စာရှုသူများထံမှမေးခွန်းလွှာ

ခရစ်ယာန်တစ်ဦးသည် ဂျူရီလူကြီးတာဝန်ထမ်းဆောင်ရန် တောင်းဆိုခံရသည့်အခါ မည်သို့ပြုသင့်သနည်း။

အချို့နိုင်ငံများ၌ နိုင်ငံသားထဲမှ ရွေးချယ်ထားသော ဂျူရီလူကြီးများကို တရားရေးရာစနစ်တွင် အသုံးပြုကြသည်။ ယင်းကို အနှံ့အပြားကျင့်သုံးသည့်ဒေသတွင် ခရစ်ယာန်တစ်ဦးသည် ဂျူရီလူကြီးတာဝန်ထမ်းဆောင်ရန် ညွှန်ကြားခံရသည့်အခါ မည်သို့အကြောင်းပြန်ရမည်ကို ဆုံးဖြတ်ရပေမည်။ ဗာဗုလုန်အစိုးရ၏ဆင့်ခေါ်ချက်အရ ရှာဒရက်၊ မေရှက်၊ အဗေဒနေဂေါတို့သည် ဒုရလွင်ပြင်သို့သွားရောက်ခဲ့ကြသည်ကတစ်ကြောင်း၊ ယောသပ်နှင့် မာရိတို့သည် ရောမအာဏာပိုင်များ၏ ညွှန်ကြားချက်အတိုင်း ဗက်လင်မြို့သို့သွားခဲ့သည်ကတစ်ကြောင်းတို့ကြောင့် ခရစ်ယာန်အများသည် ကျမ်းစာမူများက ယင်းသို့ဆောင်ရွက်သည်ကို တားမြစ်ထားခြင်းမရှိဟု ကိုယ်ကိုကိုယ်သိသောစိတ်သန့်သန့်ဖြင့် ဆုံးဖြတ်ခဲ့ကြသည်။ (ဒံယေလ ၃:၁-၁၂; လုကာ ၂:၁-၄) သို့သော်ငြားလည်း စိတ်ရိုးမှန်သောခရစ်ယာန်များ ထည့်သွင်းစဉ်းစားနိုင်သည့် အခြေခံအကြောင်းများရှိပါသည်။

နိုင်ငံတိုင်း၌ ဂျူရီလူကြီးများကို အသုံးပြုခြင်းမရှိပါ။ အချို့နိုင်ငံများတွင် တရားမမှုနှင့် ရာဇဝတ်မှုများကို ပညာသည်တရားသူကြီးတစ်ဦး သို့မဟုတ် တရားသူကြီးအဖွဲ့တစ်ဖွဲ့က အဆုံးအဖြတ်ပေးသည်။ အချို့ဒေသများ၌မူ ရိုးရာဥပဒေအဖြစ်သိထားကြသည့် ဥပဒေကို လိုက်နာကျင့်သုံးကြ၍ ဂျူရီလူကြီးများသည် တရားစီရင်ပိုင်ခွင့်ရှိသူများတွင် ပါဝင်သည်။ သို့သော်လည်း လူအများစုမှာ ဂျူရီလူကြီးများကို မည်သို့မည်ပုံရွေးချယ်သည်၊ သူတို့မည်သည့်အမှုဆောင်ရွက်ကြသည်ကို ရိပ်ဖမ်းသံဖမ်းမျှသာသိကြသည်။ ထို့ကြောင့် ဂျူရီလူကြီးတာဝန်ကို ထမ်းဆောင်ရသည်ဖြစ်စေ၊ မထမ်းဆောင်ရသည်ဖြစ်စေ ယင်းနှင့်ပတ်သက်၍ အကြမ်းဖျင်းသိထားလျှင် အထောက်အကူဖြစ်မည်။

ဘုရားသခင်၏လူမျိုးတော်သည် ယေဟောဝါအား တရားသူကြီးချုပ်အဖြစ် အသိအမှတ်ပြုကြသည်။ (ဟေရှာယ ၃၃:၂၂) ရှေးခေတ်ဣသရေလနိုင်ငံတွင် အငြင်းပွားမှုများကို ဖြေရှင်းရန်နှင့် ဥပဒေကြောင်းဆိုင်ရာပြဿနာများကို ဆုံးဖြတ်ရန် ဖြောင့်မတ်၍တရားမျှတသော အတွေ့အကြုံရှိသူတို့က တရားသူကြီးများအဖြစ် ဆောင်ရွက်ကြသည်။ (ထွက်မြောက်ရာ ၁၈:၁၃-၂၂; ဝတ်ပြုရာ ၁၉:၁၅; တရားဟောရာ ၂၁:၁၈-၂၁) ယေရှုမြေကြီးပေါ်ရှိစဉ်က တရားရေးရာလုပ်ငန်းများကို ဂျူးတရားလွှတ်တော်ဖြစ်သည့် ဆဲန်ဟီဒရင်မှကိုင်တွယ်ဖြေရှင်းသည်။ (မာကု ၁၅:၁; တမန်တော် ၅:၂၇-၃၄) တရားမမှုစီရင်သော ဂျူရီလူကြီးအဖွဲ့တွင် သာမန်ဂျူးလူမျိုးတစ်ဦးပါဝင်ရန် ပြဋ္ဌာန်းချက်မရှိချေ။

အခြားနိုင်ငံများသည် နိုင်ငံသားများနှင့်ဖွဲ့စည်းထားသည့် ဂျူရီလူကြီးများကို အသုံးပြုကြသည်။ ဆိုကရေးတီးကို တရားစီရင်ရာတွင် ဂျူရီလူကြီးအဖွဲ့ဝင် ၅၀၁ ဦးပါဝင်သည်။ ရောမသမ္မတနိုင်ငံ၌လည်း ဂျူရီလူကြီးများဖြင့် အမှုစစ်ဆေးသည့်စနစ် တည်ရှိခဲ့သော်လည်း ဧကရာဇ်မင်းများအုပ်စိုးမှုလက်အောက်တွင် ပယ်ဖျက်ခြင်းခံခဲ့ရသည်။ နောက်ပိုင်းတွင် အင်္ဂလန်နိုင်ငံ၏ တတိယမြောက်ဟင်နရီဘုရင်က တရားခံများကို သူ၏အိမ်နီးနားချင်းများက တရားစီရင်ရန်ပြဋ္ဌာန်းလိုက်သည်။ တရားခံသည် ယှဉ်ပြိုင်တိုက်ခိုက်မှု သို့မဟုတ် အချို့သောခံနိုင်ရည်စမ်းသပ်ပွဲကို ကျော်လွှားခြင်းဖြင့် မိမိ၌အပြစ်မရှိကြောင်းသက်သေထူသည့် စီရင်ထုံးများနှင့်စာလျှင် တရားခံများကိုသိရှိသူတို့၏ တရားစီရင်မှုသည် ပို၍တရားမျှတသည်ဟု ထင်မှတ်၍ဖြစ်သည်။ အချိန်ကုန်လွန်လာသည်နှင့်အမျှ ဂျူရီစနစ်သည် အမှုတစ်ခုကို နိုင်ငံသားတစ်စုကကြားနာပြီး သက်သေအထောက်အထားပေါ်မူတည်၍ အဆုံးအဖြတ်ပေးသည့်အစီအစဉ်သို့ ပြောင်းလဲလာသည်။ ပညာသည်တရားသူကြီးတစ်ဦးက အထောက်အထားဆိုင်ရာ အချက်များနှင့်ပတ်သက်၍ လမ်းညွှန်ပေးသည်။

ဂျူရီပုံစံအမျိုးမျိုးကွဲပြားသကဲ့သို့၊ ပါဝင်သောဂျူရီလူကြီးအရေအတွက်နှင့် ဆုံးဖြတ်ချက်ချနိုင်ဖို့ ပါဝင်သည့်အချက်များလည်း ကွဲပြားကြသည်။ ဥပမာအနေနှင့် အမေရိကန်ပြည်ထောင်စုတွင် လူတစ်ဦးအပြစ်ရှိမရှိမဆုံးဖြတ်ဘဲ ရာဇဝတ်ပြစ်မှုအတွက်စွဲချက်တင်ရန် လုံလောက်သော သက်သေအထောက်အထားရှိမရှိကို အဖွဲ့ဝင်ဦးရေ ၁၂ ဦးမှ ၂၃ ဦးအထိပါဝင်သည့် ဂျူရီလူကြီးများအဖွဲ့က ဆုံးဖြတ်ပေးသည်။ အလားတူစွာ သေမှုသေခင်းဆိုင်ရာ စုံစမ်းစစ်ဆေးရာတွင် ပြစ်မှုတစ်ခုကျူးလွန်ခြင်းရှိမရှိ ဆုံးဖြတ်ရန် အထောက်အထားများကို ဂျူရီလူကြီးအဖွဲ့ဝင်များက စဉ်းစားချင့်ချိန်ကြသည်။

ဂျူရီဟုဆိုသည်နှင့် လူအများစုက—တရားမမှုဆိုင်ရာအငြင်းပွားမှုဖြစ်စေ၊ ရာဇဝတ်ပြစ်မှုဖြစ်စေ—အပြစ်ရှိမရှိဆုံးဖြတ်ရန် သက်သေထွက်ချက်ကိုကြားနာသည့် နိုင်ငံသား ၁၂ ဦးပါဝင်သော အကဲဖြတ်အဖွဲ့ဟု ထင်မှတ်ကြသည်။ ဤဂျူရီသည် ဂျူရီလူကြီးများအဖွဲ့ နှင့်မတူဘဲ ဂျူရီလူကြီးအဖွဲ့ငယ်တစ်ဖွဲ့ ဖြစ်သည်။ အများအားဖြင့် မဲဆန္ဒရှင်များ၊ လိုင်စင်ရယာဉ်မောင်းများ အစရှိသည်တို့ထဲမှ ရွေးချယ်ခံရသူများအား ဂျူရီလူကြီးအဖြစ်တာဝန်ထမ်းဆောင်ဖို့ ရုံးတော်သို့လာရောက်ရန် အကြောင်းကြားစာပေးပို့သည်။ ပြစ်မှုကျူးလွန်သူနှင့် စိတ်ချွတ်ယွင်းသူကဲ့သို့သော သူအချို့သည် အလိုအလျောက်အပယ်ခံရပေမည်။ ဒေသန္တရဥပဒေပေါ်မူတည်၍—ဆရာဝန်၊ ဓမ္မဆရာ၊ ရှေ့နေ သို့မဟုတ် အသေးစားစီးပွားရေးလုပ်ငန်းပိုင်ရှင်ကဲ့သို့သော—အခြားသူများမူ ကင်းလွတ်ခွင့်တောင်းဆိုနိုင်သည်။ (အချို့သူတို့မှာ ခိုင်မာသည့် ကိုယ်ပိုင်ခံယူချက်ကြောင့် ဂျူရီလူကြီးအဖြစ်ထမ်းဆောင်ရန် ငြင်းဆိုသူများဖြစ်ကြသဖြင့်ကင်းလွတ်ခွင့်ရရှိပေမည်။) သို့သော်လည်း နိုင်ငံသားအားလုံး ဂျူရီတာဝန်ထမ်းဆောင်စေရေးအတွက် အာဏာပိုင်များသည် ကင်းလွတ်ခွင့်များကို တိုး၍ပယ်ဖျက်လာသည်၊ နှစ်များစွာအတွင်း ထပ်ခါထပ်ခါပယ်ဖျက်တတ်သည်။

ဂျူရီတာဝန်အတွက် သတင်းပို့သူအားလုံး အမှုစစ်ဆေးရာတွင် ပါဝင်ဖို့မလိုပေ။ ဂျူရီတာဝန်ထမ်းဆောင်ရန် ဆင့်ခေါ်ခံရသည့်လူတစ်စုမှ အချို့သူများသည် အမှုတစ်စုံတစ်ခုအတွက် အလားအလာရှိသောဂျူရီလူကြီးအဖြစ် အလှည့်သင့်သလိုရွေးချယ်ခံရသည်။ ထို့နောက် တရားသူကြီးက နှစ်ဖက်အမှုသည်များနှင့် သူတို့၏အကျိုးဆောင်ရှေ့နေများမည်သူဖြစ်ကြောင်း ထုတ်ဖော်ကြေညာပြီး အမှုအသွားအလာကို ဖော်ပြပေးသည်။ တရားသူကြီးနှင့် ရှေ့နေများက အလားအလာရှိသော ဂျူရီလူကြီးတစ်ဦးချင်းကို စစ်ဆေးကြသည်။ လူတစ်ဦးသည် အမှု၏သဘောသဘာဝကြောင့် ယုံကြည်မှုအကြောင်းပြချက်အရ မဆောင်ရွက်နိုင်ပါက ၎င်းအချိန်၌ထုတ်ဖော်ပြောဆိုရသည်။

ထိုအမှုစစ်ဆေးစဉ်တစ်လျှောက် အမှန်ပါဝင်မည့်အရေအတွက်အထိ အဖွဲ့ဝင်ဦးရေကို လျှော့ချဖို့လိုသည်။ အမှုတွင်ငဲ့ကွက်စရာရှိနိုင်သောကြောင့် ဘက်လိုက်သည်ဟု သံသယဖြစ်သူ မည်သူ့ကိုမဆို တရားသူကြီးက ထုတ်ပယ်လိမ့်မည်။ နှစ်ဖက်စလုံးမှ အကျိုးဆောင်ရှေ့နေများကလည်း ဂျူရီလူကြီးအချို့ကိုထုတ်ပယ်ရန် ကိုယ်ပိုင်အခွင့်အာဏာရှိကြသည်။ ၎င်းဂျူရီအဖွဲ့မှ ထုတ်ပယ်ခံရသူမည်သူမဆိုသည် အခြားအမှုများအတွက် အလှည့်သင့်သလိုရွေးချယ်ခံရန် ဂျူရီအဖွဲ့၌ပြန်၍ စောင့်ဆိုင်းရသည်။ အချို့ခရစ်ယာန်များသည် ၎င်းအချိန်ကို အလွတ်သဘောသက်သေခံခြင်းအတွက် အသုံးပြုကြသည်။ ရက်အတော်ကြာပြီးသည့်နောက် လူတစ်ဦးသည် ဂျူရီလူကြီးတစ်ဦးအဖြစ် အမှန်ပါဝင်သည်ဖြစ်စေ၊ မပါဝင်သည်ဖြစ်စေ သူ၏ဂျူရီတာဝန်ပြီးဆုံးသွားသည်။

ခရစ်ယာန်များသည် ‘သူတစ်ပါးအမှု၌ ရောနှော’ ခြင်းကိုရှောင်ကြပြီး ‘ကိုယ့်အမှုကိုသာ’ ကြိုးစားဆောင်ရွက်ကြသည်။ (၁ သက်သာလောနိတ် ၄:၁၁; ၁ ပေတရု ၄:၁၅) ဂျူးတစ်ဦးက အမွေကိစ္စစီရင်ပေးရန် ယေရှုအားတောင်းလျှောက်သည့်အခါ ကိုယ်တော်က– “အချင်းလူ၊ အဘယ်သူသည် သင်တို့အမှုကိုစီရင်ခွဲဝေပိုင်သော အခွင့်ကိုငါ့အားအပ်ပေးသနည်း” ဟုပြန်၍မိန့်တော်မူ၏။ (လုကာ ၁၂:၁၃၊ ၁၄) ယေရှုသည် တရားရေးကိစ္စရပ်များကိုဆုံးဖြတ်ပေးရန်မဟုတ်ဘဲ ဘုရားသခင့်နိုင်ငံတော်သတင်းကောင်းကို ကြေညာရန်ကြွလာတော်မူသည်။ (လုကာ ၄:၁၈၊ ၄၃) ယေရှု၏ဖြေကြားပုံက အငြင်းပွားမှုများကိုဖြေရှင်းရန် ဘုရားသခင့်ပညတ်တရား၌ဖော်ပြထားသည့် နည်းလမ်းကိုအသုံးပြုဖို့ ထိုသူအားလှုံ့ဆော်ပေးပေမည်။ (တရားဟောရာ ၁:၁၆၊ ၁၇) အထက်ပါအချက်များသည် ခိုင်လုံသော်လည်း ဂျူရီတာဝန်အတွက်သတင်းပို့ရန် ညွှန်ကြားချက်ကို ပြန်ကြားခြင်းသည် အခြားသူများ၏အမှုကိစ္စ၌ ဝင်ရောက်စွက်ဖက်ခြင်းနှင့် ကွာခြားပါသည်။ ယင်းသည် ဒံယေလ၏အဖော်သုံးယောက် အဖြစ်နှင့်ဆင်တူသည်။ ဗာဗုလုန်အစိုးရက ဒုရလွင်ပြင်သို့လာရောက်ရန် အမိန့်ပေးသည်ကို သူတို့လိုက်နာခြင်းသည် ဘုရားသခင့်ပညတ်ကို ဖောက်ဖျက်ရာမရောက်ပေ။ သမ္မာကျမ်းစာဖော်ပြသည့်အရဆိုလျှင် ထိုနောက်ပိုင်းသူတို့ပြုမူသည့်အရာသည် အခြားကိစ္စတစ်ခုဖြစ်သည်။—ဒံယေလ ၃:၁၆-၁၈။

ဘုရားသခင့်ကျေးကျွန်များသည် မောရှေပညတ်အောက်၌ မရှိတော့သည့်နောက်ပိုင်း နိုင်ငံများစွာ၌ လောကီတရားရုံးများတွင် ပြဿနာများကို ရင်ဆိုင်ဖြေရှင်းရကြသည်။ သဘောကွဲလွဲမှုများကို အသင်းတော်အတွင်း၌သာဖြေရှင်းကြရန် ကောရိန္သုမြို့ရှိ “သန့်ရှင်းသူတို့” အားတမန်တော်ပေါလုက တိုက်တွန်းခဲ့သည်။ လောကီတရားရုံးများ၏ တရားစီရင်ရေးအဖွဲ့ကို “မဖြောင့်မတ်သောလူတို့” ဟုပေါလုဖော်ပြနေသော်လည်း လောကီရေးရာကိစ္စများကိုကိုင်တွယ်ရန် ယင်း၌ တာဝန်ရှိသည်ကိုမူ သူမငြင်းဆိုခဲ့ပါ။ (၁ ကောရိန္သု ၆:၁၊ ကဘ) သူသည် ရောမတရားခွင်၌ ထုချေသည်သာမက ကဲသာဘုရင်ထံပင် အယူခံဝင်ခဲ့သည်။ လောကီတရားရုံးများသည် အခြေခံအားဖြင့်မှားသည်ဟု ဆိုရာမရောက်ပါ။—တမန်တော် ၂၄:၁၀; ၂၅:၁၀၊ ၁၁။

လောကီတရားရုံးများသည် “အထက်အာဏာပိုင်များ” ၏လုပ်ငန်းတစ်ခုဖြစ်သည်။ ၎င်းတို့သည် ‘ဘုရားသခင်ချထားတော်မူသည့် နှိုင်းရနေရာများ၌ တည်ရှိကြ’ ပြီး ဥပဒေများကိုရေးဆွဲ၍ အတည်ပြုကြသည်။ ပေါလုဤသို့ရေးသားခဲ့သည်– “မင်းသည်ကား၊ သင်၏အကျိုးအလို့ငှာ ဘုရားသခင်၏အစေခံဖြစ်၏။ မကောင်းသောအကျင့်ကိုကျင့်လျှင်၊ ကြောက်ခြင်းရှိစေလော့။ အကြောင်းမူကား၊ မင်းသည် အချည်းနည်းဓားကိုဆောင်သည်မဟုတ်။ မကောင်းသောအကျင့်ကိုကျင့်သောသူတို့ကို အပြစ်တရားစီရင်၍ ရာဇဝတ်ပေးပိုင်သောသူတည်းဟူသော ဘုရားသခင်၏အစေခံဖြစ်သတည်း။” ခရစ်ယာန်များသည် ‘မင်းအာဏာကိုဆန့်ကျင်ခြင်းဖြင့်’ တရားစီရင်မခံလိုကြသည့်အတွက် အာဏာပိုင်များ တရားရေးရာလုပ်ငန်းများ ဆောင်ရွက်သည်ကို ‘ဆန့်ကျင်ခြင်း’ မပြုကြချေ။—ရောမ ၁၃:၁၊ ကဘ၊ ၂-၄; တိတု ၃:၁။

မျှတသောအမြင်များဖြင့် ခရစ်ယာန်များသည် ကဲသာ၏တောင်းဆိုမှုအချို့ကို မိမိတို့လိုက်လျောနိုင်မနိုင် ဆင်ခြင်စဉ်းစားသင့်သည်။ ပေါလုက ဤသို့သြဝါဒပေးခဲ့သည်– “ထိုကြောင့်၊ လူအသီးသီး [အထက်အာဏာပိုင်များ] ခံထိုက်သည်အတိုင်း ပေးကြလော့။ အခွန်ကိုခံထိုက်သောသူအား အခွန်ကိုလည်းကောင်း၊ အကောက်ကိုခံထိုက်သောသူအား အကောက်ကိုလည်းကောင်း ပေးကြလော့။ ကြောက်ထိုက်သောသူကို ကြောက်ကြလော့။ ရိုသေထိုက်သောသူကို ရိုသေကြလော့။” (ရောမ ၁၃:၇) ယင်းသည် ငွေကြေးအခွန်အတုတ်နှင့်ပတ်သက်၍ တဲ့တိုးဖော်ပြခြင်းဖြစ်သည်။ (မဿဲ ၂၂:၁၇-၂၁) အကယ်၍ကဲသာက လမ်းသန့်ရှင်းရေး သို့မဟုတ် ကဲသာ၏လုပ်ငန်းများတွင် ပါဝင်သောအခြားလုပ်ငန်းများကို လုပ်ဆောင်ရေးအတွက် နိုင်ငံသားများ၏အချိန်နှင့် လုပ်အားကိုတောင်းဆိုလာခဲ့သော် လိုက်လျောသင့်မသင့် ခရစ်ယာန်တစ်ဦးချင်းအနေနှင့် ဆုံးဖြတ်ချက်ချရမည်။—မဿဲ ၅:၄၁။

အချို့ခရစ်ယာန်များက ဂျူရီလုပ်ငန်းကို ကဲသာနှင့်ဆိုင်သည့်အရာကို ကဲသာအားပေးခြင်းအဖြစ် ရှုမြင်ကြသည်။ (လုကာ ၂၀:၂၅) ဂျူရီလူကြီး၏အလုပ်တာဝန်မှာ သက်သေအထောက်အထားများကို ကြားနာပြီး အကြောင်းခြင်းရာ သို့မဟုတ် ဥပဒေရေးရာ အချက်အလက်များနှင့်စပ်လျဉ်း၍ ရိုးသားဖြောင့်မတ်သော သဘောထားထင်မြင်ချက်ကို ပေးရန်ဖြစ်သည်။ ဥပမာအနေနှင့် ဂျူရီလူကြီးများအဖွဲ့တွင် အဖွဲ့ဝင်များသည် တစ်စုံတစ်ဦးကို အပြစ်ရှိမရှိမဆုံးဖြတ်ဘဲ သက်သေအထောက်အထားအရ ရုံးတင်စစ်ဆေးရန်သင့်မသင့် ဆုံးဖြတ်ကြသည်။ သာမန်အမှုစစ်ဆေးခြင်းကော အသို့နည်း။ တရားမမှုတွင် ဂျူရီလူကြီးက နစ်နာကြေး သို့မဟုတ် လျော်ကြေးသတ်မှတ်ပေးမည်။ ရာဇဝတ်မှုတစ်ခုတွင် အပြစ်ရှိသည်ဟူသောအဆုံးအဖြတ်ကို သက်သေထွက်ချက်ကထောက်ခံခြင်းရှိမရှိ သူတို့ဆုံးဖြတ်ရကြသည်။ တစ်ခါတစ်ရံ ဥပဒေတွင်ပြဋ္ဌာန်းထားသော မည်သည့်ပြစ်ဒဏ်စီရင်ချက်ကို ကျင့်သုံးသင့်ကြောင်း အကြံပြုကြသည်။ ထို့နောက် အစိုးရသည် “မကောင်းသောအကျင့်ကို ကျင့်သောသူတို့ကိုအပြစ်တရားစီရင်” ရန်၊ သို့မဟုတ် “လူဆိုးတို့ကိုဒဏ်စီရင်” ရန်အာဏာစက်ကို အသုံးပြုကြသည်။—၁ ပေတရု ၂:၁၄။

ခရစ်ယာန်တစ်ဦးသည် တစ်စုံတစ်ခုသောဂျူရီတာဝန်ကို ဆောင်ရွက်ဖို့မိမိကိုယ်ကိုကိုယ်သိသောစိတ်က ခွင့်မပြုဟုထင်မှတ်လျှင်ကော အသို့နည်း။ သမ္မာကျမ်းစာ၌ ဂျူရီတာဝန်နှင့်ပတ်သက်၍ ဖော်ပြမထားသည့်အတွက် ‘ဘယ်ဂျူရီတာဝန်ကိုမဆို ကျွန်တော့်ဘာသာက ခွင့်မပြုဘူး’ ဟူ၍မဆိုနိုင်ပါ။ အမှုပေါ်မူတည်၍ တစ်စုံတစ်ခုသောအမှုအတွက် ဂျူရီတာဝန်ထမ်းဆောင်ရန် မိမိ၏ကိုယ်ကိုကိုယ်သိသောစိတ်ကခွင့်မပြုကြောင်း ဖော်ပြနိုင်သည်။ အမှုတစ်ခုတွင် လိင်စာရိတ္တယိုယွင်းခြင်း၊ ကလေးဖျက်ချခြင်း၊ လူသေမှု သို့မဟုတ် လောကီဥပဒေသက်သက်ဖြင့်မဟုတ်ဘဲ သမ္မာကျမ်းစာအသိပညာဖြင့် မိမိအတွေးအခေါ်ပုံသွင်းခံရသည့် အခြားအကြောင်းကိစ္စပါဝင်နေလျှင် ထိုသို့ဖြစ်တတ်ပါသည်။ တကယ်ဆိုလျှင် သူစစ်ဆေးဖို့ရွေးချယ်ခံရသည့်အမှုတွင် ထိုသို့သောအကြောင်းကိစ္စများ မပါဝင်သည်မှာသေချာပါသည်။

ရင့်ကျက်သောခရစ်ယာန်တစ်ဦးသည် တရားသူကြီးချမှတ်သည့် ပြစ်ဒဏ်အတွက် မိမိပါတာဝန်တစ်စုံတစ်ရာရှိမရှိဆိုသည်ကိုလည်း အလေးအနက်သုံးသပ်မည်။ (ကမ္ဘာဦး ၃၉:၁၇-၂၀; ၁ တိမောသေ ၅:၂၂ နှိုင်းယှဉ်။) အပြစ်ရှိသည်ဟူသော ဆုံးဖြတ်ချက်တစ်ခုသည် မှားယွင်းပြီး သေဒဏ်စီရင်မိပါက ဂျူရီလူကြီး၌ပါဝင်သော ခရစ်ယာန်တစ်ဦးသည် လူသတ်မှုအတွက်တာဝန်မကင်းဖြစ်မည်လော။ (ထွက်မြောက်ရာ ၂၂:၂; တရားဟောရာ ၂၁:၈; ၂၂:၈; ယေရမိ ၂:၃၄; မဿဲ ၂၃:၃၅; တမန်တော် ၁၈:၆) ယေရှုကိုစစ်ဆေးစဉ်က ပိလတ်မင်းသည် ‘ဤဖြောင့်မတ်သောသူ၏အသွေးနှင့် ကင်းရှင်း’ လိုခဲ့သည်။ ဂျူးများက “သူ၏အသွေးသည် ငါတို့၏ခေါင်းပေါ်၌လည်းကောင်း၊ သားမြေးတို့၏ခေါင်းပေါ်၌လည်းကောင်း တည်ရှိပါစေ” ဟူ၍ မဆိုင်းမတွဆိုခဲ့ကြသည်။—မဿဲ ၂၇:၂၄၊ ၂၅။

အစိုးရညွှန်ကြားချက်အရ ဂျူရီတာဝန်ထမ်းဆောင်ရန် သတင်းပို့ထားသော ခရစ်ယာန်တစ်ဦးသည် တရားသူကြီးတိုက်တွန်းနေသည့်ကြားမှ ကိုယ်ကိုကိုယ်သိသောစိတ်ကြောင့် တစ်စုံတစ်ခုသောအမှုကို ပါဝင်ကိုင်တွယ်ရန် ငြင်းဆိုမည်ဆိုပါက ခံရမည့်အကျိုးဆက်—ငွေဒဏ် သို့မဟုတ် ထောင်ဒဏ်—ကိုရင်ဆိုင်ရန် အသင့်ပြင်ထားသင့်ပေသည်။—၁ ပေတရု ၂:၁၉။

အဆုံးသတ်ဆန်းစစ်လေ့လာကြည့်လျှင် ဂျူရီတာဝန်နှင့်ရင်ဆိုင်ရသော ခရစ်ယာန်တစ်ဦးစီသည် သမ္မာကျမ်းစာသိမြင်နားလည်ပုံနှင့် ကိုယ်ကိုကိုယ်သိသောစိတ်ပေါ်မူတည်၍ မည်သည့်လမ်းလိုက်ရမည်ကို ဆုံးဖြတ်ချက်ချရမည်။ အချို့ခရစ်ယာန်များသည် ဂျူရီတာဝန်ထမ်းဆောင်ရန်အကြောင်းပြန်လိုက်ကြပြီး ဂျူရီလူကြီးအဖွဲ့တစ်ခုခုတွင် တာဝန်ထမ်းဆောင်ကြလေသည်။ အခြားသူတို့မူ အပြစ်ဒဏ်ရင်ဆိုင်ရစေကာမူ အကျောက်အကန် ငြင်းဆန်လိုစိတ်ရှိကြသည်။ ခရစ်ယာန်တစ်ဦးစီသည် မိမိပြုလုပ်မည့်အရာကို မိမိကိုယ်တိုင်ဆုံးဖြတ်ရမည်ဖြစ်သည်။ အခြားသူများကသူ့ဆုံးဖြတ်ချက်ကို မဝေဖန်သင့်ပါ။—ဂလာတိ ၆:၅။