ယေဟောဝါသည် ကျွန်ုပ်တို့၏ နေ့စဉ်လိုအပ်ရာများကို ထောက်ပံ့ပေး

“သောကမွှေနှောက်ခြင်းလည်းမရှိကြနှင့်။ ... ထိုအရာများကို သင်တို့သည် အသုံးလိုကြောင်းကို သင်တို့အဘသိတော်မူ၏။”—လုကာ ၁၂:၂၉၊ ၃၀။

၁။ ယေဟောဝါသည် အဟိတ်တိရစ္ဆာန်များကို မည်သို့ထောက်ပံ့ပေးတော်မူသနည်း။

စာကလေး သို့မဟုတ် အခြားကျေးငှက်တစ်ကောင်ကောင်သည် အမှိုက်သရိုက်ထဲတွင် ထိုးဆိတ်အစာရှာနေသည်ကို သင်စောင့်ကြည့်ဖူးပါသလော။ ဤနေရာမျိုးတွင် ထိုးဆိတ်ရှာဖွေရာ အဘယ်စားစရာတွေ့မည်နည်းဟု သင်တွေးမိပေမည်။ ယေရှု၏ တောင်ပေါ်တရားတော်တွင် ကျေးငှက်များကို ယေဟောဝါ ထောက်ပံ့ပေးပုံမှ သင်ခန်းစာတစ်ခု ထုတ်ယူနိုင်ကြောင်း ကိုယ်တော်ပြသခဲ့သည်။ “မိုးကောင်းကင်၌ကျင်လည်သောငှက်များကို ကြည့်ရှုဆင်ခြင်ကြလော့။ ထိုငှက်တို့သည် မျိုးစေ့ကိုမစိုက်မကြဲ၊ စပါးကိုမရိတ်၊ ကျီ၌မစုမသွင်း။ သို့သော်လည်း ကောင်းကင်ဘုံ၌ရှိတော်မူသော သင်တို့အဘသည် သူတို့ကိုကျွေးမွေးတော်မူ၏။ ထိုငှက်တို့ထက် သင်တို့သည် အလွန်မြတ်သည်မဟုတ်လော” ဟုကိုယ်တော်မိန့်ဆိုသည်။ (မဿဲ ၆:၂၆) ယေဟောဝါသည် သတ္တဝါအပေါင်းကို အံ့ဖွယ်နည်းများဖြင့် အစာရေစာ ထောက်ပံ့ပေးတော်မူသည်။—ဆာလံ ၁၀၄:၁၄၊ ၂၁; ၁၄၇:၉။

၂၊ ၃။ အသက်မွေးလောက်သောအစာကို ယနေ့ပေးသနားပါဟု ဆုတောင်းရန် ယေရှုသင်ပေးခဲ့သည့်အချက်မှ အဘယ်ဝိညာဉ်ရေးသင်ခန်းစာများ ထုတ်ယူနိုင်သနည်း။

^၂ သို့ဆိုလျှင် ယေရှုသည် မိမိ၏စံပြဆုတောင်းနည်းတွင် “အသက်မွေးလောက်သောအစာကို အကျွန်ုပ်တို့အား ယနေ့ ပေးသနားတော်မူပါ” ဟူသော တောင်းလျှောက်ချက်ကို အဘယ်ကြောင့်ထည့်သွင်းထားသနည်း။ (မဿဲ ၆:၁၁) ဤရိုးရှင်းသော တောင်းလျှောက်ချက်မှ နက်နဲသော ဝိညာဉ်ရေး သင်ခန်းစာများ ထုတ်ယူနိုင်ပါသည်။ ဦးဆုံး၊ ယေဟောဝါသည် မဟာထောက်ပံ့ပေးရှင်ဖြစ်ကြောင်း ကျွန်ုပ်တို့အား သတိရစေသည်။ (ဆာလံ ၁၄၅:၁၅၊ ၁၆) လူသားတို့သည် ထွန်ယက်စိုက်ပျိုးတတ်ကြသော်လည်း ဘုရားသခင်တစ်ပါးတည်းသာ ဝိညာဉ်ရေးအရကော ရုပ်ပိုင်းအရပါ ကြီးထွားစေနိုင်သည်။ (၁ ကောရိန္သု ၃:၇) ကျွန်ုပ်တို့စားသောက်ရသမျှတို့သည် ဘုရားသခင်ထံတော်မှ ဆုကျေးဇူးဖြစ်သည်။ (တမန်တော် ၁၄:၁၇) ကျွန်ုပ်တို့၏နေ့စဉ်လိုအပ်ရာများကို ထောက်မပေးပါရန် တောင်းခံခြင်းအားဖြင့် အထက်ပါထောက်ပံ့ပေးမှုများကို လွယ်လွယ်နှင့်ရ၍ အလေးမထားဘဲမနေကြောင်း ကိုယ်တော်အား တင်ပြနေခြင်းဖြစ်သည်။ ဤသို့တောင်းလျှောက်လိုက်ခြင်းဖြင့် မိမိလုပ်ကိုင်နိုင်လျှင် လုပ်ရမည့်တာဝန်မှ ကင်းလွတ်သွားသည် မဟုတ်။—ဧဖက် ၄:၂၈; ၂ သက်သာလောနိတ် ၃:၁၀။

^၃ ဒုတိယမှာ၊ ‘အသက်မွေးလောက်သောအစာကို ယနေ့ ပေးသနားတော်မူပါ’ ဟုကျွန်ုပ်တို့တောင်းခံခြင်းက အနာဂတ်ရေးအတွက် ကျွန်ုပ်တို့အစိုးရိမ်လွန်မနေသင့်ကြောင်း ပြသည်။ ယေရှု ထပ်၍မိန့်မှာသည်မှာ “အဘယ်သို့စားသောက်ရအံ့နည်း၊ အဘယ်သို့ဝတ်ရအံ့နည်းဟူ၍ မစိုးရိမ်ကြနှင့်။ ထိုအရာများကို ... လူတို့သည် ရှာဖွေတတ်ကြ၏။ ထိုအရာများကို သင်တို့သည် အသုံးလိုကြောင်းကို ကောင်းကင်ဘုံ၌ရှိတော်မူသော သင်တို့အဘသည် သိတော်မူ၏။ ဘုရားသခင်၏နိုင်ငံတော်နှင့် ဖြောင့်မတ်ခြင်းတရားတော်ကို ရှေ့ဦးစွာရှာကြလော့။ နောက်မှ ထိုအရာများကိုထပ်၍ ပေးတော်မူလတ္တံ့။ ထို့ကြောင့် နက်ဖြန်အဖို့ မစိုးရိမ်ကြနှင့်။ နက်ဖြန်နေ့သည် မိမိအဖို့စိုးရိမ်လိမ့်မည်။” (မဿဲ ၆:၃၁-၃၄) “အသက်မွေးလောက်သောအစာကို ... ယနေ့ ပေးသနားတော်မူပါ” ဟုဆုတောင်းခြင်းက ‘ရောင့်ရဲသောစိတ်နှင့် ဘုရားသခင်ဝတ်၌မွေ့လျော်’ ရန် ရိုးရှင်းသော ဘဝပုံစံကို ချမှတ်ပေးသည်။—၁ တိမောသေ ၆:၆-၈။

နေ့စဉ် ဝိညာဉ်အစာ

၄။ ယေရှုနှင့် ဣသရေလလူမျိုးတို့၏ အသက်တာမှ အဘယ်အဖြစ်အပျက်များက ဝိညာဉ်အစာစားဖို့ အရေးကြီးကြောင်း အလေးပေးဖော်ပြသနည်း။

^၄ အသက်မွေးလောက်သောအစာကို နေ့စဉ်ပေးသနားပါရန် ကျွန်ုပ်တို့ဆုတောင်းခြင်းက ဝိညာဉ်အစာ နေ့စဉ်လိုအပ်ကြောင်းကိုလည်း သတိပေးသည်။ ယေရှုသည် ရက်ရှည်အစာရှောင်ပြီးနောက် အလွန်ဆာလောင်နေသော်လည်း ကျောက်ခဲတို့ကို မုန့်ဖြစ်အောင်လုပ်ဖို့ စာတန်၏သွေးဆောင်မှုကို ကိုယ်တော်ငြင်းဆန်ပြီး “လူသည် မုန့်အားဖြင့်သာ အသက်ကိုမွေးရမည်မဟုတ်။ ဘုရားသခင်မိန့်တော်မူသမျှအားဖြင့် အသက်ကိုမွေးရမည် ကျမ်းစာလာသည်” ဟုမိန့်တော်မူလိုက်၏။ (မဿဲ ၄:၄) ဤတွင် ယေရှုသည် ဣသရေလလူမျိုးအား မောရှေပြောခဲ့သည့် အောက်ပါစကားကို ကိုးကားခဲ့ခြင်းဖြစ်သည်– “ထိုသို့ [ယေဟောဝါသည်] သင့်ကိုနှိမ့်ချ၍ အငတ်အမွတ်ခံစေတော်မူသောအခါ သင်သည် ကိုယ်တိုင်မသိ၊ သင်၏ဘိုးဘေးမသိဖူးသောမန္နနှင့် ကျွေးမွေးတော်မူသဖြင့် လူသည် မုန့်အားဖြင့်သာ အသက်ကိုမွေးရသည်မဟုတ်။ ဘုရားသခင်မိန့်တော်မူသမျှအားဖြင့် အသက်မွေးရသည်ကို သိစေတော်မူ၏။” (တရာဟောရာ ၈:၃) မန္နမုန့်ကို ယေဟောဝါကျွေးခဲ့ပုံသည် ဣသရေလလူများကို ကာယအစာရစေသည်သာမက ဝိညာဉ်ရေးသင်ခန်းစာများပါ ရရှိစေခဲ့သည်။ တစ်ချက်အနေနှင့် သူတို့သည် “နေ့တိုင်းထွက်၍ တစ်နေ့စားလောက်အောင် သိမ်းယူ” ကြရန်ဖြစ်သည်။ တစ်ရက်စာထက် သူတို့ပိုကောက်သည့်အခါ အကျန်သည် နံလာပြီး ပိုးတက်လေသည်။ (ထွက်မြောက်ရာ ၁၆:၄၊ ၂၀) သို့သော် ခြောက်ရက်မြောက်နေ့တွင်မူ ဥပုသ်နေ့အတွက်ပါ နှစ်ရက်စာကောက်ရသည့်အခါ ထိုသို့မဖြစ်သွားပါ။ (ထွက်မြောက်ရာ ၁၆:၅၊ ၂၃၊ ၂၄) ထို့ကြောင့် မန္နက သူတို့စိတ်ထဲတွင် စွဲမှတ်သွားစေသည်မှာ နာခံမှုရှိရမည်၊ အစားအစာအားဖြင့်သာ အသက်ကို မွေးရသည်မဟုတ်ဘဲ “ဘုရားသခင်မိန့်တော်မူသမျှအားဖြင့် အသက်ကိုမွေးရမည်” ဟူ၍ဖြစ်သည်။

၅။ ယေဟောဝါသည် နေ့စဉ် ဝိညာဉ်အစာကို မည်သို့ ထောက်ပံ့ပေးသနည်း။

^၅ ကျွန်ုပ်တို့လည်း အလားတူပင် သားတော်မှတစ်ဆင့် ယေဟောဝါထောက်ပံ့ပေးသည့် ဝိညာဉ်အစာကို နေ့စဉ်စားသုံးဖို့လိုသည်။ ဤရည်ရွယ်ချက်အတွက် ယေရှုသည် ယုံကြည်ခြင်းအိမ်သူအိမ်သားတို့အား ‘အချိန်တန် အစားအသောက်တို့ကို’ စီမံပေးရန် ‘သစ္စာနှင့်သတိပညာရှိသောကျွန်’ ကို ခန့်အပ်ထားတော်မူသည်။ (မဿဲ ၂၄:၄၅) ဤသစ္စာရှိကျေးကျွန်အတန်းအစားသည် ကျမ်းစာလေ့လာမှု အထောက်အကူပြု ပစ္စည်းများဖြင့် တစ်မျိုး၊ ကျမ်းစာကို နေ့စဉ်ဖတ်ရန် အားပေးခြင်းဖြင့် တစ်ဖုံ ဝိညာဉ်အစာ အလျှံပယ်ထောက်ပံ့ပေးနေသည်။ (ယောရှု ၁:၈; ဆာလံ ၁:၁-၃) ယေဟောဝါ၏ အလိုတော်ကို နေ့စဉ် ကြိုးစားလေ့လာ ထမ်းဆောင်ခြင်းအားဖြင့် ကျွန်ုပ်တို့လည်း ယေရှုကဲ့သို့ပင် ဝိညာဉ်ရေးအထောက်အမ ရရှိနိုင်ကြသည်။—ယောဟန် ၄:၃၄။

အပြစ်များကို ဖြေလွှတ်ခြင်း

၆။ အဘယ်ကြွေးမြီများကို ဖြေလွှတ်ပေးဖို့ ကျွန်ုပ်တို့ တောင်းခံရမည်နည်း၊ အဘယ်အရာများအပေါ်အခြေပြု၍ ယင်းတို့ကို ယေဟောဝါပယ်ဖျက်ပေးရန် အသင့်ရှိတော်မူသနည်း။

^၆ စံပြဆုတောင်းနည်းမှ နောက်တောင်းလျှောက်ချက်တစ်ခုမှာ– “အပြစ်မြီစားတို့အပေါ်တွင် ကိုယ်တိုင် ဖြေလွှတ်ကြသကဲ့သို့ အကျွန်ုပ်တို့၏ အပြစ်မြီများကို ဖြေလွှတ်တော်မူပါ။” (မဿဲ ၆:၁၂၊ သမ) ဤတွင် ယေရှုသည် ငွေကြေး ကြွေးမြီများအကြောင်း ပြောနေခြင်းမဟုတ်ပေ။ ကိုယ်တော်၏စိတ်ထဲတွင် ကျွန်ုပ်တို့၏အပြစ်များကို ဖြေလွှတ်ခြင်းအကြောင်းသာရှိနေသည်။ ဤတောင်းလျှောက်ချက်ကို လုကာ၏ မှတ်တမ်းပါ စံပြဆုတောင်းနည်းတွင် ဤသို့ဖတ်ရသည်– “အပြစ်မြီစားတိုင်းအပေါ်တွင် ဖြေလွှတ်သော အကျွန်ုပ်တို့အပြစ်များကို ဖြေလွှတ်တော်မူပါ။” (လုကာ ၁၁:၄၊ သမ) ထို့ကြောင့် ကျွန်ုပ်တို့အပြစ်ပြုလိုက်သည့်အခါ ယေဟောဝါအပေါ် အကြွေးတင်သွားဘိသကဲ့သို့ဖြစ်သည်။ သို့သော် ကျွန်ုပ်တို့ဘက်မှ အမှန်နောင်တရ၊ “ပြောင်းလဲ” ကာ ခရစ်တော်၏ရွေးဖိုးပူဇော်ရာယဇ်ကို ယုံကြည်ခြင်းအပေါ်အခြေပြုလျက် အပြစ်ဖြေလွှတ်ဖို့တောင်းခံလျှင် မေတ္တာရှင်ဘုရားသခင်ဘက်မှ အပြစ်များကို ‘ချေပေး’ ရန် သို့မဟုတ် ပယ်ဖျက်ပေးရန် အသင့်ရှိတော်မူသည်။—တမန်တော် ၃:၂၀၊ သမ္မာ; ၁၀:၄၃; ၁ တိမောသေ ၂:၅၊ ၆။

၇။ အပြစ်ဖြေလွှတ်ပေးဖို့ အဘယ်ကြောင့် နေ့စဉ်ဆုတောင်းသင့်သနည်း။

^၇ နောက်ရှုထောင့်တစ်ခုမှကြည့်လျှင် ကျွန်ုပ်တို့သည် ယေဟောဝါ၏ဖြောင့်မတ်မှုစံနှုန်းများအတိုင်း တန်းတန်းမတ်မတ်မသွားခြင်းသည် အပြစ်ပင်ဖြစ်သည်။ ကျွန်ုပ်တို့သည် အပြစ်တရား အမွေခံထား၍လည်း အပြောအဆို၊ အပြုအမူ၊ အတွေးအခေါ်တို့ဖြင့်ဖြစ်စေ၊ မိမိတို့လုပ်ဆောင်သင့်လျက်နှင့် မလုပ်ဘဲနေခြင်းဖြင့်ဖြစ်စေ အပြစ်ကျူးလွန်တတ်ကြသည်။ (ဒေ. ၇:၂၀; ရောမ ၃:၂၃; ယာကုပ် ၃:၂; ၄:၁၇) ထို့ကြောင့် တစ်နေ့တာအတွင်း အပြစ်ပြုမိကြောင်း သိလိုက်သည်ဖြစ်စေ၊ မသိသည်ဖြစ်စေ နေ့စဉ်ဆုတောင်းချက်များတွင် ကျွန်ုပ်တို့၏အပြစ်များကို ဖြေလွှတ်ပေးဖို့ ထည့်တောင်းလျှောက်ရန် လိုသည်။—ဆာလံ ၁၉:၁၂; ၄၀:၁၂။

၈။ အပြစ်ဖြေလွှတ်ပေးရန် ဆုတောင်းခြင်းသည် ကျွန်ုပ်တို့အား အဘယ်ရာပြုစေသနည်း၊ အဘယ်အကျိုးရရှိမည်နည်း။

^၈ ခရစ်တော် သွန်းတော်မူသည့်အသွေး၏ ကယ်လွှတ်နိုင်စွမ်းကို ယုံကြည်ခြင်းပေါ် အခြေပြုလျက် အပြစ်ဖြေလွှတ်ပေးဖို့ ဆုတောင်းပြီးနောက် မိမိကိုယ်ကို ရိုးရိုးသားသားဆန်းစစ်ခြင်း၊ နောင်တယူခြင်းနှင့် ဝန်ချတောင်းပန်ခြင်းတို့ ပြုလုပ်သင့်ပေသည်။ (၁ ယောဟန် ၁:၇-၉) မိမိတို့၏ဆုတောင်းချက်သည် အရိုးခံနှင့်ဖြစ်ကြောင်း သက်သေထူရန် အပြစ်ဖြေလွှတ်ပေးဖို့ တောင်းလျှောက်ပြီးနောက် “နောင်တရခြင်းနှင့်ထိုက်တန်သောအကျင့်” ဖြင့် တင်ပြဖို့လိုသည်။ (တမန်တော် ၂၆:၂၀) ထိုအခါ ကျွန်ုပ်တို့၏အပြစ်များကို ယေဟောဝါ ဖြေလွှတ်ရန်အသင့်ရှိနေကြောင်း ယုံကြည်နိုင်လေပြီ။ (ဆာလံ ၈၆:၅; ၁၀၃:၈-၁၄) သို့နှင့် “အဘယ်သူမျှကြံ၍မမီနိုင်သော ဘုရားသခင်၏ငြိမ်သက်ခြင်း” ဖြစ်သော နှိုင်းယှဉ်ပြ၍မရနိုင်သည့် စိတ်၏ငြိမ်သက်မှုရကာ ‘ယေရှုခရစ်အားဖြင့် ကျွန်ုပ်တို့၏စိတ်နှလုံးတို့ကို စောင့်မပေးလိမ့်မည်။’ (ဖိလိပ္ပိ ၄:၇) သို့သော် ယေရှု၏ စံပြဆုတောင်းနည်းက မိမိတို့၏အပြစ်များကို ဖြေလွှတ်မှုရရန် ကျွန်ုပ်တို့ အဘယ်အရာလုပ်ဆောင်ရမည်ထက်မက သင်ပေးသည်။

အပြစ်ဖြေလွှတ်ခံရရန် ကိုယ်တိုင် အပြစ်လွှတ်တတ်ရ

၉၊ ၁၀။ (က) စံပြဆုတောင်းနည်းတွင် ယေရှု အဘယ်သို့ ဖြည့်စွက်ရှင်းလင်းပေးခဲ့သနည်း၊ အဘယ်အချက်ကို အလေးပေးထားသနည်း။ (ခ)ကျွန်ုပ်တို့သည် ခွင့်လွှတ်ရန်လိုကြောင်း နောက်ထပ် အဘယ်ပုံပမာကို ယေရှု ပြောပြခဲ့သနည်း။

^၉ စိတ်ဝင်စားဖွယ်ကောင်းသည်မှာ စံပြဆုတောင်းနည်းမှ “အပြစ်မြီစားများအပေါ်တွင် ကိုယ်တိုင်ဖြေလွှတ်ကြသကဲ့သို့ အကျွန်ုပ်တို့၏အပြစ်မြီများကို ဖြေလွှတ်တော်မူပါ” အပိုင်းကိုသာ ယေရှု ရှင်းလင်းချက်ပေးခဲ့ခြင်းဖြစ်သည်။ ဆုတောင်းနည်းကို နိဂုံးချုပ်ပြီးနောက် ကိုယ်တော်ဤသို့ ထပ်၍ဖြည့်စွက်သည်– “သင်တို့သည် သူတစ်ထူးတို့ လွန်ကျူးမှုများကို ဖြေလွှတ်ကြလျှင် ကောင်းကင်ဘုံရှင် သင်တို့အဘလည်း သင်တို့အပေါ်တွင် ဖြေလွှတ်တော်မူလိမ့်မည်။ သူတစ်ထူးတို့ ကျူးလွန်မှုများကို မဖြေလွှတ်ကြလျှင်မူကား သင်တို့ကျူးလွန်မှုများကို သင်တို့အဘ ဖြေလွှတ်တော်မူမည်မဟုတ်။” (မဿဲ ၆:၁၄၊ ၁၅၊ သမ) ဤအကြောင်းကြောင့် ယေဟောဝါထံမှ ဖြေလွှတ်မှုရရှိရန်မှာ ကျွန်ုပ်တို့ဘက်မှ သူတစ်ထူးအပေါ် လိုလိုလားလားဖြေလွှတ်ခြင်းပေါ်တွင် မူတည်နေကြောင်း ယေရှု ရှင်းလင်းစွာ ရှင်းပြတော်မူခဲ့သည်။—မာကု ၁၁:၂၅။

^၁၀ နောက်တစ်ချိန်၌ ယေရှုသည် ပုံပမာတစ်ခုပေးကာ ကျွန်ုပ်တို့အပြစ်ကို ယေဟောဝါအားဖြေလွှတ်စေလိုလျှင် ကျွန်ုပ်တို့ကိုယ်တိုင် အပြစ်လွှတ်တတ်ဖို့လိုကြောင်း ပြသတော်မူသည်။ ကျွန်တစ်ဦးတွင် တင်ရှိနေသော ကြွေးအမြောက်အမြားကို ရက်ရက်ရောရောပယ်ဖျက်ပေးသည့် မင်းကြီးတစ်ပါးပုံပမာကို ယေရှုပြောပြခဲ့သည်။ နောက်ပိုင်းတွင် မင်းကြီးသည် အဆိုပါကျွန်က မပြောပလောက်သော ကျွန်ချင်း၏အကြွေး ပယ်ဖျက်ပေးရန် တောင်းပန်လှာခြင်းကို လက်မခံ ငြင်းဆိုသည့်အတွက် သူ့ကို ပြင်းပြင်းထန်ထန်အပြစ်ပေးခဲ့သည်။ ထိုပုံပမာကို ယေရှု ဤသို့နိဂုံးချုပ်ခဲ့သည်– “သင်တို့သည်လည်း ညီအစ်ကိုအချင်းချင်းတို့ကို နှလုံးပါလျက်ခွင့်မလွှတ်လျှင်၊ ကောင်းကင်ဘုံ၌ရှိတော်မူသောငါ၏အဘသည် ထိုနည်းတူ သင်တို့ကို စီရင်တော်မူလတ္တံ့။” (မဿဲ ၁၈:၂၃-၃၅) ရှင်းနေသည့်အချက်မှာ ကျွန်ုပ်တို့တစ်ဦးချင်းစီအား ယေဟောဝါရှင် ဖြေလွှတ်ပေးခဲ့သည့် အပြစ်ကြွေးမြီပမာဏသည် ကျွန်ုပ်တို့အပေါ် သူတစ်ထူးပြုမိသည့် ကျူးလွန်မှုပမာဏထက် အဆမတန်များနေခြင်းဖြစ်သည်။ ထို့အပြင် ကျွန်ုပ်တို့ကို ယေဟောဝါရှင် နေ့စဉ်ခွင့်လွှတ်ပေးလျက်ရှိသည်။ သို့ဆိုလျှင် သူတစ်ထူးက ကျွန်ုပ်တို့အပေါ် တစ်ခါတစ်ရံ အပြစ်ပြုမိခြင်းကို အမှန်ပင် ခွင့်လွှတ်နိုင်ကြပေသည်။

၁၁။ ယေဟောဝါထံမှ ခွင့်လွှတ်မှုခံရလိုလျှင် တမန်တော်ပေါလု၏အဘယ်အကြံပေးစကားကို ကျွန်ုပ်တို့ လိုက်လျှောက်ကြမည်နည်း၊ အဘယ်ကောင်းကျိုးရှိမည်နည်း။

^၁၁ တမန်တော်ပေါလုက “အချင်းချင်းကျေးဇူးပြုခြင်း၊ သနားစုံမက်ခြင်း၊ ဘုရားသခင်သည် ခရစ်တော်ကြောင့် သင်တို့၏အပြစ်ကိုလွှတ်တော်မူသကဲ့သို့ အချင်းချင်းအပြစ်လွှတ်ခြင်းရှိကြလော့” ဟုရေးသားလိုက်သည်။ (ဧဖက် ၄:၃၂) ခရစ်ယာန်ချင်းတို့သည် အပြန်အလှန်ခွင့်လွှတ်တတ်လျှင် ပို၍ငြိမ်သက်မှုရှိသည်။ ပေါလုက ဤသို့ ထပ်၍တိုက်တွန်းသည်– “ထိုကြောင့် သင်တို့သည် ဘုရားသခင်ရွေးကောက်သောသူ၊ သန့်ရှင်းသောသူ၊ ချစ်အပ်သောသူကဲ့သို့ သနားစုံမက်ခြင်း၊ ကျေးဇူးပြုခြင်း၊ စိတ်နှိမ့်ချခြင်း၊ နူးညံ့သိမ်မွေ့ခြင်း၊ စိတ်ရှည်ခြင်းတို့ကို ယူတင်ဝတ်ဆောင်ကြလော့။ တစ်ယောက်၌တစ်ယောက် အပြစ်တင်စရာအခွင့်ရှိလျှင် အချင်းချင်းသည်းခံ၍ အပြစ်ကိုလွှတ်ကြလော့။ ခရစ်တော်သည် သင်တို့၏အပြစ်ကိုလွှတ်တော်မူသကဲ့သို့ ထိုနည်းတူပြုကြလော့။ စုံလင်ခြင်းအဖွဲ့အစည်းတည်းဟူသော ချစ်ခြင်းမေတ္တာကို ထပ်၍ယူတင်ဝတ်ဆောင်ကြလော့။” (ကောလောသဲ ၃:၁၂-၁၄) ယေရှုသင်ပြပေးခဲ့သည့် “အပြစ်မြီစားတို့အပေါ်တွင် ကိုယ်တိုင်ဖြေလွှတ်ကြသကဲ့ အကျွန်ုပ်တို့၏အပြစ်မြီများကို ဖြေလွှတ်တော်မူပါ” ဟူသည့် ဆုတောင်းချက်တွင် အထက်ပါအားလုံးပါဝင်သည်။

သွေးဆောင်ခံရချိန်တွင် အကာအကွယ်

၁၂၊ ၁၃။ (က) စံပြဆုတောင်းနည်းမှ နောက်ဆုံးမတိုင်မီ တောင်းလျှောက်ချက်၏ အဓိပ္ပာယ်မှာ အဘယ်အရာမဖြစ်နိုင်သနည်း။ (ခ) မည်သူသည်သာ သွေးဆောင်သူကြီး ဖြစ်သနည်း၊ အပြစ်သွေးဆောင်ရာသို့ မလိုက်မပါစေနှင့်ဟု ဆုတောင်းခြင်းမှာ အဘယ်အဓိပ္ပာယ်နည်း။

^၁၂ ယေရှု၏ စံပြဆုတောင်းနည်းမှ နောက်ဆုံးမတိုင်မီ တောင်းလျှောက်ချက်မှာ “အပြစ်သွေးဆောင်ရာသို့ မလိုက်မပါစေ” နှင့်ဖြစ်သည်။ (မဿဲ ၆:၁၃) ယေဟောဝါရှင်က ကျွန်ုပ်တို့အား သွေးမဆောင်ပါရန် တောင်းလျှောက်သင့်သည်ဟု ယေရှုဆိုလိုသလော။ ထိုသို့မဖြစ်နိုင်ပါ၊ အကြောင်းမှာ တပည့်ဖြစ်သူယာကုပ်က ဝိညာဉ်တော်ရ၍ ဤသို့ရေးသားခဲ့သည်– “အပြစ်သွေးဆောင်ခြင်းကိုခံရသောသူမည်သည်ကား ‘ဘုရားသခင်သည် ငါ့ကိုသွေးဆောင်တော်မူသည်’ ဟု မပြောစေနှင့်။ မကောင်းသောအရာသည် ဘုရားသခင်ကိုမသွေးဆောင်နိုင်ရာ။ ကိုယ်တော်သည်လည်း အဘယ်သူကိုမျှ အပြစ်သို့သွေးဆောင်တော်မမူ။” (ယာကုပ် ၁:၁၃) ထို့အပြင် ဆာလံဆရာက ဤသို့ရေးသားသည်– ‘အိုဘုရားရှင် ထာဝရဘုရားသခင် ကိုယ်တော်သည် မကောင်းမှုများကိုမှတ်တော်မူလျှင် အဘယ်သူခံရပ်နိုင်ပါမည်နည်း။’ (ဆာလံ ၁၃၀:၃) ယေဟောဝါရှင်သည် ကျွန်ုပ်တို့ပြုသည့်အမှားတိုင်းကို မှတ်မနေပါ၊ ကျွန်ုပ်တို့ကို ထောင်ချောက်ဆင်ရန် ကြိုးစားခြင်းမျိုးလည်း လုံးဝမလုပ်ပါ။ သို့ဆိုလျှင် စံပြဆုတောင်းနည်း၏ ဤအပိုင်းသည် အဘယ်သို့ဆိုလိုသနည်း။

^၁၃ ကျွန်ုပ်တို့ကို ထောင်ဖမ်းရန်၊ ကလိမ်ဉာဏ်သုံးကာ ထောင်ချောက်ဆင်ရန်သာမက ဝါးမျိုရန်ပင် ကြိုးစားနေသူမှာ စာတန်သာဖြစ်သည်။ (ဧဖက် ၆:၁၁) သူသာလျှင် သွေးဆောင်သူကြီးဖြစ်သည်။ (၁ သက်သာလောနိတ် ၃:၅) အပြစ်သွေးဆောင်ရာသို့ မလိုက်မပါစေရန် ဆုတောင်းခြင်းမှာ ကျွန်ုပ်တို့သွေးဆောင်ခံရချိန်တွင် ကျော့မိသွားခွင့်မပေးရန် ယေဟောဝါထံ တောင်းလျှောက်နေခြင်းဖြစ်သည်။ ကျွန်ုပ်တို့သည် သွေးဆောင်မှုကို ဒူးထောက်အညံ့ခံမိကာ ‘စာတန် အနိုင်’ ရသွားခြင်းမျိုးမဖြစ်စေရန် ကူမပေးဖို့ ကိုယ်တော်ထံ ကျွန်ုပ်တို့ တောင်းလျှောက်နေခြင်းဖြစ်သည်။ (၂ ကောရိန္သု ၂:၁၁) ကျွန်ုပ်တို့သည် ‘အမြင့်ဆုံးသောဘုရားသခင်၏ ကွယ်ကာရာဌာနတော်၌’ ဆက်နေခွင့်ရကာ ပြုလေသမျှတွင် ယေဟောဝါ၏အကြွင်းမဲ့ပိုင်သအုပ်စိုးမှုကို အသိအမှတ်ပြုသူများအတွက် စီမံပေးထားသော ဝိညာဉ်ရေးအကာအကွယ်ရရှိရန် ဆုတောင်းကြသည်။—ဆာလံ ၉၁:၁-၃။

၁၄။ ကျွန်ုပ်တို့ သွေးဆောင်ခံရချိန်တွင် ယေဟောဝါကို မျှော်ကိုးလျှင် ကိုယ်တော် ပစ်ထားမည်မဟုတ်ကြောင်း တမန်တော်ပေါလု ကျွန်ုပ်တို့အား မည်သို့အာမခံပေးထားသနည်း။

^၁၄ ကျွန်ုပ်တို့၏ဆုတောင်းချက်များနှင့် လုပ်ဆောင်မှုတို့သည် အရိုးခံစိတ်ဖြင့်ဖြစ်လျှင် ယေဟောဝါရှင် ဘယ်သောအခါမျှ ပစ်ထားမည်မဟုတ်ကြောင်း ကျွန်ုပ်တို့စိတ်ချနိုင်ပါသည်။ တမန်တော်ပေါလုက ကျွန်ုပ်တို့အား ဤသို့အာမခံထားသည်– “လူ၌ဖြစ်တတ်သော စုံစမ်းနှောင့်ယှက်ခြင်းကိုသာ သင်တို့သည်ခံရကြ၏။ ဘုရားသခင်သည် သစ္စာနှင့်ပြည့်စုံတော်မူသည်ဖြစ်၍၊ သင်တို့မခံနိုင်သောစုံစမ်းနှောင့်ယှက်ခြင်းကို သင်တို့၌ရောက်စိမ့်သောငှာ အခွင့်ပေးတော်မမူ။ သင်တို့သည်ခံနိုင်မည်အကြောင်း စုံစမ်းနှောင့်ယှက်ခြင်းအရာနှင့်တကွ၊ ထွက်မြောက်သောလမ်းကိုလည်း စီရင်ပြုပြင်တော်မူလိမ့်မည်။”—၁ ကောရိန္သု ၁၀:၁၃။

‘ဆိုးညစ်သူလက်မှ ကယ်နုတ်တော်မူပါ’

၁၅။ ဆိုးညစ်သူလက်မှ ကယ်လွှတ်ပေးရန်ဆုတောင်းဖို့ အဘယ်ကြောင့် ယခင်ကထက် သာ၍အရေးကြီးလာသနည်း။

^၁၅ ခရစ်ယာန်ဂရိကျမ်းအပိုင်းအတွက် အားအထားရဆုံး လက်ရေးစာမူများအရ ယေရှု၏စံပြဆုတောင်းနည်းကို ဤစကားများဖြင့် အဆုံးသတ်ထားသည်– “မကောင်းသောအမှုအရာ [“ဆိုးညစ်သူလက်၊” ကဘ] မှလည်း ကယ်နုတ်တော်မူပါ။”a (မဿဲ ၆:၁၃) ဤဆုံးခန်းကာလတွင် စာတန်၏လက်မှ ကာကွယ်ပေးရန် သာ၍ပင်လိုအပ်သည်၊ အကြောင်းမှာ စာတန်နှင့် သူ၏နတ်ဆိုးတို့သည် ကောင်းကင်မှ နှင်ချခံထားရသဖြင့် “ဘုရားသခင်၏ပညတ်တော်တို့ကိုကျင့်၍၊ ယေရှု၏သက်သေခံတော်မူချက်ကိုစွဲလမ်းသောသူတည်းဟူသော” ကောင်းကင်အတန်းအစား အကြွင်းအကျန်များနှင့် အပေါင်းပါ ‘လူအုပ်ကြီး’ တို့ကို တိုက်ခိုက်လျက်ရှိ၍တည်း။ (ဗျာ. ၇:၉၊ ၁၂:၉၊ ၁၇) တမန်တော်ပေတရုက ခရစ်ယာန်များအား ဤသို့မိန့်မှာထားသည်– “[ကောင်းသော]သတိရှိလျက် မအိပ်ဘဲစောင့်နေကြလော့။ သင်တို့၏ရန်သူတည်းဟူသော[စာတန်]သည် ဟောက်သောခြင်္သေ့ကဲ့သို့ အဘယ်သူကိုမျိုရမည်နည်းဟူ၍ လှည့်လည်ရှာဖွေလျက်ရှိ၏။ သို့ဖြစ်၍၊ ... ယုံကြည်ခြင်း၌တည်၍ [စာတန်]ကိုဆီးတားကြလော့။” (၁ ပေတရု ၅:၈၊ ၉) စာတန်သည် ကျွန်ုပ်တို့၏သက်သေခံခြင်းလုပ်ငန်းကို ရပ်ပစ်ချင်နေသည်၊ ကမ္ဘာပေါ်ရှိ သူ၏ကိုယ်စားလှယ်များ—ဘာသာရေး၊ စီးပွားရေး သို့မဟုတ် သားရဲအုပ်စု တစ်ခုခု—ကို သုံးကာ ကျွန်ုပ်တို့ကို ခြောက်လှန့်ရန် ကြိုးစားနေသည်။ သို့သော် ကျွန်ုပ်တို့က ခိုင်မြဲစွာရပ်တည်လျှင် ကျွန်ုပ်တို့ကို ယေဟောဝါရှင် ကယ်လွှတ်ပေးမည်။ တပည့်ဖြစ်သူယာကုပ်က ဤသို့ရေးသားလိုက်သည်– “ထိုကြောင့်၊ ဘုရားသခင်၏အလိုတော်သို့လိုက်ကြလော့။ စာတန်ကိုဆီးတားကြလော့။ သို့ပြုလျှင်၊ သူသည် သင်တို့ထံကပြေးသွားလိမ့်မည်။”—ယာကုပ် ၄:၇။

၁၆။ စုံစမ်းမှုခံနေရသော ယေဟောဝါ၏ကျေးကျွန်များကို ကိုယ်တော်ကူညီပေးရန် အထံတော်တွင် အဘယ်နည်းလမ်းများ အရန်သင့်ရှိထားသနည်း။

^၁၆ ယေဟောဝါသည် မိမိ၏သားတော်အား သွေးဆောင်ခံစေခဲ့သည်။ သို့သော် ယေရှုသည် ဘုရားသခင့်နှုတ်မြွက်စကားတော်ကို အကာအကွယ်ယူ၍ စာတန်ကို ဆန့်ကျင်ပြီးနောက်တွင် ကောင်းကင်တမန်များကို ယေဟောဝါ စေလွှတ်ကာ ကိုယ်တော်ကို အားပေးခဲ့သည်။ (မဿဲ ၄:၁-၁၁) အလားတူစွာ ကျွန်ုပ်တို့သည် ယုံကြည်ခြင်းဖြင့်ဆုတောင်းကာ ယေဟောဝါအား မိမိတို့၏ခိုလှုံရာဖြစ်စေလျှင် ကောင်းကင်တမန်များကို ကျွန်ုပ်တို့အား ကူမစေတော်မူလိမ့်မည်။ (ဆာလံ ၃၄:၇; ၉၁:၉-၁၁) တမန်တော်ပေတရုက ဤသို့ ရေးသားလိုက်သည်– “ဘုရား[သခင်]ဝတ်၌မွေ့လျော်သောသူတို့ကို စုံစမ်းနှောင့်ယှက်ခြင်းအထဲက ကယ်နုတ်ခြင်းငှာလည်းကောင်း၊ မတရားသောသူတို့ကို ဒဏ်ခံစေမည်အကြောင်း ... တရားဆုံးဖြတ်သောနေ့အဖို့ ချုပ်ထားခြင်းငှာလည်းကောင်း ထာဝရဘုရား[သခင်]သည် တတ်နိုင်တော်မူ၏။”—၂ ပေတရု ၂:၉။

လုံးလုံးလျားလျား ကယ်လွှတ်ချိန် နီးပြီ

၁၇။ ယေရှုသည် ကျွန်ုပ်တို့ကို စံပြဆုတောင်းနည်းသင်ပေးကာ ပါဝင်ရမည့်အချက်များကို မည်သို့သင့်လျော်သော အစီအစဉ်ဖြင့် ထားပေးခဲ့သနည်း။

^၁၇ စံပြဆုတောင်းနည်းတွင် ပါရမည့်အချက်များကို ယေရှုသည် သင့်လျော်သော အစီအစဉ်ဖြင့် ထားပေးတော်မူသည်။ ကျွန်ုပ်တို့အဓိကအရေးထားရမည့်အရာမှာ ယေဟောဝါ၏ သန့်ရှင်းမြင့်မြတ်သော နာမတော်အား ရိုသေလေးမြတ်စေရေးဖြစ်သင့်သည်။ ယင်းကို အကောင်အထည်ဖော်ဖို့ အသုံးပြုသည့်ကိရိယာမှာ မေရှိယနိုင်ငံတော်ဖြစ်သောကြောင့် နိုင်ငံတော်တည်ထောင်ပြီး စုံလင်သော လူ့အစိုးရအားလုံး ပျက်စီးသွားစေရန်နှင့် ကိုယ်တော်၏အလိုတော် ကောင်းကင်ဘုံ၌ပြည့်စုံသကဲ့သို့ မြေကြီးပေါ်တွင် အပြည့်အဝပြည့်စုံစေရန် ကျွန်ုပ်တို့ဆုတောင်းကြသည်။ ကမ္ဘာ့ပရဒိသုတွင် ထာဝစဉ်အသက်ရှင်ရရေးမျှော်လင့်ချက်မှာ ယေဟောဝါ၏နာမတော်အား ရိုသေလေးမြတ်ခြင်းနှင့် စကြဝဠာတစ်ခွင် ကိုယ်တော်၏ဖြောင့်မှန်သော ပိုင်သအုပ်စိုးမှုကို အသိအမှတ်ပြုခြင်းတို့အပေါ်တွင် တည်မှီနေပါသည်။ အရေးအကြီးဆုံးဖြစ်သည့် ဤအကြောင်းအရာများအတွက် ဆုတောင်းပြီးနောက်တွင် ကျွန်ုပ်တို့၏နေ့စဉ်လိုအပ်ရာများ မစပေးရန်၊ အပြစ်မှ ခွင့်လွှတ်ပေးရန်နှင့် ဆိုးညစ်သူ စာတန်၏ သွေးဆောင် ဖြားယောင်းမှုတို့မှ ကယ်လွှတ်ပေးရန်တို့အတွက် ဆုတောင်းနိုင်သည်။

၁၈၊ ၁၉။ ယေရှု၏ စံပြဆုတောင်းနည်းသည် ကျွန်ုပ်တို့အား နိုးနိုးကြားကြားရှိနေစေရန်နှင့် “အဆုံးတိုင်အောင် တည်ကြည်” ရန် မည်သို့ အကူအညီပေးမည်နည်း။

^၁၈ ဆိုးညစ်၊ ယိုယွင်းသော ဆိုးသွမ်းသူ၏အစီအစဉ်စနစ်မှ လုံးလုံးလျားလျား လွတ်မြောက်ရန်အချိန် နီးသည်ထက်နီးလာပါပြီ။ စာတန်သည် သူ၌ “အချိန်ကာလ တစ်ခဏ” သာကျန်တော့ကြောင်း ကောင်းကောင်းကြီးသိနေသည့်အတွက် ဤကမ္ဘာကြီးကို၊ အထူးသဖြင့် ယေဟောဝါ၏ သစ္စာရှိကျေးကျွန်များအပေါ် “ပြင်းစွာဒေါသအမျက်” ခြောင်းခြောင်းထွက်လျက်ရှိလေတော့သည်။ (ဗျာ. ၁၂:၁၂၊ ၁၇) “ဤအစီအစဉ်စနစ်၏ ဆုံးခန်း” ဆိုင်ရာ ပေါင်းစပ်နိမိတ်တွင် ယေရှုသည် စိတ်လှုပ်ရှားဖွယ် အမှုအရာများအကြောင်း ကြိုဟောထားရာ အချို့အမှုအရာများမှာ ရှေ့တွင် ဖြစ်လာရဦးမည်ဖြစ်သည်။ (မဿဲ ၂၄:၃၊ ၂၉-၃၁၊ ကဘ) ဤအမှုအရာများဖြစ်ပျက်လာသည်ကို ကျွန်ုပ်တို့မြင်ရသည်နှင့်အမျှ လွတ်မြောက်ဖို့မျှော်လင့်ချက်မှာလည်း တောက်ပသည်ထက်တောက်ပလာပါသည်။ ယေရှုက ဤသို့မိန့်မှာသည်– “ထိုအမှုအရာတို့သည် ဖြစ်စရှိသောအခါ၊ သင်တို့ကိုရွေးနုတ်သောအချိန်ကာလ ရောက်လုနီးသည်ကိုထောက်သဖြင့်၊ မျှော်ကြည့်၍ခေါင်းကိုကြွကြလော့။”—လုကာ ၂၁:၂၅-၂၈။

^၁၉ တပည့်များကို ယေရှုပေးခဲ့သည့် ဤစံပြဆုတောင်းနည်း အနှစ်ချုပ်သည် ဆုံးခန်းချိန်နီးလာသည်နှင့်အမျှ ကျွန်ုပ်တို့၏ဆုတောင်းချက်များတွင် အဘယ်အရာများထည့်တောင်းရမည်နှင့်ပတ်သက်၍ အားထားနိုင်သော လမ်းညွှန်ပင်ဖြစ်လေသည်။ ယေဟောဝါသည် ကျွန်ုပ်တို့၏နေ့စဉ် ဝိညာဉ်ရေး၊ ကာယရေး လိုအပ်ရာ နှစ်တန်စလုံးကို ဆက်၍ထောက်ပံ့ပေးသွားမည်ကို အဆုံးအထိ ဆက်၍ယုံကြည်စိတ်ချသွားနိုင်ပါစေ။ ကျွန်ုပ်တို့သည် နိုးနိုးကြားကြားနှင့် ဆုတောင်းနေခြင်းဖြင့် “စိတ်စွဲလမ်းခြင်းကိုအစပြုသကဲ့သို့ အဆုံးတိုင်အောင်တည်ကြည်” လျက်နေရန် အကူအညီရလိမ့်မည်။—ဟေဗြဲ ၃:၁၄; ၁ ပေတရု ၄:၇။

[အောက်ခြေမှတ်ချက်]

• “အသက်မွေးလောက်သောအစာကို ယနေ့ပေးသနားတော်မူပါ” ဟု ကျွန်ုပ်တို့တောင်းလျှောက်ခြင်းဖြင့် အဘယ်အရာများကို ဆိုလိုခြင်းဖြစ်သနည်း။

• “အပြစ်မြီစားတို့အပေါ်တွင် ကိုယ်တိုင်ဖြေလွှတ်ကြသကဲ့သို့ အကျွန်ုပ်တို့၏ အပြစ်မြီများကို ဖြေလွှတ်တော်မူပါ” ဟု အသနားခံဆုတောင်းခြင်းကို ရှင်းပြပါ။

• အပြစ်သွေးဆောင်ရာသို့ မလိုက်ပါစေနှင့်ဟု ယေဟောဝါကို ကျွန်ုပ်တို့တောင်းလျှောက်ခြင်းမှာ အဘယ်အဓိပ္ပာယ်ရှိသနည်း။

• ‘ဆိုးညစ်သူလက်မှ ကယ်နုတ်ပေးတော်မူပါရန်’ ကျွန်ုပ်တို့ အဘယ်ကြောင့် ဆုတောင်းဖို့လိုသနည်း။

[စာမျက်နှာ ၁၅ ပါ ရုပ်ပုံ]

ကျွန်ုပ်တို့ခွင့်လွှတ်ခံရဖို့ဆိုလျှင် မိမိတို့က အခြားသူများကို ခွင့်လွှတ်တတ်ရမည်

[Picture Credit Line on page 13]

Lydekker