ကျေးငှက်သာရကာများနှင့် ပန်းမန်များဆီမှ သင်ခန်းစာတစ်ရပ်

လူများသည် အခြားအရာများထက် အဘယ်အရာကို ပူပင်လေ့ရှိသနည်း။ အများစုမှာ မိသားစုအတွက် အလုံအလောက်ထောက်ပံ့နိုင်ရေး သို့မဟုတ် နေထိုင်မှုအဆင့်အတန်းတိုးတက်နိုင်ရေးတို့ဖြစ်သည်။

ယေရှုကမ္ဘာပေါ်ရှိစဉ်က အလုံအလောက်ထောက်ပံ့နိုင်ဖို့ ရည်ရွယ်ချက်ထားခြင်းသည် အဓိကပူပင်မှုကြီးတစ်ခုဖြစ်ခဲ့သည်။ သို့ရာတွင် ဤယုတ္တိတန်သောပူပင်မှုသည် ဝိညာဉ်ရေးရာများကို ပိတ်ဆို့ပစ်လိုက်သည့်အထိ စိုးမိုးသောပူပင်မှုဖြစ်လာနိုင်ကြောင်း ကိုယ်တော်သတိပေးခဲ့သည်။ မိမိ၏ဆိုလိုချက်ကို တင်ပြရန် ယေရှုသည် မိမိ၏တပည့်တော်များအား ကျေးငှက်သာရကာများနှင့် ပန်းမန်များကို အနီးကပ်ကြည့်ရှုရန် မိန့်မြွက်ခဲ့သည်။

ကျေးငှက်သာရကာများသည် နေ့စဉ်အစာလိုသည်—ယင်းတို့၏ခန္ဓာတွင်းဇီဝဖြစ်ပေါ်ပြောင်းလဲမှုနှုန်းသည် မြင့်မားသောကြောင့်အချိုးအစားအရ ကျွန်ုပ်တို့လိုသည်ထက် အလွန့်အလွန်ပို၍လိုအပ်သည်။ သို့ရာတွင် သူတို့သည် မျိုးစေ့မကြဲနိုင်၊ မရိတ်သိမ်းနိုင်၊ ရှေ့ရေးအတွက် အစာမသိုလှောင်ထားနိုင်ကြပါ။ သို့တိုင် ယေရှုသတိပြုမိသကဲ့သို့ ကျွန်ုပ်တို့၏ “ကောင်းကင်ဘုံ၌ရှိတော်မူသော . . . အဘသည် သူတို့ကို ကျွေးမွေးတော်မူသည်။” (မဿဲ ၆:၂၆) အလားတူစွာ ဘုရားသခင်သည် လှပသော “တောနှင်းပင်” ကို အကောင်းဆုံးအဝတ်ဖြင့် ဆင်ယင်ပေးထားသည်။—မဿဲ ၆:၂၈-၃၀။

ယေရှုခရစ်က ကျွန်ုပ်တို့သည် ရုပ်ပစ္စည်းလိုအပ်ရာများအပေါ် သင့်တင့်မျှတစွာဆက်၍ရှုမြင်ပြီး ဝိညာဉ်ရေးရာများကို ဦးစားထားမည်ဆိုလျှင် ကျွန်ုပ်တို့လည်း မရှိမဖြစ်လိုအပ်သည့် အစားအစာနှင့် အဝတ်တို့ကို ဘုရားသခင်က ကျိန်းသေစီစဉ်ပေးမည်ဖြစ်ကြောင်း ကျွန်ုပ်တို့အား အာမခံထားသည်။ ယေဟောဝါရှင်သည် ကျေးငှက်သာရကာများနှင့် ပန်းမန်များကို ဂရုစိုက်စောင့်ရှောက်သည်ဆိုလျှင် ကိုယ်တော်ကို ချစ်မြတ်နိုးပြီး ‘ဘုရားသခင့်နိုင်ငံတော်နှင့် ဖြောင့်မတ်ခြင်းတရားကို ဆက်၍ရှေးဦးထားနေသော’ သူများကို ကျိန်းသေစောင့်ရှောက်မည်ဖြစ်သည်။ (မဿဲ ၆:၃၃၊ ကဘ) သင်သည် ဘုရားသခင့်နိုင်ငံတော်၏ အကျိုးစီးပွားကို သင့်ဘဝတွင် ရှေးဦးထားနေပါသလော။