လမ်းခရီးကို ပြင်ဆင်တဲ့ နှစ်ခြင်းပေးသူ ယောဟန်

၁၂ နှစ်သားအရွယ်ယေရှု ဗိမာန်တော်မှာ ဆရာတွေကို မေးမြန်းတဲ့အချိန်ကနေဆိုရင် ၁၇ နှစ်ကြာခဲ့ပြီ။ အခုကတော့ အေဒီ ၂၉ ခုနှစ်၊ နွေဦးအချိန်ဖြစ်တယ်။ ယေရှုနဲ့ ဆွေမျိုးတော်တဲ့ ယောဟန်အကြောင်း လူတွေ ပြောနေကြတယ်။ ယောဟန်က ဂျော်ဒန်မြစ် အနောက်ဘက်ဒေသတစ်လျှောက်မှာ ဟောပြောနေတယ်။

ယောဟန်ရဲ့ ပုံပန်းသွင်ပြင်နဲ့ အပြောအဆိုက တော်တော်ထူးခြားတယ်။ သူက ကုလားအုတ်မွေးနဲ့ရက်တဲ့ အဝတ်ကို ဝတ်ပြီး သားရေခါးပတ် ပတ်တယ်။ ကျိုင်းကောင်နဲ့ တောထဲက ပျားရည်ကို စားတယ်။ သူ ဘာအကြောင်း ဟောသလဲ။ “နောင်တရကြပါ။ ကောင်းကင်နိုင်ငံ နီးနေပြီ” ဆိုတဲ့အကြောင်းပဲ။—မဿဲ ၃:၂။

ယောဟန်ဟောတဲ့ သတင်းက ကြားနာသူတွေကို လှုံ့ဆော်ပေးတယ်။ လူတွေဟာ နောင်တယူဖို့လိုမှန်း၊ အရင်ကလုပ်ခဲ့တဲ့ မကောင်းမှုတွေကို စွန့်ပြီး သဘောထားနဲ့ အပြုအမူကို ပြောင်းလဲဖို့လိုမှန်း သိလာကြတယ်။ “ဂျေရုဆလင်မြို့၊ ယုဒနယ်၊ ဂျော်ဒန်မြစ်ဝှမ်း တစ်လျှောက်မှာနေတဲ့ လူတွေ” သူ့ဆီ ရောက်လာကြတယ်။ (မဿဲ ၃:၅) ယောဟန်ဆီရောက်လာသူ အများစုဟာ နောင်တယူကြတယ်။ ယောဟန်က သူတို့ကို ဂျော်ဒန်မြစ်ရေထဲ နှစ်မြှုပ်ပြီး နှစ်ခြင်းပေးတယ်။ ဘာကြောင့်လဲ။

ဘုရားပညတ်ကို ချိုးဖောက်မိတဲ့ အပြစ်တွေအတွက် နောင်တစစ်ရတဲ့ အထိမ်းအမှတ်အနေနဲ့ လူတွေကို သူနှစ်ခြင်းပေးတာ။ (တမန်တော် ၁၉:၄) အားလုံးကတော့ နှစ်ခြင်းခံဖို့ အရည်အချင်း မပြည့်မီကြဘူး။ ဖာရိရှဲနဲ့ ဇဒ္ဒုကဲတချို့ ရောက်လာတာကို မြင်တော့ ယောဟန်က “မြွေဆိုးအမျိုးတို့” လို့ခေါ်ပြီး အခုလို ပြောတယ်– “တကယ် နောင်တရတယ်ဆိုရင် လုပ်ရပ်နဲ့ သက်သေပြကြ။ ‘ငါတို့ဟာ အာဗြဟံရဲ့သားမြေးတွေ’ ဆိုပြီး အထင်မကြီးကြနဲ့။ ဒီမှာ ကျွန်တော်ပြောမယ်၊ ဘုရားသခင်က ဒီကျောက်ခဲတွေကိုတောင် အာဗြဟံရဲ့သားမြေးတွေ ဖြစ်အောင် လုပ်နိုင်တယ်။ ပုဆိန်က သစ်ပင်ရင်းမှာ ရှိနေတယ်။ အသီးကောင်း မသီးတဲ့အပင် ရှိသမျှဟာ ခုတ်လှဲပြီး မီးထဲ ပစ်ချခံရမယ်။”—မဿဲ ၃:၇-၁၀။

လူတွေ ယောဟန်ကို အာရုံစိုက်နေတာကြောင့်၊ သူ့ရဲ့ တန်ခိုးပါတဲ့ သတင်းစကားကြောင့်၊ လူအများကို နှစ်ခြင်းပေးနေတာကြောင့် ဂျူးတွေက ပုရောဟိတ်တွေနဲ့ လေဝိအမျိုးသားတွေကို လွှတ်ပြီး “ခင်ဗျား ဘယ်သူလဲ” လို့မေးခိုင်းလိုက်တယ်။

ယောဟန်က “ကျွန်တော် ခရစ်တော်မဟုတ်ဘူး” ဆိုပြီး ပွင့်ပွင့်လင်းလင်း ဝန်ခံတယ်။

“ဒါဆို ခင်ဗျားက ဧလိယလား” လို့ မေးတယ်။

“မဟုတ်ဘူး” လို့ သူပြန်ဖြေတယ်။

“ပေါ်ထွန်းလာမယ့် ပရောဖက်လား၊” တစ်နည်းအားဖြင့် မောရှေပြောခဲ့တဲ့ ကြီးမြတ်တဲ့ပရောဖက်လား ဆိုပြီး မေးပြန်တယ်။—တရားဟောရာ ၁၈:၁၅၊ ၁၈။

“မဟုတ်ဘူး” လို့ ယောဟန် ပြန်ဖြေတယ်။

ဒါနဲ့ သူတို့က “ခင်ဗျား ဘယ်သူလဲဆိုတာ ပြောပါ။ ဒါမှ ကျွန်တော်တို့ကို လွှတ်လိုက်တဲ့ သူတွေဆီ ပြန်ပြောပြနိုင်မှာ။ ခင်ဗျား ဘယ်သူလဲ” လို့မေးကြတယ်။ ယောဟန်က “‘ယေဟောဝါဘုရားရဲ့ လမ်းကို ဖြောင့်ဖြူးအောင် လုပ်ကြ’ ဆိုပြီး တောထဲမှာ လူတစ်ယောက် ကြွေးကြော်နေတယ်လို့ ပရောဖက်ဟေရှာယ ဟောခဲ့တဲ့သူဟာ ကျွန်တော်ပဲ” ဆိုပြီး ဖြေတယ်။—ယောဟန် ၁:၁၉-၂၃။

“ခင်ဗျားဟာ ခရစ်တော်လည်း မဟုတ်၊ ဧလိယလည်း မဟုတ်၊ ပေါ်ထွန်းလာမယ့် ပရောဖက်လည်း မဟုတ်ဘူးဆိုရင် ဘာလို့ နှစ်ခြင်းပေးတာလဲ” ဆိုပြီး မေးတယ်။ ဒီအခါ ယောဟန်က “ကျွန်တော်က ရေနဲ့နှစ်ခြင်းပေးတယ်။ ခင်ဗျားတို့မသိတဲ့ လူတစ်ယောက် ခင်ဗျားတို့ဆီမှာ ရှိနေတယ်။ သူက ကျွန်တော့်နောက်မှာ လာနေတယ်” ဆိုပြီး အဓိပ္ပာယ်ရှိရှိ ပြန်ဖြေလိုက်တယ်။—ယောဟန် ၁:၂၅-၂၇။

မှန်ပါတယ်၊ ယောဟန်က လူတွေမှာ သဘောထားမှန် ရှိလာအောင် ကူညီပေးဖို့ သူ့မှာ တာဝန်ရှိမှန်း အသိအမှတ်ပြုတယ်။ ဒါမှ ဘုရင်ဖြစ်လာမယ့် မေရှိယကို သူတို့လက်ခံကြမှာ။ မေရှိယနဲ့ပတ်သက်ပြီး ယောဟန်က “ကျွန်တော့်နောက်မှာ လာနေသူဟာ ကျွန်တော့်ထက် ကြီးမြတ်တယ်။ သူ့ဖိနပ်ကို ချွတ်ပေးဖို့တောင် ကျွန်တော် မထိုက်တန်ဘူး” လို့ပြောတယ်။ (မဿဲ ၃:၁၁) ယောဟန် ဒီလိုတောင် ပြောလိုက်သေးတယ်– “ကျွန်တော့်နောက်မှာ လာနေသူဟာ ကျွန်တော် မရှိခင်ကတည်းက တည်ရှိခဲ့သူဖြစ်လို့ ရှေ့ကိုရောက်နှင့်နေပြီ။”—ယောဟန် ၁:၁၅။

“နောင်တရကြပါ။ ကောင်းကင်နိုင်ငံ နီးနေပြီ” ဆိုတဲ့ ယောဟန်ရဲ့ သတင်းစကားဟာ တကယ် သင့်တော်ပါတယ်။ (မဿဲ ၃:၂) အဲဒါက ယေဟောဝါဘုရား ကြိုပြောထားတဲ့ဘုရင် ယေရှုခရစ်ရဲ့ အမှုဆောင်လုပ်ငန်း စတင်တော့မယ်ဆိုတာ လူသိရှင်ကြား ကြေညာလိုက်သလိုပဲ။