ယေရှုရဲ့တပည့်တွေ ဘာဖြစ်လို့ အစာမရှောင်သလဲ

အေဒီ ၃၀၊ ပသခါပွဲကို ယေရှု တက်ရောက်ပြီးနောက် တစ်ချိန်ချိန်မှာ နှစ်ခြင်းပေးသူယောဟန် ထောင်ချခံခဲ့ရတယ်။ ယောဟန်က သူ့တပည့်အားလုံးကို ယေရှုရဲ့နောက်လိုက် ဖြစ်စေချင်တယ်။ ဒါပေမဲ့ သူထောင်ချခံရပြီး လအတော်ကြာတဲ့အထိ တပည့်တချို့ပဲ ယေရှုနောက်လိုက် ဖြစ်လာတယ်။

အခု အေဒီ ၃၁၊ ပသခါပွဲ ရောက်တော့မယ်။ ယောဟန်ရဲ့တပည့်တချို့ ယေရှုဆီလာပြီး “ကျွန်တော်တို့ရော ဖာရိရှဲတွေပါ အစာရှောင်ကြတယ်။ ဆရာ့တပည့်တွေကျတော့ ဘာလို့ အစာမရှောင်တာလဲ” ဆိုပြီး မေးတယ်။ (မဿဲ ၉:၁၄) ဖာရိရှဲတွေက ဘာသာရေးထုံးတမ်း တစ်ခုအနေနဲ့ အစာရှောင်ကြတယ်။ နောက်ပိုင်း ယေရှု ပြောပြတဲ့ ပုံဥပမာတစ်ခုမှာဆိုရင် ကိုယ့်ကိုယ်ကိုယ် သူတော်ကောင်းလို့ ထင်နေတဲ့ ဖာရိရှဲက “ဘုရားသခင်၊ ကျွန်တော်ဟာ အများတကာလို . . . မဟုတ်တဲ့အတွက် ကျေးဇူးတင်ပါတယ်။ ကျွန်တော်က တစ်ပတ်မှာ နှစ်ကြိမ် အစာရှောင်ပါတယ်” လို့ဆုတောင်းတယ်။ (လုကာ ၁၈:၁၁၊ ၁၂) ယောဟန်ရဲ့တပည့်တွေလည်း ထုံးစံတစ်ခုအနေနဲ့ အစာရှောင်တာ ဖြစ်နိုင်တယ်။ ဒါမှမဟုတ် ယောဟန် ထောင်ကျနေလို့ ဝမ်းနည်းတဲ့အနေနဲ့ အစာရှောင်တာလည်း ဖြစ်နိုင်တယ်။ ယေရှုရဲ့တပည့်တွေကျတော့ ဘာလို့ အစာမရှောင်တာလဲဆိုပြီး သူတို့ သိချင်နေကြတယ်။ တကယ်ဆိုရင် ယောဟန်အတွက် ဝမ်းနည်းကြောင်း ပြတဲ့အနေနဲ့ အစာရှောင်သင့်တယ်လို့ ထင်နေကြတာ။

ယေရှုက ဒီဥပမာကို သုံးပြီး အဖြေပေးတယ်– “သတို့သားရဲ့ သူငယ်ချင်းတွေက သတို့သားနဲ့အတူ ရှိနေချိန်မှာ ဝမ်းနည်းပူဆွေးကြလို့လား။ ဒါပေမဲ့ သတို့သားကို သူတို့ဆီကနေ ခေါ်သွားမယ့်နေ့ ရောက်လာလိမ့်မယ်။ အဲဒီအခါကျမှ သူတို့ အစာရှောင်လိမ့်မယ်။”—မဿဲ ၉:၁၅။

ယောဟန်ကိုယ်တိုင်က ယေရှုကို သတို့သားအဖြစ် ရည်ညွှန်းပြောဆိုခဲ့တယ်။ (ယောဟန် ၃:၂၈၊ ၂၉) ဒါကြောင့် ယေရှု ရှိနေချိန်မှာ သူ့တပည့်တွေ အစာမရှောင်ကြဘူး။ ယေရှု သေဆုံးချိန်မှာတော့ တပည့်တွေ ဝမ်းနည်းပူဆွေးပြီး အစာစားချင်စိတ်ရှိမှာ မဟုတ်ဘူး။ ဒါပေမဲ့ သူရှင်ပြန်ထမြောက်လာချိန်မှာ အခြေအနေ ပြောင်းလဲသွားပြီ။ ဝမ်းနည်းပြီး အစာရှောင်စရာအကြောင်း မရှိတော့ဘူး။

အဲဒီနောက် ယေရှုက ပုံဥပမာနှစ်ခု ပြောပြတယ်– “ဟောင်းနွမ်းနေတဲ့ အဝတ်ကို ပိတ်စအသစ်နဲ့ ဖာလေ့မရှိဘူး။ ဖာရင် ပိတ်စအသစ်က ရုန်းတဲ့အတွက် အဝတ် ပိုပြဲသွားမှာပေါ့။ သားရေဘူးဟောင်းထဲ စပျစ်ဝိုင်အသစ် ထည့်လေ့မရှိဘူး။ ထည့်ရင် သားရေဘူး ကွဲထွက်ပြီး စပျစ်ဝိုင်လည်း ယို၊ သားရေဘူးလည်း ပျက်စီးသွားမှာပေါ့။ ဒီတော့ နှစ်ခုလုံး မဆုံးရှုံးအောင် သားရေဘူးသစ်ထဲမှာပဲ ထည့်လေ့ရှိတယ်။” (မဿဲ ၉:၁၆၊ ၁၇) ယေရှု ဘာကို ပြောချင်တာလဲ။

အစာရှောင်ခြင်းလိုမျိုး ဂျူးဘာသာရေး ထုံးစံအဟောင်းတွေကို ယေရှုရဲ့နောက်လိုက်တွေ လိုက်လျှောက်ရမယ်လို့ ဘယ်သူမှ မမျှော်လင့်သင့်မှန်း နှစ်ခြင်းပေးသူယောဟန်ရဲ့ တပည့်တွေကို နားလည်စေချင်တာ။ ဖယ်ရှားခံရတော့မယ့် ဝတ်ပြုရေးစနစ်၊ ဟောင်းနွမ်းပြီး အသုံးမဝင်တော့တဲ့ ဝတ်ပြုမှုပုံစံကို ဖာထေးဖို့၊ သက်ဆိုးရှည်အောင်လုပ်ဖို့ ယေရှုလာတာ မဟုတ်ဘူး။ ယေရှုအားပေးထောက်ခံတဲ့ ဝတ်ပြုရေးဟာ အဲဒီအချိန်မှာရှိတဲ့ ဂျူးဘာသာရေးနဲ့ လူ့ထုံးတမ်းစဉ်လာတွေနောက်ကို မလိုက်ဘူး။ ယေရှုက ဟောင်းနွမ်းနေတဲ့ အဝတ်ကို ပိတ်စအသစ်နဲ့ ဖာမှာမဟုတ်ဘူး၊ သားရေဘူးဟောင်းထဲ စပျစ်ဝိုင်အသစ် ထည့်မှာမဟုတ်ဘူး။