စစ်မှန်သောခရစ်ယာန်အားလုံး ဧဝံဂေလိတရားဟောသူများဖြစ်

“ထာဝရဘုရား[သခင်]အား သီချင်းဆို၍ နာမတော်ကိုကောင်းချီးပေးကြလော့။ ကယ်တင်တော်မူခြင်းသတင်း [ကောင်း]ကို တစ်နေ့ နောက်တစ်နေ့ ကြားပြောလော့။”—ဆာလံ ၉၆:၂၊ သမ္မာ။

၁။ အဘယ်သတင်းကောင်းကို လူတို့ကြားနာဖို့လိုသနည်း၊ ဤသတင်းကောင်းကိုဖြန့်ဝေရာ၌ ယေဟောဝါသက်သေများသည် စံနမူနာယူထိုက်သူများ မည်သို့ဖြစ်ကြသနည်း။

နေ့စဉ်နှင့်အမျှ ကပ်ဘေးဆိုက်လျက်ရှိသော ဤလောကတွင် သမ္မာကျမ်းစာဆိုသကဲ့သို့ စစ်၊ ရာဇဝတ်မှု၊ ငတ်ပြတ်မှုနှင့် ဖိနှိပ်မှုတို့ မကြာမီအဆုံးတိုင်မည်ကိုသိရှိရခြင်းသည် အမှန်ပင်နှစ်သိမ့်မှုပေးသည်။ (ဆာလံ ၄၆:၉; ၇၂:၃၊ ၇၊ ၈၊ ၁၂၊ ၁၆) ယင်းသည် လူတိုင်းကြားနာဖို့လိုသော သတင်းကောင်းမဟုတ်ပေလော။ ထိုသို့ ယေဟောဝါသက်သေများယူမှတ်ကြသည်။ ‘သာ၍ကောင်းသောအရာ၏သတင်းကောင်း’ ကိုကြေညာသူများအဖြစ် နေရာတကာတွင် သူတို့ကို လူတို့အသိအမှတ်ပြုကြသည်။ (ဟေရှာယ ၅၂:၇) မှန်ပါသည်၊ သက်သေခံများစွာတို့သည် သတင်းကောင်းပြောရန် စိတ်ပိုင်းဖြတ်မှုကြောင့် နှိပ်စက်ညှဉ်းပန်းမှုများခံခဲ့ကြရသည်။ သို့သော် သူတို့သည် လူတို့၏ကောင်းကျိုးကို စိတ်ဝင်စားကြ၏။ သက်သေခံများပြုစုပျိုးထောင်ခဲ့သော စိတ်ထက်သန်မှုနှင့် ဇွဲရှိသည့်မှတ်တမ်းပါတကား!

၂။ ယေဟောဝါသက်သေများ ဇွဲရှိကြသည့် အကြောင်းရင်းတစ်ရပ်ကား အဘယ်နည်း။

^၂ မျက်မှောက်ခေတ် ယေဟောဝါသက်သေများ၏ စိတ်ထက်သန်မှုသည် ပထမရာစုခရစ်ယာန်များနှင့်ဆင်တူသည်။ ထိုသူတို့နှင့်စပ်လျဉ်း၍ ရိုမန်ကက်သလစ်သတင်းစာ လာအိုစာဗာတောရိုမာနိုက ဤသို့မှန်ကန်စွာဆိုခဲ့သည်– “အစောပိုင်းခရစ်ယာန်များသည် နှစ်ခြင်းယူပြီးသည်နှင့် သတင်းကောင်းဖြန့်ဝေရန် မိမိတို့၌တာဝန်ရှိသည်ဟု ယူမှတ်ခဲ့ကြသည်။ ကျေးကျွန်တို့သည် သတင်းကောင်းကို နှုတ်ဖြင့် တစ်ဆင့်တစ်ဆင့်ပြောကြားခဲ့ကြသည်။” ယေဟောဝါသက်သေများသည် အဆိုပါအစောပိုင်းခရစ်ယာန်များနည်းတူ အဘယ်ကြောင့် ဤမျှဇွဲရှိကြရသနည်း။ ပထမအချက်မှာ သူတို့ကြေညာသောသတင်းကောင်းသည် ယေဟောဝါဘုရားသခင် ကိုယ်တော်တိုင်ထံမှ ဖြစ်သောကြောင့်ပင်။ သူတို့ဇွဲရှိကြဖို့ ထိုထက်ကောင်းသောအကြောင်းရင်း ရှိနိုင်ဦးမည်လော။ သူတို့၏ဟောပြောခြင်းသည် ဆာလံဆရာ၏ ဤစကားများကို တုံ့ပြန်ခြင်းဖြစ်သည်– “[ယေဟောဝါ] အား သီချင်းဆို၍ နာမတော်ကိုကောင်းချီးပေးကြလော့။ ကယ်တင်တော်မူခြင်းသတင်း [ကောင်း]ကို တစ်နေ့ နောက်တစ်နေ့ ကြားပြောလော့။”—ဆာလံ ၉၆:၂၊ သမ္မာ။

၃။ (က) ယေဟောဝါသက်သေများ ဇွဲရှိရသည့် ဒုတိယအကြောင်းရင်းကား အဘယ်နည်း။ (ခ) ‘[ဘုရားသခင်] ၏ကယ်တင်တော်မူခြင်း’ တွင် အဘယ်အရာပါဝင်သနည်း။

^၃ ဆာလံဆရာ၏ ဤစကားများက ယေဟောဝါသက်သေများ ဇွဲရှိရသည့် ဒုတိယအကြောင်းရင်းကို ပြန်သတိရစေသည်။ သူတို့ကြေညာသောသတင်းတရားသည် ကယ်တင်ခြင်းသတင်းဖြစ်၏။ လူအချို့တို့သည် လူသားချင်းတို့၏ဘဝတိုးတက်ရေးအတွက် ဆေးဘက်ဆိုင်ရာ၊ လူမှုရေးဆိုင်ရာ၊ စီးပွားရေးဆိုင်ရာ သို့မဟုတ် အခြားနယ်ပယ်များတွင် ကြိုးစားလုပ်ဆောင်ကြခြင်းကို ချီးမွမ်းထိုက်ပေသည်။ သို့သော် အခြားသူတစ်ဦးအတွက် လူသားတစ်ဦးလုပ်ဆောင်ပေးနိုင်ရာကို ‘[ဘုရားသခင်] ၏ကယ်တင်တော်မူခြင်း’ နှင့်နှိုင်းယှဉ်ကြည့်သော် အလွန်ပင် အကန့်အသတ်ရှိသည်။ ယေဟောဝါသည် ယေရှုခရစ်အားဖြင့် စိတ်နူးညံ့သောသူတို့ကို အပြစ်၊ ဖျားနာခြင်းနှင့် သေခြင်းတို့မှ ကယ်နုတ်ပေးပါလိမ့်မည်။ အကျိုးခံစားရမည့်သူတို့သည် ထာဝစဉ်အသက်ရှင်ကြလိမ့်မည်! (ယောဟန် ၃:၁၆၊ ၃၆; ဗျာဒိတ် ၂၁:၃၊ ၄) ယနေ့ခရစ်ယာန်များသည် အောက်ပါစကားများကို လက်ခံတုံ့ပြန်ကြသည့်အခါ သူတို့ပြောပြသော “အံ့ဖွယ်ရာများ” တွင် ကယ်တင်ခြင်းအကြောင်းပါဝင်၏– “[ဘုရားသခင်၏] ဘုန်းတော်ကို လူမျိုးခြားတို့၌လည်းကောင်း၊ အံ့ဖွယ်သောအမှုတော်များကို ခပ်သိမ်းသောလူမျိုးတို့၌လည်းကောင်း ဖော်ပြကြလော့။ အကြောင်းမူကား [ယေဟောဝါ]သည် ကြီးမြတ်၍ အလွန်ချီးမွမ်းဖွယ်ဖြစ်တော်မူ၏။ကိုယ်တော်သည် ဘုရားတကာထက်ကြောက်ရွံ့ဖွယ်ဖြစ်တော်မူ၏။”—ဆာလံ ၉၆:၃၊ ၄။

သခင်၏ပုံသက်သေ

၄-၆။ (က) အဘယ်တတိယအကြောင်းရင်းကြောင့် ယေဟောဝါသက်သေများ ဇွဲရှိကြသနည်း။ (ခ) ယေရှုသည် သတင်းကောင်းဟောပြောခြင်းလုပ်ငန်းအတွက် ဇွဲရှိကြောင်း မည်သို့တင်ပြခဲ့သနည်း။

^၄ ယေဟောဝါသက်သေများ ဇွဲရှိကြသည့် တတိယအကြောင်းရင်းတစ်ခု ရှိသေးသည်။ ယေရှုခရစ်၏ပုံသက်သေကို သူတို့တုပကြ၏။ (၁ ပေတရု ၂:၂၁) ထိုစုံလင်သူသည် “ဆင်းရဲသားတို့အား ဝမ်းမြောက်စရာသတင်းကိုကြားပြော” ရန်တာဝန်ကို နှလုံးအကြွင်းမဲ့လက်ခံထားသည်။ (ဟေရှာယ ၆၁:၁; လုကာ ၄:၁၇-၂၁) ထို့ကြောင့် ကိုယ်တော်သည် ဧဝံဂေလိတရားဟောပြောသူ၊ သတင်းကောင်းပြောကြားသူတစ်ဦးဖြစ်လာခဲ့သည်။ ကိုယ်တော်သည် ဂါလိလဲနယ်နှင့် ယုဒနယ်တစ်လျှောက် “နိုင်ငံတော်နှင့်ယှဉ်သော ဧဝံဂေလိတရားကိုဟောလျက်” လှည့်လည်ခဲ့သည်။ (မဿဲ ၄:၂၃) ထိုသတင်းကောင်းကို လက်ခံတုံ့ပြန်ကြမည့်သူများစွာရှိမည်ကို ကိုယ်တော်သိထားသောကြောင့် တပည့်တော်များအား ဤသို့မိန့်ဆိုခဲ့သည်– “စပါးရိတ်စရာများစွာရှိ၏။ ရိတ်သောသူတို့သည် နည်းကြ၏။ ထို့ကြောင့် လုပ်ဆောင်သောသူတို့ကို စပါးရိတ်ခြင်းငှာ စေလွှတ်တော်မူမည်အကြောင်း၊ စပါးရှင်ကိုဆုတောင်းကြလော့။”—မဿဲ ၉:၃၇၊ ၃၈။

^၅ ယေရှုသည် မိမိ၏ဆုတောင်းချက်နှင့်အညီ ဧဝံဂေလိတရားဟောပြောသူများဖြစ်လာစေဖို့ အခြားသူများကို လေ့ကျင့်ပေးခဲ့သည်။ အချိန်တန်သော် တမန်တော်များကို သူတို့ဘာသာသွားဖို့ စေလွှတ်လိုက်ပြီး ဤသို့မိန့်ဆိုခဲ့သည်– “သွားစဉ်တွင်၊ ‘ကောင်းကင်နိုင်ငံတော်တည်လုနီးပြီ’ ဟု သတင်းကြားပြောကြလော့။” ထိုခေတ်အခါက လူမှုရေးပြဿနာများလျော့နည်းစေဖို့ သူတို့အစီအစဉ်များရေးဆွဲခဲ့ကြလျှင် ပို၍လက်တွေ့ကျမည်လော။ သို့မဟုတ် ထိုအချိန်ကပျံ့နှံ့လျက်ရှိသော ယိုယွင်းမှုကိုနှိမ်နင်းဖို့ နိုင်ငံရေးတွင်ပါဝင်လျှင် သင့်တော်မည်လော။ မသင့်တော်ပါ။ ထိုသို့ပြုမည့်အစား ယေရှုက မိမိ၏နောက်လိုက်များအား “သွားစဉ်တွင်၊ . . . ဟောပြောကြလော့” ဟုမိန့်ဆိုရာတွင် ဧဝံဂေလိတရားဟောပြောသူ ခရစ်ယာန်အားလုံးအတွက် စံနှုန်းကို ချမှတ်ပေးတော်မူခဲ့သည်။—မဿဲ ၁၀:၅-၇။

^၆ နောက်ပိုင်းတွင် “ဘုရားသခင်၏နိုင်ငံတော် . . . တည်ထောင်သောအချိန်နီးပြီ” ဟုကြေညာရန် အခြားတပည့်တော်တစ်စုကို စေလွှတ်ခဲ့သည်။ သူတို့၏ဧဝံဂေလိတရားဟောပြောခြင်းခရီးစဉ် အောင်မြင်ကြောင်း ပြန်ပြောပြကြသောအခါ ယေရှုအားရရွှင်လန်းခဲ့သည်။ ကိုယ်တော်ဤသို့ဆုတောင်းခဲ့သည်– “ကောင်းကင်နှင့်မြေကြီးကို အစိုးရတော်မူသောအဘ၊ ကိုယ်တော်သည် ပညာအလိမ္မာနှင့်ပြည့်စုံသောသူတို့အား ဤအရာများကိုထိမ်ဝှက်ကွယ်ထားလျက် သူငယ်တို့အားဖော်ပြတော်မူသည်ဖြစ်၍၊ ကျေးဇူးတော်ကို အကျွန်ုပ်ချီးမွမ်းပါ၏။” (လုကာ ၁၀:၁၊ ၈၊ ၉၊ ၂၁) ယခင်က ပင်ပင်ပန်းပန်းလုပ်ကိုင်ခဲ့ကြသော တံငါသည်များ၊ လယ်သမားများစသည့် ယေရှု၏တပည့်တော်များသည် တိုင်းပြည်ရှိအဆင့်မြင့်ပညာတတ် ဘာသာရေးခေါင်းဆောင်များနှင့်နှိုင်းယှဉ်လျှင် သူငယ်များနှင့်တူကြသည်။ သို့သော် တပည့်တော်များသည် အကောင်းတကာ့ အကောင်းဆုံးသတင်းကိုကြေညာရန် လေ့ကျင့်ခံခဲ့ရသူများဖြစ်ကြသည်။

၇။ ကောင်းကင်သို့ ယေရှုတက်ကြွပြီးနောက် ကိုယ်တော့်နောက်လိုက်များသည် သတင်းကောင်းကို မည်သူတို့အား ဦးဆုံးဟောပြောခဲ့ကြသနည်း။

^၇ ကောင်းကင်သို့ ယေရှုတက်ကြွပြီးနောက် ကိုယ်တော့်နောက်လိုက်များသည် ကယ်တင်ခြင်းသတင်းကောင်းကို ဆက်လက်ဖြန့်ဝေခဲ့ကြသည်။ (တမန်တော် ၂:၂၁၊ ၃၈-၄၀) မည်သူတို့ကို သူတို့ဦးဆုံးဟောပြောခဲ့ကြသနည်း။ ဘုရားသခင်ကိုမသိသော တစ်ပါးအမျိုးသားများထံ သူတို့သွားခဲ့ကြသလော။ မသွားခဲ့ပါ၊ ယေဟောဝါကို အနှစ် ၁,၅၀၀ ကျော်သိကျွမ်းခဲ့သော ဣသရေလလူမျိုးထံ သူတို့ဦးဆုံးသွားခဲ့သည်။ ယေဟောဝါအား ကိုးကွယ်သူများ၏နယ်မြေ၌ သူတို့ဟောပြောခွင့်ရှိသလော။ ရှိပါသည်။ သူတို့ကိုယေရှုဤသို့မိန့်ဆိုခဲ့၏– “သင်တို့သည် . . . ယေရုရှလင်မြို့မှစသော ယုဒပြည်၊ ရှမာရိပြည်၊ မြေကြီးစွန်းတိုင်အောင် ငါ၏သက်သေဖြစ်ကြလိမ့်မည်။” (တမန်တော် ၁:၈) ဣသရေလနိုင်ငံသည် အခြားနိုင်ငံများကဲ့သို့ပင် သတင်းကောင်းကြားနာဖို့လိုသည်။

၈။ ယေဟောဝါသက်သေများသည် မျက်မှောက်ခေတ်တွင် ယေရှု၏ပထမရာစုနောက်လိုက်များကို မည်သို့တုပကြသနည်း။

^၈ ထိုနည်းအတိုင်းပင် ယေဟောဝါသက်သေများသည် မျက်မှောက်ခေတ်တွင် မြေတစ်ပြင်လုံး၌ ဟောပြောကြသည်။ သူတို့သည် ယောဟန်မြင်တွေ့ခဲ့သည့် “မြေကြီးပေါ်မှာနေသောသူတည်းဟူသော အသီးအသီးဘာသာစကားကိုပြောသော လူအမျိုးအနွယ်ခပ်သိမ်းတို့အား ထာဝရဧဝံဂေလိတရားကိုဟော” သည့်ကောင်းကင်တမန်နှင့် ပူးပေါင်းဆောင်ရွက်ကြသည်။ (ဗျာဒိတ် ၁၄:၆) ၂၀၀၁ ခုနှစ်တွင်၊ သူတို့သည် ခရစ်ယာန်နိုင်ငံများဟု လူအများရှုမြင်ကြသော နိုင်ငံအချို့အပါအဝင် တိုင်းနိုင်ငံနှင့်နယ်မြေ ၂၃၅ တွင် လှုပ်ရှားခဲ့ကြသည်။ ခရစ်ယာန်ဘောင်ချာ့ချ်များ ရှိနှင့်ပြီးသောနေရာဒေသများ၌ ယေဟောဝါသက်သေများဟောပြောကြခြင်းသည် မှားသလော။ အချို့က မှားသည်ဟုဆိုကြပြီး ဧဝံဂေလိတရားဟောပြောခြင်းကို “သိုးခိုးခြင်း” ဟုပင် ယူမှတ်ကြပေမည်။ သို့သော် ယေဟောဝါသက်သေများသည် ယေရှုခေတ်ရှိ နှိမ့်ချသောဂျူးများအပေါ် ကိုယ်တော်၏ခံစားချက်ကို ပြန်သတိရကြသည်။ သူတို့၌ ယဇ်ပုရောဟိတ်အစီအစဉ်ရှိနှင့်ပြီးသော်လည်း ယေရှုသည် သူတို့ကိုသတင်းကောင်းဟောပြောဖို့ မဆုတ်ဆိုင်းခဲ့ချေ။ ကိုယ်တော်သည် “[သူ]တို့ကိုမြင်တော်မူလျှင် သနားခြင်းစိတ်ရှိတော်မူ၏။ အကြောင်းမူကား ထိုသူတို့သည် ထိန်းသူမရှိသောသိုးကဲ့သို့ ပင်ပန်း၍ အားလျော့လျက်ရှိနေကြ၏။” (မဿဲ ၉:၃၆၊ သမ္မာ) ယေဟောဝါသက်သေများသည် ယေဟောဝါနှင့် ကိုယ်တော်၏နိုင်ငံတော်အကြောင်းမသိသော စိတ်နှိမ့်ချသူတို့ကိုတွေ့ဆုံကြသောအခါ သူတို့သည် အခြားဘာသာဝင်ဖြစ်သောကြောင့် သတင်းကောင်းကိုမဟောဘဲနေသင့်သလော။ ယေရှုတမန်တော်များ၏စံနမူနာကိုလိုက်လျက် မနေသင့်ဟု ကျွန်ုပ်တို့ဖြေဆိုကြမည်။ အဘယ်လူမျိုးကိုမျှမချန် “လူမျိုးအပေါင်း” အား သတင်းကောင်းကို ဟောပြောကြရမည်။—မာကု ၁၃:၁၀။

ကနဦးခရစ်ယာန်အားလုံး ဧဝံဂေလိတရားဟောခဲ့ကြ

၉။ ပထမရာစုတွင် ခရစ်ယာန်အသင်းတော်မှမည်သူတို့သည် ဟောပြောခြင်းလုပ်ငန်း၌ ပါဝင်ခဲ့ကြသနည်း။

^၉ ပထမရာစုတွင် ဟောပြောခြင်းလုပ်ငန်း၌ မည်သူတို့ပါဝင်ခဲ့ကြသနည်း။ ခရစ်ယာန်အားလုံး ဧဝံဂေလိတရားဟောပြောသူများဖြစ်ခဲ့ကြကြောင်း ဖြစ်ရပ်များကတင်ပြပါသည်။ စာရေးဆရာ ဒဗလျူ. အက်စ်. ဝီလျံက ဤသို့ဖော်ပြသည်– “ယေဘုယျထွက်ဆိုချက်မှာ အစောပိုင်းချာ့ချ်ရှိ ခရစ်ယာန်အားလုံး . . . သတင်းကောင်းဟောပြောခဲ့ကြသည်။” စီ.အီး. ၃၃၊ ပင်တေကုတ္တေပွဲနေ့၏ အဖြစ်အပျက်များနှင့်စပ်လျဉ်း၍ ကျမ်းစာကဤသို့ဆို၏– “ထိုသူအပေါင်း [အမျိုးသားနှင့် အမျိုးသမီးများ] တို့သည်လည်း သန့်ရှင်းသောဝိညာဉ်တော်နှင့်ပြည့်၍၊ ဝိညာဉ်တော်သည် ဟောပြောသောအခွင့်ကိုပေးတော်မူသည်အတိုင်း အမျိုးမျိုးသောဘာသာစကားအားဖြင့် ဟောပြောကြ၏။” ထိုအခါ ဧဝံဂေလိတရားဟောပြောသူများတွင် ယောက်ျားမိန်းမ၊ လူကြီးလူငယ်၊ ကျွန်နှင့်လူလွတ်တို့ပါဝင်လာသည်။ (တမန်တော် ၁:၁၄; ၂:၁၊ ၄၊ ၁၇၊ ၁၈; ယောလ ၂:၂၈၊ ၂၉; ဂလာတိ ၃:၂၈) နှိပ်စက်ညှဉ်းပန်းမှုကြောင့် ယေရုရှလင်မြို့မှ ခရစ်ယာန်များထွက်ပြေးကြရသောအခါ “အရပ်ရပ်သို့ကွဲပြားသောသူတို့သည် လှည့်လည်၍ နှုတ်[မြွက်စကား]တော်တည်းဟူသော ဧဝံဂေလိတရားကိုဟောပြောကြ၏။” (တမန်တော် ၈:၄) ခန့်အပ်ခံရသူအနည်းငယ်မျှသာမဟုတ်ဘဲ “အရပ်ရပ်သို့ကွဲပြားသောသူ” အားလုံးသည် ဧဝံဂေလိတရားဟောပြောကြ၏။

၁၀။ ဂျူးအစီအစဉ်စနစ်ဖျက်ဆီးမခံရမီ အဘယ်တာဝန်နှစ်ရပ်ပြည့်စုံခဲ့သနည်း။

^၁၀ ထိုအစောပိုင်းနှစ်များတစ်လျှောက် ယင်းသို့အမှန်ဖြစ်ခဲ့သည်။ ယေရှုဤသို့ပရောဖက်ပြုခဲ့သည်– “လူမျိုးအပေါင်းတို့အား သက်သေဖြစ်မည်အကြောင်း နိုင်ငံတော်နှင့်ယှဉ်သော ဧဝံဂေလိတရားကို လော[က]နိုင်ငံအရပ်ရပ်ရှိသမျှတို့၌ ဟောရလိမ့်မည်။ သို့ပြီးမှ အဆုံးသည်ဖြစ်လတ္တံ့။” (မဿဲ ၂၄:၁၄) ဂျူးဘာသာရေးနှင့် နိုင်ငံရေးစနစ်ကို ရောမစစ်တပ်များ မဖျက်ဆီးမီ သတင်းကောင်းကို ကျယ်ပြန့်စွာဟောပြောခဲ့သည့်အတွက် ပထမရာစုတွင် ထိုစကားများပြည့်စုံခဲ့သည်။ (ကောလောသဲ ၁:၂၃) ထို့အပြင် ယေရှု၏နောက်လိုက်အားလုံးသည် ကိုယ်တော်၏ ဤမိန့်မှာချက်ကို လိုက်နာခဲ့ကြသည်– “သင်တို့သွား၍ လူမျိုးတကာတို့ကို ငါ့တပည့်ဖြစ်စေလျက်၊ ခမည်းတော်၊ သားတော်၊ သန့်ရှင်းသောဝိညာဉ်တော်၏နာမ၌ [နှစ်ခြင်း]ကိုပေးကြလော့။ ငါသည် သင်တို့အားပေးသမျှသော ပညတ်တော်တို့ကို စောင့်ရှောက်စေခြင်းငှာ ဆုံးမ . . . ပေးကြလော့။” (မဿဲ ၂၈:၁၉၊ ၂၀) အချို့သောမျက်မှောက်ခေတ် တရားဟောဆရာများနည်းတူ အစောပိုင်းခရစ်ယာန်များသည် ယေရှုကိုယုံကြည်ကြဖို့ စိတ်နှိမ့်ချသူများအား တိုက်တွန်းပြီးနောက် ကိုယ့်လမ်းကိုယ်ဆက်လျှောက်ဖို့ သူတို့ကိုပစ်မထားခဲ့ကြချေ။ ယင်းအစား သူတို့ကို ယေရှု၏တပည့်များဖြစ်လာစေဖို့ သွန်သင်ပေးပြီးနောက် အသင်းတော်များဖွဲ့စည်းကာ သူတို့ကတစ်ဖန် သတင်းကောင်းဟောပြော၍ တပည့်များဖြစ်လာစေနိုင်ဖို့ ထိုသူတို့ကို လေ့ကျင့်ပေးခဲ့ကြသည်။ (တမန်တော် ၁၄:၂၁-၂၃) ၎င်းပုံစံကို ယနေ့ ယေဟောဝါသက်သေများလိုက်ကြသည်။

၁၁။ လူသားတို့အတွက် အကောင်းဆုံးသတင်းကောင်းကြေညာခြင်းတွင် ယနေ့ မည်သူတို့ပါဝင်နေကြသနည်း။

^၁၁ ပထမရာစုမှ ပေါလု၊ ဗာနဗနှင့် အခြားသူတို့၏ပုံနမူနာများကိုတုပကာ ယေဟောဝါသက်သေမြောက်မြားစွာသည် တိုင်းတစ်ပါးများသို့ ခရစ်ယာန်သာသနာပြုများအဖြစ် ထွက်ခွာသွားခဲ့ကြပြီ။ နိုင်ငံရေးတွင် မပါဝင်၊ အခြားအဘယ်နည်းဖြင့်မျှ သတင်းကောင်းဟောပြောခြင်းတာဝန်မှ မသွေဖည်ခဲ့ကြသောကြောင့် သူတို့၏လုပ်ငန်းသည် အမှန်အကျိုးဖြစ်ထွန်းခဲ့ပြီ။ “သွားစဉ်တွင် . . . ပြောကြလော့” ဟူသော ယေရှု၏မိန့်မှာချက်ကိုသာ သူတို့လိုက်နာခဲ့ကြသည်။ သို့သော် ယေဟောဝါသက်သေအများစုမူ တိုင်းတစ်ပါးတွင် ခရစ်ယာန်သာသနာပြုသူများမဟုတ်ကြချေ။ သူတို့အနက် များစွာသောသူတို့သည် ဝမ်းစာရှာလုပ်ငန်းများ လုပ်ကိုင်နေကြပြီး အချို့တို့မှာ ကျောင်းတက်နေကြဆဲဖြစ်သည်။ အခြားသူတို့မှာမူ သားသမီးများကို ကျွေးမွေးစောင့်ရှောက်နေကြရသည်။ သို့ရာတွင် သက်သေခံအားလုံးသည် မိမိတို့သိရှိထားသောသတင်းကောင်းကို သူတစ်ပါးအားဟောပြောကြသည်။ လူကြီးလူငယ်၊ ကျားမမရွေး “နှုတ် [မြွက်] တရားတော်ကိုဟောပြောလော့။ အချိန်ရှိသည် [“ကောင်းသည်၊” ကဘ] ဖြစ်စေ၊ မရှိသည် [“မကောင်းသည်၊” ကဘ] ဖြစ်စေ၊ ကြိုးစားအားထုတ်လော့” ဟူသောသမ္မာကျမ်းစာ၏ မှာကြားချက်ကို ရွှင်လန်းစွာလက်ခံတုံ့ပြန်ကြသည်။ (၂ တိမောသေ ၄:၂) ပထမရာစုမှ ရှေ့ပြေးသက်သေခံများနည်းတူ “ယေရှုသည် ခရစ်တော်ဖြစ်၏ဟူ၍ ဧဝံဂေလိတရားကို” သူတို့ အဆက်မပြတ် “ဟောပြောလျက်နေကြ၏။” (တမန်တော် ၅:၄၂) လူသားအားလုံးအတွက် အကောင်းဆုံးသတင်းကောင်းကို သူတို့ကြေညာလျက်ရှိကြသည်။

ဘာသာပြောင်းလဲစေသူလော၊ ဧဝံဂေလိဟောပြောသူလော

၁၂။ ဘာသာပြောင်းလဲစေခြင်းကား အဘယ်နည်း၊ ယင်းကို မည်သို့ရှုမြင်လာကြပြီနည်း။

^၁၂ “ဘာသာပြောင်းလဲလာသူ” ဟုအဓိပ္ပာယ်ရှိသည့် ပရော်စီလီတိုးစ် ဟူသောဂရိစကားလုံးရှိ၏။ ၎င်းမှ “ပရော်စီလီတစင်မ်” ဟူသောအင်္ဂလိပ်စကားလုံးဆင်းသက်လာပြီး အမှန်အားဖြင့် “ဘာသာပြောင်းလဲလာသူများဖြစ်စေခြင်း” ဟုဆိုလိုသည်။ ယခုခေတ်တွင် ဘာသာပြောင်းလဲစေခြင်းသည် အန္တရာယ်ရှိသည်ဟု အချို့ကဆို၏။ ချာ့ချ်များ၏ကမ္ဘာ့ကောင်စီမှထုတ်ဝေသော စာစောင်တစ်စောင်က “ဘာသာပြောင်းလဲစေသည့်အပြစ်” အကြောင်းကိုပင် ဖော်ပြသည်။ အဘယ်ကြောင့်နည်း။ ကက်သလစ်ကမ္ဘာ့မှတ်တမ်းကဤသို့ဆိုသည်– “ဩသဒေါက်ချာ့ချ်၏ တရစပ်တိုင်တန်းချက်များကြောင့် ‘ဘာသာပြောင်းလဲစေခြင်း’ ဟူသောစကားလုံးသည် အတင်းအကျပ်ဘာသာပြောင်းလဲစေခြင်းဟူသော အခြားအဓိပ္ပာယ်ရှိစေပြီ။”

၁၃။ အန္တရာယ်ပြုခဲ့သော ဘာသာပြောင်းလဲစေခြင်းနမူနာအချို့ကား အဘယ်နည်း။

^၁၃ ဘာသာပြောင်းလဲစေခြင်းသည် အန္တရာယ်ရှိသလော။ ရှိနိုင်ပါသည်။ ကျမ်းတတ်နှင့်ဖာရိရှဲတို့၏ ဘာသာပြောင်းလဲစေခြင်းအမှုသည် သူတို့ကြောင့်ဘာသာပြောင်းလဲသူတို့အတွက် အန္တရာယ်ရှိသည်ဟု ယေရှုမိန့်ဆိုခဲ့သည်။ (မဿဲ ၂၃:၁၅) “အတင်းအကျပ်ဘာသာပြောင်းလဲစေခြင်း” သည် အမှန်ပင်မှား၏။ ဥပမာ၊ သမိုင်းဆရာဂျိုစီဖတ်စ်၏အဆိုအရ မက္ကဘီးဂျွန်ဟိုင်ရ်ကန်းနပ်စ်သည် အီဒူမီးယားတို့ကို အောင်နိုင်၍နှိမ်နင်းခဲ့သောအခါ “ထိုသူတို့သည် အရေဖျားလှီးခြင်းခံယူ၍ ဂျူးတို့၏ပညတ်တော်များကို လိုက်နာကျင့်သုံးသမျှကာလပတ်လုံး သူတို့၏နိုင်ငံ၌ ဆက်နေထိုင်ခွင့်ပြုခဲ့” ကြောင်းသိရ၏။ အီဒူမီးယားတို့သည် ဂျူးအုပ်ချုပ်မှုအောက်နေထိုင်လိုလျှင် ဂျူးဘာသာရေးကိုလိုက်စားရမည်ဖြစ်သည်။ စီ.အီး. ရှစ်ရာစုတွင် ရှားလမိန်းသည် မြောက်ဥရောပရှိ အယူမှားသောဆက္ခဆန်လူမျိုးတို့ကို နှိမ်နင်းခဲ့ပြီးနောက် လက်ရုံးအားကိုးဖြင့် သူတို့ကိုဘာသာပြောင်းလဲစေခဲ့ကြောင်း သမိုင်းဆရာများကဆိုသည်။a သို့သော် ထိုဆက္ခဆန်လူမျိုးနှင့် အီဒူမီးယားတို့၏ ဘာသာပြောင်းလဲခြင်းသည် စိတ်နှလုံးအကြွင်းမဲ့ဖြစ်ပါသလော။ သာဓကအနေနှင့် သူငယ်ယေရှုကိုသတ်ပစ်ဖို့ကြိုးစားခဲ့သူ အီဒူမီးယားဘုရင်ဟေရုဒ်သည် ဘုရားသခင့်မှုတ်သွင်းခံ မောရှေ၏ပညတ်တရားကို အမှန်တကယ်ဆည်းကပ်သည်ဟု ဆိုနိုင်မည်လော။—မဿဲ ၂:၁-၁၈။

၁၄။ အချို့သောခရစ်ယာန်ဘောင်သာသနာပြုများသည် ဘာသာပြောင်းလဲလာရန် လူတို့ကို မည်သို့ဖိအားပေးကြသနည်း။

^၁၄ ယနေ့ အတင်းအကျပ်ဘာသာပြောင်းလဲစေခြင်းများ ပြုနေသေးသလော။ အချို့သည် ပြုသည့်သဘောဖြစ်နေကြသည်။ အချို့သောခရစ်ယာန်ဘောင်သာသနာပြုများသည် ဘာသာပြောင်းလဲလာဖွယ်ရှိသူတို့ကို နိုင်ငံခြားပညာသင်စရိတ်ထောက်ပံ့ရန် ကမ်းလှမ်းသည်ဟု ဆိုကြသည်။ သာသနာပြုအချို့တို့ကမူ ငတ်မွတ်နေသောဒုက္ခသည်တစ်ဦး ခွဲတမ်းရိက္ခာရရှိဖို့ သူ့ကိုထိုင်၍တရားနာစေပေမည်။ ဩသဒေါက်ဂိုဏ်းချုပ်ဘုန်းတော်ကြီးများ၏ ညီလာခံတစ်ခုက ၁၉၉၂ ခုနှစ်တွင်ထုတ်ဆင့်ခဲ့သော ဖော်ပြချက်တစ်ခုအရ “တစ်ခါတစ်ရံ ရုပ်ပစ္စည်းနှင့်ဆွဲဆောင်ခြင်းဖြင့်၊ တစ်ခါတစ်ရံ အကြမ်းဖက်နည်းအမျိုးမျိုးဖြင့် ဘာသာပြောင်းလဲစေခြင်းအမှုကို ပြုလုပ်ကြသည်။”

၁၅။ ယေဟောဝါသက်သေများသည် ဘာသာပြောင်းလဲစေခြင်းစကားလုံး၏ ခေတ်သစ်အဓိပ္ပာယ်အတိုင်းပြုလုပ်ကြသလော။ ရှင်းပြပါ။

^၁၅ ဘာသာပြောင်းလဲစေရန် လူတို့ကိုဖိအားပေးခြင်းသည် မှား၏။ ယေဟောဝါသက်သေများ ထိုသို့အမှန်ပင်မပြုကြချေ။b ထို့ကြောင့် ဘာသာပြောင်းလဲစေခြင်းစကားလုံး၏ ခေတ်သုံးအဓိပ္ပာယ်အတိုင်း သူတို့မပြုကြပါ။ ယင်းအစား၊ သူတို့သည် ပထမရာစုခရစ်ယာန်များကဲ့သို့ လူတိုင်းကို သတင်းကောင်းဟောပြောကြသည်။ စိတ်လိုကိုယ်လျောက် လက်ခံတုံ့ပြန်လိုသူ မည်သူမဆိုကို ကျမ်းစာသင်ပေးခြင်းအားဖြင့် အသိပညာပိုမိုဆည်းပူးစေသည်။ အဆိုပါစိတ်ဝင်စားသူတို့သည် တိကျမှန်ကန်သောကျမ်းစာအသိပညာပေါ် အခိုင်အမာအခြေပြုလျက် ဘုရားသခင်နှင့်ကိုယ်တော့်ရည်ရွယ်ချက်များကို ယုံကြည်စိတ်ချလာတတ်ကြသည်။ ထိုအခါ သူတို့သည် ကယ်တင်ခြင်းရဖို့ ဘုရားသခင့်နာမတော်၊ ယေဟောဝါကိုတ၍ ဆုတောင်းကြသည်။ (ရောမ ၁၀:၁၃၊ ၁၄၊ ၁၇) သတင်းကောင်းကို သူတို့လက်ခံမည်၊ လက်မခံမည်ကား ကိုယ်ပိုင်ဆုံးဖြတ်ချက်ဖြစ်သည်။ အတင်းအကျပ်ပြုမူခြင်းမရှိပါ။ ထိုသို့ပြုမူခဲ့ပါမူ ဘာသာပြောင်းလဲခြင်းသည် အဓိပ္ပာယ်ရှိမည်မဟုတ်။ ဘုရားသခင်နှစ်သက်လက်ခံစရာဖြစ်ဖို့ စိတ်နှလုံးအကြွင်းမဲ့ ဝတ်ပြုကိုးကွယ်ရမည်။—တရားဟောရာ ၆:၄၊ ၅; ၁၀:၁၂။

မျက်မှောက်ခေတ်တွင် ဧဝံဂေလိတရားဟောပြောခြင်း

၁၆။ မျက်မှောက်ခေတ်တွင် ယေဟောဝါသက်သေများ၏ ဧဝံဂေလိတရားဟောပြောခြင်းလုပ်ငန်းသည် မည်သို့တိုးတက်ခဲ့ပြီနည်း။

^၁၆ မျက်မှောက်ခေတ်ကာလတစ်လျှောက် ယေဟောဝါသက်သေများသည် မဿဲ ၂၄:၁၄ အကြီးအကျယ်ပြည့်စုံလာစေရန် သတင်းကောင်းကိုဟောပြောလျက်ရှိကြသည်။ သူတို့ ဧဝံဂေလိတရားဟောပြောရာတွင် အဓိကအသုံးပြုသည့် ကိရိယာတစ်ခုမှာ ကင်းမျှော်စင်မဂ္ဂဇင်းဖြစ်၏။c ၁၈၇၉ ခုနှစ်တွင် ကင်းမျှော်စင်ကိုဦးဆုံးထုတ်ဝေခဲ့စဉ်က ဘာသာစကားတစ်မျိုးတည်းဖြင့် စောင်ရေ ၆,၀၀၀ ခန့်ထုတ်ဝေခဲ့သည်။ ၁၂၂ နှစ်ကျော် လွန်ပြီးနောက် ၂၀၀၁ ခုနှစ်တွင် ၁၄၁ ဘာသာဖြင့် စောင်ရေ ၂၃,၀၄၂,၀၀၀ အထိထုတ်ဝေခဲ့ရပြီ။ ယင်းနှင့်အညီ ယေဟောဝါသက်သေများ၏ ဧဝံဂေလိတရားဟောပြောခြင်းလုပ်ငန်းသည်လည်း တိုးတက်လာခဲ့ပြီ။ ၁၉ ရာစုတွင်၊ ဧဝံဂေလိတရားဟောပြောခြင်းလုပ်ငန်း၌ နှစ်စဉ်အသုံးပြုခဲ့သောအချိန်နာရီ ထောင်ဂဏန်းအနည်းငယ်ကို ၂၀၀၁ ခုနှစ်တွင် ဟောပြောခြင်းလုပ်ငန်း၌ အသုံးပြုခဲ့သောအချိန်နာရီ ၁,၁၆၉,၀၈၂,၂၂၅ နှင့်နှိုင်းယှဉ်ကြည့်ပါ။ လစဉ်ပျမ်းမျှ ၄,၉၂၁,၇၀၂ ကြိမ်ကျင်းပခဲ့သော အခမဲ့အိမ်တွင်းကျမ်းစာသင်အံမှုများကို သုံးသပ်ကြည့်ပါ။ အလွန်ကောင်းသောလုပ်ငန်းတစ်ခုကို အကြီးအကျယ်ဆောင်ရွက်ခဲ့ချေပြီ! ယင်းကို တက်ကြွသောနိုင်ငံတော်ကြေညာသူ ၆,၁၁၇,၆၆၆ ဦးက လုပ်ဆောင်ခဲ့ကြသည်။

၁၇။ (က) ယနေ့ အဘယ်ဗာဗုလုန်ဘုရားသခင်များကို ကိုးကွယ်နေကြသနည်း။ (ခ) အဘယ်ဘာသာစကား၊ အဘယ်လူမျိုး၊ အဘယ်လူမှုရေးအဆင့်အတန်းပင်ဖြစ်စေ လူတိုင်း အဘယ်အရာကိုသိဖို့လိုသနည်း။

^၁၇ ဆာလံဆရာက “တစ်ပါးအမျိုးသားတို့၏ဘုရားရှိသမျှတို့သည် အချည်းနှီးသက်သက်ဖြစ်ကြ၏။ “[ယေဟောဝါ] မူကား မိုးကောင်းကင်ကိုဖန်ဆင်းတော်မူ၏” ဟုဆိုသည်။ (ဆာလံ ၉၆:၅) လောကရေးသက်သက်ကိုသာ အမှုပြုသော မျက်မှောက်ခေတ်လောကတွင် မျိုးချစ်စိတ်၊ နိုင်ငံရေးအထိမ်းအမှတ်များ၊ အထင်ကရပုဂ္ဂိုလ်များ၊ ရုပ်ပစ္စည်းများနှင့် ချမ်းသာကြွယ်ဝမှုကိုပင် ဝတ်ပြုကိုးကွယ်နေကြသည်။ (မဿဲ ၆:၂၄; ဧဖက် ၅:၅; ကောလောသဲ ၃:၅) မိုဟမ်းဒတ်စ် ကေ. ဂန္ဒီက တစ်ကြိမ်တွင် ဤသို့ဆိုခဲ့သည်– “ကျွန်ုပ်အခိုင်အမာယူဆသည်မှာ . . . ယနေ့ ဥရောပသည် ခရစ်ယာန်အမည်ခံသာဖြစ်သည်။ အမှန်မှာ ၎င်းသည် ဥစ္စာဓနကိုကိုးကွယ်နေ၏။” အမှန်သော် အရပ်ရပ်၌ သတင်းကောင်းကိုကြားရန် လိုအပ်သည်။ အဘယ်လူမျိုး၊ အဘယ်ဘာသာ၊ အဘယ်လူမှုရေးအဆင့်အတန်းမဆို လူတိုင်း ယေဟောဝါနှင့် ကိုယ်တော်၏ရည်ရွယ်တော်မူချက်များကို သိကြရဖို့လိုသည်။ “[ယေဟောဝါ] သည် ဘုန်းတန်ခိုးအစွမ်းသတ္တိရှိတော်မူသည်ဟု ဝန်ခံကြလော့။ . . . [ယေဟောဝါ] ၏နာမတော်သည် ဘုန်းကြီးတော်မူသည်ဟုဝန်ခံကြလော့” ဟူသော ဆာလံဆရာ၏စကားများကို လူတိုင်းလက်ခံတုံ့ပြန်စေလိုသည်။ (ဆာလံ ၉၆:၇၊ ၈) အခြားသူများလည်း ယေဟောဝါကိုသိရှိလာပြီး ကိုယ်တော်အား လျောက်ပတ်စွာဂုဏ်တင်နိုင်ကြစေရန် ယေဟောဝါသက်သေများ ကူညီပေးနေကြပါသည်။ လက်ခံတုံ့ပြန်သူတို့သည် အကျိုးကျေးဇူးများစွာခံစားရကြ၏။ အဘယ်အကျိုးကျေးဇူးများ ခံစားရကြသနည်း။ ၎င်းတို့ကို နောက်ဆောင်းပါး၌ ဆွေးနွေးပါမည်။

[အောက်ခြေမှတ်ချက်များ]

သင်ရှင်းပြနိုင်သလော

• ယေဟောဝါသက်သေများသည် အဘယ်ကြောင့်ဇွဲရှိသော ဧဝံဂေလိတရားဟောပြောသူများဖြစ်ကြသနည်း။

• ယေဟောဝါသက်သေများသည် ခရစ်ယာန်ဘောင်ချာ့ချ်များ ရှိပြီးသားနေရာများ၌လည်း အဘယ်ကြောင့်ဟောပြောကြသနည်း။

• ယေဟောဝါသက်သေများသည် ဘာသာပြောင်းလဲစေခြင်းစကားလုံး၏ ခေတ်သုံးအနက်အဓိပ္ပာယ်အတိုင်း အဘယ်ကြောင့်မဟုတ်ကြသနည်း။

• ယေဟောဝါသက်သေများ၏ ဧဝံဂေလိတရားဟောပြောခြင်းလုပ်ငန်းသည် မျက်မှောက်ခေတ်တွင် မည်သို့တိုးတက်ခဲ့ပြီနည်း။

[စာမျက်နှာ ၉ ပါ ရုပ်ပုံ]

ယေရှုသည် ဇွဲရှိသောဧဝံဂေလိတရားဟောပြောသူတစ်ဦးဖြစ်ပြီး ထပ်တူလုပ်ငန်းကိုလုပ်ဆောင်ရန် အခြားသူများကိုလေ့ကျင့်ပေးခဲ့

[စာမျက်နှာ ၁၀ ပါ ရုပ်ပုံ]

ပထမရာစု အသင်းတော်သားအားလုံး ဧဝံဂေလိတရားဟောပြောခြင်း၌ ပါဝင်ခဲ့ကြ

[စာမျက်နှာ ၁၁ ပါ ရုပ်ပုံ]

လူတို့ကို အတင်းအကျပ် ဘာသာပြောင်းလဲစေခြင်းသည် မှား၏