လောကီစိတ်ကူးစိတ်သန်းများကိုငြင်းပယ်၍ ဘုရားသခင့်နိုင်ငံတော်ဖြစ်ရပ်မှန်များကို မီအောင်လိုက်

“ဘုရားသခင်၏နိုင်ငံတော်နှင့် ဖြောင့်မတ်ခြင်းတရားတာ်ကို ရှေ့ဦးစွာရှာကြလော့။နောက်မှထိုအရာများကို ထပ်၍ပေးတော်မူလတ္တံ့။”—မဿဲ ၆:၃၃။

၁။ ပုံဆောင်ရာနှလုံးနှင့်စပ်လျဉ်း၍ ဘုရားသခင့်နှုတ်ကပါဌ်တော်က မည်သို့သတိပေးထားသနည်း။ ကျွန်ုပ်တို့ကိုလှည့်စားနိုင်သည့် အဓိကနည်းတစ်နည်းကား အဘယ်နည်း။

“နှလုံးသည် အသက်၏အခြေအမြစ်ဖြစ်သောကြောင့် သင်၏နှလုံးကိုအထူးသဖြင့်စောင့်ရှောက်လော့။” (သု၊ ၄:၂၃) ဤသတိပေးချက်ကို ပညာရှိရှောလမုန်မင်းကြီးပေးရန် အဘယ်ကြောင့်လိုအပ်ခဲ့သနည်း။ အကြောင်းမူကား၊ “စိတ်နှလုံးသည် ခပ်သိမ်းသောအရာထက်စဉ်းလဲတတ်၏။ အလွန်ယိုယွင်းသောသဘောရှိ” သောကြောင့်ဖြစ်သည်။ (ယေရမိ ၁၇:၉) ပုံဆောင်ရာနှလုံးသည် ကျွန်ုပ်တို့ကိုလှည့်စားနိုင်သည့် အဓိကနည်းတစ်နည်းမှာ လောကီစိတ်ကူးစိတ်သန်းများ၌ အာသာဖြေခြင်းအားဖြင့်ဖြစ်သည်။ သို့သော်စိတ်ကူးစိတ်သန်းခြင်းဆိုသည်ကား အဘယ်နည်း။ ယင်းတို့မှာယုတ္တိမတန်သောစိတ်ကူးများ၊ စိတ်ကူးယဉ်ခြင်း၊ ရောက်တတ်ရာရာ စိတ်ပျံ့လွင့်ခြင်းတို့ဖြစ်သည်။ စိတ်ကူးယဉ်ခြင်းတို့သည် လောကီစိတ်ကူးစိတ်သန်းများဖြစ်လာသည့်အခါ အချည်းနှီးသက်သက်အချိန်ကုန်ရုံမက အလွန်အန္တရာယ်ရှိပါသည်။ ထို့ကြောင့် ယင်းတို့ကို လုံးလုံးစွန့်ပစ်ငြင်းပယ်သင့်သည်။ အမှန်မှာယေရှုနည်းတူ မတရားသောအမှုကိုကျွန်ုပ်တို့ရွံမုန်းမည်ဆိုလျှင် လောကီစိတ်ကူးစိတ်သန်းများ၌ အာသာဖြေခြင်းမှ ကျွန်ုပ်တို့နှလုံးကိုကာကွယ်ထားကြမည်။—ဟေဗြဲ ၁:၈၊ ၉။

၂။ လောကီစိတ်ကူးစိတ်သန်းများကားအဘယ်နည်း။ ယင်းတို့ကို အဘယ်ကြောင့်ငြင်းပယ်သင့်သနည်း။

^၂ သို့သော် လောကီစိတ်ကူးစိတ်သန်းကားအဘယ်နည်း။ စာတန့်သြဇာလွှမ်းမိုးမှုအောက်ရှိ ဤလောကဆိုင်ရာစိတ်ကူးယဉ်များဖြစ်သည်။ ယင်းအကြောင်း တမန်တော်ယောဟန် ဤသို့ရေးသားခဲ့သည်။ “လောက၌ရှိသမျှသောအရာတည်းဟူသော ကိုယ်ကာယတပ်မက်ခြင်း၊ မျက်စိတပ်မက်ခြင်း၊ လောကီစည်းစိမ်၌ဝါကြွားခြင်းတို့သည် ခမည်းတော်နှင့်မစပ်ဆိုင်၊ လောကနှင့်သာစပ်ဆိုင်ကြ၏။” (၁ ယောဟန် ၂:၁၆။ ၅:၁၉) လောကီစိတ်ကူးစိတ်သန်းများကို ခရစ်ယာန်များအဘယ်ကြောင့်ငြင်းပယ်ရမည်နည်း။ ဤကဲ့သို့သောစိတ်ကူးစိတ်သန်းများသည် လူ့စိတ်နှလုံးတွင် အတ္တဆန်သောစိတ်ဆန္ဒများကို ပေါ်ပေါက်စေသောကြောင့်ဖြစ်သည်။ မှားယွင်းမှုကိုပြုလုပ်ခြင်းအကြောင်း စိတ်ကူးယဉ်ခြင်းသည် အမှန်မှာထိုသူပြုလုပ်မည့်အမှုကို စိတ်ကူးဖြင့်ကြိုတင်လေ့ကျင့်နေခြင်းဖြစ်သည်။ တပည့်တော်ယာကုပ် ဤသို့သတိပေးပါသည်။ “မိမိတပ်မက်သောစိတ်ဆွဲငင်ဖြားယောင်းခြင်းကိုခံသောသူမည်သည်ကား၊ အပြစ်သွေးဆောင်ခြင်းသို့ ရောက်တတ်၏။ တပ်မက်သောစိတ်သည် ပဋိသန္ဓေယူ၍ ဒုစရိုက်ကို ဖွားတတ်၏။ ဒုစရိုက်သည်လည်းပြည့်စုံလျှင် သေခြင်းကို ဖွားတတ်၏။”—ယာကုပ် ၁:၁၄၊ ၁၅။

သတိပေးချက်ဖြစ်သောဥပမာများ

၃။ အတ္တဆန်သောစိတ်ကူးစိတ်သန်းများ၏အန္တရာယ်နှင့်ပတ်သက်၍ သတိပေးချက်ဖြစ်သောအဓိကပုံသက်သေကား အဘယ်နည်း။

^၃ လောကီစိတ်ကူးစိတ်သန်းများကို အဘယ်ကြောင့်ငြင်းပယ်ရမည်အကြောင်းတင်ပြသည့် ဥပမာအချို့ကိုသုံးသပ်ကြည့်စို့။ အတ္တဆန်သောစိတ်ကူးစိတ်သန်းများ၌ အာသာဖြေခြင်း၏ဆိုးကျိုးဆိုင်ရာ အဓိကပုံဥပမာကား စာတန်မာရ်နတ်၏အဖြစ်အပျက်ပင်တည်း။ စကြဝဠာကိုပိုင်သအုပ်စိုးသူ ယေဟောဝါ၏ထူးခြားသောရာထူးဂုဏ်ဒြပ်ကို တပ်မက်၍ ဝတ်ပြုခံလိုသည်အထိ သူ၏နှလုံး၌ ပလွှားဝင့်ဝါစိတ်ကိုမွေးမြူပေးခဲ့ပါသည်။ (လုကာ ၄:၅-၈) မဖြစ်နိုင်သောစိတ်ကူးခြင်းလော။ မှန်၏။ အထူးသဖြင့်ဒုတိယသေခြင်း “မီးအိုင်” ထဲစာတန်ပစ်ချခံရပြီး အနှစ်တစ်ထောင်အဖို့ချည်နှောင်ခံရသောအခါ ထိုသို့ပင်ဖြစ်ကြောင်း အတိအလင်းထင်ရှားလိမ့်မည်။—ဗျာဒိတ် ၂၀:၁-၃၊ ၁၀။

၄။ ဧဝကိုစာတန်မည်သို့လှည့်ဖြားသနည်း။

^၄ ပထမမိန်းမဧဝ၏အဖြစ်အပျက်၌ သတိပေးချက်နောက်တစ်ခုရရှိသည်။ တားမြစ်ထားသောအသီးကိုစားလျှင် သူမသေမည်မဟုတ်၊ ဘုရားသခင်ကဲ့သို့ပင် အကောင်းအဆိုးသိလာမည်ဟူသော စိတ်ကူးစိတ်သန်းကို ဧဝစိတ်၌ပေါ်စေခြင်းဖြင့် မိမိ၏လိုဘကိုဖြည့်ဆည်းပေးရန် ဖြားယောင်းသွေးဆောင်ခဲ့သည်။ ထိုစိတ်ကူးစိတ်သန်းသည် မဖြစ်နိုင်သောအတ္တဆန်ရာဖြစ်သလော။ ဧဝနှင့်သူ၏ခင်ပွန်းအာဒံကို ယေဟောဝါအပြစ်ဒဏ်စီရင်ခဲ့ခြင်းက ထိုသို့သာဖြစ်ကြောင်းထင်ရှားပေသည်။ သူတို့အပြုအမူ၏ရလဒ်အနေနှင့် ကိုယ်တိုင်အတွက်သော်လည်းကောင်း၊ မစုံလင်သောမျိုးဆက်အားလုံးအတွက်သော်လည်းကောင်း ပရဒိသုတွင်အသက်ရှင်ခွင့်ကို သူတို့ဆုံးရှုံးခဲ့ပါသည်။—ကမ္ဘာဦး ၃:၁-၁၉။ ရောမ ၅:၁၂။

၅။ ဘုရားသခင့်ကောင်းကင်သားအချို့ ပျက်စီးသွားသည့်အကြောင်းကား အဘယ်နည်း။ သူတို့၏နောက်ဆုံးဖြစ်ရပ်ကားအဘယ်နည်း။

^၅ ဘုရားသခင့်ကောင်းကင်သားအချို့၏ သတိပေးပုံသက်သေလည်းရှိသည်။ (ကမ္ဘာဦး ၆:၁-၄) ယေဟောဝါနှင့်အတူကောင်းကင်တွင် ကောင်းချီးများခံစားခြင်း၌ရောင့်ရဲနေမည့်အစား ကိလေသာကိုခံစားလို၍ ကမ္ဘာမြေကြီးပေါ်ရှိအမျိုးသမီးများအကြောင်း စိတ်ကူးကြသည်။ ယင်းစိတ်ကူးအတိုင်းပြုမူလိုက်သည့်အတွက် နာခံမှုမရှိသောထိုကောင်းကင်တမန်များသည် တာတရပ်စ်အရပ်၏ဝိညာဏမှောင်ထုတွင် ယခုချုပ်ထားခံရ၍ ယေရှုခရစ်၏အနှစ်တစ်ထောင်မင်းရိုက်ရာအကုန်တွင် ဖျက်ဆီးခံရရန် စောင့်ဆိုင်းနေကြပါသည်။—၂ ပေတရု ၂:၄။ ယုဒ ၆။ ဗျာဒိတ် ၂၀:၁၀။

လောကီစိတ်ကူးစိတ်သန်းများကို ငြင်းပယ်

၆၊ ၇။ ရုပ်ပစ္စည်းနှင့်ပတ်သက်၍ လောကီစိတ်ကူးစိတ်သန်းများသည် အဘယ်ကြောင့်အန္တရာယ်ရှိ၍ လှည့်ဖြားခြင်းမျှဖြစ်သနည်း။

^၆ စာတန်ပြုစုပျိုးထောင်လိုက်သော အန္တရာယ်အရှိဆုံးဖြစ်ပြီး အများ၌ဖြစ်တတ်သောစိတ်ကူးစိတ်သန်းများအနက်တစ်ခုကို ယခုဆင်ခြင်သုံးသပ်ကြည့်စို့။ ဆက်သွယ်ရေးလမ်းကြောင်းအမျိုးမျိုးမှတစ်ဆင့် လောကီစိတ်ကူးစိတ်သန်းများဖြင့်အာသာဖြေရန် သွေးဆောင်ခံရသည်။ အများအားဖြင့် စည်းစိမ်ဥစ္စာမက်မောခြင်းကြောင့်ဖြစ်သည်။ ဥစ္စာရှိခြင်းကိုယ်နှိုက်သည် အပြစ်မရှိပါ။ ဘုရားတရားကြည်ညိုသောအာဗြဟံ၊ ယောဘနှင့် ဒါဝိဒ်မင်းကြီးတို့သည် ချမ်းသာကြွယ်ဝသူများဖြစ်ကြသည်။ သို့သော် စည်းစိမ်ဥစ္စာမက်မောသူများမဟုတ်ကြချေ။ ရုပ်ဝါဒနှင့်ဆိုင်သောစိတ်ကူးစိတ်သန်းများက ကြွယ်ဝချမ်းသာရန် နှစ်ချီကြိုးပမ်းလုပ်ကိုင်ဖို့လှုံ့ဆော်ပေးပါသည်။ ဤကဲ့သို့သောစိတ်ကူးစိတ်သန်းများက မြင်းလောင်းခြင်း၊ ထီထိုးခြင်းအစရှိသည့် လောင်းကစားမှုအမျိုးမျိုးကိုလည်း ပြုလုပ်စေသည်။ ငွေရတတ်ခြင်းနှင့်စပ်လျဉ်း၍ ထင်ယောင်ထင်မှားမဖြစ်ပါနှင့်။ စည်းစိမ်ဥစ္စာသည် လုံခြုံမှုရှိစေမည်ဟုယူမှတ်လျှင် ဤယုတ္တိတန်သောပညာရှိစကားကို သုံးသပ်ပါ။ “အမျက်ဒေါသထွက်သောကာလ၌ စည်းစိမ်သည် အကျိုးမပေးနိုင်။ ဖြောင့်မတ်ခြင်းပါရမီမူကား၊ သေခြင်းမှကယ်တင်တတ်၏။” (သု၊ ၁၁:၄) အမှန်တွင်၊ စည်းစိမ်ဥစ္စာသည် “ကြီးစွာသောဒုက္ခ” ကို ကပ်ကျော်စေနိုင်လိမ့်မည်မဟုတ်ပေ။—မဿဲ ၂၄:၂၁။ ဗျာဒိတ် ၇:၉၊ ၁၄။

^၇ စည်းစိမ်ဥစ္စာသည် ကျွန်ုပ်တို့ကို အလွယ်တကူလှည့်စားနိုင်သည်။ ထို့ကြောင့် ကျွန်ုပ်တို့အား၊ “ငွေရတတ်သောသူက ငါ့စည်းစိမ်သည်ခိုင်ခံ့သောမြို့ဖြစ်၏။ မြင့်သောမြို့ရိုးနှင့်တူသည်ဟုထင်တတ်၏။” ဟု ပြောထားသည်။ (သု၊ ၁၈:၁၁) မှန်သည်၊ သူ၏ ‘အထင်၌’ သာဖြစ်သည်။ အကြောင်းမူကား၊ မထိန်းချုပ်နိုင်သည့်ငွေဖောင်းပွမှု၊ စီးပွားရေးပြိုကွဲမှု၊ နိုင်ငံရေးတော်လှန်မှု သို့မဟုတ် ရောဂါခရီးလမ်းဆုံးသို့ရောက်နေသည့်အချိန်အခါများတွင် စည်းစိမ်ရှိခြင်းသည် အဘယ်အကာအကွယ်မျှမပေးနိုင်ပါ။ ဥစ္စာဓနကိုအားထားခြင်း၏မိုက်မဲမှုအကြောင်း ယေရှုခရစ်သတိပေးခဲ့ပါသည်။ (လုကာ ၁၂:၁၃-၂၁) တမန်တော်ပေါလု၏သတိပေးစကားများကိုလည်း သိထားကြသည်။ “ငွေကိုတပ်မက်ခြင်းသည် မကောင်းသောအမှုအပေါင်းတို့တွင် မူလအမြစ်ဖြစ်သတည်း။ လူအချို့တို့သည် ငွေကိုတပ်မက်သောကြောင့် ယုံကြည်ခြင်းတရားလမ်းမှလွဲသွား၍ ပူပန်ခြင်းဝေဒနာများနှင့် ကိုယ်ကိုယ်ကိုထုတ်ချင်းခပ်အောင်ထိုးကြပြီ။”—၁ တိမောသေ ၆:၁၀။

၈။ လိင်ဆိုင်ရာလောကီစိတ်ကူးစိတ်သန်းများကို မည်မျှလူကြိုက်များသနည်း။ ယင်းတို့သည် အဘယ်အန္တရာယ်များဖြစ်စေသနည်း။

^၈ အခြားသောစိတ်ကူးစိတ်သန်းများသည် မတရားမေထုန်နှင့်စပ်လျဉ်းသည်။ လိင်ဆိုင်ရာစိတ်ကူးစိတ်သန်းများအကြောင်း အပြစ်သားများ မည်မျှထိတိုင်တွေးတောတတ်သည်ကို တစ်စုံတစ်ရာသောတယ်လီဖုန်းနံပါတ်လှည့်၍ ကြားနာနိုင်သည့်ညစ်ညမ်းသောစကားများကို လူကြိုက်များခြင်းကတင်ပြပါသည်။ အမေရိကန်ပြည်တွင် ဒိုင်အဲလ်အေပေါန်ခေါ် ထိုသို့သောဖုန်းနံပါတ်သည် ဝင်ငွေအထူးကောင်းသောစီးပွားဖြစ်နေပါသည်။ မတရားမေထုန်အကြောင်းကို စိတ်စွဲလမ်းတွေးတောနေကြမည်ဆိုလျှင် သန့်ရှင်းသောခရစ်ယာန်များအဖြစ်ဟန်ဆောင်နေကြရာ အရေခြုံများသာဖြစ်နေကြမည်မဟုတ်လော။ ဤကဲ့သို့သောစိတ်ကူးစိတ်သန်းများမှတစ်ဆင့် စာရိတ္တယိုယွင်းသောရင်းနှီးမှုများသို့ ဦးတည်နိုင်သည့်အန္တရာယ်ရှိသည်မဟုတ်လော။ ယင်းသို့ဖြစ်ပျက်ခဲ့၍၊ မတရားမေထုန်ပြုမှုနှင့် သူ့မယားပြစ်မှားမှုကြောင့် အချို့တို့သည် ခရစ်ယာန်အသင်းတော်မှနှင်ထုတ်ခြင်းခံခဲ့ရကြပြီ။ မဿဲ ၅:၂၇၊ ၂၈ ပါဤယေရှု၏စကားများအတိုင်းဆိုလျှင် ဤကဲ့သို့သောစိတ်ကူးစိတ်သန်းများဖြင့် စွဲစွဲမြဲမြဲအာသာဖြေသူများသည် သူတို့နှလုံးထဲတွင် မတရားမေထုန်ပြုခြင်းအပြစ် ရှိသူများမဟုတ်ပေလော။

၉။ လောကီစိတ်ကူးစိတ်သန်းများကိုရှောင်ကြဉ်ရန် သတိပေးချက်အဖြစ် ကျမ်းစာ၌ အဘယ်သြဝါဒများရှိသနည်း။

^၉ ဤကဲ့သို့သောစိတ်ကူးစိတ်သန်းများဖြင့်အာသာဖြေရန် အပြစ်သားများ၏နှလုံးတွင်း ပေါ်တတ်သည့်ဉာဉ်ဆိုးကိုဆီးတားဖို့အတွက် ပေါလု၏သတိပေးချက်ကို စွဲမှတ်ထားကြရမည်။ “ငါတို့ကိုစစ်ကြောစီရင်တော်မူသောသူ [ဘုရားသခင့်] ရှေ့၌ မထင်ရှားသောအရာတစ်စုံတစ်ခုမျှမရှိ။ ခပ်သိမ်းသောအရာတို့သည် အကွယ်အကာမရှိဘဲ မျက်မှောက်တော်၌လှန်ထားလျက်ရှိကြ၏။” (ဟေဗြဲ ၄:၁၃) “မျက်မြင်မရသောဘုရားသခင်ကို မြင်ရဘိသကဲ့သို့ တည်ကြည်ခြင်းရှိ” ခဲ့သောမောရှေနှင့် အမြဲတူလိုသင့်သည်။ (ဟေဗြဲ ၁၁:၂၇) မှန်သည်၊ လောကီစိတ်ကူးစိတ်သန်းများကို ယေဟောဝါနှစ်သက်တော်မမူ၊ ကိုယ်ကိုယ်ကိုအန္တရာယ်သာပေးတတ်သည်ဟု အမြဲသတိပေးနေသင့်သည်။ အထူးသဖြင့်စိတ်ချုပ်တည်းခြင်းအပါအဝင် ဘုရားသခင့်ဝိညာဉ်အသီးများကို မွေးမြူပေးနေခြင်းငှာရတက်မအေးဖြစ်နေသင့်သည်။ အကြောင်းမူကား၊ ဇာတိပကတိ၌မျိုးစေ့ကြဲမည်ဆိုလျှင် ဇာတိပကတိအားဖြင့် ပုပ်ပျက်ခြင်းအသီးအနှံကိုရိတ်ရလိမ့်မည်မှာသေချာပါသည်။—ဂလာတိ ၅:၂၂၊ ၂၃၊ ၆:၇၊ ၈။

ဘုရားသခင့်နိုင်ငံတော်၏ဖြစ်ရပ်မှန်များ

၁၀၊ ၁၁။ (က) ဖန်ဆင်းရှင်သည် အမှန်ဖြစ်တော်မူကြောင်း အဘယ်အချက်အလက်တို့က သက်သေထူသနည်း။ (ခ) သမ္မာကျမ်းစာသည် အမှန်ပင်ဘုရားသခင့်နှုတ်ကပါဌ်တော်ဖြစ်ကြောင်း အဘယ်သက်သေအထောက်အထားရှိသနည်း။ (ဂ) ဘုရားသခင့်နိုင်ငံတော်၏ဘုရင်သည် အမှန်ဖြစ်တော်မူကြောင်း အဘယ်သာဓကရှိသနည်း။

^၁၀ လောကီစိတ်ကူးစိတ်သန်းများကိုငြင်းပယ်ရန် အကောင်းဆုံးနည်းကား ဘုရားသခင့်နိုင်ငံတော်ဖြစ်ရပ်မှန်များကို မီအောင်လိုက်နေခြင်းဖြစ်သည်။ ဘုရားသခင်ပြုစုပျိုးထောင်ပေးသည့် နိုင်ငံတော်ဖြစ်ရပ်မှန်များသည် လောကီစိတ်ကူးစိတ်သန်းများနှင့် အခြားကြီးခြားသည်။ ဘုရားသခင်သည် အမှန်ရှိသလော။ ကိုယ်တော်တည်ရှိတော်မူကြောင်းကို သံသယလုံးဝရှိစရာမလိုပါ။ မျက်မြင်ရဖန်ဆင်းရာများက ယင်းကိုသက်သေထူသည်။ (ရောမ ၁:၂၀) ဤတွင် ကင်းမျှော်စင်အသင်းထုတ်ဝေသည့် The Divine Plan of the Ages စာအုပ်တွင် လွန်ခဲ့သောအနှစ်တစ်ရာကျော်က ပြောဆိုထားသည့်ဤစကားကို သတိရစေသည်။ “မိုးကောင်းကင်သို့ အဝေးကြည့်မှန်ပြောင်းဖြင့်၊ သို့မဟုတ် သာမန်မျက်စိဖြင့်သာ ကြည့်ရုံကြည့်လိုက်ရာ ဖန်ဆင်းခြင်း၏ကြီးမားကျယ်ဝန်းခြင်း၊ ယင်း၏အချိုးအစားညီညွတ်မှု၊ လှပတင့်တယ်၊ စည်းစနစ်ကျမှု၊ အထူးထူးအထွေထွေဖြစ်မှုတို့ကိုမြင်လျက်နှင့် ယင်းတို့၏ဖန်ဆင်းရှင်သည် ဉာဏ်ပညာနှင့်တန်ခိုးအာနိသင် သာလွန်ကြီးမြတ်တော်မူကြောင်းကို သံသယရှိနေမည်၊ ဤသို့သောအစီအစဉ်ကျနမှုသည် ဖန်ဆင်းရှင်မပါဘဲ မတော်တဆဖြစ်ပျက်လာသည်ဟု တစ်ခဏသာထင်မှတ်မည်ဆိုလျှင် သမ္မာကျမ်းစာက ထိုသူအား မိုက်သောသူ (စဉ်းစားဆင်ခြင်မှုမရှိ သို့မဟုတ် လျစ်လျူရှုသူ) ဟုခေါ်ဆိုနိုင်သည်တိုင် ဆင်ခြင်တွေးတောမှုကို အသုံးမပြုလျစ်လျူရှုထားပြီ။”—ဆာလံ ၁၄:၁။

^၁၁ သမ္မာကျမ်းစာတွင် ဘုရားသခင့်နိုင်ငံတော်အကြောင်း အားလုံးသိရှိနိုင်ပါသည်။ သမ္မာကျမ်းစာသည် ဘုရားသခင်၏မှတ်တမ်းတင်နှုတ်ကပါဌ်တော်အမှန်ဖြစ်သလော။ ယင်း၏ညီညွတ်မှု၊ သိပ္ပံနည်းကျသည့်တိကျမှန်ကန်မှု၊ လူ့အသက်တာဘဝကို ပြုပြင်ပြောင်းလဲပေးနိုင်ခြင်းနှင့် အထူးသဖြင့် ယင်း၏ပရောဖက်ပြုချက်များ ပြည့်စုံခြင်းတို့က ဘုရားသခင့် နှုတ်ကပါဌ်တော် အမှန်ဖြစ်ကြောင်း သေချာစေသည်။aဘုရားသခင့် နိုင်ငံတော်ဘုရင် ယေရှုခရစ်ကောမည်သို့နည်း။ ကိုယ်တော်အမှန်တည်ရှိခဲ့သလော။ ခရစ်ဝင်ကျမ်းများနှင့်ခရစ်ယာန်ဂရိကျမ်း၏ ဘုရားမှုတ်သွင်းခံစာစောင်တို့က ယေရှုခရစ်၏သမိုင်းဝင်အဖြစ်ကို တပ်အပ်သေချာစွာအသားပါပါသက်သေထူသည်။ ယေရှု၏သမိုင်းဝင်အဖြစ်ကို ကိုယ်တော်အားပုဂ္ဂိုလ်တစ်ဦးအဖြစ်ဖော်ညွှန်းထားသည့် ဂျူးတယ်လ်မုဒ်ကျမ်းဂန်၏ အထောက်အထားလည်းရှိသည်။ စီအီးပထမရာစု၏ ဂျူးနှင့်ရောမသမိုင်းဆရာများကလည်း ကိုယ်တော်အားပုဂ္ဂိုလ်တစ်ဦးအဖြစ် သတ်မှတ်ကြသည်။

၁၂၊ ၁၃။ ဘုရားသခင့်နိုင်ငံတော်သည် ဖြစ်ရပ်မှန်ဖြစ်သည်ကို အဘယ်အချက်အလက်တို့က သက်သေထူသနည်း။

^၁၂ ဘုရားသခင့်နိုင်ငံတော်၏ ဖြစ်ရပ်မှန်ကိုယ်နှိုက်ကောမည်သို့နည်း။ နာမည်ကျော်ကြားသူ ပရက်စ်ဘီတေးရီယန်းအသင်းဝင်တစ်ဦး၏ ဤမကျေမချမ်းတင်ပြသည့်အတိုင်း ခရစ်ယာန်ဘောင်က ယင်းကိုအများအားဖြင့်လျစ်လျူရှုထားသည်။ “ဘုရားသခင့်နိုင်ငံတော်၏ဖြစ်ရပ်မှန်အကြောင်း မိမိ၏အသင်းသားများအား တရားဟောဆရာရှင်းပြသည်ကို မကြားရသည်မှာ အနှစ်သုံးဆယ်မကတော့သည်ကား အမှန်။” အမှန်သော်ကား၊ ဘုရားသခင့်နိုင်ငံတော်အားဖြင့် ယေဟောဝါ၏နာမတော်အား သင်္ကာယနကင်းရှင်းရေးသည် ကိုယ်တော့်နှုတ်ကပါဌ်တော်၏အဓိကအချက်ပင်ဖြစ်သည်။ ကိုယ်တော်၏နိုင်ငံတော်ဆိုင်ရာကတိတော်ကို ဘုရားသခင်ကိုယ်တော်တိုင် ဤသို့မြွက်ဆိုသည်။ “သင်နှင့်မိန်းမကိုလည်းကောင်း၊ သင်၏အမျိုးအနွယ်နှင့်မိန်းမ၏အမျိုးနွယ်ကိုလည်းကောင်း ငါသည်ရန်ငြိုးဖွဲ့စေမည်။ သူသည် သင်၏ခေါင်းကိုကြိတ်လိမ့်မည်၊ သင်သည် သူ၏ဖနောင့်ကိုကြိတ်လိမ့်မည်။” (ကမ္ဘာဦး ၃:၁၅) ဘုရားသခင့်နိုင်ငံတော်ကို အထူးသဖြင့်ရှောလမုန်မင်းနန်းစံချိန် ဣသရေလနိုင်ငံဖြင့်ပုံဆောင်ပါသည်။ (ဆာလံ ၇၂) ထို့ပြင် ဘုရားသခင့်နိုင်ငံတော်သည် ယေရှုဟောပြောသည့်အဓိကအကြောင်းဖြစ်သည်။ (မဿဲ ၄:၁၇) မဿဲအခန်းကြီး ၁၃ အစရှိသောကိုယ်တော်၏ပုံဥပမာများတွင် ယင်းကိုအထူးပေါ်လွင်စေခဲ့သည်။ ဘုရားသခင့်နိုင်ငံတော်အတွက်ဆုတောင်းရန်နှင့် ယင်းကိုရှေ့ဦးရှာရန် ယေရှုမှာကြားတော်မူသည်။ (မဿဲ ၆:၉၊ ၁၀၊ ၃၃) အမှန်မှာ၊ ဘုရားသခင့် နိုင်ငံတော်အကြောင်း ခရစ်ယာန်ဂရိကျမ်းစာစောင်များတွင် အကြိမ်ပေါင်း ၁၅၀ နီးပါးတင်ပြထားသည်။

^၁၃ ဘုရားသခင့် နိုင်ငံတော်သည် အခွင့်အာဏာတန်ခိုးရှိသော တကယ့်အုပ်ချုပ်မှုဖြစ်၍ ရသင့်ရထိုက်သော မျှော်လင့်ရာအားလုံးကို ဖြည့်ဆည်းပေးပါလိမ့်မည်။ ယင်း၏ဥပဒေစည်းကမ်းချက်များကို သမ္မာကျမ်းစာ၌ တွေ့ရှိနိုင်သည်။ ဘုရားသခင့် နိုင်ငံတော်သည် များစွာသောအရာတို့ကို ဖြစ်မြောက်အောင်မြင်စေခဲ့ပြီ။ ယင်း၌ သစ္စာရှိလက်အောက်ခံ ယေဟောဝါ၏သက်သေခံ ၄,၀၀၀,၀၀၀ ကျော်ရှိသည်။ မဿဲ ၂၄:၁၄ ပြည့်စုံချက်အရ သူတို့လည်း တိုင်းနိုင်ငံပေါင်း ၂၁၁ နိုင်ငံတွင် ဘုရားသခင့်နိုင်ငံတော်နှင့်ယှဉ်သောသတင်းကောင်းကို ဟောပြောနေကြပါသည်။ သူတို့၏ ၁၉၉၁ လုပ်ငန်းတော်နှစ်အတွင်း ဘုရားသခင့်နိုင်ငံတော်သတင်းကောင်းကို ၉၅၁,၈၇၀,၀၂၁ နာရီမျှဟောပြောခဲ့သည်။ ဤလုပ်ငန်းကြောင့် သမ္မာကျမ်းစာမှ “စင်ကြယ်သောဘာသာစကား” ကိုလူပေါင်းမြောက်မြားစွာ တတ်မြောက်လာသည်နှင့်အမျှ တည်မြဲသည့်အကောင်အထည်များ ပေါ်လာသည်ကိုတွေ့ရှိရ၏။—ဇေဖနိ ၃:၉။

ဘုရားသခင့်နိုင်ငံတော်ဖြစ်ရပ်မှန်များကို မီအောင်လိုက်ခြင်း

၁၄။ ဘုရားသခင့်နိုင်ငံတော်ဖြစ်ရပ်မှန်ကို တန်ဖိုးထားလေးမြတ်သောသဘော မည်သို့တိုးပွားလာနိုင်သနည်း။

^၁၄ ထိုသို့ဆိုလျှင် ဘုရားသခင့်နိုင်ငံတော်ဖြစ်ရပ်မှန်များကို မည်သို့မီအောင်လိုက်နိုင်မည်နည်း။ ကျွန်ုပ်တို့၏မျှော်လင့်ချက်သည် ခိုင်မာသောယုံကြည်ချက်များအပေါ် အခြေချထားရမည်။ ဘုရားသခင်ကတိတော်ထားရာကမ္ဘာသစ်သည် ကျွန်ုပ်တို့အဖို့ တကယ်ဖြစ်ရမည်။ (၂ ပေတရု ၃:၁၃) “ဘုရားသခင်သည် သူတို့၏မျက်စိ၌မျက်ရည်ရှိသမျှကိုသုတ်တော်မူမည်။ နောက်တစ်ဖန်သေဘေးမရှိရ။ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိရ” ဟူသောကတိတော်ကို ယုံကြည်စိတ်ချရမည်။ (ဗျာဒိတ် ၂၁:၄) ဤမျှော်လင့်ချက်သည် စိတ်ကူးစိတ်သန်းမျှမဟုတ်ကြောင်း မည်သို့သေချာစေနိုင်မည်နည်း။ ဘုရားသခင်ကန့်သတ်ထားရာအချိန်တိုင်သော် အမှန်ဖြစ်မြောက်လာပါမည်။ အကြောင်းမူကား၊ ကိုယ်တော်သည် မုသာမသုံးနိုင်ပေ။ (တိတု ၁:၁၊ ၂။ ဟေဗြဲ ၆:၁၈) ထိုကတိတော်များကို ဆင်ခြင်သုံးသပ်ရန်လိုပါသည်။ ဘုရားသခင့်ကမ္ဘာသစ်တွင်ရောက်ရှိနေ၍ ယင်း၏ကောင်းချီးများကိုခံစားနေသည်ဟု မြင်ယောင်နေခြင်းသည် ဖြစ်နိုင်စရာအကြောင်းမရှိသည့် စိတ်ကူးစိတ်သန်းမျှမဟုတ်ဘဲ ယုံကြည်ခြင်း၏သာဓကပင်ဖြစ်ပေသည်။ ပေါလုဖော်ပြသည်အတိုင်းပင် “ယုံကြည်ခြင်းသည် မျှော်လင့်သောအရာတို့ကိုမျက်မှောက်ပြုခြင်းဖြစ်၏။ မမြင်သေးသောအရာ [ဖြစ်ရပ်မှန်] တို့ကိုသိမှတ်စွဲလမ်းခြင်းအကြောင်းဖြစ်၏။” (ဟေဗြဲ ၁၁:၁) ဘုရားသခင့်နှုတ်ကပါဌ်တော်နှင့် ယင်းကိုနားလည်စေရန် အထောက်အကူပြုသော ခရစ်ယာန်စာပေများကို မှန်မှန်လေ့လာဆည်းပူးပြီး ကျင့်သုံးခြင်းအားဖြင့် ကျွန်ုပ်တို့ယုံကြည်ခြင်းကို ခိုင်မြဲစေကြစို့။ စည်းစနစ်အတိုင်းဖြစ်စေ၊ အလွတ်သဘောအရဖြစ်စေ ဘုရားသခင့်နိုင်ငံတော်အကြောင်းကို သူတစ်ပါးအားများများပြောပြလေ ကျွန်ုပ်တို့ယုံကြည်ခြင်းပိုခိုင်မြဲလာ၍ ယင်းကိုအားထားမျှော်လင့်ချက် ပိုတောက်ပစေမည်ဖြစ်သည်။

၁၅။ ခရစ်ယာန်ဓမ္မအမှုဆောင်ခြင်းနှင့်စပ်လျဉ်း၍ အဘယ်တာဝန်ရှိသနည်း။

^၁၅ ဓမ္မအမှုတွင်ပါဝင်ရာ၌ ကျွန်ုပ်တို့၏အရည်အချင်းကိုတိုးတက်စေခြင်းအားဖြင့် ဘုရားသခင့်နိုင်ငံတော်ဖြစ်ရပ်မှန်များနှင့်အညီ လုပ်ဆောင်ရန်လည်းလိုအပ်ပါသည်။ လုပ်ကိုင်စရာလုပ်ငန်းများစွာရှိသေးသည့်အတွက် ယင်းကိုမည်သို့ပြုလုပ်ဆောင်ရွက်မည်နည်း။ (မဿဲ ၉:၃၇၊ ၃၈) ပညာလိုအိုသည်မရှိ ဟူသောစကားမှန်ပါသည်။ သက်သေခံခြင်းလုပ်ငန်းတွင်ပါဝင်ခဲ့သည်မှာ နှစ်ပေါင်းများစွာရှိဦးတော့ တိုးတက်နိုင်ပါသေးသည်။ ဘုရားသခင့်နှုတ်ကပါဌ်တော်ကို ပိုမိုထိရောက်စွာကိုင်တွယ်ပေးခြင်းအားဖြင့်ဘုရင်ယေရှုခရစ်၏စကားကို သူတစ်ပါးကြားနာစေရန် ပိုမိုကူညီပေးနိုင်ပါလိမ့်မည်။ (ယောဟန် ၁၀:၁၆ နှိုင်းယှဉ်။) လူတို့၏ထာဝရကြမ္မာနှင့်စပ်လျဉ်း၍ ကျွန်ုပ်တို့စဉ်းစားလိုက်သောအခါ သူတို့သည် “သိုး” ဖြစ်လိုသည်၊ သို့မဟုတ် “ဆိတ်” ဖြစ်လိုသည်ကိုတင်ပြကြရန် အကြိမ်ကြိမ်အခွင့်ပေးခြင်းငှာ မိမိတို့ရပ်ကွက်ကိုစေ့ငစွာအမှုဆောင်လိုသင့်သည်။ (မဿဲ ၂၅:၃၁-၄၆) ယင်းကြောင့် အိမ်တွင်လူမတွေ့ခဲ့သည့်နေရာနှင့် အထူးသဖြင့် ဘုရားသခင့်နိုင်ငံတော်သတင်းကောင်းကို စိတ်ဝင်စားသူများ၏လိပ်စာများကို အသေအချာမှတ်သားထားရန်လိုသည်။

ဘုရားသခင့်နိုင်ငံတော်ကိုမီအောင်ဆက်လိုက်နေ

၁၆။ ဘုရားသခင့်နိုင်ငံတော်ဖြစ်ရပ်မှန်များကို မီအောင်လိုက်ခြင်းအတွက် မည်သူတို့သည် ပုံသက်သေကောင်းတင်ပြခဲ့သနည်း။ ဘုရားသခင့်နိုင်ငံတော်ကို သူတို့မည်သို့ “ဝင်စား” နေကြသနည်း။

^၁၆ ဘုရားသခင့်နိုင်ငံတော်ဖြစ်ရပ်မှန်များကို မီအောင်ဆက်လိုက်ခြင်းငှာ ဝီရိယစိုက်ထုတ်ရန်လိုသည်။ ကျန်ကြွင်းသောဘိသိက်ခံခရစ်ယာန်များ၏ ဇွဲလုံ့လရှိပုံသက်သေသည် အားတက်ဖွယ်မဟုတ်ပေလော။ သူတို့သည်ဘုရားသခင့်နိုင်ငံတော်ဖြစ်ရပ်မှန်များကို ဆယ်စုနှစ်ပေါင်းများစွာ မီအောင်လိုက်ခဲ့ပေပြီ။ ဤသို့မီအောင်လိုက်နေခြင်းကို ယေရှု၏စကားတွင် ပေါ်လွင်ပါသည်။ “ဗတ္တိဇံဆရာယောဟန်လက်ထက်မှစ၍ ယခုတိုင်အောင် ကောင်းကင်နိုင်ငံတော်ကို ပန်းတိုင်ထား၍ အနိုင်အထက်ကြိုးစားနေကြ၏။ အနိုင်အထက်ကြိုးစားနေသောသူတို့သည်လည်း ဝင်စားရကြ၏။” (မဿဲ ၁၁:၁၂၊ ကဘ) ဤတွင်ဘုရားသခင့်နိုင်ငံတော်ကို ရန်သူတို့လုယူအနိုင်အထက်ပြုခြင်းကိုမဆိုလိုဘဲ နိုင်ငံတော်ဝင်စားမည့်သူများ၏လုပ်ငန်းနှင့်စပ်ဆိုင်သည်။ ကျမ်းစာပညာရှင်တစ်ဦးက ဤသို့ဆိုသည်။ “ဤနည်းအားဖြင့် နီးကပ်လာသောမေရှိယသခင်၏နိုင်ငံတော်အတွက် စိတ်အားထက်သန်စွာကြိုးစားအားထုတ်ခြင်းကို ဖော်ပြထားပါသည်။” ဘိသိက်ခံသူများသည် ဘုရားသခင့်နိုင်ငံတော်ကို မိမိတို့ကိုယ်ပိုင်ဖြစ်လာစေရန် အတတ်နိုင်ဆုံးကြိုးစားခဲ့ကြပြီ။ ဘုရားသခင့်ကောင်းကင်နိုင်ငံတော်၏ ကမ္ဘာမြေကြီးပေါ်နေမည့်လက်အောက်ခံများအဖြစ် အရည်အချင်းပြည့်မီဖို့ရန် “အခြားသိုး” တို့လည်းထပ်တူပင် အားသွန်ခွန်စိုက်ကြိုးစားကြရမည်။—ယောဟန် ၁၀:၁၆။

၁၇။ လောကီစိတ်ကူးစိတ်သန်းများကို မီအောင်လိုက်နေသူတို့၏အဖို့ကား အဘယ်နည်း။

^၁၇ ကျွန်ုပ်တို့အသက်ရှင်နေရသည့်အချိန်ပိုင်းကား အခွင့်ထူးသည့်ကာလပိုင်းဖြစ်သည်အမှန်။ လောကီစိတ်ကူးစိတ်သန်းများကို မီအောင်လိုက်နေသူတို့သည် တစ်နေ့နေ့တွင် ဖြစ်ရပ်မှန်သက်သက်ကို ပက်ပင်းတိုးကြရလိမ့်မည်။ ဤစကားများက သူတို့အဖို့ဖော်ပြပါသည်။ “မွတ်သိပ်သောသူသည် အိပ်မက်တွင်စားရသည်ဟုထင်သော်လည်း နိုးသောအခါ အမွတ်အသိပ်မပြေသကဲ့သို့လည်းကောင်း၊ ရေငတ်သောသူသည် အိပ်မက်တွင်သောက်ရသည်ဟုထင်သော်လည်း နိုးသောအခါ နွမ်းနယ်လျက်၊ တောင့်တလျက်ရှိသကဲ့သို့လည်းကောင်း” ဖြစ်မည်။ (ဟေရှာယ ၂၉:၈) ဤလောက၏စိတ်ကူးစိတ်သန်းများသည် မည်သူကိုမျှ ကျေနပ်ရောင့်ရဲမှု၊ ပျော်ရွှင်မှုမပေးနိုင်သည်ကားအမှန်ပင်။

၁၈။ ဘုရားသခင့်နိုင်ငံတော်ဖြစ်ရပ်မှန်ကိုထောက်၍ အဘယ်မျှော်လင့်ချက်ဖြင့် အဘယ်လမ်းစဉ်ကိုမီအောင်လိုက်နေသင့်သနည်း။

^၁၈ ယေဟောဝါ၏နိုင်ငံတော်သည် ဖြစ်ရပ်မှန်ဖြစ်သည်။ ယင်းသည် စိုးမိုးအုပ်ချုပ်နေပြီဖြစ်၍ ဆိုးယုတ်သောအစီအစဉ်စနစ်မူကား ထာဝရပျက်စီးလုဆဲရှိသည်။ ထိုကြောင့် ပေါလု၏သြဝါဒကို နှလုံးပိုက်ပါလေ။ “အခြားသောသူတို့သည် အိပ်ပျော်သကဲ့သို့ ငါတို့သည်အိပ်မပျော်ဘဲ သမ္မာသတိရှိ၍စောင့်ကြကုန်အံ့။” (၁ သက်သာလောနိတ် ၅:၆) ဘုရားသခင့်နိုင်ငံတော်ဖြစ်ရပ်မှန်များအပေါ် ကျွန်ုပ်တို့စိတ်စွဲလမ်းနေကြခြင်းအားဖြင့် ထာဝရကောင်းချီးများကိုခံစားကြစို့လေ။ ကျွန်ုပ်တို့အား ဘုရားသခင့်နိုင်ငံတော်ဘုရင်က ဤသို့မိန့်မြွက်ခြင်းကို ကြားနာရသူများ ဖြစ်ကြပါစေ။ “ငါ့ခမည်းတော်ထံကောင်းချီးမင်္ဂလာကိုခံသောသူတို့ ကမ္ဘာဦးမှကပင် သင်တို့အဖို့ပြင်ဆင်သောနိုင်ငံကိုလာ၍ အမွေခံကြလော့။”—မဿဲ ၂၅:၃၄။

[အောက်ခြေမှတ်ချက်များ]

သင်မည်သို့ဖြေဆိုမည်နည်း

▫ လောကီစိတ်ကူစိတ်သန်းများကား အဘယ်နည်း။ ယင်းတို့ကိုအဘယ်ကြောင့် ငြင်းပယ်သင့်သနည်း။

▫ လောကီစိတ်ကူစိတ်သန်းများဖြင့် အာသာဖြေခြင်း၏မိုက်မဲမှုကို အဘယ်ဥပမာများကတင်ပြသနည်း။

▫ ဖန်ဆင်းရှင်၊ ကိုယ်တော်၏မှတ်တမ်းတင်နှုတ်ကပါဌ်တော်၊ ယေရှုခရစ်တော်နှင့် ဘုရားသခင့်နိုင်ငံတော်သည် ဖြစ်ရပ်မှန်များဖြစ်ကြောင်း အဘယ်အချက်အလက်များက သက်သေထူသနည်း။

▫ ဘုရားသခင့်နိုင်ငံတော်ဖြစ်ရပ်မှန်များကို ယုံကြည်အားထားမှု မည်သို့ခိုင်ခံ့မြဲမြံလာနိုင်သနည်း။

[စာမျက်နှာ ၁၆ ပါ ရုပ်ပုံ]

ဘုရားသခင့်နိုင်ငံတော်ဖြစ်ရပ်မှန်များကို မီအောင်လိုက်ရန် နည်းတစ်နည်းကား သတင်းကောင်းဟောပြောခြင်းဖြစ်

[စာမျက်နှာ ၁၇ ပါ ရုပ်ပုံ]

ဘုရားသခင့်နှုတ်ကပါဌ်တော်ကို အပတ်တကုတ်လေ့လာခြင်းအားဖြင့် ဘုရားသခင့်နိုင်ငံတော်ဖြစ်ရပ်မှန်များကို မီအောင်လိုက်နေပါသလော