ယေရှု၏ ဘဝနှင့် ဓမ္မအမှု

ကွာရှင်းခြင်း နှင့် သားသမီးများကို ချစ်ခြင်းဆိုင်ရာ သင်ခန်းစာများ

ယေရှု နှင့်တပည့်တော်များသည် စီအီး ၃၃ ခုနှစ်တွင် ယေရုရှလင်မြို့၌ကျင်းပမည့် ပသခါပွဲသို့ သွားနေကြသည်။ သူတို့သည် ယော်ဒန်မြစ်ကိုဖြတ်၍ ပေရိယခရိုင်မှတစ်ဆင့်သွားကြသည်။ ယေရှုသည် ပေရိယသို့ အပတ်အနည်းငယ်က ရောက်ခဲ့သော်လည်း သူ၏မိတ်ဆွေ လာဇရုဖျားနေသောကြောင့် ယုဒပြည်သို့ဆင့်ခေါ်ခြင်းခံရသည်။ ပေရိယနယ်၌နေစဉ် ယေရှုသည် ဖာရိရှဲများကို ကွာရှင်းခြင်းအကြောင်း ပြောကြားခဲ့သော်လည်း ယခုတစ်ဖန် ဤကိစ္စကို သူတို့ပြန်မေးကြသည်။

ဖာရိရှဲများထဲ၌ပင် ကွာရှင်းခြင်းနှင့်ပတ်သက်၍ အယူအဆများ ကွဲလွဲနေကြသည်။ “အပြစ်တင်စရာအကြောင်း” ရှိသောကြောင့် မိန်းမကို ကွာရှင်းနိုင်သည်ဟု မောရှေပြောခဲ့သည်။ အချို့က သီလယိုယွင်းမှုကိုသာညွှန်းသည်ဟု ထင်မှတ်ကြသည်။ “အပြစ်တင်စရာအကြောင်း” တွင် အသေးအမွှား အမှားများပါသည်ဟု သဘောထားသူများလည်းရှိသည်။ ထိုကြောင့် ယေရှုကိုစုံစမ်းသည့်အနေနှင့် ဖာရိရှဲများက “လူသည် ခပ်သိမ်းသောအပြစ်ကြောင့် မိမိမယားနှင့်ကွာအပ်သလော” ဟုမေးလျှောက်ကြ၏။ ယေရှုမည်သို့ပင်ဖြေဆိုစေကာမူ အထင်အမြင်ကွဲလွဲသော ဖာရိရှဲတို့နှင့် အခက်အခဲတွေ့မည်အကြံ သူတို့၌ရှိသည်။

ယေရှုသည် မေးခွန်းကို ပိုင်နိုင်စွာ ကိုင်တွယ်နိုင်ခဲ့သည်။ လူ၏ထင်မြင်ချက် တစ်လုံးတစ်ပါဒမျှမပါဘဲ၊ ဘုရားသခင်၏ထိမ်းမြားခြင်းမူလစံချိန်ကို ကိုးကားဖြေဆိုခဲ့သည်။ ကိုယ်တော်က “အစအဦး၌ ဖန်ဆင်းတော်မူသောသူသည် ယောက်ျားနှင့်မိန်းမ နှစ်ယောက်တည်းကို ဖန်ဆင်းတော်မူ၏။ ထိုအကြောင်းကြောင့် ယောက်ျားသည် ကိုယ့်မိဘကိုစွန့်၍ ကိုယ့်ခင်ပွန်း၌မှီဝဲသဖြင့် ထိုသူနှစ်ယောက်တို့သည် တစ်သားတစ်ကိုယ်တည်းဖြစ်ရလိမ့်မည်” ဟုကျမ်းစာဆိုသည်ကို “သင်တို့မဖတ်ဖူးသလော။” ထိုကြောင့် “လင်မယားတို့သည် နှစ်ဦးမဟုတ် တစ်ဦးတည်းဖြစ်၏။ ဘုရားသခင်ဖက်စပ်၍ ထမ်းပိုးတင်တော်မူသောအရာကို လူမခွဲမခွာစေနှင့်ဟု မိန့်တော်မူ၏။”

ဘုရားသခင်၏ မူလရည်ရွယ်ချက်မှာ လင်မယားသည် အတူတကွနေရန်၊ ကွာရှင်းရန်မဟုတ်ကြောင်း ယေရှုပြသခဲ့သည်။ တစ်ဖန်ဖါရိရှဲတို့က “ထိုသို့မှန်လျှင်ဖြတ်စာပေး၍မယားနှင့်ကွာစေခြင်းငှာမောရှေသည်အဘယ်ကြောင့်စီရင်သနည်းဟုမေးလျှောက်ကြ၏။”

“ကိုယ်တော်က ‘သင်တို့စိတ်နှလုံးခိုင်မာသောကြောင့်မယားနှင့်ကွာရသောအခွင့်ကိုမောရှေစီရင်၏။ အစအဦး၌ထိုသို့မဟုတ်’” ဟုဖြေဆိုသည်။ မှန်ပါသည်။ ယေဟောဝါဘုရားသည် မှန်ကန်သောထိမ်းမြားခြင်း စံချိန်ကိုဧဒင်ဥယျာဉ်၌ အကောင်အထည်ဖေါ်ရာတွင် ကွာရှင်းခြင်းကိုလုံးဝမစီမံခဲ့ပါ။

ယေရှုကဖါရိရှဲတို့အား “ငါပညတ်သည်ကား မှားယွင်းခြင်း [ဂရိ၊ ပေါ်နီယာ] အကြောင်းမှတစ်ပါး အခြားသောအကြောင်းဖြင့် မိမိမယားနှင့်ကွာ၍ အခြားသောမိန်းမနှင့် စုံဖက်သောသူသည် မိမိမယားကိုပြစ်မှား၏။” အပြစ်ကြီးလေးသော လိင်သီလယိုယွင်းမှု ဖြစ်သည့် [ပေါ်နီယာ] ကြောင့်သာလျှင် ဘုရားရေးရာအစီအစဉ်အရကွာရှင်းနိုင်သည်။

ထိမ်းမြားမင်္ဂလာသည် ခိုင်မြဲရမည်။ သို့သော်အထက်ပါအချက်အရသာလျှင် ကွာရှင်းနိုင်ကြောင်း သဘောပေါက်သည့်အတွက် တပည့်တော်တို့ကလည်း “လင်မယားအမှုသည်ဤသို့ဖြစ်လျှင် စုံဖက်ခြင်းကိုမပြုကောင်းပါဟုလျှောက်ကြ၏။” အိမ်ထောင်ပြုရန်ရည်ရွယ်နေသူတစ်ဦးသည် ထိမ်းမြားမင်္ဂလာ၏အနှောင်အဖွဲ့တည်မြဲခြင်းကိုအလေးအနက်သဘောပေါက်သင့်သည်။

ယေရှုသည် တစ်ကိုယ်ရေတစ်ကာယအကြောင်း ဆက်လက်မိန့်မြွက်တော်မူသည်။ အချို့ယောက်ျားလေးတို့သည် ကာမဘက်မအောင်မြင်သောကြောင့် အိမ်ထောင်မပြုနိုင်သည့်အတွက် မိန်းမလျှာဖြစ်ကြသည်။ အခြားသူများမှာမူ သင်းကွပ်ခံရခြင်းကြောင့်မိန်းမလျှာဖြစ်ရကြသည်။ အချို့ကျပြန်လျှင် ကောင်းကင်နိုင်ငံတော်ရေးရာတို့ကို အပြည့်အဝဆောင်ရွက်နိုင်ရန် အိမ်ထောင်ပြုခြင်း၊ သံဝါသပြုခြင်းစိတ်ဆန္ဒများကို ချိုးနှိမ်ထားကြပြီ။ ယေရှုက “အိမ်ထောင်မပြုဘဲနေနိုင်သူသည် အိမ်ထောင်မပြုစေနှင့်” ဟုနိဂုံးချုပ်ခဲ့သည်။

ယခုလူတို့သည် သူတို့၏ကလေးသူငယ်များကို ယေရှုထံသို့ ခေါ်စပြုလာကြသည်။ ထိုအခါ တပည့်တော်တို့က ယေရှုအတွက်အနှောင့်အယှက်မဖြစ်စေလို၍ ကလေးများကို ဆိုဆုံးမပြီးမောင်းနှင်ကြ၏။ သို့သော် ယေရှုက “ထိုသူငယ်တို့ကို ငါ့ထံသို့လာပါလေစေ။ မဆီးတားကြနှင့်။ ဘုရားသခင်၏နိုင်ငံတော်သည် ထိုသို့သောသူတို့၏နိုင်ငံဖြစ်၏။ ငါအမှန်ဆိုသည်ကား အကြင်သူသည် ဘုရားသခင်၏နိုင်ငံတော်ကို သူငယ်ကဲ့သို့မခံမယူ၊ ထိုသူသည် နိုင်ငံတော်သို့မဝင်ရ” ဟုမိန့်တော်မူ၏။

ဤတွင် ယေရှုပေးခဲ့သောသင်ခန်းစာမှာ အလွန်ကောင်းလှသည်တကား။ ဘုရားသခင်၏နိုင်ငံတော်ကို အမွေခံခြင်းအလို့ငှာ ကလေးသူငယ်တို့၏ စိတ်နှိမ့်ချမှုနှင့် သွန်သင်မှုခံယူလွယ်သော အရည်အချင်းကို အတုယူရမည်။ အထူးသဖြင့် မိဘများသည် ကလေးသူငယ်များအား အချိန်ပေးသင့်ကြောင်းကိုလည်း ယေရှု၏ပုံဥပမာကတင်ပြခဲ့သည်။ ယခု ယေရှုသည် ကလေးသူငယ်များကို သူ၏ရင်ခွင်တွင်း၌သွင်း၍ လက်တော်ကိုတင်ပြီး ကောင်းချီးပေးခြင်းဖြင့် သူ၏မေတ္တာကိုတင်ပြလေသည်။ မဿဲ ၁၉:၁-၁၅။ တရားဟောရာ ၂၄:၁။ လုကာ ၁၆:၁၈။ မာကု ၁၀:၁-၁၆။ လုကာ ၁၈:၁၅-၁၇။

◆ ကွာရှင်းခြင်းနှင့်ပတ်သက်၍ ဖါရိရှဲတို့ အဘယ်ထူးခြားသောအမြင်မျိုး ရှိခဲ့သနည်း။ ယေရှုကို မည်ကဲ့သို့စုံစမ်းရန် ကြိုးစားခဲ့သနည်း။

◆ ဖါရိရှဲတို့၏စုံစမ်းခြင်းကို ယေရှုမည်သို့ကိုင်တွယ်ခဲ့သနည်း။ ကွာရှင်းခြင်းအတွက် တစ်ခုတည်းသောအကြောင်းပြချက်က အဘယ်အရာဖြစ်သည်ဟုဆိုသနည်း။

◆ ယေရှု၏တပည့်တော်တို့သည် အိမ်ထောင်ပြုရန် မသင့်တော်ဟု အဘယ်ကြောင့်ပြောဆိုခဲ့၍ ယေရှုအဘယ်ကဲ့သို့ထောက်ခံပြောဆိုခဲ့သနည်း။

◆ ကလေးသူငယ်များနှင့် ကိုယ်တော်ဆက်ဆံပုံဖြင့် ယေရှုမည်သို့သင်ကြားပေးသနည်း။