နှစ်ခြိုက်စိတ်ဝင်စားဖွယ်ကောင်းသော ဂျိုစီဖတ်စ်၏သမိုင်းမှတ်တမ်းများ
သမိုင်းဖြစ်ရပ်လေ့လာသူများသည် ဂျိုစီဖတ်စ်၏နှစ်ခြိုက်စိတ်ဝင်စားဖွယ်ကောင်းသော ရေးသားချက်များကို ကာလကြာမြင့်စွာဖတ်ရှုဆင်ခြင်ခဲ့ကြပြီဖြစ်သည်။ ခရစ်တော်ကွယ်လွန်ပြီးနောက် လေးနှစ်မျှသာအကြာတွင် မွေးဖွားခဲ့သောဂျိုစီဖတ်စ်သည် ပထမရာစုခေတ်ဂျူးနိုင်ငံနှင့်ပတ်သက်သည့် ယေရှု၏ကြိုတင်ဟောထားချက် ကျောစိမ့်ဖွယ်ပြည့်စုံလာပုံကို တွေ့မြင်ခဲ့သူမျက်မြင်သက်သေတစ်ဦးဖြစ်ပေသည်။ သူသည် စစ်ဘက်တပ်မှူး၊ သံတမန်၊ ဖာရိရှဲနှင့်စာပေပညာရှင်တစ်ဦး ဖြစ်ခဲ့သည်။
ဂျိုစီဖတ်စ်၏ရေးသားချက်များသည် စိတ်အာရုံကိုဖမ်းစားနိုင်လောက်သည့် အသေးစိတ်အချက်အလက်များနှင့် ကြွယ်ဝလှသည်။ ၎င်းတို့သည် သမ္မာကျမ်းစာကို မီးမောင်းထိုးပေးသည့်အပြင် ပါလက်စတိုင်းဒေသ၏ ပထဝီဝင်နှင့် တောတောင်ရေမြေအနေအထားဖော်ပြချက်အတွက် လမ်းညွှန်စာအုပ်သဖွယ်လည်း ဖြစ်ပေသေးသည်။ များစွာသောသူတို့က ဂျိုစီဖတ်စ်၏ရေးသားချက်များကို မိမိတို့၏စာကြည့်တိုက်များအတွက် အဖိုးတန်သောအဖြည့်အစွက်အဖြစ် မှတ်ယူကြသည်မှာ အံ့ဩစရာမဟုတ်ပေ။
သူ၏စောစောပိုင်းဘဝ
ဂျိုးဆက်ဘင်မာတီးယပ်စ် (ဝါ) ဂျိုစီဖတ်စ်ကို စီ.အီး. ၃၇ ခုနှစ်၊ ရောမဧကရာဇ်ကာလီဂူလာ၏ နန်းစံပထမနှစ်တွင် ဖွားမြင်သည်။ ဂျိုစီဖတ်စ်၏ဖခင်သည် ယဇ်ပုရောဟိတ်မျိုးဖြစ်သည်။ သူ၏မိခင်မှာ ဟတ်စမိုနီယန်ယဇ်ပုရောဟိတ်မင်း ယောနသန်မှ ဆင်းသက်လာသူဖြစ်သည်ဟု သူကဆိုပါသည်။
ဆယ်ကျော်သက်အရွယ်တွင် ဂျိုစီဖတ်စ်သည် မောရှေ၏ပညတ်တရားကို စွဲစွဲလမ်းလမ်းလေ့လာလိုက်စားခဲ့သည်။ သူသည် ယုဒဘာသာ၏ဂိုဏ်းခွဲသုံးခုဖြစ်သော ဖာရိရှဲ၊ ဇဒ္ဒုကဲနှင့် အက်ဆင်းတို့ကို သေချာစွာခွဲခြမ်းစိတ်ဖြာလေ့လာခဲ့သည်။ နောက်ပိုင်းတွင်အကြိုက်တွေ့သဖြင့် အက်ဆင်းဂိုဏ်းသားဖြစ်ပုံပေါက်သော ဘားနပ်စ် အမည်ရှိ ကန္တာရရသေ့တစ်ပါးထံ သုံးနှစ်တိတိနေရန် ဆုံးဖြတ်လေသည်။ အသက် ၁၉ နှစ်တွင် ဂျိုစီဖတ်စ်သည် ၎င်းကိုစွန့်ခွာပြီး ယေရုရှလင်သို့ပြန်လာကာ ဖာရိရှဲများနှင့်ပေါင်းလေသည်။
ရောမသို့သွား၍ပြန်လာခြင်း
ဂျိုစီဖတ်စ်သည် စီ.အီး. ၆၄ ခုနှစ်တွင် ရောမမြို့တော်သို့သွားရောက်ခဲ့သည်။ ယုဒပြည်နယ်ဘုရင်ခံဖဲလစ်က ဧကရာဇ်နီရိုထံအမှုစစ်ဆေးခံရန် လွှဲအပ်ပေးပို့ထားသော ဂျူးယဇ်ပုရောဟိတ်များအတွက် ကြားဝင်တောင်းပန်ပေးရန် သွားခဲ့ခြင်းဖြစ်သည်။ လမ်းတွင်သင်္ဘောပျက်သဖြင့် ဂျိုစီဖတ်စ်သည် အသက်ဘေးမှသီသီကလေးလွတ်မြောက်ခဲ့သည်။ သင်္ဘောပေါ်တွင်ပါသွားသော ခရီးသည် ၆၀၀ အနက် ၈၀ ကိုသာကယ်ဆယ်နိုင်ကြလေသည်။
ရောမတွင်ရောက်ရှိစဉ် ဂျူးလူမျိုးပြဇာတ်မင်းသားတစ်ဦးက နီရိုဘုရင်၏မိဖုရားပေါ်ပီယာနှင့်မိတ်ဆက်ပေးသည်။ သူ၏လာရင်းကိစ္စအောင်မြင်ရန် သူမသည် အဓိကကျသောအခန်းမှ ပါဝင်ဆောင်ရွက်ပေးခဲ့သည်။ မြို့တော်၏ခမ်းနားကြီးကျယ်မှုက ဂျိုစီဖတ်စ်အပေါ် အဓွန့်ရှည်သောအာနိသင်သက်ရောက်မှု ရှိခဲ့လေသည်။
ယုဒပြည်သို့ဂျိုစီဖတ်စ်ပြန်ရောက်သောအခါ ဂျူးလူမျိုးတို့၏စိတ်ထဲတွင် ရောမကိုဆန့်ကျင်ပုန်ကန်ရန် ခိုင်မာစွာသန္နိဋ္ဌာန်ချထားပြီးကြလေပြီ။ ရောမကိုပုန်ကန်တော်လှန်ခြင်း၏ အကျိုးမရှိအချည်းနှီးဖြစ်မည့်ပုံကို သူ၏အမျိုးသားချင်းတို့ အလေးအနက်သဘောပေါက်လာအောင် ရှင်းပြရန်ကြိုးစားသည်။ ဖျောင်းဖျ၍မရသည့်အပြင် မိမိအားသစ္စာဖောက်ဟု မြင်လာကြမည့်အရေးကြောင့် ဂျိုစီဖတ်စ်သည် ဂါလိလဲနယ်ဂျူးတပ်ဖွဲ့များ၏ တပ်မှူးရာထူးကို လက်ခံလိုက်ရလေသည်။ ဂျိုစီဖတ်စ်သည် မိမိ၏တပ်ဖွဲ့များအား အားသစ်လောင်းလေ့ကျင့်ပေးကာ ရိက္ခာနှင့်လက်နက်ခဲယမ်းမီးကျောက်များကို စုဆောင်းသည်။ သို့သော် အချည်းနှီးသာ။ ဗက်စပါဆီယန်၏ရောမတပ်ဖွဲ့အားဖြင့် ဂါလိလဲနယ်ကျသွားလေသည်။ ရက်ပေါင်း ၄၇ ရက်ဝိုင်းရံပြီးနောက် ဂျိုတာပါတာအရပ်ရှိ ဂျိုစီဖတ်စ်၏အခိုင်အမာခံတပ်ကို ရောမတို့သိမ်းပိုက်ကြလေသည်။
လက်နက်ချစဉ် ဂျိုစီဖတ်စ်က ဗက်စပါဆီယန်သည် မကြာမီ ဧကရာဇ်ဖြစ်လာမည်ဟု ထိုးထွင်းဉာဏ်ပါပါဖြင့် ဟောကိန်းထုတ်လေသည်။ ဂျိုစီဖတ်စ်သည် အချုပ်ခံရသော်လည်း ဤဟောကိန်းကြောင့် အပြစ်ဒဏ်မှချမ်းသာရပြီး သူ၏ဟောကိန်းမှန်ကန်ပြည့်စုံလာသောအခါ အချုပ်မှလွတ်မြောက်သွားလေသည်။ ဤကား သူ့ဘဝ၏အလှည့်အပြောင်းပင်ဖြစ်သည်။ စစ်ပြေငြိမ်းရေးအတွက် သူသည် စကားပြန်နှင့်စေ့စပ်ရေးမှူးအဖြစ် ရောမတို့ကို အကျိုးဆောင်ပေးခဲ့ပေသည်။ ဗက်စပါဆီယန်နှင့် သူ၏သားများဖြစ်ကြသော တိုက်တပ်စ် နှင့်ဒိုမီရှန်တို့၏ အားပေးထောက်မမှုကိုဖော်ပြလျက် ဂျိုစီဖတ်စ်သည် သူ၏အမည်ရင်းတွင် ဖလေးဗီးယပ်စ် ဟူသောမိသားစုအမည်ကို ဖြည့်စွက်ခံယူလေသည်။
ဖလေးဗီးယပ်ဂျိုစီဖတ်စ်၏ရေးသားပြုစုချက်များ
ဂျိုစီဖတ်စ်၏ရေးသားချက်များအနက် ရှေးအကျဆုံးမှာ “ဂျူးတို့၏စစ်ပွဲများ” ဖြစ်သည်။ အတွဲ ၇-တွဲပါဝင်သော ဤစစ်သမိုင်းမှတ်တမ်းကြီးကိုပြုစုရာ၌ ရောမတို့၏အင်အားသာလွန်တောင့်တင်းမှုကို သရုပ်သကန်ပေါ်အောင်ခြယ်မှုန်းပြခြင်းဖြင့် အနာဂတ်ပုန်ကန်အုံကြွမှုကို ဟန့်တားပေးရန်ဖြစ်သည်ဟု ယုံကြည်ရသည်။ ဤရေးသားချက်များတွင် အန်တီအုပ်ကပ်အီပီဖာနစ်က ယေရုရှလင်ကိုတိုက်ခိုက်သိမ်းပိုက်ခြင်း (ဘီ.စီ.အီး. ဒုတိယရာစု) မှ စီ.အီး. ၆၇ ခုနှစ်အုံကြွမှုကြီးအထိ ဂျူးတို့၏သမိုင်းစဉ်ကို အသေးစိတ်စိစစ်တင်ပြထားသည်။ ထိုတွင် မျက်မြင်သက်သေအနေနှင့် ဂျိုစီဖတ်စ်က ယင်းစစ်ပွဲသည် နောက်ဆယ်စုနှစ်ဖြစ်သော၊ စီ.အီး. ၇၃ ခုနှစ်တွင် အထွတ်အထိပ်သို့ရောက်ခဲ့ပုံကို ဆွေးနွေးတင်ပြထားလေသည်။
ဂျိုစီဖတ်စ်၏အခြားပြုစုရေးသားချက်တစ်ခုမှာ “ဂျူးတို့၏ရှေးဟောင်းနှောင်းဖြစ်များ” ဟုခေါ်သော အတွဲ ၂၀ ပါဝင်သည့် ဂျူးသမိုင်းကျမ်းကြီးပင်ဖြစ်သည်။ ဤကျမ်းတွင် ကမ္ဘာဦးကျမ်းဖန်ဆင်းခြင်းမှအစပျိုးလျက် ရောမတို့နှင့်ဖြစ်ပွားသောစစ်ပွဲများအထိ ဆက်တိုက်မှတ်တမ်းပြုထားသည်။ ဂျိုစီဖတ်စ်သည် သမ္မာကျမ်းစာဖော်ပြချက်အစီအစဉ်ကို နီးကပ်စွာလိုက်ကာ အစဉ်အလာအဓိပ္ပာယ်ဖွင့်ဆိုချက်များနှင့် ပြင်ပလေ့လာမှတ်သားချက်များကိုပါ ဖြည့်စွက်ထည့်သွင်းထားသည်။
ဂျိုစီဖတ်စ်သည် ဘဝ ဟူသောအမည်ဖြင့် မိမိအကြောင်းကိုလည်းရေးခဲ့သည်။ ထိုတွင် စစ်အတွင်းသူ၏ရပ်တည်ချက်မှန်ကန်ကြောင်း ပြဆိုရန်ကြိုးစားထားပြီး တိုက်ဘေးရီးယပ်မြို့မှ ဂျပ်တပ်၏စွပ်စွဲချက်များကိုချေဖျက်ရန် အားထုတ်ထားသည်။ သူ၏စတုတ္ထပြုစုရေးသားချက်ဖြစ်သော “အေပိုင်ယန်အားရင်ဆိုင်လျက်” ဟုအမည်ပေးထားသည့် ထုချေရှင်းလင်းချက်စာတမ်းကဆိုလျှင် ဂျူးလူမျိုးများအား အထင်အမြင်လွဲမှားမှုများမှ ကာကွယ်ပေးထားလေသည်။
ဘုရားသခင့်နှုတ်ကပါဌ်တော်ကို အတွင်းကျကျ
သမိုင်းနှင့်ဆိုင်၍ ဂျိုစီဖတ်စ်၏ရေးသားချက်အများစုသည် အသေးစိတ်အတိအကျမှန်ကန်ကြောင်း စောဒကတက်စရာမရှိပေ။ “အေပိုင်ယန်အားရင်ဆိုင်လျက်” ဟုအမည်တပ်ထားသော သူ၏ပြုစုရေးသားချက်တွင် ဂျူးများသည် အပေါခရစ်ဖာစာပေများကို မှုတ်သွင်းခံကျမ်းစာတွင်အပါအဝင်အဖြစ် မည်သည့်အခါမျှ ထည့်သွင်းခြင်းမပြုခဲ့ကြကြောင်း ပြဆိုထားပြီး သန့်ရှင်းသောသမ္မာကျမ်းစာပေများ၏ တိကျမှန်ကန်မှုနှင့် အတွင်းသဘောချင်းညီညွတ်မှုကို သက်သေခံထားသည်။ “ကျွန်ုပ်တို့၌ တစ်ခုနှင့်တစ်ခုမညီညွတ်ဝိရောဓိဖြစ်နေသော စာအုပ်ပေါင်းမရေမတွက်နိုင်အောင် မရှိပါ . . . အတိတ်ကာလမှတ်တမ်းအလုံးစုံပါရှိပြီး ဘုရားသခင်မှဖြစ်လာသည်ဟု လျောက်ပတ်စွာယုံကြည်ထားသော ကျမ်းပေါင်းနှစ်ဆယ့်နှစ်ကျမ်း [ခေတ်သစ်စိတ်ပိုင်းပုံအရ ၃၉ ကျမ်း] သာ ကျွန်ုပ်တို့၌ရှိပါသည်” ဟု ဂျိုစီဖတ်စ်က ဆိုထားသည်။
ဂျူးတို့၏ရှေးဟောင်းနှောင်းဖြစ်များ စာအုပ်တွင် ဂျိုစီဖတ်စ်သည် သမ္မာကျမ်းစာမှတ်တမ်းအပြင် စိတ်ဝင်စားဖွယ်ကောင်းသော အသေးစိတ်အချက်အလက်များကို ဖြည့်စွက်ရေးသားထားသည်။ “ဣဇာက်အသက် ၂၅” နှစ်အရွယ်တွင် အာဗြဟံက ယဇ်ပူဇော်ရန်အတွက် သူ၏ခြေလက်များကိုတုတ်နှောင်ထားသည် ဟုဆိုသည်။ ဂျိုစီဖတ်စ်၏အဆိုအရ ဣဇာက်သည် ယဇ်ပလ္လင်ကိုကူညီတည်ဆောက်ပြီးနောက် မိမိသည် “‘ဘုရားသခင်နှင့် ဖခင်တို့၏ဆုံးဖြတ်ပြဋ္ဌာန်းချက်ကို ငြင်းပယ်ပါက သားဦးအဖြစ်နှင့်ထိုက်တန်တော့မည်မဟုတ်ဟုဆိုကာ’ . . . ယဇ်ပူဇော်ခံရန် ယဇ်ပလ္လင်သို့ချက်ချင်းသွားသည်” ဟုဆိုသည်။
ရှေးအီဂျစ်ပြည်မှ ဣသရေလလူမျိုးများထွက်ခွာလာကြခြင်းနှင့်ပတ်သက်၍ သမ္မာကျမ်းစာမှတ်တမ်းများအပြင် ဂျိုစီဖတ်စ်သည် ဤအသေးစိတ်အချက်အလက်များကို ဖြည့်စွက်ဖော်ပြထားသည်– “၎င်းတို့၏နောက်သို့ လိုက်လာသူများ၏အရေအတွက်မှာ အားလုံးလက်နက်အပြည့်တပ်ဆင်ထားသော မြင်းရထားအစီးခြောက်ရာ၊ မြင်းစီးစစ်သည်ငါးသောင်း၊ ခြေလျင်စစ်သည်နှစ်သိန်း” ဟူ၍ဖြစ်သည်။ “ရှမွေလသည် အသက် ၁၂ နှစ်တွင် စ၍ပရောဖက်ပြုပြီး တစ်ခါတွင် သူအိပ်ပျော်စဉ် ဘုရားသခင်ကသူ့အား သူ၏အမည်ဖြင့်ခေါ်သည်” ဟုလည်း ဂျိုစီဖတ်စ်ကဆိုသည်။—၁ ဓမ္မရာဇဝင် ၃:၂-၂၁ နှိုင်းယှဉ်။
ဂျိုစီဖတ်စ်၏အခြားရေးသားချက်များက အခွန်အတုတ်များ၊ တရားဥပဒေများ၊ အဖြစ်အပျက်များကို အတွင်းကျကျသိနားလည်စေ၏။ ဟေရုဒ်မင်း၏မွေးနေ့ဧည့်ခံပွဲတွင် ဝင်၍ကပြပြီး နှစ်ခြင်းဆရာယောဟန်၏ဦးခေါင်းကို တောင်းဆိုသောအမျိုးသမီးအား ရှာလုံဟူသောအမည်ဖြင့် သူခေါ်ဆိုထားသည်။ (မာကု ၆:၁၇-၂၆) ဟေရုဒ်အကြောင်းကျွန်ုပ်တို့သိသမျှအနက် အများစုကို ဂျိုစီဖတ်စ်ကမှတ်တမ်းတင်ခဲ့သည်။ “သူအလွန်အသက်ကြီးရင့်ကြောင်းမပေါ်လွင်စေရန် [ဟေရုဒ်သည်] ဆံပင်ကို အနက်ရောင်ဆိုးထားသည်” ဟူ၍ပင်ဆိုထားလေသည်။
ရောမဆန့်ကျင်ရေးမဟာတော်လှန်မှုကြီး
ယေရုရှလင်မြို့နှင့် ၎င်း၏ဗိမာန်တော်နှင့်ပတ်သက်၍ ယေရှုပရောဖက်ပြုပြီး ၃၃ နှစ်မျှသာအကြာတွင် ယင်းပရောဖက်ပြုချက်များသည် စတင်ပြည့်စုံလာလေတော့သည်။ ယေရုရှလင်တွင် ဂျူးအစွန်းရောက်အုပ်စုများက ရောမတို့၏သြဇာကိုဖယ်ရှားပစ်ရန် သန္နိဋ္ဌာန်ချထားကြသည်။ ဤသတင်းကြောင့် စီ.အီး. ၆၆ ခုနှစ်တွင် ရောမတို့သည် အရေးပေါ်တပ်သားများခေါ်ယူစုဆောင်းကာ ဆီးရီးယန်းပြည်နယ်ဘုရင်ခံ ဆက်စတီးယပ်ဂဲလပ်က ဦးစီးလျက် အလုံးအရင်းနှင့်ချီတက်လာကြလေတော့သည်။ ၎င်းတို့၏ရည်ရွယ်ချက်မှာ ပုန်ကန်မှုကိုနှိမ်နင်းကာ ပြစ်မှုကျူးလွန်သူများကို ပြစ်ဒဏ်ပေးရန်ဖြစ်သည်။ ယေရုရှလင်မြို့ဆင်ခြေဖုံးအရပ်တွင် ဖျက်ဆီးမှုပြုပြီးနောက် ဆက်စတီးယပ်၏တပ်ဖွဲ့များသည် မြို့ရိုးကာရံထားသောမြို့ကြီးကို ပတ်ပတ်လည်ဝိုင်းရံလျက် စခန်းချကြလေသည်။ ရောမတို့သည် ရန်သူလက်နက်မှ အကာအကွယ်ယူရန် အက်စတူဒိုဟုခေါ်သောနည်းစနစ်ကို အသုံးပြုလျက် မိမိတို့၏ဒိုင်းလွှားများကို လိပ်ခုံးသဏ္ဌာန်ဖြစ်အောင် အောင်မြင်စွာပေါင်းစပ်ကြသည်။ ဤနည်းစနစ်၏အောင်မြင်ထိရောက်မှုကို ဂျိုစီဖတ်စ်က ဤသို့သက်သေခံထားသည်– “ပစ်လိုက်သောမြားများသည် ၎င်းတို့အားမထိခိုက်ဘဲ ချော်၍ကျသွားကြသည်။ သို့ဖြစ်၍ ရောမစစ်သည်တို့သည် ၎င်းတို့ကိုယ်တိုင်ထိခိုက်ခြင်းမခံစားရဘဲ မြို့ရိုးကို အောက်မှလှိုက်၍တူးကြသည်။ ထိုနောက်တွင်ကား ဗိမာန်တော်ဝင်းတံခါးကို မီးတင်ရှို့ရန် အားလုံးအဆင်သင့်ဖြစ်သွားလေသည်။”
“ဖြစ်ပုံမှာ” ဂျိုစီဖတ်စ်ကဆိုသည်– “ဆက်စတီးယပ်သည် . . . သူ၏စစ်သည်များကို ထိုနေရာမှပြန်၍ခေါ်ပြီး . . . အကြောင်းပြချက်တစ်စုံတစ်ရာမျှမရှိဘဲ ဆုတ်ခွာသွားလေသည်။” ဘုရားသခင်၏သားတော်အား ဂုဏ်တင်ရန်မကြံရွယ်ပါဘဲလျက် ဂျိုစီဖတ်စ်သည် ယေရုရှလင်မြို့ရှိခရစ်ယာန်များ စောင့်မျှော်လာခဲ့ကြသောအမှုကို မှတ်တမ်းတင်လိုက်ခြင်းဖြစ်သည်မှာ ထင်ရှားလှသည်။ ယင်းမှာ ယေရှုခရစ်၏ပရောဖက်ပြုချက်ပြည့်စုံလာခြင်းပင်တည်း။ လွန်ခဲ့သောနှစ်အတော်အတန်က ဘုရားသခင်၏သားတော်က ဤသို့ကြိုတင်သတိပေးတော်မူခဲ့သည်– “ယေရုရှလင်မြို့ကို ဗိုလ်ခြေများဝိုင်းရံလျက်ရှိသည်ကို သင်တို့မြင်သောအခါ ထိုမြို့သည် ပျက်စီးခြင်းသို့ရောက်လုသည်ကို သိမှတ်ကြလော့။ ထိုအခါ ယုဒပြည်၌ရှိသောသူတို့သည် တောင်ပေါ်သို့ပြေးကြစေ။ မြို့ထဲ၌ရှိသောသူတို့သည် မြို့ပြင်သို့ထွက်ကြစေ။ တောရွာမှာရှိသောသူတို့သည် မြို့ထဲသို့မဝင်ကြစေနှင့်။ အကြောင်းမူကား ထိုနေ့ရက်ကာလသည် ကျမ်းစာချက်များပြည့်စုံရသော ဒဏ်စီရင်ခြင်းနေ့ရက်ကာလဖြစ်သတည်း။” (လုကာ ၂၁:၂၀-၂၂) ယေရှု၏သစ္စာရှိနောက်လိုက်များသည် ယင်းသို့ကိုယ်တော်ညွှန်ကြားတော်မူသည့်အတိုင်း မြို့ကြီးမှအလျင်အမြန်ထွက်ပြေးခြင်းဖြင့် နောက်ပိုင်းတွင်ကျရောက်ခဲ့သော ပြင်းထန်သည့်ဒုက္ခကြီးမှ ချမ်းသာရခဲ့ကြသည်။
စီ.အီး. ၇၀ ပြည့်နှစ်တွင် ရောမစစ်တပ်ကြီးပြန်လာသောအခါ ဖြစ်ပေါ်လာသည့်အကျိုးဆက်များကို ဂျိုစီဖတ်စ်က အသေးစိတ်ဖော်ပြမှတ်တမ်းတင်ခဲ့သည်။ ဗက်စပါဆီယန်၏သား ဗိုလ်ချုပ်တိုက်တပ်စ်သည် ယေရုရှလင်မြို့ကို ယင်း၏ခမ်းနားကြီးကျယ်သောဗိမာန်တော်နှင့်တကွ သိမ်းပိုက်ရန်လာခဲ့ချေသည်။ မြို့ထဲတွင် စစ်သွေးကြွအုပ်စုများက ထိန်းချုပ်ရန်အားထုတ်ကြသည်။ ၎င်းတို့၏ အစွန်းရောက် အလွန်အကျွံအရေးယူဆောင်ရွက်မှုကြောင့် သွေးထွက်သံယိုမှုများစွာဖြစ်ခဲ့ရသည်။ အချို့ကဆိုလျှင် “၎င်းတို့အား အတွင်းရန်သူများ၏လက်မှ လာရောက်ကယ်တင်” ရန်မျှော်လင့်လျက် “ရောမများဝင်ရောက်သိမ်းပိုက်ကြပါစေဟု ဆုတောင်းရသည့်အထိ အတွင်းအဖြစ်ဆိုးနှင့်ကြုံကြိုက်ကြရသည်” ဟု ဂျိုစီဖတ်စ်ကဆိုပါသည်။ သူက မြို့တွင်းရှိသူပုန်များအား ချမ်းသာသူများ၏ပစ္စည်းဥစ္စာများကို ဖျက်ဆီးကာ ရောမတို့နှင့်အပေးအယူလုပ်လိုသည်ဟု သံသယမကင်းခံရသည့် အရေးပါသောပုဂ္ဂိုလ်များအား လုပ်ကြံသတ်ဖြတ်သော “ဓားပြများ” ဟု ကင်ပွန်းတပ်ခဲ့လေသည်။
ပြည်တွင်းစစ်အလယ်တွင် ယေရုရှလင်မြို့အတွင်း လူနေမှုအဆင့်အတန်းသည် မခန့်မှန်းနိုင်လောက်အောင် နက်ရှိုင်းစွာထိုးကျသွားသည်။ လူသေများကို မသင်္ဂြိုဟ်ဘဲထားကြသည်။ ပုန်ကန်ရန်လှုံ့ဆော်သူများသည် “အလောင်းများကိုကျော်နင်းကာ အချင်းချင်းတိုက်ခိုက်သတ်ဖြတ်ကြသဖြင့် တစ်လောင်းပေါ်တစ်လောင်း ဆင့်၍ဆင့်၍ထပ်ကြသည်။” အများပြည်သူတို့ကို တိုက်ခိုက်လုယက်ကာ အစားအစာနှင့်ရွှေငွေအတွက် သတ်ဖြတ်ကြသည်။ အဖိနှိပ်ခံဒုက္ခသည်များ၏ ငိုယိုအော်ဟစ်သံများမှာ အဆက်ပြတ်သည်ဟူ၍မရှိခဲ့ချေ။
တိုက်တပ်စ်က ဂျူးတို့အား လက်နက်ချ၍မြို့ကိုအပ်ခြင်းဖြင့် ကိုယ်တိုင်ချမ်းသာရကြရန် တိုက်တွန်းသည်။ “ဂျိုစီဖတ်စ်ကိုစေလွှတ်၍ ၎င်းတို့၏ဘာသာစကားဖြင့် သွားရောက်အရေးဆိုစေသည်။ ၎င်းတို့သည် မိမိတို့အမျိုးသားချင်းတစ်ဦး၏ ဖျောင်းဖျမှုကို လိုက်လျောကြလိမ့်မည်ဟု သူယူဆခဲ့သည်။” သို့သော် ၎င်းတို့သည် ဂျိုစီဖတ်စ်ကို ကဲ့ရဲ့ပြစ်တင်ကြသည်။ ယင်းနောက်တွင်ကား တိုက်တပ်စ်သည် တစ်မြို့လုံးပတ်လည်ဝန်းရံလျက် တိုင်ချွန်များဖြင့်ခြံစည်းရိုးခတ်လိုက်သည်။ (လုကာ ၁၉:၄၃) ပြေးလွတ်ရန်မျှော်လင့်ချက် အလျင်းမရှိတော့ဘဲ လှုပ်ရှားမှုဟူသမျှကန့်သတ်ခံရသဖြင့် ငတ်မွတ်မှုက “ပြည်သူတို့အား အိမ်ထောင်အလိုက်၊ မိသားစုအလိုက် ဝါးမြိုလေတော့သည်။” အဆက်မပြတ်ဖြစ်ပွားသောတိုက်ပွဲများက သေကျေမှုကို တိုး၍တိုး၍များစေသည်။ ကျမ်းပရောဖက်ပြုချက်ကို ပြည့်စုံစေမှန်းမသိပြည့်စုံစေလျက် တိုက်တပ်စ်သည် ယေရုရှလင်ကို အောင်နိုင်ခဲ့သည်။ နောက်ပိုင်းတွင် ကြီးမားခိုင်ခံ့လှသောမြို့ရိုးနှင့် အခိုင်အမာဆောက်လုပ်ထားသော မျှော်စင်များကိုကြည့်ရှုပြီး သူက “ဒါလောက်ခိုင်ခံ့တဲ့အကာအကွယ်တွေကနေ ဂျူးတွေကိုနှင်ထုတ်သူဟာ ဘုရားသခင်ကလွဲလို့ ဘယ်သူမှမဟုတ်နိုင်ဘူး” ဟု အာမေဍိတ်သံပြုလေသည်။ ဂျူးလူမျိုးတစ်သန်းကျော် သေကျေပျက်စီးခဲ့လေသည်။—လုကာ ၂၁:၅၊ ၆၊ ၂၃၊ ၂၄။
စစ်ပြီးသော်
စစ်ပြီးဆုံးပြီးနောက် ဂျိုစီဖတ်စ်သည် ရောမမြို့သို့သွားသည်။ ဖလေဗီယန်မိသားစု၏ တာဝန်ယူကူညီမှုကိုခံစားလျက် ရောမနိုင်ငံသားအဖြစ် ဗက်စပါဆီယန်၏ယခင်အိမ်ကြီးဂေဟာတွင် နေထိုင်လေသည်။ သူသည် တိုက်တပ်စ်ထံမှ လက်ဆောင်ပစ္စည်းများနှင့်တကွ ဧကရာဇ်၏ပင်စင်အထောက်အပံ့ကိုလည်း ရရှိလေသည်။ ထို့နောက် ဂျိုစီဖတ်စ်သည် စာရေးသားခြင်းအလုပ်ကို ဇောက်ချ၍လုပ်ကိုင်လေသည်။
စိတ်ဝင်စားဖွယ်မငြင်းသာသည့်အချက်မှာ ဂျိုစီဖတ်စ်သည် “သီအိုကရေစီ” ဟူသောဝေါဟာရကို စ၍တီထွင်ခဲ့ခြင်းပင်ဖြစ်သည်။ ဂျူးနိုင်ငံနှင့်ပတ်သက်၍ “ကျွန်ုပ်တို့၏အစိုးရကို ယင်း၏အာဏာနှင့်တန်ခိုးသည် ဘုရားသခင်ထံတော်မှလာသည်ဟု မှတ်ယူလျက် သီအိုကရေစီစံနစ်ဟု ခေါ်ဝေါ်နိုင်ပေသည်” ဟုရေးသားခဲ့ပေသည်။
ဂျိုစီဖတ်စ်သည် မိမိကိုယ်ကို ခရစ်ယာန်ဟု ဘယ်တော့မျှမဆိုခဲ့ပေ။ ဘုရားသခင်၏မှုတ်သွင်းခြင်းဖြင့်လည်း စာပေများကို မရေးသားခဲ့ပါ။ သို့ဖြစ်သည့်တိုင် နှစ်ခြိုက်စိတ်ဝင်စားဖွယ်ကောင်းသော ဂျိုစီဖတ်စ်၏သမိုင်းမှတ်တမ်းများသည် သမိုင်းရေးရာကိစ္စများတွင် ကျွန်ုပ်တို့၏အသိဉာဏ်မျက်စိကိုဖွင့်ပေးရာ၌ များစွာတန်ဖိုးရှိကြပေသည်။
[စာမျက်နှာ ၃၁ ပါ ရုပ်ပုံ]
ယေရုရှလင်မြို့ရိုးတွင် ဂျိုစီဖတ်စ်