စာရှုသူများထံမှ မေးခွန်းလွှာ

ပထမရာစုကဂျူးတွေဟာ ဘယ်အချက်တွေပေါ် အခြေခံပြီး မေရှိယကို “မျှော်လင့်” ခဲ့ကြသလဲ။

နှစ်ခြင်းဆရာယောဟန် အချိန်မှာ “လူတို့သည် ခရစ်တော်ကို မျှော်လင့်နေကြရာ ယောဟန်သည် ‘ခရစ်တော်ဖြစ်ပါမည်လော’ ဟူ၍ ထိုသူအပေါင်းတို့သည် စိတ်နှလုံးထဲမှာ ဆင်ခြင်လျက်နေကြ၏။” (လု. ၃:၁၅) အဲဒီအချိန်မှာ မေရှိယပေါ်လာဖို့ ဂျူးတွေ ဘာကြောင့် မျှော်လင့်တာလဲ။ အကြောင်းရင်းတွေ အများကြီးရှိပါတယ်။

ယေရှုကို မွေးဖွားပြီးနောက်မှာ ယေဟောဝါရဲ့ကောင်းကင်တမန်က ဘက်သလီဟင်မြို့အနီး ကွင်းပြင်မှာ သိုးကျောင်းနေတဲ့ သိုးထိန်းတွေဆီ ရောက်လာတယ်။ ^(၁) ကောင်းကင်တမန်က “သခင်ခရစ်တော်တည်းဟူသော ကယ်တင်ရှင်သည် သင်တို့အတွက် ဒါဝိဒ်၏မြို့၌ ယနေ့ ဖွားမြင်ခြင်းကို ခံတော်မူပြီ” လို့ ကြေညာခဲ့တယ်။ (လု. ၂:၈-၁၁) အဲဒီနောက် “ထိုကောင်းကင်တမန်နှင့်အတူ ကောင်းကင်ဗိုလ်ခြေများစွာတို့သည် ရုတ်တရက်ထင်ရှား၍ ဘုရားသခင်အားa ‘ကောင်းကင်၌ ဘုရားသခင်သည် ဘုန်းကြီးတော်မူပါစေ။ မြေကြီးပေါ်၌လည်း ဘုရားသခင်၏မျက်နှာသာရသူတို့တွင် ငြိမ်သက်ခြင်းရှိပါစေ’ ဟု ချီးမွမ်းကြ၏။”—လု. ၂:၁၃၊ ၁၄။

အဲဒီကြေညာချက်က အဲဒီမှာရှိတဲ့ နှိမ့်ချတဲ့သိုးထိန်းတွေအပေါ် အကျိုးသက်ရောက်ခဲ့တာ သေချာတယ်။ သူတို့ ချက်ချင်း ဘက်သလီဟင်မြို့ကိုသွားပြီး ယောသပ်၊ မာရိနဲ့ မွေးကင်းစ ယေရှုကိုတွေ့တဲ့အခါ “ထိုသူငယ်အကြောင်း မိမိတို့ကြားသိခဲ့ရာများကို ပြောပြကြ” တယ်။ ဒါကြောင့် “သိုးထိန်းတို့ပြောပြသမျှကို ကြားသူအပေါင်းတို့သည် အံ့သြကြ” တယ်။ (လု. ၂:၁၇၊ ၁၈) “ကြားသူအပေါင်း” ဆိုတဲ့ အသုံးအနှုန်းက သိုးထိန်းတွေဟာ ယောသပ်နဲ့မာရိအပြင် တခြားသူတွေကိုလည်း ပြောပြတယ်ဆိုတာ ဖော်ပြတယ်။ သိုးထိန်းတွေဟာ အိမ်ပြန်ရောက်တဲ့အခါမှာလည်း “မိန့်မှာခံရသည့်အတိုင်း ကြားရ၊ မြင်ရသမျှကိုထောက်၍ ဘုရားသခင်၏ဘုန်းတော်ကို ချီးမွမ်း” ကြတယ်။ (လု. ၂:၂၀) အဲဒီသိုးထိန်းတွေဟာ သူတို့ကြားခဲ့တဲ့ ခရစ်တော်အကြောင်း သတင်းကောင်းကို တခြားသူတွေကို ပြောပြကြမှာသေချာတယ်။

မာရိဟာ မောရှေပညတ်အရ သူ့ရဲ့သားဦးကို ဂျေရုဆလင်မှာရှိတဲ့ ဗိမာန်တော်ကို ခေါ်လာတယ်။ အဲဒီအခါ ပရောဖက်မ အန္နက ‘ဘုရားသခင်ကိုချီးမွမ်းပြီး ဂျေရုဆလင်မြို့ ကယ်လွှတ်ခံရမယ့်အချိန်ကို စောင့်မျှော်နေသူအပေါင်းတို့ကို ထိုသူငယ်အကြောင်း ပြော’ ပြတယ်။ ^(၂) (လု. ၂:၃၆-၃၈; ထွ. ၁၃:၁၂) အဲဒါကြောင့် မေရှိယပေါ်လာပြီဆိုတဲ့သတင်းက ဆက်ပြီး ပျံ့နှံ့သွားတယ်။

နောက်ပိုင်းမှာ “အရှေ့တိုင်းမှ နက္ခတ်ဗေဒင်ဆရာများသည် ဂျေရုဆလင်မြို့သို့ ရောက်လာကြ၍ ‘ယခုဖွားမြင်သည့် ဂျူးတို့၏ရှင်ဘုရင်သည် အဘယ်မှာရှိသနည်း။ အရှေ့တိုင်းတွင် ငါတို့ရှိစဉ်က သူ၏ကြယ်ကို မြင်ရ၏။ ထိုသူငယ်တော်ကို ဦးညွှတ်ရန် ငါတို့ရောက်လာကြပြီ” လို့ပြောဆိုကြတယ်။ (မ. ၂:၁၊ ၂) အဲဒီသတင်းကိုကြားတဲ့အခါ “ဟေရုဒ်မင်းနှင့်တကွ ဂျေရုဆလင်မြို့သူမြို့သားအပေါင်းတို့သည် စိတ်ပူပန်ကြသဖြင့် ယဇ်ပုရောဟိတ်ကြီးနှင့် ကျမ်းတတ် အားလုံးကို စုရုံးစေပြီးလျှင် ခရစ်တော်ကို အဘယ်အရပ်တွင် ဖွားမြင်မည်နည်းဟု စုံစမ်းမေးမြန်း” တယ်။ ^(၃) (မ. ၂:၃၊ ၄) ဒါကြောင့် လူများစွာဟာ မေရှိယပေါ်လာပြီဆိုတဲ့သတင်းကို ကြားရတယ်။b

အစပိုင်းမှာ ဖော်ပြခဲ့တဲ့ လုကာ ၃:၁၅ မှာ ဂျူးတချို့က နှစ်ခြင်းဆရာယောဟန်ကို မေရှိယလို့ ထင်မှတ်ခဲ့ကြတယ်လို့ ဖော်ပြထားတယ်။ ဒါပေမဲ့ ယောဟန်က “ငါ့နောက်မှကြွလာသောသူမူကား ငါ့ထက်တတ်စွမ်းတော်မူ၏။ ငါသည် သူ၏ဖိနပ်ကိုပင် မချွတ်ထိုက်။ ထိုသူသည် သန့်ရှင်းသောစွမ်းအားတော်ဖြင့်လည်းကောင်း၊ မီးဖြင့်လည်းကောင်း သင်တို့ကို နှစ်ခြင်းပေးလိမ့်မည်” လို့ပြောပြီး လူတွေထင်မြင်ချက်ပေးတာကို ရပ်တန့်စေခဲ့တယ်။ (မ. ၃:၁၁) ယောဟန်ရဲ့စကားကြောင့် မေရှိယကိုစောင့်နေတဲ့ ဂျူးတွေရဲ့မျှော်လင့်ချက်က ပိုပြင်းပြလာမှာဖြစ်တယ်။

ပထမရာစုဂျူးတွေဟာ ဒံယေလ ၉:၂၄-၂၇ မှာပါတဲ့ သီတင်း ၇၀ ပရောဖက်ပြုချက်ကို အခြေခံပြီး မေရှိယရောက်လာမယ့်အချိန်ကို တွက်ချက်ခဲ့ကြတာ ဖြစ်နိုင်သလား။ ဖြစ်နိုင်ပေမဲ့ ဟုတ်တယ်လို့တော့ သေချာမပြောနိုင်ဘူး။ ယေရှုအချိန်တုန်းကဆိုရင် သီတင်း ၇၀ ကို အဓိပ္ပာယ်အမျိုးမျိုး ဖွင့်ဆိုခဲ့ကြတယ်၊ ဒါပေမဲ့ တစ်ခုမှ ကျွန်ုပ်တို့ လက်ရှိနားလည်ထားတာနဲ့ မကိုက်ညီဘူး။c

သဲကန္တာရမှာနေတဲ့ အက်ဆင်းလို့ခေါ်တဲ့ ဂျူးဂိုဏ်းတစ်ခုက နှစ်ပေါင်း ၄၉၀ ကုန်ခါနီးမှာ မေရှိယနှစ်ယောက်ပေါ်လာလိမ့်မယ်လို့ သွန်သင်ခဲ့တယ်။ ဒါပေမဲ့ အဲဒါကိုတွက်ချက်တဲ့အခါ ဒံယေလပရောဖက်ပြုချက်အပေါ် အခြေခံသလားဆိုတာကိုတော့ သေချာမသိရဘူး။ ဒံယေလပရောဖက်ပြုချက်ကို အခြေခံပြီး တွက်ထားတယ်ဆိုရင်တောင် လူတွေနဲ့အရောတဝင်မနေတဲ့ အက်ဆင်းတွေက တခြားဂျူးတွေအပေါ် ဘယ်လောက်အထိ ဩဇာလွှမ်းမိုးတယ်ဆိုတာ သေချာမသိနိုင်ဘူး။

အေဒီ ဒုတိယရာစုမှာ ဂျူးတချို့က သီတင်း ၇၀ ဆိုတာ ပထမဗိမာန်တော် ဖျက်ဆီးခံရတဲ့ ဘီစီ ၆၀၇ ကစပြီး ဒုတိယဗိမာန်တော် ဖျက်ဆီးခံရတဲ့ အေဒီ ၇၀ အထိ ဖြစ်တယ်လို့ ယုံကြည်ခဲ့ကြတယ်။ တချို့ကျတော့ အဲဒီပရောဖက်ပြုချက်ဟာ ဘီစီ ၁၇၀ လောက်မှာစတဲ့ မက္ကဘီးအချိန်မှာ ပြည့်စုံတယ်လို့ ယူဆခဲ့ကြတယ်။ ဒါကြောင့် ဂျူးတွေဟာ သီတင်း ၇၀ တွက်ချက်ပုံမှာ အမျိုးမျိုးကွဲပြားခဲ့ကြတယ်။

တမန်တော်တွေနဲ့ အစောပိုင်းခရစ်ယာန်တွေဟာ သီတင်း ၇၀ နဲ့ပတ်သက်တဲ့ ပရောဖက်ပြုချက်ကို မှန်မှန်ကန်ကန် နားလည်ခဲ့ကြမယ်ဆိုရင် ယေရှုခရစ်ဟာ အချိန်အတိအကျ ရောက်ရှိလာတဲ့ မေရှိယဖြစ်တယ်ဆိုတာကို ဖော်ပြတဲ့အထောက်အထားအဖြစ် သီတင်း ၇၀ ပရောဖက်ပြုချက်ကို ရည်ညွှန်းခဲ့မှာပဲ။ ဒါပေမဲ့ အစောပိုင်းခရစ်ယာန်တွေ အဲဒီလိုလုပ်ခဲ့တယ်ဆိုတဲ့ အထောက်အထားမရှိဘူး။

နောက်တစ်ချက်ကိုလည်း သတိပြုကြည့်ပါ။ ခရစ်ဝင်ကျမ်း ရေးသူတွေဟာ ယေရှုခရစ်မှာပြည့်စုံခဲ့တဲ့ အချက်တွေကို ဟေဗြဲကျမ်းစောင်တွေမှာပါတဲ့ ပရောဖက်ပြုချက်တွေနဲ့ နှိုင်းယှဉ်ဖော်ပြခဲ့ကြတယ်။ (မ. ၁:၂၂၊ ၂၃; ၂:၁၃-၁၅; ၄:၁၃-၁၆) ဒါပေမဲ့ သူတို့ထဲက တစ်ယောက်ကမှ ယေရှုခရစ်အကြောင်းကို သီတင်း ၇၀ ပရောဖက်ပြုချက်နဲ့ ဆက်စပ်ပြီး မဖော်ပြခဲ့ဘူး။

အချုပ်အနေနဲ့ ယေရှုအချိန်ကလူတွေဟာ သီတင်း ၇၀ ပရောဖက်ပြုချက်ကို အမှန်အတိုင်း နားလည်ခဲ့ကြတယ်လို့ ကျွန်ုပ်တို့ သေချာမပြောနိုင်ဘူး။ ဒါပေမဲ့ မေရှိယရောက်လာဖို့ ဂျူးတွေမျှော်လင့်ရတဲ့ တခြား ခိုင်လုံတဲ့အကြောင်းရင်းတွေကို ခရစ်ဝင်ကျမ်းတွေမှာ တွေ့ရှိရပါတယ်။