သူတို့သည် ယေဟောဝါ၏အလိုတော်ကို ဆောင်ရွက်ခဲ့ကြ

အိမ်နီးချင်းကောင်းတစ်ဦးဖြစ်ကြောင်း ရှမာရိတစ်ဦး သက်သေထူ

ယေရှုအချိန်၌ ဂျူးနှင့်တစ်ပါးအမျိုးသားကြားတွင် သိသာထင်ရှားသော မုန်းတီးမှုရှိခဲ့သည်။ နောက်ဆုံးတွင် ဂျူးမဟုတ်သူများ ကလေးမွေးဖွားစဉ် ဂျူးအမျိုးသမီးများကူညီပေးခြင်းကိုတားမြစ်သည့် ပညတ်ပင် ဂျူးမစ်ရှ်နာ၌ပါဝင်ခဲ့သည်၊ ဤလောကထဲသို့ နောက်တစ်ပါးအမျိုးသားတစ်ဦး မွေးဖွားလာခြင်းကို ကူညီပေးရာကျမည်ဖြစ်သောကြောင့်ပင်။—အဗိုဒါ ဇာရာ ၂:၁။

ရှမာရိလူမျိုးများသည် ဘာသာရေးအရလည်းကောင်း၊ လူမျိုးအရလည်းကောင်း တစ်ပါးအမျိုးသားများထက် ဂျူးလူမျိုးများနှင့် ပို၍နီးစပ်မှုရှိခဲ့ကြသည်။ သို့တိုင် သူတို့သည်လည်း ဝိုင်းပယ်ခံရသူများအဖြစ်ရှုမြင်ခံရကြသည်။ တမန်တော်ယောဟန်က “ယုဒလူတို့သည် ရှမာရိလူတို့နှင့်ပေါင်းဖော်ခြင်းမရှိ” ဟုရေးသားခဲ့သည်။ (ယောဟန် ၄:၉) အမှန်မှာ “ရှမာရိတစ်ဦးပေးသော ပေါင်မုန့်တစ်ချပ်သည် ဝက်သားထက်ပင် ပို၍ညစ်ညူးသည်” ဟုတာလ်မွဒ်ကျမ်းကသွန်သင်ခဲ့သည်။ ဂျူးအချို့က အထင်သေးပြီးကဲ့ရဲ့သည့်အသုံးအနှုန်းအဖြစ် “ရှမာရိလူ” ဟူသည့်ဝေါဟာရကိုပင် အသုံးပြုခဲ့ကြသည်။—ယောဟန် ၈:၄၈။

ဤအခြေအနေကြောင့် ဂျူးပညတ္တိကျမ်းတတ်တစ်ဦးအား ယေရှုပြောဆိုခဲ့သောစကားများသည် အလွန်မှတ်သားဖွယ်ဖြစ်သည်။ ထိုသူသည် ယေရှုထံချဉ်းကပ်ကာ “ထာဝရအသက်ကိုအမွေခံရအံ့သောငှာ အကျွန်ုပ်သည် အဘယ်အမှုကိုပြုရပါမည်နည်း” ဟုမေးလျှောက်ခဲ့သည်။ ဖြေဆိုရာ၌ ယေရှုက သူ့အား “သင်၏ဘုရားသခင်ထာဝရဘုရားကို စိတ်နှလုံးအကြွင်းမဲ့၊ အစွမ်းသတ္တိရှိသမျှ၊ ဉာဏ်ရှိသမျှနှင့်ချစ်လော့။ ကိုယ်နှင့်စပ်ဆိုင်သောသူ [“အိမ်နီးချင်း၊” ကဘ] ကို ကိုယ်နှင့်အမျှချစ်လော့” ဟုပညတ်ထားသည့် မောရှေ၏ပညတ်ကို အာရုံစိုက်စေခဲ့သည်။ ထိုအခါ ကျမ်းတတ်က “အဘယ်သူသည် အကျွန်ုပ်နှင့်စပ်ဆိုင်သောသူဖြစ်ပါသနည်း” ဟုမေးလျှောက်၏။ (လုကာ ၁၀:၂၅-၂၉; ဝတ်ပြုရာ ၁၉:၁၈; တရားဟောရာ ၆:၅) ဖာရိရှဲတို့၏အဆိုအရ “အိမ်နီးချင်း” ဟူသောဝေါဟာရသည် တစ်ပါးအမျိုးသားများ သို့မဟုတ် ရှမာရိလူမျိုးများနှင့် အမှန်ပင်မဆိုင်ဘဲ ဂျူးအစဉ်အလာများကို ထိန်းသိမ်းသူများနှင့်သာသက်ဆိုင်သည်။ ထိုရှုမြင်ပုံကို ယေရှုထောက်ခံမည်ဟု ဤစူးစမ်းလိုသောကျမ်းတတ်ယူဆခဲ့ပါမူ သူသည် အံ့အားသင့်ရပေမည်။

သနားကြင်နာသောရှမာရိလူ

ပုံဥပမာတစ်ခုကိုပြောပြခြင်းဖြင့် ထိုသူ၏မေးခွန်းကို ယေရှုဖြေကြားခဲ့သည်။a “လူတစ်ယောက်သည် ယေရုရှလင်မြို့မှယေရိခေါမြို့သို့သွား” နေသည်ဟု ကိုယ်တော်ဆိုခဲ့သည်။ ယေရုရှလင်နှင့်ယေရိခေါသည် ၁၄ မိုင်ခန့်ကွာဝေးသည်။ ဤမြို့နှစ်မြို့ကိုဆက်သွယ်ထားသောလမ်းသည် ဂငယ်ကွေ့များနှင့် တောင်စွယ်များရှိရာ သူခိုးများပုန်းအောင်းတိုက်ခိုက်၍ လွတ်မြောက်ရန်လွယ်ကူစေသည်။ သို့နှင့် ယေရှုပုံဥပမာမှ ခရီးသည်သည် “ဓားပြနှင့်တွေ့ ကြုံလေ၏။ ဓားပြတို့သည် ထိုသူ၏အဝတ်ကိုချွတ်၍ နာကျင်စွာရိုက်နှက်ပြီးမှ သေလုမတတ်ရှိသောအခါ ပစ်ထား၍သွားကြ၏။”—လုကာ ၁၀:၃၀။

“ထိုလမ်းသို့ယဇ်ပုရောဟိတ်တစ်ယောက်သည် အမှတ်တမဲ့သွား၍ ထိုလူနာကိုမြင်လျှင် လွှဲရှောင်၍သွားလေ၏။ ထိုနည်းတူလေဝိလူတစ်ယောက်သည် ထိုအရပ်သို့ရောက်သောအခါ၊ လာ၍ကြည့်မြင်လျှင် လွှဲရှောင်၍သွားလေ၏” ဟုယေရှုဆက်၍မိန့်ဆိုခဲ့သည်။ (လုကာ ၁၀:၃၁၊ ၃၂) ယဇ်ပုရောဟိတ်များနှင့် လေဝိတို့သည် ကိုယ်နှင့်စပ်ဆိုင်သူကိုချစ်ရမည်ဟူသော ပညတ်အပါအဝင်—ပညတ်တရားကိုသင်ကြားပေးသူများဖြစ်ကြသည်။ (ဝတ်ပြုရာ ၁၀:၈-၁၁; တရားဟောရာ ၃၃:၁၊ ၁၀) အမှန်ပင်၊ သူတို့သည် အခြားမည်သူထက်မဆို ဒဏ်ရာရနေသောခရီးသည်ကို အကူအညီပေးလိုစိတ်ရှိသင့်သည်။

“ရှမာရိလူတစ်ယောက်သည် ခရီးသွားရာတွင် ထိုလူနာရှိရာသို့ရောက်” လေသည်ဟုယေရှုကဆက်ပြောသည်။ ရှမာရိလူတစ်ယောက်ဟူ၍ပြောဆိုလိုက်ရာ ကျမ်းတတ်သည် ပို၍သိလိုစိတ်ရှိလာမည်မှာအမှန်။ ယေရှုသည် အပြုသဘောမဆောင်သည့် ဤလူမျိုး၏အမြင်ကို ထောက်ခံပါမည်လော။ ထိုသို့ပြုမည့်အစား အကြောင်းမလှသည့်ခရီးသည်ကို မြင်သောအခါ ရှမာရိလူသည် “ကရုဏာစိတ်ရှိ” ခဲ့သည်။ ယေရှုက ဤသို့ဆိုခဲ့သည်– “ချဉ်းကပ်၍သူ၏အနာများကို ဆီနှင့်စပျစ်ရည်ထည့်လျက် အဝတ်နှင့်စည်းပြီးလျှင်၊ မိမိတိရစ္ဆာန်ပေါ်မှာတင်၍ ဇရပ်တစ်ခုသို့ဆောင်သွားပြုစုလေ၏။ နက်ဖြန်နေ့၌ထွက်သွားသောအခါ၊ ဒေနာရိနှစ်ပြားကိုထုတ်၍ ဇရပ်ရှင်အားပေးလျက်၊ ‘ဤသူကိုကြည့်ရှုပြုစုပါ။ ကုန်သမျှကိုငါပြန်လာသောအခါ ဆပ်ပေးမည်’ ဟုဆို၏။”b—လုကာ ၁၀:၃၃-၃၅။

ယခု မိမိအားမေးမြန်းသူကို ယေရှုက “ထိုသူသုံးယောက်တို့တွင် အဘယ်သူသည် ဓားပြလက်သို့ရောက်သောသူနှင့် စပ်ဆိုင်သောသူဖြစ်သနည်း” ဟုမေးတော်မူ၏။ အဖြေကို ကျမ်းတတ်သိသော်လည်း “ရှမာရိလူ” ဟုပြောရန် အင်တင်တင်ဖြစ်နေပုံရသည်။ ယင်းအစား သူက “လူနာကိုသနားသောသူ” ဟုသာ ပြန်ဖြေဆိုခဲ့သည်။ ထို့နောက် ယေရှုက “သင်သည်သွား၍ထိုနည်းတူပြုလော့” ဟုမိန့်တော်မူ၏။—လုကာ ၁၀:၃၆၊ ၃၇။

ကျွန်ုပ်တို့အတွက်သင်ခန်းစာများ

ယေရှုအား မေးခွန်းမေးခဲ့သူသည် “မိမိဖြောင့်မတ်သည်ကိုပြလို” ၍မေးခြင်းဖြစ်သည်။ (လုကာ ၁၀:၂၉၊ သမ္မာ) သူသည် မောရှေပညတ်ကို ဇီဇာချဲ့စောင့်ထိန်းနေခြင်းကြောင့် ယေရှု၏ချီးမွမ်းခြင်းကိုခံရလိမ့်မည်ဟု သူထင်မှတ်ခဲ့ပေမည်။ သို့သော် မိမိကိုယ်ကိုအထင်ကြီးသော ထိုသူသည် ဤကျမ်းစာစကားပုံ မှန်ကန်ကြောင်း သိရှိရန်လိုနေသည်– “လူတို့သည် မိမိတို့ကျင့်သမျှသောအကျင့်တို့ကို နှစ်သက်တတ်၏။ ထာဝရဘုရားမူကား၊ စိတ်နှလုံးတို့ကိုချိန်တော်မူ၏။”—သု. ၂၁:၂။

အမှန်တကယ်ဖြောင့်မတ်သူတစ်ဦးသည် ဘုရားသခင့်ပညတ်များကိုနာခံရုံသာမက ကိုယ်တော့်အရည်အချင်းများကိုတုပသူလည်းဖြစ်ကြောင်း ယေရှု၏ပုံဥပမာက ဖော်ပြပါသည်။ (ဧဖက် ၅:၁) ဥပမာ၊ ကျမ်းစာက “ဘုရားသခင်သည် လူမျက်နှာကိုမှတ်တော်မမူ” ဟုဆိုသည်။ (တမန်တော် ၁၀:၃၄) ဤကိစ္စ၌ ဘုရားသခင်ကိုတုပနေပါသလော။ ကိုယ်နှင့်စပ်ဆိုင်သူကောင်းတစ်ဦးဖြစ်ခြင်းတွင် လူမျိုးရေး၊ ယဉ်ကျေးမှုနှင့် ဘာသာတရားအတားအဆီးများမရှိသင့်ကြောင်း ယေရှု၏ လှုံ့ဆော်မှုဖြစ်စေသောသောပုံဥပမာက တင်ပြသည်။ မှန်ပါသည်၊ ခရစ်ယာန်များသည် တူညီသော လူမှုရေးအဆင့်အတန်း၊ လူမျိုး သို့မဟုတ် အမျိုးအနွယ်နှင့် ယုံကြည်သူချင်းတို့ကိုသာမဟုတ်ဘဲ “ခပ်သိမ်းသောသူတို့အား ကျေးဇူးပြု” ရန်ညွှန်ကြားခံရကြသည်။—ဂလာတိ ၆:၁၀

ယေဟောဝါသက်သေများသည် ဤကျမ်းစာသတိပေးချက်ကို လိုက်လျှောက်ရန် ကြိုးစားအားထုတ်ကြသည်။ ဥပမာ၊ သဘာဝဘေးဒဏ်များကြုံတွေ့ရသောအခါ သူတို့သည် ယုံကြည်သူချင်းတို့အပြင် သက်သေခံမဟုတ်သူများကိုပါ လူသားခြင်းစာနာသောအထောက်အကူကိုပေးကြသည်။c ထို့အပြင် ကျမ်းစာကိုပိုမိုသိရှိလာရန် လူတို့အားကူညီပေးရာ၌ သူတို့သည် နှစ်စဉ် နာရီသန်းတစ်ထောင်ကျော်ကို အသုံးပြုကြသည်။ “လူအပေါင်းတို့သည် ကယ်တင်ခြင်းသို့ရောက်၍ [အမှန်] တရားကိုသိစေခြင်းငှာ၊ ဘုရားသခင်အလိုတော်ရှိ” သောကြောင့် ဘုရားသခင့်နိုင်ငံတော်သတင်းကောင်းကိုလူတိုင်းအားဟောပြောရန် ကြိုးစားကြသည်။—၁ တိမောသေ ၂:၄; တမန်တော် ၁၀:၃၅။

[အောက်ခြေမှတ်ချက်များ]