“အသီးမသီးတဲ့ အကိုင်းတွေကို သူ [အဖဘုရား] ခုတ်ပစ်တယ်။ အသီးသီးတဲ့ အကိုင်းတွေကိုတော့ ပိုသီးအောင် သန့်စင်ရှင်းလင်းပေးတယ်။ . . . စပျစ်ကိုင်းက စပျစ်ပင်နဲ့ ဆက်မနေရင် အသီးမသီးနိုင်ဘူး။ အဲဒီလိုပဲ၊ ခင်ဗျားတို့လည်း ကျွန်တော်နဲ့ တစ်စိတ်တစ်ဝမ်းတည်း ဖြစ်မနေရင် အသီးမသီးနိုင်ဘူး။ ကျွန်တော်ဟာ စပျစ်ပင်၊ ခင်ဗျားတို့ဟာ စပျစ်ကိုင်းတွေပေါ့။”—ယောဟန် ၁၅:၂-၅။

ယေရှု ဒီလိုရှင်းပြတယ်– “လူတစ်ယောက်က ကျွန်တော်နဲ့ တစ်စိတ်တစ်ဝမ်းတည်း ဖြစ်မယ်ဆိုရင် ကျွန်တော်လည်း သူနဲ့ တစ်စိတ်တစ်ဝမ်းတည်း ဖြစ်မယ်။ သူဟာ အသီးများစွာ သီးလိမ့်မယ်။ ကျွန်တော်နဲ့ ကင်းကွာရင်တော့ ဘာမှတတ်နိုင်မှာ မဟုတ်ဘူး။” “စပျစ်ကိုင်းတွေ” ဖြစ်တဲ့ သစ္စာရှိ နောက်လိုက်တွေဟာ အသီးများစွာ သီးရမယ်။ ဆိုလိုတာက ယေရှုရဲ့ အရည်အသွေးတွေကို အတုယူရမယ်၊ ဘုရားနိုင်ငံတော်သတင်းကို တက်တက်ကြွကြွ ဟောပြောရမယ်၊ တပည့်တွေ တိုးများလာအောင် လုပ်ရမယ်။ တကယ်လို့ ယေရှုနဲ့ တစ်စိတ်တစ်ဝမ်းတည်း မဖြစ်ဘူး၊ အသီးတွေ မသီးဘူးဆိုရင် ဘာဖြစ်မလဲ။ “ကျွန်တော်နဲ့ တစ်စိတ်တစ်ဝမ်းတည်း မဖြစ်တဲ့သူဟာ လွှင့်ပစ်” ခံရမယ်လို့ ယေရှုပြောတယ်။ ဒါပေမဲ့ “ကျွန်တော်နဲ့ တစ်စိတ်တစ်ဝမ်းတည်းဖြစ်ပြီး ကျွန်တော့်စကားတွေကို ရင်ထဲမှာ စွဲမြဲထားမယ်ဆိုရင် ခင်ဗျားတို့ အလိုရှိသမျှ တောင်းတဲ့အခါ တောင်းတဲ့အတိုင်း ရလိမ့်မယ်” လို့ဆက်ပြောတယ်။—ယောဟန် ၁၅:၅-၇။