ကျမ်းစာမှာ ရှေ့နောက်မညီညွတ်တဲ့ အကြောင်းအရာတွေ ရှိသလား

သမ္မာကျမ်းစာဖြေဆိုရာ

မရှိပါဘူး။ ကျမ်းစာတစ်အုပ်လုံးက ရှေ့နောက်ညီညွတ်မှုရှိပါတယ်။ တချို့ကျမ်းပိုဒ်တွေက ရှေ့နောက်မညီညွတ်တဲ့ပုံပေါက်နေနိုင်တယ်။ အဲဒီလိုကျမ်းချက်တွေကို မှန်မှန်ကန်ကန် နားလည်စေမယ့် အောက်ပါအကြံပြုချက်တွေကို လေ့လာကြည့်ပါ–

1. ၁။ ရှေ့နောက်အကြောင်းအရာကို သုံးသပ်ပါ။ အထက်အောက်အကြောင်းအရာကို ထည့်မစဉ်းစားဘဲ စကားစုလေးတစ်စုကိုပဲ ကွက်ပြီးဖတ်မယ်ဆိုရင် ဘယ်စာရေးဆရာရဲ့ အရေးအသားကိုမဆို ရှေ့နောက်မညီဘူးလို့ ထင်မိနိုင်တယ်။

2. ၂။ စာရေးသူရဲ့ ရှုထောင့်ကို ထည့်သုံးသပ်ပါ။ မျက်မြင်သက်သေတွေက ဖြစ်ရပ်တစ်ခုကို တိတိကျကျဖော်ပြကြပေမဲ့ စကားအသုံးအနှုန်းနဲ့ အသေးစိတ်ဖော်ပြပုံချင်း တူချင်မှတူပါလိမ့်မယ်။

3. ၃။ သမိုင်းအချက်အလက်တွေနဲ့ ဓလေ့ထုံးစံတွေကို ထည့်စဉ်းစားပါ။

4. ၄။ စကားလုံးတစ်လုံးကို တိုက်ရိုက်အဓိပ္ပာယ်အတိုင်း အသုံးပြုတာနဲ့ ဥပစာအနေနဲ့ အသုံးပြုတာကို ခွဲခြားသိမြင်ပါ။

5. ၅။ လူတစ်ယောက်ဟာ တစ်စုံတစ်ခုကို ကိုယ်တိုင် မလုပ်ဆောင်ရင်တောင် သူလုပ်တဲ့ပုံစံမျိုးနဲ့ နာမည်တပ် ဖော်ပြလေ့ရှိတယ်ဆိုတာ သတိပြုပါ။a

6. ၆။ တိကျမှန်ကန်တဲ့ ဘာသာပြန်ကျမ်းကို သုံးပါ။

7. ၇။ မှားယွင်းတဲ့ ဘာသာရေးအယူအဆတွေ၊ အယူဝါဒတွေနဲ့ ကျမ်းစာသွန်သင်ရာတွေကို မရောနှောလိုက်ပါနဲ့။

အထက်ပါအကြံပြုချက်တွေက ကျမ်းစာမှာ ရှေ့နောက်မညီညွတ်ဘူးလို့ ထင်ရတဲ့ အကြောင်းအရာတချို့ကို ဘယ်လို နားလည်စေနိုင်တယ်ဆိုတာ လေ့လာကြည့်ပါ။

၁။ ရှေ့နောက်အကြောင်းအရာ

ခုနစ်ရက်မြောက်နေ့မှာ ဘုရားသခင်အနားယူတယ်ဆိုရင် ကိုယ်တော် ဆက်အလုပ်လုပ်နေတယ်လို့ ဘယ်လိုပြောနိုင်မလဲ။ ဘုရားသခင်က “ဖန်ဆင်းသမျှသောအမှုအရာတို့သည် ပြီးစီးပြီးမှ ထိုသတ္တမနေ့၌ ငြိမ်ဝပ်စွာနေတော်မူ၏” လို့ ကမ္ဘာဦးကျမ်းက ဖော်ပြတဲ့အခါ အထူးသဖြင့် ကမ္ဘာမြေနဲ့ပတ်သက်တဲ့ ဖန်ဆင်းခြင်းအကြောင်းကို ပြောနေတာဖြစ်တယ်။ (ကမ္ဘာဦး ၂:၂–၄) ယေရှုက “ငါ့ခမည်းတော်သည် ယခုတိုင်အောင် အလုပ်လုပ်တော်မူ၏” လို့ပြောတဲ့အခါ ဒီအကြောင်းကို ဆန့်ကျင်ပြောဆိုနေတာမဟုတ်ဘဲ ဘုရားသခင်ရဲ့ တခြားအလုပ်တွေအကြောင်းကို ပြောနေတာဖြစ်တယ်။ (ယောဟန် ၅:၁၇) ဘုရားသခင်ရဲ့ တခြားအလုပ်တွေထဲမှာ ကျမ်းစာရေးသားဖို့ လူတွေကို လမ်းညွှန်တာ၊ လူသားတွေကို လမ်းပြပေးတာနဲ့ ဂရုစိုက်တာတွေလည်းပါတယ်။—ဆာလံ ၂၀:၆; ၁၀၅:၅; ၂ ပေတရု ၁:၂၁။

၂၊ ၃။ ရှုထောင့်နဲ့ သမိုင်းနောက်ခံ

မျက်မမြင်တစ်ယောက်ကို ယေရှု ဘယ်နေရာမှာ ကုသပေးခဲ့သလဲ။ လုကာကျမ်းမှာ ယေရှုက “ဂျေရိခိုမြို့အနီး” ရောက်တဲ့အခါမှာ မျက်မမြင်တစ်ယောက်ကို ကုသပေးခဲ့တယ်လို့ ဖော်ပြထားပေမဲ့ မဿဲကျမ်းမှာတော့ ယေရှုက “ဂျေရိခိုမြို့မှ ထွက်သွား” ချိန်မှာ မျက်မမြင်နှစ်ယောက်ကို ကုသပေးတယ်လို့ ဖော်ပြထားတယ်။ (လုကာ ၁၈:၃၅–၄၃; မဿဲ ၂၀:၂၉–၃၄) ဒီမှတ်တမ်းနှစ်ခုက မတူညီတဲ့ရှုထောင့်နှစ်ခုကနေ ရေးထားတာဖြစ်ပြီး တစ်ခုနဲ့တစ်ခု ဖြည့်စွက်ဖော်ပြနေပါတယ်။ မျက်မမြင်အရေအတွက်ကို မဿဲကျမ်းက နှစ်ယောက်လို့ တိတိကျကျဖော်ပြထားပေမဲ့ လုကာကျမ်းမှာတော့ ယေရှုတိုက်ရိုက်စကားပြောခဲ့တဲ့ မျက်မမြင်တစ်ယောက်ကိုပဲ အလေးပေးဖော်ပြထားတာဖြစ်တယ်။ တည်နေရာကိုကြည့်ပြန်ရင်လည်း ရှေးဟောင်းသုတေသီအဖွဲ့က ယေရှုအချိန်မှာ ဂျေရိခိုမြို့က ဂျူးတွေတည်ခဲ့တဲ့မြို့ဟောင်းနဲ့ ရောမတွေတည်ထားတဲ့မြို့သစ် ဆိုပြီး နှစ်မြို့ရှိတယ်ဆိုတာ ရှာဖွေတွေ့ရှိခဲ့တယ်။ မြို့ဟောင်းက မြို့သစ်ရဲ့ တစ်မိုင်အကွာမှာ တည်ရှိတယ်။ ဒီအံ့ဖွယ်ဖြစ်ရပ်ကို လုပ်တဲ့အခါ ယေရှုဟာ ဒီမြို့နှစ်မြို့ကြားမှာ ရှိနေတာဖြစ်နိုင်တယ်။

၄။ စကားလုံးတစ်လုံးကို တိုက်ရိုက်အဓိပ္ပာယ်အတိုင်း အသုံးပြုခြင်းနဲ့ ဥပစာအနေနဲ့ အသုံးပြုခြင်း

ကမ္ဘာကြီးဖျက်ဆီးခံရမှာလား။ ဒေသနာ ၁:၄ မှာ “မြေကြီးမူကား အစဉ်အမြဲတည်၏” လို့ ဖော်ပြထားပေမဲ့ ၂ ပေတရု ၃:၁၀ မှာတော့ “မြေကြီးနှင့် မြေကြီးပေါ်ရှိအရာများသည် ကျွမ်းလောင်လိမ့်မည်” လို့ ဖော်ပြထားတဲ့အတွက် ဒီကျမ်းနှစ်ခုက ရှေ့နောက်မညီတဲ့ပုံပေါက်နေတယ်။ ကျမ်းစာမှာ “မြေကြီး” လို့ပြောတဲ့အခါ တိုက်ရိုက်အဓိပ္ပာယ်ရှိတဲ့ ပကတိကမ္ဘာကြီးကို ပြောနေတာရှိသလို ဥပစာအနေနဲ့ ဒီကမ္ဘာပေါ်က လူသားတွေကို ပြောတဲ့အခါလည်း ရှိတယ်။ (ကမ္ဘာဦး ၁:၁; ၁၁:၁) ၂ ပေတရု ၃:၁၀ မှာ “မြေကြီး” ဖျက်ဆီးခံရမယ့်အကြောင်း ပြောတဲ့အခါ ဒီကမ္ဘာကြီး ကျွမ်းလောင်သွားမှာကို ပြောနေတာမဟုတ်ဘဲ “ဘုရားတရားမဲ့သူတို့ကို ဖျက်ဆီး” မယ့်အကြောင်း ပြောနေတာဖြစ်တယ်။—၂ ပေတရု ၃:၇။

၅။ နာမည်တပ် ဖော်ပြခြင်း

ကပေရနောင်မြို့မှာ တပ်မှူးရဲ့အသနားခံချက်ကို ယေရှုဆီ ဘယ်သူ သတင်းပို့ပေးသလဲ။ မဿဲ ၈:၅၊ ၆ မှာ တပ်မှူးကိုယ်တိုင် ယေရှုဆီလာတယ်လို့ ဖော်ပြထားပေမဲ့ လုကာ ၇:၃ မှာတော့ တပ်မှူးက သူ့ရဲ့ ဂျူးလူကြီးတွေကို ယေရှုဆီလွှတ်လိုက်တယ်လို့ ဖော်ပြထားတယ်။ ရှေ့နောက်မညီပုံရတဲ့ ဒီဖြစ်ရပ်ကနေ နားလည်ရတာက ဒီအသနားခံချက်ကို တောင်းဆိုသူက တပ်မှူးဖြစ်ပြီး သူ့ကိုယ်စားလှယ်တွေအဖြစ် ဂျူးလူကြီးတွေကို ယေရှုဆီ လွှတ်လိုက်တာဖြစ်တယ်။

၆။ တိကျတဲ့ ဘာသာပြန်ကျမ်း

ကျွန်ုပ်တို့အားလုံး အပြစ်သားတွေလား။ ကျွန်ုပ်တို့အားလုံးဟာ ပထမဆုံးလူသားအာဒံဆီကနေ အပြစ်ကူးစက်ခံရတယ်လို့ ကျမ်းစာက သွန်သင်ထားတယ်။ (ရောမ ၅:၁၂) တချို့ဘာသာပြန်ကျမ်းက ၁ ယောဟန် ၃:၆ မှာ လူကောင်းတစ်ယောက်ဟာ “အပြစ်ကို မပြုတတ်” ဒါမှမဟုတ် “အပြစ်မကျူးတတ်” လို့ ဘာသာပြန်ထားတဲ့အတွက် ရှေ့နောက်မညီပုံရတယ်။ (သမ္မာကျမ်းစာတော်၊ ခေတ်သုံးမြန်မာသမ္မာကျမ်း) မူရင်းကျမ်းအရ ၁ ယောဟန် ၃:၆ မှာ “အပြစ်” နဲ့တွဲသုံးထားတဲ့ ဂရိကြိယာက ပစ္စုပ္ပန်ကာလပြကြိယာဖြစ်ပြီး ဆက်ဖြစ်နေတဲ့လုပ်ရပ်ကို ဖော်ပြတယ်။ မရှောင်လွှဲနိုင်တဲ့ ကူးစက်ခံထားရတဲ့အပြစ်နဲ့ ဘုရားရဲ့ပညတ်ကို တမင်တကာ ဆက်ချိုးဖောက်တဲ့အပြစ်က မတူပါဘူး။ ဒါကြောင့် တချို့ဘာသာပြန်ကျမ်းမှာ “အပြစ်ပြုကျင့်လေ့မရှိ၊” “အပြစ်ကို ဆက်၍မပြု” ဆိုတဲ့ တိကျတဲ့စကားစုကို သုံးလိုက်တဲ့အတွက် ဆိုလိုရင်းသဘောပေါက်သွားစေတယ်။—ကမ္ဘာသစ် ဘာသာပြန်ကျမ်း၊ နားလည်လွယ်သော ခေတ်သုံးမြန်မာစကားပြေကျမ်း။

၇။ မှားယွင်းတဲ့အယူဝါဒ ကျမ်းစာမှာမရှိ

ယေရှုက ဘုရားနဲ့တန်းတူ ဖြစ်သလား၊ မဖြစ်ဘူးလား။ ယေရှုက “ငါနှင့် ခမည်းတော်သည် တစ်လုံးတစ်ဝတည်းဖြစ်၏” လို့ဆိုပြီး “ခမည်းတော်သည် ငါ့ထက် သာ၍ကြီးမြတ်တော်မူ၏” လို့လည်း ပြောခဲ့တဲ့အတွက် ရှေ့နောက်မညီတဲ့ပုံပေါက်နေတယ်။ (ယောဟန် ၁၀:၃၀; ၁၄:၂၈) ဒီကျမ်းချက်နှစ်ခုကို တိတိကျကျနားလည်နိုင်ဖို့ ယေဟောဝါဘုရားနဲ့ ယေရှုအကြောင်း ကျမ်းစာအမှန်တကယ်သွန်သင်တာကိုဘဲ လေ့လာရမယ်။ ကျမ်းစာပေါ်အခြေမခံတဲ့ သုံးပါးပေါင်းတစ်ဆူအယူဝါဒနဲ့ ကိုက်ညီဖို့ မကြိုးစားသင့်ဘူး။ ယေဟောဝါဟာ ယေရှုရဲ့ဖခင်သာမက ယေရှုကိုယ်တိုင်ကိုးကွယ်တဲ့ ဘုရားဖြစ်တယ်လို့ ကျမ်းစာက ဖော်ပြထားတယ်။ (မဿဲ ၄:၁၀; မာကု ၁၅:၃၄; ယောဟန် ၁၇:၃; ၂၀:၁၇; ၂ ကောရိန္သု ၁:၃) ဒါကြောင့် ယေရှုက ဘုရားနဲ့တန်းတူမဟုတ်ပါဘူး။

ယေရှုက “ငါနှင့် ခမည်းတော်သည် တစ်လုံးတစ်ဝတည်းဖြစ်၏” လို့ပြောတဲ့အခါ သူဟာ ဖခင်ယေဟောဝါဘုရားနဲ့ တစ်သဘောတည်းဖြစ်တယ်လို့ ဆိုလိုနေတာဖြစ်တယ်။ ဒါကြောင့်လည်း ‘ခမည်းတော်သည် ငါနှင့် တစည်းတလုံးတည်းရှိပြီး ငါသည်လည်း ခမည်းတော်နှင့် တစည်းတလုံးတည်းရှိ’ တယ်လို့ ယေရှုပြောခဲ့သေးတယ်။ (ယောဟန် ၁၀:၃၈) “ကျွန်ုပ်တို့သည် တစ်လုံးတစ်ဝတည်းဖြစ်သကဲ့သို့ သူတို့သည်လည်း တစ်လုံးတစ်ဝတည်းဖြစ်စေရန် ကျွန်ုပ်အား ကိုယ်တော်ပေးတော်မူသော ဘုန်းအသရေကို သူတို့အား ပေးပါပြီ။ ကျွန်ုပ်သည် သူတို့နှင့် တစည်းတလုံးတည်းရှိ၍ ကိုယ်တော်သည် ကျွန်ုပ်နှင့် တစည်းတလုံးတည်းရှိတော်မူ [ပါ၏]” ဆိုပြီး ယေရှုဆုတောင်းခဲ့တဲ့အတွက် သူလည်း တပည့်တွေနဲ့ စည်းလုံးတယ်ဆိုတာ ဖော်ပြနေတယ်။—ယောဟန် ၁၇:၂၂၊ ၂၃။