“ဒီလောကရဲ့အလင်း”

တဲနေပွဲတော် နောက်ဆုံးနေ့၊ ခုနစ်ရက်မြောက်နေ့မှာ ဗိမာန်တော် “ဘဏ္ဍာတိုက်” လို့ ခေါ်တဲ့နေရာမှာ ယေရှု သွန်သင်နေတယ်။ (ယောဟန် ၈:၂၀။ လုကာ ၂၁:၁) အဲဒါက အမျိုးသမီးများရင်ပြင် ဖြစ်နိုင်ပြီး အလှူငွေထည့်တဲ့နေရာ ဖြစ်တယ်။

ပွဲတော်အတွင်း ညဘက်မှာ အထူးသဖြင့် အဲဒီနေရာကို အလင်းပေးထားတယ်။ အဲဒီမှာ မီးတိုင်ကြီးလေးခုရှိပြီး မီးတိုင်တစ်ခုစီမှာ ဆီအပြည့်ထည့်ထားတဲ့ မီးခွက်ကြီးလေးခုရှိတယ်။ မီးတိုင်တွေရဲ့ အလင်းကြောင့် ပတ်ဝန်းကျင် ခပ်ဝေးဝေးအထိ လင်းထိန်နေတယ်။ အခု ယေရှုပြောတဲ့စကားကို ကြားတဲ့သူတွေဟာ အဲဒီအလင်းရောင်ကို စဉ်းစားမိမှာပဲ။ ယေရှုက “ကျွန်တော်ဟာ ဒီလောကရဲ့ အလင်းပဲ။ ကျွန်တော့်ရဲ့ နောက်လိုက်တွေဟာ ဘယ်တော့မှ မှောင်မိုက်ထဲ သွားလာရမှာ မဟုတ်ဘူး။ အသက်ရစေတဲ့ အလင်းကို ပိုင်ဆိုင်ရလိမ့်မယ်” လို့ပြောတယ်။—ယောဟန် ၈:၁၂။

ဒီအခါ ဖာရိရှဲတွေက “ခင်ဗျားက ကိုယ့်အကြောင်းကိုယ်ပဲ သက်သေခံနေတော့ ခင်ဗျားစကားတွေ ဘယ်မှန်မလဲ” လို့ ကန့်ကွက်ကြတယ်။ ယေရှုက “ကိုယ့်အကြောင်းကိုယ် သက်သေခံနေတာ ဆိုပေမဲ့ ကျွန်တော့်စကားတွေဟာ အမှန်ပဲ။ ဘာလို့လဲဆိုတော့ ကျွန်တော် ဘယ်ကလာတယ်၊ ဘယ်ကိုသွားနေတယ်ဆိုတာ ကျွန်တော်သိတယ်။ ခင်ဗျားတို့ကတော့ ကျွန်တော် ဘယ်ကလာလို့ ဘယ်ကိုသွားနေမှန်း မသိကြဘူး” လို့ပြောတယ်။ ပြီးတော့ “ခင်ဗျားတို့ရဲ့ ပညတ်ကျမ်းမှာလည်း ‘လူနှစ်ဦး သက်သေထွက်ဆိုရင် မှန်တယ်’ ဆိုပြီး ရေးထားတာပဲ။ ကျွန်တော်က ကိုယ့်အကြောင်းကိုယ် သက်သေခံသလို ကျွန်တော့်ကိုစေလွှတ်တဲ့ အဖကလည်း ကျွန်တော့်အကြောင်း သက်သေခံတယ်” လို့ပြောလိုက်တယ်။—ယောဟန် ၈:၁၃-၁၈။

ဖာရိရှဲတွေက လက်မခံဘဲ “ခင်ဗျားရဲ့အဖဆိုတာ ဘယ်မှာလဲ” လို့မေးကြတယ်။ ယေရှုက “ကျွန်တော့်ကို မသိမှတော့ ကျွန်တော့်အဖကိုလည်း ခင်ဗျားတို့ သိမှာမဟုတ်ဘူး။ ကျွန်တော့်ကိုသိရင် အဖကိုလည်း သိမှာပဲ” လို့ ရှင်းရှင်းပြောလိုက်တယ်။ (ယောဟန် ၈:၁၉) ဖာရိရှဲတွေက ယေရှုကို ဖမ်းစေချင်ပေမဲ့ ဘယ်သူမှ မဖမ်းကြဘူး။

ယေရှုက ပြောပြီးသား စကားကို အခုလို ပြန်ပြောတယ်– “ကျွန်တော် သွားရတော့မယ်။ ခင်ဗျားတို့ ကျွန်တော့်ကို ရှာကြမှာပဲ။ ဒါပေမဲ့ အပြစ်သားအဖြစ်နဲ့ပဲ ခင်ဗျားတို့ သေရလိမ့်မယ်။ ကျွန်တော်သွားမယ့် နေရာကို ခင်ဗျားတို့ မလာနိုင်ဘူး။” ဂျူးတွေက ယေရှုရဲ့ စကားကို နားမလည်ဘဲ “‘ကျွန်တော်သွားမယ့်နေရာကို ခင်ဗျားတို့ မလာနိုင်ဘူး’ ဆိုတော့ သူ့ကိုယ်သူ သတ်သေမလား မသိဘူး” လို့ပြောကြတယ်။ ယေရှုရဲ့ မူလအစကို မသိတာကြောင့် သူဘာကိုဆိုလိုမှန်း နားမလည်ကြတာ။ “ခင်ဗျားတို့ဟာ အောက်အရပ်က၊ ကျွန်တော်ကတော့ အထက်အရပ်က ဖြစ်တယ်။ ခင်ဗျားတို့ဟာ ဒီလောကက၊ ကျွန်တော်ကတော့ ဒီလောကက မဟုတ်ဘူး” လို့ ယေရှု ရှင်းပြတယ်။—ယောဟန် ၈:၂၁-၂၃။

ယေရှုက  လူသားဘဝမတိုင်ခင်  ကောင်းကင်အသက်တာအကြောင်း၊ သူဟာ ဘာသာရေးခေါင်းဆောင်တွေ အသိအမှတ်ပြုသင့်တဲ့ ကတိထားရာ မေရှိယ၊ ခရစ်တော်ဖြစ်ကြောင်း ပြောနေတာ။ ဒါပေမဲ့ သူတို့က အထင်သေးတဲ့ပုံစံနဲ့ “ဒါဆို ခင်ဗျား ဘယ်သူလဲ” လို့မေးကြတယ်။—ယောဟန် ၈:၂၅။

သူတို့ရဲ့ ဆန့်ကျင်မှု၊ ငြင်းပယ်မှုကို ခံရလို့ ယေရှုက “ပြောပြရင်လည်း အချိန်ကုန်ရုံပဲ ရှိမယ်” လို့ပြောလိုက်တယ်။ ဒါပေမဲ့ သူ့ဖခင်အကြောင်း၊ သားတော်ရဲ့စကားကို ဂျူးတွေ ဘာကြောင့် နားထောင်သင့်ကြောင်း အခုလို အလေးပေး ပြောတယ်– “ကျွန်တော့်ကို စေလွှတ်တဲ့အရှင်ဟာ အမှန်အတိုင်းပဲ ပြောတယ်။ ကျွန်တော်လည်း သူ့ဆီက ကြားခဲ့တာတွေကိုပဲ ဒီလောကမှာ ပြန်ပြောတယ်။”—ယောဟန် ၈:၂၅၊ ၂၆။

အဖဘုရားကို ဂျူးတွေ မယုံကြည်ပေမဲ့ သူကတော့ ယုံကြည်ကြောင်း အခုလို ဆက်ပြောတယ်– “လူသားကို သစ်တိုင်ပေါ် မြှောက်ထားတဲ့အခါကျမှ ကျွန်တော်ဟာ အဲဒီတစ်ယောက်ပဲ၊ ကိုယ်တိုင်အစပြုပြီး ဘာတစ်ခုမှ မလုပ်ဘူး၊ ကျွန်တော့်အဖ သင်ပေးတဲ့အတိုင်း ပြောတယ်ဆိုတာကို ခင်ဗျားတို့ သိရလိမ့်မယ်။ ကျွန်တော့်ကိုစေလွှတ်တဲ့ အရှင်ဟာ ကျွန်တော်နဲ့အတူ ရှိတယ်။ သူနှစ်သက်တာကိုပဲ အမြဲလုပ်တဲ့အတွက် ကျွန်တော့်ကို တစ်ယောက်တည်း စွန့်ပစ်မှာ မဟုတ်ဘူး။”—ယောဟန် ၈:၂၈၊ ၂၉။

ဂျူးတချို့ကတော့ ယေရှုကို ယုံကြည်သက်ဝင်ကြတယ်။ ယေရှုက သူတို့ကို “ခင်ဗျားတို့သာ ကျွန်တော့်စကားကို အမြဲလိုက်နာရင် ကျွန်တော့်တပည့်အစစ် ဖြစ်ရုံမက အမှန်တရားကိုပါ သိရလိမ့်မယ်။ အဲဒီအမှန်တရားက ခင်ဗျားတို့ကို လွတ်မြောက်စေလိမ့်မယ်” လို့ပြောတယ်။—ယောဟန် ၈:၃၁၊ ၃၂။

လွတ်မြောက်စေလိမ့်မယ် ဆိုတဲ့စကားက တချို့အတွက် ထူးဆန်းနေမှာပဲ။ ဒါကြောင့် “ကျုပ်တို့ဟာ အာဗြဟံရဲ့ သားမြေးတွေပါ။ ဘယ်သူ့ဆီမှာမှ ကျွန်ခံဖူးတာ မဟုတ်ဘူး။ ကျုပ်တို့ လွတ်မြောက်လိမ့်မယ်လို့ ခင်ဗျား ဘာကြောင့်ပြောရတာလဲ” ဆိုပြီး မေးကြတယ်။ တိုင်းတစ်ပါး အုပ်ချုပ်မှုအောက် ကျရောက်ခဲ့တဲ့ အချိန်တွေရှိမှန်း ဂျူးတွေသိပေမဲ့ ကျွန်လို့ အခေါ်မခံချင်ကြဘူး။ ဒါပေမဲ့ သူတို့ဟာ အပြစ်ရဲ့ ကျေးကျွန်တွေ ဖြစ်နေသေးမှန်း ယေရှု အခုလို ထောက်ပြတယ်– “ကျွန်တော် မှန်တာကိုပြောမယ်၊ အမှန်အတိုင်း ပြောမယ်။ အပြစ်လုပ်တဲ့သူဟာ အပြစ်ရဲ့ကျွန်ပဲ။”—ယောဟန် ၈:၃၃၊ ၃၄။

အပြစ်ရဲ့ကျွန်ဘဝ ရောက်နေမှန်း အသိအမှတ် မပြုတဲ့အတွက် ဂျူးတွေမှာ အန္တရာယ်ရှိနေပြီ။ “ကျွန်ဆိုတာ သခင့်အိမ်မှာ အမြဲနေရမှာ မဟုတ်ဘူး။ သားကပဲ အမြဲနေရတာ” လို့ ယေရှု ရှင်းပြတယ်။ (ယောဟန် ၈:၃၅) ကျွန်တစ်ယောက်ဟာ အမွေဆက်ခံပိုင်ခွင့် မရှိဘူး။ အိမ်ကနေ အချိန်မရွေး နှင်ထုတ်ခံရနိုင်တယ်။ သားအရင်း ဒါမှမဟုတ် မွေးစားသားကပဲ အိမ်မှာ “အမြဲနေရ” တယ်၊ အသက်ရှင်သရွေ့ နေရတယ်။

ဒါကြောင့် သားတော်နဲ့ပတ်သက်တဲ့ အမှန်တရားဟာ သေစေနိုင်တဲ့အပြစ်ကနေ လူတွေကို လွတ်မြောက်စေတဲ့ အမှန်တရားဖြစ်တယ်။ “သားတော်ကသာ လွှတ်ပေးရင် တကယ်လွတ်မြောက်ကြလိမ့်မယ်” လို့ ယေရှုပြောတယ်။—ယောဟန် ၈:၃၆။