ယေဟောဝါ၏သက်သေများ ဇွဲလုံ့လရှိရှိ—ချီတက်နေ

ယေဟောဝါ၏ပထမရာစုရှိ သက်သေများသည် ရဲရင့်ပြီး ဇွဲလုံ့လရှိရှိ လှုပ်ရှားခဲ့သူများဖြစ်ကြသည်။ “သင်တို့သွား၍ လူမျိုးတကာတို့ကို ငါ့တပည့်ဖြစ်စေ” ဟူသောယေရှုအမိန့်တော်ကို သူတို့အားရဝမ်းသာစွာ ဆောင်ရွက်ကြသည်။—မဿဲ ၂၈:၁၉၊ ၂၀။

သို့သော် ခရစ်တော်၏ရှေးတပည့်နောက်လိုက်များ ထိုအမိန့်တော်ကို အလေးအနက်ထားခဲ့ကြောင်း မည်သို့သိရှိနိုင်သနည်း။ တမန်တော်ဝတ္ထုကျမ်းစာစောင်က သူတို့သည် ယေဟောဝါ၏ ဇွဲလုံ့လရှိ သက်သေခံများဖြစ်ကြောင်း၊ အမှန်ပင်ချီတက်နေကြကြောင်း သက်သေထူသည်။

အကျိုးကျေးဇူးများနှင့် အခြားလက္ခဏာများ

တတိယခရစ်ဝင်ကျမ်းနှင့် တမန်တော်ဝတ္ထု၏ ရေးနည်းရေးဟန်၊ စကားအသုံးအနှုန်းက ကလောင်ရှင်တစ်ဦးတည်းဖြစ်ကြောင်း ထင်ရှားသည်။ “ချစ်သောဆေးသမား လုကာ” ပင်ဖြစ်သည်။ (ကောလောသဲ ၄:၁၄) ယင်း၏ထူးခြားသောလက္ခဏာများအနက် တစ်ခုကား တမန်တော်ဝတ္ထုတွင် မှတ်တမ်းတင်ထားသည့် အပြန်အလှန်စကားများနှင့် ဆုတောင်းချက်များဖြစ်သည်။ ဤစာစောင်၏ ၂၀ ရာခိုင်နှုန်းမျှသည် စစ်မှန်သောယုံကြည်ခြင်းကို ခုခံပြောဆိုရန် ပေတရုနှင့်ပေါလုတို့ပေးခဲ့သော ဟောပြောချက်များ ဖြစ်သည်။

တမန်တော်ဝတ္ထုကို စီအီး ၆၁ ခုနှစ်ခန့်က ရောမမြို့တွင် ရေးသားခဲ့သည်။ ယင်းကြောင့်လည်း ကဲသာရှေ့ ပေါလုခစားဝင်ခဲ့ခြင်း၊ သို့မဟုတ် စီအီး ၆၄ ခုနှစ်ခန့်တွင် ခရစ်ယာန်များကို နီရိုဘုရင်ညှဉ်းပန်းခြင်းအကြောင်းများ မပါခဲ့ခြင်းသာဖြစ်မည်။—၂ တိမောသေ ၄:၁၁။

လုကာခရစ်ဝင်ကျမ်းနည်းတူ တမန်တော်ဝတ္ထုကို သော်ဖိလုအား ရည်စူး၍ရေးထားသည်။ ယုံကြည်ခြင်း ပံ့ပိုးတိုးပွားပေးရန်၊ ခရစ်ယာန်ဘာသာတရား ပျံ့နှံ့လာခြင်းကို သတင်းပို့ရန် ဤကျမ်းစောင်ကိုရေးသားခဲ့ခြင်းဖြစ်သည်။ (လုကာ ၁:၁-၄။ တမန်တော် ၁:၁၊ ၂) ယေဟောဝါ၏လက်တော်သည် ကိုယ်တော်၏သစ္စာနှံကျေးကျွန်များနှင့်ရှိကြောင်း ဤကျမ်းစောင်က သက်သေထူသည်။ ကိုယ်တော်.ဝိညာဉ်တော်၏တန်ခိုးကို အသိအမှတ်ပြုစေပြီး ဘုရားမှုတ်သွင်းသော ပရောဖက်ပြုချက်များကို ပို၍အားထားမှီခိုစေသည်။ တမန်တော်ဝတ္ထုက ညှဉ်းပန်းနှိပ်စက်ခြင်းကို ခံရပ်နိုင်ရန်၊ ယေဟောဝါ၏ ကိုယ်ကျိုးစွန့် သက်သေများဖြစ်စေရန်၊ နိုင်ငံတော်မျှော်လင့်ခြင်းကို စိတ်ချယုံကြည်ရန် ကူညီပေးပါသည်။

သမိုင်းဆိုင်ရာ တိကျမှန်ကန်မှု

ပေါလု၏အပေါင်းအသင်းဖြစ်ခဲ့ရာ လုကာသည် မိမိတို့၏ခရီးစဉ်များအကြောင်း မှတ်တမ်းတင်ခဲ့သည်။ မျက်မြင်သက်သေများနှင့်လည်း သူစကားပြောဆိုခဲ့သည်။ ဤအချက်အလက်များနှင့် စေ့ငသောသုတေသနပြုမှုက သူ၏အရေးအသားများကို သမိုင်းအရတိကျမှန်ကန် ပြောင်မြောက်စေသည်။

ထိုကြောင့် ပညာရှိ ဝီလျမ်ရမ်စေ (William Ramsay) ဤသို့ဆိုနိုင်ခဲ့သည်။ “လုကာသည် ထိပ်တန်းရာဇဝင်ဆရာဖြစ်သည်။ သူ၏စကားများ တိကျမှန်ကန်ရုံမက သမိုင်းကို တကယ်သိရှိသူလည်းဖြစ်သည်။ ဤကလောင်ရှင်ကို နာမည်ကျော်သမိုင်းဆရာကြီးများအဝင်အဖြစ် သတ်မှတ်သင့်သည်။

သစ္စာရှိသက်သေ ပေတရု

သတင်းကောင်းသယ်ဆောင်ခြင်း ဘုရားပေးလုပ်ငန်းကို ယေဟောဝါ၏သန့်ရှင်းသောဝိညာဉ်တော်တန်ခိုးဖြင့်သာ ဆောင်ရွက်နိုင်ပေသည်။ သို့ဖြစ်၍ ယေရှု၏တပည့်နောက်လိုက်များ သန့်ရှင်းသောဝိညာဉ်တော် ခံစားရသောအခါ သူတို့သည် ယေရုရှလင်၊ ယုဒပြည် နှင့် ရှမာရိပြည်များအပြင် “မြေကြီးစွန်းတိုင်အောင်” ကိုယ်တော်၏သက်သေများဖြစ်လာကြမည်။ စီအီး ၃၃ ပင်တေကုတ္တေပွဲနေ့တွင် သူတို့အားလုံး သန့်ရှင်းသောဝိညာဉ်တော်တန်ခိုးခံစားခဲ့ရသည်။ နံနက် ၉ နာရီအချိန်သာရှိသေးသဖြင့် အချို့အထင်ရှိသကဲ့သို့ သူတို့မူးယစ်မနေပါ။ စိတ်လှုပ်ရှားတက်ကြွစေသည့် သက်သေခံချက်ကို ပေတရုပေးခဲ့သည်။ ထိုနောက် လူ ၃၀၀၀ နှစ်ခြင်းယူခဲ့သည်။ ဘာသာရေးသမားများသည် နိုင်ငံတော်သတင်းကြွေးကြော်သူများကို နှုတ်ပိတ်စေရန် ကြိုးစားခဲ့သော်လည်း ဆုတောင်းချက်ကိုနားညောင်းတော်မူကြောင်း ကိုယ်တော်၏ သက်သေခံများ နှုတ်ကပတ်တရားတော်ကို ရဲရင့်စွာပြောဟောနိုင်ကြရန် ဘုရားသခင့်ကူမမှုက ထင်ရှားစေသည်။ တစ်ဖန်ခြိမ်းခြောက်ခံရသော် သူတို့က “လူ၏စကားထက် ဘုရားသခင်၏စကားကို နားထောင်သင့်ပါ၏” ဟုဖြေဆိုကြသည်။ တစ်အိမ်မှ တစ်အိမ်သူတို့ဆက်ဟောပြောကြစဉ် လုပ်ငန်းတော်တိုးတက်ခဲ့သည်။​—၁:၁–၅:၄၂။

ယေဟောဝါ၏ဝိညာဉ်တော်ကို အားကိုးခြင်းက ကိုယ်တော်၏သက်သေများအား ညှဉ်းပန်းမှု ခံရပ်စေသည်။ သို့ဖြစ်၍ သစ္စာရှိသက်သေ သတေဖန်အား ခဲနှင့်ပေါက်သတ်ကြပြီးနောက် ယေရှု၏တပည့်နောက်လိုက်များသည် အရပ်ရပ်သို့ ပြန့်လွင့်ကုန်ကြသည်။ သို့သော် ယင်းကြောင့် နှုတ်ကပတ်တရားတော်သည် နေရာအနှံ့သို့ရောက်လေသည်။ ဧဝံဂေလိသတင်းဟောသူ ဖိလပ္ပုသည် ရှမာရိနယ်တွင် ရှေ့ဆောင်ခဲ့သည်။ အံ့သြဖွယ်ကား ကြမ်းတမ်းစွာညှဉ်းဆဲသူ တာရှုမြို့သားရှောလု ဘာသာဝင်ဖြစ်လာသည်။ တမန်တော်ပေါလုအဖြစ် ဒမာသက်မြို့တွင် ပြင်းထန်စွာညှဉ်းပန်းခံခဲ့ရရာ သူ့ကိုသတ်လိုသူ ဂျူးများရန်မှ လွတ်မြောက်စေခဲ့သည်။ ယေရုရှလင်မြို့ရှိ တမန်တော်များနှင့် ပေါလုတစ်ခဏပေါင်းသင်းခွင့်ရပြီးနောက် ဓမ္မအမှုဆောင်ရွက်ခြင်းငှာ ခရီးထွက်လေသည်။​—၆:၁–၉:၃၁။

တမန်တော်ဝတ္ထုတွင်ဆက်တင်ပြသည့်အတိုင်း ယေဟောဝါ၏လက်တော်သည် သက်သေခံများအပေါ်ရှိနေသည်။ ဒေါ်ကာ (တဗိသ) ကို ပေတရုရှင်ပြန်ထမြောက်စေသည်။ ကဲသရိမြို့မှလာသူတို့နောက် လိုက်သွားပြီး ကော်နေလိနှင့်သူ့အိမ်သူအိမ်သားရောင်းရင်းတို့အား သူသတင်းကောင်းဟောပြောခဲ့သည်။ ယေရှု၏တပည့်တော်များအဝင် ပထမတစ်ပါးအမျိုးသားများအဖြစ် သူတို့အားနှစ်ခြင်းပေးခဲ့သည်။ ဤနည်းဖြင့် “ခုနစ်သီတင်း” ကုန်ဆုံးရာ စီအီး ၃၆ တိုင်လေသည်။ (ဒံယေလ ၉:၂၄) ထိုနောက်များမကြာမီ ဟေရုဒ်အဂြိပ္ပသည် တမန်တော်ယာကုပ်ကို သတ်ပြီးနောက် ပေတရုကိုဖမ်းချုပ်ခဲ့သည်။ သို့သော် တမန်တော်သည် အကျဉ်းထောင်မှ ကောင်းကင်တမန်အကူအညီဖြင့် လွတ်မြောက်ခဲ့ပြီး ‘ယေဟောဝါ၏နှုတ်ကပတ်တော်သည် တိုးပွားများပြားလေ၏။’—၉:၃၂–၁၂:၂၅။

ပေါလု၏ သာသနာပြုခရီးစဉ် သုံးခု

ပေါလုနည်းတူ ဘုရားသခင့်အမှုတော်တွင် အားအင်အကုန်ခံသူများအပေါ် ကောင်းချီးများ အဆက်မပြတ် သွန်းလောင်းနေသည်။ သူ၏ပထမသာသနာပြုခရီးစဉ်သည် ရှုရိပြည်၊ အန္တအုတ်မြို့မှ စတင်ခဲ့သည်။ ကုပရုကျွန်းတွင် မြို့ဝန်မင်း သေရဂိ ပေါလု နှင့် အခြားသူတို့ ယုံကြည်သူများဖြစ်လာကြသည်။ ပံဖုလိပြည်၊ ပေရဂေမြို့သို့ရောက်သော် ယောဟန် မာကုသည် ယေရုရှလင်မြို့သို့ ပြန်လေ၏။ ပေါလုနှင့် ဗာနဗတို့မူကား ပိသိဒိပြည်၊ အန္တအုတ်မြို့သို့ ခရီးဆက်ကြသည်။ လုတ္တရမြို့တွင် ဂျူးများသည် ညှဉ်းပန်းနှိပ်စက်ကြရန် ဆွပေးခဲ့သည်။ ရိုက်နှက်ခံခဲ့ရ၍ သေပြီအထင်နှင့် ပစ်ထားခဲ့ကြသော်လည်း ဓမ္မအမှုကို ဆက်ဆောင်ရွက်ခဲ့သည်။ နောက်ဆုံး ရှုရိပြည်၊ အန္တအုတ်မြို့သို့ သူနှင့်ဗာနဗတို့ပြန်သွားကြရာ ပထမခရီးစဉ်ကို ရပ်နားခဲ့သည်။​—၁၃:၁–၁၄:၂၈။

ပထမရာစုရှိအဖွဲ့နည်းတူ ယနေ့လည်း အုပ်ချုပ်ရေးအဖွဲ့သည် သန့်ရှင်းသောဝိညာဉ်တော်ညွှန်ကြားမှုဖြင့် မေးခွန်းများကို ဖြေကြားပေးသည်။ “ရုပ်တုရှေ့မှာ ပူဇော်သော ယဇ်ကောင်ကိုလည်းကောင်း၊ အသွေးကိုလည်းကောင်း၊ လည်ပင်းကိုညှစ်၍ သတ်သောအရာကိုလည်းကောင်း၊ မတရားသောမေထုန်ကိုလည်းကောင်း ကြဉ်ရှောင်” ရသည့် “အခြားသောဝန်များ” တွင် အရေဖျားလှီးခြင်း မပါဝင်ပေ။ (၁၅:၂၈၊ ၂၉) ပေါလုနှင့် ဗာနဗတို့သည် ဒုတိယခရီးစဉ်ကို စတင်ရာတွင် တိမောသေ သူတို့နှင့် လိုက်ပါသွားသည်။ မာကေဒေါနိသို့ ကြွမြန်းရန် ဖိတ်ခေါ်ချက်ကို ချက်ချင်းလက်ခံကြသည်။ ဖိလိပ္ပိမြို့တွင် သက်သေခံကြရာ ဆူပူထကြွမှုဖြစ်ခဲ့သဖြင့် အချုပ်ခံခဲ့ရကြသည်။ သို့သော် ငလျင်လှုပ်ခြင်းကြောင့် ပေါလုနှင့် ဗာနဗတို့ လွတ်မြောက်သွားသဖြင့် ထောင်မှူးနှင့် သူ၏အိမ်သူအိမ်သားတို့အား ဟောပြောလေသည်။ ဤသူတို့လည်း ယုံကြည်သူများဖြစ်လာကြသည်။​—၁၅:၁–၁၆:၄၀။

ယေဟောဝါ၏ကျေးကျွန်များသည် ကိုယ်တော်၏နှုတ်ကပတ်တော်ကို ဝီရိယစိုက်ထုတ် လေ့လာသူများဖြစ်သင့်သည်။ ကျမ်းစာကို ဆည်းပူးသုံးသပ်ခဲ့သူ ဗေရိမြို့သားများ နှင့် ပေါလုထိုသို့ပြုခဲ့သည်။ အာသင်မြို့ရှိ အာရေတောင်ပေါ်တွင် ယေဟောဝါသည် ဖန်ဆင်းရှင်ဖြစ်ကြောင်း သက်သေထူခဲ့ရာ အချို့ယုံကြည်သူများဖြစ်လာကြသည်။ ကောရိန္သုမြို့တွင် စိတ်ဝင်စားသူများသောကြောင့် ၁၈ လတိုင် ထိုတွင်နေထိုင်ခဲ့သည်။ ထိုမြို့တွင်နေထိုင်စဉ် သက်သာလောနိတ် ပထမ နှင့် ဒုတိယ စာစောင်များကို သူရေးသားခဲ့သည်။ သိလ၊ တိမောသေတို့နှင့် ခွဲခွါပြီးနောက် တမန်တော်သည် ဧဖက်မြို့သို့ သင်္ဘောဖြင့်သွားပြီး ကဲသရိမြို့သို့သွားရန် သင်္ဘောပြန်စီး၍ ယေရုရှလင်မြို့သို့ ခရီးဆက်လေသည်။ ရှုရိပြည်၊ အန္တအုတ်မြို့သို့ သူပြန်ရောက်လာသောအခါ သူ၏ဒုတိယသာသနာပြုခရီးစဉ် ဆုံးလေသည်။​—၁၇:၁–၁၈:၂၂။

ပေါလုတင်ပြခဲ့သည်နည်းတူ တစ်အိမ်မှတစ်အိမ် သက်သေခံခြင်းလုပ်ငန်းသည် ခရစ်ယာန်ဓမ္မအမှုတွင် အရေးပါသောလုပ်ငန်းရပ်ဖြစ်သည်။ တမန်တော်၏ တတိယခရီးစဉ် (စီအီး ၅၂-၅၆) သည် ဒုတိယခရီးစဉ်ကို အများအားဖြင့် ခေါက်ပြန်သွားခြင်းဖြစ်သည်။ ပေါလု၏ဓမ္မအမှုကြောင့် ဧဖက်မြို့တွင် အတိုက်အခံဖြစ်ပွားခဲ့သည်။ ထိုတွင်လည်း ကောရိန္သု ပထမစောင်ကို သူရေးသားခဲ့သည်။ ကောရိန္သုဒုတိယစောင်ကို မာကေဒေါနိပြည်တွင်ရေးခဲ့သည်။ ရောမကျမ်းကိုကား ကောရိန္သုမြို့တွင်ရှိစဉ် ရေးသားခဲ့သည်။ မိလက်မြို့တွင် ဧဖက်မြို့မှ အကြီးအကဲများနှင့် ပေါလုတွေ့ဆုံခဲ့၍ သူတို့ကို လူအများရှေ့လည်းကောင်း၊ တစ်အိမ်မှတစ်အိမ်သော်လည်းကောင်း သွန်သင်ပေးခဲ့ကြောင်း ပြောဆိုသည်။ ယေရုရှလင်မြို့သို့ရောက်သော် သူ၏တတိယခရီးစဉ် ဆုံးလေသည်။​—၁၈:၂၃–၂၁:၁၄။

ညှဉ်းပန်းခြင်းသည် အကျိုးမပြု

ညှဉ်းပန်းမှုသည် ယေဟောဝါ၏သစ္စာနှံသက်သေများ၏နှုတ်ကို မပိတ်နိုင်။ ထိုကြောင့် ယေရုရှလင်မြို့တွင် ဗိမာန်တော်၌ ပေါလုကို လူအုပ်ကရမ်းကားလာသော် သွေးပူနေသည့် အဓိကရုဏ်းပြုသူများကို ရဲရင့်စွာ သက်သေခံခဲ့သည်။ စစ်သူရဲအစောင့်များနှင့် ကဲသရိမြို့နေ ဖေလဇ်မင်းထံ ပို့ချိန်တွင် သူ့ကိုသတ်ပစ်ရန်အကြံ ပျက်ခဲ့သည်။ လာဘ်ရမည်မျှော်လင့်ချက်နှင့် ဖေလဇ်သည် ပေါလုကို နှစ်နှစ်တိုင် ချည်နှောင်ထားသည်။ သူ၏နေရာကိုဆက်ခံသူ ဖေတ္တုမင်းသည် ကဲသာထံ ပေါလုအယူခံဝင်ချက်ကို ကြားနာလိုက်သည်။ သို့ရာတွင် ရောမသို့မသွားမီ အဂြိပ္ပမင်းကြီးရှေ့ ပေါလုတက်ကြွစွာ ထုချေရှင်းလင်းခွင့် ရရှိခဲ့သည်။​—၂၁:၁၅–၂၆:၃၂။

စမ်းသပ်မှုအမျိုးမျိုးကြား ယေဟောဝါကျေးကျွန်များ ဆက်ဟောပြောကြသည်။ ထိုသို့ ပေါလုပြုသည်ကား အမှန်။ ကဲသာရှေ့ အယူခံဝင်ထားခြင်းကြောင့် လုကာနှင့်အတူ စီအီး ၅၈ ခုနှစ်တွင် တမန်တော်သည် ရောမမြို့သို့ ခရီးထွက်ခဲ့သည်။ လုကိပြည်၊ မုရမြို့တွင် အခြားသင်္ဘောတစ်စီးသို့ ရွှေ့ပြောင်းခဲ့သည်။ သင်္ဘောပျက်၍ မေလိတေကျွန်းတွင် ကုန်းပေါ်တင်ခဲ့ရာ အခြားသင်္ဘောတစ်စီးနှင့် အီတလီသို့ရောက်လေသည်။ ရောမမြို့၌ စစ်သူရဲအစောင့်များနှင့် နေထိုင်ရသော်လည်း လူတို့ကို ပေါလုဖိတ်ခေါ်ပြီး သတင်းကောင်းဟောပြောခဲ့သည်။ ဤသို့အချုပ်ခံနေရချိန်တွင် ဧဖက်၊ ဖိလိပ္ပိ၊ ကောလောသဲ၊ ဖိလေမုန် နှင့် ဟေဗြဲ အသင်းတော်များထံ သူစာရေးခဲ့သည်။​—၂၇:၁–၂၈:၃၁။

အစဉ်ချီတက်နေ

ဘုရားသခင်၏သားတော် စတင်ခဲ့သည့်လုပ်ငန်းကို ပထမရာစုရှိ ယေဟောဝါ၏သက်သေများ သစ္စာရှိရှိဆောင်ရွက်ခဲ့ကြောင်း တမန်တော်ဝတ္ထုက ဖေါ်ပြပါသည်။ သူတို့ ဘုရားသခင့်သန့်ရှင်းသောဝိညာဉ်တော်တန်ခိုးဖြင့် ဇွဲရှိရှိ သက်သေခံခဲ့သည်။

ယေရှု၏ရှေးတပည့်တော်များသည် ဘုရားသခင်ထံဆုတောင်းပြီး အားကိုးအားထားခဲ့သောကြောင့် ကိုယ်တော်၏လက်တော်သည် သူတို့အပေါ်ရှိသည်။ သို့ဖြင့် ထောင်ပေါင်းများစွာတို့သည် ယုံကြည်သူများဖြစ်လာပြီး “ကောင်းကင်အောက်၌ ရှိသမျှသော ဝေနေယျသတ္တဝါတို့အား [သတင်းကောင်း] ဟောပြော” ခဲ့သည်။ (ကောလောသဲ ၁:၂၃) ထိုအချိန်နှင့် ယခုပင်လျှင် ခရစ်ယာန်စစ်များသည် ချီတက်လျက်နေသော ယေဟောဝါ၏ ဇွဲလုံ့လရှိ သက်သေများဖြစ်ကြောင်း ထင်ရှားသည်။

[စာမျက်နှာ ၁၆ ပါ လေးထောင့်ကွက်/ရုပ်ပုံ]

လူတစ်ရာအုပ် ကော်နေလိ။ ကော်နေလိသည် တပ်မှူး သို့မဟုတ် စစ်သူရဲ တစ်ရာအုပ်ဖြစ်သည်။ (၁၀:၁)လူတစ်ရာကို အုပ်ချုပ်ရသော တပ်မှူး၏ တစ်နှစ်စာအခသည် စစ်သူရဲတစ်ဦးထက် ငါးဆခန့်ရှိ၏။ ဒေနာရိ ၁၂၀၀ ခန့် သို့မဟုတ် ထိုထက်မကပင်ဖြစ်နိုင်သည်။ အငြိမ်းစားချိန်တွင် ငွေ သို့မဟုတ် မြေကွက်ကို ဆုကြေးအဖြစ်ရသည်။ သူ၏သံချပ်တန်ဆာသည် အလွန်ထည်ဝါလှသည်။ ငွေခမောက်မှ ဒူးရံသည့် ခါးစီးအဝတ်၊ အဖိုးထိုက်သော သိုးမွှေးဝတ်လုံနှင့် စီခြယ်ထားသော ခြေထောက်ပတ် သံချပ်တို့ပါဝင်သည်။ သူ၏တပ်တွင် သီအိုရီအရ လူတစ်ရာရှိသည်ဆိုသော်လည်း တစ်ခါတစ်ရံ ၈၀ ဝန်းကျင်သာရှိသည်။ “အီတလီတပ်” အတွက် စစ်သားသစ်များသည် ရောမပြည်သားများနှင့် အီတလီပြည်ရှိ လူလွတ်များထဲမှ ရွေးခန့်ခြင်းဖြစ်သည်။

[စာမျက်နှာ ၁၆ ပါ လေးထောင့်ကွက်/ရုပ်ပုံ]

အိမ်ခေါင်မိုးပေါ် ဆုတောင်းခြင်း။ အိမ်ခေါင်မိုးပေါ် တစ်ယောက်တည်း ဆုတောင်းနေသည့်အတွက် ပေတရုသည်ကြွားနေခြင်းမဟုတ်။ (၁၀:၉) အိမ်မိုးပြားပတ်လည်ဘောင်က လူမြင်ကွင်းမှ သူ့အားကာရံထားပေမည်။ (တရားဟောရာ ၂၂:၈) အိမ်မိုးသည် အပန်းဖြေရာ၊ ညနေချိန်၌ လမ်းမှအသံဗလံများကို ရှောင်ရာနေရာဖြစ်သည်။

[စာမျက်နှာ ၁၆ ပါ လေးထောင့်ကွက်]

လူ့သဏ္ဍာန်ရှိ ဘုရားအမည်ခံများ။ ခြေဆွံ့သူကို ပေါလုကုသပေးခဲ့ရာ လုတ္တရမြို့သားတို့က လူအဖြစ် ဘုရားများဆင်းလာပြီ အထင်ရှိကြသည်။ (၁၄:၈-၁၈) အဓိကဂရိဘုရား ဇုသအတွက် ထိုမြို့တွင် ဗိမာန်တော်ရှိ၏။ ဘုရားတို့၏ စေတမန်၊ သူ၏သား ဟေရမေမူကား အပြောကောင်းသူအဖြစ် နာမည်ကျော်သည်။ ပေါလုသည် ဦးစီးဦးဆောင်ဟောပြောသဖြင့် သူ့အား ဟေရမေဟုထင်မှတ်ကြရာ ဗာနဗအား ဇုသဟူ၍ သူတို့ယူမှတ်ကြသည်။ ရုပ်တုဘုရားများကို ပန်းကုံး သို့မဟုတ် ထင်းရှူးရွက်များ စွပ်ပေးလေ့ရှိသည်။ သို့သော် ပေါလုနှင့် ဗာနဗတို့သည် ဤကဲ့သို့သော ရုပ်တုကိုးကွယ်ခြင်းနှင့်ဆိုင်သော အပြုအမူများကို လက်မခံကြပါ။

[စာမျက်နှာ ၁၆ ပါ လေးထောင့်ကွက်/ရုပ်ပုံ]

ထောင်မှူး ယုံကြည်လာ။ မြေငလျင်ကြောင့် ထောင်တံခါးများပွင့်ပြီး အကျဉ်းသားများနှောင်ဖွဲ့ခြင်းမှ လွတ်ကြသော် ဖိလိပ္ပိထောင်မှူးသည် သူ့ကိုယ်သူ သတ်မည်ပြုသည်။ (၁၆:၂၅-၂၇) အဘယ်ကြောင့်နည်း။ ရောမဥပဒေအရ အကျဉ်းသားတစ်ဦး ထွက်ပြေးလျှင် သူ့အပြစ်ဒဏ်ကို ထောင်မှူးခံရမည်ဖြစ်သည်။ အကျဉ်းသားအချို့ခံရစရာရှိသည့် သေသည်တိုင် ညှဉ်းဆဲခံရခြင်းအစား ကိုယ့်ကိုယ်ကို သတ်သေရန် ထောင်မှူးအလိုရှိပုံရှိသည်။ သို့ရာတွင် သတင်းကောင်းကို သူလက်ခံကာ “မိမိလူအပေါင်းတို့နှင့်တကွ ဗတ္တိဇံကို ချက်ချင်းခံလေ၏။”​—၁၆:၂၈-၃၄။

[စာမျက်နှာ ၁၇ ပါ လေးထောင့်ကွက်/ရုပ်ပုံ]

ကဲသာထံ အယူခံဝင်ခြင်း။ မွေးကတည်းက ရောမပြည်သားအနေနှင့် ပေါလုသည် ကဲသာရှေ့အယူခံဝင်၍ ရောမမြို့တွင် တရားစီရင်ခံခွင့်ရှိသည်။ (၂၅:၁၀-၁၂) အမှုမစစ်ဘဲ ရောမပြည်သားတစ်ဦးကို ချည်နှောင်၊ ရိုက်နှက်၊ ဒဏ်စီရင်ခွင့်မရှိပါ။—၁၆:၃၅-၄၀; ၂၂:၂၂-၂၉; ၂၆:၃၂။

[Credit Line]

Musei Capitolini, Roma

[စာမျက်နှာ ၁၇ ပါ လေးထောင့်ကွက်/ရုပ်ပုံ]

အာတေမိနတ်သမီး၏ ဗိမာန်စောင့်။ ပေါလု၏ဟောပြောခြင်းလုပ်ငန်းကို မလိုသူ ပန်းတိမ်သမား ဒေမေတရိသည် အဓိကရုဏ်းဖြစ်ရန် ဆွပေးခဲ့သည်။ သို့သော် မြို့စာရေးသည် လူများကို တိတ်စေ၍ အစုအဝေးကို ခွဲခဲ့သည်။ (၁၉:၂၃-၄၁) ငွေပန်းတိမ်သမားများသည် သားမြတ်များစွာရှိသော သန္ဓေအောင်ဘုရားမ အာတေမိရုပ်တုတည်ရာ ဗိမာန်၏ ငွေဗိမာန်ငယ်များ ပြုလုပ်တတ်ကြသည်။ ထိုဘုရားမ၏ ne·o·ko’ros သို့မဟုတ် ‘ဗိမာန်တော်စောင့်’ ဖြစ်ခွင့်ကို မြို့များက အလုအယက်ပြိုင်ကြသည်။

[စာမျက်နှာ ၁၇ ပါ လေးထောင့်ကွက်/ရုပ်ပုံ]

ပင်လယ်၌ ဘေးကြုံခဲ့။ ဥရုကလုဒန်အမည်ရှိသော လေပြင်းမုန်တိုင်းသည် ပေါလုပါသောသင်္ဘောကို တိုက်သောအခါ “သမ္ဗန်ကို မပျက်စေရန် ပင်ပန်းစွာကြိုးစား” ကြ၏။ (၂၇:၁၅၊ ၁၆) သမ္ဗန်သည် သင်္ဘောနောက် ပါတတ်သည့် လှေငယ်ဖြစ်သည်။ မုန်တိုင်းကျချိန်တွင် ရွက်တိုင်လှုပ်ရှားလွန်းသည့်အတွက် သင်္ဘောကို ခိုင်ခံ့စေရန် သင်္ဘောဝမ်းကို ပတ်စည်းစရာ ကျောက်ကြိုးများပါသည်။ (၂၇:၁၇) ဤသင်္ဘောသားများသည် ကျောက်ဆူးလေးလက်ကိုချပြီး သင်္ဘောကိုထိန်းသော တက်မကြိုးများကို ဖြည်လိုက်သည်။ (၂၇:၂၉၊ ၄၀) အာလေဇန်ဒိသင်္ဘောတွင် သင်္ဘောသားများ၏ နာယကဟုယူမှတ်ကြသည့် “ဇုသ၏သား” နတ်ညီနောင်၊ ကဲစ်တာနှင့် ပေါ်လပ်ခ်တို့၏ ရုပ်တုပါသည်။​—၂၈:၁၁။