သမ္မာကျမ်းစာသည် အမှန်ဖြစ်သည်နှင့်အညီ ယင်းကိုခံယူလေ

“ငါတို့ဟောပြောသော ဘုရားသခင်၏နှုတ်ကပါဌ်တရားကို သင်တို့သည်ကြားနာ၍ ခံယူကြသောအခါ လူ၏နှုတ်ထွက်စကားကဲ့သို့မခံမယူဘဲ ဘုရားသခင်၏နှုတ်ကပါဌ်တော်အမှန်ဖြစ်သည်နှင့်အညီ ယုံကြည်ခြင်းသို့ရောက်သောသင်တို့အထဲ၌ ပြုပြင်သောဘုရားသခင်၏နှုတ်ကပါဌ်တရားတော်ကဲ့သို့ ခံယူကြသည်အကြောင်းအရာကိုထောက်၍ ငါတို့သည်လည်း ဘုရားသခင်၏ကျေးဇူးတော်ကို အစဉ်မပြတ်ချီးမွမ်းကြ၏။”—၁ သက်သာလောနိတ် ၂:၁၃၊ သမ္မာ။

၁ သမ္မာကျမ်းစာတွင်ပါသည့် အဘယ်အကြောင်းက ယင်းစာအုပ်ကို အမှန်တကယ်ပင်ထူးခြားစေသနည်း။

သမ္မာကျမ်းစာသည် ကမ္ဘာပေါ်တွင် ဘာသာပြန်ဆိုမှုနှင့် ထုတ်ဝေမှုအများဆုံးစာအုပ်ဖြစ်သည်။ ယင်းသည် ဂန္တဝင်မြောက်သောစာပေများအဝင်ဖြစ်သည်ဟု လူတို့အသိအမှတ်ပြုကြသည်။ သို့သော် ထိုထက်အရေးကြီးသည်ကား လူမျိုးတိုင်း၊ နိုင်ငံတိုင်းမှ လူများ၏လုပ်ငန်း၊ သို့မဟုတ် အဆင့်အတန်း မည်သို့ပင်ရှိစေကာမူ သူတို့အရေးတကြီးလိုအပ်နေသည့် လမ်းပြမှုကို သမ္မာကျမ်းစာကပေးခြင်းပင်။ (ဗျာဒိတ် ၁၄:၆၊ ၇) စိတ်ရောနှလုံးပါ ကျေနပ်သည့်အထိ ဤကဲ့သို့သောမေးခွန်းများကို သမ္မာကျမ်းစာဖြေဆိုပေးပါသည်– လူ့ဘဝ၏ ရည်ရွယ်ချက်ကား အဘယ်နည်း။ (ကမ္ဘာဦး ၁:၂၈; ဗျာဒိတ် ၄:၁၁) လူ့အုပ်ချုပ်ရေးများသည် တည်တံ့ခိုင်မြဲသော ငြိမ်းချမ်းရေးနှင့် လုံခြုံမှုကို အဘယ်ကြောင့်မရှိစေနိုင်သနည်း။ (ယေရမိ ၁၀:၂၃; ဗျာဒိတ် ၁၃:၁၊ ၂) လူသည် အဘယ်ကြောင့်သေရသနည်း။ (ကမ္ဘာဦး ၂:၁၅-၁၇; ၃:၁-၆; ရောမ ၅:၁၂) ဤဒုက္ခမြားမြောင်သောလောကတွင် ဘဝပြဿနာများကို မည်သို့အောင်မြင်စွာ ဖြေရှင်းနိုင်မည်နည်း။ (ဆာလံ ၁၁၉:၁၀၅; သု. ၃:၅၊ ၆) ကျွန်ုပ်တို့အတွက် အနာဂတ်မည်သို့ရှိမည်နည်း။—ဒံယေလ ၂:၄၄; ဗျာဒိတ် ၂၁:၃-၅။

၂။ ကျွန်ုပ်တို့၏မေးခွန်းများအတွက် လုံးလုံးလျားလျားစိတ်ချရသောအဖြေများကို သမ္မာကျမ်းစာက အဘယ်ကြောင့်ပေးသနည်း။

^၂ ဤမေးခွန်းများကို သမ္မာကျမ်းစာသည် အဘယ်ကြောင့်ပိုင်နိုင်စွာ ဖြေဆိုသနည်း။ ဘုရားသခင်၏နှုတ်ကပါဌ်တော် ဖြစ်သောကြောင့်တည်း။ ကိုယ်တော်သည် ယင်းကိုရေးသားရန် လူသားကိုအသုံးပြုခဲ့သော်လည်း ၂ တိမောသေ ၃:၁၆ ဆိုသည့်အတိုင်းပင် “ထိုကျမ်းစာရှိသမျှသည် ဘုရားသခင်မှုတ်သွင်းတော်မူသောအားဖြင့်ဖြစ်” သည်။ ယင်းသည် လူ့အဖြစ်အပျက်များကို လူကိုယ်တိုင်က အနက်ဖွင့်ဆိုဖော်ပြထားခြင်းဖြင့် ဖြစ်ပေါ်လာခြင်းမဟုတ်ပါ။ “အနာဂတ္တိစကား [ဖြစ်လတ္တံ့သောအရာများဆိုင်ရာ ကြေညာချက်များ၊ ဘုရားသခင့် အမိန့်တော်များ၊ သမ္မာကျမ်းစာ၏ စာရိတ္တစံနှုန်းတို့] သည် လူအလိုအားဖြင့် ဖြစ်ဖူးသည်မဟုတ်။ ဘုရားသခင်၏သန့်ရှင်းသူတို့သည် သန့်ရှင်းသောဝိညာဉ်တော်၏တိုက်တွန်းတော်မူခြင်းကိုခံရ၍ ဟောပြောကြ၏။”—၂ ပေတရု ၁:၂၁။

၃။ (က) နိုင်ငံအသီးသီးတွင် သမ္မာကျမ်းစာကို လူတို့မည်သို့တန်ဖိုးထားကြကြောင်း ဥပမာများပေးပါ။ (ခ) ကျမ်းစာကိုဖတ်ဖို့ လူအချို့သည် အဘယ်ကြောင့်အသက်စွန့်ရန် အသင့်ရှိခဲ့ကြသနည်း။

^၃ သမ္မာကျမ်းစာ၏တန်ဖိုးကို လေးမြတ်ခြင်းကြောင့် အကျဉ်းကျခြင်းမက သေခြင်းကိုပင် ခံလျှင်ခံရပါစေဟူ၍ အရဲစွန့်ကာ ယင်းကို လက်ဝယ်ရယူပြီးဖတ်ရှုကြသူမနည်းပါ။ လွန်ခဲ့သောနှစ်အနည်းငယ်က ကက်သလစ်စပိန်တွင်လူတို့သည် မိမိတို့ဘာသာစကားဖြင့် ကျမ်းစာကို ဖတ်ရှုကြမည်ဆိုလျှင် ဓမ္မဆရာများ၏သြဇာ ယုတ်လျော့သွားမည်ဟု ယူမှတ်ခဲ့သောအချိန်; ဘာသာရေးသြဇာလွှမ်းမိုးမှု ရှိရှိသမျှပျောက်ကင်းစေရန် ကြိုးစားခဲ့သောဖန်ဆင်းရှင်ဘုရားမရှိဝါဒကိုခံယူသည့်အုပ်ချုပ်နည်းစနစ်အရ တင်းကျပ်စွာအရေးယူခဲ့သော အဲလ်ဘေးနီးယားနိုင်ငံတို့တွင် ထိုသို့ပင်ဖြစ်ပျက်ခဲ့သည်။ သို့သော်လည်း ဘုရားသခင်ကိုကြောက်ရွံ့သူများက ကျမ်းစာကိုတန်ဖိုးထားကာ ယင်းကိုဖတ်ရှုကြပြီး တစ်ဦးကိုတစ်ဦး လက်ဆင့်ကမ်းခဲ့ကြသည်။ ဒုတိယကမ္ဘာစစ်အတွင်း ဇတ်ဆင်ဟောဆင်ချွေးတပ်စခန်းတွင် (ပိတ်ပင်တားမြစ်ချက်ရှိလျက်ပင်) သမ္မာကျမ်းစာတစ်အုပ်ကို သတိထားပြီး အကျဉ်းထောင်တိုက် တစ်တိုက်မှတစ်တိုက် လက်ဆင့်ကမ်းခဲ့သည်။ ယင်းကိုဖတ်လိုက်ရသူများက အခြားသူတို့အား တစ်ဖန်ပြန်ပြောပြနိုင်ရန် အပိုဒ်လိုက် အလွတ်ကျက်မှတ်ထားကြသည်။ ၁၉၅၀ ပြည့်လွန်နှစ်များအတွင်း ယခင်ကွန်မြူနစ်အရှေ့ဂျာမနီနိုင်ငံတွင် မိမိတို့၏ယုံကြည်ချက်ကြောင့် ထောင်ကျသော ယေဟောဝါသက်သေများသည် သူတို့အားကြာမြင့်စွာ တိုက်ပိတ်ခြင်းဒဏ်ကိုပင်မကြောက် ညအချိန်တွင်ဖတ်ရှုကြရန်အတွက် သမ္မာကျမ်းစာ အစိတ်အပိုင်းငယ်ကလေးများကို အကျဉ်းသားတစ်ဦးကိုတစ်ဦး အရဲစွန့်ပြီး လက်ဆင့်ကမ်းပေးခဲ့ကြသည်။ အဘယ်ကြောင့် ထိုသို့လုပ်ကိုင်ကြသနည်း။ သမ္မာကျမ်းစာသည် ဘုရားသခင်၏နှုတ်ကပါဌ်တော်ဖြစ်ကြောင်းကို သူတို့အသိအမှတ်ပြုကာ “လူသည် မုန့်အားဖြင့်သာ အသက်ကိုမွေးရသည်မဟုတ်။ ဘုရားသခင်မိန့်တော်မူသမျှအားဖြင့် အသက်မွေးရ” ကြောင်းကို သူတို့သိနားလည်ထားသောကြောင့်ဖြစ်သည်။ (တရားဟောရာ ၈:၃) ထိုသက်သေခံများသည် မယုံနိုင်လောက်အောင် ရက်စက်ကြမ်းတမ်းမှုများကို ခံရကြငြားလည်း သမ္မာကျမ်းစာတွင် မှတ်တမ်းတင်ထားသော ဤစကားများက သူတို့အား ဝိညာဉ်ရေးအရ အသက်ရှင်သန်စေခဲ့သည်။

၄။ ကျွန်ုပ်တို့၏အသက်တာတွင် ကျမ်းစာကို အဘယ်နေရာတွင်ထားသင့်သနည်း။

^၄ သမ္မာကျမ်းစာသည် ရံဖန်ရံခါကိုးကားကြည့်ရန်အတွက် စင်ပေါ်တင်ထားရုံတင်ထားရမည့် စာအုပ်တစ်အုပ်မဟုတ်ပါ။ ယုံကြည်သူချင်းတို့နှင့်ဝတ်ပြုစည်းဝေးချိန်တွင်သာအသုံးပြုရန်အတွက်လည်း မဟုတ်ပါ။ ကျွန်ုပ်တို့ရင်ဆိုင်နေရသည့်အခြေအနေများကို သဘောပေါက်နားလည်စေရန်နှင့် လိုက်လျှောက်သင့်သောလမ်းစဉ်ကိုညွှန်ပြစေရန် ယင်းကိုနေ့စဉ်အသုံးပြုသင့်သည်။—ဆာလံ ၂၅:၄၊ ၅။

ဖတ်ပြီး နားလည်ရန်အတွက် ရည်ရွယ်ထား

၅။ (က) ဖြစ်နိုင်မည်ဆိုလျှင် ကျွန်ုပ်တို့အားလုံး ဘာကိုပိုင်ဆိုင်သင့်သနည်း။ (ခ) ရှေးဣသရေလနိုင်ငံတွင် ကျမ်းစာ၌ အဘယ်အရာပါဝင်ကြောင်းကို လူတို့မည်သို့သိရှိခဲ့ကြသနည်း။ (ဂ) ဆာလံ ၁၉:၇-၁၁ ကသင်၏ကျမ်းစာဖတ်ရှုခြင်း သဘောထားကိုအဘယ်သို့ရှိစေသနည်း။

^၅ ယနေ့ သမ္မာကျမ်းစာစောင်များကို နိုင်ငံအများတွင် အလွယ်တကူရရှိနိုင်သည်။ ကင်းမျှော်စင်ကိုဖတ်ရှုသူတိုင်းအား ကျမ်းစာတစ်အုပ်လက်ဝယ်ရှိထားရန် ကျွန်ုပ်တို့အားပေးပါသည်။ သမ္မာကျမ်းစာကို ရေးသားချိန်က ပုံနှိပ်စက်များမရှိခဲ့ပါ။ လူအများစုတွင် ကိုယ်ပိုင်ကျမ်းစာအုပ်များမရှိကြချေ။ သို့သော် ရေးသားထားသမျှကို ယေဟောဝါ၏ကျေးကျွန်များ ကြားနာရရန် ကိုယ်တော်စီစဉ်ပေးတော်မူခဲ့သည်။ သို့ဖြစ်၍ ယေဟောဝါညွှန်ကြားသမျှကို မောရှေရေးမှတ်ပြီးနောက် သူသည် “ပဋိညာဉ်စာကိုလည်းယူ၍ ပရိသတ်များရှေ့မှာ ဖတ်” လေသည်ဟု ထွက်မြောက်ရာ ၂၄:၇ ကဖော်ပြသည်။ သိနာတောင်အရပ်တွင် သဘာဝလွန်ဖြစ်ရပ်များကို တွေ့မြင်ကြပြီးနောက် သူတို့အား မောရှေဖတ်ပြသောစကားများသည် ဘုရားသခင့်ထံတော်မှဖြစ်ပြီး ယင်းတို့ကို သိရှိကြရန်လိုအပ်ကြောင်း သူတို့အသိအမှတ်ပြုကြသည်။ (ထွက်မြောက်ရာ ၁၉:၉၊ ၁၆-၁၉; ၂၀:၂၂) ကျွန်ုပ်တို့လည်း ဘုရားသခင်၏နှုတ်ကပါဌ်တော်တွင် မှတ်တမ်းတင်ထားသောအရာများကို သိရှိကြရန်လိုအပ်သည်။—ဆာလံ ၁၉:၇-၁၁။

၆။ (က) ကတိထားရာပြည်ထဲ ဣသရေလလူမျိုးမဝင်မီ မောရှေဘာလုပ်ခဲ့သနည်း။ (ခ) မောရှေ၏ပုံသက်သေကို ကျွန်ုပ်တို့မည်သို့တုပနိုင်သနည်း။

^၆ ဣသရေလလူမျိုးသည် တောတွင်လှည့်လည်နေထိုင်သည့်ဘဝကို စွန့်လွှတ်ကာ ကတိထားရာပြည်ကိုဝင်ရန် ယော်ဒန်မြစ်ကိုဖြတ်ကူးဖို့ အသင့်ပြင်ဆင်နေစဉ် သူတို့သည် ယေဟောဝါ၏ပညတ်တော်နှင့် ကိုယ်တော်၏စီရင်ချက်များကို ပြန်သုံးသပ်ဆင်ခြင်ရန် လျောက်ပတ်ပေသည်။ ဘုရားသခင်၏ဝိညာဉ်တော်တိုက်တွန်းမှုဖြင့် မောရှေသည် ပညတ္တိကျမ်းကို သူတို့နှင့်ဆွေးနွေးနှီးနှောခဲ့သည်။ ပညတ္တိကျမ်း၏ အသေးစိတ်အချက်အလက်များကို သူတို့အားသတိပေးပြီး ယေဟောဝါနှင့်ဆက်ဆံရာတွင် သူတို့ကိုလွှမ်းမိုးရမည့် အခြေခံမူများနှင့် သဘောထားများကိုလည်း ပေါ်လွင်စေခဲ့သည်။ (တရားဟောရာ ၄:၉၊ ၃၅; ၇:၇၊ ၈; ၈:၁၀-၁၄; ၁၀:၁၂၊ ၁၃) ယနေ့ကျွန်ုပ်တို့လည်း တာဝန်အသစ်များကိုလက်ခံယူသည့်အခါ၊ သို့မဟုတ် ဘဝတွင် အခြေအနေအသစ်များကိုရင်ဆိုင်ရသည့်အခါ ကျွန်ုပ်တို့ပြုလုပ်မည့်အမှုကို ကျမ်းစာသြဝါဒက မည်သို့သြဇာလွှမ်းမိုးသင့်ကြောင်း ဆင်ခြင်သုံးသပ်သင့်သည်။

၇။ ယော်ဒန်မြစ်ကို ဣသရေလလူမျိုးဖြတ်ကူးပြီးနောက် မကြာမီအချိန်တွင် သူတို့၏စိတ်နှလုံးထဲ ယေဟောဝါ၏ပညတ္တိကျမ်းကို စွဲမှတ်ထားစေရန် ဘာလုပ်ခဲ့ကြသနည်း။

^၇ ဣသရေလလူမျိုးသည် ယော်ဒန်မြစ်ကိုဖြတ်ကူးပြီးနောက် မကြာမီအချိန်တွင် မောရှေမှတစ်ဆင့် သူတို့အား ယေဟောဝါမိန့်မှာသောစကားများကို ပြန်ဆင်ခြင်သုံးသပ်ရန် တစ်ဖန်စုဝေးကြပြန်သည်။ ထိုလူမျိုးသည် ယေရုရှလင်မြို့၏ မြောက်ဘက်မိုင် ၃၀ ခန့်အကွာတွင်စုဝေးကြသည်။ ဧဗလတောင်ပေါ်မှာလူတစ်ဝက်၊ ဂေရဇိမ်တောင်ပေါ်မှာတစ်ဝက်ရပ်၍ နေကြသည်။ ယောရှုသည် “ပညတ္တိကျမ်း၌ရေးထားသမျှသော ကောင်းချီးမင်္ဂလာစကားနှင့် ကျိန်ခြင်းအမင်္ဂလာစကားတည်းဟူသော တရားစကားအလုံးစုံတို့ကို ဖတ်ရွတ်လေ၏။” ဤနည်းဖြင့် ယောက်ျား၊ မိန်းမ၊ သူငယ်များ၊ တည်းခိုသော တစ်ပါးအမျိုးသားများတို့သည် ယေဟောဝါ၏အမျက်ကိုခံရမည့်အကျင့်များနှင့် ယေဟောဝါ၏စကားနားထောင်လျှင် ခံစားရမည့်ကောင်းချီးများဆိုင်ရာပညတ်ချက်များကို အခန့်သင့်ထပ်မံကြားနာကြရသည်။ (ယောရှု ၈:၃၄၊ ၃၅) ယေဟောဝါ၏ရှုထောင့်မှ အဘယ်အရာကောင်းသည်၊ အဘယ်အရာဆိုးသည်ကို ရှင်းလင်းပြတ်သားစွာ သူတို့နားလည်ထားရန်လိုသည်။ ထို့ပြင် ယနေ့ ကျွန်ုပ်တို့တစ်ဦးစီနည်းတူ သူတို့သည် အကောင်းကိုမြတ်နိုးပြီး အဆိုးကိုမုန်းသောသဘောကို နှလုံးထဲစွဲမှတ်ထားရန်လိုသည်။—ဆာလံ ၉၇:၁၀; ၁၁၉:၁၀၃၊ ၁၀၄; အာမုတ် ၅:၁၅။

၈။ ဣသရေလနိုင်ငံတွင် လူမျိုးလိုက်စည်းဝေးခဲ့သည့်အချိန်အခါအချို့တွင် ဘုရားသခင်၏နှုတ်ကပါဌ်တော်ကို ရံဖန်ရံခါဖတ်ရွတ်ခြင်းကား အဘယ်အကျိုးဖြစ်ထွန်းစေသနည်း။

^၈ ထိုသမိုင်းတွင်သောအချိန်အခါများတွင် ပညတ္တိကျမ်းကိုဖတ်ပြသည့်အပြင် ဘုရားသခင်၏နှုတ်ကပါဌ်တော်ကို မှန်မှန်ဖတ်ရှုရန်အစီအစဉ်ကို တရားဟောရာ ၃၁:၁၀-၁၂ တွင်အကြမ်းဖျင်းဖော်ပြထားသည်။ လူမျိုးတစ်မျိုးလုံးသည် ဘုရားသခင်၏နှုတ်ကပါဌ်တော်မှဖတ်ပြခြင်းကို ကြားနာခြင်းငှာ ခုနစ်နှစ်တစ်ကြိမ် စုဝေးကြရ၏။ ယင်းသည် သူတို့အတွက် ဝိညာဉ်အစာစားသုံးခြင်းဖြစ်သည်။ ယင်းက သူတို့၏စိတ်နှလုံးထဲတွင် မျိုးနွယ်တော်နှင့်ပတ်သက်သောကတိတော်များကိုစွဲမှတ်ထားစေပြီး သစ္စာရှိသူများအား မေရှိယထံညွှန်ကြားပို့ဆောင်ပေးသည်။ တောအရပ်တွင် ဣသရေလလူမျိုးရှိစဉ်ကစတင်ခဲ့သည့် ဝိညာဉ်အစာစားခြင်းအစီအစဉ်များသည် ကတိထားရာပြည်ထဲဝင်သောအခါတွင် ကုန်ခန်းပြီးဆုံးခဲ့သည်မဟုတ်ပါ။ (၁ ကောရိန္သု ၁၀:၃၊ ၄) ယင်းအစား ပရောဖက်တို့၏ထပ်ဆင့်ဖွင့်ဟထုတ်ဖော်ချက်များကို ထည့်သွင်းလိုက်ခြင်းအားဖြင့် ဘုရားသခင့်နှုတ်ကပါဌ်တော်၏အရည်အသွေးသည် မြှင့်တင်ခံရလေသည်။

၉။ (က) လူစုလူဝေးအနေနှင့် စည်းဝေးကြသည့်အခါများတွင်သာ ဣသရေလလူမျိုးသည် ကျမ်းစာကိုဖတ်ရွတ်ကြသလော။ (ခ) မိသားစုတစ်စုစီတွင် ကျမ်းစာပို့ချမှုကို မည်သို့ပြုလုပ်ခဲ့သနည်း။ အဘယ်ရည်ရွယ်ချက်ဖြင့်နည်း။

^၉ လူစုလူဝေးအနေနှင့် စည်းဝေးသည့်အချိန်အခါများတွင်သာ ဘုရားသခင်၏နှုတ်ကပါဌ်တော်သြဝါဒကို ပြန်လည်သုံးသပ်ရန်မဟုတ်။ ဘုရားသခင်နှုတ်ကပါဌ်တော်၏အစိတ်အပိုင်းများနှင့် ယင်းတွင်ပါဝင်သည့်မူများကို နေ့စဉ်ဆွေးနွေးရန်ဖြစ်သည်။ (တရားဟောရာ ၆:၄-၉) ယနေ့ နေရာအများတွင် လူငယ်တို့သည် ကိုယ်ပိုင်ကျမ်းစာအုပ်ရရှိနိုင်၍ ရှိထားခြင်းသည် အလွန်အကျိုးရှိသည်။ သို့သော် ရှေးဣသရေလလူမျိုးခေတ်က ထိုသို့မဖြစ်နိုင်ပါ။ ထိုစဉ်က မိဘများသည် ဘုရားသခင်၏နှုတ်ကပါဌ်တော်မှ သွန်သင်ပေးသောအခါ မိမိတို့အလွတ်ကျက်မှတ်ထားသည့်ကျမ်းပိုဒ်များနှင့် သူတို့နှလုံးတွင်စွဲမှတ်ထားသောအမှန်တရားများအပေါ် အားထားကြရသည်။ ထို့ပြင် ရေးမှတ်ထားကောင်းရေးမှတ်ခဲ့မည့် ကောက်နုတ်ချက်လေးများကို အသုံးပြုကြရ၏။ အကြိမ်ကြိမ်ပြန်ကျော့ခြင်းအားဖြင့် ယေဟောဝါနှင့် ကိုယ်တော်၏နည်းလမ်းတော်များကို သားသမီးများချစ်မြတ်နိုးကြစေရန် ကြိုးစားပျိုးထောင်ပေးကြသည်။ ဤသို့ပြုလုပ်ရခြင်းရည်ရွယ်ချက်မှာ သူတို့အသိပညာရှိဖို့အတွက်သာမဟုတ်ဘဲ မိသားစုရှိသူတိုင်းအား ယေဟောဝါကိုလည်းကောင်း၊ ကိုယ်တော်၏နှုတ်ကပါဌ်တော်ကိုလည်းကောင်း မြတ်နိုးမှုထင်ရှားသည့်ဘဝပုံစံအတိုင်း အသက်ရှင်နေထိုင်ကြရန်အတွက်ဖြစ်သည်။—တရားဟောရာ ၁၁:၁၈၊ ၁၉၊ ၂၂၊ ၂၃။

တရားဇရပ်များတွင် ကျမ်းစာဖတ်ရွတ်ခြင်း

၁၀၊ ၁၁။ တရားဇရပ်များတွင် အဘယ်ကျမ်းစာဖတ်ရွတ်ခြင်းအစီအစဉ်ရှိခဲ့သနည်း။ ဤအချိန်အခါများကို ယေရှုမည်သို့ရှုမြင်သနည်း။

^၁၀ ဗာဗုလုန်သို့ ဂျူးများပြည်နှင်ခံရပြီးနောက် အတန်ကြာလေသော် တရားဇရပ်များသည် ဝတ်ပြုရာအရပ်အဖြစ် တည်ရှိလာခဲ့သည်။ ဤစည်းဝေးရာအရပ်တွင် ဘုရားသခင်၏နှုတ်ကပါဌ်တော်ကို ဖတ်ရွတ်ဆွေးနွေးနိုင်ရန် ကျမ်းစာကို မိတ္တူရေးကူးခဲ့ကြသည်။ ယင်းကြောင့်သာ လက်ရေးစာမူဟေဗြဲကျမ်းစာစောင်အစိတ်အပိုင်းများ ၆,၀၀၀ ခန့်ယခုတိုင်ရှိနေခြင်းဖြစ်သည်။

^၁၁ တရားဇရပ်တွင်ဝတ်ပြုစည်းဝေးချိန်၏ အရေးကြီးသောအစီအစဉ်တစ်ခုမှာ မျက်မှောက်ခေတ် သမ္မာကျမ်းစာများ၏ ပထမငါးကျမ်းပါဝင်သည့် တိုရာကိုဖတ်ရွတ်ခြင်းဖြစ်သည်။ စီ.အီး. ပထမရာစုတွင် ဤကဲ့သို့ဖတ်ရွတ်ခြင်းကို ဥပုသ်နေ့တိုင်းပြုလုပ်ခဲ့ကြောင်း တမန်တော် ၁၅:၂၁ ကဆိုသည်။ ဒုတိယရာစုတွင်မူ သီတင်းပတ်အတွင်းဖြစ်သော ဒုတိယနှင့်ပဉ္စမရက်များ၌လည်း တိုရာကိုဖတ်ရွတ်ကြကြောင်း မစ်ရှ်နာကဖော်ပြသည်။ သတ်မှတ်ထားသောအပိုင်းများကို အများသောသူတို့သည် တစ်ယောက်စီ ဆက်တိုက်ဖတ်ရွတ်ကြသည်။ ဗာဗုလုန်နိုင်ငံတွင်နေထိုင်သောဂျူးထုံးစံမှာ တိုရာတစ်အုပ်လုံးကို နှစ်စဉ်ဖတ်ရှုရန်ဖြစ်သည်။ ပါလက်စတိုင်းနိုင်ငံတွင်မူ သုံးနှစ်တစ်ကြိမ်ဖတ်ပြီးရန်ဖြစ်သည်။ အနာဂတ္တိကျမ်းစောင်များမှ အပိုင်းအချို့ကိုလည်း ဖတ်ရွတ်၍ရှင်းပြလေ့ရှိသည်။ ယေရှုနေထိုင်ခဲ့သောအရပ်တွင် ဥပုသ်နေ့တိုင်း ကျမ်းစာဖတ်ရွတ်ခြင်းကို ကိုယ်တော်သွားရောက်နားထောင်သောထုံးစံရှိသည်။—လုကာ ၄:၁၆-၂၁။

ကိုယ်တိုင်တုံ့ပြန်ပုံနှင့် အသုံးချပုံ

၁၂။ (က) လူတို့အား ပညတ္တိကျမ်းကို မောရှေဖတ်ရွတ်ပြသောအခါ လူတို့ကို မည်သို့အကျိုးပြုသနည်း။ (ခ) လူတို့က မည်သို့တုံ့ပြန်ခဲ့သနည်း။

^၁၂ မှုတ်သွင်းခံကျမ်းစာစောင်များကို ဖတ်ရွတ်ခြင်းသည် လုပ်ရိုးလုပ်စဉ်မျှဖြစ်ဖို့မဟုတ်ပါ။ လူတို့၏သိလိုစိတ်ကို ရောင့်ရဲစေလို၍သာ ဖတ်ရွတ်ရန်မဟုတ်။ သိနာတောင်ရှေ့ရှိလွင်ပြင်တွင် ဣသရေလလူမျိုးအား “ပဋိညာဉ်စာ” ကိုမောရှေဖတ်ပြခဲ့သောအခါ ဘုရားသခင်ရှေ့သူတို့ပြုလုပ်ရမည့်တာဝန်များကိုသိထားပြီး ပြုလုပ်ဆောင်ရွက်ကြရန်အတွက် ဖတ်ပြပေးခြင်းဖြစ်သည်။ ထိုသို့ပြုကြပါမည်လော။ ဖတ်ရွတ်ပြခြင်းက တုံ့ပြန်မှုရလို၍ဖြစ်သည်။ လူတို့ကလည်း ယင်းကိုအသိအမှတ်ပြုကာ ဤသို့ဆိုကြသည်– “ထာဝရဘုရား [ယေဟောဝါ] မိန့်တော်မူသမျှအတိုင်း အကျွန်ုပ်တို့ပြုပါမည်။ နားထောင်ပါမည်။”—ထွက်မြောက်ရာ ၂၄:၇; ထွက်မြောက်ရာ ၁၉:၈၊ နှိုင်းယှဉ်; ၂၄:၃။

၁၃။ နားမထောင်ခြင်းနှင့်ဆိုင်သောကျိန်ဆိုချက်များကို ယောရှုဖတ်ရွတ်ပြသောအခါ လူတို့သည် မည်သို့ပြုလုပ်ရမည်ဖြစ်သနည်း။ မည်သည့်ဦးတည်ချက်ဖြင့်နည်း။

^၁၃ နောင်တွင် ထိုလူမျိုးအား ယောရှုက ကတိတော်ရှိသည့် ကောင်းချီးများနှင့် ကျိန်ခြင်းများအကြောင်း ဖတ်ပြသည့်အခါ သူတို့သည်တုံ့ပြန်ကြရမည်ဖြစ်သည်။ ကျိန်ခြင်းတစ်ခုစီတင်ပြပြီးနောက် ဤသို့မှာကြားသည်– “လူအပေါင်းတို့က ‘အာမင်!’ ဟုဝန်ခံကြရမည်။” (တရားဟောရာ ၂၇:၄-၂၆) ဤနည်းအားဖြင့် ဖော်ပြပါအမှားများ တစ်ချက်ချင်းစီကို ယေဟောဝါအပြစ်ဒဏ်စီရင်ခြင်းအား သူတို့သဘောတူဝန်ခံကြောင်း တင်ပြကြသည်။ လူမျိုးတစ်မျိုးလုံး ကျယ်လောင်စွာ သဘောတူဝန်ခံခြင်းသည် မည်မျှစွဲမှတ်စရာဖြစ်ခဲ့ပါမည်တကား!

၁၄။ နေဟမိခေတ်က ပညတ္တိကျမ်းကို လူအများရှေ့ဖတ်ရွတ်ခြင်းသည် အဘယ်ကြောင့်အထူးအကျိုးရှိခဲ့သနည်း။

^၁၄ နေဟမိခေတ်တွင် ပညတ္တိကျမ်းကို ကြားနာခြင်းငှာ ယေရုရှလင်မြို့၌ လူအပေါင်းတို့စုရုံးခဲ့စဉ်က ထိုတွင်ပါသောညွှန်ကြားချက်များကို သူတို့အပြည့်အဝ မနာခံခဲ့ကြောင်း သတိပြုမိကြသည်။ ထိုအချိန်တွင် ကြားသိသမျှကို သူတို့ချက်ချင်းလိုက်နာကျင့်သုံးခဲ့ကြသည်။ အကျိုးရလဒ်ကား အဘယ်နည်း။ “အလွန်ဝမ်းမြောက်လျက်နေကြ၏။” (နေဟမိ ၈:၁၃-၁၇) ထိုပွဲခံစဉ် တစ်ပတ်လုံးလုံး ကျမ်းစာကို နေ့စဉ်ဖတ်ရွတ်ပြီးနောက် သူတို့မှာ ထပ်မံပြုလုပ်စရာလိုနေသေးသည်ကို သိမြင်လာကြသည်။ သို့နှင့် ဆုတောင်းကြပြီး အာဗြဟံခေတ်မှစတင်သော ယေဟောဝါလူမျိုး၏သမိုင်း၊ သူတို့နှင့်ကိုယ်တော်ဆက်ဆံပုံကို ပြန်သုံးသပ်ကြသည်။ ယင်းတို့အားလုံးကြောင့် ပညတ္တိကျမ်းစီရင်ထုံးဖွဲ့သည့်အတိုင်းကျင့်ပါမည်၊ လူမျိုးခြားတို့နှင့် ရောနှောထိမ်းမြားခြင်းကိုမပြုပါ၊ ဘုရားသခင်၏ဗိမာန်တော်အမှုတို့ကို ဆောင်ရွက်ပါမည်ဟူ၍ သစ္စာကတိပြုရန် လှုံ့ဆော်တိုက်တွန်းခံရသည်။—နေဟမိ အခန်း ၈-၁၀။

၁၅။ တရားဟောရာ ၆:၆-၉ ပါညွှန်ကြားချက်များက မိသားစုများတွင် ဘုရားသခင့်နှုတ်ကပါဌ်တော်မှသွန်သင်ပေးခြင်းကို လုပ်ရိုးလုပ်စဉ်အရသာမဖြစ်စေသင့်ကြောင်း မည်သို့တင်ပြသနည်း။

^၁၅ ထိုနည်းတူ မိသားစုတွင် သမ္မာကျမ်းစာကိုလုပ်ရိုးလုပ်စဉ်အရသာသွန်သင်ပေးခြင်းမဖြစ်စေရပါ။ တွေ့ရှိနှင့်ခဲ့သည့်အတိုင်း တရားဟောရာ ၆:၆-၉ တွင်ပုံဆောင်စကားများဖြင့် ‘ဘုရားသခင်၏စကားကို သူတို့၏လက်၌ လက္ခဏာသက်သေအဖြစ်ချည်ထားရမည်’ ဟုလူတို့အား မှာကြားသည်။ ထိုသို့ပြုခြင်းဖြင့် ပုံသက်သေအားဖြင့်လည်းကောင်း၊ လက်တွေ့အရလည်းကောင်း ယေဟောဝါ၏လမ်းစဉ်ကို မြတ်နိုးကြောင်း တင်ပြကြမည်ဖြစ်သည်။ ဘုရားသခင်၏စကားများကို ‘သူတို့၏မျက်စိကြားမှာ သင်းကျစ်ကဲ့သို့ ချည်ထားရမည်’ ဖြစ်သည်။ ဤနည်းဖြင့် ကျမ်းချက်များပါ မူတို့ကို အစဉ်သတိရကြပြီး ဆုံးဖြတ်ချက်များချတိုင်း ယင်းတို့ကိုအခြေခံ၍ပြုလုပ်ကြရမည်ဖြစ်သည်။ (ထွက်မြောက်ရာ ၁၃:၉၊ ၁၄-၁၆ တွင်အသုံးပြုထားသည့်စကားကို နှိုင်းယှဉ်။) သူတို့သည် ‘အိမ်တံခါး၊ မြို့တံခါးတို့၌လည်း ရေးထားရမည်’ ဖြစ်သည်။ ဤနည်းအားဖြင့် သူတို့၏အိမ်၊ သူတို့၏အရပ်သည် ဘုရားသခင်၏နှုတ်ကပါဌ်တော်ကို တန်ဖိုးထားလေးစား၍ အသုံးပြုရာနေရာများဖြစ်ကြောင်းကို ဖော်ပြကြသည်။ တစ်နည်းအားဖြင့်ဆိုလျှင် သူတို့သည် ယေဟောဝါ၏ဖြောင့်မတ်သောပညတ်ချက်များကို မြတ်နိုးသည့်အတိုင်း လိုက်နာကျင့်သုံးကြောင်း သူတို့အသက်ရှင်နေထိုင်ပုံက ဖော်ပြရမည်ဖြစ်သည်။ တကယ်အကျိုးဖြစ်ထွန်းပါမည်တကား! ကျွန်ုပ်တို့အိမ်ထောင်များ၏ နေ့စဉ်ဘဝအသက်တာတွင် ဘုရားသခင်၏နှုတ်ကပါဌ်တော်ကို ထိုအတိုင်းဦးစားပေးကြပါသလော။ ဝမ်းနည်းစရာကား ဂျူးလူမျိုးသည် အထက်ပါအမှုအားလုံးတို့ကို လုပ်ရိုးလုပ်စဉ်မျှသာဖြစ်စေ၍ ကျမ်းချက်ထည့်ထားသည့်ဘူးများကို အဆောင်လက်ဖွဲ့များကဲ့သို့ယူမှတ်ပြီး တပ်ဆင်ကြသည်။ နှလုံးဖြင့်ဝတ်ပြုမှုမဟုတ်တော့သဖြင့် ယေဟောဝါ၏စွန့်ပယ်ခြင်းကို သူတို့ခံခဲ့ကြရသည်။—ဟေရှာယ ၂၉:၁၃၊ ၁၄; မဿဲ ၁၅:၇-၉။

ကြီးကြပ်မှူးအရာ၌ရှိသူများ၏ တာဝန်

၁၆။ ကျမ်းစာကို မှန်မှန်ဖတ်ရှုခြင်းသည် ယောရှုအတွက် အဘယ်ကြောင့်အရေးကြီးသနည်း။

^၁၆ ကျမ်းစာဖတ်ရွတ်ခြင်းနှင့်ပတ်သက်၍ ထိုလူမျိုးကိုကြီးကြပ်ရသူများသည် အထူးမှာကြားခံခဲ့ရသည်။ ယောရှုအား ယေဟောဝါက ဤသို့မိန့်တော်မူသည်– “ပညတ္တိကျမ်းစာ၌ ရေးထားသမျှအတိုင်း သတိနှင့်စောင့်ရှောက်” လော့။ ထိုတာဝန်ကျေပွန်ရန် သူ့အား ဤသို့မှာကြားသည်– “ကျမ်းစာကို . . . နေ့ညဉ့်မပြတ် ဖတ်ရွတ်ဆင်ခြင်ရမည်။ သို့မှ သင်ပြုသောအမှု၌ထမြောက်၍ အောင်မြင်လိမ့်မည်။” (ယောရှု ၁:၇၊ ၈၊ သမ္မာ) ကျမ်းစာကို ယောရှုမှန်မှန်ဖတ်ရွတ်ခဲ့သည့်အတွက် ယေဟောဝါ၏လူမျိုးအား ကိုယ်တော်ချမှတ်တော်မူသော ပညတ်ချက်များကို သူ့အားစွဲမှတ်စေသည့်နည်းတူ ယနေ့ အဘယ်ခရစ်ယာန်ကြီးကြပ်မှူးအတွက်မဆို ထပ်တူပင်ဖြစ်သည်။ အခြေအနေအမျိုးမျိုးအောက် ယေဟောဝါ၏ကျေးကျွန်များနှင့် ကိုယ်တော်မည်သို့ဆက်ဆံခဲ့ကြောင်းကို ယောရှုနားလည်ထားရန်လည်းလိုသည်။ ဘုရားသခင်၏ရည်ရွယ်ချက်များအကြောင်း သူဖတ်ရှုရသည့်အခါ ထိုရည်ရွယ်ချက်နှင့်ပတ်သက်၍ မိမိ၏တာဝန်ကိုစဉ်းစားဆင်ခြင်ရန် သူ့အဖို့အရေးကြီးသည်။

၁၇။ (က) ကျမ်းစာဖတ်ရွတ်ခြင်းမှ ယေဟောဝါမိန့်ဆိုသည့်နည်းအတိုင်း ရှင်ဘုရင်များအကျိုးခံစားရရန် ဖတ်ရွတ်ခြင်းနှင့်အတူ သူတို့ဘာလုပ်ကြရန် လိုအပ်သနည်း။ (ခ) ကျမ်းစာကို မှန်မှန်ဖတ်ရှုခြင်းနှင့် ဆင်ခြင်တွေးတောခြင်းသည် ခရစ်ယာန်အကြီးအကဲများအတွက် အဘယ်ကြောင့်အလွန်အရေးကြီးသနည်း။

^၁၇ ယေဟောဝါ၏လူမျိုးကို ဘုရင်အဖြစ်အုပ်ချုပ်ရသူ မည်သူမဆို ဘုရင်စဖြစ်ချိန်တွင်ပင် ယဇ်ပုရောဟိတ်များ၌ရှိသော ဘုရားသခင်၏ပညတ္တိကျမ်းစာကိုကူးရေးရမည်ဟု ယေဟောဝါညွှန်ကြားတော်မူသည်။ ထို့နောက် သူသည် “လက်ခံစာကို တစ်သက်လုံးစောင့်ရှောက်ကြည့်ရှုဖတ်ရွတ်ရမည်” ဖြစ်သည်။ ရည်ရွယ်ချက်မှာ ၎င်းပါအကြောင်းအရာများကို အလွတ်ကျက်မှတ်ရုံအတွက်မျှမဟုတ်ဘဲ ‘သူ၏ဘုရားသခင် ယေဟောဝါကိုကြောက်ရွံ့၍ . . . သူ၏ညီအစ်ကိုတို့ကို မထီမဲ့မြင်ပြု၍ မာနမထောင်လွှား’ မည်အကြောင်းတည်း။ (တရားဟောရာ ၁၇:၁၈-၂၀) သို့ပြုရန် သူဖတ်ရှုသမျှကို လေးလေးနက်နက်ဆင်ခြင်တွေးတောရန်လိုသည်။ ရှင်ဘုရင်အချို့က ညွှန်ကြားရေးတာဝန်များနှင့် မိမိအလုပ်များလွန်းသည်ဟု မိမိကိုယ်ကိုယူမှတ်ကြောင်း ထင်ရှားသည်။ သူတို့၏လျစ်လျူရှုမှုကြောင့် လူမျိုးတစ်မျိုးလုံး ဒုက္ခရောက်ခဲ့ရ၏။ ခရစ်ယာန်အသင်းတော်တွင် အကြီးအကဲများ၏ကဏ္ဍသည် ရှင်ဘုရင်များ၏ကဏ္ဍမဟုတ်သည်မှာ အမှန်ပင်။ သို့ဖြစ်စေကာမူ ဘုရင်များနည်းတူ အကြီးအကဲများသည်လည်း ဘုရားသခင်၏နှုတ်ကပါဌ်တော်ကို ဖတ်ရှုပြီး ဆင်ခြင်တွေးတောရန်လိုသည်။ သူတို့သည် ယင်းသို့ပြုလုပ်ကြမည်ဆိုလျှင် သူတို့အားအပ်နှင်းထားသူများအပေါ် အမြင်မှန်ရှိရန် အထောက်အကူရမည်ဖြစ်သည်။ ဘုရားသခင်ကို အမှန်တကယ်ဂုဏ်တင်ပြီး ခရစ်ယာန်ချင်းတို့အား ဝိညာဉ်ရေးအရ ခွန်အားရှိစေသော သွန်သင်ပို့ချသူများအဖြစ် မိမိတို့တာဝန်ကျေပွန်ရန်လည်း သူတို့အား အထောက်အကူဖြစ်မည်။—တိတု ၁:၉; ယောဟန် ၇:၁၆-၁၈ နှိုင်းယှဉ်; ၁ တိမောသေ ၁:၆၊ ၇ ယှဉ်ကြည့်။

၁၈။ ကျမ်းစာကိုမှန်မှန်ဖတ်ရှုလေ့လာခြင်းက တမန်တော်ပေါလုတင်ပြခဲ့သော အဘယ်ပုံသက်သေကိုတုပရန် အကူအညီဖြစ်စေမည်နည်း။

^၁၈ ပထမရာစုတွင် ခရစ်ယာန်ကြီးကြပ်မှူးတစ်ဦးဖြစ်သူ တမန်တော်ပေါလုသည် မှုတ်သွင်းခံကျမ်းစာကို ကောင်းစွာသိနားလည်သူတစ်ဦးဖြစ်သည်။ ရှေးခေတ်သက်သာလောနိတ်မြို့တွင် သူသက်သေခံခဲ့သောအခါ ကျမ်းစာကိုအသုံးပြုပြီး လူတို့နှင့်ထိရောက်စွာဆင်ခြင်သုံးသပ်ကာ အနက်ကိုနားလည်ရန်ကူညီနိုင်ခဲ့သည်။ (တမန်တော် ၁၇:၁-၄) ရိုးဖြောင့်သောကြားနာသူများ၏နှလုံးကို သူထိမိခဲ့သည်။ ဤနည်းအားဖြင့် သူဟောပြောသောစကားကို ကြားနာခဲ့သူများသည် ယုံကြည်သူများ ဖြစ်လာကြသည်။ (၁ သက်သာလောနိတ် ၂:၁၃) သင်၏ကျမ်းစာဖတ်ရွတ်လေ့လာခြင်းအစီအစဉ်ကြောင့် သင်သည် ကျမ်းစာကိုအသုံးပြုပြီး ထိရောက်စွာ ဆင်ခြင်နှီးနှောနိုင်ပါသလော။ သင့်အသက်တာတွင် ကျမ်းစာဖတ်ရွတ်ရန် သင်အချိန်ပေးပြီး ဖတ်ရှုလေ့လာပုံက ဘုရားသခင်၏နှုတ်ကပါဌ်တော်ကိုရထားသည့်အတွက် အမှန်တကယ်ကျေးဇူးတင်ကြောင်း တင်ပြပါသလော။ နောက်ဆောင်းပါးတွင် အလွန်အလုပ်များသူများပင်လျှင် ယင်းမေးခွန်းများကို အပြုသဘောဖြင့် မည်သို့ဖြေဆိုနိုင်ကြောင်း သုံးသပ်ကြည့်ကြမည်။

သင်မည်သို့ဖြေဆိုမည်နည်း

◻ သမ္မာကျမ်းစာကိုဖတ်ရှုရန် လူတို့သည် အသက်နှင့်လွတ်လပ်ခွင့်ကိုပင် စွန့်လွှတ်ရန် အဘယ်ကြောင့်အသင့်ရှိခဲ့ကြသနည်း။

◻ ရှေးဣသရေလလူမျိုးသည် ဘုရားသခင်၏နှုတ်ကပါဌ်တော်ကိုကြားနာရန် ပြုလုပ်ထားသောအစီအစဉ်များကို ပြန်သုံးသပ်ခြင်းအားဖြင့် ကျွန်ုပ်တို့မည်သို့အကျိုးခံစားရမည်နည်း။

◻ သမ္မာကျမ်းစာတွင် ကျွန်ုပ်တို့ဖတ်ရှုသည့်အရာနှင့်အညီ ဘာလုပ်သင့်သနည်း။

◻ ကျမ်းစာဖတ်ခြင်းနှင့် ဆင်ခြင်တွေးတောခြင်းသည် ခရစ်ယာန်အကြီးအကဲများအတွက် အဘယ်ကြောင့်အထူးသဖြင့်အရေးကြီးသနည်း။

[စာမျက်နှာ ၁၆ ပါ လေးထောင့်ကွက်]

သင့်ကျမ်းစာဖတ်ရှုခြင်းကို ပိုအကျိုးရှိစေရန် အကြံပြုချက်များ

(၁) လူအများသည် ကျမ်းစာစောင်များကို ပုံနှိပ်ထားသောထုံးစံအတိုင်း၊ ကမ္ဘာဦးမှဗျာဒိတ်ကျမ်းအထိကို ဖတ်ရှုသည်။ အသင်လည်း ယင်းတို့ကိုမူလရေးသားစဉ်ကအစီအစဉ်အတိုင်း ဖတ်ရှုနိုင်ပါသည်။ သမ္မာကျမ်းစာသည် မှုတ်သွင်းခံစာစောင် ၆၆ စောင်ဖြစ်သည့် ဘုရားသခင်နှင့်ဆိုင်သောစာကြည့်တိုက်တစ်ခုဖြစ်ကြောင်း သတိရပါ။ အပြောင်းအလဲအနေနှင့် စာမျက်နှာလိုက်သာ ဖတ်ရှုသွားမည့်အစား ရာဇဝင်သမိုင်းကိုဖော်ပြသော၊ ထို့နောက် အဓိကအားဖြင့် ပရောဖက်ပြုချက်ဖြစ်သောစာစောင်များ၊ ယင်းနောက် ဩဝါဒစာများကို ဖတ်ရှုသွားနိုင်ပါသည်။ သင်ဖတ်ရှုပြီးသည့်အပိုင်းကိုမှတ်ထားပြီး သမ္မာကျမ်းစာတစ်အုပ်လုံးကို မပျက်မကွက်ဖတ်ပြီးရန် သတိပြုပါ။

(၂) ကျမ်းစာတစ်ပိုင်းကိုဖတ်ပြီးသည့်နောက် ယေဟောဝါအကြောင်း၊ ကိုယ်တော်၏ရည်ရွယ်ချက်၊ ကိုယ်တော်ပြုမူစီရင်ပုံ၊ ယင်းတို့သည် သင့်ဘဝတွင် မည်သို့အကျိုးသက်ရောက်သင့်ပုံ၊ အခြားသူတစ်ဦးကို အသင်အကူအညီပေးရာတွင် မည်သို့အသုံးပြုနိုင်မည့်အကြောင်း ကိုယ့်ကိုမေးမြန်းပါ။

(၃) ကျမ်းစာစောင်များအပေါ်ထိုးထွင်းသိမြင်ခြင်းတွင် (“ကျမ်းစာတစ်ကျမ်းလုံး ဘုရားမှုတ်သွင်းရာဖြစ်ပြီး အကျိုးလည်းပြု” တွင်လည်း)၊ ပါသည့် “ယေရှု၏မြေကြီးပေါ်အသက်တာမှ အဓိကအဖြစ်အပျက်များ” ခေါင်းစဉ်အောက်ဇယားကွက်ကို အညွှန်းအဖြစ်အသုံးပြုကာ အလားတူမှတ်တမ်းများကို ခရစ်ဝင်ကျမ်းတစ်ခုစီမှ အစဉ်လိုက်ဖတ်ပါ။ အသက်ရှင်ခဲ့သမျှတွင်အကြီးမြတ်ဆုံးလူသားစာအုပ်ပါ အလားတူအပိုင်းများကို ဖွင့်ဖတ်ကြည့်ပြီး လိုအပ်ရာကိုဖြည့်စွက်ပေးပါ။

(၄) ပေါလု၏အသက်တာဘဝနှင့် ဓမ္မအမှုအကြောင်းကို တမန်တော်ဝတ္ထုတွင် ဖတ်ရှုသည့်အခါ သက်ဆိုင်ရာမှုတ်သွင်းခံသြဝါဒစာများကိုလည်းဖတ်ပါ။ သို့ဖြင့် ပေါလုဟောပြောခဲ့သော မြို့များ၊ ဒေသများကိုဖော်ပြသည့်အခါ ခေတ္တရပ်ကာ ထိုနေရာများတွင်ရှိသော ခရစ်ယာန်ချင်းတို့ထံ နောက်ပိုင်း၌သူရေးသားခဲ့သည့်သြဝါဒစာများကို ဖွင့်ဖတ်ပါ။ သူ၏ခရီးစဉ်များကို ကမ္ဘာသစ်ဘာသာပြန်ကျမ်း၏အနောက်အတွင်းမျက်နှာဖုံးပါမြေပုံ အစရှိသောမြေပုံတွင်လိုက်ကြည့်ခြင်းသည်လည်း အကူအညီဖြစ်ပါမည်။

(၅) ထွက်မြောက်ရာကျမ်းမှ တရားဟောရာကျမ်းအထိကိုဖတ်ရှုရာတွင် ပရောဖက်ပြုချက်ဆိုင်ရာပုံဆောင်ချက်များကို သဘောပေါက်နားလည်နိုင်ရန် ဟေဗြဲသြဝါဒစာကိုဖတ်ပါ။ ကျမ်းစာစောင်များအပေါ်ထိုးထွင်းသိမြင်ခြင်း တွင်ပါသည့် “ပညတ္တိကျမ်း” ဟူသောခေါင်းစဉ်အောက်တွင်ရှိ “ပညတ်ပဋိညာဉ်၏ထူးခြားချက်အချို့” ဇယားကွက်ကိုဖတ်ကြည့်ပါ။

(၆) ပရောဖက်ပြုချက်ဆိုင်ရာစာစောင်များကိုဖတ်သည့်အခါ သမ္မာကျမ်းစာ၏ သမိုင်းနောက်ခံကို အချိန်ယူ၍ပြန်ဆင်ခြင်သုံးသပ်ပါ။ ဥပမာ၊ ဟေရှာယအနာဂတ္တိကျမ်းကိုဖတ်သည့်အခါ ဟေရှာယ ၁:၁ တွင်ပါသော ဩဇိ၊ ယောသံ၊ အာခတ်နှင့် ဟေဇကိမင်းများအကြောင်း အခြားနေရာများတွင် အဘယ်သို့ဆိုထားသည်ကို ပြန်သုံးသပ်ပါ။ (၄ ဓမ္မရာဇဝင်၊ အခန်းကြီး ၁၅-၂၀; ၂ ရာဇဝင်ချုပ်၊ အခန်းကြီး ၂၆-၃၂) သို့မဟုတ် ဟဂ္ဂဲနှင့်ဇာခရိအနာဂတ္တိကျမ်းများကိုဖတ်သည့်အခါ ဧဇရမှတ်စာတွင်ပါသည့်အကြောင်းကို အချိန်ယူပြီး ဆင်ခြင်သုံးသပ်ပါ။

(၇) ကျမ်းစာစောင်တစ်စောင်ကို ရွေးချယ်ပြီးနောက် တစ်ပိုင်းလောက်ဖတ်ပြီး (ဥပမာ၊ အခန်းတစ်ခန်း) ဆည်းပူးလေ့လာပါ။ သို့ပြုရန် Watch Tower Publications Index သို့မဟုတ် သင်၏ဘာသာစကားတွင်ရှိပါက ကွန်ပျူတာတွင်သွင်းထားသော Watchtower Library ကိုအသုံးပြုနိုင်သည်။ သက်ဆိုင်ရာအကြောင်းကို သင့်အသက်တာတွင် လက်တွေ့ကျင့်သုံးပါ။ ယင်းကို ဟောပြောချက်များနှင့် လယ်ကွင်းဓမ္မအမှုတွင် အသုံးပြုပါ။ ထို့နောက် အခြားအကြောင်းတစ်ခုကို ဆက်လေ့လာပါ။

(၈) ကျမ်းစာစောင်တစ်စောင်၊ သို့မဟုတ် တစ်ပိုင်းနှင့်ဆိုင်သော ကောက်ချက်များကိုဖော်ပြသည့် ကင်းမျှော်စင်စာပေတစ်စောင်ရှိမည်ဆိုလျှင် ထိုကျမ်းစာစောင်ကို သင်ဖတ်ရှုနေစဉ် ယင်းကိုမကြာခဏဖတ်ကြည့်ပါ။ (ဥပမာ– ရှောလမုန်သီချင်းအကြောင်း၊ ကင်းမျှော်စင်၊ ဒီဇင်ဘာ ၁၊ ၁၉၅၇၊ ၇၂၀-၃၄ [လိပ်]; ယေဇကျေလအကြောင်း၊ “ငါသည်ယေဟောဝါဖြစ်ကြောင်း လူမျိုးတို့သိရကြမည်”—မည်သို့နည်း (လိပ်); ဒံယေလအကြောင်း၊ “အလိုတော်သည် မြေကြီးပေါ်တွင်ပြည့်စုံမည်” (လိပ်) သို့မဟုတ် ကျွန်ုပ်တို့၏လာလတ္တံ့သော ကမ္ဘာ့အစိုးရ—ဘုရားသခင့်နိုင်ငံတော် (လိပ်); ဟဂ္ဂဲနှင့်ဇာခရိအကြောင်း၊ လူသားတို့အတွက် ပရဒိသု ပြန်လည်တည်ထောင်လာ—သီအိုကရေစီအားဖြင့်! (လိပ်); ဗျာဒိတ်အကြောင်း၊ ဗျာဒိတ်ကျမ်း—ယင်း၏မဟာအထွတ်အထိပ်နီးပြီ! (လိပ်) အစရှိသည်တို့ဖြစ်သည်။)

(၉) အသင်ဖတ်ရှုနေစဉ် ပြန်လှန်ညွှန်းချက်အချို့ကို ဖွင့်ဖတ်ကြည့်ပါ။ ခရစ်ယာန်ဂရိကျမ်းစာစောင်များတွင်ပါ ဟေဗြဲကျမ်းစာစောင်များမှ တိုက်ရိုက်ကိုးကားချက် ၃၂၀ နှင့် ညွှန်းထားသည့် အခြားရာချီသည့်ကျမ်းပိုဒ်များအပြင် သက်ဆိုင်ပုံကိုပါသတိပြုပါ။ ပြန်လှန်ညွှန်းချက်တို့က ကျမ်းစာတွင်မှတ်တမ်းတင်ထားသည့် ပရောဖက်ပြုချက်များ၏ပြည့်စုံချက်၊ အတ္ထုပ္ပတ္တိနှင့်ပထဝီဆိုင်ရာ အသေးစိတ်အချက်အလက်များနှင့် နားလည်ရခက်ကောင်းခက်မည့် စကားအသုံးအနှုန်းများကိုရှင်းလင်းစေသည့် အလားတူအဆိုများကို ထောက်ပြပါသည်။

(၁၀) သင့်ဘာသာစကားဖြင့် ကမ္ဘာသစ်ဘာသာပြန်ကျမ်း၏ အညွှန်းများပါကျမ်းစာရှိမည်ဆိုလျှင် ယင်းကိုအသုံးပြုပြီး သင်ဖတ်ရှုနေသည့်အကြောင်းနှင့်ဆက်စပ်၍ အောက်ခြေမှတ်ချက်များနှင့် နောက်ဆက်တွဲဆောင်းပါးများကို စစ်ဆေးကြည့်ပါ။ ယင်းတို့က ဘာသာပြန်ဆိုခြင်း၏ အကြောင်းရင်းနှင့် အရေးကြီးသောစကားများကို အခြားနည်းများဖြင့် ဘာသာပြန်ဆိုနိုင်ပုံများကို တင်ပြပါသည်။ အခြားဘာသာပြန်ကျမ်းများတွင်ပါသည့် အခန်းငယ်များ ပြန်ဆိုထားပုံတို့ကိုလည်း နှိုင်းယှဉ်၍ဖတ်ရှုလိုပေမည်။

(၁၁) အခန်းကြီးတစ်ခန်းစီကို ဖတ်ပြီးသည့်နောက် ထိုအခန်းကြီး၏ အဓိကအချက်ကို တိုတုတ်စွာအကျဉ်းချုပ်၍ဖော်ပြပါ။ ယင်းကို နောက်နောင်ပြန်ဖတ်ရှုလေ့လာဆင်ခြင်တွေးတောဖို့အတွက် အခြေခံအဖြစ် အသုံးပြုပါ။

(၁၂) သမ္မာကျမ်းစာကို အသင်ဖတ်ရှုစဉ် သင်အထူးစွဲမှတ်ထားလိုသော ကြိုက်နှစ်သက်ရာကျမ်းချက်များကို မှတ်သားထားပါ။ သို့မဟုတ် ကတ်ပြားများပေါ်ကူးရေးပြီး ယင်းတို့ကိုနေ့စဉ်တွေ့မြင်နိုင်သောနေရာတွင်ထားပါ။ ယင်းတို့ကို အလွတ်ကျက်မှတ်ပါ; ဆင်ခြင်တွေးတောပါ; အသုံးပြုပါ။ တစ်ခါတည်းနှင့်ကျက်မှတ်စရာ မများလွန်းစေနှင့်; တစ်ပတ်လျှင် တစ်ခုနှစ်ခုမျှသာကျက်မှတ်ပါ; ၎င်းနောက် ကျမ်းစာတစ်အုပ်လုံးကို ဆက်ဖတ်သည့်အခါ ထပ်မံရွေးချယ်ပါ။

[စာမျက်နှာ ၉ ပါ ရုပ်ပုံ]

“ကျမ်းစာကို . . . နေ့ညဉ့်မပြတ် ဖတ်ရွတ်ဆင်ခြင်ရမည်” ဟု ယောရှုအား ယေဟောဝါ မှာကြားတော်မူခဲ့သည်