သွေး

အဓိပ္ပာယ်သတ်မှတ်ချက်– တကယ်ပင်အံ့ဖွယ်ကောင်းသောအရည်ဖြစ်၍ လူနှင့်ဆဲလ်များတိရစ္ဆာန်တို့၏သွေးကြောစုအတွင်း လှည့်ပတ်လျက် ခန္ဓာအတွက် အာဟာရနှင့်အောက်ဆီဂျင်ဖြည့်တင်း၏။ အညစ်အကြေးဖယ်ထုတ်၏။ ကူးစက်ရောဂါကိုခုခံရာ၌ အဓိကကဏ္ဍမှပါဝင်ဆောင်ရွက်၏။ သွေးသည် အသက်ဖြစ်စဉ်နှင့်ခွဲမရနိုင်အောင်ပတ်သက်ရကား သမ္မာကျမ်းစာက “ကိုယ်ခန္ဓာအသက်သည် အသွေး၌တည်၏” ဟုပင်ဆိုသည်။ (ဝတ်. ၁၇:၁၁) အသက်ပေးရှင်အနေနှင့် ယေဟောဝါသည် သွေးကိုမည်သို့အသုံးပြုနိုင်သည်နှင့်ပတ်သက်၍ တိကျပြတ်သားသောညွှန်ကြားချက်များ ချမှတ်တော်မူပြီဖြစ်သည်။

ခရစ်ယာန်များအား ‘သွေးကိုရှောင်ရန်’ ပညတ်ထားတော်မူသည်

တ. ၁၅:၂၈၊ ၂၉– “ရုပ်တုရှေ့မှာပူဇော်သောယဇ်ကောင်ကိုလည်းကောင်း၊ အသွေးကိုလည်းကောင်း၊ လည်ပင်းကိုညှစ်၍ [သို့မဟုတ်၊ သွေးမထုတ်ဘဲ] သတ်သောအရာကိုလည်းကောင်း၊ မတရားသောမေထုန်ကိုလည်းကောင်း ကြဉ်ရှောင်ရမည်ဟူသောပညတ်မှတစ်ပါး အခြားသောဝန် သင်တို့၏အပေါ်၌တင်ခြင်းငှာ သန့်ရှင်းသောဝိညာဉ်တော်နှင့်ငါတို့ [ခရစ်ယာန်အသင်းတော်၏အုပ်ချုပ်ရေးအဖွဲ့] သည်အလိုမရှိ။ ထိုအရာများကိုကြဉ်ရှောင်အပ်၏။ ကျန်းမာကြပါစေသော။” (ဤတွင် သွေးစားခြင်းကို ကျွန်ုပ်တို့ပြုရန်ဆန္ဒမရှိအပ်သော ရုပ်တုကိုးကွယ်ခြင်း၊ မတရားမေထုန်တို့နှင့်တစ်စားတည်းထား၍ဆိုထားပါသည်။)

တိရစ္ဆာန်၏အသားကိုစားနိုင်သော်လည်း သွေးကိုမူမစားအပ်

က. ၉:၃၊ ၄၊ သမ– “လှုပ်ရှားသွားလာသောသက်ရှိတိရစ္ဆာန်ဟူသမျှကို သင်တို့စားသုံးရန်ဖြစ်စေ၍ ဟင်းသီးဟင်းရွက် ငါပေးခဲ့သည့်နည်းတူပင် ရှိသမျှကိုလည်းငါပေး၏။ သို့ရာတွင် အသွေးတည်းဟူသော အသက်ပါရှိသည့်အသားကိုမစားကြရ။”

မည်သည့်တိရစ္ဆာန်ကိုမဆို စားဖို့သတ်သောအခါ သွေးကိုကောင်းစွာထုတ်ပစ်သင့်သည်။ လည်ညစ်သတ်သော၊ ထောင်ချောက်ညွှတ်ကွင်းဖြင့်သေသော၊ သို့တည်းမဟုတ် သေနေသောအကောင်သည် စားရန်မသင့်။ (တ. ၁၅:၁၉၊ ၂၀; ဝတ်ပြုရာ ၁၇:၁၃-၁၆ နှင့်နှိုင်းယှဉ်ပါ။) ထို့အတူ၊ သွေးအတိ၊ သို့မဟုတ် သွေး၏အစိတ်အပိုင်းအချို့နှင့်ရောနှောထားသောအစာကိုလည်းမစားသင့်။

သွေးကိုယဇ်ပူဇော်မှုအတွက်သာအသုံးပြုရန် ဘုရားသခင်ခွင့်ပြုတော်မူခဲ့သည်

ဝတ်. ၁၇:၁၁၊ ၁၂– “သင်တို့ပြုသောအပြစ်ကိုဖြေစေခြင်းငှာ ထိုအသွေးကို သင်တို့အား ယဇ်ပလ္လင်ပေါ်မှာငါပေးပြီ။ လူအပြစ်ကိုဖြေသောအရာကားအသွေးဖြစ်သတည်း။ ထိုကြောင့်သင်တို့၌ အဘယ်သူမျှအသွေးကိုမစားရ။ သင်တို့တွင်တည်းနေသော တစ်ပါးအမျိုးသားလည်း အသွေးကို မစားရဟု ဣသရေလအမျိုးသားတို့အား ငါ့အမိန့်တော်ရှိ၏။” (မောရှေပညတ်တရားအောက် ပူဇော်သောထိုတိရစ္ဆာန်ယဇ်အားလုံး ယေရှုခရစ်၏တစ်ခုတည်းသောယဇ်ကို တင်ကြိုအရိပ်ပြခဲ့သည်။)

ဟေဗြဲ ၉:၁၁-၁၄၊ ၂၂– “ယဇ်ပုရောဟိတ်မင်းဖြစ်သောခရစ်တော်သည် ငါတို့အဖို့ ထာဝရရွေးနုတ်ခြင်းကျေးဇူးကိုခံရ၍ ဆိတ်အသွေး၊ နွားကလေးအသွေးနှင့်မဟုတ်၊ မိမိအသွေးတော်နှင့် သန့်ရှင်းရာဌာနထဲသို့ တစ်ခါတည်းဝင်တော်မူ၏။ အကြောင်းမူကား၊ အညစ်အကြေးရှိသောသူတို့အပေါ်၌ဖြန်းသောနွားအသွေး၊ ဆိတ်အသွေး၊ နွားမကလေး၏ပြာသည် သူတို့ကိုယ်ခန္ဓာ၌ စင်ကြယ်ခြင်းကို ပြုနိုင်သည်မှန်လျှင် ထိုမျှမက၊ အပြစ်ကင်းသောကိုယ်တော်ကို ထာဝရဝိညာဉ်တော်အားဖြင့် ဘုရားသခင့်ရှေ့၌တင်လှူပူဇော်သောခရစ်တော်၏အသွေးသည် သေခြင်းနှင့်စပ်ဆိုင်သောအကျင့်ကို ပယ်ရှင်း၍ သင်တို့သည် အသက်ရှင်တော်မူသောဘုရားသခင်ကို ဝတ်ပြုမည်အကြောင်း၊ သင်တို့၌ ကိုယ်ကိုကိုယ်သိသောစိတ်ကိုစင်ကြယ်စေခြင်းငှာ သာ၍တတ်နိုင်တော်မူသည်မဟုတ်လော။ . . . သွေးမသွန်းလောင်းဘဲအပြစ်လွှတ်ခြင်းမရှိ။”

ဧ. ၁:၇၊ ၈– “အတိုင်းထက်အလွန်များလှစွာသောကျေးဇူးတော်သည် ကြွယ်ဝပြည့်စုံသည်နှင့်အညီ ထိုသားတော်၏အသွေးအားဖြင့် အပြစ်လွှတ်တော်မူခြင်းတည်းဟူသော ရွေးနုတ်တော်မူခြင်းကျေးဇူးကို ငါတို့သည်ခံရကြ၏။”

အဦးပိုင်းရာစုနှစ်များမှခရစ်ယာန်အမည်ခံတို့သည် သွေးဆိုင်ရာကျမ်းစာပညတ်များနှင့်ပတ်သက်၍ မည်သို့နားလည်ခဲ့ကြသနည်း

တာတူလျံ (စီ.အီး. ၁၆၀-၂၃၀ ခန့်)– “သင်တို့၏ သဘာဝကိုဖီဆန်သောအမူအကျင့်ကြောင့် ခရစ်ယာန်များရှေ့ရှက်ဖို့ကောင်းသည်။ ငါတို့၏ထမင်းစားပွဲ၌ တိရစ္ဆာန်အသွေးပင်မပါချေ။ ရိုးရိုးအစားအသောက်များသာဖြစ်သည်။ . . . ခရစ်ယာန်များကို ရုံးတင်စစ်ဆေးသောအခါ သင်တို့ (တိတ္ထိရောမလူများ) သည် သူတို့အား သွေးနှင့်ပြည့်သောဝက်အူချောင်းများကိုပေး၏။ သူတို့အား လမ်းလွဲစေရန် သင်တို့အကောက်ကြံရာ၌ အသုံးပြုသောအရာသည် သူတို့အဖို့ ဥပဒေနှင့်ဖီဆန်သောအရာဖြစ်ကြောင်း သင်တို့သေချာသိကြသည်မှာ အထူးဆိုစရာမရှိ။ တိရစ္ဆာန်သွေးကို သူတို့အော့နှလုံးနာမည်ကို သင်တို့တပ်အပ်သိပါလျက်နှင့် လူ့သွေးကိုသူတို့ အာသာငမ်းငမ်းနှင့်တောင့်တကြမည်ဟု အဘယ်ကြောင့်ယူမှတ်ကြသနည်း။”​—တာတူလျံ၊ ချေပချက်စာစောင်၊ မီနုရှပ်စ်ဖဲလစ်စ်၊ အောက်တိုဗိယပ်စ် (နယူးယောက်၊ ၁၉၅၀)၊ အယ်မလီဒယ်လီဘာသာပြန်သည်။ စ. ၃၃။

မီနုရှပ်စ်ဖဲလစ်စ် (စီ.အီး. တတိယရာစု)– “လူ့သွေးကို ကျွန်ုပ်တို့မည်သည့်အထိရှောင်ဖယ်သနည်းဟူမူ ကျွန်ုပ်တို့၏အစားအသောက်ထဲ၌ အသားကိုစားသုံးနိုင်သောတိရစ္ဆာန်များ၏အသွေးကိုပင် ကျွန်ုပ်တို့မသုံးဆောင်ပါ။” —နိုင်စင်းညီလာခံအကြိုခေတ်ကဖားသားများ (ဂရန်း ရက်ပစ်စ်မြို့၊ မစ်ရှဂင်နယ်၊ ၁၉၅၆)၊ အေ. ရောဘတ်နှင့် ဂျေ.ဒေါ်နယ်စင် တို့တည်းဖြတ်သည်။ အတွဲ ၄၊ စ. ၁၉၂။

သွေးသွင်းခြင်း

ကျမ်းစာ၏တားမြစ်ချက်တွင် လူ့သွေးလည်းအကျုံးဝင်သလော

ဝင်ပါသည်။ အစောပိုင်းကခရစ်ယာန်များလည်း ထိုသို့သဘောပေါက်ခဲ့ကြသည်။ တမန်တော် ၁၅:၂၉ က “သွေးကို . . . ကြဉ်ရှောင်ရမည်” ဟုဆို၏။ တိရစ္ဆာန်သွေးကိုရှောင်ပါဟုသာဆိုသည်မဟုတ်။ (ဝတ်. ၁၇:၁၀ နှင့်နှိုင်းယှဉ်။ “အသွေးတစ်မျိုးမျိုး” ကိုမျှမစားရန်တားမြစ်ထားသည်ကိုတွေ့ရမည်။) သွေးသွင်းခြင်းသည် သွေးစားခြင်းနှင့် တကယ်ပင်အတူတူဖြစ်သလော

ဆေးရုံတစ်ရုံ၌ လူနာတစ်ဦး ပါးစပ်ဖြင့်အစာမစားနိုင်သောအခါ သွေးပြန်ကြောမှတစ်ဆင့် အစာအာဟာရထိုးသွင်းပေးကြသည်။ သို့ဖြစ်၍ ပါးစပ်ထဲသို့ သွေးကိုတစ်ခါမျှမထည့်သွင်းဖူးသော လူတစ်ယောက်သည် ကိုယ်ထဲသို့သွေးသွင်းလျှင် “သွေးကိုရှောင်ကြဉ်ရမည်” ဟူသောပညတ်ကို တကယ်ပင်နာခံရာရောက်သလော။ (တ. ၁၅:၂၉) ဥပမာ၊ ဆရာဝန်က လူနာတစ်ဦးအား အရက်ရှောင်ရမည်ဟုညွှန်ကြား၏။ ထိုသူသည် အရက်ကိုမသောက်တော့သော်လည်း သွေးကြောထဲသို့ အရက်ကိုတိုက်ရိုက်ထိုးသွင်းပါက ဆရာဝန်ကို နာခံရာရောက်မည်လော။

သွေးကိုလက်မခံသောလူနာအတွက် အခြားအစားထိုးကုသမှုရှိသလော

Saline solution (ဆားပါပျော်ရည်)၊ Ringer’s solution (ရင်းငါး၏ပျော်ရည်) နှင့် dextran (ဒက်စထရန်) ရိုးရိုးကလေးတို့ကို plasma volume expanders (သွေးရည်ကြည်ထုထည်ချဲ့ပစ္စည်း) အဖြစ် အသုံးပြုနိုင်သည်။ ၎င်းတို့ကို ခေတ်မီဆေးရုံအားလုံးလိုလို၌ ရယူနိုင်သည်။ အမှန်မှာ၊ ၎င်းတို့ကိုသုံးလျှင် သွေးသွင်းခြင်းကြောင့် ပေါ်ပေါက်လာနိုင်သောအန္တရာယ်များကို ရှောင်ရှားနိုင်သည်။ ကနေဒါမေ့ဆေးဆရာဝန်များအသင်းဂျာနယ် (၁၉၇၅၊ ဇန်နဝါရီလ၊ စ. ၁၂) က ဤသို့ဆို၏– “သွေးသွင်းခြင်းကြောင့် အန္တရာယ်ဖြစ်ပေါ်နိုင်သဖြင့် သွေးရည်ကြည်အစားထိုးပစ္စည်းများက သာ၍စိတ်ချရသည်။ ဗက်တီးရီးယားနှင့်ဗိုင်းရတ်ရောဂါပိုးများကြောင့်ဖြစ်သောရောဂါကူးစက်မှု၊ သွေးချင်းမတည့်၍တုံ့ပြန်မှု၊ ရီးဆတ်ဝတ္ထုအာရုံခံစားမှုလွန်မင်းခြင်းတို့ကို ရှောင်ရှားနိုင်သည်။ ယေဟောဝါသက်သေများသည် သွေးမဲ့သွေးရည်ကြည်ထုထည်ချဲ့ပစ္စည်းများကို ဘာသာရေးကြောင့် ငြင်းပယ်ခြင်းမပြုပါ။

စင်စစ်၊ ယေဟောဝါသက်သေများသည် သွေးကိုလက်မခံခြင်းကြောင့် သာ၍ကောင်းသောကုသနည်းမှ အကျိုးရရှိကြသည်။ အမေရိကန်သားဖွားနှင့်မီးယပ်ပညာဂျာနယ် (၁၉၆၈၊ ဇွန်လ ၁ ရက်၊ စ. ၃၉၅) တွင် ဆရာဝန်တစ်ဦးက ဤသို့သိမှတ်ခဲ့သည်– “သင် (ခွဲစိတ်ကုသဆရာဝန်) သည် သွေးသွင်းခြင်းမပြုနိုင်ဘဲ ခွဲစိတ်ကုသရသောအခါ စွမ်းဆောင်ချက်ပို၍ကောင်းမည်မှာ သံသယမရှိ။ သွေးထွက်သည့်သွေးပြွန်မှန်သမျှကို သွေးထွက်မခံ၊ စိတ်ဇောနှင့်ညှပ်ပိတ်မည်ဖြစ်သည်။”

ခွဲစိတ်ကုသမှုအမျိုးအစားအားလုံးကိုသွေးမသွင်းဘဲ အောင်မြင်စွာပြုလုပ်နိုင်သည်။ နှလုံးခွဲစိတ်ကုသခြင်း၊ ဦးနှောက်ခွဲစိတ်ကုသခြင်း၊ ခြေလက်အင်္ဂါဖြတ်တောက်ခြင်း၊ ကင်ဆာစွဲအင်္ဂါများကို လုံးဝဖြတ်ပယ်ခြင်းများပါဝင်သည်။ နယူးယောက်ပြည်နယ်ဆေးဂျာနယ်၊ (၁၉၇၂၊ အောက်တိုဘာ ၁၅ ရက်ထုတ်၊ စ. ၂၅၂၇) ၌ ဒေါက်တာ ဖစ်လစ်ရိုးအင်း က ဤသို့ရေးသားလိုက်သည်– “သွေးသွင်းခွင့်မရသောအခြေအနေနှင့်ရင်ဆိုင်ရစေကာမူ လိုအပ်သောခွဲစိတ်ကုသမှုကို ဆောင်ရွက်ရန် ကျွန်ုပ်တို့ဝန်မလေးခဲ့ပါ။” တက်ဆပ်ပြည်နယ်နှလုံးသုတေသနဌာနမှ ဒေါက်တာဒင်တင်ခူလီ အောက်ပါအတိုင်းဆို၏– “ယေဟောဝါသက်သေများအပေါ် [သွေးမဲ့သွေးရည်ကြည်ထုထည်ချဲ့ပစ္စည်းများကိုအသုံးပြုရာမှ] ရလာသောအကျိုးရလဒ်များကြောင့် ကျွန်ုပ်တို့အားရဝမ်းသာလှရကား ဤကုထုံးကို ကျွန်ုပ်တို့၏အခြားနှလုံးဝေဒနာရှင်များအပေါ်မှာပင် စတင်အသုံးပြုလာပြီဖြစ်သည်။” (စန်ဒီယေးဂိုးယူနီယံ၊ ၁၉၇၀၊ ဒီဇင်ဘာ ၂၇ ရက်၊ စ. အေ-၁၀) “ယေဟောဝါသက်သေများ၏ဘာသာရေးက သွေးသွင်းခြင်းကိုတားမြစ်သောကြောင့် ‘သွေးမဲ့’ နှလုံးခွဲစိတ်ကုသနည်းသည် နဂိုက သက်သေခံလူကြီးများအဖို့ ကြံဆတီထွင်ခဲ့ခြင်းဖြစ်သည်။ ယခုသော် နို့စို့သူငယ်နှင့်ကလေးများအပေါ် သိမ်မွေ့သောနှလုံးခွဲစိတ်ကုထုံးအဖြစ် စိတ်ချစွာအသုံးပြုလာကြလေပြီ။”​—နှလုံးသွေးကြောဆိုင်ရာသတင်း၊ ၁၉၈၄၊ ဖေဖော်ဝါရီလ၊ စ. ၅။

တစ်စုံတစ်ယောက်က ဤသို့ပြောလျှင်​—

‘ခင်ဗျားတို့က သွေးသွင်းတာကိုလက်မခံတော့ကာ ကိုယ့်ကလေးကို သေရွာပို့တာနဲ့မခြားပါဘူး။ တကယ်ရက်စက်တယ်ဗျာ’

ဤသို့ ပြန်ပြောနိုင်သည်– ‘ကျွန်တော်တို့သွေးမသွင်းပေမဲ့ ပိုပြီးစိတ်ချရတဲ့ဆေးသွင်းခွင့်ပေးပါတယ်။ ကျွန်တော်တို့လက်ခံတဲ့သွင်းဆေးတွေဟာ အေအိုင်ဒီအက်စ်၊ အသည်းရောင်နာ၊ ငှက်ဖျား စတဲ့ရောဂါတွေနဲ့ကင်းရှင်းတယ်။ ကျွန်တော်တို့ကလေးအတွက် အကောင်းဆုံးဆေးဝါးကို ကျွန်တော်တို့လိုလားတယ်။ မေတ္တာနဲ့ပြည့်ဝတဲ့ ဘယ်မိဘမဆို ဒီလိုပါပဲ။’ ထို့နောက် ဤသို့ထပ်၍ဆိုနိုင်သည်– (၁) ‘သွေးအထွက်လွန်ခဲ့ရင် အရေးအကြီးဆုံးအချက်က အရည်ထုထည်ကို နဂိုအတိုင်းအတာရောက်အောင်လုပ်ဖို့ပါပဲ။ သွေးထဲမှာ ရေ ၅၀ ရာနှုန်းထက်မက ပါဝင်တယ်ဆိုတာ မိတ်ဆွေအသိပါပဲ။ ပြီးတော့ ဆဲလ်နီ ဆဲလ်ဖြူ စသဖြင့်လည်းပါတယ်။ သွေးအထွက်လွန်တဲ့အခါ ကိုယ်ခန္ဓာကိုယ်နှိုက်က ဆိုင်ရာအင်္ဂါအဖွဲ့ထဲကို သိုလှောင်ထားတဲ့သွေးဆဲလ်တွေ ဒုနဲ့ဒေး သွန်မှောက်ဖြည့်တင်းပါတယ်။ ပြီးတော့ သွေးဆဲလ်သစ်ထုတ်လုပ်ရှိန်ကိုပါ မြှင့်တင်လိုက်တယ်။ ဒါပေမဲ့ အရည်ထုထည်လိုတယ်။ သွေးမဲ့သွေးရည်ကြည်ထုထည်ချဲ့ပစ္စည်းကိုသုံးလို့ရှိရင် လိုတဲ့ထုထည်ကိုရနိုင်တယ်။ ဒီလိုပစ္စည်းကို ကျွန်တော်တို့လက်ခံပါတယ်။’ (၂) ‘လူထောင်သောင်းနဲ့ချီပြီး သွေးရည်ကြည်ထုထည်ချဲ့ပစ္စည်းတွေအသုံးပြုလို့ ထူးထူးကဲကဲအကျိုးရရှိခဲ့ကြပါပြီ။’ (၃) ကျွန်တော်တို့အတွက် ပိုအရေးကြီးတာက တမန်တော် ၁၅:၂၈၊ ၂၉ မှာပြောတဲ့ကျမ်းစကားဖြစ်တယ်။’

သို့မဟုတ် ဤသို့ဆိုနိုင်သည်– ‘မိတ်ဆွေဘာကြောင့်ခုလိုပြောရသလဲဆိုတာကို ကျွန်တော်သဘောပေါက်နိုင်ပါတယ်။ ‘ငါ့ကလေးသာ ဒီအဖြစ်မျိုးရောက်နေရင်’ ဆိုပြီးတွေးမိလို့ဖြစ်မှာပဲ။ ကျွန်တော်တို့ဟာ မိဘများအနေနဲ့ ကိုယ့်ကလေးကျန်းမာချမ်းသာဖို့ အတတ်နိုင်ဆုံးကာကွယ်စောင့်ရှောက်ကြမှာပါ။ ဟုတ်တယ်မဟုတ်လား။ ဒီတော့ ခင်ဗျားလို၊ ကျွန်တော်လိုလူတစ်ယောက်က ဆေးဝါးကုထုံးတစ်မျိုးမျိုးကို လက်မခံဘူးဆိုရင် ခိုင်လုံတဲ့အကြောင်းရှိလို့ဖြစ်ရမယ်။’ ထို့နောက် ဆက်လက်၍– (၁) ‘တချို့သောမိဘများဟာ ဒီက တမန်တော် ၁၅:၂၈၊ ၂၉ မှာဆိုထားတဲ့ ဘုရားသခင့်နှုတ်ကပါဌ်တော်ရဲ့သြဇာလွှမ်းမိုးခြင်း ခံရလို့ကောမဖြစ်နိုင်ဘူးလား။’ (၂) ‘ဒါကြောင့် အရေးကြီးတဲ့အချက်က ဘုရားသခင့်ပညတ်အတိုင်း လုပ်ကိုင်နိုင်လောက်အောင် ကျွန်တော်တို့မှာ ယုံကြည်ခြင်းရှိသလားဆိုတာပဲ။

‘ခင်ဗျားတို့ သွေးသွင်းတာကိုလက်မခံကြဘူး’

ဤသို့ပြန်ပြောနိုင်သည်– ‘သတင်းစာတွေထဲမှာ သက်သေခံတွေသွေးမသွင်းရင် သေနိုင်တယ်လို့ လူတွေထင်တဲ့အခြေအနေအကြောင်း ရေးသားဖြန့်ချိခဲ့ဖူးတယ်။ ဒီလိုသတင်းနဲ့ပတ်သက်လို့ မိတ်ဆွေပြောနေတာလား။ . . . ဘာကြောင့် ကျွန်တော်တို့မှာ ဒီလိုရပ်တည်ချက်ရှိသလဲသိလား။ ထို့နောက် ဤသို့ထပ်၍ဆိုနိုင်သည်– (၁) ‘ခင်ဗျားရဲ့ခင်ပွန်းကိုခင်ဗျား အသက်စွန့်ဖို့အသင့်ရှိတဲ့အထိချစ်ပါသလား။ . . . ကိုယ့်နိုင်ငံအတွက် အသက်စွန့်တဲ့လူတွေလဲရှိသေးတယ်။ သူတို့ကို လူတွေက သူရဲကောင်းလို့သဘောထားကြတယ်။ ဟုတ်တယ်မဟုတ်လား။ ဒါပေမဲ့ ကမ္ဘာပေါ်ရှိရှိသမျှလူ၊ ရှိသမျှအရာထက် ပိုပြီးကြီးမြတ်တဲ့ပုဂ္ဂိုလ်တစ်ဦးရှိတယ်။ သူဟာ ဘုရားသခင်ပါပဲ။ မိတ်ဆွေက သူ့ကိုချစ်လို့၊ သူ့အုပ်စိုးမှုပေါ်သစ္စာရှိလို့ ကိုယ့်အသက်ကိုစွန့်မလား။’ (၂) ‘အမှန်မှာ ဒါဟာ ဘုရားသခင်ပေါ် သစ္စာစောင့်မစောင့်ဆိုတဲ့ကိစ္စဖြစ်တယ်။ ဘုရားသခင်ရဲ့နှုတ်ကပါဌ်တော်ကပဲ ကျွန်တော်တို့ကိုသွေးကိုရှောင်ကြဉ်ဖို့ပညတ်ခြင်းဖြစ်တယ်။ (တ. ၁၅:၂၈၊ ၂၉)’

သို့မဟုတ် ဤသို့ဆိုနိုင်သည်– ‘ယေဟောဝါသက်သေများရှောင်ကြဉ်ကြတဲ့အရာတွေ တော်တော်များများဟာ ဒီကနေ့လူတွေအဖို့ ထမင်းစားရေသောက်သလိုရိုးနေပါတယ်။ ဥပမာ၊ လိမ်လည်ခြင်း၊ ခင်ပွန်းရှိသူနှင့် (ရှိလျက်နှင့်) ဖောက်ပြန်မှု၊ ခိုးမှု၊ ဆေးလိပ်သောက်ခြင်း၊ ပြီးတော့ မိတ်ဆွေပြောတဲ့ သွေးကိုသုံးခြင်းဖြစ်တယ်။ ဘာကြောင့် ကျွန်တော်တို့ဒါတွေကိုရှောင်သလဲ။ ဘုရားသခင်ရဲ့နှုတ်ကပါဌ်တော်ကွပ်ကဲမှုကို ကျွန်တော်တို့ခံယူတဲ့အတွက်ကြောင့်ပါပဲ။ ထို့နောက် ဤသို့ထပ်၍ဆိုနိုင်သည်– (၁) ‘ကျမ်းစာက ‘သွေးကိုရှောင်ရမည်’ လို့ပြောထားတာ မိတ်ဆွေသိပါသလား။ ကျွန်တော်ထောက်ပြပါရစေ။ (တ. ၁၅:၂၈၊ ၂၉)’ (၂) ဘုရားသခင်က ကျွန်တော်တို့ရဲ့ပထမမိဘနှစ်ပါးအာဒံနဲ့ဧဝတို့ကို ဧဒင်ဥယျာဉ်ထဲကသစ်ပင်တစ်ပင်ကလွဲလို့ ကျန်တဲ့အပင်အားလုံးရဲ့အသီးကိုစားနိုင်တယ်လို့မိန့်မှာခဲ့တယ်ဆိုတာ မိတ်ဆွေသတိရရင်ရမှာပါ။ ဒါပေမဲ့သူတို့နာမခံဘဲ တားမြစ်တဲ့အသီးကိုစားခဲ့ကြလို့ ရှိရှိသမျှဆုံးရှုံးခဲ့ရတယ်။ ဘယ်လောက်မိုက်သလဲ။ ကျွန်တော်တို့အချိန်မှာ မစားရတဲ့အသီးဆိုတာတော့မရှိဘူးပေါ့။ ဒါပေမဲ့ နောဧလက်ထက်ရေလွှမ်းမိုးခြင်းနောက်မှာ ဘုရားသခင်က လူကိုတားမြစ်ချက်တစ်ရပ် ပြဋ္ဌာန်းလိုက်ပြန်တယ်။ ဒီတစ်ခါ သွေးနဲ့ပတ်သက်တယ်။ (က. ၉:၃၊ ၄)’ (၃) ‘ဒါကြောင့် အဓိကကိစ္စက ဘုရားသခင်ပေါ် ကျွန်တော်တို့သစ္စာရှိသလားဆိုတာပဲ။ ဘုရားသခင်ကို ကျွန်တော်တို့နာခံရင် သူ့နိုင်ငံတော်အောက်မှာ စုံလင်တဲ့ထာဝရအသက်ကိုခံစားနိုင်တဲ့ အနာဂတ်ရှိမယ်။ ကျွန်တော်တို့သေရင်တောင်မှ ရှင်ပြန်ထမြောက်နိုင်တယ်လို့အာမခံတော်မူတယ်။’

‘ဆရာဝန်က “ခင်ဗျားသွေးမသွင်းရင်သေလိမ့်မယ်” ဆိုပြီးပြောလို့ ရှိရင် ဘယ်လိုလုပ်မလဲ’

ဤသို့ ပြန်ပြောနိုင်သည်– ‘အခြေအနေဒီလောက်တောင်စိုးရိမ်ရလို့ရှိရင် ဆရာဝန်အနေနဲ့ လူနာကိုသွေးသွင်းရင်မသေဘူးလို့အာမခံချက်ပေးနိုင်မလား။’ ထို့နောက် ဤသို့ထပ်၍ဆိုနိုင်သည်– (၁) ‘အသက်ကိုပြန်ပေးနိုင်တဲ့အရှင်တစ်ပါးရှိပါတယ်။ ဘုရားသခင်ပါပဲ။ သေခြင်းနဲ့ရင်ဆိုင်နေရတဲ့အချိန်မှာ ဘုရားသခင်ရဲ့ပညတ်ကိုချိုးဖောက်ပြီး ကိုယ်တော်ကို ကျောခိုင်းခြင်းဟာမဟာအမှားလို့ မိတ်ဆွေမထင်ဘူးလား။ ကျွန်တော် ဘုရားသခင်ပေါ်မှာ တကယ်ယုံကြည်ခြင်းရှိတယ်။ မိတ်ဆွေကော။ သားတော်ကိုယုံကြည်တဲ့လူတွေရှင်ပြန်ထမြောက်လာမယ်ဆိုပြီး ဘုရားသခင်ရဲ့နှုတ်ကပါဌ်တော်က ကတိပြုတယ်။ မိတ်ဆွေယုံသလား။ (ယော. ၁၁:၂၅)’

သို့မဟုတ် ဤသို့ဆိုနိုင်သည်– ‘သွေးမသွင်းရရင် သူမကုတတ်ဘူးဆိုတာလဲဖြစ်ချင်ဖြစ်မယ်။ ဖြစ်နိုင်လို့ရှိရင် ဒီဆရာဝန်ကို လိုအပ်တဲ့အတွေ့အကြုံရှိတဲ့တခြားဆရာဝန်တစ်ယောက်နဲ့ ဆက်သွယ်ပေးဖို့ကျွန်တော်တို့ကြိုးစားပါတယ်။ ဒါမှမဟုတ်၊ တခြားဆရာဝန်ရဲ့ကုသမှုကို ကျွန်တော်တို့ခံယူပါတယ်။