‘ဘုရားသခင်နဲ့ စပ်ဆိုင်ရာများကို စိတ်စွဲလမ်းခြင်းက အသက်ရှင်ခြင်းနဲ့ ငြိမ်သက်ခြင်းဖြစ်’

၁၊ ၂။ ရောမအခန်းကြီး ၈ ကို ဘိသိက်ခံ ခရစ်ယာန်တွေ ဘာကြောင့် အထူး စိတ်ဝင်စားကြသလဲ။

ယေရှုရဲ့ သေခြင်း အောက်မေ့ရာပွဲကာလမှာ ရောမ ၈:၁၅-၁၇ ကို သင်ဖတ်ဖူးပါလိမ့်မယ်။ ဘိသိက်ခံဖြစ်မှန်း ခရစ်ယာန်တွေ ဘယ်လို သိနိုင်သလဲဆိုတာ အဲဒီကျမ်းပိုဒ်မှာ ရှင်းပြထားတယ်။ စွမ်းအားတော်က သူတို့ရဲ့ စိတ်နဲ့အတူ သက်သေခံတယ်။“အခန်းငယ်တစ်မှာခရစ်တော်ယေရှုနှင့် တစည်းတလုံးတည်း ရှိသူတို့” အကြောင်း ဖော်ပြထားတယ်။ ဒါပေမဲ့ ရောမအခန်းကြီး ၈ ဟာ ဘိသိက်ခံတွေနဲ့ပဲ သက်ဆိုင်သလား။ မြေကြီးပေါ် ထာဝစဉ် အသက်ရှင်ဖို့ မျှော်လင့်သူတွေနဲ့ကော သက်ဆိုင်သလား။

^၂ အဲဒီအခန်းကြီးမှာ ဘိသိက်ခံ ခရစ်ယာန်တွေကို အဓိက ဦးတည်ထားတယ်။ သူတို့ဟာ “ခန္ဓာကိုယ် ရွေးနုတ်ခြင်းချမ်းသာကို တောင့်တစောင့်မျှော်နေ” သူတွေအဖြစ် “စွမ်းအားတော်” ရရှိကြတယ်။ (ရော. ၈:၂၃) သူတို့ရဲ့ အနာဂတ်မျှော်လင့်ချက်က ကောင်းကင်မှာ ဘုရားသခင့် သားတွေ ဖြစ်လာဖို့ပဲ။ နှစ်ခြင်းခံပြီးတဲ့နောက် ရွေးနုတ်ဖိုးကို အခြေခံကာ အပြစ်တွေကို ဘုရားသခင် ခွင့်လွှတ်ပေးခဲ့ပြီး ဖြောင့်မတ်ကြောင်း ကြေညာတဲ့အတွက် ဘုရားသားတွေ ဖြစ်နိုင်ကြတယ်။—ရော. ၃:၂၃-၂၆။ ၄:၂၅။ ၈:၃၀။

၃။ ရောမအခန်းကြီး ၈ ကို မြေကြီး မျှော်လင့်ချက် ရှိသူတွေလည်း စိတ်ဝင်စားသင့်တယ်လို့ ဘာကြောင့် ပြောနိုင်သလဲ။

^၃ ရောမ အခန်းကြီး ၈ ကို မြေကြီး မျှော်လင့်ချက် ရှိသူတွေလည်း စိတ်ဝင်စားကြတယ်။ သူတို့ကို ဖြောင့်မတ်သူတွေအဖြစ် ဘုရားသခင် ရှုမြင်လို့ပဲ။ ဒီကျမ်းစောင်ရဲ့ အစပိုင်း အခန်းကြီးမှာ ဒီအကြောင်း ပေါလု ရေးသားခဲ့တယ်။အခန်းကြီး ၄မှာ အာဗြဟံအကြောင်း ဖော်ပြထားတယ်။ ဒီသစ္စာရှိသူဟာ အစ္စရေးတွေကို ယေဟောဝါ ပညတ်တရား မပေးခင်၊ ကျွန်တော်တို့ရဲ့ အပြစ်တွေအတွက် ယေရှု မသေဆုံးခင်မှာ အသက်ရှင်ခဲ့သူ ဖြစ်တယ်။ သူ့ရဲ့ ထူးခြားတဲ့ ယုံကြည်ခြင်းကို ယေဟောဝါ အသိအမှတ်ပြုပြီး ဖြောင့်မတ်သူအဖြစ် ယူမှတ်ခဲ့တယ်။ (ရောမ ၄:၂၀–၂၂ ကိုဖတ်ပါ။) မြေကြီးပေါ် ထာဝစဉ် အသက်ရှင်ဖို့ မျှော်လင့်နေတဲ့ ဒီနေ့ခေတ် သစ္စာရှိ ခရစ်ယာန်တွေကိုလည်း ဖြောင့်မတ်သူအဖြစ် ယေဟောဝါ ယူမှတ်နိုင်ပါတယ်။ ရောမ အခန်းကြီး ၈ မှာပါတဲ့ အကြံပြုချက်ကနေ သူတို့လည်း အကျိုးရရှိနိုင်ပါတယ်။

၄။ ရောမ ၈:၂၁ ကိုဖတ်ပြီး ဘယ်မေးခွန်း မေးသင့်သလဲ။

^၄ ရောမ ၈:၂၁ မှာ ကမ္ဘာသစ် တကယ် ဖြစ်လာမယ်ဆိုတဲ့ အာမခံချက် ပါတယ်။ “ဖန်ဆင်းခံအရာများသည် ဖောက်ပြန်ပျက်စီးခြင်း အနှောင်အဖွဲ့မှ လွတ်မြောက်၍ ဘုရားသခင့် သားသမီးတို့၏ လွတ်လပ်မှု ဘုန်းအသရေကို ခံစားရလိမ့်မည်” လို့ ကတိပေးထားတယ်။ မေးစရာက ကျွန်တော်တို့ အဲဒီမှာ ရှိနေမလား၊ အဲဒီဆုကို ရမလား ဆိုတာပဲ။ ရမယ်လို့ သင်ယုံကြည်စိတ်ချရဲ့လား။ ရောမ အခန်းကြီး ၈ က ကူညီပေးနိုင်ပါတယ်။

“လူ့ဇာတိနှင့်ဆိုင်သော အရာများကို စိတ်စွဲလမ်းခြင်း”

၅။ ရောမ ၈:၄-၁၃ မှာ ဘယ်အရေးကြီးကိစ္စကို ပေါလု ဖော်ပြခဲ့သလဲ။

^၅ ရောမ ၈:၄–၁၃ ကိုဖတ်ပါ။ ရောမအခန်းကြီး ၈ မှာ “လူ့ဇာတိအတိုင်း” လိုက်လျှောက်သူနဲ့ “စွမ်းအားတော်အတိုင်း” လိုက်လျှောက်သူအကြောင်း ခွဲခြားဖော်ပြထားတယ်။ အမှန်တရား သိသူနဲ့ မသိသူ၊ ခရစ်ယာန် ဟုတ်သူနဲ့ မဟုတ်သူကို ခွဲခြားဖော်ပြထားတာလို့ တချို့ယူဆကြမယ်။ တကယ်တော့ “ဘုရားသခင် ချစ်တော်မူ၍ သန့်ရှင်းသူများဟု ခေါ်ဆိုခြင်းခံရသော ရောမမြို့တွင် ရှိသူအပေါင်းတို့ထံ” ပေါလု ရေးသားနေတာပါ။ (ရော. ၁:၇) ဒါကြောင့် “လူ့ဇာတိအတိုင်း” လိုက်လျှောက်နေတဲ့ ခရစ်ယာန်တွေနဲ့ “စွမ်းအားတော်အတိုင်း” လိုက်လျှောက်တဲ့ ခရစ်ယာန်တွေကို ပေါလု ခွဲခြားဖော်ပြနေတာ ဖြစ်တယ်။ ကွာခြားချက်က ဘာလဲ။

၆၊ ၇။ (က) ကျမ်းစာမှာ “လူ့ဇာတိ” ဆိုတဲ့ စကားလုံးကို ဘယ်လို သုံးနှုန်းထားသလဲ။ (ခ) ရောမ ၈:၄-၁၃ မှာ “လူ့ဇာတိ” ဆိုတဲ့ စကားလုံးကို ဘယ်သဘောနဲ့ ပေါလု သုံးနှုန်းခဲ့သလဲ။

^၆ “လူ့ဇာတိ” ဆိုတဲ့ စကားလုံးကို အရင် သုံးသပ်ကြည့်ပါ။ ပေါလု ဘာကို ဆိုလိုသလဲ။ ကျမ်းစာမှာ “လူ့ဇာတိ” ကို အမျိုးမျိုး အသုံးပြုထားတယ်။ တစ်ခါတလေ ပကတိ သွေးသားခန္ဓာကိုယ်ကို ရည်ညွှန်းတယ်။ (ရော. ၂:၂၈။ ၁ ကော. ၁၅:၃၉၊ ၅၀) ဆွေမျိုးသားချင်းကိုလည်း ရည်ညွှန်းနိုင်တယ်။ ယေရှုဟာ “လူ့ဇာတိအားဖြင့် ဒါဝိဒ်မျိုးနွယ်မှ ဆင်းသက်လာ” သူ ဖြစ်တယ်။ ဂျူးတွေဟာ ‘လူ့ဇာတိအားဖြင့် ဆွေမျိုးသားချင်း’ တွေ ဖြစ်တယ်လို့ ပေါလု ပြောခဲ့တယ်။—ရော. ၁:၃။ ၉:၃။

^၇ ရောမ ၈:၄-၁၃ မှာပါတဲ့ “လူ့ဇာတိ” က ဘာကို ဆိုလိုကြောင်းရောမအခန်းကြီး ၇ပါ ပေါလုရဲ့ စကားကနေ သိရှိနိုင်တယ်။ “လူ့ဇာတိသဘောအတိုင်း အသက်ရှင်” ခြင်းကို “ကိုယ်အင်္ဂါများ၌ ထကြွ” နေတဲ့ “အပြစ်ပြုလိုစိတ်” နဲ့ ဆက်စပ်ခဲ့တယ်။ (ရော. ၇:၅) အဲဒါက “လူ့ဇာတိနှင့်ဆိုင်သော အရာများကို စိတ်စွဲလမ်း” တဲ့ “လူ့ဇာတိသဘောရှိသူ” ဆိုတဲ့ အသုံးအနှုန်းရဲ့ အဓိပ္ပာယ်ကို နားလည်စေတယ်။ မစုံလင်တဲ့ လူသားတွေအဖြစ် ကိုယ့်ဆန္ဒနဲ့ အာသီသတွေကို ဦးစားပေးသူတွေကို ပေါလု ရည်ညွှန်းတယ်။ အဓိကအားဖြင့် လိင်ကိစ္စမှာဖြစ်စေ၊ တခြားကိစ္စတွေမှာဖြစ်စေ ကိုယ့်ဆန္ဒ၊ လိုအင်၊ ရမ္မက်နောက် လိုက်နေသူတွေ ဖြစ်တယ်။

၈။ “လူ့ဇာတိအတိုင်း” လိုက်လျှောက်ခြင်းနဲ့ပတ်သက်ပြီး ဘိသိက်ခံ ခရစ်ယာန်တွေကို ပေါလု သတိပေးဖို့ ဘာကြောင့် လိုအပ်ခဲ့သလဲ။

^၈ “လူ့ဇာတိအတိုင်း” အသက်ရှင်ခြင်းရဲ့ အန္တရာယ်အကြောင်း ဘိသိက်ခံ ခရစ်ယာန်တွေကို ပေါလု ဘာကြောင့် သတိပေးခဲ့သလဲ။ မိတ်ဆွေအဖြစ်၊ ဖြောင့်မတ်သူအဖြစ် ဘုရားသခင် သတ်မှတ်ထားတဲ့ ယနေ့ခေတ် ခရစ်ယာန်တွေလည်း အဲဒီအန္တရာယ်ထဲ ကျရောက်နိုင်သလား။ ဘယ်ခရစ်ယာန်မဆို အပြစ်ရှိတဲ့ လူ့ဇာတိအတိုင်း စတင်လိုက်လျှောက်မိနိုင်တယ်။ ဥပမာ၊ ရောမမြို့မှာရှိတဲ့ ညီအစ်ကိုတချို့ဟာ မိမိတို့ရဲ့ ဆန္ဒအာသီသကို အစေခံတဲ့သူတွေ ဖြစ်ခဲ့တယ်လို့ ပေါလု ပြောတယ်။ အဲဒါက လိင်ဆန္ဒအာသီသဖြစ်နိုင်သလို အစားအသောက်နဲ့ တခြားဆန္ဒအာသီသတွေလည်း ဖြစ်နိုင်တယ်။ တချို့ကျတော့ ‘ရိုးသားသောသူတို့ကို ဖြားယောင်းကြ’ တယ်။ (ရော. ၁၆:၁၇၊ ၁၈။ ဖိ. ၃:၁၈၊ ၁၉။ ယု. ၄၊ ၈၊ ၁၂) ကောရိန္သုမြို့မှာရှိတဲ့ ညီအစ်ကို တစ်ယောက်လည်း ခဏတာ “အဖ၏မယားနှင့် ပေါင်းသင်းနေထိုင်” ခဲ့တယ်။ (၁ ကော. ၅:၁) ဒါကြောင့် “လူ့ဇာတိနှင့်ဆိုင်သော အရာများကို စိတ်စွဲလမ်း” ခြင်းအကြောင်း ခရစ်ယာန်တွေကို သတိပေးဖို့ ပေါလုကို ဘုရားသခင် အသုံးပြုခဲ့တယ်။—ရော. ၈:၅၊ ၆။

၉။ ရောမ ၈:၆ မှာပါတဲ့ သတိပေးချက်ဟာ ဘာကို မဆိုလိုသလဲ။

^၉ အဲဒီသတိပေးချက်ဟာ ဒီနေ့ခေတ်နဲ့လည်း သက်ဆိုင်ပါတယ်။ ခရစ်ယာန်တစ်ယောက်ဟာ ဘုရားသခင်ကို နှစ်ပေါင်းများစွာ အမှုဆောင်ပြီးတာတောင်မှ လူ့ဇာတိနဲ့ဆိုင်တဲ့အရာတွေကို စတင် စိတ်စွဲလမ်းလာနိုင်တယ်။ အဲဒါက အစားအစာ၊ အလုပ်အကိုင်၊ အပန်းဖြေမှု၊ အချစ်ရေးအချစ်ရာအကြောင်း တစ်ခါတလေမှ စဉ်းစားတဲ့ ခရစ်ယာန်တစ်ယောက်ကို ဆိုလိုတာ မဟုတ်ဘူး။ အဲဒါတွေဟာ ဘဝရဲ့ သာမန်ကိစ္စတွေပါပဲ။ ယေရှုလည်း အစာစားတယ်။ တခြားသူတွေကို ကျွေးမွေးတယ်။ အနားယူဖို့ လိုအပ်မှန်း သိတယ်။ အိမ်ထောင်ရေးမှာ လိင်ကိစ္စရဲ့ အရေးကြီးမှုကိုလည်း ပေါလု ရေးခဲ့တယ်။

၁၀။ ရောမ ၈:၅၊ ၆ မှာပါတဲ့ “စိတ်စွဲလမ်းခြင်း” ဆိုတဲ့ အသုံးအနှုန်းက ဘာကို ဆိုလိုသလဲ။

^၁၀ ဒါဆိုရင် “လူ့ဇာတိနှင့်ဆိုင်သောအရာများကို စိတ်စွဲလမ်းခြင်း” က ဘာကို ဆိုလိုသလဲ။ ပေါလု အသုံးပြုခဲ့တဲ့ ဂရိစကားလုံးဟာ “တစ်ခုခုအပေါ် စိတ်စွဲလမ်းခြင်း၊ ရည်ရွယ်ချက်ရှိရှိ အကွက်ကျကျ စီစဉ်ခြင်း” ကို ဆိုလိုတယ်။ လူ့ဇာတိအတိုင်း အသက်ရှင်သူတွေဟာ အပြစ်ရှိတဲ့ လူ့သဘာဝအတိုင်း နေထိုင်ဖို့ ဆုံးဖြတ်ထားသူတွေ ဖြစ်တယ်။ ရောမ ၈:၅ မှာပါတဲ့ အဲဒီစကားလုံးနဲ့ပတ်သက်ပြီး ကျမ်းပညာရှင်တစ်ယောက်က “လူ့ဇာတိနဲ့ဆိုင်တဲ့ ကိစ္စတွေကို အထူးစိတ်ဝင်စားပြီး အဲဒါတွေအကြောင်း တစ်ချိန်လုံး အမွှမ်းတင် ပြောဆိုခြင်း ဖြစ်တယ်” လို့ပြောတယ်။

၁၁။ ဘဝမှာ ဘာတွေကို အဓိက ထားမိနိုင်သလဲ။

^၁၁ ရောမမြို့က ခရစ်ယာန်တွေဟာ ဘဝမှာ အဓိကထားရာတွေကို ပြန်ဆန်းစစ်သင့်တယ်။ “လူ့ဇာတိနှင့်ဆိုင်သော အရာများ” ကို သူတို့ အဓိက ထားခဲ့တာ ဖြစ်နိုင်တယ်။ ကျွန်တော်တို့လည်း ဘဝမှာ အဓိက ထားတဲ့အရာတွေကို ပြန်ဆန်းစစ်သင့်တယ်။ ဘာကို စိတ်အဝင်စားဆုံးလဲ။ ဘာအကြောင်းကိုပဲ အမြဲ ပြောသလဲ။ တစ်နေ့တစ်နေ့ ဘာတွေကိုပဲ လုပ်နေသလဲ။ တချို့က ဝိုင်အမျိုးမျိုး စမ်းသောက်တာ၊ အိမ်အလှဆင်တာ၊ အဝတ်အစား ပုံစံသစ်တွေ ရှာတာ၊ ရင်းနှီးမြှုပ်နှံတာ၊ အပန်းဖြေခရီး ထွက်ဖို့ စီစဉ်တာ စတာတွေကိုပဲ အဓိကထားနေမှန်း တွေ့ရှိလာနိုင်တယ်။ အဲဒါတွေဟာ မမှားပါဘူး။ သာမန်ကိစ္စတွေပါပဲ။ တစ်ခါတုန်းက ယေရှုလည်း စပျစ်ဝိုင် လုပ်ပေးခဲ့ဖူးတယ်။ “စပျစ်ဝိုင် အနည်းငယ်” သောက်ဖို့ တိမောသေကို ပေါလု အကြံပေးခဲ့တယ်။ (၁ တိ. ၅:၂၃။ ယော. ၂:၃-၁၁) ဒါပေမဲ့ ယေရှုနဲ့ ပေါလုဟာ စပျစ်ဝိုင်အကြောင်းပဲ “တစ်ချိန်လုံး အမွှမ်းတင် ပြောဆို” ခဲ့သလား။ မပြောခဲ့ပါဘူး။ ကျွန်တော်တို့ကော။ ဘဝမှာ ဘာကို စိတ်အဝင်စားဆုံးလဲ။

၁၂၊ ၁၃။ ကိုယ်စိတ်စွဲလမ်းတဲ့အရာကို ဘာကြောင့် သတိပြုသင့်သလဲ။

^၁၂ ကိုယ့်ကိုယ်ကိုယ် ဆန်းစစ်ဖို့ အရေးကြီးတယ်။ ဘာကြောင့်လဲဆိုတော့ “လူ့ဇာတိနှင့်ဆိုင်သောအရာများကို စိတ်စွဲလမ်းခြင်းသည် သေခြင်းဖြစ်၏” လို့ပေါလု ရေးခဲ့လို့ပဲ။ (ရော. ၈:၆) လောလောဆယ် ယေဟောဝါနဲ့ ဆက်ဆံရေး ပြတ်တောက်ပြီး အနာဂတ်မှာ အသက်ဆုံးရှုံးနိုင်တဲ့အတွက် အရေးကြီးကိစ္စ ဖြစ်တယ်။ ဒါပေမဲ့ “လူ့ဇာတိနှင့်ဆိုင်သောအရာများကို စိတ်စွဲလမ်း” လာရင် သေကို သေရမယ်လို့တော့ ပေါလု မဆိုလိုပါဘူး။ ပြောင်းလဲနိုင်ပါတယ်။ “လူ့ဇာတိ” နောက်လိုက်လို့ နှင်ထုတ်ခံခဲ့ရတဲ့ ကောရိန္သုမြို့က အကျင့်ပျက်သူအကြောင်း စဉ်းစားကြည့်ပါ။ သူ ပြောင်းလဲနိုင်ခဲ့တယ်။ လူ့ဇာတိအတိုင်း မလိုက်တော့ဘဲ လမ်းမှန်ကို ပြန်လာခဲ့တယ်။—၂ ကော. ၂:၆-၈။

^၁၃ ကောရိန္သုမြို့ကလူ ပြောင်းလဲနိုင်တယ်ဆိုရင် ဒီနေ့ခေတ် ခရစ်ယာန်တွေ၊ အထူးသဖြင့် သူ့လောက် လူ့ဇာတိဆန္ဒနောက် မလိုက်ခဲ့သူတွေလည်း ပြောင်းလဲနိုင်ပါတယ်။ “လူ့ဇာတိနှင့်ဆိုင်သောအရာများကို စိတ်စွဲလမ်း” သူရဲ့ နောက်ဆုံးဖြစ်အင်အကြောင်း ပေါလုရဲ့ သတိပေးချက်က လိုအပ်သလို ပြောင်းလဲဖို့ ခရစ်ယာန်တွေကို လှုံ့ဆော်ပေးသင့်တယ်။

“ဘုရားသခင်နှင့် စပ်ဆိုင်ရာများကို စိတ်စွဲလမ်းခြင်း”

၁၄၊ ၁၅။ (က) “လူ့ဇာတိနှင့်ဆိုင်သော အရာများကို စိတ်စွဲလမ်းခြင်း” ရဲ့ ဆန့်ကျင်ဘက်က ဘာလဲ။ (ခ) “ဘုရားသခင်နှင့်စပ်ဆိုင်ရာများကို စိတ်စွဲလမ်းခြင်း” ဆိုတာ ဘာကို မဆိုလိုသလဲ။

^၁၄ “လူ့ဇာတိနှင့်ဆိုင်သောအရာများကို စိတ်စွဲလမ်းခြင်း” အကြောင်း ပေါလု သတိပေးပြီးတဲ့နောက် “ဘုရားသခင်နှင့် စပ်ဆိုင်ရာများကို စိတ်စွဲလမ်းခြင်းမူကား အသက်ရှင်ခြင်းနှင့် ငြိမ်သက်ခြင်း ဖြစ်၏” လို့ ဆက်ပြောခဲ့တယ်။ သိပ်ကောင်းတဲ့ ရလဒ်တွေပါပဲ။ အဲဒါကို ဘယ်လို ရနိုင်သလဲ။

^၁၅ “ဘုရားသခင်နှင့် စပ်ဆိုင်ရာများကို စိတ်စွဲလမ်းခြင်း” ဆိုတာ လက်တွေ့ဘဝနဲ့ ကင်းကွာနေတာကို မဆိုလိုပါဘူး။ ကျမ်းစာအကြောင်း၊ ယေဟောဝါအကြောင်း၊ အနာဂတ် မျှော်လင့်ချက်အကြောင်း တစ်ချိန်လုံး စဉ်းစားပြောဆိုနေတာကိုလည်း မဆိုလိုပါဘူး။ ဘုရားသခင့် နှစ်သက်မှု ရခဲ့တဲ့ ပေါလုနဲ့ ပထမရာစု ခရစ်ယာန်တွေဟာ သာမန်ဘဝပုံစံနဲ့ပဲ အသက်ရှင်ခဲ့ကြသူတွေပါ။ စားသောက်ကြတယ်။ အိမ်ထောင်သားမွေးပြုကြတယ်။ အလုပ်လုပ်ကြတယ်။—မာ. ၆:၃။ ၁ သက်. ၂:၉။

၁၆။ သာမန်ဘဝကိစ္စတွေကို လုပ်ဆောင်ရင်း ဘာကို ပေါလု အဓိက ထားခဲ့သလဲ။

^၁၆ ဒါပေမဲ့ ပေါလုနဲ့ ပထမရာစု ခရစ်ယာန်တွေဟာ သာမန်ဘဝကိစ္စတွေကို အဓိက မထားခဲ့ကြဘူး။ ပေါလုဟာ တဲရှင်ချုပ်တဲ့အလုပ် လုပ်ပေမဲ့ ဟောပြောခြင်းနဲ့ သွန်သင်ခြင်းကို အဓိကထား လုပ်ဆောင်ခဲ့တယ်လို့ မှတ်တမ်းတွေက ဖော်ပြတယ်။ (တမန်တော် ၁၈:၂–၄ နဲ့ ၂၀:၂၀၊ ၂၁၊ ၃၄၊ ၃၅ တို့ကိုဖတ်ပါ။) ရောမမြို့မှာရှိတဲ့ ညီအစ်ကို/မတွေကိုလည်း အဲဒီလို လုပ်ဖို့ အားပေးခဲ့တယ်။ ပေါလုကို သူတို့ တုပခဲ့သလို ကျွန်တော်တို့လည်း တုပသင့်တယ်။—ရော. ၁၅:၁၅၊ ၁၆။

၁၇။ “ဘုရားသခင်နှင့် စပ်ဆိုင်ရာများကို စိတ်စွဲလမ်း” ရင် ဘယ်လို ဘဝအသက်တာမျိုး ရမလဲ။

^၁၇ ယေဟောဝါရဲ့ အမှုတော်ကို အဓိကထားရင် ဘာရလဒ် ရရှိမလဲ။ “ဘုရားသခင်နှင့်စပ်ဆိုင်ရာများကို စိတ်စွဲလမ်းခြင်းမူကား အသက်ရှင်ခြင်းနှင့် ငြိမ်သက်ခြင်း ဖြစ်၏” လို့ ရောမ ၈:၆ မှာ အဖြေပေးထားတယ်။ ဒါက သန့်ရှင်းသော စွမ်းအားတော်ရဲ့ လွှမ်းမိုးမှုကို ခံယူခြင်း၊ ဘုရားသခင် စဉ်းစားသလို စဉ်းစားခြင်းကို ဆိုလိုတယ်။ “ဘုရားသခင်နှင့် စပ်ဆိုင်ရာများကို” အဓိက ထားခြင်းအားဖြင့် အဓိပ္ပာယ်ရှိတဲ့ ကျေနပ်ဖွယ်ဘဝကို ရရှိပါလိမ့်မယ်။ နောက်ဆုံးရလဒ်ကတော့ ကောင်းကင်မှာဖြစ်စေ၊ မြေကြီးမှာဖြစ်စေ ထာဝရအသက် ရရှိပါလိမ့်မယ်။

၁၈။ “ဘုရားသခင်နှင့် စပ်ဆိုင်ရာများကို စိတ်စွဲလမ်းခြင်း” က ဘယ်လိုနည်းနဲ့ ငြိမ်သက်မှု ရရှိစေသလဲ။

^၁၈ “ဘုရားသခင်နှင့် စပ်ဆိုင်ရာများကို စိတ်စွဲလမ်းခြင်းမူကား . . . ငြိမ်သက်ခြင်း ဖြစ်၏” ဆိုတဲ့ အာမခံချက်အကြောင်း စဉ်းစားကြည့်ကြစို့။ လူများစွာဟာ စိတ်ငြိမ်သက်မှုရဖို့ ကြိုးစားနေကြတယ်။ သူတို့ ရှာနေတဲ့ စိတ်ငြိမ်သက်မှုကို ကျွန်တော်တို့ ခံစားနေရပြီ။ မိသားစုဝင်တွေ၊ ညီအစ်ကို/မတွေနဲ့ သင့်မြတ်နေကြတယ်။ ကိုယ်တိုင်ရော၊ ညီအစ်ကို/မတွေပါ မစုံလင်မှန်း သိထားကြတယ်။ မစုံလင်တဲ့အတွက် ပြဿနာတွေ ပေါ်လာနိုင်ပေမဲ့ “သင်၏ညီအစ်ကိုနှင့် သင့်မြတ်အောင် အရင်ပြုဦးလော့” ဆိုတဲ့ ယေရှုရဲ့ အကြံပြုချက်ကို လိုက်နာကြတယ်။ (မ. ၅:၂၄) “ငြိမ်သက်ခြင်းကို ပေးသနားတော်မူသော ဘုရားသခင်” ကို ညီအစ်ကို/မတွေ ဝတ်ပြုနေမှန်း သတိရခြင်းက ယေရှုရဲ့ အကြံပြုချက်ကို လိုက်နာဖို့ လွယ်ကူစေတယ်။—ရော. ၁၅:၃၃။ ၁၆:၂၀။

၁၉။ ထူးခြားတဲ့ ဘယ်ငြိမ်သက်မှုမျိုး ရရှိနိုင်သလဲ။

^၁၉ တန်ဖိုးမဖြတ်နိုင်တဲ့ ငြိမ်သက်မှုတစ်မျိုး ရှိသေးတယ်။ “ဘုရားသခင်နှင့် စပ်ဆိုင်ရာများကို စိတ်စွဲလမ်း” မယ်ဆိုရင် ဖန်ဆင်းရှင်နဲ့ သင့်မြတ်မယ်။ “စိတ်နှလုံး တည်ကြည်သောသူသည် ကိုယ်တော်၌ ခိုလှုံသောကြောင့် ငြိမ်သက်ခြင်းသက်သက် ရှိမည်အကြောင်း စောင့်ရှောက်တော်မူလိမ့်မည်” ဆိုတဲ့ ဟေရှာယရဲ့ စကားက ဒီနေ့ခေတ်မှာ အကြီးစား ပြည့်စုံနေတယ်။—ဟေရှာ. ၂၆:၃။ ရောမ ၅:၁ ကိုဖတ်ပါ။

၂၀။ ရောမ အခန်းကြီး ၈ မှာပါတဲ့ အကြံပြုချက်အတွက် သင်ဘာကြောင့် ကျေးဇူးတင်သလဲ။

^၂၀ ကျွန်တော်တို့ဟာ ဘိသိက်ခံဖြစ်စေ၊ မြေကြီးမျှော်လင့်ချက်ရှိသူဖြစ်စေ ရောမ အခန်းကြီး ၈ မှာပါတဲ့ အကြံပြုချက်အတွက် ကျေးဇူးတင်ကြတယ်။ ဘဝမှာ “လူ့ဇာတိ” ကို အဓိက မထားဖို့ အားပေးထားတဲ့အတွက် ကျေးဇူးတင်စရာပါပဲ။ “ဘုရားသခင်နှင့် စပ်ဆိုင်ရာများကို စိတ်စွဲလမ်းခြင်းမူကား အသက်ရှင်ခြင်းနှင့် ငြိမ်သက်ခြင်း ဖြစ်၏” ဆိုတဲ့ စကားနဲ့အညီ နေထိုင်ခြင်းဟာ ပညာရှိမှန်း သဘောပေါက်ကြတယ်။ “အပြစ်တရား၏ အခကား သေခြင်းဖြစ်၏။ ဘုရားသခင်၏ ဆုကျေးဇူးတော်ကား ငါတို့၏သခင် ခရစ်တော်ယေရှုအားဖြင့် ထာဝရအသက် ဖြစ်သတည်း” လို့ ပေါလု ပြောခဲ့တဲ့အတွက် ထာဝရအသက် ဆုကျေးဇူး ရရှိပါလိမ့်မယ်။—ရော. ၆:၂၃။