လူအမျိုးအနွယ်

အဓိပ္ပာယ်သတ်မှတ်ချက်– ဤတွင် လူအမျိုးအနွယ်ဟုဆိုရာ၌ သိသာခြားနားသော ကြန်အင်လက္ခဏာစုံ အသီးသီးရှိကြသော လူသားအုပ်စုများကိုဆိုလိုသည်။ ထိုကြန်အင်လက္ခဏာများသည် မျိုးရိုးအလိုက်ဖြစ်၍ လူသားတစ်မျိုးကို အခြားတစ်မျိုးနှင့် ကွဲပြားစေလောက်အောင် ပီပြင်သည်။ သို့တစေ၊ လူတစ်မျိုးနှင့်တစ်မျိုး စုံဖက်၍သားသမီးထွန်းကားနိုင်သည်ဟူသည့်အချက်က လူအမျိုးအနွယ်တို့သည် စင်စစ် တစ် “မျိုး” တည်းသော လူ့မိသားစုအဝင်များဖြစ်ကြကြောင်းကိုပြသည် ဟူသည့်အချက်ကို မှတ်သားအပ်သည်။ သို့ဖြစ်၍ လူမျိုးအဖုံဖုံမှာ လူသားမျိုးနွယ်ဘောင်အတွင်း ရှိနိုင်သော လူမျိုးအနွယ်နွယ်မျှသာဖြစ်သည်။

လူမျိုးအနွယ်နွယ် အဘယ်ကဆင်းသက်လာကြသနည်း

က. ၅:၁၊ ၂၊ သမ; ၁:၂၈– “[ဘုရားသခင်သည်] လူ [အာဒံ] ကိုဖန်ဆင်းတော်မူသောကာလ၌ ပုံသဏ္ဌာန်တော်နှင့်အညီ ဖန်ဆင်း၍ ယောက်ျားနှင့်မိန်းမကိုဖြစ်စေတော်မူ၏။ ဖန်ဆင်းတော်မူသောနေ့၌လည်း သူတို့အားကောင်းချီးပေးလျက် လူ [သို့မဟုတ်လူမျိုး] ဟူ၍ သမုတ်တော်မူ၏။” “အချင်းတို့၊ များပြားစွာမွေးဖွားကြလော့။ မြေကြီးကိုပြည့်စေ၍ နိုင်ကြလော့ . . . ဟု မိန့်တော်မူ၍ သူတို့ကို ကောင်းချီးပေးတော်မူ၏။ (ထို့ကြောင့် လူသားမျိုးနွယ်တစ်ရပ်လုံး ပထမလူသားမောင်နှံ အာဒံနှင့်ဧဝတို့မှ ဆင်းသက်လာကြသည်။)

တ. ၁၇:၂၆၊ သမ္မာ– “ဘုရားသခင်သည် မြေတစ်ပြင်လုံး၌နေရသောလူအမျိုးမျိုးကို [အာဒံ] တစ်ဦးတည်းမှ ဖန်ဆင်းတော်မူ [၏။]” (သို့ဖြစ်၍ မည်သည့်နိုင်ငံက မည်သည့်လူမျိုးများဖြင့် ဖွဲ့စည်းထားစေကာမူ သူတို့အားလုံး အာဒံ၏အနွယ်သာတည်း။)

က. ၉:၁၈၊ ၁၉၊ သမ္မာ– “သင်္ဘောထဲကထွက်ဆင်းသော နောဧသားတို့၏အမည်ကား ရှေမ၊ ဟာမ၊ ယာဖက်တည်း။ . . . ဤသူတို့သည် နောဧ၏သားသုံးယောက်ဖြစ်၏။ ထိုသူတို့မှ မြေကြီးတစ်ပြင်လုံး၌ နှံ့ပြားကြ၏။” (နောဧလက်ထက် ရေလွှမ်းမိုးစေခြင်းဖြင့် ဘုရားတရားမဲ့လောကကို ဘုရားသခင်ဖျက်ဆီးတော်မူပြီးနောက်၌ ယနေ့ရှိသမျှလူမျိုးအနွယ်အားလုံးအပါအဝင် အသစ်သောကမ္ဘာသားတို့သည် နောဧ၏သားသုံးယောက်နှင့် ၎င်းတို့၏မယားများမှ ပေါက်ဖွားလာကြသည်။)

အာဒံနှင့်ဧဝတို့သည် ဒဏ္ဍာရီပုံပြင်ထဲကလူများလော

ဤအယူကိုကျမ်းစာမထောက်ခံချေ။ “အာဒံနှင့်ဧဝ” ဟူသောအဓိကခေါင်းစဉ်ကိုရှု။

ထိုစဉ်အခါ လူသားတစ်အိမ်ထောင်သာရှိခဲ့လျှင် ကာဣနသည် အဘယ်က မိန်းမရခဲ့သနည်း

က. ၃:၂၀– “လူသည် မိမိမယားကို ဧဝအမည်ဖြင့်မှည့်လေ၏။ အကြောင်းမူကား သူသည် အသက်ရှင်သောသူအပေါင်းတို့၏အမိဖြစ် [ရန်] တည်း။” (ထို့ကြောင့် လူသားအားလုံး အာဒံဧဝတို့မှဆင်းသက်လာရန်ဖြစ်၏။)

က. ၅:၃၊ ၄– “အာဒံသည် အသက်တစ်ရာသုံးဆယ်ရှိသော် မိမိပုံသဏ္ဌာန်နှင့် တညီတသဏ္ဌာန်တည်းသားကိုမြင်ရ၍ ရှေသအမည်ဖြင့်မှည့်လေ၏။ ရှေသကိုဖွားမြင်သောနောက် အာဒံသည် အနှစ်ရှစ်ရာအသက်ရှင်၍ သားသမီးများကိုမြင်လေ၏။” (အာဒံ့သားတစ်ယောက်အမည်မှာ ကာဣနဖြစ်၍ အာဒံ့သမီးများထဲမှတစ်ယောက်က သူ၏မယားဖြစ်လာခြင်းဖြစ်ရပေမည်။ လူ့သမိုင်း၏ထိုအချိန်ပိုင်းရှိလူတို့၏သက်တမ်းကိုထောက်လျှင် ထိုခေတ်ကလူတို့သည် သိသိသာသာ ကျန်းမာသန်စွမ်းကြသေးသည်ဖြစ်ရာ မျိုးနီးချင်းစုံဖက်မှုကြောင့် အင်္ဂါချို့တဲ့သောသားသမီးများမွေးဖွားသည့်အလားအလာ မများချေ။ သို့ရာတွင် လူ့သမိုင်း၏နှစ်ပေါင်း ၂,၅၀၀ ကျော်လွန်သည့်နောက် လူသားမျိုးနွယ်၏ကာယအခြေအနေသည် များစွာယိုယွင်းပျက်စီးလာပြီဖြစ်သဖြင့် ယေဟောဝါက သွေးရင်းစပ်ယှက်မှုမပြုရန် တားမြစ်သောပညတ်ကို ဣသရေလလူတို့အား ပေးတော်မူလေ၏။)

က. ၄:၁၆၊ ၁၇– “ကာဣနသည် ထာဝရဘုရားထံတော်မှထွက်သွား၍ ဧဒင်ပြည်အရှေ့ နောဒပြည်တွင်နေလေ၏။ ထိုအခါ ကာဣနသည် မိမိမယားနှင့်ဆက်ဆံသဖြင့်၊ သူသည် ပဋိသန္ဓေစွဲယူ၍ သားဧနောက်ကိုဖွားမြင်လေ၏။” (ကာဣန၏မယားသည် နောက်တစ်အိမ်ထောင်မှလာဘိသကဲ့သို့ ကာဣနသည် တိမ်းရှောင်ရာဒေသ၌ သူ့ကိုပထမအကြိမ် တွေ့ ခဲ့ခြင်းမဟုတ်ကြောင်း သတိပြုပါ။ ထိုဒေသ၌ သူမနှင့်ဆက်ဆံ၍ သားတစ်ယောက်မွေးခြင်းဖြစ်သည်။)

အဘယ်အချက်က လူအမျိုးအနွယ်တို့၏သီးခြားသောကြန်အင်လက္ခဏာများဖြစ်ပေါ်လာပုံကိုရှင်းပြသနည်း

“ယနေ့အသက်ရှင်နေသမျှလူတို့သည် တစ်မျိုးတည်းသောမျိုးစိတ်ဖြစ်သည့် ဟိုမိုဆေပီယန်လူ ဖြစ်၍ လူမျိုးကြီးတစ်မျိုးတည်းမှ ပေါက်ဖွားလာကြသည်။ . . . လူသားချင်း ဇီဝခြားနားချက်ရှိရခြင်းမှာ မျိုးရိုးဗီဇဖွဲ့စည်းပုံခြားနားချက်ကြောင့်လည်းကောင်း၊ ဤမျိုးရိုးအလားအလာပေါ်သက်ရောက်သော ပတ်ဝန်းကျင်သြဇာကြောင့်လည်းကောင်း ဖြစ်သည်။ များသောအားဖြင့် အထက်ပါအကြောင်းရင်းနှစ်ရပ်၏ အပြန်အလှန်အကျိုးသက်ရောက်မှုကြောင့် ကွဲပြားရခြင်းဖြစ်သည်။ . . . လူမျိုး သို့မဟုတ် နိုင်ငံဒေသတူသူတို့အနက် လူချင်းခြားနားချက်သည် အများအားဖြင့် လူမျိုး သို့မဟုတ် နိုင်ငံဒေသသား တစ်မျိုးနှင့်တစ်မျိုးစပ်ကြား ပျမ်းမျှခြားနားချက်ထက် သာ၍ကြီးမားလေ့ရှိသည်။”​—ယူနက်စကိုဆင့်ခေါ်သော နိုင်ငံတကာဆိုင်ရာသိပ္ပံပညာရှင်များအဖွဲ့ညီလာခံ၊ Statement on Race (လူမျိုးရေးဆိုင်ရာ ထုတ်ဖော်ကြေညာချက်) ၌ ကိုးကားထားသည်။ (နယူးယောက် ၁၉၇၂၊ တတိယအကြိမ်)၊ အက်ရှလီမွန်တဂူ၊ စစ. ၁၄၉၊ ၁၅၀။

“လူမျိုးတစ်မျိုးဟူသည် လူသားများ ကနဦးအချိန်၌ ဒေသအနှံ့အပြားသို့ပျံ့နှံ့စဉ်နှင့် ပျံ့နှံ့သည့်နောက်ပိုင်း ကွဲပြား၍ အတန်အရာ တသီးတခြားစီဖြစ်သွားသည့် မျိုးရိုးဗီဇစုတစ်ခုသာဖြစ်သည်။ ကမ္ဘာ့တိုက်ကြီးငါးတိုက်ရှိရာ၊ အကြမ်းအားဖြင့် တစ်တိုက်လျှင် လူတစ်မျိုး ဖြစ်ပေါ်လာသည်။ . . . သမိုင်း၏ထိုအခါသမယ၌ လူသည် မျိုးရိုးအလိုက် တကယ်ပင် ဖြာထွက်ခဲ့သည်။ ပထဝီဆိုင်ရာ ရှေးဟောင်းလူမျိုးများ၏ ယနေ့အကြွင်းအကျန်တို့၌ ထိုဖြာထွက်မှု၏ရလဒ်ကို ကျွန်ုပ်တို့တိုင်းဆလေ့လာနိုင်ပေသည်။ ကျွန်ုပ်တို့ထင်သည့်အတိုင်း ဖြာထွက်မှုသည် တသီးတခြားနေထိုင်သည့်အတိုင်းအတာနှင့် အပြန်အလှန်ဆက်ဆံနေဟန်ရှိသည်။ . . . တိုက်ကြီးများပေါ် လူအမျိုးအနွယ်ပုံပေါ်လာစဉ် တစ်ကမ္ဘာလုံး အထောင်အသောင်းသောလူတို့သည် သီးခြားဖြစ်သောမျိုးရိုးဗီဇစုထဲသို့ သွတ်သွင်းခံရလေသဖြင့် ယနေ့ကျွန်ုပ်တို့မြင်ရသော မျိုးရိုးဗီဇ-အဖန်ဖန်ဖြစ်နှုန်းခြားနားချက်များသည် အတည်ဖြစ်လာလေသည်။ . . . ကျွန်ုပ်တို့ရင်ဆိုင်နေရသည့် ရှေ့နောက်မညီဟန်ရှိသည့်အဖြစ်မှန်ကား လူမျိုးတစ်စုနှင့်တစ်စု အပြင်ပန်းအားဖြင့်ခြားနားကြသော်လည်း ထိုခြားနားချက်များဖုံးကွယ်မှုအောက်၌ အခြေခံကျသောတူညီချက်ရှိသည် ဟူ၍ပင်တည်း။” (Heredity and Human Life [မျိုးရိုးဗီဇနှင့်လူ့အသက်]၊ နယူးယောက် ၁၉၆၃၊ အိပ်ချ်.အယ်လ်.ကာစင်၊ စစ. ၁၅၁၊ ၁၅၄၊ ၁၆၂၊ ၁၆၃) (ထို့ကြောင့် လူ့သမိုင်းအစ၌ လူတစ်စုသည် အခြားတစ်စုနှင့်ဝေးကွာသွားပြီး အုပ်စုတူချင်း အိမ်ထောင်ပြုကြသောအခါ သားသမီးများ၌ မျိုးရိုးကြန်အင်လက္ခဏာဆိုင်ရာ ထူးခြားသောအရောအနှော သိသိသာသာပေါ်လွင်လာသည်။)

လူမဲများသည် ကျိန်စာသင့်သူများဖြစ်သည်ဟု ကျမ်းစာသွန်သင်သလော

ထိုအယူသည် ကမ္ဘာဦး ၉:၂၅ ကို အလွဲနားလည်ရာမှ ပေါ်လာသည်။ ၎င်းကျမ်းချက်၌ နောဧက ဤသို့ဆိုသည်– “ခါနာန်သည် ကျိန်ခြင်းကိုခံပါစေ။ အစ်ကိုတို့၏ကျွန်တို့၌ ကျွန်ဖြစ်ပါစေဟုဆို၏။” သတိပြု၍ဖတ်ပါလေ။ အသားအရောင်နှင့်ပတ်သက်၍ ဘာမျှဆိုမထားပါ။ ဟာမ၏သားခါနာန်သည် အကျိန်ခံထိုက်သည့် ရှက်ကြောက်ဖွယ်အမှုတစ်ခု မုချပြုခဲ့၍ အကျိန်ခံရခြင်းဖြစ်၏။ သို့သော် ခါနာန်၏သားစဉ်မြေးဆက်မှာ မည်သူနည်း။ လူမဲများမဟုတ်။ မြေထဲပင်လယ်အရှေ့ဘက်နေ အသားအရောင်ဖျော့သူများတည်း။ သူတို့သည် နတ်ဆိုးကိုဝတ်ပြုခြင်း၊ ရုပ်တုကိုးကွယ်ခြင်း၊ ကလေးများကိုယဇ်အဖြစ်ပူဇော်ခြင်း စသော ယုတ်မာသောအကျင့်များပြုကျင့်ကြသောကြောင့် ဘုရားသခင့်စီရင်ဒဏ်အောက် ရောက်ခဲ့ကြသည်။ သူတို့ (ခါနာန်လူတို့) ပြည်ကိုလည်း ဣသရေလလူတို့အား ပေးတော်မူ၏။ (က. ၁၀:၁၅-၁၉) ခါနာန်လူအားလုံး ဖျက်ဆီးခံရကြသည်မဟုတ်။ အချို့သည် ကျိန်ချက်နှင့်အညီ အစေခံကျွန်များဖြစ်လာကြသည်။​—ယောရှု ၁၇:၁၃။

လူမဲများသည် နောဧ၏မည်သည့်သားမှ ဆင်းသက်လာကြသနည်း။ “[ဟာမ၏အခြားသားဖြစ်သော] ကုရှ [၏] သားကား၊ သေဘ၊ ဟာဝိလ၊ သာဘတ၊ ရာဂမ၊ သတ္တေခါတည်း။” (က. ၁၀:၆၊ ၇) နောက်ပိုင်း၌ ကုရှအကြောင်း ကျမ်းစာဆိုသည့်အခါ အဲသယောပိကိုရည်ညွှန်းလေ့ရှိ၏။ သေဘကိုလည်း အာဖရိကအရှေ့ပိုင်း အဲသယောပိပြည်အနီး၌နေထိုင်သော အခြားလူမျိုးကိုရည်ညွှန်းလျက် သုံးစွဲလာ၏။​—ဟေရှာ. ၄၃:၃၊ ကဘ ကျမ်းညွှန်းပါအတွဲတွင် အောက်ခြေမှတ်ချက်ကိုရှု။

လူသားအားလုံး ဘုရားသခင့်သားသမီးများလော

မစုံလင်သောလူသား ကျွန်ုပ်တို့သည် မွေးသည်နှင့် ဘုရားသခင့်သားသမီးများ ဖြစ်ခွင့်ရသည်မဟုတ်။ သို့ရာတွင် ကျွန်ုပ်တို့အားလုံး အာဒံ၏သားမြေးများဖြစ်ကြ၏။ အာဒံသည် စုံလင်ခြင်း၌ဖန်ဆင်းခြင်းခံရစဉ် “ဘုရားသခင့်သား” ဖြစ်၏။​—လု. ၃:၃၈၊ သမ။

တ. ၁၀:၃၄၊ ၃၅၊ သက– “ထာဝရဘုရားသည် မျက်နှာကြီးငယ် လိုက်တော်မမူ။ . . . မိမိအား ကြောက်ရွံ့ရိုသေ၍ အမှန်တရားကိုကျင့်သုံးသူမှန်သမျှအား လူမျိုးခွဲခြားမှုမပြုဘဲ နှစ်သက်လက်ခံတော်မူ၏။”

ယော. ၃:၁၆၊ သမ– “ဘုရားသခင်သည် သားတော်ကိုယုံကြည်သူတိုင်း မပျက်စီးဘဲ ထာဝရအသက်ရစေခြင်းငှာ ဧကပုတ္တသားတော်ကို အပ်ပေးသည့်တိုင်အောင် ဤလောကသားတို့အား မေတ္တာသက်တော်မူ၏။” (ယေရှုပေါ် စစ်မှန်သောယုံကြည်ခြင်းရှိမှသာ အာဒံဆုံးရှုံးခဲ့သော ဘုရားသခင်နှင့်ရင်းနှီးသည့် အဆိုပါဆက်ဆံမှုကို ရယူနိုင်မည်။ လူမျိုးတိုင်း ထိုအခွင့်အရေးရှိသည်။)

၁ ယော. ၃:၁၀၊ သက– “ဤနည်းအားဖြင့် ထာဝရဘုရား၏သားသမီးများနှင့် စာတန်၏သားသမီးများကွာခြားပုံကို သိရ၏။ အမှန်တရားကိုမကျင့်မသုံးသူ၊ မိမိ၏ညီအစ်ကိုကို မချစ်သူသည် ထာဝရဘုရား၏သားသမီးမဟုတ်။” (ထို့ကြောင့် ဘုရားသခင်သည် လူအားလုံးကို မိမိ၏သားသမီးများအဖြစ် မှတ်တော်မမူ။ ဝိညာဏရှုထောင့်အရ၊ ဘုရားသခင်တားမြစ်ရာကို တမင်ပြုကျင့်သူတို့သည် မာရ်နတ်၏သားများဖြစ်ကြသည်။ ယောဟန် ၈:၄၄ ကိုရှု။ ခရစ်ယာန်စစ်များမူ ဘုရားတရားအရည်အသွေးများကို ရောင်ပြန်ဟပ်ကြပေသည်။ သူတို့အနက် အရေအတွက်အနည်းငယ်ကို ရွေးချယ်၍ ကောင်းကင်၌ ခရစ်တော်နှင့်အတူ ဘုရင်များအဖြစ် အုပ်စိုးစေတော်မူ၏။ သူတို့ကို မိမိ၏ “သားသမီးများ၊” သို့မဟုတ် “သားများ” အဖြစ် ညွှန်းဆိုတော်မူ၏။ အသေးစိတ်ကို “ဒုတိယမွေးခြင်း” ဟူသောခေါင်းစဉ်၌ ရှု။)

ရော. ၈:၁၉-၂၁၊ သမ္မာ– “ဖန်ဆင်းတော်မူသောအရာများသည် ဘုရားသခင့်သားတို့၏ပေါ်ထွန်းခြင်းကို အလွန်တောင့်တမျှော်လင့်လျက် စောင့်နေကြ၏။ . . . ဘုရားသခင့်သားတို့ [“သားသမီးများ၊” ကဘ] ၏ဘုန်းဖြစ်သော လွတ်ခြင်းချမ်းသာတည်းဟူသော၊ ဖောက်ပြန်ပျက်စီးခြင်းအနှောင်အဖွဲ့မှ ကယ်လွှတ်ခြင်းချမ်းသာကိုဝင်စား [ကြရ] မည်။” (“ဘုရားသခင့်သားတို့” သည် ကောင်းကင်အသက်တာရသည့်နောက် ခရစ်တော်ညွှန်ကြားချက်အရ လူသားတို့အတွက် အရေးယူဆောင်ရွက်လျက် “ပေါ်ထွန်း” လာသောအခါ လူသားတို့သည် ကယ်လွှတ်ချမ်းသာရကြမည်။ ဤကျမ်းချက်၌ “ဖန်ဆင်းတော်မူသောအရာများ” အဖြစ် ရည်ညွှန်းခံရသော ကမ္ဘာပေါ်မှ သစ္စာရှိသူတို့လည်း လူ့စုံလင်ခြင်းသို့ရောက်ပြီးနောက် ယေဟောဝါအပေါ် စကြဝဠာအချုပ်အခြာအာဏာပိုင်အဖြစ် မယိုင်မလဲသောသမာဓိ စောင့်ထိန်းခဲ့ပြီဆိုလျှင် ဘုရားသခင့်သားသမီးများ တည်းဟူသော မွန်မြတ်သည့်ဆက်ဆံရေးကိုခံစားရကြလိမ့်မည်။ လူမျိုးစုံ ပါဝင်ခံစားကြမည်။)

လူမျိုးအားလုံး ညီအစ်ကို ညီအစ်မများအဖြစ် တကယ်ပင် စည်းလုံးလာကြမည်လော

မိမိ၏တပည့်စစ်များ ဖြစ်လာမည့်သူများအား ယေရှုက “သင်တို့အပေါင်းသည် ညီအစ်ကိုချင်းဖြစ်ကြ၏” ဟု မိန့်ဆို၏။ (မ. ၂၃:၈) “သင်တို့သည် အချင်းချင်းချစ်ကြလျှင် လူအပေါင်းတို့သည် ထိုမေတ္တာကိုထောက်၍ သင်တို့သည် ငါ၏တပည့်ဖြစ်သည်ကို သိရကြလိမ့်မည်” ဟု နောက်ပိုင်း၌ ထပ်ဆင့်မိန့်ကြားပြန်၏။​—ယော. ၁၃:၃၅။

ရှေးခရစ်ယာန်တို့သည် မစုံလင်သောလူသားများဖြစ်ကြသော်လည်း ထိုစည်းလုံးသောသဘော တကယ်ရှိကြပေသည်။ တမန်တော်ပေါလုက “ယေရှုခရစ်၌ ယုဒလူမရှိ၊ ဟေလသလူမရှိ၊ ကျွန်မရှိ၊ လူလွတ်မရှိ၊ ယောက်ျားမရှိ၊ မိန်းမမရှိ၊ ထိုသခင်၌ သင်တို့အပေါင်းသည် တစ်လုံးတစ်ဝတည်းဖြစ်ကြ၏” ဟု ရေးသားခဲ့၏။​—ဂလ. ၃:၂၈။

၂၀ ရာစု ယေဟောဝါသက်သေများဘောင်၌ လူမျိုးခွဲခြားမှုနှင့်ကင်းစင်သော ခရစ်ယာန်ညီအစ်ကိုစိတ်ဓာတ် တကယ်ပင်လွှမ်းမိုးလျက်ရှိပေသည်။ စာရေးသူ ဝီလျံဝေလင်က ယူ.အက်စ်. ကက်သလစ် ၌ ဤသို့ရေးသားလိုက်သည်– “ [ယေဟောဝါသက်သေများ၏အဖွဲ့အစည်း] ၏ ဆွဲဆောင်မှုအကောင်းဆုံးကြန်အင်တစ်ခုမှာ လူမျိုးမရွေး တန်းတူညီမျှ ဟူသော ရိုးရာပေါ်လစီဖြစ်ကြောင်း ကျွန်ုပ်ယုံကြည်သည်။” အောက်စဖို့တက္ကသိုလ် လူမှုရေးပညာရှင် ဘရိုင်းယင်း ဝီလ်စင်က အာဖရိကတိုက်မှ ယေဟောဝါသက်သေများအကြောင်း အကျယ်တဝင့်လေ့လာပြီးနောက် ဤသို့ဆို၏– “သက်သေခံများသည် အသင်းဝင်လာသူတို့၏ လူမျိုးစုခွဲခြားစိတ်ကို ချေမှုန်းသည့်ကိစ္စ၌ အခြားအုပ်စုများထက် အရှိန်အဟုန်မြင့်မားပြီး ပို၍အောင်မြင်ဟန်ရှိပေသည်။” နိုင်ငံပေါင်း ၁၂၃ နိုင်ငံမှလာကြသော သက်သေခံများ၏ နိုင်ငံတကာစည်းဝေးကြီးအကြောင်းကို နယူးယောက်တိုင်းမ်စ်မဂ္ဂဇင်းက ဤသို့သတင်းပေး၏– “သက်သေခံများသည် အရေအတွက်များရုံသာမက စုံလင်ထူးပြားမှု (လူတန်းစားအလွှာလွှာမှလာကြသည်)၊ လူမျိုးရေးစိတ်ဓာတ်ကင်းစင်မှု (သက်သေခံများစွာတို့သည် နီးဂရိုးများဖြစ်၏)၊ ငြိမ်ဝပ်၍ စည်းကမ်းသေသပ်သောအကျင့်အကြံရှိ၍လည်း နယူးယောက်မြို့သားများ အထင်ကြီးစရာဖြစ်ပေသည်။”

မကြာမီ ဘုရားသခင့်နိုင်ငံတော်သည် ယေဟောဝါနှင့်လူချင်းကို စင်စစ် မချစ်သောသူများအပါအဝင် လက်ရှိ ဘုရားမဲ့စနစ်ကို ဖျက်ဆီးလိမ့်မည်။ (ဒံ. ၂:၄၄၊ ၄၅; လု. ၁၀:၂၅-၂၈) “အသီးအသီး ဘာသာစကားကိုပြောသော လူအမျိုးအနွယ်ခပ်သိမ်းတို့အထဲက” ပုဂ္ဂိုလ်များ ကပ်ကျော်ကြမည်ဟု ဘုရားသခင့်နှုတ်ကပါဌ်တော်က ကတိပြု၏။ (ဗျာ. ၇:၉) သူတို့သည် ဘုရားစစ်ကိုကိုးကွယ်ခြင်း၊ ယေရှုခရစ်ပေါ်ယုံကြည်ခြင်း၊ အချင်းချင်းချစ်ခြင်းတို့ကြောင့် သွေးစည်းညီညွတ်သော လူ့မိသားစုတစ်ခု ဖြစ်လာမည်မုချ။