ကာလအချိန်ရောက်လုနီးသည်ကိုထောက်သဖြင့် အချင်းချင်းတို့ကိုတိုက်တွန်းနှိုးဆော်ကြလော့

“အချင်းချင်းတို့ကို တိုက်တွန်းနှိုးဆော်ကြလော့။ ကာလအချိန်ရောက်လုနီးသည်ကိုထောက်သဖြင့် သာ၍ကြိုးစားကြလော့။”—ဟေဗြဲ ၁၀:၂၅။

၁၊ ၂။ မည်သည့်နေ့နီးလာနေပြီး၊ ယေဟောဝါလူမျိုးတော်၏သဘောထား မည်သို့ဖြစ်သင့်သနည်း။

‘အ သက်ရေကိုယူပါစေ’ ဟုပြောဆိုရာတွင် ပါဝင်သူများသည် သူတို့ကိုယ်ကိုသီးခြားခွဲ၍မနေကြပါ။ ယေဟောဝါ၏အောင်ပွဲခံနေ့တော်ကြီး ချဉ်းကပ်လာသည်နှင့်အမျှ သူတို့သည်ကျမ်းဆိုင်ရာ အောက်ပါသွန်သင်ချက်ကို ကျင့်သုံးကြသည်။ “ထိုမှတစ်ပါး၊ မေတ္တာစိတ်ရှိစေခြင်းငှာလည်းကောင်း၊ ကောင်းသောအကျင့်ကိုကျင့်စေခြင်းငှာလည်းကောင်း၊ တိုက်တွန်းနှိုးဆော်ရသောအခွင့်ကိုရှာ၍ အချင်းချင်းတစ်ယောက်ကိုတစ်ယောက် ထောက်စာကြည့်ရှုကြကုန်အံ့။ လူအချို့တို့၏ထုံးစံရှိသည့်အတိုင်း အချင်းချင်းစည်းဝေးခြင်းအမှုကို မရှောင်မလွှဲကြနှင့်။ အချင်းချင်းတို့ကို တိုက်တွန်းနှိုးဆော်ကြလော့။ ကာလအချိန်ရောက်လုနီးသည်ကို ထောက်သဖြင့်သာ၍ကြိုးစားကြလော့။”—ဟေဗြဲ ၁၀:၂၄၊ ၂၅။

^၂ ကျမ်းစောင်များကထို “နေ့” ကို “ယေဟောဝါရှင်၏နေ့တော်” ဟုပရောဖက်ပြုထားသည်။ (၂ ပေတရု ၃:၁၀) ယေဟောဝါသည်အကြီးမြတ်ဆုံး အနန္တတန်ခိုးရှင်ဘုရားသခင် ဖြစ်သည့်အတိုင်း ကိုယ်တော်၏နေ့ကြီးထက် မည်သည့်နေ့မှသာလွန်ထွန်းတောက် နိုင်မည်မဟုတ်ချေ။ (တမန်တော် ၂:၂၀) ယင်းကစကြဝဠာတစ်ခွင်တွင် ဘုရားအဖြစ်ကိုယ်တော်၏အချုပ်အခြာ ထင်ရှားမည်ကိုဆိုလိုသည်။ မနှိုင်းယှဉ်နိုင်သည့် ထိုအရေးပါသောနေ့ နီးကပ်၍လာပေပြီ။

၃။ ပထမရာစုရှိခရစ်ယာန်များအတွက် ယေဟောဝါနေ့တော်သည်မည်သို့နီးလာခဲ့ပြီး၊ ကျွန်ုပ်တို့အတွက်ကောမည်သို့နည်း။

^၃ တမန်တော်ပေါလုက ပထမရာစုခရစ်ယာန်များအား ယေဟောဝါ၏နေ့တော်ကြီး နီးကပ်လာနေကြောင်းပြောခဲ့သည်။ သူတို့သည်၊ ထိုနေ့ရောက်လာမည်ကို စောင့်မျှော်ခဲ့ကြသည်။ သို့သော်ထိုစဉ်က ယင်းနေ့သည်၊ နှစ်ပေါင်း ၁၉၀၀ ကျော်တွင်ရှိနေခဲ့သည်။ (၂ သက်သာလောနိတ် ၂:၁-၃) သို့ပင်ငြားလည်း၊ သူတို့ကိုအားပေးရန်ဖြစ်သည်။ အကြောင်းမှာ၊ ယင်းနေ့သည်လာရန်သေချာပြီး ခရစ်ယာန်များသည်ထိုယုံကြည်ခြင်းတွင် မှန်မှန်တိုးတက်သွားလျှင် ထိုကောင်းချီးခံရာနေ့တော်အတွင်းသို့ ဝင်ရောက်သွားကြပေမည်။ (၂ တိမောသေ ၄:၈) ထိုစဉ်ကထိုနေ့သည် နီးကပ်လာနေကြောင်းတွေ့ခဲ့ရသည်။ ယနေ့ကျွန်ုပ်တို့အတွက်မူ၊ ယေဟောဝါနေ့တော်သည် အမှန်ပင်နီးကပ်လာခဲ့ပြီ။ သမ္မာကျမ်းပရောဖက်ပြုချက်များ၏ အံ့ဖွယ်ပြည့်စုံချက်များက ဤရွှင်လန်းဖွယ်အချက်ကို ဖော်ပြနေသည်။ မကြာမီကျွန်ုပ်တို့၏ဘုရား ယေဟောဝါ၏နာမသည် ထာဝစဉ်ရိုသေလေးမြတ်ခြင်းခံရတော့မည်။—လုကာ ၁၁:၂။

မြင့်မြတ်သောနာမတော်ဖြင့် အားပေးခံရခြင်း

၄။ ဗျာဒိတ် ၁၉:၆ အရမည်သူသည်ဘုရင်ဖြစ်လာရမည်ဖြစ်ပြီး၊ ကိုယ်တော်၏နာမတော်ကို မည်သို့ပိုင်းခြားသိမြင်နိုင်သနည်း။

^၄ မြင့်မြတ်သောနာမတော်သည် လူသားမိသားစုတစ်ခုလုံးအတွက် စိတ်ဝင်စားဖွယ်ကိစ္စရပ်ဖြစ်သင့်သည်။ Todayʼs English Version ကဤသို့ဖေါ်ပြသည်။ “ဘုရားရှင်ကိုချီးမွမ်းလော့။ အကြောင်းမှာ၊ ကျွန်ုပ်တို့၏သခင် အနန္တတန်ခိုးရှင်ဘုရားသည် ဘုရင်ဖြစ်တော်မူ၏။” (ဗျာဒိတ် ၁၉:၆) ထို ၂၀ ရာစုသမ္မာကျမ်းစာဘာသာပြန်ကျမ်းအရဆိုလျှင် ကိုယ်တော်သည်သခင်၊ အနန္တတန်ခိုးရှင်ဘုရားဖြစ်တော်မူ၏။ အခြားကျမ်းများနှင့်အတူ ယင်းဘာသာပြန်ကျမ်းက ဘုရင်အဖြစ်စတင်စိုးစံသည့် မြင့်မြတ်သောပုဂ္ဂိုလ်၏နာမကို မဖေါ်ပြချေ။ သို့သော်ဗျာဒိတ် ၁၉:၆ ကိုဘာသာပြန်ထားသည့် Revised Standard, the New International Version နှင့်မောဖက်၏ကျမ်းတွင်တွေ့ရသည့် ကြွေးကြော်ချက် ဟာလေလုဂျား (“ဂျားကိုချီးမွမ်းလော့” သို့မဟုတ် “ယေဟောဝါကိုချီးမွမ်းလော့”) တွင်ဘုရားနာမပါဝင်လေသည်။ ကျွန်ုပ်တို့၏သက္ကရာဇ်အများစုတွင် ဘုရားနာမတော်ကို သမ္မာကျမ်းဘာသာပြန်သူများက ဖုံးကွယ်ခဲ့သည်။ ကျွန်ုပ်တို့မြင်တွေ့ရမည်ဖြစ်သည့်အတိုင်း ယင်းနာမသည်ရှေးအချိန်နှင့် မျက်မှောက်ခေတ်အချိန်တွင် ဘုရားလူမျိုးအတွက်မဟာအားပေးမှုကြီးဖြစ်ခဲ့သည်။

၅၊ ၆။ (က) မောရှေသည်အဘယ်ကြောင့်သူကိုယ်စားပြုသော ဘုရား၏နာမကိုသိရန်လိုအပ်ခဲ့သနည်း။ (ခ) မြင့်မြတ်သောနာမကိုမောရှေသည် အလေးပေးဖော်ပြသောအခါ၊ ဣသရေလများအပေါ် မည်သို့သက်ရောက်မှုဖြစ်ခဲ့မည်နည်း။

^၅ အီဂျစ်တွင်ကျွန်ခံနေရသော ဣသရေလလူမျိုးထံမောရှေကို အကြီးမြတ်ဆုံးရှင်ဘုရားသခင်စေလွှတ်ခဲ့စဉ် မောရှေစေလွှတ်ခံရသောလူမျိုးတို့၏စိတ်တွင် မည်သူကသူ့အားစေလွှတ်သနည်းဟူသည့် မေးခွန်းပေါ်ခဲ့သည်ကို ကျွန်ုပ်တို့သတိရမည်။ ဒုက္ခခံနေရသောဂျူးလူမျိုးသည် သူကိုယ်စားပြုသည့်ဘုရား၏နာမကို သိလိုကြမည်ဟုမောရှေတွေးဆခဲ့သည်။ ယင်းနှင့်စပ်လျဉ်း၍ ထွက်မြောက်ရာ ၃:၁၅ တွင်ကျွန်ုပ်တို့ဤသို့ဖတ်ရသည်။ “တစ်ဖန်ဘုရားသခင်က “‘သင်တို့ဘိုးဘေးများ၏ဘုရားသခင်၊ အာဗြဟံ၏ဘုရား၊ ဣဇာက်၏ဘုရား၊ ယာကုပ်၏ဘုရားတည်းဟူသော ထာဝရဘုရား [ယေဟောဝါ၊ NW] သည်ငါ့ကိုသင်တို့ရှိရာသို့ စေလွှတ်တော်မူပြီ” ဟုဣသရေလလူမျိုးတို့အားပြောရမည်။’ ထိုအမည်သည် အစဉ်ငါ့အမည်ဖြစ်၏။ လူမျိုးအစဉ်အဆက်မပြတ် ငါ့ဘွဲ့နာမဖြစ်၏။”

^၆ ဤအကြောင်းကိုသူတို့ထံ အလေးအနက်တင်ပြသောအခါ ဣသရေလများသည်အလွန်အားရခဲ့ပေမည်။ သူတို့၏လွတ်မြောက်ခြင်းကို တစ်ဆူတည်းသောဘုရားမှန်ယေဟောဝါက ခိုင်မာစေသည်။ မာနစိတ်နှင့်ကိုယ့်ကိုယ်ကိုသီးခြားမနေဘဲ မိမိကိုယ်ပိုင်နာမ၏အနက်ကိုတင်ပြသည့် ဘုရားရှင်နှင့်အကျွမ်းဝင်ခွင့်ရသည့် အခွင့်အရေးသည်မည်မျှ အားတက်ဖွယ်ဖြစ်ခဲ့ပါမည်တကား။—ထွက်မြေက်ရာ ၃:၁၃။ ၄:၂၉-၃၁။

၇။ (က) ယေရှု၏တပည့်တော်များသည် မြင့်မြတ်သောနာမတော်နှင့် အကျွမ်းတဝင်ဖြစ်ခဲ့ကြောင်း ကျွန်ုပ်တို့မည်သို့သိရှိနိုင်သနည်း။ (ခ) ဘုရားရှင်၏နာမတော်သည် နောက်တန်းသို့ မည်သို့အပို့ခံရသနည်း။

^၇ သခင်ယေရှုခရစ်၏တပည့်တော်များလည်း မြင့်မြတ်သောနာမတော်ယေဟောဝါနှင့် ယင်း၏ရပ်တည်ချက်ကြောင့် အလွန်အားရခဲ့ရသည်။ (ယောဟန် ၁၇:၆၊ ၂၆) ယေရှု၏မြေကြီးပေါ်အမှုဆောင်ခြင်းတွင် ကိုယ်တော်သည်ဘုရားနာမတော်ကို နောက်တန်းသို့မပို့ခဲ့ပဲ မိမိ၏နာမယေရှုသည် ရှေ့တွင်နေရာကျရန် ကိုယ်တော်.ရည်ရွယ်ချက်မဟုတ်ခဲ့ချေ။ ကြိုတင်ဟောထားသည့်အတိုင်း ခရစ်ယာန်ယုံကြည်ခြင်းမှ ဖောက်ပြန်သင်းကွဲခြင်းစတင်ပြီးနောက်ပိုင်းတွင်သာ ဘုရားနာမတော်သည်နောက်တန်းသို့ တွန်းပို့ခံရသည်။ မှန်ပါသည်။ ခရစ်ယာန်ပြောဆိုဆက်သွယ်မှုမှ လုံးဝဖျောက်ပစ်ခံခဲ့ရသည်။ (တမန်တော် ၂၀:၂၉၊ ၃၀) သို့နှင့်သားတော်၏နာမကို ပို၍အသားပေးလာကာ ခမည်းတော်၏နာမကိုဖုံးအုပ်လိုက်သည်။ ခရစ်ယာန်အခေါ်ခံသူများသည် ခမည်းတော်ကိုဝတ်ပြုရာတွင် ပုဂ္ဂိုလ်တစ်ဦးကဲ့သို့ မယူမှတ်လာတော့ဘဲ မိသားစုဆိုင်ရာနီးကပ်မှုများ ကင်းမဲ့လာပြီးအားတက်ဖွယ်မဖြစ်ခဲ့ချေ။

၈။ ယေဟောဝါသက်သေများအမည်ကိုခံယူသောအခါ ဘုရားလူမျိုးတော်အပေါ် ဆက်လက်အကျိုးသက်ရောက်မှုကား မည်သို့နည်း။

^၈ ထို့ကြောင့် ၁၉၃၁ တွင်ကင်းမျှော်စင်အသင်းနှင့်ဆက်နွယ်သော အပြည်ပြည်ဆိုင်ရာကျမ်းစာကျောင်းသားများသည် ယေဟောဝါသက်သေများအမည်ခံယူသောအခါ မပြောပြနိုင်သောပျော်ရွှင်ရန်အကြောင်း ဖြစ်ခဲ့သည်။ ယင်းသည်ပျော်ရွှင်မှုကိုလှုံ့ဆော်သည်သာမက အလွန်ပင်အားတက်ဖွယ်ဖြစ်ခဲ့သည်။ ယင်းကြောင့်အမည်သစ်ခံယူခဲ့သော ကျမ်းစာကျောင်းသားများသည် တစ်ဦးကိုတစ်ဦးအားပေးနိုင်ခဲ့သည်။—ဟေရှာယ ၄၃:၁၂ နှင့်နှိုင်းယှဉ်။

၉။ ခရစ်ယာန်စစ်များသည် သူတို့သက်သေခံသည့် ပုဂ္ဂိုလ်နှင့်စပ်လျဉ်း၍ မည်သို့ယူမှတ်သနည်း။

^၉ ထို့ကြောင့်ပင်၊ ယနေ့ခရစ်ယာန်စစ်များသည် သူတို့၏ခေါင်းဆောင်ယေရှုခရစ်မြေကြီးပေါ်တွင်ရှိစဉ် လုပ်ခဲ့သည့်အတိုင်းကြိုတင်ဟောထားခဲ့သော သူတို့သက်သေခံရမည့်ပုဂ္ဂိုလ်ကို ဖေါ်ပြရန်လျှောက်ပတ်ကြောင်းမြင်ကြသည်။ (ဗျာဒိတ် ၁:၁၊ ၂) မှန်ပါသည်၊ ဤပုဂ္ဂိုလ်အားတစ်ဦးတည်းသော ယေဟောဝါအမည်ရှိသူဖြစ်ကြောင်း ဖေါ်ပြခဲ့သည်။—ဆာလံ ၈၃:၁၈။

ဝမ်းမြောက်ခြင်းနှင့် သန့်ရှင်းသောဝိညာဉ်တော်ဖြင့်ပြည့်ဝ

၁၀-၁၂။ (က) ယေရှု၏နောက်လိုက်များအပေါ်တွင် လှုပ်ရှားသောတန်ခိုးတော်၏ အကျိုးသက်ရောက်မှုကား မည်သို့ဖြစ်မည်နည်း။ (ခ) ဝမ်းမြောက်မှုဖြင့်လှုံ့ဆော်ခံရသော ယေဟောဝါသက်သေများသည် တစ်ဦးနှင့်တစ်ဦးမည်သို့ ဆက်ဆံသင့်သနည်း။

^၁၀ ယေရှုခရစ်သည်မိမိ၏တမန်တော်များအား ခွဲခွာခါနီးစကားပြောခဲ့ရာတွင် ဤသို့ဆိုခဲ့သည်။ “သင်တို့သွား၍လူမျိုးတကာတို့ကို ငါ့တပည့်ဖြစ်စေလျက် ခမည်းတော်၊ သားတော်၊ သန့်ရှင်းသောဝိညာဉ်တော်၏နာမ၌ ဗတ္တိဇံကိုပေးကြလော့။ ငါသည်သင်တို့အား ပေးသမျှသောပညတ်တော်တို့ကို စောင့်ရှောက်စေခြင်းငှာ ဆုံးမသြဝါဒပေးကြလော့။ ငါသည်လည်းကပ်ကမ္ဘာကုန်သည်တိုင်အောင် သင်တို့နှင့်အတူအစဉ်မပြတ်ရှိသည်။”—မဿဲ ၂၈:၁၉၊ ၂၀။

^၁၁ သင်ကြားထားသောခရစ်ယာန်လူသစ်များသည် သန့်ရှင်းသောဝိညာဉ်တော်၏ နာမ၌နှစ်ခြင်းခံရမည်ကို သတိပြုပါ။ ဤသန့်ရှင်းသောဝိညာဉ်တော်သည် ပုဂ္ဂိုလ်တစ်ဦးမဟုတ်ဘဲ ယေဟောဝါဘုရားရှင်၏လှုပ်ရှားသော တန်ခိုးတော်ဖြစ်၍ ယေရှုခရစ်အားဖြင့်လုပ်ဆောင်တော်မူသည်။ ပင်တေကုတ္တေပွဲနေ့တွင် ယေဟောဝါဘုရားသည်ယေရှုအားဖြင့် ယေရှုခရစ်၏ဆက်ကပ်ထားသော နောက်လိုက်များအပေါ် ဤသန့်ရှင်းသောဝိညာဉ်တော်ကို သွန်းလောင်းချခဲ့သည်။ (တမန်တော် ၂:၃၃) သူတို့သည် ဤသန့်ရှင်းသောဝိညာဉ်တော်နှင့်ပြည့်ဝကြပြီး ယင်းမှတစ်ခုမှာ သို့မဟုတ်အသီးတစ်သီးမှာ ဝမ်းမြောက်ခြင်းပင်ဖြစ်သည်။ (ဂလာတိ ၅:၂၂၊ ၂၃၊ ဧဖက် ၅:၁၈-၂၀) ဝမ်းမြောက်ခြင်းသည် လှုံ့ဆော်မှုပေးသောအရည်အချင်းဖြစ်သည်။ တပည့်တော်များသည် သန့်ရှင်းသောဝိညာဉ်တော်၏ဝမ်းမြောက်ခြင်းနှင့် ပြည့်နေရန်ဖြစ်သည်။ တမန်တော်၏ဆုတောင်းချက်စကားသည် အထူးဆီလျော်လှသည်။ “သင်တို့သည်သန့်ရှင်းသောဝိညာဉ်တော်၏တန်ခိုးအားဖြင့် မျှော်လင့်ခြင်းပါရမီနှင့်ကြွယ်ဝစေခြင်းငှာ၊ ယုံကြည်သောစိတ်ရှိ၍ ဝမ်းမြောက်သက်သာခြင်းအမျိုးမျိုးတို့နှင့် ပြည့်စုံမည်အကြောင်း၊ မျှော်လင့်ခြင်း၏အရှင်၊ ဘုရားသခင်သည်ကယ်မသနားတော်မူပါစေသော။”—ရောမ ၁၅:၁၃။

^၁၂ ဤဝမ်းမြောက်ခြင်းလှုံ့ဆော်မှုဖြင့်ပြည့်သော “လူအုပ်ကြီး” အပါအဝင် ယေဟောဝါသက်သေများသည် ခင်မင်မှုကင်းမဲ့သောဤအစီအစဉ်စနစ်အလယ်တွင် တစ်ဦးကိုတစ်ဦးအားပေးသွားလိုမည်။ မှန်ပါသည်၊ ယင်းကဲ့သို့ပြုရန်လှုံ့ဆော်ခံရပေမည်။ သို့နှင့်အညီ၊ တမန်တော်ပေါလုက “အချင်းချင်းအားရသက်သာခြင်း ကိုရောက်ကြမည်” အကြောင်းပြောခဲ့သည်။—ဗျာဒိတ် ၇:၉၊ ၁၀။ ရောမ ၁:၁၂။ ၁၄:၁၇။

ခွန်အားရှိရန်အကြောင်း

၁၃။ ကျွန်ုပ်တို့တွင်အားရှိစရာနှင့် တစ်ဦးကိုတစ်ဦးအားပေးရန် မည်သည့်အကြောင်းများရှိသနည်း။

^၁၃ ဖြောင့်မတ်မှုဟူသမျှကိုဆန့်ကျင်သောသူအုပ်ချုပ်ပြီး၊ ဘုရားလည်းဖြစ်သည့် ဤအစီအစဉ်စနစ်အလယ်တွင်ရှိနေသောကြောင့် ခရစ်ယာန်များသည် ယေဟောဝါ၏သန့်ရှင်းသောဝိညာဉ်တော်ဖြင့်ပြည့်နေသော အသင်းတော်အတွင်းရှိ၊ သူတစ်ဦးနှင့်တစ်ဦး အားပေးလိုကြသည်။ (ဟေဗြဲ ၁၀:၂၄၊ ၂၅။ တမန်တော် ၂၀:၂၈) ကျွန်ုပ်တို့ခွန်အားယူစရာအပြည့်အဝရှိပါသည်။ မှန်ပါသည်။ ယေဟောဝါ၏တိကျသောအသိပညာ၊ ကိုယ်တော်၏သားတော်နှင့် ထိုပုဂ္ဂိုလ်တို့အသုံးပြုသော လှုပ်ရှားသည့်တန်ခိုးဖြစ်သည့် သန့်ရှင်းသောဝိညာဉ်တော်ကို ကျွန်ုပ်တို့ရရှိထားသည့်အတွက် မည်မျှကျေးဇူးတင်စရာပါတကား။ ကျွန်ုပ်တို့သည်သူတို့ပေးသော မျှော်လင့်ချက်အတွက်မည်မျှကျေးဇူးတင်စရာပါတကား။ ထို့ကြောင့်ကျွန်ုပ်တို့၏ဝတ်ပြုရေးသည် ဝမ်းမြောက်ခြင်းနှင့်ပြည့်နေသည်။ တမန်တော်ပေါလုက သူစာရေးသားခဲ့သောခရစ်ယာန်များအား သူတို့သည်သူတို့၏သန့်ရှင်းသောယုံကြည်ခြင်းတွင် တစ်ဦးနှင့်တစ်ဦးအားပေးသင့်ကြောင်း ပြောခဲ့သည်။ သူတို့သည် “ကာလအချိန်ရောက်လုနီးသည်ကို ထောက်သဖြင့်သာဤကြိုးစား” လုပ်ဆောင်ကြရန်ဖြစ်သည်။ ၄င်းပြင်၊ ဤကမ္ဘာ၏အာဏာစက်များသည် အခြားမှောက်မှားသောဘာသာများနှင့်အတူ အမည်ခံမျှသာဖြစ်သောခရစ်ယာန်များကို သုတ်သင်သောအခါ ကျွန်ုပ်တို့တစ်ဦးနှင့်တစ်ဦးပို၍အားပေးရန် အခြေအနေကတောင်းဆိုလိမ့်မည်။

၁၄။ မည်သူများတစ်ဦးနှင့်တစ်ဦး အားပေးနေသင့်ပြီး၊ မည်သို့နည်း။

^၁၄ အကြီးအကဲများသည် သူတို့၏ဆိုင်ရာအသင်းတော်များတွင် အားပေးရာ၌ဦးဆောင်စဉ် ခရစ်ယာန်အားလုံးသည် ဟေဗြဲ ၁၀:၂၅ တိုက်တွန်းသည့်အတိုင်း တစ်ဦးနှင့်တစ်ဦးအားပေးရန်လိုအပ်သည်။ အမှန်မှာယင်းသည် ခရစ်ယာန်လိုအပ်ချက်ဖြစ်သည်။ သင်သည်အသင်းတော်တစ်ခု၏ အသင်းသားတစ်ဦးဖြစ်လျှင် ဤသို့သောအားပေးမှုကို သင်ပြုပါသလော။ သင်က ‘ငါဘယ်လိုအားမှာလဲ’ ဟုစဉ်းစားမိမည်။ အခြားသူများသစ္စာရှိစွာဖြင့် အသင်းတော်စည်းဝေးများတက်သည်ကို သင်တွေ့ရသောအခါ သင်အားရသကဲ့သို့ စည်းဝေးများတွင် သင်ရောက်ရှိနေခြင်းနှင့် ခရစ်ယာန်အစီအစဉ်အပေါ် သင်၏ထောက်မမှုတို့သည် အခြားညီအစ်ကို၊ ညီအစ်မများအတွက် အားရစရာမဟုတ်ပေလော။ သင်၏သစ္စာရှိခံနိုင်ရည်ပုံသက်သေအားဖြင့်လည်း သူတို့ကိုအားပေးနိုင်သည်။ ဘဝပြဿနာများနှင့် အခက်အခဲများကြားတွင် အလျော့မပေးပဲ သင်၏ခရစ်ယာန်လမ်းစဉ်တွင် ဆက်လက်လိုက်လျှောက်ခြင်းဖြင့် သင့်အနေနှင့်လှုံ့ဆော်မှုပေးသော ပုံသက်သေတင်ပြနိုင်သည်။

မာရ်နတ်မှလာသောစိတ်ဓာတ်ကျမှုကိုတွန်းလှန်ခြင်း

၁၅။ မာရ်နတ်သည်အဘယ်ကြောင့် “အမျက်ပြင်းစွာ” ထွက်နေပြီး၊ မည်သူများကိုနည်း။

^၁၅ ယေဟောဝါနေ့ရက်နီးကြောင်း ကျွန်ုပ်တို့သာသိသည်မဟုတ်။ စာတန်မာရ်နတ်လည်းသိလေသည်။ ဗျာဒိတ် ၁၂:၁၂ ကကျွန်ုပ်တို့အားယခုတွင်မြေကြီးပေါ်၌ အမင်္ဂလာဖြစ်သည်ဟုပြောပြသည်။ “အကြောင်းမူကား၊ မာရ်နတ် သည်မိမိကာလတခဏသာရှိသည်ကိုသိ၍ ပြင်းစွာသောဒေါသအမျက်နှင့်တကွ သင်တို့ရှိရာသို့ဆင်းလေပြီ။” ဗျာဒိတ် ၁၂:၁၇ ကသူ၏ဒေါသကြီးသည် “ဘုရားသခင်၏ပညတ်တော်တို့ကိုကျင့်၍ ယေရှု၏သက်သေခံတော်မူချက်ကို စွဲလမ်းသောသူ” တို့ကိုဦးတည်ကြောင်း ဖော်ပြသည်။ မာရ်နတ်သည် ကျွန်ုပ်တို့အားစိတ်ဓာတ်ကျစေလိုသည်မှာ သံသယဖြစ်ဖို့မလိုချေ။ ယင်းကိုမည်သို့ပြုရမည်ကိုလည်း သူသိလေသည်။ ကျွန်ုပ်တို့၏အားနည်းချက်နှင့်ပြဿနာများကို သူသိပြီးယင်းအပေါ်သူလုပ်ဆောင်သည်။

၁၆။ စာတန်သည်အဘယ်ကြောင့် စိတ်ဓာတ်ကျမှုကို လက်နက်အဖြစ်သုံးသနည်း။

^၁၆ အဘယ်ကြောင့်မာရ်နတ်သည် စိတ်ဓာတ်ကျမှုကို လက်နက်အဖြင့်သုံးသနည်း။ အကြောင်းမှာယင်းသည် အောင်မြင်လေ့ရှိသောကြောင့်ဖြစ်သည်။ တစ်ကယ့်အတိုက်အခံများနှင့် နှိပ်စက်ခြင်းခံနိုင်ခဲ့သူများပင် စိတ်ဓာတ်ကျမှု၏ သားကောင်ဖြစ်သွားနိုင်သည်။ စာတန်သည်ယေဟောဝါဘုရားရှင်အား ကဲ့ရဲ့လိုပြီး၊ လူများကို ကိုယ်တော်အားဝတ်ပြုခြင်းမှ လမ်းလွဲအောင်ပြုနိုင်ကြောင်းပြလိုသည်။ (သု ၂၇:၁၁။ ယောဘ ၂:၄၊ ၅ နှင့်နှိုင်းယှဉ်။ ဗျာဒိတ် ၁၂:၁၀) သူသည်သင့်အားစိတ်ဓာတ်ကျစေနိုင်လျှင် ဘုရားရှင်ထံသင်၏အမှုဆောင်ခြင်းကို ကျဆင်းသွားစေနိုင်သည်။ သူသည်သင့်အား နိုင်ငံတော်သတင်းကောင်းဟောပြောရာတွင် မလှုပ်မရှားဖြစ်သွားရန်၊ ရပ်ဆိုင်းသွားရန်ပင် လုပ်လိုက်နိုင်သည်။—၂ ကောရိန္သု ၂:၁၀၊ ၁၁။ ဧဖက် ၆:၁၁။ ၁ ပေတရု ၅:၈။

၁၇။ မောရှေလက်ထက်တွင်၊ စိတ်ဓာတ်ကျခြင်း၏ သက်ရောက်မှုမည်သို့ထင်ရှားသနည်း။

^၁၇ ရှေးအီဂျစ်ပြည်ရှိဣသရေလများ၏ အပြုသဘောမဆောင်သည့် စိတ်ဓာတ်ကျမှုရလဒ်ကို သတိပြုနိုင်သည်။ မောရှေသည် ဖာရောအားပြောဆိုပြီးသောအခါ ထိုရက်စက်သောအုပ်စိုးရှင်သည် သူတို့အပေါ်ဝန်ထုပ်နှင့်ဖိနှိပ်မှုကို အလွန်အမင်းတိုးမြှင့်လိုက်သည်။ ဘုရားရှင်သည်မောရှေအား ဣသရေလများကိုကိုယ်တော်ကယ်တင်မည့်အကြောင်း၊ သူတို့အားမိမိ၏လူမျိုးဖြစ်စေမည့်အကြောင်း၊ သူတို့၏လွတ်မြောက်ရာကို ပြင်ဆင်ပေးခါ၊ ကတိထားရာပြည်သို့ ခေါ်ဆောင်သွားမည့်အကြောင်း၊ စိတ်ချရန်ပြောခဲ့သည်။ သို့သော် ထွက်မြောက်ရာ ၆:၉ ကဤသို့မှတ်တမ်းတင်ထားသည်။ “သူတို့သည်အလွန်စိတ်ပင်ပန်း၍ ကြမ်းတမ်းစွာညှဉ်းဆဲခြင်းကိုခံရသောကြောင့် မောရှေစကားကို နားမထောင်ပဲနေကြ၏။” ယေဟောဝါရှင်သည်မောရှေအား အမိန့်ပေးထားသည်အတိုင်း ဖာရောထံသွား၍မပြောရန် စိတ်ဓာတ်ကျစေခဲ့သည်။—ထွက်မြောက်ရာ ၆:၁၀-၁၃။

၁၈။ ဘုရားလူမျိုးတော်သည် မာရ်နတ်ဖြစ်ပေါ်စေသော စိတ်ဓာတ်ကျမှုကိုတိုက်ဖျက်ရန် အဘယ်ကြောင့်အလွန်လိုအပ်သနည်း။

^၁၈ စိတ်ဓာတ်ကျမှုသည် ဘုရားကျေးကျွန်တစ်ဦး၌ အပြုသဘောမဆောင်သည့်အကျိုး သက်ရောက်နိုင်ကြောင်းစာတန်မာရ်နတ် ကောင်းစွာသိလေသည်။ သု၊ ၂၄:၁၀ ဆိုသည့်အတိုင်းပင်။ “သင်သည်အမှုရောက်သောကာလ၌ စိတ်ပျက်လျှင်အားနည်း၏။” ကျွန်ုပ်တို့သည် ဆုံးခန်းချိန်၏ဆုံးလုဆဲဆဲတွင် အသက်ရှင်နေသောကြောင့် ကျွန်ုပ်တို့သည်တန်ခိုးပါပြီး၊ ဝိညာဉ်ရေးအရ သန်စွမ်းရမည်။ ကျွန်ုပ်တို့၏မစုံလင်မှုများ၊ အားနည်းချက်များနှင့် ကျွန်ုပ်တို့အားနောက်သို့ပြန်ဆွဲချသည့် အမှားများကိုခုခံနေရသည်ပင် ဆိုးလှပေပြီ။ စာတန်ကဤအမှားများကို အမြတ်ထုတ်ရန်ကြိုးပမ်းနေသောကြောင့် ကျွန်ုပ်တို့အကူအညီလိုအပ်လေသည်။

ခရစ်တော်၏ပူဇော်သက္ကာအပေါ် အခိုင်အမာအားထားခြင်း

၁၉။ စိတ်ဓာတ်ကျမှုကိုချေဖျက်ရန် ဘာကကျွန်ုပ်တို့အားကူညီမည်ဖြစ်ပြီး၊ အဘယ်ကြောင့်နည်း။

^၁၉ ထို့ကြောင့်ပင်ယေရှုခရစ်အားဖြင့် ယေဟောဝါရှင်ပြင်ဆင်ပေးသော ရွေးနှုတ်ဖိုးပြင်ဆင်ပေးချက်သည် အကူအညီပေးမှုကြီးပင်ဖြစ်သည်။ ရွေးနှုတ်ဖိုးအပေါ်အခိုင်အမာကိုးစားခြင်းဖြင့် ကျွန်ုပ်တို့သည်အောင်နိုင်သူများ ဖြစ်နိုင်သည်။ ဤပြင်ဆင်ပေးချက်ကိုအထင်သေးခြင်းသည် အန္တရာယ်ပင်ဖြစ်သည်။ မှန်ပါသည်၊ ကျွန်ုပ်တို့မစုံလင်သ၍ မှားနေမည် သို့မဟုတ် အပြစ်ပြုနေမည်။ သို့သော်ကျွန်ုပ်တို့သည် မျှော်လင့်ချက်မရှိတော့ဟုထင်ကာ၊ စိတ်ဓာတ်ကျပြီး၊ ရှောင်သွားရန်မဟုတ်ချေ။ သို့ပြုလျှင်၊ စာတန်၏ထောင်ချောက်ထဲကျဆင်းသွားပေမည်။ ကျွန်ုပ်တို့တွင် အပြစ်အတွက်ပူဇော်သက္ကာအပြည့်အဝရှိကြောင်း ကျွန်ုပ်တို့သိကြသည်။ ရွေးနှုတ်ဖိုးသည်အပြစ်များကို ဖယ်ရှားနိုင်သည်။ ကျွန်ုပ်တို့သည် “လူအုပ်ကြီး” အဝင်ဖြစ်လျှင် ကျွန်ုပ်တို့၏ဝတ်လုံများကို သိုးသငယ်၏အသွေး၌လျှော်နိုင်ပြီး၊ ဖြူစင်စေနိုင်ကြောင်း ယုံကြည်ခြင်းနှင့်ကိုးစားမှု အပြည့်အဝရှိရမည်။—ဗျာဒိတ် ၇:၉၊၁၄။

၂၀။ စိတ်ဓာတ်ကျစေသူကြီးမာရ်နတ်ကို အောင်နိုင်ကြောင်း ဗျာဒိတ် ၁၂:၁၁ ကမည်သို့ဖော်ပြသနည်း။

^၂၀ ဗျာဒိတ် ၁၂:၁၀ တွင် “ငါတို့ညီအစ်ကိုများကို ငါတို့ဘုရားသခင်ရှေ့တော်၌ နေ့ညဉ့်မပြတ် အပြစ်တင်သောရန်သူ” အဖြစ်ဖော်ပြထားသည်။ ကျွန်ုပ်တို့သည်ထိုမျှဆိုးဝါးသော အပြစ်တင်သူနှင့် စိတ်အားလျော့အောင်ပြုသော ဆိုးသွမ်းသူကိုမည်သို့အောင်မြင်နိုင်မည်နည်း။ ထိုအခန်းကြီး၏အခန်းငယ် ၁၁ ကအဖြေပေးသည်။ “သူတို့သည်သိုးသငယ်၏အသွေးအားဖြင့်လည်းကောင်း၊ မိမိတို့သက်သေခံချက်နှုတ်ကပတ်တရားအားဖြင့်လည်းကောင်း၊ အောင်မြင်၍ အသေခံသည်တိုင်အောင် ကိုယ်အသက်ကိုမနှမြောကြ။” ထို့ကြောင့်ယေဟောဝါလူမျိုးသည် ရွေးနှုတ်ဖိုးပူဇော်သက္ကာ၊ သိုးသငယ်၏သွေးတွင် အပြည့်အဝယုံကြည်စိတ်ချရန်လိုအပ်သည်။ သက်သေခံခြင်းမှရသော အားပေးမှုကိုခိုင်မာစေကာ သင်တတ်နိုင်သလောက် လူတိုင်းနှင့်ဘုရားနိုင်ငံတော်သတင်းကောင်းကို မှန်မှန်ဝေမျှပါ။

၂၁။ ကျွန်ုပ်တို့၏ညီအစ်ကိုများအား စိတ်ဓာတ်ကျစေသည့် မာရ်နတ်၏လုပ်ရပ်တွင် ကျွန်ုပ်တို့မည်သို့မရည်ရွယ်ပဲနှင့် ပါဝင်နိုင်သနည်း။

^၂၁ တစ်ခါတစ်ရံမရည်ရွယ်ပဲနှင့် ကျွန်ုပ်တို့၏ညီအစ်ကိုများကို စိတ်ဓာတ်ကျစေသော စာတန်၏လုပ်ရပ်တွင် ကျွန်ုပ်တို့ပါဝင်လုပ်ဆောင်နေပေမည်။ မည်သို့နည်း။ အပြစ်ရှာလွန်းခြင်း၊ တောင်းဆိုမှု၊ များလွန်းခြင်း သို့မဟုတ် လွန်ကြူးစွာဖြောင့်မတ်ခြင်းအားဖြင့်ဖြစ်သည်။ (ဒေသနာ ၇:၁၆) ကျွန်ုပ်တို့အားလုံးသည် ချို့တဲ့ချက်များနှင့် အားနည်းချက်များရှိသည်။ ကျွန်ုပ်တို့သည်စာတန်ကဲ့သို့ သူတို့အပေါ်မပြုလုပ်ပါနှင့်။ သို့အစား၊ ကျွန်ုပ်တို့၏ညီအစ်ကိုများနှင့် ဖွဲ့စည်းထားသောအုပ်စုဖြစ်သည့် ယေဟောဝါလူမျိုးအကြောင်း အားရှိစရာများကို ပြောဆိုကြပါစို့။ ကျွန်ုပ်တို့သည်တစ်ဦးနှင့်တစ်ဦး နှလုံးရွှင်ပြုံးစေလိုပြီး၊ တစ်ဦးနှင့်တစ်ဦးနှလုံးနာစေမှုများကို ရှောင်ပါ။

နေ့တော်နီးလာသည်နှင့်အမျှ အားပေးတိုက်တွန်းလော့

၂၂၊ ၂၃။ (က) အားပေးရာအရင်းခံများအနေနှင့် အကြီးအကဲများအပေါ်၌သာ အဘယ်ကြောင့်မတင်သင့်သနည်း။ (ခ) ခရစ်ယာန်အသင်းတော်ရှိ ကြီးကြပ်မှူးများကိုမည်သို့အားပေးနိုင်သနည်း။

^၂၂ ကျွန်ုပ်တို့သည်နေ့တော်နီးလာသည်နှင့်အမျှ တစ်ဦးနှင့်တစ်ဦးအားပေးရန် အစဉ်အခိုင်အမာ သန္နိဌာန်ချထားသင့်သည်။ သင်၏သစ္စာရှိပုံသက်သေနှင့် နှစ်သိမ့်သောစကားများဖြင့် အခြားသူများကိုအားပေးပါ။ ယင်းနှင့်စပ်လျဉ်း၍ ယေဟောဝါနှင့်ယေရှုခရစ်ကိုတုပပါ။ အသင်းတော်အကြီးအကဲများကိုသာ အားပေးမှုပင်ရင်းဟုမယူမှတ်ပါနှင့်။ အဘယ်ကြောင့်နည်း။ အကြီးအကဲများကိုယ်နှိုက်ပင် အားပေးမှုလိုအပ်သည်။ သူတို့သည်သိုးအုပ်ရှိအခြားသူများကဲ့သို့ ချို့တဲ့ချက်များနှင့်အားနည်းချက်များရှိပြီး၊ ယိုယွင်းနေသောလောကတွင် သူတို့မိသားစုကိုထောက်မရာ၌ အလားတူပြဿနာများကိုတိုက်လှန်နေကြရသည်။ ယင်းထက်မကသူတို့သည် ပေါလုဖော်ပြသည့်အတိုင်း အသင်းတော်အတွက်စိုးရိမ်စိတ်များ ခံစားရသည်။ (၂ ကောရိန္သု ၁၁:၂၈၊ ၂၉) သူတို့လုပ်ငန်းသည် ခက်ခဲပင်ပန်းသည်။ သူတို့အားပေးမှုလိုအပ်သည်။

^၂၃ သူတို့နှင့်ပူးပေါင်းဆောင်ရွက်ခြင်းဖြင့် ခရစ်ယာန်အသင်းတော်တွင် ကြီးကြပ်သောနေရာ၌ရှိသူများကို သင်အလွန်အမင်းအားပေးနိုင်သည်။ သို့ပြုလျှင်၊ သင်သည်ဟေဗြဲ ၁၃:၁၇ ရှိသွန်သင်ချက်ကို နာယူနေပေမည်။ “သင်တို့ကိုအုပ်သောသူတို့၏စကားကိုနားထောင်၍ နှိမ့်ချလျက်နေကြလော့။ သူတို့သည်ကိုယ်တိုင်စစ်ကြောခြင်းကို ခံရသောသူကဲ့သို့ သင်တို့စိတ်ဝိညာဉ်၏အကျိုးအလိုငှာစောင့်နေကြ၏။ သင်တို့အကျိုးကို မဖြစ်စေတတ်သော ဝမ်းနည်းခြင်းမရှိ၊ ဝမ်းမြောက်ခြင်းရှိ၍၊ သူတို့သည်စစ်ကြောခြင်းကိုခံရမည်အကြောင်း သတိပြုလျက်နေကြလော့။”

၂၄။ ဤစိတ်အားလျော့ရာအချိန်တွင် ကျွန်ုပ်တို့ဘာပြုလုပ်နေသင့်ပြီး၊ အဘယ်ကြောင့်နည်း။

^၂၄ ကျွန်ုပ်တို့သည်စိတ်အားလျော့ရာအချိန်တွင် အသက်ရှင်နေကြသည်။ ယေရှုကြိုတင်ဟောထားသကဲ့သို့ လူတို့၏နှလုံးသည်မြေကြီးပေါ်တွင် လာလတံ့သောဘေးဒုက္ခတို့ကိုမျှော်၍ အမှန်ပင်ကြောက်လန့်စိုးရိမ်နေကြသည်။ (လုကာ ၂၁:၂၅၊ ၂၆) စိတ်ဓာတ်ကျရန်နှင့်စိတ်ပျက်စေရန် ပြဿနာများလာသည်နှင့်အမျှ “သင်တို့သည်ယခုပင်ပြုသည်နည်းတူ၊ အချင်းချင်းတိုက်တွန်း၍ တစ်ယောက်ကိုတစ်ယောက် တည်ဆောက်ကြလော့” ဟူသည့် ၁ သက်သာလောနိတ် ၅:၁၁ ရှိတမန်တော်ပေါလု၏သွန်သင်ချက်ကောင်းကိုလိုက်နာပါလေ။

သင်မည်သို့ဖြေဆိုမည်နည်း

▫ အဘယ်ကြောင့်ယခင်ကထက် ခရစ်ယာန်ချင်းတစ်ဦးကိုတစ်ဦးပို၍ အားပေးတိုက်တွန်းသင့်သနည်း။

▫ မြင့်မြတ်သောနာမတော်အသိပညာသည် ယေဟောဝါလူမျိုးအတွက်မည်သို့ အားပေးမှုဖြစ်ခဲ့သနည်း။

▫ ကျွန်ုပ်တို့သည်တစ်ဦးနှင့်တစ်ဦး မည်သို့သောနည်းများဖြင့်တစ်ဦးချင်း အားပေးနိုင်သနည်း။

▫ ကျွန်ုပ်တို့သည်အဘယ်ကြောင့် မိမိတို့၏ညီအစ်ကိုများကို စိတ်ဓာတ်ကျစေသည့် မာရ်နတ်၏လုပ်ရပ်များတွင် မပါဝင်ပဲရှောင်ရှားသင့်သနည်း။

[စာမျက်နှာ ၂၀ ပါ ရုပ်ပုံ]

အကြီးအကဲများသည် သူတို့၏အသင်းတော်များတွင် အားပေးတိုက်တွန်းရာ၌ ဦးဆောင်သည်