ဘုရားသခင်နှင့်ယေရှုအကြောင်း သမ္မာကျမ်းစာ အဘယ်အရာ သွန်သင်သနည်း

လူတို့သည် သုံးပါးတစ်ဆူအယူဝါဒကို ကြိုတင်လက်ခံထားခြင်းမရှိဘဲ ကျမ်းစာကိုအစမှအဆုံးဖတ်မည်ဆိုပါက ထိုသို့ယူဆပါမည်လော။ လုံးဝယူဆမည်မဟုတ်။

သဘောထားမှန်သော စာရှုသူတစ်ဦးအနေဖြင့် ဘုရားသခင်တစ်ပါးတည်းသာ အနန္တတန်ခိုးရှင်၊ ဖန်ဆင်းရှင်၊ အခြားမည်သူနှင့်မျှမတူသော သီးခြားပုဂ္ဂိုလ်ဖြစ်ကြောင်း၊ ယေရှုသည် လူသားဘဝမတိုင်မီတွင်ပင် သီးခြားပုဂ္ဂိုလ်တစ်ဦးဖြစ်ပြီး ဖန်ဆင်းခံရသူ၊ ဘုရားသခင်ထက် အဆင့်နိမ့်သူဖြစ်ကြောင်း ရှင်းလင်းစွာသဘောပေါက်ပါလိမ့်မည်။

ဘုရားသခင်သည် တစ်ပါးတည်းဖြစ်တော်မူ၏၊ သုံးပါးမဟုတ်

ဘုရားသခင် တစ်ဆူတည်းရှိသည်ဟူသော ကျမ်းစာသွန်သင်ချက်ကို မိုနိုသီယယ်ဇင်မ် (ဘုရားသခင်တစ်ဆူတည်းရှိသည်ဟူသော အယူအဆ) ဟုခေါ်သည်။ ဘုရားသခင်တစ်ဆူတည်းရှိသည်ဟူသော အယူအဆသည် သုံးပါးပေါင်းတစ်ဆူကို လုံးဝလက်မခံကြောင်း ခရစ်ယာန်သာသနာ့သမိုင်းပါမောက္ခ အယ်လ်အယ်လ်ပိန်းက ဤသို့ဖော်ပြသည်– “ဘုရားသခင်တစ်ဆူတည်းရှိသည်ဟူသော အယူအဆကို ဓမ္မဟောင်းကျမ်းက အခိုင်အမာထောက်ခံသည်။ ဘုရားသခင်သည် တစ်ပါးတည်းဖြစ်၏။ သုံးပါးပေါင်းတစ်ဆူအယူဝါဒသည် . . . လုံးဝအခြေအမြစ်မရှိ။”

ဘုရားသခင်တစ်ဆူတည်းရှိသည်ဟူသော အယူအဆသည် ယေရှုမြေကြီးပေါ်ကြွလာပြီးနောက် ပြောင်းလဲသွားသလော။ ပိန်းက ဤသို့ဆက်ဆို၏– “ဤကိစ္စနှင့်ပတ်သက်၍ ဓမ္မဟောင်းကျမ်းနှင့် ဓမ္မသစ်ကျမ်းတွင် ကွဲပြားမှုမရှိ။ ဘုရားသခင်တစ်ဆူတည်းရှိသည်ဟူသော အယူအဆကို ဆက်ယုံကြည်လာကြသည်။ ယေရှုသည် ဂျူးလူမျိုးတစ်ဦးဖြစ်၏။ ဂျူးလူမျိုးမိဘများက ဓမ္မဟောင်းကျမ်းဖြင့် ယေရှုကို လေ့ကျင့်သွန်သင်ပေးခဲ့ကြသည်။ ကိုယ်တော့်သွန်သင်ချက်များသည် ဂျူးများအတွက် အဓိကဖြစ်သည်။ သတင်းအသစ်ဖြစ်သော်လည်း အယူဝါဒအသစ်မဟုတ်။ . . . ဘုရားသခင်တစ်ဆူတည်းရှိသည်ဟူသော ဂျူးတို့၏အယူဝါဒကိုဖော်ပြသည့် ဤကျမ်းချက်ကို ကိုယ်တော် ယုံကြည်လက်ခံသည်– ‘အို ဣသရေလအမျိုး၊ နားထောင်လော့။ ငါတို့၏ဘုရားသခင် ထာဝရဘုရားသည် တစ်ဆူတည်းသောထာဝရဘုရားဖြစ်တော်မူ၏။’”

ထိုစကားများကို တရားဟောရာ ၆:၄ တွင်တွေ့ရသည်။ ကက်သလစ် ဂျေရုဆလင်ကျမ်းသစ်တွင် ဤသို့ဖတ်ရသည်– “ဣသရေလအမျိုး၊ နားထောင်လော့။ ငါတို့၏ဘုရားသခင် ယာဝေးသည် တစ်ဆူတည်းသောယာဝေး ဖြစ်တော်မူ၏။”a ထိုအခန်းငယ်၏သဒ္ဒါပုံစံအရ “တစ်ဆူတည်း” ဟူသောစကားလုံးသည် အများကိန်းပုံစံ လုံးဝမပါဝင်သောကြောင့် တစ်ဦးတည်းကိုသာ ဆိုလိုသည်။

ယေရှုမြေကြီးပေါ် ကြွလာပြီးနောက်၌ပင် ဘုရားသခင်၏ဇာတိတော် လုံးဝမပြောင်းလဲကြောင်း တမန်တော်ပေါလု ဖော်ပြခဲ့သည်။ “ဘုရားသခင်သည် တစ်ပါးတည်း ဖြစ်တော်မူ၏” ဟုသူရေးသားခဲ့သည်။—ဂလာတိ ၃:၂၀၊ ကဘ; ၁ ကောရိန္သု ၈:၄-၆ ကိုလည်းရှု။

ဘုရားသခင်သည် ပုဂ္ဂိုလ်တစ်ပါးတည်းဖြစ်ကြောင်း သမ္မာကျမ်းစာတွင် အကြိမ်ပေါင်းထောင်နှင့်ချီ ဖော်ပြထားသည်။ ကိုယ်တော်စကားပြောစဉ် သီးခြားပုဂ္ဂိုလ်တစ်ပါးအဖြစ် ပြောဆိုတော်မူသည်။ ယင်းနှင့်ပတ်သက်၍ သမ္မာကျမ်းစာ ရှင်းရှင်းလင်းလင်း ဖော်ပြသည်။ ဘုရားသခင် ဤသို့ဆိုသည်– “ငါသည် ယေဟောဝါဖြစ်၏။ ထိုနာမသည် ငါ့နာမဖြစ်၏။ ငါ့ဘုန်းကို အခြားသောသူအား . . . ငါမပေး။” (ဟေရှာယ ၄၂:၈၊ ကဘ) “ငါသည် . . . သင်၏ဘုရားသခင် ယာဝေးဖြစ်၏။ ငါမှတစ်ပါး အခြားသောဘုရားကို မကိုးကွယ်နှင့်။”—ထွက်မြောက်ရာ ၂၀:၂၊ ၃၊ ဂျေရုဆလင်ကျမ်း။

ဘုရားသခင်သည် အမှန်ပင် ပုဂ္ဂိုလ်သုံးပါးဖြစ်လျှင် မှုတ်သွင်းခံကျမ်းရေးသူအားလုံးက တစ်ပါးတည်းဖြစ်သည်ဟု အဘယ်ကြောင့်ဆိုကြသနည်း။ ယင်းသည် လူတို့ကို ထင်ယောင်ထင်မှားဖြစ်စေရုံမှလွဲ၍ အဘယ်အရာဖြစ်စေမည်နည်း။ မှန်ပါသည်၊ ဘုရားသခင်သာ ပုဂ္ဂိုလ်သုံးပါးဖြစ်ပါက ယင်းနှင့်ပတ်သက်၍ သံသယမရှိစေရန် ကျမ်းရေးသူများကို ရှင်းရှင်းလင်းလင်း ရေးသားစေပေလိမ့်မည်။ ယုတ်စွအဆုံး ဘုရားသခင့်သားတော်နှင့် ရင်းရင်းနှီးနှီးဆက်ဆံခဲ့ကြသော ခရစ်ယာန်ဂရိကျမ်းရေးသူများ ထိုသို့ရေးသားကြပေမည်။ သို့သော် သူတို့ ထိုသို့မရေးသားခဲ့ကြပေ။

ယင်းအစား ဘုရားသခင်သည် ပြိုင်ဘက်မရှိသော သီးခြားပုဂ္ဂိုလ် တစ်ပါးတည်းဖြစ်ကြောင်း သူတို့ ရှင်းရှင်းလင်းလင်းရေးသားခဲ့၏။ “ငါတစ်ပါးတည်းသာ ယေဟောဝါဖြစ်၏။ ငါမှတစ်ပါး အခြားသောဘုရားသခင်မရှိ။” (ဟေရှာယ ၄၅:၅၊ ကဘ) “ယေဟောဝါဟူ၍ နာမတော်ရှိသော ကိုယ်တော်တစ်ပါးတည်းသာလျှင် မြေကြီးတစ်ပြင်လုံးအပေါ်မှာ အမြင့်ဆုံးသောဘုရားဖြစ်တော်မူကြောင်းကို သိကြပါစေ။”—ဆာလံ ၈၃:၁၈၊ ကဘ။

ပုဂ္ဂိုလ်အများပါသော ဘုရားမဟုတ်

ဘုရားသခင်ကို “မှန်သောဘုရားသခင်တစ်ဆူတည်း” ဟုယေရှုခေါ်ဆိုခဲ့သည်။ (ယောဟန် ၁၇:၃) ဘုရားသခင်ကို ပုဂ္ဂိုလ်အများပါသော ဘုရားတစ်ပါးအဖြစ် ကိုယ်တော် တစ်ခါမျှမဖော်ပြခဲ့ပေ။ ထို့ကြောင့် ကျမ်းစာတွင် ယေဟောဝါတစ်ပါးတည်းမှလွဲ၍ မည်သူ့ကိုမျှ အနန္တတန်ခိုးရှင်ဟု မခေါ်ထားပေ။ ထိုသို့မဟုတ်ပါက “အနန္တတန်ခိုးရှင်” ဟူသောစကား၏အဓိပ္ပာယ်သည် အချည်းနှီးပင်ဖြစ်သည်။ ယေရှုနှင့် သန့်ရှင်းသောဝိညာဉ်တော်ကိုလည်း ထိုသို့မခေါ်ထားပေ၊ အကြောင်းမှာ ယေဟောဝါတစ်ပါးတည်းသာ အမြင့်မြတ်ဆုံးဖြစ်သောကြောင့် ဖြစ်၏။ ကမ္ဘာဦး ၁၇:၁ တွင် ယေဟောဝါက “ငါသည် အနန္တတန်ခိုးရှင်ဘုရားသခင်ဖြစ်၏” ဟုမိန့်ဆိုသည်။ ထွက်မြောက်ရာ ၁၈:၁၁ တွင် “ထာဝရဘုရားသည် အခြားသောဘုရားရှိသမျှတို့ထက် သာ၍ကြီးမြတ်” ၏ဟုဆိုထားသည်။

ဟေဗြဲကျမ်းစာ၌ အီလိုအာ (ဘုရား) ဟူသောစကားလုံးတွင် အီလိုဟင်မ် (ဘုရားများ) နှင့် အီလိုဟာ (ဘုရားများ၏) ဟူ၍အများကိန်းပုံစံနှစ်မျိုးရှိသည်။ ထိုအများကိန်းပုံစံများသည် ယေဟောဝါကို ရည်ညွှန်းလေ့ရှိပြီး ထိုသို့ရည်ညွှန်းသည့်အခါ “ဘုရား” ဟူသည့် အနည်းကိန်းဖြင့် ပြန်ဆိုကြသည်။ ထိုအများကိန်းပုံစံများက သုံးပါးပေါင်းတစ်ဆူကို ရည်ညွှန်းနေခြင်းလော။ မဟုတ်ပါ။ သမ္မာကျမ်းစာအဘိဓာန်တွင် ဝီလျံစမစ်သ်က ဤသို့ဆို၏– “[အီလိုဟင်မ်] သည် သုံးပါးပေါင်းတစ်ဆူကို ရည်ညွှန်းသည်ဟူသော လက်တွေ့မကျသည့်အယူအဆကို ထောက်ခံသူ ကျမ်းပညာရှင်တစ်ဦးမျှပင် မတွေ့နိုင်ပေ။ ယင်းသည် သဒ္ဒါဆရာများအခေါ်အရ မြင့်မြတ်မှုဆိုင်ရာအများကိန်း သို့မဟုတ် ဘုရားသခင့်အစွမ်းခွန်အား၏ ပြည့်ဝမှု၊ ဘုရားသခင်ဖော်ပြသော တန်ခိုးအလုံးစုံကို ရည်ညွှန်းနိုင်သည်။”

ဆီးမိုက်ဘာသာစကားနှင့်စာပေများဆိုင်ရာ အမေရိကန်ဂျာနယ်က အီလိုဟင်မ်နှင့်ပတ်သက်၍ ဤသို့ဆို၏– “ယင်းကို ကြိယာအနည်းကိန်း၊ နာမဝိသေသနအနည်းကိန်းအဖြစ် အမြဲလိုလိုပြန်ဆိုလေ့ရှိသည်။” ဥပမာ၊ ဖန်ဆင်းခြင်းမှတ်တမ်းတွင် အီလိုဟင်မ် ၃၅ ကြိမ်ပါဝင်ပြီး အကြိမ်တိုင်းတွင် ဘုရားသခင်ပြောဆိုပြုလုပ်ရာကို ဖော်ပြသည့်ကြိယာမှာ အနည်းကိန်းဖြစ်သည်။ (ကမ္ဘာဦး ၁:၁–၂:၄) ထို့ကြောင့် အဆိုပါဂျာနယ်က “[အီလိုဟင်မ်] ကို ကြီးမြတ်မှုနှင့် မြင့်မြတ်မှုကိုဖော်ပြသော လေးနက်မှုပြအများကိန်းအဖြစ် အနက်ဖွင့်ဆိုရမည်” ဟုနိဂုံးချုပ်သည်။

အီလိုဟင်မ်သည် “ပုဂ္ဂိုလ်များ” ကိုမဆိုလိုဘဲ “ဘုရားများ” ကိုဆိုလို၏။ ထို့ကြောင့် ယင်းစကားလုံးက သုံးပါးပေါင်းတစ်ဆူကို ရည်ညွှန်းသည်ဟုဆိုသူတို့သည် ဘုရားများစွာကို ဝတ်ပြုသူများဖြစ်သွားကြသည်။ အဘယ်ကြောင့်နည်း။ အကြောင်းမှာ ယင်းက သုံးပါးပေါင်းတစ်ဆူတွင် ဘုရားသုံးပါးပါဝင်သည်ဟု ဆိုလို၏။ သို့သော် သုံးပါးပေါင်းတစ်ဆူကို ထောက်ခံသူအားလုံးနီးပါးက ယင်းတွင် သီးခြားဖြစ်သော ဘုရားသုံးပါးပါဝင်သည်ဟူသောအချက်ကို ငြင်းပယ်ကြသည်။

မှားယွင်းသောရုပ်တုဘုရားများကို ရည်ညွှန်းရာတွင်လည်း အီလိုဟင်မ်နှင့် အီလိုဟာဟူသောစကားလုံးများကို ကျမ်းစာအသုံးပြုထားသည်။ (ထွက်မြောက်ရာ ၁၂:၁၂; ၂၀:၂၃) သို့သော် ဖိလိတ္တိလူတို့သည် “သူတို့ဘုရား [အီလိုဟာ] ဒါဂုန်” ကိုရည်ညွှန်းခြင်းကဲ့သို့ မှားယွင်းသောဘုရားတစ်ပါးကိုသာ ရည်ညွှန်းသည့်အခါများလည်း ရှိနိုင်သည်။ (တရားသူကြီး ၁၆:၂၃၊ ၂၄) ဗာလကို “ဘုရား[အီလိုဟင်မ်]” ဟုခေါ်ထားသည်။ (၃ ဓမ္မရာဇဝင် ၁၈:၂၇) ထို့ပြင် ယင်းစကားလုံးကို လူသားများအတွက်လည်း အသုံးပြုသည်။ (ဆာလံ ၈၂:၁၊ ၆) မောရှေသည် အာရုန်နှင့်ဖာရောအတွက် “ဘုရား [အီလိုဟင်မ်]” အဖြစ် အမှုဆောင်ရမည်ဟု မိန့်မှာခံခဲ့ရသည်။—ထွက်မြောက်ရာ ၄:၁၆; ၇:၁။

အီလိုဟင်မ်နှင့် အီလိုဟာဟူသောစကားလုံးများကို မှားယွင်းသောဘုရားများ၊ လူသားများအတွက်ပင်အသုံးပြုခြင်းက သူတို့တစ်ဦးစီကို ဘုရားများအဖြစ် ရည်ညွှန်းနေခြင်းမဟုတ်ကြောင်း ထင်ရှားပါသည်။ အလားတူ၊ အီလိုဟင်မ်နှင့် အီလိုဟာဟူသောစကားလုံးများကို ယေဟောဝါအတွက်အသုံးပြုခြင်းက ကိုယ်တော်သည် ပုဂ္ဂိုလ်တစ်ပါးထက်မကဖြစ်ကြောင်း ရည်ညွှန်းနေခြင်း မဟုတ်ပေ။ အထူးသဖြင့် ထိုအကြောင်းနှင့်ပတ်သက်၍ ကျန်ရှိသော ကျမ်းစာအထောက်အထားများကို သုံးသပ်ကြည့်ပါက ထင်ရှားပါသည်။

ယေရှုသည် သီးခြားပုဂ္ဂိုလ်တစ်ပါးဖြစ်

ယေရှုသည် မြေကြီးပေါ်ရှိစဉ်က လူသားတစ်ဦးဖြစ်သော်လည်း စုံလင်သူဖြစ်၏။ အကြောင်းမှာ ဘုရားသခင်သည် ကိုယ်တော့်အသက်ကို မာရိ၏သားအိမ်အတွင်းသို့ ရွှေ့ပြောင်းပေးခဲ့သောကြောင့် ဖြစ်သည်။ (မဿဲ ၁:၁၈-၂၅) သို့သော် ယင်းသည် ကိုယ်တော်၏မူလအစမဟုတ်ပေ။ မိမိသည် “ကောင်းကင်ဘုံက ဆင်းသက်” လာကြောင်း ကိုယ်တော်တိုင် မိန့်ဆိုခဲ့၏။ (ယောဟန် ၃:၁၃) ထို့ကြောင့် နောက်ပိုင်းတွင် “လူသား[ယေရှု]သည် အရင်နေရာအရပ်သို့ တစ်ဖန်ကြွတက်သည်ကိုမြင်ရလျှင် အဘယ်သို့ထင်မှတ်ကြသနည်း” ဟုနောက်လိုက်များကို ကိုယ်တော်မေးခြင်းမှာ သဘာဝကျပါသည်။—ယောဟန် ၆:၆၂။

သို့ဖြစ်၍ ယေရှုသည် မြေကြီးပေါ်မကြွလာမီ ကောင်းကင်တွင်ရှိခဲ့သည်။ သို့သော် အနန္တတန်ခိုးရှင်၊ သုံးပါးတစ်ဆူအဝင် ထာဝရဘုရားအဖြစ်လော။ မဟုတ်ပါ။ အကြောင်းမှာ လူသားဘဝမတိုင်မီက ယေရှုသည် ဘုရားသခင်ဖန်ဆင်းခဲ့သော နာမ်ဝိညာဉ်သား ကောင်းကင်တမန်များကဲ့သို့ပင် ဖန်ဆင်းခံ နာမ်ဝိညာဉ်သားတစ်ဦးဖြစ်ကြောင်း ကျမ်းစာကရှင်းလင်းစွာဖော်ပြထား၍တည်း။ ယေရှုနှင့် ကောင်းကင်တမန်များသည် ဖန်ဆင်းခြင်းမခံရမီ လုံးဝမတည်ရှိခဲ့ပေ။

လူသားဘဝမတိုင်မီက ယေရှုသည် “ဖန်ဆင်းခြင်းအားလုံး၏သားဦးဖြစ်တော်မူ၏။” (ကောလောသဲ ၁:၁၅၊ ကက်သလစ်ကျမ်းစာတော်မြတ်) ကိုယ်တော်သည် “ဘုရားသခင်၏ဖန်ဆင်းတော်မူခြင်းတွင် အစမူလ” ဖြစ်တော်မူ၏။ (ဗျာဒိတ် ၃:၁၄၊ ကက်သလစ်ကျမ်းစာတော်မြတ်) “အစမူလ” [ဂရိ၊ အာခဲ] ဟုဆိုသောကြောင့် ဘုရားသခင့်ဖန်ဆင်းရာများကို ‘အစပြုသူ’ ဟူ၍မဆိုလိုပါ။ ယောဟန်သည် သူရေးသားသောကျမ်းတွင် ဂရိစကားလုံး အာခဲကို အကြိမ်ပေါင်း ၂၀ ကျော်သုံးထားပြီး ယင်းတို့၏ယေဘုယျအဓိပ္ပာယ်မှာ “အစမူလ” ဖြစ်သည်။ မှန်ပါသည်၊ ဘုရားသခင်သည် ယေရှုကို မျက်မြင်မရဖန်ဆင်းရာများ၏အစမူလအဖြစ် ဖန်ဆင်းခဲ့သည်။

ယေရှု၏အစမူလနှင့် သုတ္တံကျမ်းပါ ပုံဆောင် “ဉာဏ်ပညာ” ပြောဆိုသောစကားများ အပြန်အလှန်ဆက်စပ်ပုံကို သတိပြုပါ။ “ထာဝရဘုရားသခင်သည် ရှေးပဝေသဏီအခါက ငါ့အား ဦးစွာပထမ ဖန်ဆင်းတော်မူ၏။ ငါသည် ကိုယ်တော်၏အဦးဆုံးသောလက်ရာတော်ဖြစ်၏။ တောင်တန်းများ မဖြစ်ပေါ်မီ၊ တောင်ကုန်းများမတည်ရှိမီ ငါ့ကိုပေါ်ထွန်းစေတော်မူခဲ့၏။ ကမ္ဘာမြေကြီးနှင့်လယ်ကွင်းများ မဖြစ်ပေါ်မီ၊ ဦးဆုံးမြေမှုန့်ကိုပင် ထာဝရဘုရားသခင်ဖန်ဆင်းတော်မမူမီ ငါ့ကိုတည်ရှိစေတော်မူခဲ့၏။” (သုတ္တံ ၈:၁၂၊ ၂၂၊ ၂၅၊ ၂၆၊ ကက်သလစ်ကျမ်းစာတော်မြတ်) “ဉာဏ်ပညာ” ကို ဘုရားသခင့်ဖန်ဆင်းခံပုဂ္ဂိုလ်အဖြစ် တင်စားထားသောကြောင့် ယင်းသည် လူသားဘဝမတိုင်မီက နာမ်ဝိညာဉ်သတ္တဝါအဖြစ်ရှိခဲ့သော ယေရှုကို တင်စားပြောဆိုနေကြောင်း ကျမ်းပညာရှင်များစွာ သဘောတူကြသည်။

လူသားဘဝမတိုင်မီက “ဉာဏ်ပညာ” အနေဖြင့် ယေရှုက “ငါသည် အတူပါဝင်တည်ဆောက်သူတစ်ဦးကဲ့သို့ ကိုယ်တော်[ဘုရားသခင်]၏အပါး၌ ရှိနေခဲ့၏” ဟုဆိုသည်။ (သုတ္တံ ၈:၃၀၊ ကက်သလစ်ကျမ်းစာတော်မြတ်) အတူပါဝင်တည်ဆောက်သူတစ်ဦးအဖြစ် ကိုယ်တော့်အခန်းကဏ္ဍနှင့်လျော်ညီစွာ ကောလောသဲ ၁:၁၆ တွင် ‘ထိုသားတော်အားဖြင့် ဘုရားသခင်သည် ကောင်းကင်နှင့် ကမ္ဘာမြေပေါ်ရှိ အရာဟူသမျှကို ဖန်ဆင်းတော်မူသည်’ ဟုဆိုထားသည်။—ခေတ်သုံးမြန်မာသမ္မာကျမ်း (ခမ)။

ထို့ကြောင့် အနန္တတန်ခိုးရှင်ဘုရားသခင်သည် မိမိထက်အဆင့်နိမ့်သော ထိုကျွမ်းကျင်လုပ်သားအားဖြင့် အရာခပ်သိမ်းကို ဖန်ဆင်းခဲ့သည်။ ယင်းနှင့်ပတ်သက်၍ ကျမ်းစာက ဤသို့အကျဉ်းချုပ်ဖော်ပြ၏– “ငါတို့အတွက်မှာမူ အဖဘုရားသခင်တစ်ဆူတည်းသာရှိပြီး ကိုယ်တော့်ထံမှ ခပ်သိမ်းသောအရာတို့သည် ဖြစ်လာကြ၍ . . . ယေဇူးခရစ်တော်တည်းဟူသော အရှင်သခင်တစ်ပါးတည်းသာရှိပြီး ခပ်သိမ်းသောအရာတို့သည် ကိုယ်တော်အားဖြင့် တည်ရှိ . . . ကြ၏။”—၁ ကောရိန္သု ၈:၆၊ ကက်သလစ်ကျမ်းစာတော်မြတ်။

“ငါတို့ပုံသဏ္ဌာန်နှင့်တညီတသဏ္ဌာန်တည်း လူကိုဖန်ဆင်းကြစို့” ဟုဘုရားသခင် မိန့်ဆိုရာတွင် ထိုကျွမ်းကျင်လုပ်သားကို မိန့်ဆိုနေခြင်းဖြစ်သည်မှာ ရှင်းနေပါသည်။ (ကမ္ဘာဦး ၁:၂၆) အချို့က “ငါတို့” နှင့် “ကြစို့” ဟူသောအသုံးအနှုန်းများသည် သုံးပါးတစ်ဆူကိုရည်ညွှန်းသည်ဟု ဆိုကြ၏။ သို့သော် ‘ငါတို့အတွက် တစ်ခုခုလုပ်ကြစို့’ ဟုသင်ပြောသည်ဆိုပါစို့။ ယင်းက လူများစွာသည် သင့်ကိုယ်ထဲတွင် တစ်ဦးတည်းအဖြစ်ပေါင်းနေခြင်းကို ဆိုလိုသည်ဟု မည်သူကမျှ ယူဆမည်မဟုတ်။ နှစ်ဦး သို့မဟုတ် ထို့ထက်များသောလူများ စုပေါင်းပြီး တစ်ခုခုပြုလုပ်မည်ဟုသာ ဆိုလိုခြင်းဖြစ်သည်။ အလားတူ၊ “ငါတို့” နှင့် “ကြစို့” ဟူသောအသုံးအနှုန်းများကို ဘုရားသခင်အသုံးပြုရာတွင် နောက်ပုဂ္ဂိုလ်တစ်ဦး၊ မိမိဦးဆုံးဖန်ဆင်းသော နာမ်ဝိညာဉ်သား၊ ကျွမ်းကျင်လုပ်သား၊ လူသားဘဝမတိုင်မီကယေရှုကို ပြောနေခြင်းဖြစ်သည်။

ဘုရားသခင်ကို စုံစမ်းသွေးဆောင်နိုင်သလော

မဿဲ ၄:၁ တွင် ယေရှုကို ‘မာရ်နတ် သွေးဆောင်လေ၏’ ဟု ဖော်ပြသည်။ စာတန်သည် ယေရှုအား “လောကတိုင်းနိုင်ငံရှိသမျှနှင့် ယင်းတို့၏ဘုန်းစည်းစိမ်ကိုပြ” ပြီးနောက် “သင်သည် ငါ့ကို တစ်ကြိမ်သာ ပျပ်ဝပ်၍ ကိုးကွယ်လျှင် ဤအရာရှိသမျှတို့ကို ငါပေးမည်” ဟုဆို၏။ (မဿဲ ၄:၈၊ ၉၊ ကဘ) ဘုရားသခင်အပေါ် ယေရှု သစ္စာသမာဓိချိုးဖောက်စေရန် စာတန်ကြိုးပမ်းခဲ့သည်။

သို့သော် ယေရှုသာ ဘုရားသခင်ဖြစ်သည်ဆိုလျှင် ကိုယ်တော်၏သစ္စာသမာဓိကို စမ်းသပ်ခြင်းသည် အဘယ်အဓိပ္ပာယ်ရှိမည်နည်း။ ဘုရားသခင်သည် မိမိကိုယ်ကို ပြန်၍ပုန်ကန်နိုင်ပါမည်လော။ လုံးဝပင်၊ သို့သော် ကောင်းကင်တမန်များနှင့် လူသားတို့သည် ဘုရားသခင်ကို ပုန်ကန်နိုင်ပြီး ပုန်ကန်ခဲ့ကြသည်။ ယေရှုသည် ဘုရားသခင်မဟုတ်ဘဲ မိမိဆန္ဒအတိုင်း လွတ်လပ်စွာလုပ်နိုင်သည့် သီးခြားပုဂ္ဂိုလ်တစ်ဦးဖြစ်မှသာလျှင်၊ ကောင်းကင်တမန်တစ်ပါး သို့မဟုတ် လူသားတစ်ဦးကဲ့သို့ သမာဓိချိုးဖောက်ရန် ရွေးချယ်မည်ဆိုပါက ရွေးချယ်နိုင်သူဖြစ်မှသာလျှင် ကိုယ်တော်ကိုစမ်းသပ်ခြင်းသည် အဓိပ္ပာယ်ရှိပေလိမ့်မည်။

တစ်ဖက်တွင်၊ ဘုရားသခင်သည် အပြစ်ပြုနိုင်ပြီး မိမိကိုယ်ကို သစ္စာသမာဓိချိုးဖောက်နိုင်သည်ဟူသောအချက်မှာ လုံးဝမဖြစ်နိုင်ပေ။ ဘုရားသခင်၏ “အမှုတော်သည် စုံလင်ပေ၏။ . . . သစ္စာစောင့်သောဘုရား၊ အပြစ်ကင်းလွတ်၍ ဟုတ်မှန်ဖြောင့်မတ်သောဘုရားဖြစ်တော်မူ၏။” (တရားဟောရာ ၃၂:၄) ထို့ကြောင့် ယေရှုသည် ဘုရားသခင်ဖြစ်သည်ဆိုလျှင် ကိုယ်တော်ကို စုံစမ်းသွေးဆောင်နိုင်မည်မဟုတ်ပေ။—ယာကုပ် ၁:၁၃။

ယေရှုသည် ဘုရားသခင်မဟုတ်သောကြောင့် သစ္စာသမာဓိချိုးဖောက်မိနိုင်သည်။ သို့သော် ကိုယ်တော် သစ္စာတည်ကြည်ခဲ့၏။ “အချင်းစာတန်၊ ထွက်သွားလော့။ ‘သင်၏ဘုရားသခင် ယေဟောဝါကို ကိုးကွယ်ရမည်။ ကိုယ်တော်တစ်ပါးတည်းကိုသာ ဝတ်ပြုရမည်’ ဟူ၍ ကျမ်းစာ၌ ရေးထားသည်” ဟုကိုယ်တော်မိန့်ဆိုတော်မူ၏။—မဿဲ ၄:၁၀၊ ကဘ။

ရွေးနုတ်ဖိုး၏တန်ဖိုး

ယေရှု မြေကြီးပေါ်ကြွလာရသည့် အဓိကအကြောင်းရင်းများထဲမှ တစ်ခုသည် သုံးပါးပေါင်းတစ်ဆူနှင့် တိုက်ရိုက်သက်ဆိုင်၏။ ကျမ်းစာက ဤသို့ဆိုသည်– “ဘုရားသခင် တစ်ဆူတည်းရှိတော်မူ၏။ ဘုရားသခင်နှင့် လူတို့စပ်ကြားတွင် လူဖြစ်သူ ခရစ်တော်ယေရှုတည်းဟူသော ဖျန်ဖြေသူ တစ်ပါးတည်းရှိ၏။ ကိုယ်တော်သည် လူအပေါင်းတို့အတွက် ညီမျှသော ရွေးနုတ်ဖိုးအဖြစ် မိမိကိုယ်ကို ပေးဆက်တော်မူခဲ့၏။”—၁ တိမောသေ ၂:၅၊ ၆၊ ကဘ။

စုံလင်သောလူသားယေရှုသည် မြေကြီးပေါ်စုံလင်သောအသက်တာ ရပိုင်ခွင့်ဖြစ်သည့် အာဒံဆုံးရှုံးခဲ့ရာကို အစားလျော်ပေးရန် ရွေးနုတ်ဖိုးပေးခဲ့၏။ ထို့ကြောင့် ပေါလုက ယေရှုကို “နောက်ဆုံးသောအာဒံ” ဟုမှန်ကန်စွာခေါ်ဆိုခဲ့ပြီး “လူအပေါင်းတို့သည် အာဒံကြောင့် သေဆုံးကြရသည့်နည်းတူ လူအပေါင်းတို့သည်လည်း ခရစ်တော်ကြောင့် အသက်ရှင်ကြရလိမ့်မည်” ဟုဆိုခဲ့သည်။ (၁ ကောရိန္သု ၁၅:၂၂၊ ၄၅၊ ကဘ) ယေရှု၏စုံလင်သော လူ့အသက်သည် ဘုရားသခင့်တရားမျှတမှုက တောင်းဆိုသောအရာထက် မပိုမလျော့သော “ညီမျှသောရွေးနုတ်ဖိုး” ဖြစ်သည်။ တရားမျှတမှုနှင့်ပတ်သက်၍ လူတို့ချမှတ်သောအခြေခံမူတွင်ပင် ပေးဆပ်ရသောတန်ဖိုးသည် ကျူးလွန်ခဲ့သောအရာနှင့် တန်ဖိုးတူရမည်။

သို့သော် ယေရှုသည် သုံးပါးတစ်ဆူတွင်ပါဝင်သည်ဆိုလျှင် ရွေးနုတ်ဖိုး၏တန်ဖိုးမှာ ဘုရားသခင့်ပညတ်တော်တောင်းဆိုရာထက် အဆပေါင်းများစွာ သာလွန်နေပေလိမ့်မည်။ (ထွက်မြောက်ရာ ၂၁:၂၃-၂၅; ဝတ်ပြုရာ ၂၄:၁၉-၂၁) ဧဒင်တွင်အပြစ်ပြုခဲ့သူမှာ စုံလင်သောလူသားအာဒံဖြစ်ပြီး ဘုရားသခင်မဟုတ်ပါ။ ထို့ကြောင့် ဘုရားသခင့်တရားမျှတမှုနှင့် အမှန်တကယ်ကိုက်ညီနိုင်ရန် ရွေးနုတ်ဖိုးသည် လုံးဝတန်ဖိုးတူဖြစ်ရမည်။ ယင်းသည် စုံလင်သောလူသားဖြစ်သည့် “နောက်ဆုံးသောအာဒံ” ပင်ဖြစ်သည်။ ထို့ကြောင့် ဘုရားသခင်သည် ယေရှုကို ရွေးနုတ်ဖိုးအဖြစ် မြေကြီးသို့စေလွှတ်ချိန်တွင် တရားမျှတမှုနှင့်အညီ လုပ်ဆောင်ခဲ့သည်။ လူဝင်စားခြင်းမဟုတ်၊ ဘုရားတစ်ပိုင်း လူတစ်ပိုင်းလည်းမဟုတ်၊ “ကောင်းကင်တမန်များထက် အနည်းငယ်နိမ့်ကျသော” စုံလင်သည့်လူသားအဖြစ် စေလွှတ်ခဲ့သည်။ (ဟေဗြဲ ၂:၉၊ ကဘ; ဆာလံ ၈:၄-၈ နှင့်နှိုင်းယှဉ်။) ခမည်းတော်၊ သားတော်၊ သန့်ရှင်းသောဝိညာဉ်တော် သုံးပါးပေါင်းတစ်ဆူ အနန္တတန်ခိုးရှင်ဘုရားတွင် ပါဝင်သူတစ်ပါးသည် ကောင်းကင်တမန်တို့ထက် နိမ့်ကျနိုင်ပါမည်လော။

“တစ်ပါးတည်းသောသား” မည်သို့ဖြစ်

သမ္မာကျမ်းစာက ယေရှုကို ဘုရားသခင်၏ “တစ်ပါးတည်းသောသားတော်” ဟုခေါ်ထားသည်။ (ယောဟန် ၁:၁၄; ၃:၁၆၊ ၁၈; ၁ ယောဟန် ၄:၉) သုံးပါးပေါင်းတစ်ဆူဝါဒီများက ဘုရားသခင်သည် ထာဝရဘုရားဖြစ်သောကြောင့် ဘုရားသခင်၏သားတော်သည်လည်း ထာဝရဘုရားဖြစ်၏ဟု ဆိုကြသည်။ သို့သော် ဖခင်နှင့်အသက်အရွယ်တန်းတူရှိသူတစ်ဦးသည် မည်သည့်နည်းဖြင့် သားဖြစ်နိုင်မည်နည်း။

“တစ်ပါးတည်းသောသားတော်” (only–begotten) ဟူသည့်စကားလုံးသည် “ကလေးတစ်ဦး၏ဖခင်ဖြစ်လာသည်” ဟုအဘိဓာန်တွင်ဖွင့်ဆိုထားသော (begetting) နှင့်တူ၏။ (ဝက်ဘ်စတား၏ နဝမအကြိမ်မြောက် အဘိဓာန်သစ်) သို့သော် သုံးပါးတစ်ဆူဝါဒီများက ယေရှု၏အဖြစ်တွင် ထိုအဓိပ္ပာယ်ကိုမဆိုလိုဟု ဆိုကြသည်။ ယင်းသည် “အစမရှိသောတော်စပ်မှု၊” ဖခင်တစ်ဦးမှမွေးဖွားလာခြင်းမဟုတ်သော သားတစ်ဦး၏တော်စပ်မှုကိုဆိုလိုသည်ဟု သူတို့ဆိုကြ၏။ (ဗိုင်း၏ဓမ္မဟောင်းနှင့် ဓမ္မသစ်ကျမ်းစကားလုံးများ ရှင်းလင်းချက်အဘိဓာန်) ယင်းသည် သင့်အတွက် ကျိုးကြောင်းညီညွတ်မှုရှိပါသလော။ လူတစ်ဦးသည် သားဖြစ်သူကို မမွေးဖွားဘဲ ထိုသား၏ဖခင်ဖြစ်လာနိုင်သလော။

ထို့ပြင် သမ္မာကျမ်းစာတွင် အာဗြဟံနှင့်ဣဇာက်တို့၏ တော်စပ်မှုကိုဖော်ပြရန် “တစ်ပါးတည်းသောသားတော်” (only–begotten) ဟုပြန်ဆိုသည့် ဂရိစကားလုံးကိုပင် အဘယ်ကြောင့် အသုံးပြုထားသနည်း။ ဟေဗြဲ ၁၁:၁၇ [ကဘ] တွင် ဣဇာက်ကို အာဗြဟံ၏ “တစ်ဦးတည်းသောသား” ဟုဆိုထားသည်။ ဣဇာက်၏အဖြစ်တွင် သူသည် တစ်ဦးတည်းသောသားဖြစ်ပြီး ဖခင်နှင့် အသက်အရွယ်ကော၊ အနေအထားပါမတူညီကြောင်း ရှင်းနေပါသည်။

ယေရှုနှင့်ဣဇာက်အတွက် အသုံးပြုထားသော “တစ်ပါးတည်းသောသားတော်” (only–begotten) ဟုပြန်ဆိုသည့် ဂရိစကားလုံးမှာ မိုနိုဂီနဲစ် ဖြစ်ပြီး “တစ်ပါးတည်း” ဟုအဓိပ္ပာယ်ရသော မိုနော့စ်နှင့် “ဖြစ်ပွားစေသည်၊” “ဖြစ်လာစေသည်” ဟုအဓိပ္ပာယ်ရသော ဂီနိုမိုင်တို့မှ ဆင်းသက်လာသည်ဟု စထရောင်း၏ မှန်ပြမာတိကာအကျယ်ကဆိုသည်။ ထို့ကြောင့် မိုနိုဂီနဲစ်သည် “တစ်ဦးတည်းမွေးဖွားသော၊ တစ်ဦးတည်းသောကလေး” ဟုအဓိပ္ပာယ်ရသည်။—အီးရော်ဘင်စင်ပြန်ဆိုသော ဓမ္မသစ်ကျမ်း၏ ဂရိနှင့်အင်္ဂလိပ်အဘိဓာန်။

ဂေရ်ဟာ့ထ်ကိတယ်လ်ပြုစုသော ဓမ္မသစ်ကျမ်း၏ဘာသာရေးဆိုင်ရာ အဘိဓာန်၏အဆိုအရ “[မိုနိုဂီနဲစ်] သည် ‘တစ်ဦးတည်းသောမျိုးဆက်၊’ ညီအစ်ကိုမောင်နှမ မရှိခြင်းကို ဆိုလိုသည်။” ယောဟန် ၁:၁၈; ၃:၁၆၊ ၁၈; ၁ ယောဟန် ၄:၉ တွင် “ယေရှု၏တော်စပ်ပုံကို ဖခင်ဖြစ်သူ၏တစ်ဦးတည်းသောသားနှင့် နှိုင်းယှဉ်ပြနေရုံသာမဟုတ်။ ကိုယ်တော်သည် ခမည်းတော်၏တစ်ပါးတည်းသောသားတော် ဖြစ်သည်” ဟုယင်းကဆက်ဆိုသည်။

ထို့ကြောင့် တစ်ပါးတည်းသောသားတော် ယေရှုတွင် မူလအစရှိသည်။ အာဗြဟံသည် ဣဇာက်၏ဖခင်ဖြစ်သည့်နည်းတူ အနန္တတန်ခိုးရှင်ဘုရားသခင်သည်လည်း ယေရှုကိုဖြစ်ပွားစေသူ သို့မဟုတ် ယေရှု၏ခမည်းတော်ဖြစ်သည်ဟုဆိုနိုင်သည်။ (ဟေဗြဲ ၁၁:၁၇) ထို့ကြောင့် ကျမ်းစာက ဘုရားသခင်ကို ယေရှု၏ “ခမည်းတော်” အဖြစ်ဖော်ပြရာတွင် သူတို့သည် သီးခြားပုဂ္ဂိုလ်နှစ်ပါးဖြစ်ကြောင်း ဆိုလိုနေခြင်းဖြစ်သည်။ ဘုရားသခင်သည် ပို၍မြင့်မြတ်တော်မူ၏။ ယေရှုသည် အသက်အရွယ်၊ ရာထူး၊ တန်ခိုးအာဏာ၊ အသိပညာတို့တွင် ဘုရားသခင်ထက် အဆင့်နိမ့်သည်။

ကောင်းကင်တွင် ယေရှုတစ်ဦးတည်းကိုသာ နာမ်ဝိညာဉ်သားအဖြစ် ဘုရားသခင် မဖန်ဆင်းခဲ့ကြောင်း စဉ်းစားကြည့်လျှင် ယေရှုအား “တစ်ပါးတည်းသောသားတော်” ဟုခေါ်ဆိုရသည့် အကြောင်းရင်းကို သိနိုင်ပါသည်။ မရေမတွက်နိုင်သော အခြားနာမ်ဝိညာဉ်သား ကောင်းကင်တမန်များကို ဘုရားသခင်ဖန်ဆင်းခဲ့သည်။ အာဒံကဲ့သို့ပင် သူတို့ကိုလည်း ‘ဘုရားသခင့်သားများ’ ဟုခေါ်၏။ အကြောင်းမှာ သူတို့၏အသက်သည် အသက်စမ်းရေတွင်းဖြစ်သော ယေဟောဝါဘုရားသခင်ထံမှ အစပြု၍ဖြစ်၏။ (ယောဘ ၃၈:၇; ဆာလံ ၃၆:၉; လုကာ ၃:၃၈) သို့သော် ဘုရားသခင်တိုက်ရိုက်ဖြစ်ပွားစေသော “တစ်ပါးတည်းသောသားတော်” အားဖြင့် ထိုသူအားလုံးကို ဖန်ဆင်းခဲ့သည်။—ကောလောသဲ ၁:၁၅-၁၇။

ယေရှုကို ဘုရားသခင်အဖြစ် ယူမှတ်ခဲ့ကြသလော

ကျမ်းစာတွင် ယေရှုကို ဘုရားသခင်၏သားတော်ဟု ခေါ်ဆိုလေ့ရှိသောကြောင့် ပထမရာစုရှိ မည်သူကမျှ ကိုယ်တော့်ကို သားတော်ဘုရားအဖြစ် မယူမှတ်ခဲ့ကြပေ။ “ဘုရားသခင်တစ်ဆူတည်းရှိကြောင်း” ယုံကြည်သောနတ်ဆိုးများပင် ဝိညာဉ်ဘုံတွင် သူတို့၏အတွေ့အကြုံအရ ယေရှုသည် ဘုရားသခင်မဟုတ်ကြောင်း သိကြသည်။ ထို့ကြောင့် ယေရှုကို သီးခြားပုဂ္ဂိုလ်တစ်ဦးအဖြစ် “ဘုရားသခင်၏သားတော်” ဟု မှန်ကန်စွာခေါ်ဝေါ်ခဲ့ကြ၏။ (ယာကုပ် ၂:၁၉; မဿဲ ၈:၂၉) ယေရှုသေဆုံးချိန်တွင် အနီးတွင်ရပ်နေသော ရောမစစ်သားများသည် ကိုယ်တော့်နောက်လိုက်များထံမှ သူတို့ကြားသိရာများ မှန်ကန်ကြောင်း၊ ယေရှုသည် ဘုရားသခင်မဟုတ်ဘဲ “စင်စစ် ဤသူသည် ဘုရားသခင်၏သားတော်မှန်” ကြောင်း ပြောဆိုခဲ့ကြသည်။—မဿဲ ၂၇:၅၄၊ ကဘ။

ထို့ကြောင့် “ဘုရားသခင်၏သားတော်” ဟူသောစကားစုက ယေရှုကို သုံးပါးတစ်ဆူတွင် ပါဝင်သူတစ်ဦးအဖြစ်မဟုတ်ဘဲ ဖန်ဆင်းခံရသော သီးခြားပုဂ္ဂိုလ်တစ်ဦးအဖြစ် ရည်ညွှန်းနေသည်။ ဘုရားသခင်၏သားတော်အနေဖြင့် ကိုယ်တော်သည် ဘုရားသခင်ကိုယ်တော်တိုင် မဖြစ်နိုင်ပေ၊ အကြောင်းမှာ ယောဟန် ၁:၁၈ တွင် “ဘုရားသခင်ကို အဘယ်သူမျှမမြင်စဖူး” ဟုဆိုထား၍ဖြစ်သည်။

တပည့်တော်များသည် ယေရှုကို ဘုရားသခင်အဖြစ်မဟုတ်ဘဲ ‘ဘုရားသခင်နှင့်လူတို့၏စပ်ကြားတွင် ဖျန်ဖြေသူ’ အဖြစ် သိမှတ်ခဲ့ကြသည်။ (၁ တိမောသေ ၂:၅၊ ကဘ) အနက်ဖွင့်ဆိုချက်အရ ဖျန်ဖြေသူသည် ဖျန်ဖြေပေးဖို့လိုအပ်သူများတွင် မပါဝင်၊ သီးခြားပုဂ္ဂိုလ်ဖြစ်၏၊ ထို့ကြောင့် ယေရှုသည် ဘုရားသခင်ဖြစ်လျှင် ထိုသို့ဖျန်ဖြေပေးခြင်းသည် ရှေ့နောက်မညီဖြစ်ပေမည်။ ကိုယ်တော်သည် ဟန်ဆောင်သူဖြစ်သွားပေလိမ့်မည်။

ဘုရားသခင်နှင့်ယေရှု၏ဆက်နွှယ်မှုအကြောင်း သမ္မာကျမ်းစာရှင်းပြချက်သည် ရှင်းလင်းပြီး ညီညွတ်မှုရှိသည်။ ယေဟောဝါဘုရားသခင်တစ်ပါးတည်းသာ အနန္တတန်ခိုးရှင်ဖြစ်၏။ လူသားဘဝမတိုင်မီက ယေရှုကို ဘုရားသခင်တိုက်ရိုက်ဖန်ဆင်းခဲ့သည်။ ထို့ကြောင့် ယေရှုတွင် မူလအစရှိပြီး တန်ခိုးတွင်ဖြစ်စေ၊ ထာဝရတည်ရှိမှုတွင်ဖြစ်စေ မည်သည့်အခါမျှ ဘုရားသခင်နှင့်တူညီနိုင်မည်မဟုတ်ပေ။

[အောက်ခြေမှတ်ချက်]

[စာမျက်နှာ ၁၄ ပါ အကျဉ်းဖော်ပြချက်]

ယေရှုသည် ဘုရားသခင်၏ ဖန်ဆင်းခံဖြစ်သောကြောင့် အသက်အရွယ်၊ တန်ခိုးနှင့်အသိပညာ တွင် ဒုတိယအဆင့်ဖြစ်

[စာမျက်နှာ ၁၅ ပါ ရုပ်ပုံ]

ယေရှုက မိမိတွင် လူသားဘဝမတိုင်မီအသက်တာရှိကြောင်း၊ ဘုရားသခင့်မျက်မြင်မရ ဖန်ဆင်းရာများ၏အစမူလအဖြစ် မိမိကို ဘုရားသခင် ဖန်ဆင်းခဲ့ကြောင်း ပြောဆိုခဲ့