အလုပ်များနေ အလုပ်သေများတွင်လော၊ ယေဟောဝါ၏လုပ်ငန်းတော်တွင်လော

“ဝမ်းနည်းပါတယ်။ ကျွန်တော်အလုပ်များနေလို့ပါ။” ယင်းကား ယေဟောဝါသက်သေတို့သည် လူအများအား ဘုရားသခင့်နိုင်ငံတော်သတင်းကောင်းဟောပြောရာတွင် ကြုံတွေ့ရသည့်ငြင်းဆန်ချက်တစ်ခုဖြစ်သည်။ (မဿဲ ၂၄:၁၄) “ကျွန်တော်အလုပ်များနေတယ်” ဟူသောအဆိုသည် တစ်ခါတစ်ရံလွယ်ကူသောအကြောင်းပြချက်တစ်ရပ်အနေနှင့်အသုံးပြုကြသော်လည်း အမှန်မှာ လူများစွာတို့သည် အလုပ် များနေကြပါသည်။ အမှန်အားဖြင့်သူတို့သည် ဝမ်းစာရှာခြင်း၊ အကြွေးဆပ်ခြင်း၊ အလုပ်သွားအလုပ်ပြန်ခြင်း၊ ကလေးများကိုကျွေးမွေးစောင့်ရှောက်ရခြင်း၊ အိမ်၊ ကားနှင့်အခြားပိုင်ဆိုင်ရာများကိုကြည့်ရှုစောင့်ရှောက်ရခြင်းများဖြင့် “လောကီအမှု၌စိုးရိမ်ခြင်း” ဖြစ်နေကြရသည်။—မဿဲ ၁၃:၂၂။

လူများသည်အမှန်အလုပ်များနေကြသော်လည်း လူနည်းစုသည်သာ အမှန်အကျိုးဖြစ်ထွန်းသောအလုပ်များတွင် ပါဝင်နေကြသည်။ “လူသည် နေအောက်မှာကြိုးစားအားထုတ်သောအမှု၊ အလွန်စိတ်စွဲလမ်းသောအမှုအလုံးစုံတို့၌ အဘယ်အကျိုးရှိသနည်း။ သူ၏နေ့ရက်အပေါင်းတို့သည်ဝမ်းနည်းခြင်း၊ သူ၏အလုပ်အကိုင်လည်းငြိုငြင်ခြင်းဖြစ်၏။ ညအခါ၌ပင်သူ့စိတ်နှလုံးမငြိမ်ရ။ ထိုအမှုအရာသည်လည်းအနတ္တဖြစ်၏” ဟူ၍ပညာရှိရှောလမုန်ပြောခဲ့သကဲ့သို့ပင်ဖြစ်သည်။—ဒေသနာ ၂:၂၂၊ ၂၃။

ကျမ်းစာကလည်း ထိုအကျိုးမပြုသောလုပ်ရပ်များကို “အလုပ်သေများ” ဟုခေါ်သည်။ (ဟေဗြဲ ၉:၁၄၊ ကဘ) ထိုအလုပ်မျိုးတို့သည် သင့်ဘဝကိုစိုးမိုးသလော။ ဘုရားသခင်သည် “လူအသီးသီးတို့အား သူတို့အကျင့်နှင့်အလျောက် အကျိုးအပြစ်ကိုဆပ်ပေးတော်မူ” မည်ဖြစ်သည့်အလျောက် ခရစ်ယာန်တစ်ဦးဖြစ်သောသင့်အတွက် ယင်းသည် အလွန်ဂရုစိုက်စရာဖြစ်သည်။ (ဆာလံ ၆၂:၁၂) “ကျန်ကြွင်းသောကာလသည်ကျဉ်းကျပ်” သည်ဖြစ်သောကြောင့် ကျွန်ုပ်တို့သည် အလုပ်သေများတွင်အချိန်ကုန်မနေကြရန် အထူးသဖြင့်ဂရုစိုက်ကြရမည်။ (၁ ကောရိန္သု ၇:၂၉) သို့သော် အလုပ်သေများကား အဘယ်နည်း။ ယင်းတို့ကိုကျွန်ုပ်တို့မည်သို့ရှုမှတ်သင့်သနည်း။ အမှန်တကယ်အကျိုးရှိသောအလုပ်များဖြင့်အလုပ်များနေကြကြောင်း ကျွန်ုပ်တို့မည်သို့သေချာနိုင်သနည်း။

အလုပ်သေများကိုမှတ်သားဖော်ပြခြင်း

ဟေဗြဲ ၆:၁၊ ၂ တွင် ပေါလုက “သေခြင်းနှင့်စပ်ဆိုင်သောအကျင့်ကိုနောင်တရခြင်း၊ [အလုပ်သေများမှနောင်တရခြင်း၊ ကဘ] ဘုရားသခင်ကိုယုံကြည်ခြင်း၊ ဗတ္တိဇံတရားကိုသွန်သင်ခြင်း၊ လက်ကိုတင်ခြင်း၊ သေလွန်သောသူတို့၏ထမြောက်ခြင်း၊ ထာဝရစီရင်ဆုံးဖြတ်ခြင်းတည်းဟူသော မူလအမြစ် [အခြေခံသွန်သင်ချက်များ၊ ကဘ] ကို ငါတို့သည်ပြန်၍မတည်ဘဲ ခရစ်တော်၏ဘာသာ၌အစအဦးအကြောင်းအရာတို့ကိုထား၍ စုံလင်သောအဖြစ်သို့တက်ကြကုန်အံ့” ဟုရေးသားခဲ့သည်။ “အခြေခံသွန်သင်ချက်များ” တွင် “အလုပ်သေများမှနောင်တရခြင်း” ပါဝင်ကြောင်းသတိပြုပါ။ ပေါလု၏စာဖတ်သူများသည် ခရစ်ယာန်များအနေနှင့် ထိုအလုပ်သေများမှနောင်တယူပြီးဖြစ်ကြသည်။ မည်သို့အားဖြင့်နည်း။

ပထမရာစုရှိအချို့လူများသည် ခရစ်တော်ကိုလက်မခံမီက အလုပ်သေများဖြစ်သော “ဇာတိပကတိအကျင့်များ” ဖြစ်သည့် “မတရားသောမေထုန်၌မှီဝဲခြင်း၊ ညစ်ညူးစွာကျင့်ခြင်း၊ ကိလေသာလွန်ကျူးခြင်း၊ . . . ၊ သူတစ်ပါးကိုပြုစားခြင်း” နှင့်အခြားသောဆိုးညစ်မှုများတွင် ပါဝင်ခဲ့ကြသည်။ (ဂလာတိ ၅:၁၉-၂၁) ဂရုမစိုက်ပါက ထိုအလုပ်များသည် သူတို့၏ဝိညာဏသေခြင်းကိုပင် ပို့ဆောင်နိုင်သည်။ သို့သော် ထိုခရစ်ယာန်များသည် ပျက်စီးခြင်းသို့ပို့ဆောင်သည့်မိမိတို့၏လမ်းစဉ်မှခွဲထွက်လာပြီး နောင်တယူကာ “ဆေးကြောသန့်ရှင်း” ခံခဲ့ရကြသည်။ ထို့ကြောင့်သူတို့သည် ယေဟောဝါရှေ့စင်ကြယ်သောရပ်တည်မှုကို မွေ့လျော်နေကြရသည်။—၁ ကောရိန္သု ၆:၉-၁၁။

သို့ရာတွင် ခရစ်ယာန်တိုင်းသည် ဆိုးညစ်သော၊ သို့မဟုတ် အကျင့်ပျက်ပြားသောအလုပ်များမှ နောင်တယူရန်လိုအပ်ကြသည်မဟုတ်ပါ။ ခရစ်တော်ကိုလက်မခံမီ မောရှေ၏ပညတ်ကိုတိတိကျကျလိုက်လျှောက်ခဲ့ကြသော ဂျူးလူမျိုးယုံကြည်သူများထံသို့ပေါလု၏စာကအဓိကလမ်းညွှန်နေခြင်းဖြစ်သည်။ သို့ဆိုလျှင် မည်သည့်အလုပ်သေများမှ သူတို့နောင်တယူခဲ့ကြရသနည်း။ သူတို့သည် ဝိနည်းအထုံးအဖွဲ့များနှင့် အစားအသောက်ဆိုင်ရာပညတ်တရား၏တောင်းဆိုချက်များကိုလိုက်လျှောက်ခဲ့ခြင်းသည် ဘာမျှမမှားပါ။ ပညတ်တရားသည် “သန့်ရှင်းခြင်း၊ ဖြောင့်မတ်ခြင်း၊ ကောင်းမြတ်ခြင်း” ရှိသည်မဟုတ်လော။ (ရောမ ၇:၁၂) ရှိပါသည်။ သို့သော် ရောမ ၁၀:၂၊ ၃ တွင် ဂျူးများနှင့်ပတ်သက်၍ပေါလုက “ထိုသူတို့သည် မှန်သောပညာမရှိသော်လည်း ဘုရားသခင်ဘက်၌စိတ်အားကြီးသည်ဟု သူတို့အဖို့ငါသက်သေခံ၏။ ထိုသူတို့သည် ဘုရားသခင်၏ဖြောင့်မတ်ခြင်းတရားကိုမသိဘဲ ကိုယ်ဖြောင့်မတ်ခြင်းကိုတည်စေခြင်းငှာရှာကြံသောကြောင့် ဘုရားသခင်၏ဖြောင့်မတ်ခြင်းတရားကိုဝန်မခံကြ” ဟုရေးသားခဲ့သည်။

မှန်ပါသည်။ ဂျူးများသည် ပညတ်တရားကို ဂရုတစိုက်လိုက်လျှောက်ခြင်းအားဖြင့် ကယ်တင်ခြင်းရမည်ဟုမှားယွင်းစွာယုံကြည်ခဲ့ကြသည်။ သို့သော် “လူတစ်ဦးသည် ပညတ်တရား၏အကျင့်အားဖြင့်မဟုတ်ဘဲ ယေရှုခရစ်ကိုယုံကြည်ခြင်းအားဖြင့်သာလျှင် ဖြောင့်မတ်သည်ဟုကြေညာခံရသည်” ဟုပေါလုရှင်းပြခဲ့သည်။ (ဂလာတိ ၂:၁၆) ပညတ်တရား၏အကျင့်များသည် မည်၍မည်မျှကြည်ညိုလေးစားဖွယ်၊ မြင့်မြတ်ဖွယ်ဖြစ်ပါစေ ခရစ်တော်၏ရွေးဖိုးပေးဆက်ပြီးနောက်ပိုင်းတွင် အလုပ်သေများသာဖြစ်ပြီး ကယ်တင်ခြင်းအတွက်မည်သို့မျှတန်ဖိုးမရှိသောအရာများဖြစ်ကြသည်။ ထို့ကြောင့် စိတ်ထားမှန်ကန်သောဂျူးများသည် အလုပ်သေများမှနောင်တယူပြီး နောင်တရကြောင်းကိုနှစ်ခြင်းနှင့်တင်ပြခြင်းအားဖြင့် ဘုရားသခင့်မျက်နှာသာတော်ကိုရယူနိုင်ခဲ့ကြသည်။—တမန်တော် ၂:၃၈။

ယင်းမှကျွန်ုပ်တို့အဘယ်သင်ခန်းစာရရှိသနည်း။ ထိုအလုပ်သေများသည် ဆိုးညစ်သော သို့မဟုတ် အကျင့်ယိုယွင်းသောလုပ်ရပ်များထက်မက ပိုမိုပါဝင်သည်။ ဝိညာဉ်ရေးအရသေစေနိုင်သော၊ အချည်းနှီးဖြစ်သော၊ အကျိုးမရှိသော မည်သည့် အလုပ်မဆိုပါဝင်သည်။ သို့သော် ခရစ်ယာန်အားလုံးသည် နှစ်ခြင်းမယူမီ ထိုအလုပ်သေများမှနောင်တယူခဲ့ကြပြီမဟုတ်လော။ ယူခဲ့ကြပါသည်။ သို့သော် ပထမရာစုရှိခရစ်ယာန်အချို့တို့သည် အကျင့်ပျက်ပြားယိုယွင်းသွားခဲ့ကြသည်။ (၁ ကောရိန္သု ၅:၁) ဂျူးခရစ်ယာန်များထဲတွင် မောရှေပညတ်နှင့်ပတ်သက်သောအလုပ်သေများကို ပြန်ကျော့လိုသောသဘောများရှိခဲ့ကြသည်။ ထိုအလုပ်သေများသို့ပြန်မလှည့်ရန် ပေါလုသတိပေးခဲ့ရသည်။—ဂလာတိ ၄:၂၁။ ၅:၁။

အလုပ်သေများကိုသတိပြုရှောင်ရှားခြင်း

ယနေ့ယေဟောဝါ၏လူများသည် အလုပ်သေများဆိုင်ရာကျော့ကွင်းထဲသို့မသက်ဆင်းသွားရလေအောင် သတိပြုကြရမည်။ အမှန်မှာ စာရိတ္တဆိုင်ရာမသင်္ကာဖွယ်လုပ်ရပ်များလုပ်ရန်၊ မရိုးသားရန်၊ လိင်ဆိုင်ရာမတော်မလျော်သောအကျင့်များကိုပြုလုပ်ရန် အဘက်ဘက်မှနေ၍ ကျွန်ုပ်တို့ဖိနှိပ်တိုက်ခိုက်ခံနေကြရသည်။ ဝမ်းနည်းဖွယ်ရာကား နှစ်စဉ်ခရစ်ယာန်ထောင်ပေါင်းများစွာတို့သည် ထိုဖိနှိပ်မှုများအောက်သက်ဆင်းသွားကြရပြီး နောင်တမရကြပါက ခရစ်ယာန်အသင်းတော်မှနှင်ထုတ်ခံရကြသည်။ ခရစ်ယာန်တစ်ဦးသည် ဧဖက် ၄:၂၂-၂၄ တွင်ပါသော ပေါလု၏အကြံပေးချက်များကို ခါတိုင်းထက်ပို၍လိုက်လျှောက်သင့်သည်။ “အထက်ကကျင်လည်ကြသည့်အရာမှာ လှည့်ဖြားတတ်သောလောဘစိတ်တို့ဖြင့်ပုပ်ပျက်သောလူဟောင်းကိုချွတ်ပယ်၍ စိတ်နှလုံးသဘောသစ်ကိုရပြီးလျှင် မှန်သောဖြောင့်မတ်ခြင်း၊ သန့်ရှင်းခြင်းပါရမီအားဖြင့် ဘုရားသခင်နှင့်အတူအမျှဖန်ဆင်းသောလူသစ်ကို ယူတင်ဝတ်ဆောင်” ကြရန်ဖြစ်သည်။

မှန်ပါသည်။ ပေါလုစာရေးသောဧဖက်မြို့သားများသည် ဥပဓိရုပ်သစ်ကို ကြီးမားသောအတိုင်းအတာဖြင့် ဝတ်ဆင်ခဲ့ကြပြီးဖြစ်သည်။ သို့သော် ထိုသို့ပြုခြင်းကို စဉ်ဆက်မပြတ်ပြုလုပ်ရမည့်အရာ အဖြစ်သဘောထားရန် ပေါလုသူတို့အားကူညီခဲ့သည်။ မနားမနေကြိုးစားအားထုတ်မှုမရှိလျှင် ခရစ်ယာန်များသည် ဖျက်ဆီးတတ်သည့်သြဇာလွှမ်းမိုးမှုဖြစ်သော လှည့်စားတတ်သည့်အလိုဆန္ဒများအားဖြင့် အလုပ်သေများသို့တစ်ဖန်ပြန်ကျော့မိနိုင်သည်။ ယနေ့ကျွန်ုပ်တို့အတွက်လည်း ထိုနည်းတူဖြစ်သည်။ ဥပဓိရုပ်သစ်ကိုဝတ်ဆင်နိုင်ရန် စဉ်ဆက်မပြတ်တိုက်လှန်သွားပြီး၊ ယင်းကို ဘဝဟောင်း၏သဘောသဘာဝတစ်ခုခုက ညစ်ပေစွန်းထင်းစေခွင့်မပြုပါနှင့်။ သွေးသားနှင့်ဆိုင်သောဆိုးညစ်သည့်အလုပ်အားလုံးကို ကျွန်ုပ်တို့ရှောင်ရှား—မုန်းတီး—ရမည်။ ဆာလံဆရာက “ထာဝရဘုရား [ယေဟောဝါ၊ ကဘ] ကိုချစ်သောသူတို့၊ မကောင်းသောအမှုကိုရွံရှာကြလော့” ဟုအားပေးထားသည်။—ဆာလံ ၉၇:၁၀။

ချီးမွမ်းဖွယ်ကောင်းလောက်အောင် ယနေ့ယေဟောဝါ၏လူများသည် ဤသြဝါဒကိုလိုက်နာကြပြီး စာရိတ္တရေးတွင်သန့်ရှင်းနေကြသည်။ သို့သော် အချို့တို့သည် ပင်ကိုယ်အရမှားယွင်းခြင်းမရှိသော်လည်း အဆုံး၌အကျိုးမရှိသောအလုပ်များအားဖြင့် လမ်းလွဲအောင်သွေးဆောင်ခံရကြသည်။ ဥပမာအားဖြင့် အချို့တို့သည် ငွေရမည့်အစီအစဉ်များ သို့မဟုတ် ပစ္စည်းဥစ္စာရယူဆည်းပူးခြင်းများအားဖြင့် တိုက်လှန်ခံနေကြရသည်။ သို့သော် ကျမ်းစာက ဤသို့သတိပေးထားသည်။ “ငွေရတတ်ခြင်းငှာအလိုရှိသောသူတို့သည် အပြစ်သွေးဆောင်ခြင်း၊ ဖမ်းမိခြင်း၊ မိုက်မဲဖျက်ဆီးတတ်သောတပ်မက်ခြင်းများထဲသို့ ကျရောက်တတ်ကြ၏။ ထိုသို့သောအားဖြင့် လူတို့သည် အကျိုးနည်းခြင်း၊ ပျက်စီးခြင်း၌နစ်မွန်းတတ်ကြ၏။” (၁ တိမောသေ ၆:၉) အချို့သူများအတွက်မူ လောကီပညာရေးသည် ထောင်ချောက်သဖွယ်ဖြစ်သည်။ အလုပ်ရရန် တစ်စုံတစ်ခုသောအတိုင်းအတာဖြင့် လောကီပညာကိုတတ်ထားရန်လိုအပ်သည်တော့မှန်ပါသည်။ သို့သော် အချိန်စားသောလောက၏အဆင့်မြင့်ပညာရေးများကိုလိုက်စားသူအချို့တို့သည် မိမိတို့၏ဝိညာဉ်ရေးကို အန္တရာယ်ဖြစ်စေခဲ့ကြပြီ။

အလုပ်များစွာတို့သည် စာရိတ္တရေးအရမမှားသည်မှာမှန်ပါသည်။ သို့သော် ယင်းတို့သည် ကျွန်ုပ်တို့၏ယခုဘဝကိုမတိုးပွားစေလျှင် သို့မဟုတ် ယေဟောဝါဘုရားသခင့်မျက်နှာသာတော်ကိုမရစေလျှင် အလုပ်သေများသာဖြစ်ကြသည်။ ယင်းတို့သည် အချိန်နှင့်စွမ်းအင်ကုန်ခန်းစေသော်လည်း ဝိညာဏအကျိုးနှင့် တည်မြဲသောလန်းဆန်းမှုကိုမပေးပါ။—ဒေသနာ ၂:၁၁ နှိုင်းယှဉ်။

ဝိညာဏရေးရာများတွင်အလုပ်များနေရန် သင်အပြင်းအထန်ကြိုးစားနေမည်မှာမလွဲပါ။ သို့ရာတွင် မိမိကိုယ်ကိုမှန်မှန်ပိုင်းခြားသုံးသပ်ခြင်းသည် အကူအညီဖြစ်စေသည်။ အချိန်အခါမရွေး သင့်ကိုယ်ကို ဤသို့သောမေးခွန်းများမေးနိုင်သည်။ ‘ကျွန်ုပ်သည် မလိုအပ်သောလောကီအလုပ်များကိုဆက်လုပ်နေခြင်းအားဖြင့် အစည်းဝေးတက်ခြင်း၊ အမှုဆောင်ထွက်ခြင်းတို့ကို ထိခိုက်နေပါသလော။’ ‘ကျွန်ုပ်သည် အပန်းဖြေရန်အချိန်ရှိပြီး မိသားစုနှင့်ကိုယ်ပိုင်လေ့လာမှုအတွက်မူ အချိန်နည်းနေသလော။’ ‘ကျွန်ုပ်သည် ရုပ်ပစ္စည်းများကိုအရေးတယူအာရုံစိုက်ပြီး အသင်းတော်တွင် ဖျားနာနေသူများ၊ အသက်ကြီးသူများကဲ့သို့သောလိုအပ်နေသူများအားဂရုစိုက်ရန်ကိုမူ ပျက်ကွက်နေပါသလော။’ ဝိညာဉ်ရေးရာအလုပ်များတွင် သင်အရေးတကြီးဦးစားပေးရန်လိုအပ်သည့်အပိုင်းကို ဤမေးခွန်းများ၏အဖြေများကဖော်ပြပေးပေလိမ့်မည်။

ယေဟောဝါ၏လုပ်ငန်းတော်တွင်အလုပ်များနေပါ

၁ ကောရိန္သု ၁၅:၅၈ အရဆိုလျှင် ‘သခင့်အလုပ်တွင် လုပ်စရာများစွာရှိ’ သည်။ အရေးကြီးဆုံးမှာ ဘုရားသခင့်နိုင်ငံတော်အကြောင်းဟောပြောခြင်းနှင့် တပည့်ဖြစ်စေခြင်းလုပ်ငန်းဖြစ်သည်။ ၂ တိမောသေ ၄:၅ တွင် ပေါလုဤသို့တိုက်တွန်းထားသည်။ “သတင်းကောင်းဟောပြောခြင်းကို နှံ့နှံ့စပ်စပ်လုပ်ဆောင်သည့်လုပ်ငန်းအနေနှင့် သင့်ဘဝအလုပ်ဖြစ်စေပါ။” (Jerusalem Bible) အကြီးအကဲများနှင့်ဓမ္မအမှုထမ်းများသည်လည်း သိုးတော်စု၏လိုအပ်ရာများကို ဂရုစိုက်လုပ်ဆောင်စရာများစွာရှိသည်။ (၁ တိမောသေ ၃:၁၊ ၅၊ ၁၃။ ၁ ပေတရု ၅:၂) အိမ်ထောင်ဦးစီးများ—ဖော်မစုံမိဘအများစုဖြစ်သည်—၌လည်း မိမိတို့၏မိသားစုကိုကြည့်ရှုစောင့်ရှောက်ရန်နှင့် သားသမီးများယေဟောဝါနှင့်ကောင်းမွန်သောဆက်ဆံရေးရှိရန်ပြုစုပေးဖို့ ကြီးလေးသောတာဝန်များရှိကြသည်။ ထိုအလုပ်များသည် မောပန်းနွမ်းနယ်စေပြီး တစ်ခါတစ်ရံ ယင်း၌နှစ်မြုပ်နေစေသည့်အထိပင်ဖြစ်မည်။ သို့သော် ယင်းတို့သည်အလုပ်သေများမဟုတ်သည်သာမက စစ်မှန်သောကျေနပ်မှုကိုဖြစ်စေသည်။

မေးစရာကား ဤတန်ဖိုးရှိအလုပ်အားလုံးကိုပြီးမြောက်အောင်မြင်နိုင်ရန် လူတစ်ဦး အချိန်မည်သို့ရနိုင်မည်နည်း ဟူ၍ဖြစ်သည်။ မိမိကိုယ်ကိုကြပ်မတ်ခြင်းနှင့်စီစဉ်ဆောင်ရွက်ခြင်းလိုအပ်သည်။ ၁ ကောရိန္သု ၉:၂၆၊ ၂၇ တွင်ပေါလုက “ငါပြေးသောအခါ အမှတ်တမဲ့ပြေးသည်မဟုတ်။ လက်ဝှေ့သတ်သောအခါ အာကာသကောင်းကင်ကိုသာထိုး၍သတ်သည်မဟုတ်။ သူတစ်ပါးကိုဆုံးမပြီးမှကိုယ်တိုင်ရှုံးသောသူ မဖြစ်ရမည့်အကြောင်း ကိုယ်ကိုထိုး၍နှိပ်စက်လေ့ရှိ၏” ဟုရေးခဲ့သည်။ ဤကျမ်းချက်ပါမူကိုလိုက်လျှောက်နိုင်ရန်နည်းတစ်နည်းမှာ မိမိ၏ကိုယ်ပိုင်အလေ့အထနှင့်ဘဝပုံစံကို မကြာခဏစစ်ဆေးမှုပြုရန်ပင်ဖြစ်သည်။ မလိုအပ်ဘဲသင့်အချိန်ကိုကုန်ခန်းစေသည့်အကြောင်းပေါင်းမြောက်မြားစွာကို သင်ပယ်ရှင်းနိုင်ကြောင်းရှာဖွေတွေ့ရှိပေလိမ့်မည်။

ဥပမာအားဖြင့် တီဗွီကြည့်ခြင်း၊ အပန်းဖြေခြင်း၊ လောကစာပေများဖတ်ခြင်း သို့မဟုတ် ဝါသနာတို့အတွက် သင့်အချိန်နှင့်ခွန်အားများစွာအသုံးပြုသလော။ The New York Times သတင်းစာပါဆောင်းပါးတစ်ပိုဒ်အရ ယူနိုက်တက်စတိတ်စ်ရှိသာမန်လူကြီးများသည် “တစ်ပတ်လျှင်နာရီ ၃၀ ထက်မနဲ” တီဗွီကြည့်ခြင်းဖြင့်အချိန်ကုန်ကြသည်။ ထိုအချိန်များကို သာ၍ကောင်းသောနည်းဖြင့်အသုံးပြုနိုင်သည်မှာ သေချာလှပါသည်တကား။ နယ်လှည့်ကြီးကြပ်မှူးတစ်ဦး၏ဇနီးသည်က ဤသို့ပြန်ပြောပြသည်။ “အချိန်ဖြုန်းတီးတဲ့အရာမှန်သမျှကို ကျွန်မလုံးလုံးလျားလျားနီးပါးဖယ်ထုတ်ထားတယ်။” ရလဒ်ကားအဘယ်နည်း။ Insight on the Scriptures ခေါ် အတွဲနှစ်တွဲပါသမ္မာကျမ်းစာစွယ်စုံကျမ်းကို အားလုံးဖတ်ရှုပြီးစီးနိုင်ခဲ့သည်တကား။

သင်လည်း သင့်ဘဝပုံစံကို မည်သည့်အတိုင်းအတာအထိ ရိုးရှင်းစေနိုင်ကြောင်းကို ဆင်ခြင်ရန်လိုအပ်သည်။ ရှောလမုန်က “အလုပ်လုပ်သောသူသည် များစွာစားသည်ဖြစ်စေ၊ အနည်းငယ်စားသည်ဖြစ်စေ အအိပ်မြိန်တတ်၏။ ရတတ်သောသူ၏စည်းစိမ်မူကား စည်းစိမ်ရှင်ကိုအအိပ်ပျက်စေတတ်၏” ဟုပြောခဲ့သည်။ (ဒေသနာ ၅:၁၂) မလိုအပ်သောရုပ်ပစ္စည်းပိုင်ဆိုင်ရန်အတွက် သင့်အချိန်နှင့်ခွန်အားများစွာတို့ကိုစိုက်ထုတ်ထားသလော။ ပစ္စည်းဥစ္စာများများပိုင်ဆိုင်လေ၊ ထိန်းသိမ်းခြင်း၊ အာမခံခြင်း၊ ပြုပြင်ခြင်း၊ ကာကွယ်စောင့်ရှောက်ခြင်းတို့ကို များများပြုရလေပင်ဖြစ်သည်။ ထိုရုပ်ပစ္စည်းများပိုင်ဆိုင်ခြင်းအဖြစ်ကိုသင်လက်လွှတ်လိုက်လျှင် သင့်အတွက်အကျိုးမဖြစ်ထွန်းပေလော။

လက်တွေ့ကျသောဇယားရှိခြင်းသည်လည်း အချိန်ကိုသာ၍ကောင်းမွန်စွာအသုံးပြုသည့်နည်းတစ်နည်းဖြစ်သည်။ ထိုဇယားတွင် လူတစ်ဦးလိုအပ်သည့်အနားယူခြင်းနှင့်အပန်းဖြေခြင်းတို့ပါဝင်သင့်သည်။ သို့ရာတွင် ဝိညာဏအကျိုးကိုဦးစားပေးသင့်သည်။ အသင်းတော်အစည်းအဝေးများအားလုံးကို မှန်မှန်တက်ရောက်နိုင်ရန်အတွက် အချိန်သတ်မှတ်ထားသင့်သည်။ မည်သည့်နေ့ သို့မဟုတ် မည်သည့်ညနေခင်းများတွင် သတင်းကောင်းဟောပြောရန်ထွက်မည်ကိုလည်း သင်ကြိုတင်ဆုံးဖြတ်နိုင်သည်။ ဂရုတစိုက်အစီအစဉ်ဆွဲခြင်းအားဖြင့် အခါအားလျော်စွာအရန်ရှေ့ဆောင်ခြင်းစသည့် လုပ်ငန်းတော်တွင်သင့်ပါဝင်မှုကိုပင်တိုးချဲ့သွားနိုင်သည်။ အစည်းအဝေးများအတွက်အသေးစိတ်ပြင်ဆင်ခြင်းအပါအဝင် ကိုယ်ပိုင်နှင့်မိသားစုလေ့လာမှုအတွက်အချိန်ဇယားကို အသေအချာဆွဲထားပါ။ ပြင်ဆင်ခြင်းအားဖြင့် အစည်းအဝေးတွင် သင်ကိုယ်တိုင်အကျိုးခံစားရရုံမက သင့်ဖြေဆိုမှုအားဖြင့်လည်း သူတစ်ပါးကို “မေတ္တာစိတ်ရှိစေခြင်းငှာလည်းကောင်း၊ ကောင်းသောအကျင့်ကိုကျင့်စေခြင်းငှာလည်းကောင်း တိုက်တွန်းနှိုးဆော်ရသောအခွင့်” ကိုရပေမည်။—ဟေဗြဲ ၁၀:၂၄။

လေ့လာမှုအတွက်အချိန်ရရန် စွန့်လွှတ်မှုအချို့ပြုရန်လိုအပ်ပေမည်။ ဥပမာအားဖြင့် ကမ္ဘာတစ်ဝန်းရှိဗေသလမိသားစုဝင်များသည် နေ့စဉ်ကျမ်းချက်ဆွေးနွေးရန် နံနက်တိုင်းစောစောအိပ်ရာထကြသည်။ နံနက်တိုင်းတွင် သင့်ကိုယ်ပိုင်လေ့လာမှုအတွက် အချိန်အနည်းငယ်ယူရန်မဖြစ်နိုင်ပေလော။ “မိုးမလင်းမီအကျွန်ုပ်အော်ဟစ်တတ်ပါ၏။ နှုတ်ကပါဌ်တော်ကို မျှော်လင့်လျက်နေပါ၏” ဟုဆာလံဆရာပြောခဲ့သည်။ (ဆာလံ ၁၁၉:၁၄၇) မှန်ပါသည်။ စောစောထနိုင်ရန် တော်သင့်သောအိပ်ရာဝင်ချိန်ဇယားရှိရန်လိုအပ်သည်။ သို့မှသာ နောက်တစ်နေ့တွင် ကျန်းမာရွှင်လန်းစွာနိုးထနိုင်မည်ဖြစ်သည်။

ယေဟောဝါ၏လုပ်ငန်းတော်တွင် အလုပ်များနေခြင်း၏ အကျိုးကျေးဇူးများ

‘သခင့်အလုပ်တွင် လုပ်စရာများစွာရှိ’ နေနိုင်ရန် အစီအစဉ်၊ စည်းကမ်းကြပ်မတ်မှုနှင့် ကိုယ်ကျိုးစွန့်လွှတ်မှုတို့လိုအပ်သည်။ သို့သော် မရေတွက်နိုင်သောအကျိုးကျေးဇူးများကို သင်ခံစားရမည်။ ထို့ကြောင့် အချည်းနှီးဖြစ်ပြီးထိခိုက်နစ်နာစေသောအလုပ်သေများ၌မဟုတ်ဘဲ ယေဟောဝါ၏လုပ်ငန်းတော်၌ အလုပ်များနေပါ။ အကြောင်းမှာ ထိုအလုပ်အားဖြင့် သင့်ယုံကြည်ခြင်းကိုတင်ပြရာရောက်ပြီး ဘုရားသခင့်မျက်နှာသာတော်ကိုခံစားရကာ အဆုံးတွင်ထာဝရအသက်ဆုကျေးဇူးကိုသင်ခံစားရပေမည်။

[စာမျက်နှာ ၂၈ ပါ ရုပ်ပုံ]

လက်တွေ့ကျသောဇယားများချမှတ်ခြင်းသည် မိမိ၏အချိန်ကို သာ၍ပညာရှိစွာအသုံးပြုရန် ခရစ်ယာန်တစ်ဦးအားအကူအညီဖြစ်စေသည်