ကျွန်ုပ်တို့သားသမီးများ၌ ခရစ်ယာန်ဥပဓိရုပ်များ တည်ဆောက်ပေးခြင်း

ဝမ်ဒါ၏မိခင်သည် အိမ်ထောင်ပျက်ခဲ့ရသောတစ်ခုလပ်ဖြစ်ရရှာ၍ မိမိသမီး၌ ခရစ်ယာန်ဥပဓိရုပ်များ တည်ဆောက်ပေးခြင်းငှာ ကြိုးစားအားထုတ်ခဲ့သည်။ ဝမ်ဒါမှာ ၁၂ အရွယ်ရှိစဉ်၌ ဤလေ့ကျင့်ပေးမှုသည် အစမ်းသပ်ခံခဲ့ရသည်။ ထိုအချိန်တွင် ဝမ်ဒါနှင့် သူ၏မောင်လေး၊ ညီမလေးတို့သည် မိခင်အိမ်မှထွက်ခွာပြီး ဖခင်နှင့်အတူ ခေတ္တသွားနေထိုင်ရသည်။ သူမ၏ဖခင်မှာ မယုံကြည်သူဖြစ်သဖြင့် မိခင်ဖြစ်သူ၏အရေးစိုက်မှုအောက်မှ ဝေးကွာချိန်တွင် ကလေးမမည်သို့ပြုမူမည်နည်း။

ခရစ်ယာန်မိဘတိုင်း မိမိတို့သားသမီးများ ကိုယ်ပိုင်ဆုံးဖြတ်ချက်ချရသည့်အခါ သူတို့ကလေးတွေ၏ယုံကြည်ခြင်း စမ်းသပ်ခံရခြင်းနှင့် ကြုံကြိုက်ရစမြဲဖြစ်သည်။ သားသမီးများသည် ခရစ်ယာန်မိဘများထံမှ ဝမ်ဒါနည်းတူ ဝေးကွာနေချိန်မျိုး၌ဖြစ်မည်။ အမှားအယွင်းပြုမူရန် ကျောင်းတွင် သက်တူရွယ်တူ၏ဖိအားကို ခံရကြမည်။ သို့မဟုတ် ပြင်းထန်သောစုံစမ်းသွေးဆောင်မှုများကိုခံရကြမည်။ ထိုအချိန်အခါမျိုးရောက်သည့်အခါ မိမိတို့သားသမီးများ၏ ခရစ်ယာန်ဥပဓိရုပ်များသည် စမ်းသပ်မှု၌ မားမားမတ်မတ်ရပ်တည်နိုင်ရန် သန်မာခိုင်ခံ့မည်ဟု ခရစ်ယာန်မိဘများ မျှော်လင့်လျက်ဆုတောင်းကြပေမည်။

မိမိတို့သားသမီးများ၌ သန်စွမ်းသောခရစ်ယာန်အရည်အချင်းများကို မိဘများမည်သို့တည်ဆောက်ပေးနိုင်မည်နည်း။ ဝမ်ဒါအကြောင်းဆက်မတင်ပြမီ ထိုမေးခွန်းကို သမ္မာကျမ်းစာမည်သို့ဖြေဆိုပေးကြောင်း ကြည့်ကြဦးစို့။ အဖြေ၏အခြေခံသည် ကောရိန္သုခရစ်ယာန်များထံ တမန်တော်ပေါလုရေးသားခဲ့သော ဤစကားများတွင် ပါရှိသည်။ “ယေရှုခရစ်တည်းဟူသော ချလျက်ရှိသောတိုက်မြစ်မှတစ်ပါး အခြားသောတိုက်မြစ်ကို အဘယ်သူမျှမချနိုင်။ ထိုတိုက်မြစ်အပေါ်၌ ရွှေ၊ ငွေ၊ ကျောက်ကောင်း၊ သစ်သား၊ မြက်ပင်၊ ကောက်ရိုးများကို ထပ်ဆင့်၍တည်ဆောက်သောသူရှိသမျှ အသီးသီးလုပ်သောအလုပ်သည် ထင်ရှားလိမ့်မည်။ အဘယ်သို့နည်းဟူမူကား ဖော်ပြချိန်နေ့ရက်သည် မီးအားဖြင့်ထင်ရှားစေလိမ့်မည်။ လူတိုင်းလုပ်သောအလုပ်သည် အဘယ်သို့သောအလုပ်ဖြစ်သည်ကို မီးသည် စစ်ကြောစုံစမ်းလိမ့်မည်။”—၁ ကောရိန္သု ၃:၁၁-၁၃။

အုတ်မြစ်

ဤစကားများကို ပေါလုအဘယ်ကြောင့်ရေးသားခဲ့ရသနည်း။ ကောရိန္သုမြို့တွင် ခရစ်ယာန်ဥပဓိရုပ်များတည်ဆောက်ပေးခြင်းအစီအစဉ်ကို သူစတင်နေသော်လည်း အခက်အခဲများတွေ့ကြုံနေသည်။ ပေါလု၏တည်ဆောက်ပေးခြင်းအစီအစဉ်သည် သူ၏သွေးရင်းသားရင်းသားသမီးများနှင့်မပတ်သက်သည်ကား မှန်သည်။ သူ၏ဟောပြောခြင်းအားဖြင့် ခရစ်ယာန်များဖြစ်လာသူတို့နှင့်ပတ်သက်နေပါသည်။ သို့သော် ဤသူများအား ဝိညာဏသားသမီးများအဖြစ် သူသဘောထားခဲ့သည်။ သို့ဖြစ်၍ သူ၏စကားများသည် မိဘများအတွက်လည်း အကျိုးရှိပေသည်။—၁ ကောရိန္သု ၄:၁၅။

ပေါလုသည် ကောရိန္သုမြို့သို့ မကြာမီကရောက်လာပြီး ထိုတွင်ခရစ်ယာန်အသင်းတော်တည်ထောင်ထားသည်။ သူ၏ဟောပြောခြင်းကိုလက်ခံနာယူသူများသည်လည်း ဘဝပုံစံကို အကြီးအကျယ်ပြောင်းလဲခဲ့ကြပေပြီ။ အချို့သူတို့သည် ယခင်ကသီလယိုယွင်းသူများ၊ သူခိုးများ၊ ရုပ်တုကိုးကွယ်သူများနှင့်သောက်ကြူးသူများဖြစ်ခဲ့ကြသည်။ (၁ ကောရိန္သု ၆:၉-၁၁) သို့သော် အုတ်မြစ်ကောင်းကို ပေါလုချပေးနိုင်ခဲ့သဖြင့် ခရစ်ယာန်အတွေးအခေါ်သို့ ဤသူများပြောင်းလဲလာနိုင်ခဲ့ကြပေသည်။ ထိုအုတ်မြစ်ကားအဘယ်နည်း။ “ယေရှုခရစ်တည်းဟူသော ချလျက်ရှိသောတိုက်မြစ်မှတစ်ပါး အခြားသောတိုက်မြစ်ကို အဘယ်သူမျှမချနိုင်။”—၁ ကောရိန္သု ၃:၁၁။

ကောရိန္သုမြို့ရှိ ဤယုံကြည်သူလူသစ်များကို သွန်သင်ပေးရာတွင် ဤအုတ်မြစ်ကို ပေါလုမည်သို့ချခဲ့သနည်း။ သူဤသို့ပြောပြ၏။ “ညီအစ်ကိုတို့၊ ငါသည် သင်တို့ရှိရာသို့ရောက်လာသောအခါ၊ ဘုရားသခင်၏သက်သေချက်ကို ထူးမြတ်သောစကားနှင့် ထူးမြတ်သောပညာအားဖြင့် သင်တို့အားပြသ၍ရောက်လာသည်မဟုတ်။ အကြောင်းမူကား၊ ယေရှုခရစ်တည်းဟူသော လက်ဝါးကပ်တိုင်မှာ အသေခံတော်မူသောသခင်မှတစ်ပါး အဘယ်အရာကိုမျှ သင်တို့တွင် ငါမသိမမှတ်ဟု ငါစိတ်ပြဌာန်းခြင်းရှိ၏။” (၁ ကောရိန္သု ၂:၁၊ ၂။ တမန်တော် ၁၈:၅) မိမိအား သူအာရုံမပြုစေခဲ့ပါ။ သမ္မာတရားကိုလည်း အပေါ်ယံအသိဉာဏ်ရှိပုံမျိုးဖြင့် ဆွဲဆောင်ပေးရန် သူမပြုလုပ်ခဲ့ပေ။ ထိုသို့ပြုမည့်အစား ယေရှုခရစ်တော်ထံ လူတို့အားဦးဆောင်လမ်းညွှန်ပြခဲ့သည်။ ကိုယ်တော်အား ဘုရားသခင်အသုံးပြုပုံပြုနည်းကိုသာ အာရုံပြုစေခဲ့သည်။

အမှန်မှာ၊ ခရစ်ယာန်တည်ဆောက်ခြင်းအတွက် ယေရှုသည် အထူးခိုင်မြဲသောအုတ်မြစ်ဖြစ်သည်။ ရွေးနှုတ်ဖိုးပူဇော်သက္ကာကို ကိုယ်တော်တင်ဆက်ခဲ့သည်။ ကိုယ်တော်သည် ယခုကောင်းကင်ဘုရင်တစ်ပါးဖြစ်နေ၍ မကြာမီပင် အာမဂေဒုန်၌ ဘုရားသခင်၏ရန်သူများကို ဖျက်ဆီးပစ်တော်မူမည်။ ထိုနောက် အနှစ်တစ်ထောင်စိုးစံရာကာလအတွင်း ဘုရားသခင်၏ဖြောင့်မတ်ခြင်းအတိုင်းစီမံခန့်ခွဲအုပ်ချုပ်ကာ ဘုရားသခင်၏ယဇ်ပုရောဟိတ်မင်းကြီးအဖြစ် လူမျိုးအား စုံလင်ခြင်းသောအခြေအနေသို့ တဖြည်းဖြည်းမြှင့်တင်ပေးတော်မူလိမ့်မည်။ အခြားအဘယ်အုတ်မြစ်မျိုး လိုဦးမည်နည်း။

ယင်းကြောင့် ကျွန်ုပ်တို့သားသမီးများတွင် ခရစ်ယာန်ဥပဓိရုပ်များတည်ဆောက်ပေးရာ၌ ပေါလုကိုအတုယူဖို့ ကောင်းလှပေသည်။ ဤအရေးကြီးအချက်အလက်များကို သူတို့တန်ဖိုးထားလေးစားတတ်မတတ် ဂရုပြုပါ။ နို့စို့အရွယ်မှစတင်၍ ကျွန်ုပ်တို့အတွက်ယေရှုပြုတော်မူခဲ့ရာများနှင့်ပြုမူနေသည့်အရာများအတွက် ကိုယ်တော်ကို ကျွန်ုပ်တို့သားသမီးများချစ်မြတ်နိုးကြရန် သွန်သင်ပေးပါလေ။—၁ ပေတရု ၁:၈။

အဆောက်အအုံ

သို့ရာတွင် ဤကောင်းမွန်သောအုတ်မြစ်ကိုပေါလုချပေးခဲ့သော်လည်း သူထွက်ခွါသွားပြီးနောက် တည်ဆောက်မှုလုပ်ငန်းသည် အနည်းငယ်ချို့တဲ့ပျက်စီးခဲ့သည်။ (၁ ကောရိန္သု ၃:၁၀) ယနေ့မိဘအမြောက်အမြားကြုံတွေ့ရသည့်အဖြစ်မျိုးနှင့် ဆင်တူယိုးမှားဖြစ်သည်။ ခရစ်ယာန်ယုံကြည်ခြင်း၌ သူတို့သားသမီးတို့ကို သွန်သင်ပို့ချပေးကြရာ သမ္မာတရားကိုကောင်းစွာသိနားလည်ကြသည်ဟု ယူမှတ်ထားသည်။ သို့သော် သူတို့ကြီးပြင်းလာကြသောအခါ သားသမီးများသည် တရွေ့ရွေ့လွင့်ပါးသွားမည်၊ သို့မဟုတ် ယုံကြည်ခြင်းကိုပစ်ပယ်ကြသည်။ ထိုသို့အဘယ်ကြောင့်ဖြစ်ပျက်ရသနည်း။ အများအားဖြင့် အသုံးပြုခဲ့သည့် ဆောက်လုပ်ရေးပစ္စည်းများကြောင့်ဖြစ်သည်။

တန်ဖိုးရှိပစ္စည်းများဖြစ်သည့် ရွှေ၊ ငွေနှင့်ကျောက်မြတ်များဖြင့် ဥပဓိရုပ်တို့ကို တည်ဆောက်ပေးနိုင်သည်ဟု ပေါလုဆိုသည်။ သို့မဟုတ် အဖိုးအခနည်းသော သစ်သား၊ ကောက်ရိုး၊ ရိုးပြတ်တို့နှင့်လည်း ဆောက်လုပ်နိုင်ပါသည်။ (၁ ကောရိန္သု ၃:၁၂) ဆောက်လုပ်သူသည် ရွှေ၊ ငွေနှင့်ကျောက်မြတ်များကိုအသုံးပြုမည်ဆိုလျှင် ထူးကဲ၍တန်ဖိုးရှိသောအဆောက်အအုံမျိုးကို တည်ဆောက်နေမည်ဖြစ်သည်။ သို့သော် သစ်သား၊ ကောက်ရိုးနှင့်ရိုးပြတ်တို့ကိုအသုံးပြုသော ဆောက်လုပ်သူမှာမူ ခေတ္တအတွက်သာဖြစ်၍ တန်ဖိုးမရှိသောအဆောက်အအုံအမျိုးအစားကို ဆောက်လုပ်နေခြင်းဖြစ်သည်။

ကောရိန္သုမြို့တွင် ကျိုးပျက်လွယ်သောဝိညာဏပစ္စည်းများကို အသုံးပြုနေဟန်ရှိသည်။ တမန်တော်ပေါလု၏အုတ်မြစ်ချလုပ်ငန်းကို ဆက်လုပ်ကိုင်နေသူအချို့သည် ခိုင်ခံ့မြဲမြံသောအဆောက်အအုံများကို ဆောက်မနေဘဲ အပေါစားပစ္စည်းများဖြင့် ဆောက်လုပ်နေကြသည်။ ကောရိန္သုမြို့သားတို့သည် လူတို့ကိုမျှော်ကိုးနေစပြု၍ သူတို့အချင်းချင်း စည်းလုံးမှုမရှိ၊ မနာလိုဝန်တိုမှုနှင့်ခိုက်ရန်ဖြစ်ပွားနေသည်။ (၁ ကောရိန္သု ၁:၁၀-၁၂။ ၃:၁-၄) ယင်းကို မည်သို့တားဆီးနိုင်ခဲ့မည်နည်း။ သာ၍ကောင်းသော ကြာရှည်ခံပစ္စည်းများကို အသုံးပြုခြင်းအားဖြင့်ဖြစ်သည်။

ယင်းတို့က ခရစ်ယာန်ဥပဓိရုပ်၏ အရေးပါအဖိုးတန်အရည်အသွေးများကိုတင်စားပါသည်။ အဘယ်အရည်အသွေးများနည်း။ တမန်တော်ပေတရုက တစ်ခုကိုတင်ပြပေးသည်။ “ရွှေ . . . ထက် သင်တို့ယုံကြည်ခြင်းကိုစစ်ကြောစုံစမ်းခြင်းအရာသည် သာ၍မြတ်သည်။” (၁ ပေတရု ၁:၆၊ ၇) ရှောလမုန်မင်းကြီးက အခြားနှစ်ခုဖြစ်သည့် ဉာဏ်ပညာနှင့်ထိုးထွင်းဉာဏ်ကိုဖေါ်ပြသည်။ ယင်းတို့ရှိထားခြင်းကား “ငွေကုန်သွယ်ခြင်းထက်သာ၍ကောင်း၏။” (သု၊ ၃:၁၃-၁၅) ဒါဝိဒ်မင်းကြီးကလည်း ယေဟောဝါကိုကြောက်ရွံ့ခြင်းနှင့် ကိုယ်တော်၏ပညတ်တော်များကို တန်ဖိုးထားခြင်းသည် “ရွှေစင်ထက် နှစ်သက်ဖွယ်ဖြစ်” သည်ဟုသတိပေးပါသည်။—ဆာလံ ၁၉:၉၊ ၁၀။

စုံစမ်းခြင်းများကို ကျွန်ုပ်တို့သားသမီးများခံရပ်နိုင်မည်အကြောင်း ယင်းတို့နှင့်အခြားတန်ဖိုးဖြတ်မရပစ္စည်းများကို ခရစ်ယာန်ဥပဓိရုပ်များအတွင်း တည်ဆောက်ပေးနိုင်ပါသည်။ သို့သော် ဤကဲ့သို့သောပစ္စည်းများကိုအသုံးပြုဆောက်လုပ်ပေးနေကြောင်း မည်သို့သေချာနိုင်မည်နည်း။ နှလုံးများကို ဂရုပြုခြင်းအားဖြင့်ဖြစ်သည်။ ကျွန်ုပ်တို့သားသမီးများ၏နှလုံးသာမက ကိုယ်ပိုင်နှလုံးကိုလည်း ဂရုပြုရကြမည်။

အောင်မြင်မှုရှိ ဆောက်လုပ်ရေး

ဤဆောက်လုပ်ရေးလုပ်ငန်းတွင် မိဘ၏နှလုံး မည်သို့ပါဝင်ပတ်သက်သည်ကို ရှေးဣသရေလလူမျိုးရှိ မိဘများအား ယေဟောဝါပေးတော်မူခဲ့သောမိန့်မှာချက်တွင် တွေ့ရှိရသည်။ “ယနေ့ငါမှာထားသောစကားကို [သင်တို့ ] နှလုံးသွင်းရမည်။” ထိုနောက်ဆက်၍ “ထိုစကားကို သင်၏သားသမီးတို့အား ကြိုးစား၍သွန်သင်ရမည်” ဟုဆိုသည်။ (တရားဟောရာ ၆:၆၊ ၇) သို့ဖြစ်သောကြောင့် အခြားသူတို့ကို တည်ဆောက်မပေးမီ ကိုယ်ကိုယ်နှိုက်ကို တည်ဆောက်ပေးရပေမည်။ ကျွန်ုပ်တို့ပြောဆိုပြုမူလေသမျှတွင် ကျွန်ုပ်တို့၏ဥပဓိရုပ်သည် မှန်ကန်သောပစ္စည်းများဖြင့် တည်ဆောက်ထားကြောင်းကို သားသမီးများတွေ့မြင်နေသင့်သည်။—ကောလောသဲ ၃:၉၊ ၁၀။

ထိုနောက် ကျွန်ုပ်တို့၏သွန်သင်ချက်သည် သူတို့နှလုံးထဲရောက်ရမည်။ ခရစ်ယာန်ဥပဓိရုပ်များကို တည်ဆောက်ရာတွင် အောင်မြင်မှုအတွေ့ရှိဆုံးသူ ယေရှုသည် ပုံဥပမာများနှင့်မေးခွန်းများကိုမေးမြန်းခြင်းအားဖြင့် နှလုံးထိမိခဲ့တော်မူသည်။ (မဿဲ ၁၇:၂၄-၂၇။ မာကု ၁၃:၃၄) ဤသွန်သင်နည်းနိဿယများသည် အလွန်ထိရောက်ကြောင်း မိဘများတွေ့ရှိကြသည်။ ကလေးငယ်များ ခရစ်ယာန်သမ္မာတရားကိုနှစ်မြို့စေရန် ပုံဥပမာများကို သူတို့အသုံးပြုကြသည်။ အနည်းငယ်ကြီးရင့်သောကလေးများ အဘယ်အရာကိုစဉ်းစားတွေးခေါ်နေကြောင်း၊ သူတို့နှလုံးထဲ မည်သို့ဆင်ခြင်သုံးသပ်နေကြောင်း သိရှိနိုင်ရန် အသေအချာကြိုတင်စဉ်းစားထားသည့်မေးခွန်းများကို အသုံးပြုကြပါသည်။—သု၊ ၂၀:၅။

ဣသရေလလူမျိုး၌ သစ္စာတည်ကြည်လိုစိတ်ရှိစေရန် မောရှေကြိုးစားသွန်သင်ပေးနေချိန်တွင် ဤသို့ဆိုသည်။ “သင်၏အကျိုးကိုထောက်၍ . . . ထာဝရဘုရား [ယေဟောဝါ၊ NW ] ၏ပညတ်တော်ကို စောင့်ရှောက်” လော့။ (တရားဟောရာ ၁၀:၁၃) ထိုနည်းထပ်တူ ဘုရားသခင်၏စံချိန်ကို သားသမီးများအားရှင်းလင်းစွာပြောပြရုံသာမက ရိုးသားမှု၊ သီလသန့်ရှင်းမှု၊ ကောင်းသောအပေါင်းအသင်း အစရှိသည့်အရာတို့သည် အဘယ်ကြောင့်ကလေးတို့၏အကျိုးအတွက်ဖြစ်ရကြောင်း သဘောပေါက်နားလည်စေသင့်သည်။

နောက်ဆုံးအနေနှင့် ယေရှုစကားကိုဂရုပြုပါ။ “ထာဝရအသက်ဟူမူကား မှန်သောဘုရားသခင် တစ်ဆူတည်းဖြစ်တော်မူသော ကိုယ်တော်ကိုလည်းကောင်း၊ စေလွှတ်တော်မူသော ယေရှုခရစ်ကိုလည်းကောင်း သိကျွမ်းခြင်းတည်း။” (ယောဟန် ၁၇:၃) ငယ်စဉ်တောင်ကျေး ကလေးဘဝကပင် ယေဟောဝါနှင့် သားသမီးများသည် တရင်းတနှီးရှိမည်၊ မိမိတို့ပြဿနာများကို ကိုယ်တော်နှင့်တိုင်ပင်ဆွေးနွေးမည်၊ သူတို့ဆုတောင်းချက်များကို ကိုယ်တော်ဖြေဆိုပေးခြင်းအတွေ့အကြုံကို ခံစားရမည်ဆိုလျှင် ခရစ်ယာန်ဥပဓိရုပ်၏ အရေးကြီးကဏ္ဍဖြစ်သော သူတို့ဖန်ဆင်းရှင်နှင့်နှစ်ကိုယ်ကြားဆက်ဆံမှုကို သူတို့ပျိုးထောင်ပေးလာကြပါသည်။

မီးဘေး

ကောရိန္သုမြို့၌ ဆောက်လုပ်ရေးလုပ်ငန်းကို ကောင်းမွန်စွာမလုပ်ကိုင်ခဲ့သဖြင့် သင်းကွဲခြင်းနှင့်သဘောကွဲလွဲမှု အစရှိသည့်လောကီအရည်အသွေးများ အမြစ်တွယ်ကပ်လာကြောင်း ပေါလုတွေ့ရှိခဲ့သည်။ ယင်းသည် အန္တရာယ်ပင်။ အကြောင်းမူကား၊ သူရှင်းပြသည်အတိုင်း “အသီးအသီးလုပ်သောအလုပ်သည် . . . မီးအားဖြင့်ထင်ရှားစေလိမ့်မည်” ဖြစ်သည်။—၁ ကောရိန္သု ၃:၁၃။

မီးကားအဘယ်နည်း။ ခရစ်ယာန်တစ်ဦးအပေါ် စာတန်ပုံချသည့် မည်သို့သောစမ်းသပ်မှုမျိုးမဆိုဖြစ်နိုင်ပေသည်။ သက်တူရွယ်တူဖိအား၊ သွေးသားဆွဲဆောင်မှု၊ ရုပ်ဝါဒ၊ ညှဉ်းပန်းနှိပ်စက်ခြင်း၊ သံသယဝင်ခြင်း၏ တိုက်စားပျက်ပြားစေသည့်သြဇာပင်ဖြစ်နိုင်သည်။ ဤကဲ့သို့သောစမ်းသပ်မှုများကို အမှန်ကြုံကြိုက်ရပေမည်။ “အသီးအသီးလုပ်သောအလုပ်သည် ထင်ရှားလိမ့်မည်။ အဘယ်သို့နည်းဟူမူကား ဖော်ပြချိန်နေ့ရက်သည် မီးအားဖြင့်ထင်ရှားစေလိမ့်မည်။” ပညာရှိမိဘများသည် သားသမီးများအစမ်းခံရလိမ့်မည်ကို မြော်မြင် ထားပြီး ကလေးတို့၏ဥပဓိရုပ်များကို တည်ဆောက်ပေးကြခြင်းဖြစ်သည်။ သို့သော် ယေဟောဝါအကူအညီဖြင့် သူတို့သားသမီးများသည် စမ်းသပ်မှုကိုကျော်လွှားအောင်နိုင်မည်ဟု စိတ်ချနေကြမည်။ ဤသို့သောသဘောထားမျိုးကို မိဘများပိုက်ထားမည်ဆိုလျှင် သူတို့များစွာကောင်းချီးခံစားရလိမ့်မည်။

ဆုကျေးဇူး

ပေါလုဤသို့ဆိုသည်။ “ထိုတိုက်မြစ်အပေါ်၌ ထပ်ဆင့်၍တည်ဆောက်သော အကြင်သူ၏အလုပ်သည် မြဲ၏။ ထိုသူသည် အကျိုးကိုခံရလိမ့်မည်။” (၁ ကောရိန္သု ၃:၁၄) တမန်တော်ပေါလုသည် ဆုလာဘ်အကျိုးရရှိခဲ့သည်။ တည်ဆောက်ရေးလုပ်ငန်း ဆောင်ရွက်ခဲ့သော သက်သာလောနိတ်မြို့နေ ခရစ်ယာန်များအားလည်း သူဤသို့ရေးသားခဲ့သည်။ “ငါတို့မျှော်လင့်ခြင်းအကြောင်း၊ ဝမ်းမြောက်ခြင်းအကြောင်း၊ ဝါကြွားခြင်း၏ဦးရစ်သရဖူကား အဘယ်သို့သောအကြောင်းအရာနည်း။ ငါတို့သခင်ယေရှုခရစ် ကြွလာတော်မူသောအခါ ရှေ့တော်၌ သင်တို့သည် ထိုသို့သောအကြောင်းအရာဖြစ်ကြသည်မဟုတ်လော။ သင်တို့သည် ငါတို့၏ဘုန်းအသရေ၊ ငါတို့၏ဝမ်းမြောက်ခြင်းအကြောင်း ဖြစ်ကြသတည်း။”—၁ သက်သာလောနိတ် ၂:၁၉၊ ၂၀။

ဝမ်ဒါ၏မိခင်သည် ဤဆုကျေးဇူးကိုခံခဲ့ရသည်။ ၁၂ သမီးဝမ်ဒါသည် မိခင်နှင့်ခွဲခွာခဲ့ရချိန်တွင် အစအဦး၌ အိပ်ပျော်သည်တိုင် ငိုယိုရရှာသည်။ ထိုနောက် မိမိအခက်အခဲပြဿနာများကို ဆုတောင်းခြင်းအားဖြင့် ယေဟောဝါနှင့်ဆွေးနွေးရန် မိခင်၏ဆုံးမစကားကို သတိရလေသည်။ ထိုအခါဆုတောင်းလေသည်။ တယ်လီဖုန်းစာရင်းစာအုပ်ကိုယူ၍ မိမိအနီးအနား၌ ယေဟောဝါသက်သေများရှိမရှိရှာယူရန် အကြံဉာဏ်ကောင်းပေါ်လာသည်။ အဆက်အသွယ်ရ၍ ဖခင်အိမ်နှင့်တစ်လမ်းတည်းတွင် သက်သေခံအိမ်ထောင်တစ်အိမ်ထောင်ရှိကြောင်းသိရလေသည်။ “ဝမ်းသာလိုက်တာမပြောနဲ့” ဟုဝမ်ဒါပြောပြသည်။

ဤအိမ်ထောင်၏အားပေးမှုဖြင့် ဝမ်ဒါသည် သူမ၏မောင်လေးနှင့်ညီမလေးတို့အားလည်း ခရစ်ယာန်လုပ်ငန်းရပ်များ၌ပါဝင်ရန် ပြန်စည်းရုံးပေးနိုင်ခဲ့သည်။ “စည်းဝေးများအတွက် ကျွန်မတို့မောင်နှမများအသင့်ရှိကြဖို့ ကျွန်မတာဝန်ယူရတယ်။ ကျွန်မတို့အဝတ်တွေကိုလျှော်၊ ခေါင်းဖီးပေး၊ သန့်ပြန့်သင့်တော်စွာဆင်ယင်ကြဖို့ ကျွန်မဘဲတာဝန်ယူပေးတယ်။” ကလေးမလေးအတွက် မလွယ်သည့်အလုပ်ဖြစ်ငြား သူမပြုလုပ်ပေးခဲ့သည်။ တစ်ချိန်တွင် ဖခင်ဖြစ်သူက သူတို့စည်းဝေးတက်ခြင်းကို ကြိုးစားတားဆီးခဲ့သည်။ သို့သော် ကလေးများက ဖခင်ကိုတောင်းပန်ကြသဖြင့် နောက်ဆုံးသွားခွင့်ပြုခဲ့သည်။

နောင်တွင် မိခင်ထံသူတို့ပြန်သွားနေကြသည်။ ဝမ်ဒါသည် အသက် ၁၅ နှစ်အရွယ်တွင် နှစ်ခြင်းယူပြီးသား ခရစ်ယာန်ညီအစ်မတစ်ဦးဖြစ်လာသည်။ တစ်နေ့ကျလျှင် မိမိသာသနာပြုသူတစ်ဦးဖြစ်လိုကြောင်း သူ၏ဆန္ဒကိုဖေါ်ပြသည်။ မှန်ပေ၏။ ဝမ်ဒါ့မိခင်၏လုပ်ငန်းသည် စမ်းသပ်မှုကို အောင်မြင်စွာကျော်လွှားနိုင်ခဲ့ပေသည်။ သမ္မာတရားဘက် သမီးဖြစ်သူ မားမားမတ်မတ်ရပ်တည်ခြင်းကို တွေ့မြင်ရသည့်ဆုကျေးဇူးကို ခံစားခဲ့ရသည်။ မိမိတို့သားသမီးများ၌ ခရစ်ယာန်ဥပဓိရုပ်များ တည်ဆောက်ပေးရန် ခရစ်ယာန်မိဘများကြိုးစားကြရာတွင် ထပ်တူအောင်မြင်မှုမျိုးကို ခံစားရကြပါစေ။

[စာမျက်နှာ ၂၇ ပါ လေးထောင့်ကွက်]

ဤဆောင်းပါးတင်ပြသည့်အတိုင်း မိဘများအနေနှင့် မိမိတို့သားသမီးများတွင် ခရစ်ယာန်ဥပဓိရုပ်များကို တည်ဆောက်ပေးရန်ကြိုးစားကြငြားလည်း သားသမီးများကိုယ်နှိုက် တာဝန်ထမ်းဆောင်စရာရှိပါသည်။ သူတို့သည် ခရစ်ယာန်အားလုံးနည်းတူ မိမိကိုယ်၌ တည်ဆောက်ပေးခြင်းလုပ်ငန်းကိုပြုလုပ်ရကြမည်။ (ဧဖက် ၄:၂၂-၂၄) ယင်း၌ကူညီဖေးမပေးရန် မိဘများအခွင့်ထူးရရှိကြငြား နောက်ဆုံးတွင် အသီးသီးတို့သည် ယေဟောဝါအမှုတော်ကိုထမ်းလိုမလို ကိုယ်တိုင် ဆုံးဖြတ်ကြရမည်။