စာရှုသူများထံမှ မေးခွန်းလွှာ

▫ “လူအပေါင်းတို့ကို ရွေးအံ့သောငှာ မိမိကိုယ်ကိုစွန့်တော်မူ” သော “အာမခံ” ဟု ၁ တိမောသေ ၂:၅၊ ၆ ကဆိုထားသဖြင့် ယေရှုသည် ဝိညာဉ်တော်ဖွားခရစ်ယာန်များအတွက် သို့မဟုတ် လူသားအပေါင်းတို့၏ အာမခံဖြစ်ပါသလော။

လေ့လာစရာ ကြေခဲသောအစာဖြစ်သည့် အခြေခံသွန်သင်ချက်များနှင့် နက်နဲသောသမ္မာတရားများ ကျမ်းစာတွင်ပါရှိသည်။ ဤလေ့လာစရာအကြောင်းတစ်ခုမှာ အာမခံအဖြစ် ယေရှု၏ကဏ္ဍဖြစ်သည်။ တမန်တော်ပေါလုဤသို့ရေးသားခဲ့သည်။ “ဘုရားသခင်သည် တစ်ဆူတည်းရှိတော်မူ၏။ ဘုရားသခင်နှင့်လူတို့၏စပ်ကြားမှာ လူဖြစ်သောယေရှုခရစ်တည်းဟူသော အာမခံတစ်ပါးတည်းရှိ၏။ ထိုအာမခံသည် လူအပေါင်းတို့ကိုရွေးအံ့သောငှာ ကိုယ့်ကိုယ်ကိုစွန့်တော်မူပြီ။ ကာလအချိန်တန်မှသက်သေခံခြင်းရှိ၏။”—၁ တိမောသေ ၂:၅၊ ၆။

ပေါလုစကားကိုနားလည်နိုင်ရန် သစ္စာရှိလူသားတို့အတွက် ခရီးလမ်းဆုံးနှစ်ခု သမ္မာကျမ်းစာတင်ပြထားကြောင်း ဦးဆုံးသဘောပေါက်ရမည်။ (၁) ပြန်လည်တည်ထောင်ထားသော မြေကြီးပရဒိသုပေါ် ပြည့်ဝစုံလင်သောဘဝအသက်တာနှင့် (၂) ၁၄၄၀၀၀ အရေအတွက်ရှိသော ခရစ်တော်၏ “သိုးစုငယ်” အတွက်ကောင်းကင်အသက်တာ တို့ဖြစ်သည်။ (လုကာ ၁၂:၃၂။ ဗျာဒိတ် ၅:၁၀; ၁၄:၁-၃) လူကောင်းအားလုံး ကောင်းကင်တက်သည်ဟု ခရစ်ယာန်ဘောင်သွန်သင်ပေးသည်။ ကျမ်းစာနှင့်မညီညွတ်သော ဤအယူအဆသည် ယေဘုယျကြည့်မြင်ချက်ကို အဓိပ္ပာယ်တစ်မျိုးထွက်စေခဲ့ရာ ယေရှုသည် ဤသူအပေါင်းတို့အတွက် အာမခံဖြစ်သည်ဟုထင်မြင်ကြပြီ။ သို့သော် သမ္မာကျမ်းစာက မည်သို့တင်ပြသနည်း။

“အာမခံ” အတွက်အသုံးပြုသောဂရိစကားလုံး မီစီတီးစ် (me·si΄tes) အဓိပ္ပာယ်မှာ ‘နှစ်ဦး သို့မဟုတ် နှစ်ဖွဲ့အလယ်ရှိသူ’ ဖြစ်သည်။ ယင်းကား ‘ဟေလသဥပဒေသုံးစကား၏ ရှုထောင့်အမျိုးမျိုးရှိ လုပ်ငန်းပညာဆိုင်ရာစကားလုံးဖြစ်သည်။’ မီစီတီးစ်သည် “ဟေလသတရားဥပဒေသုံးစကားတွင် ကွဲပြားခြားနားဆုံး လုပ်ငန်းပညာဆိုင်ရာစကားလုံးဖြစ်သည်” ဟုပါမောက္ခအော်လ်ဘရက်ချ် အို(ပ်)ကီ၏ (Theological Dictionary of the New Testament) တွင်ဆိုသည်။

သို့သော် ယေရှု၏ဖျန်ဖြေစေ့စပ်၊ အာမခံပေးသည့် လုပ်ဆောင်မှုကဏ္ဍအတွက် သမ္မာကျမ်းစာက ဥပဒေသုံးစကားလုံးကို အဘယ်ကြောင့်အသုံးပြုထားရသနည်း။ နောက်ခံအကြောင်းအနေနှင့် သိနာတောင်တွင်စုဝေးနေသော ဣသရေလလူမျိုးအားပေးခဲ့သော ဘုရားသခင့်ပညတ်တရားအကြောင်း ပေါလုဘာပြောခဲ့သည်ကို သုံးသပ်ကြည့်စို့။ “ထိုတရားကို ကောင်းကင်တမန်များအားဖြင့် အာမခံ၏လက်၌ထားတော်မူ၏။” (ဂလာတိ ၃:၁၉၊ ၂၀) ထိုအာမခံကား မောရှေဖြစ်သည်။ သူသည် ယေဟောဝါနှင့်ဇာတိပကတိဣသရေလလူမျိုးစပ်ကြား၊ ကြားနေကိုယ်စားလှယ်ဖြစ်ပေသည်။ အဘယ်အတွက် ကိုယ်စားလှယ်ဖြစ်သနည်း။ ဘုရားသခင်နှင့် ထိုလူမျိုးစပ်ကြား ပဋိညာဉ်ဖွဲ့ရန်အတွက်ဖြစ်သည်။a

ယင်းကြောင့် အာမခံအနေနှင့် ယေရှု၏လုပ်ဆောင်မှုကဏ္ဍတွင် ဥပဒေဆိုင်ရာသဘောထားတစ်မျိုးမျိုးရှိနေပါသလော။ ရှိပါသည်။ ဟေဗြဲ ၈:၆ ပါ ပေါလုစကားကို သတိပြုပါလေ။ ပညတ်ပဋိညာဉ်အောက်ရှိ တဲတော်နှင့် အခြားပုံဆောင်ချက်များအကြောင်းပြောပြီးနောက် ဤသို့ရေးသားခဲ့သည်။ “ယေရှုသည် သာ၍မြတ်သောကတိတော်တို့၌တည်သော သာ၍မြတ်သောပဋိညာဉ်တရား၏အာမခံဖြစ်သည်နှင့်အညီ သာ၍မြတ်သောဝတ်ပြုခြင်းအခွင့်အရာကိုရတော်မူ၏။” “သာ၍မြတ်သောပဋိညာဉ်” သည် မောရှေအာမခံခဲ့သောပဋိညာဉ်အစား ဖွဲ့ခဲ့သောပဋိညာဉ်သစ်ဖြစ်သည်။ (ဟေဗြဲ ၈:၇-၁၃) ပဋိညာဉ်သစ်သည် သာ၍မြတ်သောကတိတော်တို့၌“တည်သည်။” ယင်းက တမန်တော်များနှင့်စချီသည့် ခရစ်တော်၏တပည့်နောက်လိုက်အချို့ ကောင်းကင်ကိုယ်ထည်ဖြစ်သော ‘သန့်ရှင်းရာဌာနထဲသို့ဝင်ရန်’ အခြေခံဖြစ်ပေသည်။—ဟေဗြဲ ၉:၂၄; ၁၀:၁၆-၁၉။

“ပဋိညာဉ်သစ်” ၏အာမခံအနေနှင့် ယေရှုအမှုဆောင်ကဏ္ဍ၏ ဥပဒေဆိုင်ရာသဘောနှင့်ပတ်သက်သည့် အခြားတင်ပြချက်များလည်းရှိသည်။ ဆာလံ ၁၁၀:၄ ပါဘုရားသခင်၏ကတိတော်နှင့်စပ်လျဉ်း၍ ပေါလုဤသို့ရေးသားခဲ့သည်။ “ဤသို့ခန့်ထားပုံ ကွာခြားမှုကြောင့် သခင်ယေရှုသည် ပိုမိုကောင်းမြတ်သည့် ပဋိညာဉ်တရားတော်ကို အာမခံချက် [အင်ဂျီအော့စ်၊ en’gy·os] ပေးသူဖြစ်တော်မူ၏။” (ဟေဗြဲ ၇:၂၂) (သတင်းကောင်းကျမ်း) ကျမ်းစာတွင် အင်ဂျီအော့စ်၊ en’gy·osကိုဤတစ်နေရာတည်း၌ အသုံးပြုထားသည်။ The New International Dictionary of New Testament Theology ကဤသို့ဆိုသည်။ အင်ဂျီအော့စ်၊ en’gy·osက တရားဥပဒေနှင့်ညီသောတာဝန်ပြီးမြောက်မည်ဟု အာမခံချက်ရှိသည်။” ထိုကြောင့် ပဋိညာဉ်သစ်၏အာမခံအနေနှင့် “သာ၍မြတ်သောမျှော်လင့်ချက်” တွေ့ရှိရမည်အကြောင်း ယေရှုသည်တရားဥပဒေနှင့်ညီသော ကတိတော်ဖြစ်သည်။—ဟေဗြဲ ၇:၁၉။

အခြားတစ်နေရာတွင် “စားရန်” ဟုပြန်ဆိုသည့် တရားဥပဒေသဘောပါ အခြားစကားလုံးတစ်လုံး ar·ra·bon’ ကိုထပ်ဆင့်အသုံးပြုသည်။ ထိုအဘိဓာန်ကျမ်းပင် ဤသို့ဆိုသည်။ “ဂရိစကားလုံး ar·ra·bon’ . . . သည်စီးပွားရေးနှင့်ဈေးသုံးစကားအရ တရားဥပဒေသဘောရှိသည်။” ဤတရားဥပဒေဆိုင်ရာစကားလုံးကို ပေါလုမည်သို့အသုံးပြုခဲ့ကြောင်း သတိပြုပါ။ “သင်တို့နှင့်ငါတို့ကို ခရစ်တော်၌တည်စေ၍ ဘိသိက်ပေးသောသူကား ဘုရားသခင်ဖြစ်သတည်း။ ထိုဘုရားသခင်သည် ငါတို့ကို တံဆိပ်ခတ်၍ ငါတို့စိတ်နှလုံးထဲ၌ ဝိညာဉ်တော်တည်းဟူသော စားရန်ကိုသွင်းပေးတော်မူ၏။” (၂ ကောရိန္သု ၁:၂၁၊ ၂၂) ဤ ar·ra·bon’ ဟူသောစကားလုံးကိုအသုံးပြုထားသည့် အခြားနေရာများတွင်လည်း ခရစ်ယာန်များကို ဝိညာဉ်တော်ဖြင့် ဘုရားသခင့်ဘိသိက်ပေးခြင်းနှင့် သက်ဆိုင်သည်။ သို့ဖြင့် ဘုရားသခင်၏ဝိညာဏသားများအဖြစ် ‘ကောင်းကင်၌ ထာဝရဆုကျေးဇူး သို့မဟုတ်အမွေ’ ခံဖြစ်ကြမည်။—၂ ကောရိန္သု ၅:၁၊ ၅။ ဧဖက်၁:၁၃၊ ၁၄။ Kingdom Interlinear Translation of the Greek Scriptures.

ထိုကြောင့် ပဋိညာဉ်သစ်သည် လူသားအပေါင်းအတွက်ဖြစ်သော လျော့ရဲသောအစီအစဉ်တစ်ရပ်မဟုတ်ပါ။ ဘုရားသခင်နှင့် ဘိသိက်ခံခရစ်ယာန်များနှင့်သာစပ်လျဉ်းသည့် တရားဥပဒေအရ အသေအချာပြင်ဆင်ထားသည့်ပဋိညာဉ်ဖြစ်သည်။

ယင်းက ၁ တိမောသေ ၂:၅၊ ၆ ကို ကျွန်ုပ်တို့သဘောပေါက်နိုင်ရန် အကူအညီဖြစ်ပေမည်။ ယခင်ကရေးသားခဲ့သောစာစောင်များတွင် ထိုစကားလုံးငါးကြိမ်ပါပြီးနောက်မှ “အာမခံ” ကိုဤတွင်ကိုးကားဖေါ်ပြသည်။ ထိုကြောင့် ပဋိညာဉ်သစ်နှင့်ပတ်သက်၍ ယေရှု၏အာမခံအရာသည် ဥပဒေတရားနှင့်ညီသော လုပ်ဆောင်မှုကဏ္ဍကိုဆိုလိုကြောင်း တိမောသေသဘောပေါက်ပါလိမ့်မည်။ Dibelius နှင့် Conzelmann တို့၏ The Pastoral Epistles က ၁ တိမောသေ ၂:၅ ပါ ‘“အာမခံဟူသောစကားလုံးသည် ဥပဒေတရားဆိုင်ရာအဓိပ္ပာယ်ရှိ’ ပြီး ဟေဗြဲ ၈:၆ နှင့်မတူဘဲ ဤကျမ်းပိုဒ်တွင် [ပဋိညာဉ်] အကြောင်းမပါသော်လည်း ရှေ့နောက်စကားတင်ပြသည်အတိုင်း ‘ပဋိညာဉ်၏အာမခံ’ ကိုဆိုလိုကြောင်း ယူဆရကြမည်။” ပါမောက္ခ အို(ပ်)ကီက ၁ တိမောသေ ၂:၅ သည် ယေရှုကို “ရှေ့နေနှင့်ဖျန်ဖြေစေ့စပ်ပေးသူ” အဖြစ်တင်ပြထားကြောင်း သတိပြုစေသည်။

အထူးသဖြင့် သင်သည် ဘိသိက်ခံခရစ်ယာန်တစ်ဦးမဟုတ်ပါက မျက်မှောက်ခေတ်ဥပမာတစ်ခုသည် ယင်းကိုသဘောပေါက်စေမည်။ ရှေ့နေတစ်ဦးပါဝင်နေသည့် ဥပဒေဆိုင်ရာ အမှုတစ်ခုအကြောင်းစဉ်းစားလိုက်လေ။ တရားသဖြင့်ဖြစ်စေရန်အတွက်ထက် အုပ်စုနှစ်စုစလုံးလက်ခံနိုင်ပြီး နှစ်စုစလုံးအတွက်အကျိုးရှိစေမည့် ဥပဒေဆိုင်ရာစာချုပ်တစ်ခုအတွက် ဖျန်ဖြေစေ့စပ်နေရန် ကြိုးစားနေခြင်းဖြစ်မည်။ ထိုအမှုတွင် သင်မပါဝင်သည့်အတွက် သူသည် သင့်ရှေ့နေဖြစ်မည်မဟုတ်ပေ။ သို့ဖြစ်စေကာမူ သူသည် သင်၏ရင်းနှီးသောမိတ်ဆွေတစ်ဦးဖြစ်သဖြင့် အခြားနည်းဖြင့် သင့်အားတန်ဖိုးရှိအကူအညီအမျိုးမျိုးပေးပေမည်။

တစ်ခါတစ်ရံ ရှေ့နေ၏လုပ်ငန်းသည် များစွာသောသူတို့အား အကျိုးဖြစ်ထွန်းစေသည်။ ပဋိညာဉ်သစ်၏ဖျန်ဖြေစေ့စပ်ရေးမှူးအနေနှင့် ယေရှု၏တရားဥပဒေဆိုင်ရာဖြစ်မြောက်အောင်မြင်မှုများသည်လည်းထပ်တူပင်ဖြစ်သည်။ ပညတ်ပဋိညာဉ်မဖြစ်မြောက်စေခဲ့သည့် ကောင်းကင်ဆိုင်ရာ “ယဇ်ပုရောဟိတ်များ၏နိုင်ငံတော်” ကိုဖြစ်ပေါ်စေခဲ့သည်။ (ထွက်မြောက်ရာ ၁၉:၆။ ၁ ပေတရု ၂:၉) ထိုနောက် နိုင်ငံတော်ရှိ ဘိသိက်ခံခရစ်ယာန်များသည် “မြေကြီးပေါ်လူမျိုးအပေါင်း” ကောင်းချီးများခံစားရရန် ယေရှုနှင့်အတူ ကောင်းကင်မှ အကျိုးဆောင်မည်ဖြစ်သည်။—ကမ္ဘာဦး ၂၂:၁၈။

ကမ္ဘာပေါ်ထာဝရအသက်ရရန်မျှော်လင့်သူ လူမျိုးအပေါင်းတို့သည် ယခုပင် ယေရှုအမှုတော်ဆောင်ခြင်းမှ အကျိုးကျေးဇူးခံစားနေရကြပြီ။ သူတို့သည် ပဋိညာဉ်အသစ်တွင်မပါဝင်သဖြင့် ကိုယ်တော်သည် သူတို့၏တရားဝင် ဖျန်ဖြေစေ့စပ်သူ မဟုတ်သော်ငြားလည်း၊ ကိုယ်တော်ကြောင့်သာ ယေဟောဝါထံ သူတို့ချဉ်းကပ်နိုင်ကြသည်။ ခရစ်တော်က “ငါသည် လမ်းခရီးဖြစ်၏။ သမ္မာတရားလည်းဖြစ်၏။ အသက်လည်းဖြစ်၏။ ငါ့ကိုအမှီမပြုလျှင် အဘယ်သူမျှ ခမည်းတော်ထံသို့မရောက်ရ” ဟုမိန့်တော်မူခဲ့သည်။ (ယောဟန် ၁၄:၆) ကမ္ဘာပေါ်အသက်ရှင်လိုသူအားလုံး ယေရှုမှတစ်ဆင့် ယေဟောဝါထံဆုတောင်းပတ္ထနာပြုရကြမည်။ (ယောဟန် ၁၄:၁၃၊ ၂၃၊ ၂၄) ကိုယ်တော်၏ ယဇ်ပူဇော်သက္ကာအကျိုးကျေးဇူးကို ခံစားစေတော်မူခြင်းအားဖြင့် ခွင့်လွှတ်ခံရ၍ နောက်ဆုံးတစ်နေ့ ကယ်တင်ခြင်းရရှိစေနိုင်တော်မူသော စာနာမှုရှိသည့် ယဇ်ပုရောဟိတ်အရာ၌လည်း ယေရှုအမှုတော်ထမ်းဆောင်ပေသည်။—တမန်တော် ၄:၁၂။ ဟေဗြဲ ၄:၁၅။

ထိုကြောင့် ၁ တိမောသေ ၂:၅၊ ၆ က “ဖျန်ဖြေစေ့စပ်ရေးမှူး” စကားလုံးကို ဘာသာစကားအများ၌ကဲ့သို့ ကျယ်ဝန်းသောသဘောမရှိပေ။ ယေရှုသည် ဘုရားသခင်နှင့်လူအပေါင်းတို့၏ ဖျန်ဖြေစေ့စပ်ရေးမှူးဖြစ်သည်ဟု မဆိုနေပါ။ ထိုအစား ခရစ်တော်သည် ပဋိညာဉ်သစ်၏ တရားဝင်ဖျန်ဖြေစေ့စပ်သူ (အာမခံ သို့မဟုတ် “ရှေ့နေ”) ဖြစ်သည်ဟုဆိုနေခြင်းဖြစ်သည်။ ယင်းက ထိုစကားလုံးကို သမ္မာကျမ်းစာအသုံးပြုထားသည့် အကန့်အသတ်နည်းပင်ဖြစ်သည်။ ကောင်းကင်တွင်မသေနိုင်သောအသက်ရမည့် ဂျူးနှင့်တစ်ပါးအမျိုးသားများအတွက် ယေရှုသည်အာမခံဖြစ်သည်။ ၁ ယောဟန် ၂:၂ တွင် ဤသူများအကြောင်း တမန်တော်ယောဟန်ဖေါ်ပြထားသည်။ သို့သော် အခြားသူများလည်း ခရစ်တော်၏ယဇ်ပူဇော်သက္ကာအကျိုးကျေးဇူးခံစားရမည်ဟု သူတင်ပြထားသေးသည်။ “ထိုသခင်သည် ငါတို့၏အပြစ်မက လောကီသားအပေါင်းတို့၏အပြစ်ဖြေစရာအကြောင်း ဖြစ်တော်မူ၏။”

‘လောကမှလူအပေါင်း’ သည် ပြန်လည်တည်ထောင်သော ကမ္ဘာ့ပရဒိသုတွင် ထာဝရအသက်ရမည့်သူများဖြစ်သည်။ ဤကဲ့သို့မျက်နှာသာခံစားနေရသူ သန်းပေါင်းများစွာတို့သည် ထိုမြေကြီးဆိုင်ရာမျှော်လင့်ချက်ကို ယခုပင်ရှိနေကြသည်။ ယေရှုမှတစ်ဆင့် ယေဟောဝါထံ သူတို့နေ့စဉ်ချဉ်းကပ်နိုင်ရန် ကိုယ်တော်အား သူတို့၏ယဇ်ပုရောဟိတ်နှင့် ဘုရင်အဖြစ် သူတို့အသိအမှတ်ပြုထားပါသည်။ သူတို့အကျိုးရယူနိုင်သည့် ယေရှု၏ရွေးဖိုးပူဇော်သက္ကာကို မှီခိုအားထားကြသည်။ ၄င်း၏အကျိုးထူးကို အာဗြဟံ၊ ဒါဝိဒ် နှင့် နှစ်ခြင်းဆရာယောဟန်တို့ ထမြောက်လာသည့်အခါလည်း ခံစားရကြလိမ့်မည်။ (မဿဲ ၂၀:၂၈) ဤနည်းဖြင့် ခရစ်တော်၏ယဇ်ပူဇော်သက္ကာသည် နာခံမှုပြသော လူသားအပေါင်း ထာဝရအသက်ရရန် ပို့ဆောင်ပေးတော်မူမည်။

[အောက်ခြေမှတ်ချက်များ]

[စာမျက်နှာ ၃၂ ပါ ရုပ်ပုံ]

ဤသိနာတောင်အရပ်တွင် ပဋိညာဉ်သစ်၏ဖျန်ဖြေစေ့စပ်မှူးအဖြစ် မောရှေအမှုထမ်းခဲ့သည်

[Credit Line]

Pictorial Archive (Near Eastern History) Est.