အာဗြဟံ—ဘုရားသခင်နှင့် မိတ်ဆွေဖွဲ့လိုသူအပေါင်းအတွက် စံနမူနာ

“သူသည်ယုံကြည်ခြင်း၌ အားမလျော့ဘဲ . . . [ဘုရားသခင်] သည်ကတိထားတော်မူသည့်အတိုင်း ပြုနိုင်တော်မူကြောင်း အကြွင်းမဲ့ယုံကြည်၏။”—ရောမ ၄:၁၉-၂၁၊ ကဘ။

၁။ အာဗြဟံမှတ်တမ်းအကြောင်းကို အယုံအကြည်မရှိအောင် စာတန် အဘယ်ကြောင့်ကြိုးစားသနည်း။

သ မ္မာကျမ်းစာတွင် ဖေါ်ပြထားသည့် ဘုရားသခင့်နှုတ်ကပတ်တော်သည် ‘အသက်ရှင်၍ တန်ခိုးနှင့်ပြုပြင်တတ်၏။’ (ဟေဗြဲ ၄:၁၂) သို့ဖြစ်သောကြောင့် လွန်ခဲ့သောနှစ်ပေါင်း ၃၅၀၀ ကျော်ကရေးသားခဲ့သည့် ယေဟောဝါနှင့်အာဗြဟံဆက်ဆံရေးအကြောင်းမှတ်တမ်းမှာ ဘုရားသခင်နှင့်မိတ်ဖွဲ့လိုသူအပေါင်းအတွက် အားတက်ဖွယ်ရာ အရင်းအမြစ်တစ်ရပ်ဖြစ်သည်။ (ရောမ ၁၅:၄) ဤအကြောင်းကို ရန်သူကြီး စာတန်သိသဖြင့် ဘာသာရေးခေါင်းဆောင်များကို အသုံးပြုပြီး ထိုမှတ်တမ်းမှာဒဏ္ဍာရီဖြစ်သည်ဟု အသရေဖျက်၍ အယုံအကြည်မရှိအောင်ပြုလုပ်လာခဲ့သည်။—၂ ကောရိန္သု ၁၁:၁၄၊ ၁၅။

၂။ အာဗြဟံနှင့်ပတ်သက်၍ ယေရှု၏တပည့်တော်များ အဘယ်အမြင်သဘောထားရှိကြသနည်း။

^၂ အာဗြဟံ၏သမိုင်းသည် ‘ဘုရားသခင်မှုတ်သွင်းရာ ကျမ်းစာရှိသမျှ’ ၏အစိတ်အပိုင်းအနေနှင့် မှန်ကန်၍ ‘ခရစ်ယာန်သင်ကြားခြင်းအတွက်အကျိုးရှိ၏။’ (၂ တိမောသေ ၃:၁၆။ ယောဟန် ၁၇:၁၇) ယေရှု၏ ကနဦးတပည့်တော်များသည် ဤအကြောင်းကိုကောင်းစွာ သဘောပေါက်ကြသဖြင့် ခရစ်ယာန်ဂရိကျမ်းစာတွင် အာဗြဟံအကြောင်း ၇၄ ကြိမ်ဖေါ်ပြထားသည်။ ယုံကြည်ခြင်း အားတက်ဖွယ်ဖြစ်သော ဟေဗြဲသြဝါဒစာအခန်းကြီး ၁၁ တွင်ခရစ်ယာန်ခေတ်မတိုင်မီက ဘုရားသခင့်အစေခံများအားလုံးထက် သူ့အကြောင်းကိုပို၍ နေရာပေးထားသည်။

၃။ အာဗြဟံအကြီးအကျယ်မည်သို့ ဂုဏ်ပြုခြင်းခံရသနည်း။

^၃ အာဗြဟံသည် သာမန် “ပရောဖက်” မျှသာမဟုတ်ပေ။ အဘယ်ကြောင့်ဆိုသော်ယေဟောဝါသည် ကြီးမြတ်သော “ပုံပမာ” တစ်ခု၌ သူ့အားသရုပ်ဆောင်အဖြစ်အသုံးတော်ခံထား၏။ ထိုပုံပမာတွင် ဘိုးဘေးအာဗြဟံသည် ဘုရားသခင် ကိုယ်တော်တိုင်၏ ရှေ့ပြေးစံနမူနာအဖြစ် သရုပ်ဆောင်ခြင်းအခွင့်ဖြင့် အကြီးအကျယ်ဂုဏ်ပြုချီးမြှင့်ခြင်းခံရသည်။ (ကမ္ဘာဦး ၂၀:၇။ ဂလာတိ ၄:၂၁-၂၆) ထို့ကြောင့်ဘုရားမျက်နှာသာရ အနေအထားအကြောင်း ဥပမာဆောင်၍ ရှင်းလင်းရာတွင် ယေရှုက “အာဗြဟံ၏ရင်ခွင်” ဟုတင်စားမိန့်ဆိုတော်မူ၏။—လုကာ ၁၆:၂၂။

သူ၏ ပထမ ယုံကြည်ခြင်းလုပ်ရပ်

၄။ သမ္မာကျမ်းစာအရ ဘုရားသခင်နှင့်အာဗြံတို့၏ ဆက်ဆံရေးမည်သို့စတင်ခဲ့သနည်း။

^၄ သူ၏နာမည်ရင်းမှာ အာဗြံဖြစ်ပြီး ‘ခါလဒဲပြည်ဥရမြို့’ ၌ကြီးပြင်းသည်။ ထိုမြို့တွင် နေထိုင်စဉ်အခါ ယေဟောဝါထင်ရှားတော်မူ၍ ဤသို့မိန့်တော်မူ၏။ “သင်၏ပြည်နှင့်တကွ အမျိုးသားချင်းပေါက်ဖော်များထဲကထွက်ပြီးလျှင် ငါပြလတံ့သောပြည်သို့သွားလော့။ ငါသည် သင့်ကိုလူမျိုးကြီးဖြစ်စေမည်။ ငါကောင်းချီးပေး၍ သင်၏နာမကိုကြီးမြတ်စေမည်။ သင်သည် ကောင်းချီးခံရသောသူ ဖြစ်လိမ့်မည်။ သင့်ကို ကောင်းချီးပေးသောသူကို ငါကောင်းချီးပေးမည်။ သင့်ကို ကျိန်ဆဲသောသူကို ငါကျိန်ဆဲမည်။ သင်အားဖြင့်လည်း လူမျိုးအပေါင်းတို့သည် ကောင်းချီးမင်္ဂလာကို ခံရကြလိမ့်မည်။”—ကမ္ဘာဦး ၁၂:၁-၃၊ ၁၅:၇။ တမန်တော် ၇:၂၊ ၃။

၅။ (က) ဘုရားသခင်၏ကတိတော်သည် အာဗြံ၏နှလုံးသားကို မည်သို့ထိခိုက်ခဲ့မည်နည်း။ (ခ) ထိုကတိတော်ကို အာဗြံမည်သို့တုံ့ပြန်ခဲ့သနည်း။

^၅ စိန်ခေါ်ခြင်း သဘောသက်ဝင်သော တောင်းဆိုချက်ပါတကား။ အာဗြံအဖို့ ယင်းအတိုင်းလိုက်နာခြင်းဆိုသည်မှာ အကောင်းဆုံး ပတ်ဝန်းကျင်အသိုင်းအဝိုင်းနှင့် ဆွေမျိုးတို့ကို စွန့်ခွာလျက် ဝေးလံသည့်တိုင်းတစ်ပါးတွင် သွားရောက်နေထိုင်ခြင်းမည်၏။ သို့သော်ဘုရားသခင်၏မေတ္တာပြည့်ဝသော ကတိတော်သည် အာဗြံ၏နှလုံးသားထဲသို့ နက်ရှိုင်းစွာငြိတွယ်လျက်ရှိသည်။ မြုံနေသောမယားနှင့် ကလေးမရှိသောအဘိုးအိုတစ်ဦးအနေနှင့် မကြာမီသူ့နာမည်သည် မေ့ပျောက်ခံရတော့မည်ဟုပင်ထင်ရသည်။ ဘုရားကတိတော်က သူ့အားဆန့်ကျင်ဘက် မျှော်လင့်ချက်ကို အာမခံထားသည်။ သူ့ထံမှ “လူမျိုးကြီးတစ်မျိုး” ဆင်းသက်လာပေမည်။ ထိုမျှမက ဘုရားသခင့်ကတိတော်တွင် လူမျိုးအပေါင်း ကောင်းချီးမင်္ဂလာခံစားရမည့်အချိန်ကို ညွှန်ပြသည့် သတင်းကောင်းကို လူသားအပေါင်းတို့အား ဟောပြောကြေညာခြင်းလည်းပါဝင်သည်။ (ဂလာတိ ၃:၈) အာဗြံသည် ယေဟောဝါ၏ကတိတော်ကို ယုံကြည်၍ တိုးတက်သော ယဉ်ကျေးမှု၏အချက်အချာမှ ထွက်ခဲ့လေသည်။ “သူသည် အဘယ်အရပ်သို့သွားသည်ကို ကိုယ်တိုင်မသိဘဲလျက် . . . ထွက်သွားလေ၏” ဟုသမ္မာကျမ်းစာဆို၏။—ဟေဗြဲ ၁၁:၈။

၆။ (က) ကမ္ဘာဦး ၁၁:၃၁ ကပြောင်းရွှေ့ခြင်းကို တေရ ဦးဆောင်စီစဉ်သည်ဟု အဘယ်ကြောင့် ဂုဏ်ပြုမှတ်တမ်းတင်ထားသနည်း။ (တမန်တော် ၇:၂-၄) (ခ) စာရာသည် အဘယ်နည်းအားဖြင့် ယနေ့ခရစ်ယာန်အမျိုးသမီးများအတွက် စံနမူနာဖြစ်သနည်း။

^၆ အာဗြံ၏ယုံကြည်ခြင်းသည် အခြားသူတို့အတွက်လည်း အကျိုးသက်ရောက်ခဲ့သည်။ သူ့မိသားစုမှစ၍ သူ့ဖခင်တေရနှင့် တူတော်မောင်လောတတို့လည်း သူနှင့်အတူထွက်ခွာကြသည်။ သို့သော်လည်း တေရသည် မိသားစုကြီး၏ဦးစီးဖြစ်ရကား သူဦးဆောင်၍ ပြောင်းရွှေ့သည်ဟု ဂုဏ်ပြုမှတ်တမ်းတင်ထားသည်။ (ကမ္ဘာဦး ၁၁:၃၁) နောင်တွင် စာရာဟုခေါ်သော စာရဲထံမှ အာဗြံရရှိသောထောက်ခံအားပေးမှုမှာ မှတ်သားထိုက်သော အချက်ဖြစ်ပေသည်။ သူမ၏ကျန်အသက်တာဘဝတစ်လျှောက်လုံးတွင် နိမ့်ကျသောနေထိုင်မှုအဆင့်အတန်းနှင့် သည်းခံပြီးနေသွားသည်။ (ကမ္ဘာဦး ၁၃:၁၈၊ ၂၄:၆၇) သူမကွယ်လွန်သောအခါ “အာဗြဟံသည်လည်း စာရာကြောင့်ညည်းတွားငိုကြွေးခြင်းငှာ ဝင်လာ” သည်မှာ နားလည်ရန်မခက်သော အချက်ဖြစ်သည်။ (ကမ္ဘာဦး ၂၃:၁၊ ၂) သူမ၏ ခိုင်မြဲသော ယုံကြည်ခြင်းနှင့် မယားကောင်းပီသစွာ စိတ်နှလုံးအပြည့်အဝလက်အောက်ခံခြင်းကြောင့် ခရစ်ယာန်အမျိုးသမီးများအတွက် စစ်မှန်သော ဝိညာဏအလှကျက်သရေ၏ စံနမူနာအဖြစ်ဖေါ်ကျူးခြင်းခံရလေသည်။—ဟေဗြဲ ၁၁:၁၁၊ ၁၃-၁၅။ ၁ ပေတရု ၃:၁-၆။

၇။ ယခုခေတ်ခရစ်ယာန်များသည် အဘယ်နည်းအားဖြင့် အာဗြဟံနှင့်စာရာတို့ကဲ့သို့သော ယုံကြည်ခြင်းမျိုးရှိကြောင်းတင်ပြကြသနည်း။

^၇ ယခုခေတ်ခရစ်ယာန်အများတို့သည် နိုင်ငံတော်ဟောပြောသူများ အထူးလိုအပ်နေသော ဒေသများ၌ ဘုရားသခင့်သတင်းတရားကို ဖြန့်ဖြူးရန်အတွက်သော်လည်းကောင်း၊ သမ္မာကျမ်းစာစာပေ ပုံနှိပ်ထုတ်ဝေတင်ပို့ရန် လိုအပ်သောအဆောက်အဦးများဆောက်လုပ်ခြင်း၊ အထောက်အကူပြု စက်ပစ္စည်းကိရိယာများကို ကိုင်တွယ်ဆောင်ရွက်ခြင်းအတွက်သော်လည်းကောင်း စေတနာအလျောက် သွားရောက်ထမ်းဆောင်ခြင်းအားဖြင့် အလားတူယုံကြည်ခြင်းမျိုးကို တင်ပြနေကြသည်။ (မဿဲ ၂၄:၁၄) ဤခရစ်ယာန်တို့သည် “သင်တို့သွား၍ လူမျိုးတကာတို့ကို ငါ့တပည့်ဖြစ်စေလော့” ဟူသော အမိန့်တော်ကို နာခံကြသည်။ မသိကျွမ်းသော တိုင်းပြည်တစ်ပြည်သို့ ပြောင်းရွှေ့နေထိုင်ရာတွင် ကွဲပြားသောလူနေမှု အဆင့်အတန်းနှင့် လိုက်လျောညီထွေ ပြုပြင်ပြောင်းလဲမှု ပြုလုပ်ရလေ့ရှိသည်။ အခြားသူတို့မှာ မိမိတို့ဒေသတွင်း၌ တပည့်ဖြစ်စေရေးအတွက် ရုပ်ဝတ္တုပိုင်းတွင် ထူးထူးခြားခြား စွန့်လွှတ်အနစ်နာခံခဲ့ကြသည်။—မဿဲ ၂၈:၁၉၊ ၂၀။

အခြားယုံကြည်ခြင်းလုပ်ရပ်များ

၈။ အာဗြံထံ ယေဟောဝါ ဒုတိယအကြိမ်ထင်ရှားရန် အဘယ်အကြောင်းကဖန်တီးခဲ့သနည်း။

^၈ အာဗြံသည် ဟာရန်မြို့တွင်ဖခင်တေရကွယ်လွန်သည်အထိ ရပ်နားခဲ့၏။ (ကမ္ဘာဦး ၁၁:၃၁၊ ၃၂) ထိုနောက်သူ့အိမ်ထောင်စုသည် ဥဖရတ်မြစ်ကို ဖြတ်ကူး၍ တောင်အရပ်သို့ ဦးတည်ထွက်ခဲ့လေသည်။ နောက်ဆုံး၌ ခါနာန်ပြည်အလယ်ပိုင်းရှိ “ရှိခင်အရပ်” သို့ရောက်ကြ၏။ အလွန်သာယာလှပသည့် မြင်ကွင်းဖြစ်ခဲ့ပေမည်။ ရှိခင်အရပ်သည် ဧဗလတောင်တန်းနှင့် ဂေရဇိမ်တောင်တန်းနှစ်ခုကြားရှိ မြေသြဇာကောင်းသော ချိုင့်ဝှမ်းတွင်တည်ရှိသည်။ ယင်းအရပ်ကို “သန့်ရှင်းသောပြည်တော်၏ပရဒိသု” အဖြစ်တင်စားပြောဆိုကြသည်။ ဤအရပ်တွင် ယေဟောဝါ တစ်ဖန်ထင်ရှား၍ အာဗြံအား “ဤပြည်ကို သင်၏အမျိုးအနွယ်အား ငါပေးမည်” ဟုမိန့်တော်မူသည်မှာ လျောက်ပတ်လှပေသည်။—ကမ္ဘာဦး ၁၂:၅-၇။

၉။ (က) အဘယ်ထူးခြားထင်ရှားသောနည်းဖြင့် ယုံကြည်ခြင်းကို အာဗြံ ဆက်လက်၍ တင်ပြခဲ့သနည်း။ (ခ) ဤအကြောင်းမှ ကျွန်ုပ်တို့အဘယ်သင်ခန်းစာရရှိသနည်း။

^၉ အာဗြံသည် ယုံကြည်ခြင်းလုပ်ရပ် နောက်တစ်ခုဖြင့် တုံ့ပြန်ခဲ့သည်။ မှတ်တမ်း၌ဆိုသည့်အတိုင်း သူသည်ယေဟောဝါအဖို့ “ထိုအရပ်၌ယဇ်ပလ္လင်ကိုတည်လေ၏။” (ကမ္ဘာဦး ၁၂:၇) တိရစ္ဆာန်ယဇ်ပူဇော်ခြင်းလည်းပါဝင်ဖွယ်ရှိသည်။ အဘယ်ကြောင့်ဆိုသော် “ယဇ်ပလ္လင်” အတွက်ဟေဗြဲစကားလုံးမှာ “ယဇ်ပူဇော်ရာနေရာ” ဟူ၍ အဓိပ္ပာယ်ရှိသောကြောင့်ဖြစ်သည်။ နောင်တွင် အာဗြံသည် ဤယုံကြည်ခြင်းလုပ်ရပ်များကို အခြားဒေသတွင် ထပ်ခါထပ်ခါပြုလုပ်ခဲ့သည်။ ထို့ပြင် သူသည် ‘ယေဟောဝါ၏နာမတော်အားဖြင့်ပတ္ထနာပြုလေ၏။’ (ကမ္ဘာဦး ၁၂:၈၊ ၁၃:၁၈၊ ၂၁:၃၃) “နာမတော်အားဖြင့် ပတ္ထနာပြုသည်” ဟူသောဟေဗြဲဝါကျပြတ်သည် “နာမတော်ကိုကြေညာ (ဟောပြော) သည်” ဟူ၍လည်း အဓိပ္ပာယ်ရသည်။ ထို့ကြောင့်အာဗြံ၏အိမ်ထောင်စုမှစ၍ ခါနာန်လူမျိုးတို့သည် သူ့ဘုရား၏နာမတော် ယေဟောဝါအကြောင်း အာဗြံရဲရင့်စွာကြေညာသည်ကို ကြားခဲ့ကြပေမည်။ (ကမ္ဘာဦး ၁၄:၂၂-၂၄) ထိုနည်းတူ ယနေ့ဘုရားနှင့်မိတ်ဆွေ ဖွဲ့လိုသူအပေါင်းတို့အနေဖြင့် ယုံကြည်ခြင်း၌ နာမတော်အားဖြင့်ပတ္ထနာပြုရကြမည်။ လူထုဟောပြောခြင်းလုပ်ငန်းတွင် ပါဝင်ရမည်။ “နာမတော်ကို [လူထုရှေ့] ဝန်ခံသော နှုတ်ခမ်းအသီးတည်းဟူသောချီးမွမ်းခြင်းယဇ်ကို ဘုရားသခင်အား အစဉ်ဆက်ကပ်ပူဇော်” ကြရမည်။—ဟေဗြဲ ၁၃:၁၅။ ရောမ ၁၀:၁၀။

၁၀။ (က) အာဗြံသည် အခြားအဘယ်နည်းများဖြင့် ယုံကြည်ခြင်းတင်ပြသနည်း။ (ခ) ခရစ်ယာန်အိမ်ထောင်ဦးစီးများအတွက် သူအဘယ်စံနမူနာထားခဲ့သနည်း။ (၁ တိမောသေ ၃:၁၂)

^၁၀ အာဗြံသည် ယေဟောဝါ၌ယုံကြည်ကြောင်း အခြားနည်းလမ်းများစွာဖြင့် တင်ပြခဲ့သည်။ ငြိမ်းချမ်းရေးအတွက် ကိုယ်ကျိုးစွန့်အနစ်နာခံပြီး အရေးကြုံလာလျှင်လည်း ရဲရင့်ပြတ်သားစွာ ရင်ဆိုင်ဖြေရှင်းသည်။ (ကမ္ဘာဦး ၁၃:၇-၁၁၊ ၁၄:၁-၁၆) ကြွယ်ဝချမ်းသာသော်လည်း ရုပ်ဝါဒီမဆန်ပေ။ (ကမ္ဘာဦး ၁၄:၂၁-၂၄) ဧည့်ဝတ်ကျေပွန်၍ ယေဟောဝါ၏ကိုးကွယ်မှုကို ရက်ရောစွာ ထောက်ခံအားပေးသည်။ (ကမ္ဘာဦး ၁၄:၁၈-၂၀၊ ၁၈:၁-၈) အရေးအကြီးဆုံးမှာ သူသည် စံပြအိမ်ထောင်ဦးစီးဖြစ်သည်။ မိမိသားများနှင့်တကွ အိမ်သူအိမ်သားတို့အား ‘ယေဟောဝါ၏တရားလမ်းသို့လိုက်သဖြင့် ဖြောင့်မတ်ခြင်းကိုပြု’ စေခြင်းငှာ ပညတ်ထားခြင်းအားဖြင့် ယေဟောဝါညွှန်ကြားချက်ကိုလိုက်နာသည်။ (ကမ္ဘာဦး ၁၈:၁၉) ဤနေရာတွင် အာဗြံ၏ အိမ်သူအိမ်သားတို့သည် အနီးအနားရှိ သောဒုံနှင့်ဂေါမောရမြို့များတွင် နေထိုင်သည့် လိင်သီလဖောက်ပြန်သော ခါနာန်လူတို့၏ လမ်းစဉ်နှင့်အကြီးအကျယ် ခြားနားသည့်လမ်းကိုလိုက်ကြသည်။ အာဗြံအနေဖြင့် ကြီးလေးသော ထိုအပြစ်မျိုးကို မိမိအိမ်ထောင်အတွင်း၌ လုံးဝသည်းခံခွင့်ပြုခဲ့မည်မဟုတ်ပေ။ သူ၏အိမ်သူအိမ်သားတို့သည် သူ့နမူနာကိုယူ၍ ယုံကြည်ခြင်း၌ ယေဟောဝါ၏နာမတော်အားဖြင့် ပတ္ထနာပြုကြခြင်းကိုကြည့်သော် သူသည်မိမိအိမ်ထောင်ကိုကောင်းမွန်စွာ အုပ်ချုပ်နိုင်ကြောင်းထင်ရှားသည်။—ကမ္ဘာဦး ၁၆:၅၊ ၁၃၊ ၂၄:၂၆၊ ၂၇၊ ၂၅:၂၁။

“ယုံကြည်ခြင်း၌ အားမလျော့”

၁၁။ အာဗြံသည် ‘သူတစ်ပါးပိုင်သောပြည်တွင် ဧည့်သည်ကဲ့သို့’ အနှစ်တစ်ရာတိုင် အဘယ်သို့ကြံ့ကြံ့ခံနေနိုင်ခဲ့သနည်း။

^၁၁ မိမိတို့တိုင်းပြည်ပါဟု ပြောဆိုကြသောလူမျိုးတို့တွင် အာဗြံအနှစ်တစ်ရာနေထိုင်စဉ်အတွင်း အခက်အခဲဒုက္ခများကို ကြံ့ကြံ့ခံနိုင်ရန် ခိုင်ခံ့သောသူ၏ ယုံကြည်ခြင်းက သူ့အားထောက်မခဲ့သည်။ (ကမ္ဘာဦး ၁၂:၄၊ ၂၃:၄၊ ၂၅:၇) သမ္မာကျမ်းစာ ဤသို့ဆို၏။ “သူတစ်ပါးပိုင်သောပြည်၌ ဧည့်သည်နေသကဲ့သို့ ကတိတော်နှင့်စပ်ဆိုင်သော ပြည်၌ယုံကြည်ခြင်းအားဖြင့် ဧည့်သည်ဖြစ်၍နေ၏။ ထိုကတိတော်ကို အမွေခံရသော အဖေါ်အဖက်တည်းဟူသော ဣဇာက်၊ ယာကုပ်တို့နှင့် အတူ တဲ၌နေလေ၏။ အကြောင်းမူကား၊ ဘုရားသခင်တည်ထောင်တော်မူသော ခိုင်ခံ့မြဲမြံသောမြို့ [ဘုရားသခင့်နိုင်ငံတော်] ကိုမျှော်လင့်သတည်း။ ထိုသူတို့သည် အထက်က ထွက်သောပြည်ကို အောက်မေ့သည် မှန်လျှင် ထိုပြည်သို့ပြန်ရသော အခွင့်ရှိကြ၏။”—ဟေဗြဲ ၁၁:၉၊ ၁၀၊ ၁၅။ ဟေဗြဲ ၁၂:၂၂၊ ၂၈ နှင့်နှိုင်းယှဉ်ပါ။

၁၂။ အာဗြံအနေဖြင့် ဥရမြို့သို့ပြန်ရန် အဘယ်အခွင့်အလမ်းစောစောစီးစီး ရရှိခဲ့သနည်း။ ထိုအကျပ်အတည်းကို သူမည်သို့ဖြေရှင်းခဲ့သနည်း။

^၁၂ ခါနာန်ပြည်ရောက်၍ မကြာမီ အလွန်ကြီးကျယ်သောအစာခေါင်းပါးခြင်း ကပ်ဆိုက်ရာ အာဗြံအတွက် နေရင်းပြည်သို့ “ပြန်ရန်အခွင့်အလမ်း” ပေါ်လာသည်။ ဥရမြို့သည် ဥဖရတ်မြစ်ရေ အလျှံပယ်ရရှိသဖြင့် မိုးရေကိုအားထားစရာမလိုပေ။ သို့သော်ထိုမြို့သို့ ပြန်မည့်အစား ယေဟောဝါအပေါ်ယုံကြည်ကိုးစားလျက် ဆန့်ကျင်ဘက်အရပ်ဖြစ်သော အီဂျစ်ပြည်သို့ ဦးတည်သွားလေ၏။ ဘေးရန်များပြားလှသည်။ နိုင်ငံခြားသားဖြစ်သော အာဗြံအနေဖြင့် မယားချောချောလှလှရှိသဖြင့် ထိုပြည်တွင်အသက်အန္တရာယ်တွေ့နိုင်သည်။ သို့သော်လည်း သူသည်သတိဝီရိယကြီးစွာနှင့် လင်မယားတော်စပ်ပုံကို ဖွင့်မပြောရန် စာရဲကို မှာကြား၏။ အာဗြံ၏ယုံကြည်ခြင်းအတွက် သူ့အားယေဟောဝါကောင်းချီးပေးတော်မူသဖြင့် မကြာမီ သူသည် ယခင်ကထက်များပြားသော ဥစ္စာစည်းစိမ်တို့နှင့်တကွ ကတိထားရာပြည်တော်သို့ပြန်သွားနိုင်ခဲ့သည်။—ကမ္ဘာဦး ၁၂:၁၀–၁၃:၂၊ ၂၀:၁၂။

၁၃။ စာရဲ၏မြုံခြင်းနှင့် သူမ၏လင်သားဖြစ်ခြင်းကို အာဗြံဖုံးကွယ်ထားခြင်းတို့သည် အသီးသီးဘာကိုပုံဆောင်သနည်း။

^၁၃ ဤအကြောင်းမှာလည်း ကျွန်ုပ်တို့ကိုဆုံးမသွန်သင်ရန်အတွက် အာဗြံအမှတ်မထင်ပါဝင်ကပြခဲ့သည့် ပရောဖက်ပြုချက်ဆိုင်ရာ ပြဇာတ်၏တစ်ခန်းတစ်ကဏ္ဍဖြစ်သည်။ ထိုအချိန်အထိ မြုံနေသောစာရဲသည် သစ္စာရှိကောင်းကင်တမန်များဖြင့် ဖွဲ့စည်းထားသော ယေဟောဝါ၏ကောင်းကင်ဆိုင်ရာ မိန်းမကဲ့သို့သော အဖွဲ့အစည်းကို ပုံဆောင်သည်။ ဤတင်စားသည့် လှပသော မိန်းမသည် သာ၍ကြီးမြတ်သည့် အာဗြဟံဖြစ်သော ယေဟောဝါဘုရားသခင်၏ အမျိုးအနွယ်အစစ် ပေါ်ထွန်းစေရန်အတွက် နှစ်ပေါင်း ၄၀၀၀ ကျော်စောင့်ခဲ့ရသည်။ စောင့်နေရသော ထိုနှစ်များအတွင်း ဘုရားသခင့်သစ္စာရှိအစေခံများ ပြောင်ပြောင်တင်းတင်း နှိပ်စက်ညှဉ်းပန်းခံရခြင်းကို ထောက်ရှုလျှင် ယေဟောဝါသည် သူမ၏လင်သားဖြစ်ခြင်းကို မသိအောင်ဖုံးကွယ်ထားသည်ဟု ထင်မှတ်ရသည်။—ကမ္ဘာဦး ၃:၁၅။ ဟေရှာယ ၅၄:၁-၈။ ဂလာတိ ၃:၁၆၊ ၂၇၊ ၂၉၊ ၄:၂၆။

၁၄။ (က) နောက်ဆုံး၌ စာရဲသည် ကလေးမရနိုင်သည့်အတွက်ကြောင့် မည်သို့စီစဉ်ဆောင်ရွက်ခဲ့သနည်း။ (ခ) အာဗြံအသက် ၉၉ နှစ်တွင်ဘာဖြစ်ပျက်သနည်း။ အဘယ်ကြောင့်နည်း။

^၁၄ ဧည့်သည်အဖြစ်ဆယ်နှစ်ကြာ သည်းခံစောင့်ပြီးနောက်၌ပင် အာဗြံ၌အမွေခံသားမရှိသေးပေ။ စာရဲသည် စိတ်ပျက်ပျက်နှင့်မိမိကျွန်မ ဟာဂရအားဖြင့် သားသမီးထွန်းကားရန် အာဗြံအားတောင်းပန်သည်။ အာဗြံသဘောတူသဖြင့် ဣရှမေလမွေးဖွားလာသည်။ (ကမ္ဘာဦး ၁၂:၄၊ ၁၆:၁-၄၊ ၁၆) သို့ရာတွင် ကောင်းချီးပေးမည့် ကတိထားရာ အမျိုးအနွယ်မှာ အခြားသူတစ်ဦးမှ ဆင်းသက်လာမည်ဖြစ်သည်။ အာဗြံအသက် ၉၉ နှစ်တွင် သူ့နာမည်ကို အာဗြဟံအဖြစ် ပြောင်းလိုက်သည်။ အကြောင်းမှာ၊ ဘုရားမိန့်တော်မူသည့်အတိုင်း “ငါသည်သင့်ကို လူမျိုးအများတို့၏အဘအရာ၌ ခန့်ထားပြီ” ဖြစ်သောကြောင့်တည်း။ စာရဲ၏နာမည်ကိုလည်း သားတစ်ယောက်ရမည်ဟူသော ကတိတော်နှင့်အတူ စာရာဟူ၍ ပြောင်းလိုက်သည်။—ကမ္ဘာဦး ၁၇:၁၊ ၅၊ ၁၅-၁၉။

၁၅။ (က) စာရာသားဖွားမည်ဟူသော စကားကိုကြားသော် အာဗြဟံအဘယ်ကြောင့်ရယ်သနည်း။ (ခ) အာဗြဟံသည် မိမိ၏ခိုင်ခံ့သောယုံကြည်ခြင်းအတွက် နောက်ထပ်အဘယ်သက်သေအထောက်အထားတင်ပြသနည်း။

^၁၅ အာဗြဟံနှင့်စာရာတို့သည် သားဖွားနိုင်သောအစွမ်း ကုန်ခန်းနေပြီဖြစ်သောကြောင့် ထိုစကားကိုကြားသော် အာဗြဟံ (နောက်ပိုင်းတွင်စာရာ) သည်ရယ်၏။ (ကမ္ဘာဦး ၁၇:၁၇၊ ၁၈:၉-၁၅) သို့သော်ဤကား မယုံနိုင်၍၊ ရယ်ခြင်းမဟုတ်ပေ။ သမ္မာကျမ်းစာရှင်းပြသည့်အတိုင်း “သူသည်ယုံကြည်ခြင်း၌ အားမလျော့ဘဲ . . . ဘုရားသခင်၏ကတိတော်ကြောင့် . . . ယုံကြည်ခြင်းအားဖြင့် ခွန်အားပြည့်ဝလာသဖြင့် ဘုရားသခင်၏ဂုဏ်တော်ကို ချီးမွမ်း၍ ကိုယ်တော်သည် ကတိထားတော်မူသည့်အတိုင်း ပြုနိုင်တော်မူကြောင်း အကြွင်းမဲ့ယုံကြည်၏။” (ရောမ ၄:၁၈-၂၁၊ ကဘ) ထိုနေ့တွင် အာဗြဟံသည် မိမိ၌ခိုင်မြဲသော ယုံကြည်ခြင်းရှိကြောင်း သက်သေတင်ပြသည်။ သူနှင့်ဘုရားဖွဲ့သည့် ပဋိညာဉ်၏လက္ခဏာသက်သေတစ်ရပ်အနေနှင့် ယေဟောဝါသည် အာဗြဟံအား သူ့အိမ်ထောင်စုကြီး၌ရှိသော ယောက်ျားအားလုံးကို အရေဖျားလှီးရန် မိန့်မှာတော်မူ၏။ (ကမ္ဘာဦး ၁၅:၁၈-၂၁၊ ၁၇:၇-၁၂၊ ၂၆) နာကျင်လှသော ဤအမိန့်ကို သူမည်သို့တုံ့ပြန်သနည်း။ “အာဗြဟံ . . . ဘုရားသခင်မိန့်တော်မူခဲ့သည်အတိုင်း ထိုနေ့ချင်းတွင်ပင် အရေဖျားလှီးမင်္ဂလာကိုပေးလေ၏။”—ကမ္ဘာဦး ၁၇:၂၂-၂၇။

၁၆။ (က) ဣဇာက် နို့ဖြတ်သောနေ့တွင် ဘာဖြစ်ပျက်သနည်း။ (ခ) ဟာဂရနှင့်ဣရှမေလတို့ကို နှင်ထုတ်ခြင်းသည် ဘာကိုပုံဆောင်သနည်း။

^၁၆ နောက်တစ်နှစ်တွင် စာရာသည် ဣဇာက်ကိုဖွားမြင်သည်။ ဣဇာက်၏အမည်မှာ “ရယ်မောခြင်း” ဟုအဓိပ္ပာယ်ရှိသည်။ (ကမ္ဘာဦး ၂၁:၅၊ ၆) များမကြာမီ ဣဇာက်နို့ဖြတ်ချိန်ရောက်လာသည်။ ပွဲခံချိန်တွင် မနာလိုသော ဣရှမေလသည် ဣဇာက်ကို ညှဉ်းဆဲလေ၏။ သို့နှင့် ကျွန်မဟာဂရနှင့် သူ့သားဣရှမေလတို့ကို အိမ်ထောင်စုမှ နှင်ထုတ်ရန် အာဗြဟံအားစာရာ အပြင်းအထန်တိုက်တွန်း၏။ စာရာ၏ တောင်းဆိုချက်ကို ယေဟောဝါဘုရားထောက်ခံတော်မူ၏။ အာဗြဟံသည် စိတ်မကောင်းကြီးစွာဖြစ်သော်လည်း ချက်ချင်းပင်နာခံလေ၏။ (ကမ္ဘာဦး ၂၁:၈-၁၄) ဂလာတိ ၄:၂၁-၃၀ အရဆိုလျှင် ဤအကြောင်းသည် ဇာတိဣသရေလလူမျိုးနှင့် ထားရှိသောဆက်ဆံရေးကို သာ၍ကြီးမြတ်သော အာဗြဟံအဆုံးသတ်မည့်အကြောင်း ပုံဆောင်သည်။ အခြားလူသားများနည်းတူ သူတို့သည်လည်း အပြစ်တရား၏ကျွန်များအဖြစ် မွေးဖွားလာကြသည်။ (ရောမ ၅:၁၂) သို့ရာတွင်သူတို့သည် သူတို့ကိုလွတ်မြောက်စေရန် ကြွလာတော်မူသည့် အာဗြဟံ၏အမျိုးအနွယ်အစစ် ယေရှုခရစ်ကို ငြင်းပယ်ခဲ့ကြသည်။ (ယောဟန် ၈:၃၄-၃၆။ ဂလာတိ ၃:၁၆) ဣရှမေလသည် ဣဇာက်ကို နှိပ်စက်သကဲ့သို့ သူတို့သည် တည်ထောင်ခါစဝိညာဏဣသရေလလူမျိုး ခရစ်ယာန်အသင်းတော်ကို နှိပ်စက်ကြ၏။ ဝိညာဏဣသရေလလူမျိုးမှာ အာဗြဟံအမျိုးအနွယ်၏ ဒုတိယအပိုင်းဖြစ်သည်။—မဿဲ ၂၁:၄၃။ လုကာ ၃:၇-၉။ ရောမ ၂:၂၈၊ ၂၉၊ ၈:၁၄-၁၇၊ ၉:၆-၉။ ဂလာတိ ၃:၂၉။

အကြီးဆုံး ယုံကြည်ခြင်း စမ်းသပ်မှု

၁၇။ အာဗြဟံ၏ယုံကြည်ခြင်း နောက်ထပ် အဘယ်သို့အပြင်းအထန်စမ်းသပ်ခံရသနည်း။

^၁၇ ဣဇာက်ကို အိုမင်းသောအာဗြဟံ ချစ်သောမေတ္တာထက် သားကိုပို၍ချစ်သော လူသားဖခင်ရှိမည်မထင်။ သို့ဖြစ်လျှင် အောက်ပါအမိန့်တော်ရရှိသောအခါ သူအကြီးအကျယ်တုန်လှုပ်ချောက်ချားခဲ့ပေမည်။ “သင်သည်အလွန်ချစ်သော တစ်ယောက်တည်းသော သားဣဇာက်ကိုယူ၍ မောရိပြည်သို့သွားလော့။ ငါပြလတံ့သောတောင်ပေါ်မှာ သူ့ကိုမီးရှိုရာ ယဇ်ပြု၍ ပူဇော်လော့။”—ကမ္ဘာဦး ၂၂:၁၊ ၂။

၁၈။ ဣဇာက်ကို ပူဇော်ပါဟူသော ယေဟောဝါ၏အမိန့်တော်ကို အာဗြဟံအဘယ်သို့ တုံ့ပြန်ခဲ့သနည်း။

^၁၈ ဝမ်းနည်းဖွယ်ကောင်းသော ဤအမိန့်တော်အဘယ်ကြောင့်ပေးသည်ကို အာဗြဟံတွေးရခက်ကြီးဖြစ်ခဲ့ပေမည်။ သို့တစေ ခါတိုင်းလိုပင် ချက်ချင်းနာခံခဲ့သည်။ (ကမ္ဘာဦး ၂၂:၃) စိတ်ဝေဒနာပြင်းထန်စွာခံစားရင်း သတ်မှတ်သောတောင်သို့ရောက်ရန် သုံးရက်အချိန်ယူခဲ့ရသည်။ ထိုတွင်ယဇ်ပလ္လင်တည်ကာ ထင်းများစီထားလိုက်သည်။ ဤအချိန်လောက်တွင် ဣဇာက်အား ဘုရားသခင့်အမိန့်တော်အကြောင်း ရှင်းပြပြီးဖြစ်မည်။ ဣဇာက်အနေဖြင့် လွယ်လွယ်နှင့်ထွက်ပြေးနိုင်သော်လည်း ထွက်မပြေးဘဲ မိမိခြေလက်တို့ကို အိုမင်းနေသောဖခင်၏ ချည်နှောင်ခြင်းကိုခံ၍ ယဇ်ပလ္လင်ပေါ်၌ လဲလျောင်းစေရန် လျှောလျှောရှုရှုခွင့်ပြုလိုက်သည်။ (ကမ္ဘာဦး ၂၂:၄-၉) ဤသို့နာခံမှုကို မည်သို့မှတ်ယူနိုင်သနည်း။

၁၉။ (က) ဣဇာက်၏သတ္တိရှိရှိ ကျိုးနွံနာခံခြင်းကို ကျွန်ုပ်တို့ အဘယ်သို့မှတ်ယူနိုင်သနည်း။ (ခ) အာဗြဟံနှင့်ဣဇာက်တို့၏ဆက်ဆံရေးသည် ယနေ့ခရစ်ယာန်မိသားစုအတွက် အဘယ်သို့သင်ခန်းစာတစ်ရပ်ဖြစ်သနည်း။

^၁၉ ကမ္ဘာဦး ၁၈:၁၉ ၌ဖေါ်ပြထားသည့်အတိုင်း ဣဇာက်နှင့်စပ်လျဉ်း၍ အာဗြဟံသည်မိမိတာဝန်ကို သစ္စာရှိရှိထမ်းဆောင်ခဲ့သည်။ လူသေများကို ထမြောက်စေမည့်ယေဟောဝါ၏ ရည်ရွယ်ချက်အကြောင်းကို ဣဇာက်၏စိတ်ထဲတွင် အာဗြဟံစွဲမြဲအောင် ရိုက်သွင်းခဲ့မည်မှာ ယုံမှားဖွယ်မရှိပေ။ (ကမ္ဘာဦး ၁၂:၃။ ဟေဗြဲ ၁၁:၁၇-၁၉) ဣဇာက်အနေဖြင့် အာဗြဟံ၏အသည်းစွဲဖြစ်သဖြင့် အရာရာတိုင်းတွင် ဖခင်စိတ်ချမ်းသာစေလိုသည့်ဆန္ဒရှိခဲ့ပေမည်။ အထူးသဖြင့် ဘုရားသခင့်အလိုတော်ဆောင်ရာတွင်ဖြစ်သည်။ ယနေ့ခရစ်ယာန်မိသားစုများအတွက် ကောင်းမြတ်လှသည့်သင်ခန်းစာပါတကား။—ဧဖက် ၆:၁၊ ၄။

၂၀။ အာဗြဟံအဘယ်သို့နာခံခဲ့သနည်း။ အဘယ်အကျိုးကျေးဇူးရရှိသနည်း။

^၂၀ ယခုစမ်းသပ်မှု၏ အထွတ်အထိပ်သို့ရောက်လာသည်။ အာဗြဟံသည် သတ်ဖို့ဓားကိုဆွဲယူလိုက်သည်။ သို့သော်လည်း သတ်မည့်ဆဲဆဲအချိန်တွင် ယေဟောဝါ သူ့ကိုတားဆီး၍ ဤသို့မိန့်တော်မူ၏။ “သင်၏သား၊ သင်၌တစ်ယောက်တည်းသော သားကိုပင် မနှမြောသည်ဖြစ်၍ ဘုရားသခင်ကိုကြောက်ရွံ့သည်ဟု ယခုငါသိ၏။” (ကမ္ဘာဦး ၂၂:၁၁၊ ၁၂) အာဗြဟံအနေဖြင့် သူဖြောင့်မတ်ကြောင်း ဘုရားကိုယ်တော်တိုင် မိန့်မြွက်သည်ကို ကြားရခြင်းအားဖြင့် ကြွယ်ဝစွာကောင်းချီးပေးခံရသည်တကား။ မစုံလင်သောလူသားအတွက် ဘုရားတောင်းဆိုရာကိုပြည့်မီကြောင်း သူယခုခံစားနိုင်ပေသည်။ ထိုထက်အရေးကြီးသည်ကား သူ့ယုံကြည်ခြင်းနှင့်ပတ်သက်၍ ယေဟောဝါ၏တင်ကူးမှန်းဆချက် မှန်ကန်ကြောင်းထင်ရှားခဲ့လေသည်။ (ကမ္ဘာဦး ၁၅:၅၊ ၆) ယင်းနောက် ဣဇာက်ကိုယ်စား ထူးဆန်းစွာပြင်ဆင်ပေးသည့် သိုးထီးတစ်ကောင်ကို ပူဇော်လိုက်သည်။ ထိုနောက်ပဋိညာဉ်ပါ ကတိတော်များကို ယေဟောဝါကျိန်ဆို၍ အတည်ပြုသည်ကို သူကြားရသည်။ နောင်တွင် သူသည် ယေဟောဝါ၏မိတ်ဆွေအဖြစ် ကျော်ကြားလာသည်။—ကမ္ဘာဦး ၂၂:၁၃-၁၈။ ယာကုပ် ၂:၂၁-၂၃။

၂၁။ ဤတွင်အဘယ်ပရောဖက်ပြုချက်ဆိုင်ရာ ပုံပမာပေးထားသနည်း။ အဘယ်အရာကို ရှာကြံရန် အားပေးသင့်သနည်း။

^၂၁ အာဗြဟံ၏ပူဇော်ခြင်းကား ‘ပုံပမာ’ ဖြစ်သည်။ (ဟေဗြဲ ၁၁:၁၉) ၄င်းမှာ ချစ်လှစွာသောသားတော်ကို ကမ္ဘာသို့စေလွှတ်၍ “ဤလောက၏အပြစ်ကို ဆောင်သွားသောဘုရားသခင်၏သိုးသငယ်” အဖြစ်အသေခံစေရာတွင် ယေဟောဝါဘုရားပြုတော်မူသည့် စိတ်ဆင်းရဲ၍ တန်ဖိုးကြီးမားလှသည့် စွန့်လွှတ်မှုကို ပုံဆောင်ခြင်းဖြစ်သည်။ (ယောဟန် ၁:၂၉) ဣဇာက်၏ စိတ်လိုကိုယ်လျောက် အသေခံခြင်းသည် သာ၍ကြီးမြတ်သောဣဇာက်တည်းဟူသော ယေရှုခရစ် ကောင်းကင်ခမည်းတော်၏အလိုကို ဆောင်ရန်အတွက် မေတ္တာဖြင့်ကျိုးနွံခြင်းကို ပုံဆောင်သည်။ (လုကာ ၂၂:၄၁၊ ၄၂။ ယောဟန် ၈:၂၈၊ ၂၉) နောက်ဆုံး၌ အာဗြဟံသည် ယဇ်ပလ္လင်မှ သားကိုအရှင်ပြန်ရသကဲ့သို့ ယေဟောဝါသည် ချစ်စွာသောသားတော်ကို ဂုဏ်ကျက်သရေနှင့်ပြည့်စုံသော နံဝိညာဉ်သတ္တဝါအဖြစ် သေခြင်းမှပြန်လည်ရရှိတော်မူသည်။ (ယောဟန် ၃:၁၆။ ၁ ပေတရု ၃:၁၈) ဤအကြောင်းအားလုံးသည် ဘုရားနှင့်မိတ်ဆွေဖွဲ့ရန်ရှာကြံသူများအတွက် အားတက်ဖွယ်ရာပါတကား။

၂၂။ လူသားထဲမှ ရွေးချယ်ထားသော အုပ်စုတစ်စုသည် ဘုရားသခင်၏ သူမတူမေတ္တာမှ အဘယ်သို့ အကျိုးကျေးဇူးရရှိကြသနည်း။

^၂၂ သာ၍ကြီးမြတ်သူ အာဗြဟံဖြစ်သော ယေဟောဝါဘုရားသခင်၏ ဤသူမတူ မေတ္တာလုပ်ရပ်၌ ယုံကြည်ကြောင်းတင်ပြခြင်းအားဖြင့် လူသားထဲမှရွေးချယ်ထားသော အုပ်စုတစ်ခုသည် ဘုရားသခင်၏သားတော်များအဖြစ် ဖြောင့်မတ်ကြောင်းကြေညာခံရကြသည်။ (ရောမ ၅:၁၊ ၈:၁၅-၁၇) ပထမတွင် ယုဒအမျိုးသားများမှခေါ်ယူ၍၊ ၄င်းနောက် လူမျိုးခြားမှခေါ်ခဲ့သော ဤသူတို့သည် အမှန်ပင် အာဗြဟံ၏အမျိုးအနွယ်ဖြစ်သော ယေရှုခရစ်အားဖြင့် ကောင်းချီးမင်္ဂလာခံစားရကြသည်။ (တမန်တော် ၃:၂၅၊ ၂၆။ ဂလာတိ ၃:၈၊ ၁၆) တစ်ဖန်သူတို့သည် အာဗြဟံ၏အမျိုးအနွယ်မှ ဒုတိယအပိုင်းဖြစ်လာကြသည်။ (ဂလာတိ ၃:၂၉) အရေအတွက် ၁၄၄၀၀၀ ရှိသောထိုသူတို့သည် သေသည်တိုင်အောင် သစ္စာရှိကြောင်းတင်ပြကြပြီးနောက် ယေရှုကဲ့သို့ကောင်းကင်အသက်တာသို့ ရှင်ပြန်ထမြောက်ခြင်းခံရကြသည်။—ရောမ ၆:၅။ ဗျာဒိတ် ၂:၁၀၊ ၁၄:၁-၃။

၂၃။ (က) သန်းပေါင်းစွာသော သူတို့သည် အာဗြဟံ၏အမျိုးအနွယ်မှ အကြွင်းအကျန်အားဖြင့် ယခုပင် အဘယ်သို့ကောင်းချီးမင်္ဂလာခံစားနေရကြပြီနည်း။ (၂ ကောရိန္သု ၅:၂၀) (ခ) “လူအုပ်ကြီး” အတွက် နောက်ထပ်အဘယ်ကောင်းချီးများ စောင့်ကြိုနေသနည်း။

^၂၃ ထိုအတောအတွင်း လူမျိုးအပေါင်းတို့အထဲမှ သန်းပေါင်းများစွာသော သူတို့သည် အာဗြဟံ၏အမျိုးအနွယ်မှ အကြွင်းအကျန်အနည်းငယ်တို့၏ မေတ္တာပြည့်ဝသော ဓမ္မအမှုကို တုံ့ပြန်ခြင်းအားဖြင့် ‘မိမိတို့ကိုယ်ကိုကောင်းချီးပေးနေကြ’ သည်။(ကမ္ဘာဦး ၂၂:၁၈) အပြစ်ရှိသောလူသားများအနေဖြင့် ဘုရား၏မိတ်ဆွေများအဖြစ် မည်သို့ကြေညာခြင်းခံနိုင်ကြောင်း သိရှိလာသောအခါ အူလှိုက်သည်းလှိုက်ဖြစ်ခဲ့ကြသည်။ သို့နှင့် “လူမျိုးအပေါင်းမှ ထွက်လာသော လူအုပ်ကြီး” သည် ဘုရားသခင်၏မျက်နှာသာတော်ကို ခံစား၍ “မိမိတို့ဝတ်လုံကို သိုးသငယ်၏အသွေး၌လျှော်၍ ဖြူစေကြ၏။” အကြွင်းအကျန်တို့၏ ဦးဆောင်မှုဖြင့် သူတို့သည်လည်း “ဘုရားဝတ်ကို နေ့ညဉ့်မပြတ်” ပြုနေကြ၏။ ဤလူအုပ်ကြီး၏ရှေ့တွင် ‘ဘုရားသခင်၏မြေကြီးဆိုင်ရာ သားသမီးများ’ အဖြစ် ပရဒိသုတွင် ထာဝရအသက်ရှင်ခြင်း အံ့ချီးဖွယ်မျှော်လင့်ချက် စောင့်ကြိုလျက်ရှိသည်။ (ဗျာဒိတ် ၇:၉-၁၇၊ ၂၁:၃-၅။ ရောမ ၈:၂၁။ ဆာလံ ၃၇:၂၉) သို့သော်လည်း ထိုကောင်းချီးများ အကောင်အထည်ပေါ်မလာမီ သာ၍အရေးကြီးသော အခြင်းအရာများ ဖြစ်ပျက်ရပေဦးမည်။ နောက်ဆောင်းပါးတွင် ဤအကြောင်းလေ့လာကြပါမည်။

ပြန်လည်စစ်ဆေးရန်မေးခွန်းများ

▫ အာဗြဟံနှင့်သူ၏ဆွေမျိုးများ အဘယ်သို့ ယုံကြည်ခြင်းစမ်းသပ်ခံရသနည်း။

▫ ယခုခေတ်ခရစ်ယာန်များ အလားတူ ယုံကြည်ခြင်းမျိုးအဘယ်သို့ ပြသကြသနည်း။

▫ အခြားအဘယ်နည်းများအားဖြင့် အာဗြဟံယုံကြည်ခြင်းတင်ပြခဲ့သနည်း။

▫ အာဗြဟံ၊ စာရာနှင့်ဣဇာက်တို့သည် ခရစ်ယာန်မိသားစုများအဖို့ အဘယ်သို့ စံနမူနာများဖြစ်ကြသနည်း။

▫ အာဗြဟံ၏အကြီးမားဆုံး ယုံကြည်ခြင်းလုပ်ရပ်သည် အဘယ်အရာကို တင်စားပုံဖေါ်သနည်း။