ဧပဖြောဒိတ်—ဖိလိပ္ပိအသင်းတော်သားများ၏ တမန်
“သခင်ဘုရားကိုထောက်လျက်၊ ဝမ်းမြောက်သောစိတ်နှင့် သူ့ကို လက်ခံကြလော့။ ထိုသို့သောသူတို့ကို ရိုသေလေးမြတ်ကြလော့” ဟု ပေါလုက ဖိလိပ္ပိအသင်းတော်သားများထံ စာရေးခဲ့သည်။ ကျွန်ုပ်တို့အကြောင်းကို ခရစ်ယာန်ကြီးကြပ်မှူးတစ်ဦးက ဤသို့ချီးမွမ်းစကားဆိုလျှင် ပျော်ရွှင်ကြည်နူးမိမည်မှာမလွဲပေ။ (ဖိလိပ္ပိ ၂:၂၉) သို့သော် ပေါလုသည် မည်သူ့အကြောင်း ပြောနေပါသနည်း။ ထို့အပြင် ထိုသူသည် ဤကဲ့သို့လှိုက်လှိုက်လှဲလှဲချီးမွမ်းမှုမျိုးကို ရထိုက်ဖို့ မည်သည့်အမှုပြုခဲ့သနည်း။
ပထမမေးခွန်းအတွက် အဖြေမှာ ဧပဖြောဒိတ်ဖြစ်သည်။ ဒုတိယအဖြေအတွက် ဤစကားများကိုရေးရန် ပေါလုအားလှုံ့ဆော်ခဲ့သည် အခြေအနေများကို သုံးသပ်ကြည့်ကြစို့။
စီ.အီး. ၅၈ ခုနှစ်ခန့်၌ ပေါလုသည် ယေရုရှလင်မြို့တွင် ဗိမာန်တော်အပြင်သို့ တရွတ်တိုက်ဆွဲထုတ်ခံရပြီး လူရမ်းကားအုပ်စု၏ အရိုက်အနှက်ကို ခံရကာ အာဏာပိုင်များ၏ ဖမ်းဆီးချုပ်နှောင်မှုကို ခံရကြောင်း၊ အမှုကြားနာဆုံးဖြတ်ခြင်းမရှိဘဲ သံကြိုးများဖြင့်ချည်နှောင်ကာ ရောမသို့ အပို့ခံထားရကြောင်း ဖိလိပ္ပိအသင်းတော်သားများ ကြားခဲ့ကြသည်။ (တမန်တော် ၂၁:၂၇-၃၃; ၂၄:၂၇; ၂၇:၁) သူတို့သည် သူ၏ကောင်းကျိုးအတွက် စိတ်ပူရကား သူ့အတွက် မိမိတို့ဘာများလုပ်ပေးနိုင်မည်နည်းဟု ကိုယ့်ကိုယ်ကိုစောကြောခဲ့ကြပေမည်။ သူတို့သည် ရုပ်ပစ္စည်းအရ ဆင်းရဲနွမ်းပါးကြခြင်း၊ ပေါလုနှင့်ဝေးနေခြင်းတို့က သူတို့ပေးနိုင်သည့် အကူအညီကို ကန့်သတ်ထားသည်။ သို့တိုင် ယခင်က သူ၏ဓမ္မအမှုကို ထောက်ပံ့ရန် ဖိလိပ္ပိအသင်းတော်သားများကို တွန်းအားပေးခဲ့သည့် သံယောဇဉ်တွယ်တာမှုသည် သူတို့ကို လှုံ့ဆော်နေဆဲဖြစ်သည်; သူသည် အခက်အခဲကြုံနေရသောကြောင့် ဤသို့သာ၍ပင်လှုံ့ဆော်ခံရကြသည်။—၂ ကောရိန္သု ၈:၁-၄; ဖိလိပ္ပိ ၄:၁၆။
ဖိလိပ္ပိအသင်းတော်သားများသည် မိမိတို့ထဲမှ တစ်ယောက်က ပေါလုထံသို့ လက်ဆောင်ဖြင့် သွားရောက်ကာ သူလိုအပ်နေသည့်အရာကို အကူအညီသွားပေးရန်ဖြစ်နိုင်မဖြစ်နိုင် ထောက်ချင့်ခဲ့ကြမည်။ အလွန်ပင်ပန်းစေသော ခရီးရှည်ကြီးဖြစ်ပြီး သူ့အားအကူအညီပေးခြင်းသည် အန္တရာယ်ပင်ရှိနိုင်သည်! ယိုအကင်း ဂျနေးလ်ကာက “အကျဉ်းသားတစ်ယောက်ထံ သွားရောက်လည်ပတ်ရန်မှာ သတ္တိလိုသည်၊ ထိုသူ၏ ‘ရာဇဝတ်မှု’ သည် လုံးဝသဲသဲကွဲကွဲမဖြစ်ပုံရလျှင် ပို၍လိုသည်” ဟု မှတ်သားဖော်ပြသည်။ စာရေးဆရာ ဘရိုင်ယန်ရပ်စခီးက ဤသို့ဆိုသည်– “အကျဉ်းသားတစ်ယောက် သို့မဟုတ် သူ၏အယူအဆများနှင့် အလွန်ရင်းနှီးကျွမ်းဝင်ရုံ သို့မဟုတ် ထောက်ထားစာနာမှုတင်ပြရုံမျှဖြင့် ထပ်ဆင့်အန္တရာယ်ကျရောက်နိုင်သည်။ . . . မတော်တဆစကားတစ်ခွန်းပြောမိ၊ အပြုအမူတစ်ခုပြုမိခြင်းသည်ပင်လျှင် အကျဉ်းသားသာမက အကူအညီပေးသူကိုပါ သေကိန်းဆိုက်စေနိုင်သည်။” ဖိလိပ္ပိအသင်းတော်သားများသည် မည်သူ့ကို စေလွှတ်ခြင်းဖြစ်နိုင်သနည်း။
ဤလမ်းခရီးမျိုးသည် စိုးရိမ်ခြင်းနှင့် စိတ်မချခြင်းကို နှိုးဆွနိုင်ကြောင်း ကျွန်ုပ်တို့ကောင်းကောင်းတွေးဆနိုင်သည်၊ သို့သော် ဧပဖြောဒိတ် (ကောလောသဲမြို့မှ ဧပဖြနှင့် ရောထွေးမသွားပါနှင့်) သည် ထိုခက်ခဲသောတာဝန်ကို သယ်ပိုးလိုစိတ်ရှိခဲ့သည်။ သူ့၏နာမည်တွင် အက်ဖရိုဒိုက်ဟူသည့် အမည်ပေါင်းထည့်ထားသည်ကို ထောက်ရှုခြင်းဖြင့် သူသည် ခရစ်ယာန်ဘာသာသို့ ပြောင်းဝင်လာသော တစ်ပါးအမျိုးသားတစ်ဦး . . . ဖြစ်နိုင်သည်။ ဖိလိပ္ပိအသင်းတော်သားများ၏ ရက်ရောမှုကို ကျေးဇူးတင်ကြောင်း ပေါလုစာရေးသောအခါ ဧပဖြောဒိတ်သည် “ငါ့ကိုပြုစုသောသူတည်းဟူသော သင်တို့တမန်” ဖြစ်သည်ဟု သူလျော်ကန်စွာဖော်ပြနိုင်ခဲ့သည်။—ဖိလိပ္ပိ ၂:၂၅။
ပေါလုအတွက်နှင့် မိမိ၏အသင်းတော်အတွက် အမှုဆောင်ရာတွင် မိမိကိုယ်ကိုအသုံးချရန် ချီးမွမ်းလောက်ဖွယ်ကောင်းအောင် လိုလိုလားလားရှိနေလင့်ကစား ဧပဖြောဒိတ်တွင် ကျွန်ုပ်တို့၌ရှိနိုင်သော ထပ်တူပြဿနာမျိုးရှိကြောင်း သူနှင့်ပတ်သက်၍ ကျမ်းစာတွင်ပြောထားသည့်အရာများမှ နားလည်နိုင်သည်။ သူ၏ပုံသက်သေကို သုံးသပ်ကြည့်ကြစို့။
“ငါ့ကိုပြုစုသောသူ”
ကျွန်ုပ်တို့ အသေးစိတ်မသိသော်လည်း သူ၏ခရီးစဉ်မှ မောမောပန်းပန်းနှင့် ရောမမြို့သို့ရောက်ရှိလာသည်ဟု ကျွန်ုပ်တို့ တွက်ဆနိုင်သည်။ သူသည် မက်စီဒိုးနီးယားကို ဖြတ်သွားသည့် ရောမလမ်းတစ်ခုဖြစ်သော ဗိုင်ယာအက်ဂနာတီယာအတိုင်း ခရီးနှင်ခဲ့ဖွယ်ရှိသည်။ သူသည် အီတလီကျွန်းဆွယ်၏ “ဖနောင့်” သို့ အက်ဒရီအက်တစ်ပင်လယ်လက်တက်မှ ဖြတ်ကူးသွားပြီးနောက် အက်ပီယန်းလမ်းအတိုင်း ရောမသို့ လာခဲ့နိုင်သည်။ တစ်လကျော်အချိန်ယူရဖွယ်ရှိသည့် (အသွားခရီး မိုင် ၇၅၀) ပင်ပင်ပန်းပန်းသွားရသော ခရီးဖြစ်သည်။—စာမျက်နှာ ၂၉ ရှိ လေးထောင့်ကွက်ကိုရှု။
ဧပဖြောဒိတ်သည် မည်သည့်စိတ်ထားဖြင့် စတင်လုပ်ဆောင်ခဲ့သနည်း။ ပေါလုအတွက် “ပြုစု” သူ သို့မဟုတ် လိန်တိုးဂျီးယား တစ်ယောက်အဖြစ် ထမ်းဆောင်ရန် သူစေလွှတ်ခံခဲ့ရသည်။ (ဖိလိပ္ပိ ၂:၃၀) ဤဂရိစကားလုံးသည် မူလတွင် နိုင်ငံသားတစ်ဦးက နိုင်ငံအတွက် စေတနာအလျောက်လုပ်ဆောင်ခြင်းကို ရည်ညွှန်းသည်။ နောက်ပိုင်းတွင် ထမ်းဆောင်ဖို့ အထူးအရည်အသွေးရှိသည့် နိုင်ငံသားများကို နိုင်ငံက အတင်းအကျပ်တောင်းဆိုသည့် လုပ်ငန်းမျိုးကို ဆိုလိုလာသည်။ ဂရိကျမ်းစောင်များ၌ ဤစကားလုံးကို အသုံးပြုမှုနှင့်ပတ်သက်ပြီး ကျမ်းပညာရှင်တစ်ဦးက ဤသို့ဆိုသည်– “ခရစ်ယာန်တစ်ဦးသည် ဘုရားသခင်အတွက်နှင့် လူတို့အတွက် လုပ်ဆောင်ပေးသူဖြစ်သည်၊ ပထမအနေနှင့် နှလုံးအပြည့်ဖြင့် လုပ်ဆောင်လိုသောကြောင့်တစ်ကြောင်း၊ ဒုတိယအနေနှင့် ခရစ်တော်ကိုချစ်သော မေတ္တာက သူ့အပေါ်တွင် တာဝန်တင်ကာ အနိုင်အထက်တိုက်တွန်းသွေးဆောင်သောကြောင့်တစ်ကြောင်း ဖြစ်သည်။” မှန်ပါသည်၊ ဧပဖြောဒိတ်သည် အလွန်ကောင်းသောစိတ်ဓာတ်ကို ပြသခဲ့သည်တကား!
‘သူ့အသက်ကို စွန့်စား’
လောင်းကစားအသုံးအနှုန်းမှ ငှားယူထားသည့် စကားလုံးကို အသုံးပြုကာ ပေါလုက ဧပဖြောဒိတ်သည် ‘သူ့အသက်ကို စွန့်စား [ပါရာဗိုလျူစားမဲနော့စ်]’ ကြောင်း၊ လုံးကောက်အတိုင်းဆိုလျှင် ခရစ်တော်၏လုပ်ငန်းအတွက် မိမိ၏အသက်ကို “စွန့်လောင်း” ကြောင်းပြောခဲ့သည်။ (ဖိလိပ္ပိ ၂:၃၀) ဧပဖြောဒိတ်သည် တစ်ခုခုကို မိုက်မိုက်ကန်းကန်းလုပ်ခဲ့သည်ဟု ထင်စရာအကြောင်းမရှိပါ; ဤသို့မဟုတ်ဘဲ သူ၏မြင့်မြတ်သောလုပ်ငန်းတော်တာဝန်ကို ကျေပွန်စေခြင်းတွင် စွန့်စားမှုတစ်ခု ပါဝင်နေခြင်းပင်ဖြစ်သည်။ နှစ်၏ခက်ခဲသောအချိန်အခါအတွင်း ဤကိုယ်စားတာဝန်ကို ကြိုးစားပမ်းစားလုပ်ဆောင်ခဲ့ပုံရပါသလော။ သူသည် ဤလမ်းတစ်လျှောက် တစ်နေရာရာတွင် အဖျားဝင်ပြီးနောက် လိုရာခရီးရောက်ဖို့ မဆုတ်မနစ်ဇွဲဖြင့် ကြိုးစားခဲ့သလော။ မည်သို့ပင်ဖြစ်ပါစေ ဧပဖြောဒိတ်သည် “သေလုအောင်နာ” ခဲ့သည်။ ပေါလုကို အလုပ်အကျွေးပြုရန် အတူနေဖို့ စီစဉ်ထားဖွယ်ရှိရကား အဘယ်ကြောင့် မျှော်လင့်ထားသည်ထက် စော၍သူပြန်လာခြင်းကို တမန်တော်သည် ရှင်းပြချင်ကြောင်း ထင်ရှားသည်။—ဖိလိပ္ပိ ၂:၂၇။
ဤသို့ဖြစ်သည့်ကြားမှ ဧပဖြောဒိတ်သည် လိုအပ်နေသူများကို အကူအညီပေးနိုင်ရန် ကိုယ်ကျိုးမဖက်ဘဲ မိမိကိုယ်ကိုစွန့်စားလိုစိတ်ရှိသော ရဲစွမ်းသတ္တိရှိသူတစ်ဦးဖြစ်သည်။
‘ခက်ခဲသောအခြေအနေများ ကြုံတွေ့နေရသည့် ကျွန်ုပ်တို့၏ဝိညာဏညီအစ်ကိုများကို ထောက်မကူညီရန် မိမိကိုယ်ကို မည်သည့်အတိုင်းအတာအထိ အသုံးချမည်နည်း’ ဟု ကျွန်ုပ်တို့ကိုယ်ကို ပြန်မေးကြည့်နိုင်သည်။ ဤကဲ့သို့သော လိုလိုလားလားရှိသည့်စိတ်ထားမျိုးသည် ခရစ်ယာန်များအတွက် စိတ်ကြိုက်ရွေးရသည့်အရာတစ်ခုမဟုတ်ပါလေ။ ယေရှုက “သင်တို့သည် အချင်းချင်းတစ်ယောက်ကိုတစ်ယောက်ချစ်ကြလော့။ ငါသည် သင်တို့ကိုချစ်သည်နည်းတူ အချင်းချင်းချစ်ကြလော့ဟု ပညတ်သစ်ကိုငါပေး၏” ဟူ၍မိန့်တော်မူခဲ့သည်။ (ယောဟန် ၁၃:၃၄) ဧပဖြောဒိတ်သည် သူ၏တာဝန်ကို “သေလုအောင်” ထမ်းဆောင်ခဲ့သည်။ ဧပဖြောဒိတ်သည် ပေါလုက ဖိလိပ္ပိအသင်းတော်သားများတွင် ရှိထားဖို့ တိုက်တွန်းအားပေးသည့် “စိတ်သဘော” ကို ပိုင်ဆိုင်ထားသည့် စံနမူနာယူထိုက်သော ပုဂ္ဂိုလ်တစ်ဦးဖြစ်သည်။ (ဖိလိပ္ပိ ၂:၅၊ ၈၊ ၃၀) ဤအတိုင်းအတာအထိ စွန့်စားလုပ်ဆောင်ဖို့ ကျွန်ုပ်တို့ အသင့်ပြင်ထားကြမည်လော။
သို့သော် ဧပဖြောဒိတ် စိတ်ဓာတ်ကျခဲ့သည်။ အဘယ့်ကြောင့်နည်း။
သူ၏စိတ်ဓာတ်ကျမှု
သင်ကိုယ်တိုင် ဧပဖြောဒိတ်နေရာတွင် ဝင်ကြည့်ပါ။ “သူသည်နာကြောင်းကို သင်တို့ကြားသိသောကြောင့် သူသည် သင်တို့အပေါင်းကို လွမ်းဆွတ်၍စိတ်မသာလျက်နေ၏” ဟု ပေါလု သတင်းပို့လိုက်သည်။ (ဖိလိပ္ပိ ၂:၂၆) မိမိအသင်းတော်တွင်ရှိသော ညီအစ်ကိုများသည် မိမိနာမကျန်းဖြစ်နေကြောင်း၊ သူတို့မျှော်လင့်ထားသလို ပေါလုကို အကူအညီပေးနိုင်တော့မည်မဟုတ်ကြောင်း သိနေကြမည်ကို ဧပဖြောဒိတ်သိသည်။ အမှန်မှာ ဤအခြေအနေကြောင့်ပင် ဧပဖြောဒိတ်သည် ပေါလုအတွက် တစ်ပူပေါ်နှစ်ပူဆင့်စရာဖြစ်ခဲ့ပုံရသည်။ ပေါလု၏ ရောင်းရင်း ဆရာဝန်လုကာသည် ဧပဖြောဒိတ်ကို ပြုစုဂရုစိုက်ဖို့ အခြားကိစ္စများကို လျစ်လျူရှုခဲ့ရပါသလော။—ဖိလိပ္ပိ ၂:၂၇၊ ၂၈; ကောလောသဲ ၄:၁၄။
အကျိုးဆက်တစ်ခုအနေနှင့် ဧပဖြောဒိတ်သည် စိတ်ဓာတ်ကျလာဖွယ်ရှိသည်။ မိမိသည် လုပ်ရည်ကိုင်ရည်မရှိသူဟု မိမိ၏အသင်းတော်မှ ညီအစ်ကိုများ ယူမှတ်နေကြမည်ဟု သူစဉ်းစားခဲ့ဖွယ်ရှိသည်။ သူသည် အပြစ်ရှိကြောင်း ခံစားနေရနိုင်ပြီး မိမိသည်သစ္စာရှိသူဖြစ်ကြောင်း ယုံကြည်စိတ်ချစေရန် သူတို့ကို တွေ့မြင်ဖို့ “လွမ်းဆွတ်” နေခဲ့နိုင်သည်။ “စိတ်မသာလျက်နေ” သည့် ဧပဖြောဒိတ်၏အခြေအနေကို ဖော်ပြရန် အလွန်ပြင်းထန်သော ဂရိစကားလုံးဖြစ်သော အဒီမိုနီးယို ကို ပေါလုအသုံးပြုခဲ့သည်။ ကျမ်းပညာရှင် ဂျေ. ဘီ. လိုက်ဖုအဆိုအရ အဆိုပါစကားလုံးသည် “ကိုယ်ခန္ဓာမချိမဆံ့ခံစားရခြင်းကြောင့်ဖြစ်စေ၊ ယူကျုံးမရဖြစ်ခြင်း၊ ရှက်ခြင်း၊ စိတ်ပျက်ခြင်းကဲ့သို့သော စိတ်သောကရောက်ခြင်းဖြစ်စေ ပေါ်ပေါက်စေသည့် စိတ်ရှုပ်ထွေးသော၊ နေမထိထိုင်မသာဖြစ်နေသော၊ တစ်ဝက်တစ်ပျက်စိတ်လေလွင့်နေသောအခြေအနေ” ကိုညွှန်းနိုင်သည်။ ဂရိကျမ်းစောင်များတွင် ဤစကားလုံးနှင့်ပတ်သက်ပြီး တစ်ခုတည်းသောအသုံးပြုမှုမှာ ဂေသရှေမန်ဥယျာဉ်တွင် ယေရှု၏ ရုတ်တရက်ခံရသော ပြင်းထန်သည့် ဝေဒနာနှင့်ပတ်သက်သည်။—မဿဲ ၂၆:၃၇။
သူတို့၏ တမန်ဖြစ်သူသည် မမျှော်လင့်ဘဲ ပြန်လာရသည့်အကြောင်းရှင်းပြထားသည့် စာတစ်စောင်နှင့်အတူ ဖိလိပ္ပိအသင်းတော်သားများထံ ဧပဖြောဒိတ်ကို ပြန်လွှတ်ခြင်းသည် အကောင်းဆုံးဖြစ်မည်ဟု ပေါလု ဆုံးဖြတ်လိုက်သည်။ “ဧပဖြောဒိတ်ကို သင်တို့ရှိရာသို့ ယခုစေလွှတ်သင့်သည်ဟု ငါထင်မှတ်၏” ဟုပြောရာတွင် ပေါလုသည် သူ့အားပြန်ပို့ဖို့ တာဝန်ရှိနေကြောင်း ယူဆနေကာ ဧပဖြောဒိတ်ပျက်ကွက်ခဲ့သည့်အရာအတွက် ပေါ်လာနိုင်သောမည်သည့်သံသယကိုမဆို ထုတ်ပစ်လိုက်သည်။ (ဖိလိပ္ပိ ၂:၂၅) ဆန့်ကျင်ဘက်အနေနှင့် ဧပဖြောဒိတ်သည် သူ၏တာဝန်ကို ပြီးမြောက်ဖို့အရေး သေလုမျောပါးဖြစ်ခဲ့သည်! “သခင်ဘုရားကိုထောက်လျက်၊ ဝမ်းမြောက်သောစိတ်နှင့်သူ့ကိုလက်ခံကြလော့။ ထိုသို့သောသူတို့ကို ရိုသေလေးမြတ်ကြလော့။ အကြောင်းမူကား သင်တို့သည် ငါ့ကိုပြုစု၍ မပြည့်စုံသေးသောဝတ်ကို သူသည် ပြည့်စုံစေခြင်းငှာ ကိုယ်အသက်ကို စွန့်စား၍ ခရစ်တော်၏အမှုကြောင့်သေခြင်းသို့ရောက်လုနီးပြီ” ဟု ပေါလုက လှိုက်လှိုက်လှဲလှဲ ထောက်ခံခဲ့သည်။—ဖိလိပ္ပိ ၂:၂၉၊ ၃၀။
“ထိုသို့သောသူတို့ကို ရိုသေလေးမြတ်ကြလော့”
ဧပဖြောဒိတ်ကဲ့သို့ ထပ်တူသဘောထားရှိသော အမျိုးသား၊ အမျိုးသမီးများသည် အမှန်ပင် လေးမြတ်ခံရသင့်သည်။ သူတို့သည် အမှုဆောင်ရန်အလို့ငှာ မိမိကိုယ်ကို စွန့်လွှတ်ကြသည်။ အိမ်မှအလွန်ဝေးကွာသောနေရာများတွင် အမှုဆောင်ဖို့အတွက် သာသနာပြုများ၊ နယ်လှည့်ကြီးကြပ်မှူးများအနေနှင့်ဖြစ်စေ၊ ကင်းမျှော်စင်အသင်း၏ ဌာနခွဲရုံးတစ်ခုတွင်ဖြစ်စေ မိမိတို့ကိုယ်ကို ပေးဆက်ထားကြသူများကို စဉ်းစားကြည့်ပါလေ။ အချို့တို့သည် အသက်အရွယ်နှင့် ကျန်းမာရေးကျဆင်းလာခြင်းတို့ကြောင့် တစ်ချိန်ကသူတို့လုပ်ခဲ့သည့် အလုပ်များကို ယခုအခါတွင် မလုပ်နိုင်တော့ပါက သစ္စာရှိရှိ သူတို့အမှုဆောင်ခဲ့သည့်နှစ်များကိုထောက်၍ ရိုသေလေးစားမှု ခံထိုက်ကြသည်။
မည်သို့ပင်ဆိုစေ အားအင်ဆုတ်ယုတ်စေသော အဖျားအနာသည် စိတ်ဓာတ်ကျခြင်း သို့မဟုတ် အပြစ်ရှိသည်ဟု ခံစားရခြင်း၏ အရင်းအမြစ်တစ်ခုဖြစ်နိုင်သည်။ လူတစ်ဦးသည် များစွာအလုပ်လုပ်လိုပေမည်။ အလွန်စိတ်ပျက်အားလျော့စရာပင်! ဤအခြေအနေမျိုးရောက်နေသောသူ တစ်ဦးသည် ဧပဖြောဒိတ်ထံမှ သင်ခန်းစာရယူနိုင်သည်။ အမှန်တွင် သူဖျားနာရခြင်းသည် သူ၏အပြစ်ဖြစ်သလော။ လုံးဝမဟုတ်ပါလေ! (ကမ္ဘာဦး ၃:၁၇-၁၉; ရောမ ၅:၁၂) ဧပဖြောဒိတ်သည် ဘုရားသခင်နှင့် သူ့ညီအစ်ကိုများအတွက် အမှုဆောင်လိုသော်လည်း အဖျားအနာက သူ့ကို ဟန့်တားလိုက်သည်။
ပေါလုသည် ဧပဖြောဒိတ်နေထိုင်မကောင်းဖြစ်ခြင်းကြောင့် သူ့ကိုအပြစ်မတင်ဘဲ သူ့နားတွင် အနီးကပ်နေကြရန် ဖိလိပ္ပိအသင်းတော်သားများကို ပြောခဲ့သည်။ အလားတူစွာ ကျွန်ုပ်တို့ညီအစ်ကိုများ စိတ်ဓာတ်ကျသောအခါ ကျွန်ုပ်တို့သည် သူတို့ကို နှစ်သိမ့်ပေးသင့်သည်။ အမှုဆောင်လုပ်ငန်းတွင် သစ္စာရှိသော သူတို့၏စံနမူနာအတွက် ကျွန်ုပ်တို့ချီးမွမ်းပေးနိုင်သည်။ ပေါလုသည် ဧပဖြောဒိတ်ကို ကျေးဇူးတင်ကာ သူနှင့်ပတ်သက်ပြီး အကောင်းချည်းပြောခဲ့ခြင်းတို့က သူ့အတွက် နှစ်သိမ့်မှုဖြစ်စေခဲ့ပြီး စိတ်သောကကို ဖြေဖျောက်နိုင်စေခဲ့ပေမည်။ ‘ကျွန်ုပ်တို့သည် သန့်ရှင်းသူတို့ကို အလုပ်အကျွေးပြုခဲ့သည်သာမက၊ ဆက်၍အလုပ်အကျွေးပြုနေသောကြောင့်လည်းကောင်း၊ ထိုသို့ပြုသောအားဖြင့် နာမတော်ကိုထောက်၍ပြသောမေတ္တာကိုလည်းကောင်း၊ မေ့လျော့သည်တိုင်အောင် မဖြောင့်မတ်သောဘုရားမဟုတ်’ ကြောင်း ကျွန်ုပ်တို့လည်း စိတ်ချနိုင်သည်။—ဟေဗြဲ ၆:၁၀။
[စာမျက်နှာ ၂၉ ပါ လေးထောင့်ကွက်]
လမ်းခရီးအဆင်မပြေမှုများ
ယခုအချိန်တွင် အရေးပါသော ဥရောပမြို့ကြီးနှစ်မြို့အကြား ခရီးလမ်းကို ဧပဖြောဒိတ် ကြိုးစားပမ်းစားသွားခဲ့ရသကဲ့သို့ အကြီးအကျယ်အားထုတ်စရာ လိုလိမ့်မည်မဟုတ်ပေ။ ထိုခရီးကို ဂျက်လေယာဉ်ဖြင့် တစ်နာရီ၊ နှစ်နာရီအတွင်း သက်သက်သာသာ ရောက်နိုင်သည်။ ဤကဲ့သို့သော လမ်းခရီးမျိုးကို ပထမရာစုက သွားရသည်နှင့် အခြေအနေလုံးဝခြားနားသည်။ ထိုအချိန်က တစ်နေရာမှ တစ်နေရာသို့ သွားလာခြင်းသည် မလွယ်ကူပါ။ ခရီးသွားတစ်ဦးသည် ရာသီဥတုဒဏ်နှင့် “ဓားပြ” ရန် အပါအဝင် အန္တရာယ်အမျိုးမျိုးကြားမှ စွန့်စားကာ ခြေလျင်ဖြင့် တစ်နေ့လျှင် ၁၈ မိုင်မှ ၂၂ မိုင်အထိ ခရီးပေါက်နိုင်သည်။—၂ ကောရိန္သု ၁၁:၂၆။
ညအိပ်ရပ်နားခြင်းနှင့် အထောက်အပံ့ရိက္ခာများကော အသို့နည်း။
သမိုင်းပညာရှင် မိုက်ကယ်လန်ဂျီလို ကာဂျားနို ဒယ်အာစယ်ဗေးဒိုးက ရောမလမ်းများတစ်လျှောက်တွင် “ရိက္ခာသိုလှောင်ရုံများ၊ မြင်းဇောင်းများနှင့် အလုပ်သမားတန်းလျားများရှိသော မန်စီယိုနက်စ်ခေါ် ပစ္စည်းပစ္စယစုံသော တည်းခိုဆောင်များရှိသည်; မန်စီယိုနက်စ်တစ်ခုနှင့်တစ်ခုအကြားတွင် မြင်းများ သို့မဟုတ် ယာဉ်များကို လဲလှယ်နိုင်၊ ရိက္ခာများရရှိနိုင်သော တာတီယိုနက်စ်ခေါ် ရပ်နားစရာနေရာများရှိ” ကြောင်း ဖော်ပြထားသည်။ ထိုတည်းခိုခန်းများသည် လူနေမှုအဆင့်အတန်းအနိမ့်ကျဆုံးသူများ မကြာခဏလာတည်းသောကြောင့် နာမည်ပျက်နေသည်။ တည်းခိုခန်းကြီးကြပ်သူများသည် ခရီးသွားများထံမှ လုယက်သည့်အပြင် ပြည့်တန်ဆာများထံမှ ရသည့်ငွေဖြင့် မိမိတို့၏ဝင်ငွေကို ထပ်ဆောင်းလေ့ရှိသည်။ ဤကဲ့သို့သောတည်းခိုခန်းမျိုးတွင် မဖြစ်မနေတည်းခိုမိလျက်သားဖြစ်သွားသောသူတစ်ဦးသည် “လူသတ်သမားတစ်ဦး၏ဘေးတွင်၊ လှေထိုးသားများ၊ သူခိုးများနှင့် အိမ်ပြေးကျွန်များအဖွဲ့ကြားတွင်၊ ကြိုးပေးသူများနှင့် ခေါင်းလုပ်သူများ၏အနားတွင် . . . ပါးတေ့နားတေ့ အိပ်မိလျက်သားဖြစ်သွားနိုင်သည်။ ခွက်တစ်ခွက်တည်းကို လူအားလုံးကဝိုင်းသုံးကြသည်; အိပ်စက်အနားယူချိန်မှလွဲ၍ ကိုယ်ပိုင် အိပ်ရာ၊ ကိုယ်ပိုင်စားပွဲမရှိပါ” ဟု လက်တင်သရော်ကဗျာဆရာ ဂျူဗန်နယ်လ်က မှတ်ချက်ချခဲ့သည်။ အခြားစာရေးဆရာများက မသန့်ရှင်းသောသောက်ရေ၊ ညစ်ပတ်စိုရွှဲပြီး လှေးများနှင့် ပွထနေသောအခန်းများကြောင့် ညည်းတွားခဲ့ကြသည်။
[စာမျက်နှာ ၂၇ ပါ လေးထောင့်ကွက်/ရုပ်ပုံ]
ရောမ
[ရုပ်ပုံ]
ရောမခေတ်က ခရီးသွားတစ်ဦး
[Credit Lines]
Map: Mountain High Maps® Copyright© 1995 Digital Wisdom, Inc.; Traveler: Da originale del Museo della Civiltà Romana, Roma.