‘ယုံကြည်ခြင်းနှင့်ဆိုင်သောစကားများဖြင့် မွေးမြူခြင်းခံရ’
၁ ဘုရားဝတ်၌မွေ့လျော်သည့်အသက်တာကို လိုက်စားရန် အစွမ်းကုန်ကြိုးစားဖို့လို၏။ (၁ တိ. ၄:၇-၁၀) ကျွန်ုပ်တို့၏ကိုယ်ပိုင်ခွန်အားဖြင့် ထိုသို့သောလမ်းကိုလိုက်လျှောက်ရန် ကြိုးစားလျှင် မကြာမီ မောပန်းကာ ထိမိ၍လဲကြလိမ့်မည်။ (ဟေရှာ. ၄၀:၂၉-၃၁) ယေဟောဝါထံတော်မှ ကျွန်ုပ်တို့ခွန်အားရနိုင်သည့် နည်းတစ်နည်းမှာ ‘ယုံကြည်ခြင်းနှင့်ဆိုင်သောစကားများဖြင့် မွေးမြူခံ’ ခြင်းဖြင့်ဖြစ်သည်။—၁ တိ. ၄:၆၊ သမ္မာ။
၂ အာဟာရရှိသောဝိညာဉ်အစာ– ယေဟောဝါသည် မိမိ၏နှုတ်ကပါဌ်တော်နှင့် ‘သစ္စာနှင့်သတိပညာရှိကျွန်’ မှတစ်ဆင့် အာဟာရရှိသောဝိညာဉ်အစာကို စီစဉ်ပေးတော်မူ၏။ (မ. ၂၄:၄၅) ၎င်းမှ အကျိုးကျေးဇူးရရှိရန် ကျွန်ုပ်တို့၏ကဏ္ဍကို လုပ်ဆောင်နေသလော။ သမ္မာကျမ်းစာကို ကျွန်ုပ်တို့ နေ့စဉ်ဖတ်ရှုကြသလော။ ကိုယ်ပိုင်လေ့လာမှုနှင့် တွေးတောဆင်ခြင်မှုအတွက် အချိန်သတ်မှတ်ထားသလော။ (ဆာ. ၁:၂၊ ၃) ထိုသို့သောကျန်းခံ့စေသည့်ဝိညာဉ်အစာက ကျွန်ုပ်တို့ကို ခွန်အားရှိစေကာ စာတန့်လောက၏ အားအင်ကုန်ခန်းစေသောသက်ရောက်မှုများမှ ကာကွယ်ပေး၏။ (၁ ယော. ၅:၁၉) ကျွန်ုပ်တို့၏စိတ်ကို အကျိုးရှိသောအရာများနှင့်ပြည့်နေစေကာ ယင်းတို့ကို အသက်တာတွင် လက်တွေ့ကျင့်သုံးလျှင် ယေဟောဝါသည် ကျွန်ုပ်တို့နှင့်အတူရှိတော်မူလိမ့်မည်။—ဖိ. ၄:၈၊ ၉။
၃ ယေဟောဝါသည် အသင်းတော်အစည်းအဝေးများအားဖြင့်လည်း ကျွန်ုပ်တို့ကို ခွန်အားပေး၏။ (ဟေဗြဲ ၁၀:၂၄၊ ၂၅) ဤအစည်းအဝေးများ၌ရရှိသော ဝိညာဉ်ရေးသွန်သင်ချက်နှင့် အကျိုးရှိသောပေါင်းသင်းမှုက စုံစမ်းမှုများရင်ဆိုင်ရစဉ် ကျွန်ုပ်တို့ကို ခိုင်မြဲစွာရပ်တည်နိုင်စေသည်။ (၁ ပေ. ၅:၉၊ ၁၀) ခရစ်ယာန်အမျိုးသမီးငယ်တစ်ဦးက ဤသို့ဆို၏– “တစ်နေကုန်ကျောင်းတက်ရတာ စိတ်ပင်ပန်း ငြီးငွေ့လိုက်တာ။ ဒါပေမဲ့ အစည်းအဝေးတွေဟာ နောက်နေ့ ကျောင်းပြန်တက်ဖို့ အားသစ်လောင်းပေးတဲ့နေရာ၊ သဲကန္တာရက အိုအေစစ်တစ်ခုလိုပါပဲ။” အစည်းအဝေးများတက်ရန် ကျွန်ုပ်တို့၏လုံ့လစိုက်ထုတ်မှုအတွက် အမှန်ပင်ကောင်းချီးခံစားရသည်တကား!
၄ သမ္မာတရားကိုကြွေးကြော်ခြင်း– အခြားသူများအား ဟောပြောခြင်းသည် ယေရှုအတွက် စားစရာကဲ့သို့ဖြစ်ခဲ့၏။ ယင်းသည် ကိုယ်တော်ကို အားရှိစေ၏။ (ယော. ၄:၃၂-၃၄) အလားတူ၊ ကျွန်ုပ်တို့သည် အခြားသူများအား ဘုရားသခင့်အံ့ဖွယ်ကတိတော်များအကြောင်း ပြောပြကြသောအခါ အားရှိလာကြသည်။ ဓမ္မအမှုတွင် အလုပ်များနေခြင်းကလည်း နိုင်ငံတော်နှင့် မကြာမီခံစားရတော့မည့် ကောင်းချီးများအပေါ် ကျွန်ုပ်တို့၏စိတ်နှလုံးကို ရောက်နေစေ၏။ ယင်းက ကျွန်ုပ်တို့ကို အမှန်ပင် လန်းဆန်းမှုဖြစ်စေသည်။—မ. ၁၁:၂၈-၃၀။
၅ ယနေ့ မိမိ၏လူမျိုးတော်အတွက် ယေဟောဝါစီစဉ်ပေးနေသည့် ကြွယ်ဝသောဝိညာဏအာဟာရမှ ကျွန်ုပ်တို့ အကျိုးကျေးဇူးခံစားရခြင်းသည် တကယ့်အခွင့်ထူးပါတကား! ကိုယ်တော်အား ရွှင်လန်းစွာ ဆက်လက် ချီးမွမ်းထောမနာပြုနိုင်ကြပါစေ။—ဟေရှာ. ၆၅:၁၃၊ ၁၄။