သင်၏တိုးပွားမှုကို ထင်ရှားစေခြင်း

^၁ နိုင်ငံတော်သတင်းကို ဦးဆုံးကြားနာခဲ့သောအချိန်ကို ပြန်သတိရပါ။ ရိုးရိုးကလေးမျှဖြစ်သော သမ္မာတရားတို့က အသိပညာရလိုစိတ်ရှိစေခဲ့သည်။ မကြာမီပင် သင့်လမ်းစဉ်များထက် ယေဟောဝါ၏နည်းလမ်းတော်များ၏ သာလွန်ကောင်းမြတ်ခြင်းကို တွေ့ရှိလာသောအခါ သင့်ဘဝပုံစံကို ပြောင်းလဲဖို့လိုကြောင်း အသိအမှတ်ပြုခဲ့လေသည်။ (ဟေရှာ. ၅၅:၈၊ ၉) သို့နှင့် သင်သည်တိုးတက်လာပြီး မိမိအသက်တာကို ဆက်ကပ်အပ်နှံ၍ နှစ်ခြင်းခံခဲ့လေသည်။

^၂ ဝိညာဉ်ရေးဘက် အနည်းငယ်တိုးတက်ပြီးနောက်ပင်လျှင် သင်ချိုးနှိမ်ရမည့် အားနည်းချက်များ ရှိနေဦးမည်။ (ရော. ၁၂:၂) သင်၌ လူကိုကြောက်သောစိတ်ရှိနေသဖြင့် လယ်ကွင်းလုပ်ငန်းတွင် မပါဝင်ဝံ့ဘဲ ဖြစ်နေမည်။ သို့မဟုတ် ဘုရားသခင်၏ဝိညာဉ်အသီးသီးဖို့လိုနေပေမည်။ နောက်တွန့်ဆုတ်မည့်အစား ကိုယ်ပိုင်သီအိုကရက်တစ်ပန်းတိုင်များထားပြီး တိုးတက်ဖို့ရန် သင်စိတ်ပိုင်းဖြတ်ထားပေမည်။

^၃ ယခု သင့်ကိုယ်သင် ဆက်ကပ်အပ်နှံခဲ့ပြီး၍ နှစ်အတန်ကြာပင် ကုန်လွန်ခဲ့ပေမည်။ နောက်ကြောင်းကိုပြန်ကြည့်သည့်အခါ မိမိတွင် အဘယ်တိုးတက်မှုကို တွေ့ရှိသနည်း။ သင့်ပန်းတိုင်အချို့ကို မီခဲ့ပြီလော။ “အစပြု” ချိန်ကကဲ့သို့သောဇွဲမျိုး အသင်၌ရှိနေသေးသလော။ (ဟေဗြဲ ၃:၁၄) တိမောသေကို ပေါလုက ဤသို့တိုက်တွန်းချိန်တွင် သူသည် အတွေ့အကြုံအတော်အတန်ရှိသော ဝါရင့်ခရစ်ယာန်တစ်ဦး ဖြစ်နေပါပြီ– “သင်၏တိုးပွားခြင်းကို လူအပေါင်းတို့အား ထင်ရှားစေခြင်းငှာ ဤအရာများကို စိတ်စွဲလမ်း၍ ကြိုးစားအားထုတ်လော့။”—၁ တိ. ၄:၁၅။

^၄ မိမိကိုယ်ကိုစစ်ဆေးရန်လို– လွန်ခဲ့သောနှစ်အနည်းငယ်ကို ကျွန်ုပ်တို့ပြန်သုံးသပ်ဆင်ခြင်သည့်အခါ ကျွန်ုပ်တို့တွင် အစအဦး၌ရှိခဲ့သောအားနည်းချက်အချို့ ရှိနေဆဲဖြစ်ကြောင်း တွေ့ရှိသလော။ ကျွန်ုပ်တို့ချမှတ်ခဲ့သောပန်းတိုင်အချို့ကို မမီဘဲဖြစ်နေသလော။ သို့ဖြစ်လျှင် အဘယ်ကြောင့်နည်း။ ရည်ရွယ်ချက်ကောင်းလျက်ပင် အချိန်ဆွဲခဲ့၍ဖြစ်ပေမည်။ လောကီစိုးရိမ်ခြင်း သို့မဟုတ် ဤစနစ်ဟောင်း၏ဖိစီးမှုများက ကျွန်ုပ်တို့ကိုဟန့်တားနေပေမည်။—လု. ၁၇:၂၈-၃၀။

^၅ လွန်ခဲ့သောအချိန်အတွက် ကျွန်ုပ်တို့ဘာမျှမတတ်နိုင်တော့သော်လည်း လာမည့်အချိန်တွင် အမှန်ကြိုးစားနိုင်ပါသည်။ မိမိကိုယ်ကို ရိုးသားမှန်ကန်စွာ အကဲဖြတ်ပြီး အဘယ်ကဏ္ဍတွင် မိမိလိုအပ်နေကြောင်း အသိအမှတ်ပြုကာ တိုးတက်မှုရှိရန် ဂရုစိုက်ကြိုးစားနိုင်သည်။ ချုပ်တည်းခြင်း၊ နူးညံ့သိမ်မွေ့ ခြင်း သို့မဟုတ် စိတ်ရှည်ခြင်း အစရှိသော ဘုရားသခင်၏ဝိညာဉ်အသီးများကိုသီးရန် ပိုမိုကြိုးစားဖို့လိုနေပေမည်။ (ဂလ. ၅:၂၂၊ ၂၃) သူတစ်ပါးနှင့် အသင့်အတင့်ရှိရန် သို့မဟုတ် အကြီးအကဲများကို ဝိုင်းဝန်းကူညီရန် အခက်အခဲတွေ့နေမည်ဆိုလျှင် စိတ်နှိမ့်ချမှုကို မွေးမြူရန်အရေးကြီးသည်။—ဖိ. ၂:၂၊ ၃။

^၆ လုပ်ငန်းတော်အခွင့်အရေးများကို ရရှိနိုင်ရန် မိမိ၏တိုးတက်မှုကို ထင်ရှားပြသနိုင်မည်လော။ ပိုမိုကြိုးစားအားထုတ်ခြင်းဖြင့် ညီအစ်ကိုများသည် ဓမ္မအမှုထမ်းများ သို့မဟုတ် အကြီးအကဲများဖြစ်လာနိုင်ကြမည်။ ကျွန်ုပ်တို့အနက် အချို့သူများသည် မှန်မှန်ရှေ့ဆောင်နိုင်ကြမည်။ အရန်ရှေ့ဆောင်ရန် ပန်းတိုင်ထားနိုင်သူ မြောက်မြားစွာလည်းရှိသည်။ အခြားသူများမူကား မိမိတို့၏ကိုယ်ပိုင်လေ့လာမှုအစီအစဉ်မှ ပိုမိုအကျိုးရရှိခြင်း၊ အသင်းတော်အစည်းအဝေးများတွင် ပိုမိုပါဝင်ခြင်း၊ သို့မဟုတ် အသင်းတော်ကြေညာသူများအဖြစ် ပိုမိုတိုးတက်မှုရှိခြင်းတို့ဘက် ကြိုးစားရန်လိုပေမည်။

^၇ သို့သော် ကျွန်ုပ်တို့တစ်ဦးစီအနေနှင့် အဘယ်နေရာတွင် မိမိတိုးတက်ရန်လိုကြောင်း ဆုံးဖြတ်ရန်လိုသည်။ “အရွယ်ရောက်သူအဖြစ်သို့တက်ကြ” ရန်ကျွန်ုပ်တို့ကြိုးစားအားထုတ်လေ ပျော်ရွှင်မှုပိုများလာလေဖြစ်ပြီး တိုးတက်ကြီးပွားသော အသင်းတော်သားများအမှန်ဖြစ်ဖို့အကြောင်းရှိသည်။—ဟေဗြဲ ၆:၁၊ သမ။