‘မေတ္တာအခြေပြု၍တိုက်တွန်းနှိုးဆော်ခြင်း’

စီအီး ၆၀-၆၁ ခုနှစ်ခန့်က သခင်လက်မှထွက်ပြေးသောကျွန်တစ်ယောက်သည် ရောမမြို့မှထွက်၍ မိုင်ပေါင်း ၉၀၀ ဝေးသည့် အာရှမိုင်းနားအနောက်တောင်ဘက်ရှိ ကောလောသဲမြို့သို့ ပြန်သွားသည်။ သူ့သခင်အတွက် တမန်တော်ပေါလုကိုယ်တိုင်ရေးသောစာတစ်စောင်ကို သူယူဆောင်လာသည်။ ယနေ့ထိုစာသည် ကျမ်းစာ၏အစိတ်အပိုင်းတစ်ခုဖြစ်ပြီး စာလက်ခံရရှိသူ၏အမည်ဖိလေမုန်ဟုတွင်လေသည်။

ဖိလေမုန်ထံရေးသားလိုက်သောစာသည် ပညာသားပါ၍ လက်ခံနိုင်ဖွယ်အကြောင်းအချက်များဖြင့် အထူးပြုရေးသားထားရာဖြစ်သည်။ သာ၍အရေးကြီးသည်ကား ယနေ့ခရစ်ယာန်များအတွက် လက်တွေ့ကျသောသင်ခန်းစာများစွာပါဝင်ပြီး ယင်းတို့အထဲမှတစ်ခုမှာ ခရစ်ယာန်မေတ္တာအခြေခံပြီး အချင်းချင်း အားပေးတိုက်တွန်းခြင်း၏တန်ဖိုးပင်ဖြစ်သည်။ တိုတောင်းသော်လည်း အားပါသောဤစာစောင်ကို ဂရုတစိုက်လေ့လာကြည့်ကြစို့။

ထွက်ပြေးသူပြန်ရောက်လာ

ဖိလေမုန်သည် ကောလောသဲအသင်းတော်တွင် အလွန်ချစ်ခင်မြတ်နိုးခံရသော ခရစ်ယာန်တစ်ဦးဖြစ်သည်။ (ဖိလေမုန် ၄၊ ၅) ထိုတွင်ရှိအသင်းတော်သည် သူ့အိမ်ကို အစည်းအဝေးကျင်းပရာနေရာအဖြစ် အသုံးပြုခဲ့သည်။ (အခန်းငယ် ၂) ထို့အပြင် ဖိလေမုန်သည် တမန်တော်ပေါလုနှင့် ပုဂ္ဂိုလ်ရေးအရရင်းနှီးခဲ့သည်။ ဖိလေမုန်ခရစ်ယာန်ဖြစ်လာရန် တမန်တော်ကကူညီပေးခဲ့ခြင်းဖြစ်နိုင်သည်။ မှန်ပါသည်။ ကောလောသဲတွင် မိမိကိုယ်တိုင်မဟောပြောခဲ့ကြောင်း ပေါလုရေးသည့်စာကဖော်ပြသည်။ (ကောလောသဲ ၂:၁) သို့သော် ဧဖက်မြို့တွင် နှစ်နှစ်ကြာအထိဟောပြောခဲ့ရာ “အာရှိ [ကောလောသဲမြို့အပါအဝင်] ပြည်သားတို့သည် သခင်ယေရှု၏နှုတ်ကပါဌ်တရားတော်ကို ကြားရကြ၏။” (တမန်တော် ၁၉:၁၀) တုံ့ပြန်မှုရှိသောနားထောင်သူများထဲတွင် ဖိလေမုန်လည်းပါခဲ့ဖွယ်ရှိသည်။

မည်သို့ဆိုစေ ထိုအချိန်ကကြွယ်ဝသူများနည်းတူ ဖိလေမုန်လည်း ကျွန်ပိုင်ရှင်တစ်ဦးဖြစ်ခဲ့သည်။ ရှေးအချိန်က ကျွန်ဖြစ်ခြင်းသည် အမြဲနိမ့်ကျခြင်းမရှိပါ။ ဂျူးများတွင် မိမိကိုယ်ကို သို့မဟုတ် မိသားစုဝင်တစ်ဦးဦးကို ကျွန်အဖြစ်ရောင်းခြင်းသည် အကြွေးဆပ်သည့်တရားဝင်နည်းလမ်းဖြစ်သည်။ (ဝတ်ပြုရာ ၂၅:၃၉-၄၀) The International Standard Bible Encyclopedia က ရောမခေတ်ကာလနှင့်ပတ်သက်၍ ဤသို့မှတ်ချက်ချထားသည်။ “လူပေါင်းများစွာတို့သည် အကြောင်းအမျိုးမျိုးကြောင့် မိမိတို့ကိုယ်ကို ကျွန်အဖြစ်ရောင်းချကြသည်။ မွေးရာပါလွတ်လပ်သည့်ဆင်းရဲသားဖြစ်ရသည်ထက် အဆင်ပြေပြီးပိုမိုလုံခြုံသောအသက်တာသို့ဝင်စားရန်၊ အထူးအလုပ်များရရှိရန်၊ လူမှုရေးတွင် အဆင့်အတန်းမြင့်မားလာရန်တို့ကြောင့်ဖြစ်သည်။ . . . ရောမ,မဟုတ်သူများစွာတို့သည် ရောမဥပဒေကအတိအကျပြဌာန်းထားသော ကျွန်အဖြစ်မှလွတ်မြောက်သည့်အခါ ရောမနိုင်ငံသားဖြစ်ခွင့်တည်းဟူသော ခြေမြစ်ခိုင်လုံသည့်အလားအလာဖြင့် ရောမနိုင်ငံသားများထံ မိမိတို့ကိုယ်ကိုရောင်းချခဲ့ကြသည်။”

ဩနေသိမ်အမည်ရှိ ဖိလေမုန်၏ကျွန်တစ်ယောက်သည် ရောမသို့ထွက်ပြေးခဲ့ရာတွင် ပြဿနာတစ်ခုစတင်လာသည်။ ထွက်ပြေးလွတ်မြောက်ရန် လိုအပ်သောငွေကြေးကို ဖိလေမုန်ထံမှပင်ခိုးယူခဲ့ပုံရှိသည်။ (အခန်းငယ် ၁၈) ဩနေသိမ်သည်ရောမသို့ရောက်သောအခါ ထောင်ကျနေသောပေါလုနှင့်အဆက်အသွယ်ရသည်။

ကျွန်အဖြစ်မှထွက်ပြေးသည့် “အထက်ကသုံးမရသော” ကျွန်သည် ယခုခရစ်ယာန်တစ်ဦးဖြစ်နေပေပြီ။ မိမိကိုယ်ကို ပေါလု၏အစေအပါးနေရာတွင်ထားပြီး ထောင်ကျနေသောတမန်တော်အတွက် များစွာအကူအညီပေးခဲ့သည်။ ထိုသြနေသိမ်သည် ပေါလု၏ “ရင်သွေး”၊ “ချစ်သောညီ” ကဲ့သို့ယူမှတ်ခံရသည်မှာ အံ့ဩစရာမဟုတ်ပါ။—အငယ် ၁၁၊ ၁၂၊ ၁၆။

ဩနေသိမ်သည်မိမိနှင့်အတူနေရန် ပေါလုလိုလားပေမည်။ သို့သော် ဖိလေမုန်သည် ဩနေသိမ်၏တရားဝင်သခင်ဖြစ်ခွင့်ရှိနေသည်။ ထို့ကြောင့် ဩနေသိမ်သည် သူ၏တရားဝင်သခင်၏အမှုထမ်းရန် ပြန်သွားဖို့တာဝန်ရှိသည်။ သူ့ကိုဖိလေမုန်မည်သို့ကြိုဆိုမည်နည်း။ ဒေါသတကြီးဖြင့် ကြီးလေးသည့်ပြစ်ဒဏ်ခံစေမည်လော။ ဩနေသိမ်က မိမိသည် ခရစ်ယာန်အပေါင်းအသင်းဖြစ်ကြောင်းရိုးသားသည့်အဆိုကို သူစောဒကတက်မည်လော။

မေတ္တာနှင့်ပြဿနာဖြေရှင်းခြင်း

ပေါလုသည် ဩနေသိမ်နှင့်ပတ်သက်၍ ဖိလေမုန်ထံစာရေးရန်လှုံ့ဆော်ခံခဲ့ရသည်။ သူ့ထုံးစံရှိသည့်အတိုင်း အတွင်းရေးမှူးကိုမရေးစေဘဲ သူကိုယ်တိုင်ရေးခဲ့သည်။ (အခန်းငယ် ၁၉) ဖိလေမုန်ထံရေးသောစာတိုကလေးကို မိနစ်အနည်းငယ်နှင့်ဖတ်ပြီးနိုင်သည်။ ပေါလုသည် မိမိကိုယ်ကိုမိတ်ဆက်၍ ဖိလေမုန်နှင့်သူ၏အိမ်သားများကို “ကျေးဇူးတော်နှင့်ငြိမ်သက်ခြင်း” ဖြင့်နှုတ်ဆက်ပြီး၊ ဖိလေမုန်အား ‘သခင်ယေရှုနှင့်သန့်ရှင်းသူအားလုံးအပေါ်ထားရှိသော သူ၏မေတ္တာနှင့်ယုံကြည်ခြင်း’ အတွက် ချီးမွမ်းခဲ့သည်။—အငယ် ၁-၇။

ပေါလုသည် မိမိ၏တမန်တော်အခွင့်အာဏာကိုလက်ကိုင်ပြုပြီး ‘ဖိလေမုန်အား ပြုသင့်သောအမှုအရာကိုပြုရန် အမိန့်ပေး’ နိုင်သော်လည်း ယင်းသို့ပြုမည့်အစား ပေါလုသည် ‘မေတ္တာကိုအခြေပြု၍ တိုက်တွန်းနှိုးဆော်’ ခဲ့သည်။ ဖိလေမုန်သည် မိမိအတွက်အလွန်အသုံးဝင် သောခရစ်ယာန်ညီအစ်ကိုတစ်ဦးဖြစ်လာခြင်းကို ပေါလုအခိုင်အမာထောက်ခံပြောဆိုသည်။ “ဧဝံဂေလိတရားကြောင့် ချည်နှောင်ခြင်းကိုငါခံစဉ်တွင် သူသည် သင်၏ကိုယ်စား ငါ့ကိုပြုစုစေမည်အကြောင်း သူ့ [ဩနေသိမ်] ကိုငါထားချင်သော်လည်း သင်သည် ငါ၌ကျေးဇူးပြုရာတွင် အနိုင်ပြုရသကဲ့သို့မဟုတ်၊ အလိုအလျောက်ပြုစေချင်သောစိတ်ရှိသည်ဖြစ်၍၊ သင်၏အခွင့်မရှိလျှင် အလျင်းမပြုလို” ဟုပေါလုဝန်ခံခဲ့သည်။—အငယ် ၈-၁၄။

ထို့ကြောင့်ပေါလုသည် ယခင်ကျွန်ဖြစ်ဖူးသူသြနေသိမ်အား ညီအစ်ကိုတစ်ယောက်ကဲ့သို့ပြန်လက်ခံရန် ဖိလေမုန်အားတိုက်တွန်းခဲ့သည်။ “သူ့ကိုငါကဲ့သို့ပင်လက်ခံလော့” ဟုပေါလုရေးခဲ့သည်။ အလုပ်တာဝန်မှ ဩနေသိမ်လွတ်မြောက်ရန်အတွက်မဟုတ်ပါ။ ပေါလုသည် မိမိခေတ်ရှိလူမှုရေးအစီအစဉ်များကို ပြောင်းလဲရန်ကြိုးစားနေခြင်းမဟုတ်ပါ။ (ဧဖက် ၆:၉။ ကောလောသဲ ၄:၁။ ၁ တိမောသေ ၆:၂ တို့နှင့်နှိုင်းယှဉ်ပါ) မည်သို့ဆိုစေ ကျွန်သခင်ဆက်ဆံရေးသည် ယခု ဖိလေမုန်နှင့်သြနေသိမ်တို့စပ်ကြားတည်ရှိသည့် ခရစ်ယာန်စည်းမျဉ်းနှင့် ရောယှက်နေသည်။ ဖိလေမုန်သည် ဩနေသိမ်အား ‘ကျွန်တစ်ဦးထက်မကဘဲ ချစ်ခင်သောညီအစ်ကို’ ကဲ့သို့ယူမှတ်ရန်ဖြစ်သည်။

ဩနေသိမ် ခိုးယူခဲ့ဖွယ်ရှိသောငွေများကိုပြန်ဆပ်ရန်ကိစ္စကောမည်သို့နည်း။ ဤတွင်လည်း ပေါလုက မိမိနှင့်ဖိလေမုန်တို့၏ရင်းနှီးမှုကို အကြောင်းပြုပြီး ဤသို့ပြောခဲ့သည်။ “သူသည် သင်၌ပြစ်မှားခြင်း၊ ကြွေးတင်ခြင်းတစ်စုံတစ်ခုရှိလျှင် ငါ့အတွက်အတာမှတ်လော့။” ဖိလေမုန်သည် မိမိတောင်းဆိုသည်ထက်ပို၍ ခွင့်လွှတ်ခြင်းသဘောတင်ပြမည်ကို မိမိယုံကြည်ကြောင်း ပေါလုဖော်ပြနေခြင်းဖြစ်သည်။ ပေါလုသည် မကြာမီ မိမိလွတ်တော့မည်ကိုမျှော်လင့်သောကြောင့် ဖိလေမုန်၏ဧည့်ဝတ်ပြုခြင်းကိုခံရရန်ပင် သူစီစဉ်ထားသည်။ ဖိလေမုန်အား ထပ်မံ၍နှုတ်ဆက်စကားပြောပြီးနောက် ‘သခင်ယေရှု၏ချစ်ခင်ကြင်နာမှု’ ဖြင့်နှုတ်ခွန်းဆက်ကာ မိမိ၏စာကို ပေါလုနိဂုံးချုပ်လိုက်သည်။—အငယ် ၁၈-၂၅။

ယနေ့ခရစ်ယာန်များအတွက်သင်ခန်းစာ

ဖိလေမုန်စာစောင်သည် ယနေ့ခရစ်ယာန်များအတွက် လက်တွေ့ကျသင်ခန်းစာများစွာပါရှိသည်။ တစ်ခုအနေနှင့် ယုံကြည်သူချင်းတစ်ယောက်သည် ကျွန်ုပ်တို့ကို အလွန်အကျူးပြစ်မှားသည့်တိုင် ကျွန်ုပ်တို့ခွင့်လွှတ်ရန်လိုအပ်ကြောင်း သတိပေးသည်။ “သင်တို့သည် သူတစ်ပါးတို့၏အပြစ်ကိုလွှတ်လျှင် ကောင်းကင်ဘုံ၌ရှိတော်မူသော သင်တို့၏အဘသည် သင်တို့၏အပြစ်ကိုလွှတ်တော်မူမည်” ဟုယေရှုမိန့်တော်မူခဲ့သည်။—မဿဲ ၆:၁၄။

ခရစ်ယာန်အသင်းတော်တွင် အခွင့်အာဏာရှိသူတို့သည် ဖိလေမုန်စာစောင်မှ အထူးသဖြင့်အကျိုးခံစားရနိုင်သည်။ သင့်တော်ရာကိုဖိလေမုန်ပြုလုပ်ရန်အမိန့်ပေးဖို့ ပေါလုသည် မိမိ၏တမန်တော်အခွင့်အာဏာကိုအသုံးပြုရန် ရှောင်ကြဉ်ခဲ့သည်မှာမှတ်သားစရာဖြစ်သည်။ ထို့အပြင် ဩနေသိမ်ကို ရောမတွင်ပင်ဆက်ထားပြီး မိမိကိုအစေခံရန် ပေါလုမတောင်းဆိုခဲ့ပါ။ အခြားသူ၏ပစ္စည်းဥစ္စာဆိုင်ရာအခွင့်အရေးကို ပေါလုလေးစားခဲ့သည်။ အခွင့်အာဏာအသုံးပြု၍ချဉ်းကပ်ခြင်းအားဖြင့် လိုက်လျောမှုကိုရနိုင်သော်လည်း စိတ်လိုကိုယ်လျောက်ပြုမူလုပ်ကိုင်ခြင်းက ဖိလေမုန်အတွက် သာ၍ကောင်းကြောင်းကို ပေါလုကောင်းစွာသဘောပေါက်ခဲ့သည်။ လှိုက်လှဲသည့်တုံ့ပြန်မှုထွက်ပေါ်လာရန် မေတ္တာအခြေခံ၍ သူတောင်းပန်ခဲ့သည်။

ယနေ့ခရစ်ယာန်အကြီးအကဲများလည်း သိုးတော်စုနှင့်ဆက်ဆံရာတွင် မည်သည့်အခါမျှ မိမိတို့၏အခွင့်အာဏာကို အလွဲသုံးခြင်း၊ ကြမ်းတမ်းစွာ သို့မဟုတ် နိုင်လိုမင်းထက်သဘောဖြင့်သုံးခြင်းအားဖြင့် “ဘုရားသခင်၏အမွေဥစ္စာများကို အစိုးတရ” မပြုသင့်ပါ။ (၁ ပေတရု ၅:၁-၃) “သင်တို့သိသည့်အတိုင်း လောကီမင်းတို့သည် အစိုးတရပြုတတ်ကြ၏။ အကဲအမှူးတို့သည် အာဏာထားတတ်ကြ၏။ သင်တို့မူကား ထိုသို့မပြုကြနှင့်” ဟုယေရှုမိန့်တော်မူခဲ့သည်။ (မဿဲ ၂၀:၂၅၊ ၂၆) သိုးတော်စုအဝင်တို့သည် အများအားဖြင့် အမိန့်ပေးခြင်းထက် မေတ္တာနှင့်တောင်းပန်ခြင်းကို သာ၍တုံ့ပြန်ကြကြောင်း ကြီးကြပ်မှူးများတွေ့ရှိရသည်။ စိတ်ဓာတ်ကျဆင်းနေသူများသည် ကြင်နာစွာဖြင့် သူတို့၏ပြဿနာများကိုနားထောင်ပြီး စာနာမှုရှိသောအကြံဉာဏ်များပေးတတ်သည့်အကြီးအကဲများကို လေးမြတ်ကြသည်။

ပေါလု၏စာက ချီးမွမ်းခြင်းနှင့်လိမ္မာပါးနပ်ခြင်း၏တန်ဖိုးကို အကြီးအကဲများအား သတိပေးထားသည်။ ဖိလေမုန်ကြောင့် ‘သန့်ရှင်းသူတို့၏ချစ်ခင်ကြင်နာမှုသည် အားသစ်လောင်းခံရ’ ကြောင်းပေါလုဝန်ခံခြင်းအားဖြင့် အစပြုသည်။ (အခန်းငယ် ၇) ဤသို့ရိုးသားစွာချီးမွမ်းခြင်းသည် ဖိလေမုန်အား သာ၍ခံယူနိုင်သည့်သဘောကို ဖြစ်ထွန်းစေသည်။ ယနေ့လည်း အလားတူပင် သွန်သင်မှုများသည် ရိုးသားပြီးလှိုက်လှဲသော ချီးမွမ်းခြင်းများဖြင့် တန်ဆာဆင်သင့်သည်။ ယင်းသွန်သင်ချက်များသည် တုံးတိတိနှင့် လိမ္မာပါးနပ်မှုမရှိ မဖြစ်စေဘဲ၊ နားထောင်သူပို၍နှစ်လိုဖွယ်ဖြစ်အောင် “ဆားအားဖြင့်ငံသောအရသာရှိစေ” ရမည်။—ကောလောသဲ ၄:၆။

ဖိလေမုန်သည် ပြုသင့်သောအမှုကိုပြုမည်ဟု မိမိယုံကြည်ကြောင်း ပေါလုဤသို့ပြောသည်။ “သင်သည်နားထောင်မည်ဟု ယုံမှားခြင်းမရှိသည်သာမက ငါပြောသည်ထက် သာ၍ပြုမည်ဟုအမှန်သိလျက် ငါရေးလိုက်ပါ၏။” (အခန်းငယ် ၂၁) အကြီးအကဲများ၊ သင်တို့၏ယုံကြည်သူချင်းတို့အား အလားတူယုံကြည်စိတ်ချမှုမျိုးကို တင်ပြပါသလော။ ယင်းက သူတို့ပြုသင့်သောအမှုကိုပြုလုပ်ရန် အကူအညီမဖြစ်စေပေလော။

စိတ်ဝင်စားဖွယ်ကား မိဘများပင် မိမိတို့၏ကလေးများအပေါ် ယုံကြည်စိတ်ချမှုတင်ပြခြင်းသည် ကောင်းကျိုးဖြစ်ထွန်းစေကြောင်းကို မကြာခဏတွေ့ရှိရသည်။ ဝတ်ကျေတန်းကျေလုပ်ဆောင်ရုံထက် ပိုသောစိတ်ဆန္ဒဖြစ်သည့် စိတ်လိုကိုယ်လျောက်နာခံမှု၏တန်ဖိုးကို မိဘများအသိအမှတ်ပြုခြင်းအားဖြင့် သားသမီးများအား ဣန္ဒြေသိက္ခာရှိစေနိုင်သည်။ မိဘများ၏အခွင့်အာဏာအရအမိန့်ပေးခြင်း၊ တောင်းဆိုခြင်းများတို့သည် ဖြစ်နိုင်သည့်အခါတိုင်း ကြင်နာ၍မေတ္တာပါသောအသံဖြင့်ဖြစ်သင့်သည်။ စာနာထောက်ထားမှုနှင့် ကျိုးကြောင်းဆင်ခြင်မှုများကို တင်ပြသင့်သည်။ သားသမီးများချီးမွမ်းခံထိုက်သည့်အခါ မိဘများသည် လှိုက်လှဲစွာချီးမွမ်းပြီး၊ သူတို့ကို အလွန်အမင်းအပြစ်တင်ခြင်း၊ အထူးသဖြင့် လူအများရှေ့တွင်ထိုသို့ပြုခြင်းများကို ရှောင်ရမည်။

ထိုသဘောအတိုင်းပင် လင်ယောက်ျားများသည် ကျိုးကြောင်းဆီလျော်မှု၊ ကြင်နာမှု၊ ဇနီးသည်များကို ချီးမွမ်းလိုသည့်သဘောများကို တင်ပြနိုင်သည်။ ယင်းက ဇနီးသည်များလက်အောက်ခံမှုကို နှစ်သက်ဖွယ်နှင့် ရွှင်လန်းအားရဖွယ်ဖြစ်စေသည်။—သု၊ ၃၁:၂၈။ ဧဖက် ၅:၂၈။

ပေါလု၏စာကို ဖိလေမုန်မည်သို့ပြန်ကြားသည်ကိုမူ အတိအကျမဖော်ပြထားချေ။ သို့တိုင် သူ့အပေါ်ပေါလု၏ယုံကြည်စိတ်ချမှုသည် အလွဲဖြစ်သည်ဟုကျွန်ုပ်တို့မထင်မှတ်နိုင်ပေ။ ယနေ့ ခရစ်ယာန်အကြီးအကဲများ၊ မိဘများနှင့် လင်ယောက်ျားများသည်လည်း နိုင်လိုမင်းထက်ပြုခြင်း၊ အမိန့်ပေးခြင်း သို့မဟုတ် အပေါ်စီးမှမဟုတ်ဘဲ “မေတ္တာအခြေပြု၍ တိုက်တွန်းနှိုးဆော်ခြင်း” ဖြင့် ထိုနည်းတူစွာ ဆက်ဆံရေးတွင်အောင်မြင်ကြပါစေ။

[စာမျက်နှာ ၂၃ ပါ ရုပ်ပုံ]

မိမိ၏တမန်တော်အခွင့်အာဏာကိုလက်ကိုင်ပြုမည့်အစား ပေါလုသည် ခရစ်ယာန်မေတ္တာကိုအခြေပြု၍ ဖိလေမုန်အား တိုက်တွန်းနှိုးဆော်ခဲ့သည်