ဘုရားသခင်၏ ခန့်အပ်ခံ တရားသူကြီးမင်းအားဖြင့် အားလုံးအတွက် တရားခြင်း

“ခမည်းတော်သည် သားတော်ကို ချစ်တော်မူ၍ . . . တရားစီရင်ခြင်းအခွင့်ရှိသမျှကို သားတော်အား အပ်ပေးတော်မူ၏။”—ယောဟန် ၅:၂၀၊ ၂၃။

၁။ ပထမရာစုမှလူအချို့ ရင်ဆိုင်ခဲ့ရသော ဆင်တူမေးခွန်းများကို အသင်မည်သို့ ရင်ဆိုင်နေရသနည်း။

တရားခြင်းသည် သင့်အဖို့ မည်မျှအရေးကြီးသနည်း။ စစ်မှန်သော တရားခြင်းရရှိရေး၊ ကမ္ဘာတစ်ဝန်းတရားခြင်းစိုးမိုးချိန်တွင် အသက်ရှင်နေထိုင်ရေးအတွက် အသင်မည်မျှအားထုတ်ကြိုးပမ်းမည်နည်း။ ဂရိနိုင်ငံ အာသင်မြို့မှ ဂုဏ်သရေရှိ အမျိုးသားအမျိုးသမီးအချို့ ပြုခဲ့သကဲ့သို့ ဤမေးခွန်းတို့ကို အသင်အလေးအနက် စဉ်းစားရန် တာဝန်ရှိသည်။

၂၊ ၃။ (က) အဘယ်အကြောင်းကြောင့် အာသင်မြို့သား ပရိသတ်တို့အား နောင်တရရန် ပေါလုတိုက်တွန်းခဲ့ရခြင်း ဖြစ်သနည်း။ (ခ) ထိုပရိသတ်အဖို့ နောင်တရခြင်းသည် အဘယ်ကြောင့် အထူးအဆန်းဖြစ်ခဲ့မည်နည်း။

^၂ ကျော်ကြားသော အာရေတောင်တရားရုံးတော်၌ ခရစ်ယာန်တမန်တော်ပေါလု ပြောကြားခဲ့သော အမှတ်တရမိန့်ခွန်းကို သူတို့ကြားနာခဲ့ကြသည်။ ကျွန်ုပ်တို့ရှိရှိသမျှတို့၏ အသက်သခင်၊ ဖန်ဆင်းရှင် ဘုရားသခင်တစ်ပါးတည်း ရှိခြင်းအကြောင်းကို တာဝန်ရှိသည်ဟူသော ယုတ္တိတန်သည့် အပြီးသတ်ဆုံးဖြတ်ချက်ပေါ်ထွက်ခဲ့သည်။ ထိုအခိုက်တွင် ပေါလုက ဤသို့ကြေငြာလိုက်သည်။ “ဘုရားသခင်သည် မိုက်မဲသော အချိန်ကာလတို့ကိုအမှုမထားဖူးသော်လည်း ယခုမှာ ကိုယ်အပြစ်ကိုမြင်၍ နောင်တရကြလော့ဟု ခပ်သိမ်းသောအရပ်တို့၌ ရှိသော လူအပေါင်းတို့အား ပညတ်တော်မူ၏။”—တမန်တော် ၁၇:၃၀။

^၃ ရှင်းရှင်းဆိုရသော် နောင်တရခြင်းဆိုသည်မှာ ထိုပရိသတ်တို့အဖို့ အံ့သြထိတ်လန့်စရာဖြစ်ခဲ့ပေမည်။ အဘယ်ကြောင့် ထိုသို့ဖြစ်ရသနည်း။ ရှေးဂရိလူတို့၏စိတ်သန္တာန်တွင် နောင်တတရားဆိုသည်မှာ အချို့သောလုပ်ရပ် သို့မဟုတ် ပြောဆိုမှုများအတွက် သံဝေဂရခြင်းဟူ၍ နားလည်ခဲ့ကြသည်။ သို့သော် အဘိဓာန်ကျမ်းတစ်စောင်ဖေါ်ပြချက်အရ နောင်တဟူသောစကားလုံးသည် “စာရိတ္တစိတ်သဘောထားတစ်ရပ်လုံးကို ပြုပြင်ပြောင်းလဲခြင်း၊ ဘဝဦးတည်ချက်ကို သိသိသာသာပြောင်းလဲခြင်း၊ ကိုယ်ကျင့်တရားတစ်ခုလုံးကို ထိခိုက်သည့် ပြောင်းလဲခြင်းသဘောမျိုး မည်သည့်အခါမျှမဆောင်ပေ။”

၄။ နောင်တနှင့်ဆိုင်သော ပေါလု၏တင်ပြချက်ကို အဘယ်ကျိုးကြောင်းဆင်ခြင်ပုံဖြင့် ထောက်ခံထားသနည်း။

^၄ သို့တစေ ထိုသို့အလေးအနက်နောင်တရရန် အဘယ်ကြောင့်သင့်တော်ကြောင်းကို သင်သံသယရှင်းစွာ တွေ့မြင်နိုင်သည်။ ပေါလု၏ ကျိုးကြောင်းဆင်ခြင်ပုံကို လိုက်ကြည့်ပါ။ လူအားလုံး၏ အသက်သည် ဘုရားသခင်ထံမှလာခြင်းဖြစ်သောကြောင့် အားလုံးဘုရားသခင်၌ တာဝန်ကိုယ်စီရှိကြသည်။ သို့ဖြစ်သောကြောင့် မိမိကိုရှာ၍ သိကျွမ်းအောင် အားထုတ်ရန် ဘုရားသခင်လိုလားတော်မူခြင်းမှာ အလွန်မှန်ကန်၍ တရားနည်းလမ်းကျပေသည်။ အာသင်မြို့သားတို့အနေဖြင့် ကိုယ်တော်၏မူများနှင့် အလိုတော်ကိုမသိကြပါက ယင်းတို့ကို သိအောင်သင်ကြားဆည်းပူးပြီး ယင်းတို့နှင့်အညီ မိမိတို့ဘဝကို ညီညွတ်စေရန် နောင်တရဖို့လိုအပ်သည်။ အဆင်ပြေမှ ထိုသို့ပြုဖို့လိုသည်ဟူ၍ အဓိပ္ပာယ်မသက်ရောက်ပါ။ ပေါလု၏မိန့်ခွန်းမှ အောက်ပါအားမာန်ပါသော နိဂုံးကမ္ပတ်စကားမှ အကြောင်းရင်းကို တွေ့နိုင်ပေသည်။ “အကြောင်းမူကား ခန့်ထားတော်မူသောသူအားဖြင့် လောကီသားတို့ကို ဖြောင့်မတ်ခြင်းတရားနှင့်ညီလျော်စွာ စစ်ကြောစီရင်မည့်နေ့ရက်ကို ချိန်းချက်တော်မူပြီ။ ထိုသူကိုသေခြင်းမှ ထမြောက်စေတော်မူသောအားဖြင့် ခပ်သိမ်းသောလူတို့အား ယုံလောက်သောသက်သေကို ပြတော်မူပြီ။”—တမန်တော် ၁၇:၃၁။

၅။ ပေါလု၏မိန့်ခွန်းကို ပရိသတ် မည်သို့တုံ့ပြန်ခဲ့ကြသနည်း။ အဘယ်ကြောင့်နည်း။

^၅ အနှစ်သာရပြည့်ဝ၍ ပိုင်နိုင်ထိရောက်လှသည့် ဤအခန်းငယ်ကို ဂရုတစိုက်စစ်ဆေးကြည့်ထိုက်သည်။ ကျွန်ုပ်တို့ခေတ်တွင် စုံလင်ပြည့်ဝသော တရားခြင်းစိုးမိုးရေးကို မျှော်လင့်ရန် နှိုးဆော်ပေးသောကြောင့်တည်း။ “နေ့ရက်ကို ချိန်းချက်၊” ‘လောကီသားတို့ကို စစ်ကြောစီရင်၊’ “ဖြောင့်မတ်ခြင်းတရားနှင့် ညီလျော်စွာ၊” “ခန့်ထားတော်မူသော သူအားဖြင့်၊” “ယုံလောက်သော သက်သေကို ပြတော်မူပြီ၊” ‘ထိုသူကို ထမြောက်စေတော်မူပြီ’ ဟူသောစကားက ပေါလု၏ပရိသတ်တို့ထဲတွင် ပြင်းထန်သောတန်ပြန်မှု ဖြစ်ပေါ်စေခဲ့သည်။ အခန်းငယ် ၃၂-၃၄ ၌ပြဆိုသည့်အတိုင်း အချို့က ကဲ့ရဲ့သရော်ကြ၏။ အချို့မှာ ဆွေးနွေးပွဲမှ ထွက်ခွာသွားကြ၏။ သို့ရာတွင် လူအနည်းငယ်ကမူ နောင်တရ၍ ယုံကြည်သူများဖြစ်လာကြသည်။ သို့ဖြစ်၍ အာသင်မြို့သား ပရိသတ် အများစုထက်ပို၍ ဉာဏ်အမြော်အမြင်ရှိသူများ ဖြစ်အောင် ကျွန်ုပ်တို့ကြိုးစားကြပါစို့။ အကြောင်းမှာ စစ်မှန်သော တရားခြင်းကို ကျွန်ုပ်တို့တောင့်တကြသည်ရှိသော် ဤအချက်သည် အထူးအရေးကြီးသောအချက် ဖြစ်သောကြောင့်တည်း။ အခန်းငယ် ၃၁ မှ အနှစ်သာရအများဆုံးရရှိရေးအတွက် ‘လောကီသားတို့ကို စစ်ကြောစီရင်ရန် ကိုယ်တော်ရည်ရွယ်တော်မူ၏’ ဟူသောအသုံးအနှုန်းကို ဦးစွာကြည့်ကြမည်။ ‘ကိုယ်တော်’ ကားမည်သူနည်း။ ကိုယ်တော်၏ စံချိန်ကား အဘယ်နည်း။ အထူးသဖြင့် တရားခြင်းနှင့်စပ်လျဉ်းသော စံချိန်ကား အဘယ်နည်း။

၆။ လောကီသားတို့ကို တရားစီရင်မည့် နေ့ရက်ကို ချိန်းချက်တော်မူသော အရှင်အကြောင်း ကျွန်ုပ်တို့ အဘယ်သို့သိမြင်နိုင်သနည်း။

^၆ တမန်တော် ၁၇:၃၀ ကပေါလုမည်သူ့ကို ရည်ညွှန်းကြောင်း ဖေါ်ပြထားသည်။ ကိုယ်တော်ကား ရှိသမျှနောင်တရရန် အမိန့်ပေးသော ဘုရားသခင်၊ ကျွန်ုပ်တို့၏ အသက်သခင်ဖန်ဆင်းရှင်ပင်တည်း။ ဖန်ဆင်းထားသောအရာများမှ ဘုရားသခင်အကြောင်း များစွာကို ကျွန်ုပ်တို့အလိုလို သိမြင်နိုင်သည်။ သို့သော်တရားခြင်းနှင့် ဆိုင်သော စံချိန်ကိုမူကားအခြားသော ပင်ရင်းတစ်ခုဖြစ်သော သမ္မာကျမ်းစာမှ အထူးသဖြင့်ထင်ရှားစွာ တွေ့ရသည်။ ယင်းစာအုပ်၌ မောရှေကဲ့သို့သော လူစားမျိုးနှင့် ကိုယ်တော်ဆက်ဆံပုံအကြောင်းနှင့်တကွ ဣသရေလလူမျိုးအားပေးခဲ့သော ဘုရားသခင့်ပညတ်တရားတော်များကို မှတ်တမ်းတင်ထားသည်။

အဘယ်သို့သော စီရင်ခြင်းနှင့် တရားခြင်းမျိုးနည်း

၇။ ယေဟောဝါနှင့် တရားခြင်းအကြောင်း မောရှေအဘယ်သက်သေခံချက် ပေးခဲ့သနည်း။

^၇ မောရှေသည် ဆယ်စုနှစ်များစွာကြာအောင် ဘုရားသခင်နှင့်ရင်းနှီးသော ဆက်ဆံမှုများရှိခဲ့သည်ကို သင်သိပေလိမ့်မည်။ မည်မျှရင်းနှီးသနည်းဟူမူ မောရှေနှင့် ‘နှုတ်ခွန်းဆိုင်လျက်’ မြွက်ဆိုခဲ့သည်ဟုပင် ဘုရားသခင်မိန့်တော်မူခဲ့သည်။ (တောလည်ရာ ၁၂:၈) မောရှေသည် သူ့အားဘုရားသခင်မည်သို့ဆက်ဆံတော်မူသည်၊ အခြားလူသားများနှင့် လူမျိုးတစ်မျိုးလုံးကို မည်သို့ဆက်ဆံတော်မူသည်ကိုသိသည်။ ကွယ်လွန်ခါနီးတွင် မောရှေသည် အောက်ပါအတိုင်း ယုံမှားခြင်းကင်းစွာ ပြောဆိုခဲ့သည်။ “ဘုရားသခင်သည် မူလအမြစ်ဖြစ်၍ အမှုတော်သည် စုံလင်ပေ၏။ စီရင်တော်မူသမျှတို့သည် တရားနှင့်ညီလျက်၊ သစ္စာစောင့်သောဘုရား၊ အပြစ်ကင်းလွတ်၍ ဟုတ်မှန်ဖြောင့်မတ်သောဘုရားဖြစ်တော်မူ၏။”—တရားဟောရာ ၃၂:၄။

၈။ တရားခြင်းအကြောင်း ဧလိဟုပြောဆိုချက်ကို ကျွန်ုပ်တို့ အဘယ်ကြောင့် မှတ်သားသင့်သနည်း။

^၈ ဉာဏ်ပညာနှင့် အမြော်အမြင်ကြီးမားမှုကြောင့် ထင်ရှားကျော်ကြားသူ ဧလိဟု၏သက်သေခံချက်ကိုလည်း သုံးသပ်ကြည့်ပါ။ သူသည် မချင့်မချိန်ဘဲ ဆုံးဖြတ်ချက်ချသူမဟုတ်ကြောင်း အသင်စိတ်ချနိုင်သည်။ အမှုကိစ္စတစ်ခု၌ နှစ်ဦးနှစ်ဘက်ရှည်လျားစွာ အခြေအတင်ငြင်းခုံကြသည်ကို သူတစ်ပတ်ကျော်ကြာကြာ ထိုင်နားထောင်ခဲ့သည်။ ယခုဧလိဟုကိုယ်ပိုင်အတွေ့အကြုံမှလည်းကောင်း၊ ဘုရားသခင်၏နည်းလမ်းတော်များကို လေ့ကျက်ခြင်းမှလည်းကောင်း ဘုရားသခင်အကြောင်းနှင့်ပတ်သက်၍ အဘယ်သို့ကောက်ချက်ချခဲ့သနည်း။ ဤသို့သူကြေညာခဲ့သည်။ “သို့ဖြစ်၍ ဉာဏ်ကောင်းသောသူတို့ ငါ့စကားကိုနားထောင်ကြလော့။ ဒုစရိုက်သည် ဘုရားသခင်နှင့်လည်းကောင်း၊ အပြစ်သည် အနန္တတန်ခိုးရှင်နှင့်လည်းကောင်း ဝေးပါစေ။ လူပြုသောအမှု၏ အကျိုးအပြစ်ကိုပေးတော်မူမည်။ လူတိုင်းကိုယ်ကျင့်သောအကျင့်နှင့် အထိုက်အလျောက်ခံစေတော်မူမည်။ အကယ်စင်စစ်ဘုရားသခင်သည် ဒုစရိုက်ကိုပြုတော်မမူ။ အနန္တတန်ခိုးရှင်သည် မတရားသဖြင့် စီရင်တော်မမူ။”—ယောဘ ၃၄:၁၀—၁၂

၉၊ ၁၀။ လူသားတရားသူကြီးများအား ဘုရားသခင်ပေးတော်မူသော စံချိန်များသည် ကျွန်ုပ်တို့အဖို့ အဘယ်ကြောင့် အားတက်စရာဖြစ်သနည်း။ (ဝတ်ပြုရာ ၁၉:၁၅)

^၉ ကိုယ်ကိုမေးကြည့်ပါ။ အထက်ပါကြေညာချက်၌ မျက်နှာလိုက်ခြင်းမရှိ၊ တရားလွဲခြင်းမရှိဘဲ လူတိုင်းကို ကိုယ်ကျင့်သောအကျင့်နှင့် အထိုက်အလျောက် ဆက်ဆံသည့် တရားသူကြီးထံမှ ကျွန်ုပ်တို့လိုလားရာများကို ပြည့်ပြည့်စုံစုံ ဖေါ်ပြထားသည်မဟုတ်လော။ ပုထုစဉ် လူသားတရားသူကြီးတစ်ဦး၏ စီရင်ခြင်းခံရသည်ရှိသော် သူသည် အထက်ပါအရည်အချင်း ရှိမည်ဆိုလျှင် အသင်များစွာ စိတ်သက်သာမည်မဟုတ်လော။

^၁၀ သမ္မာကျမ်းစာက ယေဟောဝါအား “မြေတစ်ပြင်လုံး၏ တရားမင်း” ဟူ၍ ညွှန်းဆိုထားသည်။ (ကမ္ဘာဦး ၁၈:၂၅) သို့သော် ရံဖန်ရံခါ လူသားတရားသူကြီးတို့ကို ကိုယ်တော်အသုံးပြုတော်မူ၏။ မိမိအားကိုယ်စားပြုသော ဣသရေလတရားသူကြီးများအား အဘယ်သို့ပြုရန် ကိုယ်တော်မျှော်လင့်တော်မူသနည်း။ တရားဟောရာ ၁၆:၁၉၊ ၂၀ တွင် တရားသူကြီးများအဖို့ ဘုရားသခင်ပေးတော်မူသည့် အလုပ်သဘောဆောင်သော ညွှန်ကြားချက်များကို ဖတ်ရသည်။ “သင်သည် တရားလမ်းမှမလွဲရ။ လူမျက်နှာကို မထောက်ရ။ တံစိုးကို မစားရ။ တံစိုးသည် ပညာရှိမျက်စိကို ကွယ်စေတတ်၏။ ဖြောင့်မတ်သောသူ၏စကားကို ကောက်စေတတ်၏။ . . . သင်သည် အသက်ရှင်၍ အမွေခံမည်အကြောင်း၊ ဖြောင့်သော တရားလမ်းသို့သာ လိုက်ရမည်။” ယခုခေတ်တရားခြင်းကို ပုံဖေါ်သော ရုပ်တုများ၌ အဂတိမလိုက်ခြင်း၊ မျက်နှာမလိုက်ခြင်းကို သရုပ်ဖေါ်သည့်အနေနှင့် မျက်စိကို အဝတ်နှင့်စည်းထားလေ့ရှိသော်လည်း ဘုရားသခင့်စံချိန်မှာ ထိုထက်မြင့်မားသည်ကို သင်တွေ့ရပေမည်။ စင်စစ်ဆိုလျှင် မိမိကို ကိုယ်စားပြု၍ တရားဥပဒေကို ကျင့်သုံးသောလူသားတရားသူကြီးများ အဂတိမလိုက်ရန်၊ မျက်နှာမလိုက်ရန် ကိုယ်တော်တောင်းဆိုထားတော်မူသည်။

၁၁။ သမ္မာကျမ်းစာဖေါ်ပြသည့် ဤတရားမျှတခြင်းအကြောင်းအရာကို ထောက်ရှု၍ ကျွန်ုပ်တို့ အဘယ်နိဂုံးချုပ်အဖြေရရှိနိုင်သနည်း။

^၁၁ တရားခြင်းဆိုင်ရာ ဘုရားသခင့်အမြင်သဘောထားနှင့်စပ်လျဉ်းသော ဤအသေးစိတ်အကြောင်းတို့က ပေါလု၏မိန့်ခွန်းမှ အထွတ်အထိတ်အကြောင်းနှင့် တိုက်ရိုက်ဆက်စပ်မှုရှိသည်။ တမန်တော် ၁၇:၃၁ ၌ ပေါလုက ဘုရားသခင်သည် “ဖြောင့်မတ်ခြင်းတရားနှင့်ညီလျော်စွာ စစ်ကြောစီရင်မည့် နေ့ရက်ကို ချိန်းချက်တော်မူပြီ” ဟုကြေညာခဲ့သည်။ တရားမျှတခြင်း၊ ဖြောင့်မတ်ခြင်း၊ မျက်နှာမလိုက်ခြင်း တို့သည် ဘုရားသခင်ထံတော်မှ ကျွန်ုပ်တို့အတိအကျမျှော်လင့်နိုင်သော အရည်အချင်းများပင်တည်း။ အခန်းငယ် ၃၁ အရ လူသားအပေါင်းတို့အား တရားစီရင်ရန် ‘ပုဂ္ဂိုလ်တစ်ဦး’ ကိုဘုရားသခင်အသုံးပြုတော်မူမည်ဟု ဆိုထားသဖြင့် အချို့ စိုးရိမ်ကောင်း စိုးရိမ်ကြမည်။ ထို ‘ပုဂ္ဂိုလ်’ ကား မည်သူနည်း။ သူသည် ဘုရားသခင်၏ တရားမျှတခြင်းဆိုင်ရာ မြင့်မားသော စံချိန်အတိုင်း လိုက်မည်ဟု အဘယ်အာမခံချက်ရှိသနည်း။

၁၂၊ ၁၃။ တရားစီရင်ရန် အဘယ် ‘ပုဂ္ဂိုလ်’ ကို ဘုရားသခင် အသုံးပြုတော်မူမည်ကို ကျွန်ုပ်တို့ အဘယ်သို့သိရသနည်း။

^၁၂ ပေါလုသည် ‘ယေရှုနှင့် ထမြောက်ခြင်းသတင်းကောင်းကို ဟောပြော’ ခဲ့ကြောင်း တမန်တော် ၁၇:၁၈ ကဆို၏။ ထိုကြောင့် မိန့်ခွန်းအဆုံး၌ ပေါလုက ဘုရားသခင်သည် ‘ခန့်ထားတော်မူသော ပုဂ္ဂိုလ်ကို သူသေတို့အထဲမှ ရှင်ပြန်ထမြောက်စေတော်မူသည်’ ဟူ၍ ပြောဆိုရာတွင် ယေရှုကို ဆိုလိုကြောင်း လူထုပရိသတ်တို့ သိရှိကြသည်။

^၁၃ မိမိအား ဘုရားသခင့် စံချိန်မီသော တရားမင်းအဖြစ် ဘုရားသခင့်ခန့်အပ်တော်မူကြောင်း ယေရှုဝန်ခံတော်မူခဲ့၏။ ယောဟန် ၅:၂၃ ၌ ကိုယ်တော် ဤသို့မိန့်တော်မူ၏။ “ခမည်းတော်သည် အဘယ်သူကိုမျှ တရားစီရင်တော်မမူ။ တရားစီရင်ခြင်းအခွင့်ရှိသမျှကို သားတော်အား အပ်ပေးတော်မူ၏။” အောက်မေ့ရာ သင်္ချိုင်း၌ ရှိသူများ ထမြောက်ခြင်းအကြောင်း ယေရှုမိန့်ဆိုပြီးနောက် ဤသို့ထပ်၍ မိန့်တော်မူ၏။ “ငါသည်ကိုယ်အလိုအလျောက် အဘယ်အမှုကိုမျှမပြုနိုင်။ ငါသည်ကြားသည်အတိုင်း တရားစီရင်၏။ ငါစီရင်ခြင်းသည်လည်း တရားတော်နှင့် ညီညွတ်၏။ အကြောင်းမူကား ငါသည် ကိုယ်အလိုသို့မလိုက်၊ ငါ့ကိုစေလွှတ်တော်မူသော ခမည်းတော်၏ အလိုသို့လိုက်၏။”—ယောဟန် ၅:၃၀။ ဆာလံ ၇၂:၂-၇။

၁၄။ ယေရှုထံမှ အဘယ်သို့သော ဆက်ဆံမှုမျိုး မျှော်လင့်နိုင်သနည်း။

^၁၄ ဤအာမခံချက်သည် တမန်တော် ၁၇:၃၁ ၌ဖတ်ရသည့်အချက်နှင့် ဆီလျော်လှသည်တကား။ ထိုကျမ်းချက်တွင် သားတော်သည် “တစ်လောကလုံးကို ဖြောင့်မတ်ခြင်းတရားအတိုင်း စီရင်ဆုံးဖြတ်တော်မူမည်” ဟု ပေါလုကလည်း အာမခံထားသည်။ ဤစကားက ကိုယ်တော်၏စီရင်ချက်သည် တင်းမာခက်ထန်၍ အကြင်နာတရားကင်းမဲ့သည်ဟု ဖေါ်ညွှန်းခြင်းမဟုတ်သည်မှာ သေချာသည်။ ဖြောင့်မတ်တရားသောစီရင်ဆုံးဖြတ်ချက်ဆိုရာဝယ် တရားသဖြင့် အပြစ်ပေးရာတွင် ကရုဏာတရားနှင့် နားလည်မှုကို ရှေ့ထား၍ သက်ညှာထောက်ထားခြင်းလည်း ပါဝင်သည်။ အောက်ပါအချက်ကို မျက်စိမလျှံပါနှင့်။ ယေရှုသည် ယခုအခါ ကောင်းကင်ဘုံ၌ ရှိတော်မူစေကာမူ ကိုယ်တော်သည် လူသားဖြစ်ခဲ့ဖူးသဖြင့် စာနာသက်ဝင်တတ်တော်မူသည်။ ဟေဗြဲ ၄:၁၅၊ ၁၆ ၌ ယေရှုသည် ယဇ်ပုရောဟိတ်မင်းဖြစ်ကြောင်း ဖေါ်ပြရာတွင် ဤအချက်ကို ပေါလုအကျဉ်းမျှထည့်သွင်းရေးသားထားသည်။

၁၅။ လူသားတရားသူကြီးနှင့် ယေရှု မည်သို့ ခြားနားသနည်း။

^၁၅ ဟေဗြဲ ၄:၁၄၊ ၁၆ ကိုဖတ်စဉ်တွင် တရားသူကြီးမင်းအဖြစ် ယေရှုစီရင်မည့်အတွက် ခံစားရသော စိတ်သက်သာမှုအကြောင်းကို စဉ်းစားကြည့်ပါ။ “ငါတို့ယဇ်ပုရောဟိတ်မင်း [နှင့်တရားသူကြီးမင်း] သည် ငါတို့ခံရသော ဆင်းရဲဒုက္ခများကြောင့် မကြင်နာနိုင်သောသူမဟုတ်။ ငါတို့ခံရသည်နည်းတူ၊ အမျိုးမျိုးသော စုံစမ်းနှောင့်ရှက်ခြင်းတို့ကို ခံဘူးသောသူ ဖြစ်တော်မူ၏။ သို့ရာတွင် ဒုစရိုက်အပြစ်နှင့် ကင်းလွတ်တော်မူ၏။ ထိုကြောင့် ငါတို့သည် သနားခြင်းကရုဏာကိုလည်းကောင်း၊ တော်လျော်သော မစခြင်းကျေးဇူးတော်ကိုလည်းကောင်း ခံရမည်အကြောင်း ရဲရင့်သောစိတ်နှင့် ကျေးဇူးပလ္လင်တော်သို့ တိုးဝင်ချဉ်းကပ်ကြကုန်အံ့။” ယခုခေတ် တရားရုံးတွင် တရားသူကြီးအဖွဲ့ရှေ့ စီရင်ခံရခြင်းသည် များသောအားဖြင့် ကြောက်လန့်စရာဖြစ်တတ်သော်လည်း တရားသူကြီးမင်း ခရစ်တော်ကိစ္စ၌မူကား ကျွန်ုပ်တို့သည် ‘ကရုဏာတော်နှင့် မခံစားထိုက်သော ကျေးဇူးတော်ကိုခံလျက် သင့်တော်သောအချိန်၌ မစခြင်းကျေးဇူးတော်ကို ခံရခြင်းငှာ ကျေးဇူးပလ္လင်တော်သို့ ရဲရင့်စွာချဉ်းကပ်’ နိုင်ကြသည်။ သို့သော် အချိန်ကာလနှင့်ပတ်သက်၍ အသင့်အနေဖြင့် ‘ဖြောင့်မတ်ခြင်းတရားအတိုင်း ယေရှု ဘယ်တော့တရားစီရင်မှာလဲ” ဟုမေးစရာအကြောင်းရှိပေသည်။

စီရင်ဆုံးဖြတ်မည့် “နေ့”—မည်သည့်အချိန်နည်း

၁၆၊ ၁၇။ ယခုအခါ ကောင်းကင်ဘုံမှ စီရင်ဆုံးဖြတ်လျက်နေသည်ဟု အဘယ်သို့သိရသနည်း။

^၁၆ ဘုရားသခင်သည် ခန့်ထားတော်မူသော တရားသူကြီးမင်းအားဖြင့် လောကကိုတရားစီရင်မည့် ‘နေ့ကို ချိန်းချက်တော်မူပြီ’ ဟု ပေါလုပြောကြားခဲ့သည်ကို သတိရပါ။ ထိုတရားစီရင်ရာ “နေ့” ကို ငံ့လင့်လျက်နေစဉ် ယေရှုသည် ယနေ့ အရေးကြီးသောစီရင်ဆုံးဖြတ်ရာလုပ်ငန်းတစ်ရပ်ကို လုပ်ဆောင်လျက်နေသည်။ မှန်ပေသည်။ ယခုလောလောဆယ်အချိန်၌ပင် ထိုသို့ပြုနေတော်မူ၏။ အဘယ်ကြောင့်ထိုသို့ပြောနိုင်သနည်း။ ယေရှုသည် အဖမ်းခံရ၍ မတရားသေဒဏ်စီရင်ခံရချိန်မတိုင်မီလေးတွင် ကျွန်ုပ်တို့ခေတ်ပါအကြုံးဝင်သော သမိုင်းဝင်ပရောဖက်ပြုချက်တစ်ခု ပေးတော်မူခဲ့၏။ ယင်းကိုမဿဲ အခန်းကြီး ၂၄ တွင်တွေ့ရသည်။ ‘ဤစနစ်၏ဆုံးခန်း’ ဟုခေါ်သော ဤကာလကို မှတ်သားသည့် ကမ္ဘာ့ဖြစ်ရပ်များအကြောင်း ယေရှုဖေါ်ပြတော်မူ၏။ ပထမကမ္ဘာစစ်ပွဲမှစ၍ ဆက်တိုက်ဖြစ်ပျက်လာခဲ့သည့် စစ်ပွဲများ၊ အစာရှားပါးမှုများ၊ ငလျင်များနှင့် အခြားအခြားသောဒုက္ခဆင်းရဲမှုများက ယေရှု၏ပရောဖက်ပြုချက်ယခုပြည့်စုံလျက်ရှိသည်။ (မဿဲ ၂၄:၃-၁၄) ယေဟောဝါသက်သေများသည် သမ္မာကျမ်းစာ ဤအကြောင်းကို ဆယ်စုနှစ်များစွာ ရှင်းပြလာခဲ့သည်။ မတရားသော ဤစနစ်ကြီး၏ နောက်ဆုံးနေ့ရက်များအတွင်း ရောက်နေကြောင်း မည်သို့သိရခြင်းနှင့်ပတ်သက်၍ သက်သေသာဓကပို၍လိုလားပါက ထိုသာဓကများကိုယေဟောဝါသက်သေများတင်ပြနိုင်ပါလိမ့်မည်။

^၁၇ သို့သော်နောက်ဆုံးနေ့ရက်နှင့်ပတ်သက်သော ယေရှု၏ ပရောဖက်ပြုချက်၏ တစ်စိတ်တစ်ဒေသဖြစ်သော မဿဲအခန်းကြီး ၂၅ ၏ဒုတိယအပိုင်းကို ဆန်းစစ်ကြည့်ပါ။ မဿဲ ၂၅:၃၁၊ ၃၂ သည် ကျွန်ုပ်တို့ခေတ်တွင်ပြည့်စုံလျက်ရှိသည်။ “လူသားသည် မိမိဘုန်းအာနုဘော်ကိုဆောင်လျက် သန့်ရှင်းသော ကောင်းကင်တမန်များအခြံအရံတို့နှင့်တကွ ကြွလာတော်မူသောအခါ [ကောင်းကင်ဘုံရှိ] ဘုန်းရှိသောပလ္လင်တော်ပေါ်မှာထိုင်၍ ရှေ့တော်၌ လူမျိုးအပေါင်းတို့ကို စုဝေးစေသဖြင့် သိုးထိန်းသည် သိုးနှင့်ဆိတ်တို့ကို တစ်ခြားစီခွဲထားသကဲ့သို့ လူအပေါင်းတို့ကို အသီးအခြားခွဲ” တော်မူမည်။ ယခု ယေရှု၏ခွဲခြားခြင်း သို့မဟုတ်တရားစီရင်ခြင်း လုပ်ငန်းတော်၏အကျိုးရလဒ်အကြောင်း ဖေါ်ပြသောအပိုင်းကို ဆက်ကြည့်လိုက်ပါ။ အခန်းငယ် ၄၆ ၌ ဤသို့ဆို၏။ “ထိုသူတို့ [ဆိတ်နှင့်တူသည်ဟု စီရင်ခြင်းခံရသောသူများ] သည် ထာဝရအပြစ်ဒဏ်ခံရာသို့လည်းကောင်း၊ ဖြောင့်မတ်သောသူတို့ [သိုးများ] မူကား ထာဝရအသက်ရှင်ရာသို့လည်းကောင်း သွားရကြလတံ့။”

၁၈။ ယခုလက်ရှိတရားစီရင်ခြင်းက အဘယ်အရာသို့ပို့ဆောင်သနည်း။

^၁၈ ထိုကြောင့် ကျွန်ုပ်တို့သည် အရေးအကြီးဆုံးစီရင်ဆုံးဖြတ်ရာကာလ၌ အသက်ရှင်နေကြသည်။ ယနေ့ ‘ဘုရားသခင်အား ရှာဖွေ၍ တကယ်တွေ့ရှိ’ သူတို့သည် လက်ရှိစနစ်၏ အဆုံး ကို ကပ်ကျော်၍ တစ်ဆက်တည်းလိုက်ပါလာမည့် ကမ္ဘာသစ်အတွင်းဝင်ရောက်ခွင့်ရှိသော “သိုးများ” အဖြစ် ဆုံးဖြတ်ခြင်းခံရကြမည်။ ထိုနောက် ၂ ပေတရု ၃:၁၃ အကောင်အထည်ပေါ်လာပေမည်။ “ဖြောင့်မတ်ခြင်းတရားတည်နေရာ မိုးကောင်းကင်သစ်နှင့် မြေကြီးသစ်ကို ငါတို့သည် ကတိတော်နှင့်အညီ မျှော်လင့်ကြ၏။” ထိုကာလကား တမန်တော် ၁၇:၃၁ မှပေါလု၏စကားအပြည့်အဝပြည့်စုံမည့် “နေ့” ဖြစ်လိမ့်မည်။ ထိုကာလ၌ တစ်လောကလုံးသည် ဖြောင့်မတ်ခြင်းတရားနှင့် အညီ စီရင်ဆုံးဖြတ်ခြင်းခံရပေမည်။

၁၉၊ ၂၀။ လာလတံ့သော တရားစီရင်ရာနေ့သည် မည်သူတို့ကို ထိခိုက်မည်နည်း။

^၁၉ ထိုတရားစီရင်ရာနေ့သည် ကမ္ဘာသစ်အတွင်းဝင်ထိုက်သည်ဟု စီရင်ဆုံးဖြတ်ခြင်းခံရပြီးသော ကပ်ကျော်သူ “သိုးများ” သာ အကြုံးဝင်သက်ဆိုင်သည် မဟုတ်ပါ။ ခမည်းတော်သည် တရားစီရင်ခြင်းအခွင့်ကို မိမိအားအပ်ပေးကြောင်း မိန့်ဆိုပြီးနောက် ယေရှုက လာလတံ့သော ရှင်ပြန်ထမြောက်ခြင်းအကြောင်း မိန့်တော်မူ၏။ တမန်တော် ၁၀:၄၂ တွင်လည်း တမန်တော်ပေါလုက ယေရှုခရစ်သည် “အသက်ရှင်သောသူတို့နှင့် သေသောသူတို့ကို တရားစီရင်သောသခင်ဖြစ်စေခြင်းငှာ ဘုရားသခင်ခန့်ထားတော်မူ” သော အရှင်ဖြစ်ကြောင်းဆိုထားသည်။

^၂၀ သို့ဖြစ်သောကြောင့် ယေရှုခရစ်အားဖြင့် ‘တစ်လောကလုံးကို ဖြောင့်မတ်ခြင်းတရားအတိုင်း ဘုရားသခင်စီရင်ဆုံးဖြတ်” မည်ဟု တမန်တော် ၁၇:၃၁ ၌ ဖေါ်ပြထားသော ‘ချိန်းချက်ရာနေ့’ သည် သေလွန်သူများထမြောက်ရာကာလ ဖြစ်လိမ့်မည်။ များသောအားဖြင့် အကြီးအကျယ် မတရားမှုဖြစ်စေတတ်သော သေခြင်းကို တန်ခိုးတော်ဖြင့် ဘုရားသခင်နှိမ်နင်းတော်မူသည်ကို ကိုယ်တိုင်ကိုယ်ကျ မြင်တွေ့ရသောအခါ မည်မျှရွှင်လန်း ဝမ်းမြောက်စရာ ဖြစ်မည်တကား။ ယေရှုကိုယ်တော်တိုင်ကဲ့သို့ လူအချို့တို့သည် အစိုးရများနှင့် ကျူးကျော်လာသော ရန်သူများကြောင့် မတရားကွပ်မျက်ခံရကြသည်။ အခြားသူတို့မှာ တိုနေဒိုးမုန်တိုင်း၊ ငလျင်၊ မတော်တဆမီးလောင်မှုများနှင့် အလားတူ ဘေးဒုက္ခများကဲ့သို့သော ကြိုတင်မှန်းဆ၍မရနိုင်သော အဖြစ်အပျက်များကြောင့် အသက်ဆုံးခဲ့ရကြသည်။—ဒေသနာ ၉:၁၁။

အတိတ်က မတရားခြင်းများ ပပျောက်

၂၁။ ကမ္ဘာသစ်တွင် အတိတ်က မတရား-ခြင်းများကို အဘယ်သို့နှိမ်နင်းပစ်မည်နည်း။

^၂၁ ကျွန်ုပ်တို့ချစ်ခင်ရသူများ ပြန်အသက်ရှင်လာသည်ကို တွေ့နိုင်မည့်အရေးကို စိတ်ကူးကြည့်ပါလေ။ ထိုအခါ အများသောသူတို့မှာ ‘ဘုရားသခင်အား ရှာဖွေ၍ တကယ်တွေ့ရှိ’ နိုင်မည့် အခွင့်အရေးကို ပထမဆုံးအကြိမ်ရရှိကြမည်ဖြစ်ပြီး “သိုးများ” အား ဆုချမည့် “ထာဝရအသက်” ကို ပိုင်ဆိုင်မည့် မျှော်လင့်ချက်လည်း ရှိလာကြမည်။ ထမြောက်လာကြသူအချို့နှင့် ဤမတရားသောစနစ်ကို ကပ်ကျော်သူတို့သည် ဝမ်းတွင်းပါအင်္ဂါချို့ယွင်းခြင်း၊ မျက်မမြင်ခြင်း၊ ဆွံ့အနားမကြားခြင်း စသော သိသာထင်ရှားသည့် မတရားခြင်းများ၏ သားကောင်များဖြစ်ခဲ့ကြရှာသည်။ ‘ဖြောင့်မတ်ခြင်းတရားတည်ရာ မြေကြီးသစ်တွင် ထိုအရာများ ဆက်၍ရှိသင့်ပါသလော။ ယေဟောဝါသည် ဟေရှာယကို အသုံးပြု၍ လာလတံ့သော တရားစီရင်ရာနေ့အတွင်း ကြီးကျယ်ခမ်းနားစွာ ပကတိအတိုင်း ပြည့်စုံလာမည့် ပရောဖက်ပြုချက်အမျိုးမျိုးကိုတင်ပြတော်မူခဲ့၏။ ကျွန်ုပ်တို့မျှော်လင့်နိုင်သော အရာများအကြောင်းကို ဂရုပြုမှတ်သားပါလေ။ “ထိုအခါ မျက်စိကန်းသောသူတို့သည် မျက်စိပွင့်လင်းကြလိမ့်မည်။ နားပင်းသောသူတို့သည် နားပင်းခြင်းနှင့် လွတ်ကြလိမ့်မည်။ ခြေဆွံ့သောသူတို့သည် ဒရယ်ကဲ့သို့ ခုန်ကြလိမ့်မည်။ စကားအသောသူတို့သည် သီချင်းဆိုကြလိမ့်မည်။”—ဟေရှာယ ၃၅:၅၊ ၆။

၂၂။ ဟေရှာယ အခန်းကြီး ၆၅ သည် တရားခြင်းနှင့်ပတ်သက်၍ အဘယ်ကြောင့် အလွန်အားတက်စရာဖြစ်သနည်း။

^၂၂ ယခုအချိန်တွင် စိတ်မချမ်းသာစရာအကြီးအကျယ် ဖြစ်ပေါ်စေသော အခြားမတရားခြင်းများကော မည်သို့ဖြစ်သွားမည်နည်း။ ဟေရှာယ အခန်းကြီး ၆၅:၁၇ နှင့် ၂ ပေတရု ၃:၁၃ တို့ကို နှိုင်းယှဉ်ကြည့်လိုက်လျှင် ဤအခန်းကြီးသည်လည်း “ကောင်းကင်သစ်နှင့် မြေကြီးသစ်” တည်းဟူသော ဖြောင့်မတ်သည့် စနစ်သစ်ကိုပင် ညွှန်ပြလျက်ရှိကြောင်း တွေ့ရသည်။ သို့တစေ ငြိမ်သက်ခြင်းနှင့် တရားခြင်းကို ဖျက်လိုဖျက်ဆီးပြုကြမည့် ယုတ်မာသူအနည်းအကျဉ်းကို ဘာက ဟန့်တားမည်နည်း။ ဟေရှာယ အခန်းကြီး ၆၅ ကို အနည်းငယ်ဆက်ဖတ်လိုက်သော် ပြဿနာဟု ထင်ရသော ဤအချက်ကို အဘယ်သို့ဖြေရှင်းပစ်မည်အကြောင်း တွေ့ရမည်။

၂၃။ အချို့ပုဂ္ဂိုလ်များအတွက် တရားစီရင်ရာနေ့သည် အဘယ်အကျိုးရလဒ်ဖြစ်ပေါ်လာနိုင်ဖွယ်ရှိသနည်း။

^၂၃ ကာလအတန်ကြာမည့် ဤတရားစီရင်ရာနေ့အတောအတွင်း ယေရှုသည် လူတို့အား ထာဝရအသက်ရထိုက်မရထိုက် တစ်ဦးချင်းကို စီရင်သည့် လုပ်ငန်းကို ဆက်၍ လုပ်ဆောင်သွားတော်မူမည်။ အချို့အရည်အချင်းပြည့်မည်မဟုတ်ပေ။ ဘုရားသခင်အား ရှာဖွေရန် အချိန်အလုံအလောက်ပေးပြီးနောက် “အနှစ်တစ်ရာ” လည်းဖြစ်ချင်ဖြစ်မည်။ အချို့သူတို့သည် ဖြောင့်မတ်ခြင်းတရား ကျင့်ရန် ငြင်းပယ်ကြမည်။ ဟေရှာယ ၆၅:၂၀ ၌ တွေ့မြင်ရသည့်အတိုင်း ထိုသူတို့သည် ကမ္ဘာသစ်တွင် အသက်ရှင်ခွင့်တရားသဖြင့် ဆုံးရှုံးပေမည်။ “အပြစ်ရှိသောသူသည် အသက်တစ်ရာရှိလျက်သေလျှင် ကျိန်ခြင်းကိုခံရသောသူဟူ၍ မှတ်ရ၏။” ထိုသို့အသက်ရှင်ခွင့်မရထိုက်ကြောင်း စီရင်ခံရသည့်သူတို့မှာ အနည်းအကျဉ်းမျှသာဖြစ်မည်။ ကျွန်ုပ်တို့နှင့်တကွ အခြားသူအများအပြားတို့သည် ဖြောင့်မတ်ခြင်းတရား ဆည်းပူးသင်ကြားပြီး လိုက်နာကျင့်ကြံရာတွင် နှစ်ထောင်းအားရဖြစ်ရန် မျှော်လင့်စရာအကြောင်းများရှိသည်။—ဟေရှာယ ၂၆:၉။

၂၄။ စီးပွားရေးမတရားခြင်းနှင့် စပ်လျဉ်း၍ အခြေအနေ မည်သို့ရှိမည်နည်း။

^၂၄ မည်သည့်မတရားခြင်းမျှ ဆက်၍မရှိတော့ဟူ၍ ဆိုလိုသလော။ စီးပွားရေးမတရားခြင်းများပင်မရှိတော့ဟုဆိုလိုသလော။ မှန်ကန်လှသည်။ ဟေရှာယ ၆၅:၂၁-၂၃ က ဤအချက်ကိုထောက်ပြထားသည်။ “ထိုသူတို့သည် ကိုယ်ဆောက်သောအိမ်၌နေကြလိမ့်မည်။ ကိုယ်စိုက်သော စပျစ်ဥယျာဉ်အသီးကို စားကြလိမ့်မည်။ သူတို့သည် အိမ်ကိုဆောက်၍ အခြားသောသူနေရမည်မဟုတ်။ သူတို့သည် စပျစ်ဥယျာဉ်ကို စိုက်၍ အခြားသောသူ စားရမည်မဟုတ်။ ငါ၏လူတို့ အသက်သည် သစ်ပင်၏အသက်ကဲ့သို့ဖြစ်၍ သူတို့သည် ကိုယ်ပြုစုသောအရာကို ကြာမြင့်စွာ သုံးဆောင်ရကြလိမ့်မည်။ ငါရွေးကောက်သောသူတို့သည် အချည်းနှီးမလုပ်မဆောင်ရကြ။ အသက်တိုသောသားကို မဖွားမမြင်ရကြ။ ကိုယ်တိုင်မှစ၍ အမျိုးအနွယ်တို့သည် [ယေဟောဝါ၊ NW] ပေးတော်မူသော ကောင်းချီးမင်္ဂလာကို ခံရသောသူ ဖြစ်ကြလိမ့်မည်။” ယနေ့နှင့် မည်မျှခြားနားလှသည်တကား။ မည်မျှကြီးမားလှသည့် ကောင်းချီးမင်္ဂလာပါတကား။

၂၅။ ဘုရားသခင် ခန့်အပ်သော တရားသူကြီးမင်းမှ သက်ရောက်မည့် တရားခြင်းနှင့်ပတ်သက်၍ သင့်မျှော်လင့်ချက်နှင့် အဓိဌာန်ကားအဘယ်နည်း။

^၂၅ ထိုကြောင့် အဓွန့်ရှည်တည်တံ့သည့် တရားခြင်းကို တောင့်တသူအားလုံး အားယူနိုင်ကြသည်။ ဧကန်မုချ ဆိုက်ရောက်လာမည်။ မကြာတော့ပါ။ ယခုလက်ရှိ တရားစီရင်ရာကာလမှ ကျန်ရှိသော အချိန်တိုကလေးအတောအတွင်း ယခုအချိန်သည် ယေဟောဝါသက်သေများနှင့် ပူးပေါင်း၍ ဘုရားသခင်အား ရှာဖွေ၍ ကိုယ်တော်အား တကယ်တွေ့ရှိအောင် လုပ်ရမည့် အချိန်ဖြစ်သည်။ ဤသို့ပြုလုပ်ပါက ထာဝရအကျိုးကျေးဇူးရရှိပေလိမ့်မည်။

[စာမျက်နှာ ၁၆ ပါ ရုပ်ပုံ]

ပြန်လည်စစ်ဆေးရန် မေးခွန်းများ

▫ ဘုရားသခင်၏ တရားခြင်းစံချိန်နှင့်စပ်လျဉ်း၍ အဘယ်သက်သေသာဓကများရှိသနည်း။

▫ လာလတံ့သော တရားစီရင်ရာနေ့တွင် ယေရှုအဘယ်သို့ပါဝင်ပတ်သက်သနည်း။

▫ ဘုရားသခင့် တရားစီရင်ခြင်းနှင့်ပတ်သက်၍ ကျွန်ုပ်တို့၏ ခေတ်ကာလသည် အဘယ်ကြောင့် အရေးကြီးသော အခါသမယဖြစ်သနည်း။

▫ ကမ္ဘာသစ်တွင် အတိတ်က မတရားခြင်းများ အဘယ်သို့ပြင်ဆင်တည့်မတ် ခံရမည်နည်း။