ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
စက်တင်ဘာ ၂-၈
ကျမ်းစာထဲက အဖိုးတန်ဘဏ္ဍာများ | ဟီဘရူး ၇-၈
“မေလခိဇေဒက်လို ပုရောဟိတ်မျိုး ထာဝစဉ် ဖြစ်ရလိမ့်မယ်”
it-2 ၃၆၆
မေလခိဇေဒက်
ရှေးခေတ် ဆာလင်မြို့ရဲ့ ဘုရင် ဖြစ်ပြီး ‘အမြင့်ဆုံး ဘုရားသခင် ယေဟောဝါရဲ့ ပုရောဟိတ်’ ဖြစ်တယ်။ (က ၁၄:၁၈၊ ၂၂) ကျမ်းစာမှာ ဦးဆုံး ဖော်ပြခံရတဲ့ ပုရောဟိတ် ဖြစ်ပြီး ဘီစီ ၁၉၃၃ မတိုင်ခင် တစ်ချိန်ချိန်မှာ တာဝန် ထမ်းဆောင်ခဲ့တယ်။ “ငြိမ်သက်ခြင်း” လို့ အဓိပ္ပာယ်ရတဲ့ ဆာလင်မြို့ရဲ့ မင်း ဖြစ်တာကြောင့် “ငြိမ်သက်ခြင်းမင်း” ဆိုပြီး တမန်တော် ပေါလု ဖော်ပြခဲ့တယ်။ မေလခိဇေဒက်ဆိုတဲ့ နာမည်ကို အခြေခံပြီး “ဖြောင့်မတ်ခြင်းမင်း” လို့လည်း ခေါ်ခဲ့တယ်။ (ဟီ ၇:၁၊ ၂) နောက်ပိုင်း ဂျေရုဆလင်မြို့ကို ရှေးခေတ် ဆာလင်မြို့နေရာမှာ တည်ခဲ့တယ်။ ဆာလင်ဆိုတဲ့ နာမည်ဟာ ဂျေရုဆလင်ဆိုတဲ့ နာမည်မှာ ပါနေပြီး ဂျေရုဆလင်မြို့ကို ဆာလင်မြို့ဆိုပြီး တစ်ခါတလေ ဖော်ပြလေ့ရှိတယ်။—ဆ ၇၆:၂။
အာဗြံ (အာဗြဟံ) က ခေဒေါရလောမာနဲ့ မဟာမိတ်ဘုရင်တွေကို အနိုင်ရပြီးနောက် “ဘုရင့်ချိုင့်ဝှမ်း” လို့ ခေါ်တဲ့ ရှာဝေချိုင့်ဝှမ်းကို လာတယ်။ မေလခိဇေဒက်က “မုန့်နဲ့ ဝိုင်ကို ယူလာ” ပြီး “မိုးမြေကို ဖန်ဆင်းတဲ့အရှင်၊ အမြင့်ဆုံး ဘုရားသခင်က အာဗြံကို ကောင်းချီးပေးပါစေ။ ဖိနှိပ်သူတွေကို မင်းရဲ့ လက်ထဲ အပ်တဲ့ အမြင့်ဆုံး ဘုရားသခင်ကို ချီးမွမ်းကြပါစေ” ဆိုပြီး အာဗြဟံအတွက် ဆုမွန်ကောင်း တောင်းပေးတယ်။ အာဗြဟံလည်း မဟာမိတ်ဘုရင်တွေကို အနိုင်ရတုန်းက ရခဲ့တဲ့ “အကောင်းဆုံး တိုက်ရာပါ ဥစ္စာတွေထဲက ဆယ်ဖို့တစ်ဖို့” ကို ဘုရင်နဲ့ ပုရောဟိတ် ဖြစ်တဲ့ မေလခိဇေဒက်ကို ပေးတယ်။—က ၁၄:၁၇-၂၀။ ဟီ ၇:၄။
it-2 ၃၆၇ ပိုဒ်. ၄
မေလခိဇေဒက်
မေလခိဇေဒက်ရဲ့ ‘မွေးဖွားချိန်၊ ကွယ်လွန်ချိန်ကို မသိရဘူး’ ဆိုတာ ဘယ်လိုနည်းအားဖြင့် မှန်ကန်သလဲ
မေလခိဇေဒက်နဲ့ပတ်သက်ပြီး ထူးခြားချက်တစ်ချက်ကို ပေါလု ဒီလိုဖော်ပြခဲ့တယ်– “သူ့မိဘ ဘယ်သူဘယ်ဝါမှန်း မသိရသလို သူ့ရဲ့ ဆွေစဉ်မျိုးဆက်စာရင်းလည်း မရှိဘူး။ သူမွေးဖွားချိန်၊ ကွယ်လွန်ချိန်ကိုလည်း မသိရဘူး။ ဒါပေမဲ့ ဘုရားသခင်ရဲ့ သားနဲ့တူတဲ့ လူအဖြစ် သူဟာ အမြဲပဲ ပုရောဟိတ် ဖြစ်နေတယ်။” (ဟီ ၇:၃) မေလခိဇေဒက်ဟာ တခြားလူတွေလိုပဲ မွေးဖွားလာတယ်၊ ကွယ်လွန်သွားတယ်။ ဒါပေမဲ့ သူ့မိဘနာမည်တွေ၊ ဆွေစဉ်မျိုးဆက်တွေကို မသိရဘူး။ ကျမ်းစာမှာ သူ့မွေးဖွားချိန်၊ ကွယ်လွန်ချိန်အကြောင်း မပါဘူး။ ဒါကြောင့် မေလခိဇေဒက်ဟာ ထာဝရပုရောဟိတ်မင်း ယေရှုခရစ်ရဲ့ ရှေ့ပြေးအရိပ်အဖြစ် တကယ့်ကို သင့်လျော်ပါတယ်။ မေလခိဇေဒက်ဟာ ပုရောဟိတ်တာဝန်ကို တစ်ယောက်ယောက်ဆီက ဆက်ခံတယ်၊ သူ့ကို ဆက်ခံတဲ့သူရှိတယ် ဆိုတဲ့ မှတ်တမ်း မရှိဘူး။ အဲဒီအတိုင်းပဲ ခရစ်တော်လို ပုရောဟိတ်မင်း အရင်က မရှိခဲ့သလို နောင်လည်း ရှိမှာ မဟုတ်ဘူးလို့ ကျမ်းစာမှာ ဖော်ပြထားတယ်။ ဒါ့အပြင် ယေရှုဟာ ယုဒအနွယ်၊ ဒါဝိဒ်မင်းမျိုးကနေ မွေးဖွားလာပေမဲ့ ယုဒမျိုးရိုးထဲမှာ ပုရောဟိတ်တာဝန် ထမ်းဆောင်ခဲ့တဲ့သူ မရှိခဲ့ဘူး။ မျိုးရိုးကြောင့် ပုရောဟိတ်နဲ့ ဘုရင်အဖြစ် ခန့်အပ်ခံရတာ မဟုတ်ဘူး။ ယေဟောဝါရဲ့ ကျိန်ဆိုချက်ကြောင့်သာ ဖြစ်တယ်။
it-2 ၃၆၆
မေလခိဇေဒက်
ခရစ်တော်ရဲ့ ပုရောဟိတ်တာဝန်။ မေရှိယနဲ့ဆိုင်တဲ့ ထင်ရှားတဲ့ ပရောဖက်ပြုချက်တစ်ခုမှာ ယေဟောဝါက “မင်းဟာ မေလခိဇေဒက်လို ပုရောဟိတ်မျိုး ထာဝစဉ် ဖြစ်ရလိမ့်မယ်” ဆိုပြီး ဒါဝိဒ်ရဲ့ “သခင်” ကို ကျိန်ဆိုထားတယ်။ (ဆ ၁၁၀:၁၊ ၄) ဒီဆာလံကျမ်းကြောင့် ကတိထားရာ မေရှိယဟာ ပုရောဟိတ်နဲ့ ဘုရင်အဖြစ် အမှုဆောင်မယ့်သူ ဖြစ်ရမယ်လို့ ဟီဘရူးတွေ မျှော်လင့်ခဲ့ကြတယ်။ ဟီဘရူးတွေဆီ ရေးတဲ့ စာမှာ တမန်တော် ပေါလုက “မေလခိဇေဒက်လို ထာဝရပုရောဟိတ်မင်း ဖြစ်လာတဲ့ ယေရှု” အကြောင်း ဖော်ပြခြင်းအားဖြင့် ကတိထားရာ မေရှိယ ဘယ်သူဘယ်ဝါ ဖြစ်ကြောင်း ရှင်းရှင်းလင်းလင်း သိစေခဲ့တယ်။—ဟီ ၆:၂၀။ ၅:၁၀။
it-1 ၁၁၁၃ ပိုဒ်. ၄-၅
ယေရှုခရစ်ရဲ့ ပုရောဟိတ်မင်းတာဝန်။ ယေရှုခရစ်ဟာ ရှင်ပြန်ထမြောက်ပြီး ကောင်းကင်ကို တက်သွားချိန်ကစပြီး “မေလခိဇေဒက်လို ထာဝရ ပုရောဟိတ်မင်း ဖြစ်လာ” ကြောင်း ဟီဘရူးကျမ်းက ထောက်ပြတယ်။ (ဟီ ၆:၂၀။ ၇:၁၇၊ ၂၁) ခရစ်တော်ရဲ့ ပုရောဟိတ်တာဝန်ဟာ အာရုန်အမျိုး ပုရောဟိတ်တာဝန်ထက် သာလွန်မြင့်မြတ်ကြောင်း ကျမ်းရေးသူ ဒီလိုဖော်ပြခဲ့တယ်– မေလခိဇေဒက်ဟာ မျိုးရိုးကြောင့် မဟုတ်ဘဲ အမြင့်ဆုံး ဘုရားသခင်ရဲ့ ခန့်အပ်မှုကြောင့် ဘုရင်နဲ့ ပုရောဟိတ်အဖြစ် အမှုဆောင်ခဲ့တယ်။ ခရစ်တော်ယေရှုဟာ လေဝိအနွယ် မဟုတ်ဘဲ ယုဒအနွယ်၊ ဒါဝိဒ်မင်းမျိုးကနေ မွေးဖွားလာခဲ့တယ်။ အာရုန်အမျိုးကနေ ဆင်းသက်လာလို့ မဟုတ်ဘဲ မေလခိဇေဒက်တုန်းကလိုပဲ ဘုရားသခင် တိုက်ရိုက် ခန့်အပ်လို့ ပုရောဟိတ်တာဝန် ရခဲ့တာ ဖြစ်တယ်။ (ဟီ ၅:၁၀) “ယေဟောဝါက ‘မင်းဟာ မေလခိဇေဒက်လို ပုရောဟိတ်မျိုး ထာဝစဉ် ဖြစ်ရလိမ့်မယ်’ လို့ ကျိန်ဆိုထားတယ်။ ဘုရားက စိတ်ပြောင်းလဲမှာ မဟုတ်ဘူး” ဆိုပြီး ဆာလံ ၁၁၀:၄ မှာ မှတ်တမ်းတင်ထားတဲ့ ကတိတော်ကြောင့် ခရစ်တော်ဟာ ကောင်းကင်မှာ ဘုရင်နဲ့ ပုရောဟိတ်အဖြစ် အမှုဆောင်ခွင့် ရရှိတယ်။ ဒါ့အပြင် ခရစ်တော်ဟာ ဒါဝိဒ်မင်းမျိုးကနေ ဆင်းသက်လာလို့ နိုင်ငံတော်အခွင့်အာဏာကိုလည်း ပိုင်ဆိုင်ထားတယ်။ ဒီအကြောင်းရင်းကြောင့် ဒါဝိဒ်နဲ့ ဖွဲ့ထားတဲ့ ပဋိညာဉ်မှာ ဘုရား ကတိပြုထားတဲ့အတိုင်း ခရစ်တော်ဟာ ဘုရင်အရိုက်အရာကို ဆက်ခံသူ ဖြစ်လာတယ်။ (၂ရှ ၇:၁၁-၁၆) မေလခိဇေဒက်လိုပဲ ဘုရင်နဲ့ ပုရောဟိတ် ဖြစ်လာတယ်။
ခရစ်တော်ရဲ့ ပုရောဟိတ်မင်းတာဝန်ဟာ သာလွန်မြင့်မြတ်ကြောင်း ဖော်ပြတဲ့ နောက်တစ်ချက် ရှိသေးတယ်။ ရှာလင်မင်းကြီးကို အာဗြဟံ ဆယ်ဖို့တစ်ဖို့ ပေးတုန်းက လေဝိအမျိုးသားတွေဟာ ဘိုးဘေးအာဗြဟံရဲ့ မမွေးသေးတဲ့ သားစဉ်မြေးဆက်တွေ ဖြစ်နေတယ်။ ဒီတော့ ဂျူးပုရောဟိတ်တွေရဲ့ ဘိုးဘေး ဖြစ်တဲ့ လေဝိအမျိုးသားတွေကတောင် မေလခိဇေဒက်ကို ဆယ်ဖို့တစ်ဖို့ ပေးခဲ့ရတယ်၊ မေလခိဇေဒက်ကလည်း လေဝိအမျိုးသားတွေကို ဆုမွန်ကောင်း တောင်းပေးခဲ့တယ် ဆိုတဲ့ သဘောပဲ။ ပိုကြီးမြတ်သူက နိမ့်ကျသူကို ဆုမွန်ကောင်း တောင်းပေးတာ ထုံးစံပါပဲ။ (ဟီ ၇:၄-၁၀) တမန်တော် ပေါလုက မေလခိဇေဒက်နဲ့ပတ်သက်ပြီး “သူ့မိဘ ဘယ်သူဘယ်ဝါမှန်း မသိရသလို သူ့ရဲ့ ဆွေစဉ်မျိုးဆက်စာရင်းလည်း မရှိဘူး။ သူမွေးဖွားချိန်၊ ကွယ်လွန်ချိန်ကိုလည်း မသိရဘူး” ဆိုပြီး ဖော်ပြခဲ့တယ်။ အဲဒါက “မပျက်စီးနိုင်တဲ့” အဖြစ်ကို ရှင်ပြန်ထမြောက်ပြီး ဖြစ်တဲ့ ယေရှုခရစ်ရဲ့ ထာဝရပုရောဟိတ်တာဝန်ကို ပုံဆောင်တယ်။—ဟီ ၇:၃၊ ၁၅-၁၇။
ရှာဖွေလေ့လာ ဘုရားရေးရာရတနာ
ဘုရားသခင် နှစ်ခြိုက်သော ယဇ်များ
၁၁ တမန်တော်ပေါလုက “ယဇ်ပုရောဟိတ်မင်း မည်သည်ကား၊ ပူဇော်သကာ [“လက်ဆောင်များ၊” ကဘ] နှင့် ယဇ်ကို ပူဇော်စေခြင်းငှာ ခန့်ထားလျက်ရှိ . . . ၏” ဟု ဆိုသည်။ (ဟေဗြဲ ၈:၃) ပေါလုသည် ရှေးခေတ် ဣသရေလ ယဇ်ပုရောဟိတ်မင်းများ ပူဇော်ခဲ့သည့် ပူဇော်သကာများကို ‘လက်ဆောင်များ’ နှင့် “ယဇ်” များ၊ သို့မဟုတ် “အပြစ်ဖြေရာယဇ်” များ ဟူ၍ နှစ်မျိုးနှစ်စား ခွဲခြားဖော်ပြသည်ကို သတိပြုပါ။ (ဟေဗြဲ ၅:၁) လူတို့သည် ခင်မင်မှုနှင့် တန်ဖိုးထားလေးမြတ်မှုကို ဖော်ပြဖို့အတွက် သာမက မိတ်ဖွဲ့ရန်၊ မျက်နှာရရန်၊ သို့မဟုတ် လက်ခံနိုင်စရာ ဖြစ်ဖို့အတွက်လည်း လက်ဆောင်များ ပေးတတ်ကြသည်။ (ကမ္ဘာဦး ၃၂:၂၀; သု. ၁၈:၁၆) အလားတူ၊ ပညတ္တိကျမ်းတွင် ပြဋ္ဌာန်းထားသော ပူဇော်သကာများစွာကို ကိုယ်တော်၏ လက်ခံမှုနှင့် မျက်နှာသာ ရဖို့အတွက် ဘုရားသခင်အား ပေးဆက်သည့် ‘လက်ဆောင်များ’ အဖြစ် ရှုမြင်နိုင်သည်။ ပညတ်တော်ကို ကျူးလွန်ခြင်းက အလျော်ပေးဖို့ လိုအပ်ခဲ့ပြီး လျော်ကြေးပေးရန် “အပြစ်ဖြေရာယဇ်များ” ကို ပူဇော်ကြရသည်။ ပင်တကျွတ်ကျမ်း၊ အထူးသဖြင့် ထွက်မြောက်ရာ၊ ဝတ်ပြုရာနှင့် တောလည်ရာကျမ်းများတွင် ယဇ်နှင့် ပူဇော်သကာ အမျိုးမျိုးတို့ကို ဖော်ပြထားသည်။ အသေးစိတ် အချက်အလက်အားလုံးကို သဘောပေါက်၍ မှတ်မိရန်မှာ ကျွန်ုပ်တို့အတွက် တကယ့် စိန်ခေါ်ချက် ဖြစ်နိုင်သော်လည်း ယဇ်ပူဇော်နည်းအမျိုးမျိုးနှင့် ပတ်သက်၍ အဓိကအချက်အချို့ကို အလေးဂရုပြုထိုက်ပေသည်။
it-1 ၅၂၃ ပိုဒ်. ၅
ပဋိညာဉ်
ပညတ်ပဋိညာဉ် ဘယ်လို “ပျက်ပြယ်” သွားသလဲ
ပဋိညာဉ်သစ် ဖွဲ့မယ့်အကြောင်း ပရောဖက် ယေရမိကတစ်ဆင့် ဘုရား အသိပေးလိုက်တာက ပညတ်ပဋိညာဉ်ကို “ပျက်ပြယ်စေ” မယ်ဆိုတဲ့ သဘောပဲ။ (ယေ ၃၁:၃၁-၃၄။ ဟီ ၈:၁၃) ဒုက္ခသစ်တိုင်ပေါ်မှာ ခရစ်တော် အသေခံခဲ့တာကို အခြေခံပြီး အေဒီ ၃၃ မှာ ပညတ်ပဋိညာဉ်ကို ပယ်ဖျက်ခဲ့တယ်။ (ကော ၂:၁၄) ပဋိညာဉ်သစ်နဲ့ အစားထိုးခဲ့တယ်။—ဟီ ၇:၁၂။ ၉:၁၅။ တ ၂:၁-၄။
ကျမ်းစာဖတ်ရှုခြင်း
it-1 ၅၂၄ ပိုဒ်. ၃-၅
ပဋိညာဉ်သစ်
ပဋိညာဉ်သစ်ဟာ အစ္စရေးတွေ ချိုးဖောက်ခဲ့တဲ့ ပညတ်ပဋိညာဉ်နဲ့ မတူကြောင်း ဘီစီ ခုနစ်ရာစုမှာ ပရောဖက် ယေရမိကတစ်ဆင့် ယေဟောဝါ ကြိုပြောခဲ့တယ်။ (ယေ ၃၁:၃၁-၃၄) ယေရှုခရစ်က အေဒီ ၃၃၊ နိသန်လ ၁၄ ရက်၊ သူမသေဆုံးခင်ညမှာ သခင့်ညစာစားပွဲကို ကျင်းပခဲ့ပြီး မိမိရဲ့ ပူဇော်သက္ကာအားဖြင့် အတည်ပြုပေးမယ့် ပဋိညာဉ်သစ်အကြောင်း ထုတ်ပြောခဲ့တယ်။ (လု ၂၂:၂၀) ရှင်ပြန်ထမြောက်ပြီး ရက် ၅၀၊ ခမည်းတော်ဆီ ပြန်တက်ကြွသွားပြီး ၁၀ ရက်အကြာမှာ ဂျေရုဆလင်မြို့ အထက်ခန်းမှာ စုဝေးနေကြတဲ့ တပည့်တွေအပေါ် ယေရှုက ယေဟောဝါဆီက ရထားတဲ့ သန့်ရှင်းသော စွမ်းအားတော်ကို သွန်းလောင်းခဲ့တယ်။—တ ၂:၁-၄၊ ၁၇၊ ၃၃။ ၂က ၃:၆၊ ၈၊ ၉။ ဟီ ၂:၃၊ ၄။
ပဋိညာဉ်သစ်မှာ ပါဝင်သူတွေကတော့ တစ်ဖက်မှာ ယေဟောဝါ၊ နောက်တစ်ဖက်မှာတော့ စွမ်းအားတော်နဲ့ မွေးဖွားခံရပြီး ခရစ်တော်နဲ့ တစ်စိတ်တစ်ဝမ်းတည်း ဖြစ်နေတဲ့၊ ခရစ်တော်ရဲ့ အသင်းတော် ဒါမှမဟုတ် ကိုယ်ခန္ဓာအဝင် ဖြစ်လာတဲ့ “ဘုရားသခင်ရဲ့ အစ္စရေးလူမျိုး” ဖြစ်တယ်။ (ဟီ ၈:၁၀။ ၁၂:၂၂-၂၄။ ဂ ၆:၁၅၊ ၁၆။ ၃:၂၆-၂၈။ ရ ၂:၂၈၊ ၂၉) ယေရှုခရစ် သွန်းလောင်းခဲ့တဲ့ သွေး (လူသားအသက်တာကို ပူဇော်သက္ကာအဖြစ် ဆက်သခြင်း) ကြောင့် ပဋိညာဉ်သစ် စတင်အကျိုးသက်ရောက်ခဲ့တယ်။ ယေရှုက ကောင်းကင်ကို တက်ကြွပြီးတဲ့နောက် အဲဒီပူဇော်သက္ကာတန်ဖိုးကို ယေဟောဝါဆီ ဆက်သခဲ့တယ်။ (မ ၂၆:၂၈) လူတစ်ယောက်ဟာ ကောင်းကင်အသက်တာအတွက် ခေါ်တော်မူခြင်း ခံရတဲ့အခါ (ဟီ ၃:၁) ဘုရားသခင်က သူ့ကို ခရစ်တော်ရဲ့ ပူဇော်သက္ကာအပေါ် အခြေခံပြီး ပဋိညာဉ်သစ်မှာ ပါဝင်စေတယ်။ (ဆ ၅၀:၅။ ဟီ ၉:၁၄၊ ၁၅၊ ၂၆) ယေရှုခရစ်ဟာ ပဋိညာဉ်သစ်ရဲ့ ဖျန်ဖြေသူ ဖြစ်ပြီး (ဟီ ၈:၆။ ၉:၁၅) အာဗြဟံရဲ့ အဓိကမျိုးနွယ် ဖြစ်တယ်။ (ဂ ၃:၁၆) ယေရှုဟာ ပဋိညာဉ်သစ်ရဲ့ ဖျန်ဖြေသူအနေနဲ့ ပဋိညာဉ်သစ်မှာ ပါဝင်သူတွေကို အပြစ်တွေ ခွင့်လွှတ်ပေးခြင်းအားဖြင့် အာဗြဟံရဲ့ မျိုးနွယ်စစ်စစ် ဖြစ်လာဖို့ ထောက်မတယ်။ (ဟီ ၂:၁၆။ ဂ ၃:၂၉) ယေဟောဝါက သူတို့ကို ဖြောင့်မတ်သူအဖြစ် သတ်မှတ်တယ်။—ရ ၅:၁၊ ၂။ ၈:၃၃။ ဟီ ၁၀:၁၆၊ ၁၇။
စွမ်းအားတော်နဲ့ မွေးဖွားခံရတဲ့ ခရစ်တော်ရဲ့ ဘိသိက်ခံ ညီတွေဟာ ပုရောဟိတ်မင်းရဲ့ လက်အောက်မှာ “ပုရောဟိတ်အဖြစ် အမှုထမ်းမယ့် ဘုရင်တွေ” ဖြစ်လာတယ်။ (၁ပ ၂:၉။ ဗ ၅:၉၊ ၁၀။ ၂၀:၆) သူတို့က ပုရောဟိတ်တာဝန်၊ “အမှုဆောင် လုပ်ငန်း” ကို ထမ်းဆောင်တဲ့အတွက် (ဖိ ၂:၁၇) သူတို့ကို “ပဋိညာဉ်သစ်နဲ့ဆိုင်တဲ့ အမှုဆောင်သူတွေ” လို့ ခေါ်တယ်။ (၂က ၃:၆) ခေါ်တော်မူခြင်း ခံရတဲ့ ဒီလူတွေဟာ သေဆုံးချိန်အထိ ခရစ်တော်ရဲ့ ခြေရာကို ထက်ကြပ်မကွာ၊ သစ္စာရှိရှိ လိုက်လျှောက်ရမယ်။ အဲဒီနောက် ယေဟောဝါက သူတို့အားဖြင့် ပုရောဟိတ် အုပ်ချုပ်တဲ့ နိုင်ငံတစ်နိုင်ငံ ဖြစ်လာစေမယ်။ သူတို့ကို ဘုရားသခင်လို ဝိညာဉ်ပုဂ္ဂိုလ်တွေ ဖြစ်လာစေမယ်။ ခရစ်တော်နဲ့ ကောင်းကင်မှာ တွဲဖက်အမွေခံမယ့်သူတွေအဖြစ် မသေနိုင်တဲ့အဖြစ်၊ မပုပ်ပျက်နိုင်တဲ့အဖြစ်ကို ပေးမှာ ဖြစ်တယ်။ (၁ပ ၂:၂၁။ ရ ၆:၃၊ ၄။ ၁က ၁၅:၅၃။ ၁ပ ၁:၄။ ၂ပ ၁:၄) ပဋိညာဉ်ရဲ့ ရည်ရွယ်ချက်ကတော့ ယေဟောဝါရဲ့ နာမတော်အတွက် လူမျိုးတစ်မျိုးကို အာဗြဟံရဲ့ “မျိုးနွယ်” အဖြစ် ရွေးချယ်ဖို့ ဖြစ်တယ်။ (တ ၁၅:၁၄) သူတို့ဟာ ခရစ်တော်ရဲ့ “သတို့သမီး၊” ခရစ်တော်နဲ့အတူ နိုင်ငံတော်မှာ အုပ်ချုပ်ဖို့ ပဋိညာဉ် ဖွဲ့ထားတဲ့သူတွေအဝင် ဖြစ်လာတယ်။ (ယဟ ၃:၂၉။ ၂က ၁၁:၂။ ဗ ၂၁:၉။ လု ၂၂:၂၉။ ဗ ၁:၄-၆။ ၅:၉၊ ၁၀။ ၂၀:၆) “ဘုရားသခင်ရဲ့ အစ္စရေးလူမျိုး” တစ်ယောက်မကျန် ကောင်းကင်မှာ မသေနိုင်တဲ့အဖြစ်ကို ထမြောက်ချိန်အထိ ပဋိညာဉ်သစ်ရဲ့ ရည်ရွယ်ချက်ဟာ အကျိုးသက်ရောက်နေဖို့ လိုတယ်။ ရည်ရွယ်ချက် ပြီးမြောက်သွားခြင်းကြောင့် ရလာမယ့် အကျိုးကျေးဇူးတွေဟာ ထာဝရ ဖြစ်လာမှာမို့ “ထာဝရပဋိညာဉ်” လို့ ခေါ်နိုင်ပါတယ်။—ဟီ ၁၃:၂၀။
စက်တင်ဘာ ၉-၁၅
ကျမ်းစာထဲက အဖိုးတန်ဘဏ္ဍာများ | ဟီဘရူး ၉-၁၀
“နောင်လာမယ့် ကောင်းမြတ်တဲ့အရာတွေရဲ့ အရိပ်ပဲ”
it-1 ၈၆၂ ပိုဒ်. ၁
ခွင့်လွှတ်မှု
အစ္စရေးလူမျိုးကို ပေးတဲ့ ဘုရားပညတ်အရ လူတစ်ယောက်ဟာ ဘုရားကို ဒါမှမဟုတ် တခြားတစ်ယောက်ကို ပြစ်မှားမိရင် ခွင့်လွှတ်ခံရဖို့ ပညတ်မှာ ဖော်ပြထားတဲ့အတိုင်း အရင်ဆုံး အပြစ်ဖြေရမယ်။ အခြေအနေ အတော်များများမှာ အပြစ်ဖြေရာအလှူအဖြစ် သွေးကို ယေဟောဝါဆီ ဆက်သရတယ်။ (ဝ ၅:၅–၆:၇) ဒါကြောင့် “ပညတ်တရားအရ အရာအားလုံးနီးပါးဟာ သွေးအားဖြင့်ပဲ စင်ကြယ်နိုင်တယ်။ သွေး သွန်းလောင်းမှသာ အပြစ်တွေ ခွင့်လွှတ်ခံရမယ်” ဆိုပြီး ပေါလု ဖော်ပြခဲ့တယ်။ (ဟီ ၉:၂၂) ဒါပေမဲ့ တိရစ္ဆာန်ရဲ့ သွေးဟာ အပြစ်တွေကို မဖယ်ရှားပေးနိုင်ဘူး။ အမှားအမှန်သိစိတ် လုံးဝကြည်လင်သွားအောင် မလုပ်ပေးနိုင်ဘူး။ (ဟီ ၁၀:၁-၄။ ၉:၉၊ ၁၃၊ ၁၄) ကြိုဟောထားတဲ့ ပဋိညာဉ်သစ်ကတော့ ယေရှုခရစ်ရဲ့ ရွေးဖိုး ပူဇော်သက္ကာပေါ် အခြေခံပြီး အမှန်တကယ် ခွင့်လွှတ်ခံရအောင် လုပ်ပေးနိုင်တယ်။ (ယေ ၃၁:၃၃၊ ၃၄။ မ ၂၆:၂၈။ ၁က ၁၁:၂၅။ ဧ ၁:၇) ယေရှု ကမ္ဘာပေါ်မှာ ရှိတုန်းက လေဖြတ်နေသူကို ကုသပေးခြင်းအားဖြင့် အပြစ်တွေကို ခွင့်လွှတ်ပေးပိုင်ခွင့် ရှိကြောင်း ပြခဲ့တယ်။—မ ၉:၂-၇။
“ငါ့နောက်သို့ ဆက်၍ လိုက်လော့”
၄ ကောင်းကင်သို့ ယေရှု ပြန်ရောက်သောအခါ ကြိုဆိုခံရပုံ၊ ခမည်းတော်နှင့် ဝမ်းသာအားရ ပြန်လည် ဆုံစည်းပုံအကြောင်း သမ္မာကျမ်းစာက မဖော်ပြပါ။ သို့ရာတွင် ကောင်းကင်သို့ ယေရှု ပြန်ရောက်ပြီးနောက် မကြာမီ ဖြစ်ပျက်မည့်အရာကို ကျမ်းစာက ကြိုပြောပြပါသည်။ လွန်ခဲ့သည့် ၁၅ ရာစုကျော်ကတည်းက ဂျူးလူမျိုးတို့သည် သန့်ရှင်းမြင့်မြတ်သော အခမ်းအနားပွဲတစ်ခုကို မှန်မှန် ကျင်းပကြသည်။ နှစ်စဉ်နှစ်တိုင်း နေ့ရက်တစ်ရက်တွင် ယဇ်ပုရောဟိတ်မင်းသည် ဗိမာန်တော်၏ အသန့်ရှင်းဆုံးဌာနသို့ ဝင်ပြီး အပြစ်ဖြေရာနေ့၏ ပူဇော်ရာယဇ်များအသွေးကို ပဋိညာဉ်သေတ္တာရှေ့ ဖျန်းရသည်။ အဆိုပါနေ့တွင် ယဇ်ပုရောဟိတ်မင်းသည် မေရှိယကို ပုံဆောင်သည်။ ယေရှုသည် ကောင်းကင်သို့ ပြန်ရောက်ပြီးနောက် ထိုအခမ်းအနားပွဲ၏ ပရောဖက်ပြုချက်ဆိုင်ရာ အဓိပ္ပာယ်ကို တစ်ကြိမ်တည်းနှင့် အပြီးပြည့်စုံစေခဲ့သည်။ စကြဝဠာတွင် အသန့်ရှင်းဆုံးဌာန ဖြစ်သော ကောင်းကင်ရှိ ခမည်းတော် ယေဟောဝါ၏ ရှေ့တော်မှောက်သို့ ဝင်ရောက်ပြီးလျှင် ရွေးနုတ်ဖိုး ပူဇော်ရာယဇ်၏ တန်ဖိုးကို ကိုယ်တော် ဆက်သခဲ့သည်။ (ဟေဗြဲ ၉:၁၁၊ ၁၂၊ ၂၄) ယင်းကို ယေဟောဝါ လက်ခံခဲ့သလော။
it-2 ၆၀၂-၆၀၃
ပြည့်ဝစုံလင်ခြင်း
မောရှေပညတ်ရဲ့ ပြည့်ဝစုံလင်မှု။ မောရှေကတစ်ဆင့် အစ္စရေးတွေကို ပေးတဲ့ ပညတ်မှာ ပုရောဟိတ် တာဝန်နဲ့ တိရစ္ဆာန် ပူဇော်သက္ကာအမျိုးမျိုး ဆက်သခြင်းဆိုင်ရာ ပြဋ္ဌာန်းချက်တွေ ပါဝင်တယ်။ တမန်တော် ပေါလု ဖော်ပြသလိုပဲ ပညတ်တရား၊ ပုရောဟိတ် တာဝန်နဲ့ ပူဇော်သက္ကာ အစီအစဉ်ဟာ ဘုရားဆီက လာလို့ ပြည့်ဝစုံလင်တာ မှန်ပေမဲ့ ပညတ်တရားအောက်မှာ ရှိတဲ့သူတွေကိုတော့ စုံလင်အောင် မလုပ်ပေးနိုင်ဘူး။ (ဟီ ၇:၁၁၊ ၁၉။ ၁၀:၁) အပြစ်နဲ့ သေခြင်းကနေ လွတ်မြောက်စေမယ့်အစား အပြစ်ကို ပိုထင်ရှားစေတယ်။ (ရ ၃:၂၀။ ၇:၇-၁၃) ဒါပေမဲ့ ဒီအရာတွေအားဖြင့် ဖြစ်မြောက်လာဖို့ ဘုရား ရည်ရွယ်ထားတာတွေကိုတော့ တကယ်ပဲ အထမြောက်စေခဲ့ပါတယ်။ ပညတ်တရားဟာ လူတွေကို ခရစ်တော်ဆီ ပို့ဆောင်ပေးတဲ့ “အုပ်ထိန်းသူ” အဖြစ် လုပ်ဆောင်တယ်။ “နောင်လာမယ့် ကောင်းမြတ်တဲ့အရာတွေရဲ့” ပြည့်ဝစုံလင်တဲ့ “အရိပ်” ဖြစ်တယ်။ (ဂ ၃:၁၉-၂၅။ ဟီ ၁၀:၁) ဒါကြောင့် “လူတွေဟာ ပြည့်ဝစုံလင်သူတွေ မဟုတ်လို့ ပညတ်တရားကို အပြည့်အဝ မလိုက်နာနိုင်ဘူး။ ဒါကြောင့် ပညတ်တရားက လူတွေကို မကယ်တင်ပေးနိုင်ဘူး” (ရ ၈:၃) ဆိုပြီး ပေါလု ပြောတဲ့အခါ ဟီဘရူး ၇:၁၁၊ ၁၈-၂၈ မှာ ရှင်းပြထားသလို ကိုယ်အမှုဆောင်ပေးနေတဲ့သူတွေ “အပြည့်အဝ ကယ်တင်” ခံရအောင် မလုပ်ပေးနိုင်တဲ့ ဂျူးလူမျိုးပုရောဟိတ်မင်းအကြောင်း ရည်ညွှန်းနေတာ ထင်ရှားတယ်။ (ပုရောဟိတ်မင်းဆိုတာ ပူဇော်သက္ကာ အစီအစဉ်ကို ကြီးကြပ်ဖို့ ပညတ်တရားအရ ခန့်အပ်ခံရတဲ့သူ၊ အပြစ်ဖြေရာနေ့မှာ အသန့်ရှင်းဆုံး အခန်းထဲကို ပူဇော်သက္ကာအသွေးနဲ့ ဝင်ခွင့်ရှိတဲ့သူ ဖြစ်တယ်။) အာရုန်အမျိုး ပုရောဟိတ်တွေကတစ်ဆင့် ပူဇော်သက္ကာတွေ ဆက်သတာက လူတွေကို ဘုရားရှေ့မှာ တော်မှန်တဲ့ အနေအထား ရှိစေပေမဲ့ အပြစ်ရှိတယ်လို့ မခံစားရအောင်တော့ အပြည့်အဝ မလုပ်ပေးနိုင်ခဲ့ဘူး။ အပြစ်ဖြေရာအလှူတွေက “ဘုရားသခင်ကို ဝတ်ပြုကိုးကွယ်သူတွေကို ပြည့်ဝစုံလင်တဲ့ အဖြစ်ဆီ” မရောက်စေနိုင်ဘူး၊ အမှားအမှန်သိစိတ် လုံးဝကြည်လင်သွားအောင် မလုပ်ပေးနိုင်ဘူးလို့ တမန်တော် ပေါလု ပြောတဲ့အခါ အဲဒါကို ရည်ညွှန်းနေတာပါ။ (ဟီ ၁၀:၁-၄။ ဟီ ၉:၉ နဲ့နှိုင်းယှဉ်ပါ။) ပုရောဟိတ်မင်းဟာ အပြစ်တရားကနေ အမှန်တကယ် ရွေးနုတ်ခံရဖို့ လိုအပ်တဲ့ ရွေးဖိုးကို မပေးနိုင်ဘူး။ ခရစ်တော်ရဲ့ ထာဝစဉ် တည်တဲ့ ပုရောဟိတ်တာဝန်နဲ့ အကျိုးသက်ရောက်မှု ရှိတဲ့ ပူဇော်သက္ကာကသာ အဲဒီအချက်ကို ပြီးမြောက်စေတယ်။—ဟီ ၉:၁၄။ ၁၀:၁၂-၂၂။
ရှာဖွေလေ့လာ ဘုရားရေးရာရတနာ
စာရှုသူများထံမှ မေးခွန်းလွှာ
ဘုရားသခင်နှင့် လူတို့စပ်ကြား ပဋိညာဉ်များကို အတည်ပြုစေရန် အသေခံစရာ လိုကြောင်း ပေါလု ပြောဆိုသည်။ ပညတ်ပဋိညာဉ်ကား ဥပမာ တစ်ရပ် ဖြစ်သည်။ ဘုရားသခင်နှင့် ဇာတိပကတိ ဣသရေလလူမျိုးစပ်ကြား ဤသဘောတူညီချက် ဖြစ်ပေါ်လာစေရန် ယင်း၏ ကြားခံမှာ မောရှေ ဖြစ်၏။ ယင်းကြောင့် မောရှေသည် အရေးကြီးကဏ္ဍတွင် ဆောင်ရွက်ကာ ပဋိညာဉ်အောက် ရောက်လာသူ ဣသရေလလူမျိုးနှင့် ဆက်ဆံသောသူ ဖြစ်သည်။ ယင်းကြောင့် ယေဟောဝါနှင့် ဖွဲ့သော ပညတ်ပဋိညာဉ်၏ စာချုပ်,ချုပ်သူမှာ မောရှေ ဖြစ်သည် ဟူ၍ ယူမှတ်နိုင်ပါသည်။ သို့သော် ပညတ်ပဋိညာဉ်ကို အတည်ပြုရန် မောရှေသည် သူ၏ အသွေးကို သွန်းခဲ့ရပါသလော။ မသွန်းရပါ။ ယင်းအစား တိရစ္ဆာန်များကို ပူဇော်ခဲ့ရာ သူတို့အသွေးသည် မောရှေအသွေးအစား ဖြစ်သည်။—ဟေဗြဲ ၉:၁၈-၂၂။
ယေဟောဝါနှင့် ဝိညာဏ ဣသရေလလူမျိုး ဖွဲ့သော ပဋိညာဉ်သစ်ကော။ ယေဟောဝါနှင့် ဝိညာဏ ဣသရေလလူမျိုး၏ ကြားခံ ဖြစ်သော ဖျန်ဖြေစေ့စပ်ရေးမှူးကဏ္ဍတွင် ယေရှုခရစ်တော် အမှုဆောင်ခွင့် ရရှိတော်မူသည်။ ဤပဋိညာဉ်ကို ယေဟောဝါ စတီထွင်သော်လည်း ယေရှုခရစ်သည် ယင်း၏ အချက်အချာ ဖြစ်တော်မူသည်။ ၄င်း၏ ဖျန်ဖြေစေ့စပ်ရေးမှူး ဖြစ်သည့်အပြင် ဤပဋိညာဉ်ထဲ ဦးဆုံး ဝင်ခွင့်ရမည့်သူတို့နှင့် ယေရှုသည် သွေးသားအားဖြင့် တိုက်ရိုက် ပေါင်းသင်းဆက်ဆံခွင့် ရခဲ့သည်။ (လုကာ ၂၂:၂၀၊ ၂၈၊ ၂၉) ထို့ပြင် ပဋိညာဉ်ကို တရားဝင် ဖြစ်စေနိုင်ဖို့ လိုအပ်သော ယဇ်ပူဇော်သက္ကာကို ပေးဆက်ရန် ကိုယ်တော် အရည်အချင်း ပြည့်မီခဲ့သည်။ ယင်းယဇ်သက္ကာသည် တိရစ္ဆာန် ယဇ်ကောင်မျှသာ မဟုတ်ဘဲ စုံလင်သော လူ့အသက်ပင် ဖြစ်သည်။ ထိုကြောင့် ခရစ်တော်အား ပဋိညာဉ်သစ်၏ လူသားစာချုပ်သူ ဟူ၍ ပေါလု ခေါ်ဆိုနိုင်ခဲ့ခြင်း ဖြစ်သည်။ “ခရစ်တော်သည် . . . ငါတို့အတွက် . . . ဘုရားသခင်၏ ရှေ့တော်၌ . . . ကောင်းကင်ကိုယ်ထဲသို့ ဝင်” ပြီးနောက် ပဋိညာဉ်သစ်သည် တရားဝင် ဖြစ်လာလေသည်။—ဟေဗြဲ ၉:၁၂-၁၄၊ ၂၄။
မောရှေနှင့် ယေရှုတို့အား စာချုပ်,ချုပ်သူများအဖြစ် ပေါလု ဆိုခြင်းအားဖြင့် ပဋိညာဉ်အသီးသီးကို သူတို့ စတီထွင်သည်ဟု ဆိုလိုခြင်း မဟုတ်ပါ။ ယင်းတို့ကို ဘုရားသခင်ကိုယ်တိုင် တီထွင်ခဲ့ခြင်း ဖြစ်သည်။ သို့သော် ထိုသူနှစ်ဦးသည် ကြားခံ ဖျန်ဖြေစေ့စပ်မှူးများအဖြစ် ပဋိညာဉ်အသီးသီးကို အတည်ပြုခြင်းတွင် ပါဝင်ခွင့် ရရှိခဲ့ကြသည်။ တစ်ခုစီတွင် အသေခံစရာ လိုသည်။ မောရှေအစား တိရစ္ဆာန်များ သေရ၏။ ပဋိညာဉ်သစ်၌ ပါဝင်သူတို့အတွက်မူ ယေရှု၏ အသက်သွေးကို ပူဇော်ခဲ့ရသည်။
it-1 ၂၄၉-၂၅၀
နှစ်ခြင်း
ယေရှုဟာ နှစ်ခြင်းခံတဲ့အချိန်မှာ ဆုတောင်းနေတယ်ဆိုပြီး လုကာ ဖော်ပြတယ်။ (လု ၃:၂၁) ဒါ့အပြင် ဟီဘရူးတွေဆီ ရေးတဲ့စာမှာ ကျမ်းရေးသူက “ဒီလောကကို” ယေရှုခရစ် လာတဲ့အချိန်အကြောင်း ပြောခဲ့တယ်။ (ဒါက ယေရှု မွေးဖွားတဲ့အချိန်ကို ပြောတာ မဟုတ်ပါဘူး။ နှစ်ခြင်းခံဖို့ ရောက်လာပြီး အမှုဆောင်လုပ်ငန်း စတင်တဲ့အချိန်ကို ပြောတာ ဖြစ်တယ်။) အဲဒီအချိန်မှာ “ကိုယ်တော်က ပူဇော်သက္ကာတွေ၊ အလှူတွေကို မလိုချင်ဘူး။ ဒါပေမဲ့ ကျွန်တော့်အတွက် ကိုယ်ခန္ဓာကို ပြင်ဆင်ထားတယ်။ . . . ပြီးတော့ ဘုရားသခင်၊ (ကျမ်းလိပ်ထဲမှာ ကျွန်တော့်အကြောင်း ရေးထားတဲ့အတိုင်း) အလိုတော်ဆောင်ဖို့ ကျွန်တော် ရောက်လာပါပြီ” ဆိုပြီး ဆာလံ ၄၀:၆-၈ မှာ ရေးထားတဲ့အတိုင်း ပြောခဲ့တယ်။ (ဟီ ၁၀:၅-၉) ယေရှုဟာ ဂျူးလူမျိုးအဖြစ် မွေးဖွားခဲ့တယ်။ ဂျူးလူမျိုးဆိုတာ ဘုရားနဲ့ လူမျိုးလိုက် ပညတ်ပဋိညာဉ် ဖွဲ့ထားသူတွေ ဖြစ်တယ်။ (ထွ ၁၉:၅-၈။ ဂ ၄:၄) ဒါကြောင့် နှစ်ခြင်းခံဖို့ ယောဟန်ဆီ ရောက်လာချိန်မှာ ယေရှုဟာ ယေဟောဝါဘုရားနဲ့ ပဋိညာဉ် ဖွဲ့ထားပြီးသား ဖြစ်တယ်။ ယေရှုဟာ ပညတ်တရားရဲ့ တောင်းဆိုချက်ကို လိုက်နာဖို့သက်သက် ရောက်လာတာ မဟုတ်ဘူး။ “ပြင်ဆင်ထား” တဲ့ သူ့ကိုယ်ခန္ဓာကို ဆက်သဖို့နဲ့ ပညတ်တရားအရ ဆက်သရတဲ့ တိရစ္ဆာန် ပူဇော်သက္ကာတွေကို ဖယ်ရှားဖို့ ဆိုတဲ့ ခမည်းတော်ရဲ့ “အလိုတော်” ကို ဆောင်ဖို့ အဖယေဟောဝါရှေ့ ရောက်လာတာ ဖြစ်တယ်။ “အဲဒီ ‘အလိုတော်’ အတိုင်း သူ့ရဲ့ ကိုယ်ခန္ဓာကို တစ်ကြိမ်တည်းအပြီး ပူဇော်လိုက်တဲ့အတွက် ကျွန်တော်တို့ သန့်စင်သွားပြီ” လို့ တမန်တော် ပေါလု မှတ်ချက်ချတယ်။ (ဟီ ၁၀:၁၀) ခမည်းတော်ရဲ့ အလိုတော်ဆောင်ခြင်းမှာ နိုင်ငံတော်နဲ့ သက်ဆိုင်တဲ့ အလုပ်တွေ လုပ်ဆောင်ခြင်း ပါဝင်ပြီး အဲဒီအတွက်ပဲ ယေရှု ရောက်လာတာ။ (လု ၄:၄၃။ ၁၇:၂၀၊ ၂၁) ယေဟောဝါက သားတော်ကို သန့်ရှင်းသော စွမ်းအားတော်နဲ့ ဘိသိက်ပေးခြင်း၊ “မင်းဟာ ငါမြတ်နိုးတဲ့ ငါ့ရဲ့ ချစ်သားပဲ” လို့ ပြောခြင်းအားဖြင့် အသိအမှတ်ပြု၊ လက်ခံခဲ့တယ်။—မာ ၁:၉-၁၁။ လု ၃:၂၁-၂၃။ မ ၃:၁၃-၁၇။
ကျမ်းစာဖတ်ရှုခြင်း
စက်တင်ဘာ ၁၆-၂၂
ကျမ်းစာထဲက အဖိုးတန်ဘဏ္ဍာများ | ဟီဘရူး ၁၁
“ယုံကြည်ခြင်း အလွန်အရေးကြီး”
ယေဟောဝါရဲ့ ကတိတွေကို ယုံကြည်ကြောင်း တင်ပြပါ
၆ ဟေဗြဲ ၁၁:၁ (ဖတ်ပါ) မှာ ယုံကြည်ခြင်းနဲ့ပတ်သက်တဲ့ ကျမ်းစာအဆိုကို တွေ့ရတယ်။ (၁) ယုံကြည်ခြင်းဆိုတာ “မျှော်လင့်သောအရာများကို စိတ်ချစွာ စောင့်မျှော်ခြင်း” ဖြစ်တယ်။ ဥပမာ၊ ဆိုးသွမ်းမှုအားလုံး အဆုံးတိုင်မယ်၊ ကမ္ဘာသစ် ရောက်လာမယ် ဆိုတာကို စိတ်ချနေခြင်း ဖြစ်တယ်။ (၂) ယုံကြည်ခြင်းဆိုတာ “မမြင်ရသေးသော်လည်း အမှန် တည်ရှိသောအရာတို့၏ ထင်ရှားသော သက်သေ” ဖြစ်တယ်။ ယေဟောဝါဘုရား၊ ယေရှုခရစ်၊ ကောင်းကင်တမန်တွေ၊ နိုင်ငံတော်တို့ဟာ မမြင်နိုင်ပေမဲ့ တကယ် တည်ရှိတဲ့အရာတွေ ဖြစ်တယ်။ (ဟေဗြဲ ၁၁:၃) ဘုရားသခင့်ကတိတွေ၊ ကျမ်းစာမှာ ပါတဲ့ မမြင်နိုင်တဲ့အရာတွေကို တကယ် ယုံကြည်ကြောင်း ဘယ်လို တင်ပြနိုင်သလဲ။ အပြောအဆို၊ အပြုအမူအားဖြင့် ဖြစ်တယ်။ အပြောနဲ့ အလုပ် မပါရင် ယုံကြည်ခြင်းဟာ ပြည့်စုံမှာ မဟုတ်ဘူး။
“မိမိအား စိတ်ထက်သန်စွာ ရှာဖွေသူကို ဆုချသောအရှင်”
ယေဟောဝါဘုရားရဲ့ စိတ်တော်နဲ့ တွေ့ဖို့ ဘာလိုအပ်သလဲ။ “ယုံကြည်ခြင်း မရှိလျှင် ဘုရားသခင် စိတ်တော်နှင့် မတွေ့နိုင်” ဘူးလို့ ပေါလု ရေးခဲ့တယ်။ ဒီမှာ ပေါလုက ယုံကြည်ခြင်း မရှိရင် ဘုရားသခင်ရဲ့ စိတ်တော်နဲ့ တွေ့ဖို့ ခက်ခဲတယ်လို့ မပြောဘဲ ယုံကြည်ခြင်း မရှိရင် ဘုရားသခင်ရဲ့ စိတ်တော်နဲ့ မတွေ့နိုင်ဘူးလို့ ပြောနေတယ်။ နောက်တစ်နည်း ပြောရရင် ဘုရားသခင်ရဲ့ စိတ်တော်နဲ့ တွေ့ဖို့ ယုံကြည်ခြင်း မရှိမဖြစ် လိုအပ်တယ်။
ယေဟောဝါဘုရားက ဘယ်လို ယုံကြည်ခြင်းမျိုးကို နှစ်သက်ပါသလဲ။ ဘုရားသခင်ကို ကျွန်ုပ်တို့ ယုံကြည်တယ်လို့ ပြောတဲ့အခါ အပိုင်းနှစ်ပိုင်း ပါဝင်တယ်။ ပထမ၊ “ကိုယ်တော် တည်ရှိကြောင်းကို ယုံကြည်ရ” မယ်။ ဘုရားသခင် တကယ်ရှိမရှိ ဆိုတာကို ဇဝေဇဝါ ဖြစ်နေရင် ဘုရားသခင် နှစ်သက်မှု ရဖို့ ဖြစ်နိုင်ပါ့မလား။ စစ်မှန်တဲ့ ယုံကြည်ခြင်းမှာ ဘုရားသခင် ရှိကြောင်းကို ယုံတာထက်မက ပါဝင်တယ်။ ဘာဖြစ်လို့လဲဆိုတော့ နတ်ဆိုးတွေတောင်မှ ယေဟောဝါဘုရား တည်ရှိတယ်ဆိုတာကို ယုံကြည်ကြလို့ပါပဲ။ (ယာကုပ် ၂:၁၉) ဘုရားသခင် တကယ် ရှိတာကို ကျွန်ုပ်တို့ တကယ် ယုံမယ်ဆိုရင် လုပ်ရပ်နဲ့ သက်သေပြပါလိမ့်မယ်။ ဆိုလိုတာက ဘုရားသခင် နှစ်သက်တဲ့ ဘဝလမ်းစဉ်အတိုင်း အသက်ရှင်နေထိုင်ခြင်း ဖြစ်တယ်။—ယာကုပ် ၂:၂၀၊ ၂၆။
ဒုတိယ၊ ဘုရားသခင်ဟာ “ဆုချသောအရှင်” ဖြစ်တယ် ဆိုတာကို “ယုံကြည်ရ” မယ်။ စစ်မှန်တဲ့ ယုံကြည်ခြင်း ရှိသူက ဘုရားသခင် ကြိုက်နှစ်သက်တဲ့ ဘဝလမ်းစဉ်အတိုင်း အသက်ရှင်ဖို့ ကြိုးစားတာဟာ သဲထဲ ရေသွန်သလို အလကား ဖြစ်မသွားဘူးဆိုတာ အခိုင်အမာ ယုံကြည်တယ်။ (၁ ကောရိန္သု ၁၅:၅၈) ဘုရားသခင်ဆီမှာ ဆုချပေးနိုင်စွမ်း ရှိတယ် ဒါမှမဟုတ် ဆုချပေးချင်တဲ့ စိတ်ဆန္ဒ ရှိတယ်ဆိုတာကို သံသယ ဝင်နေရင် ဘုရားသခင့်စိတ်တော်နဲ့ ဘယ်လို တွေ့နိုင်ပါ့မလဲ။ (ယာကုပ် ၁:၁၇; ၁ ပေတရု ၅:၇) ဘုရားသခင်က လူတွေကို ဂရုမစိုက်ဘူး၊ တန်ဖိုးမထားဘူး၊ တွန့်တိုတယ်လို့ ယူဆတဲ့သူဟာ သမ္မာကျမ်းစာမှာ ပါတဲ့ ဘုရားသခင်အကြောင်း တကယ်သိတာ မဟုတ်ဘူး။
ယေဟောဝါဘုရားက ဘယ်သူတွေကို ဆုချသလဲ။ “မိမိ [ဘုရားသခင်] အား စိတ်ထက်သန်စွာ ရှာဖွေသူ” တွေကို ဆုချတယ်လို့ ပေါလု ရေးသားခဲ့တယ်။ “ထက်သန်စွာ ရှာဖွေ” ဆိုတဲ့ ဂရိစကားလုံးဟာ ဘုရားသခင်အကြောင်း ကြိုးစားသင်ယူရုံလောက်ပဲ မဟုတ်ပါဘူး၊ ဘုရားသခင်ကို ဝတ်ပြုကိုးကွယ်ဖို့ ကြိုးစားအားထုတ်တာကို ဆိုလိုနေတာ ဖြစ်တယ်လို့ ကျမ်းစာဘာသာပြန်သူတွေအတွက် အကိုးအကားစာအုပ်မှာ ဖော်ပြထားတယ်။ အကိုးအကားစာအုပ် နောက်တစ်အုပ်မှာ “ရှာဖွေ” ဆိုတဲ့ ဂရိကြိယာက အားစိုက်ပြီး အပတ်တကုတ် ကြိုးစားတာကို ပြောတာ ဖြစ်တယ်လို့ ရှင်းပြထားတယ်။ ယေဟောဝါဘုရားက စိတ်နှလုံး အကြွင်းမဲ့နဲ့ မိမိကို ချစ်ပြီး ဇွဲရှိရှိ ဝတ်ပြုနေတဲ့ ယုံကြည်ခြင်း ရှိသူတွေကို ဆုချပါတယ်။—မဿဲ ၂၂:၃၇။
မျှော်လင့်တဲ့အရာအပေါ် ယုံကြည်ခြင်း ခိုင်မာစေပါ
၁၀ ဟေဗြဲ အခန်းကြီး ၁၁ မှာ တမန်တော် ပေါလု အခုလိုပြောတယ်– “အမျိုးသမီးများ၏ သေဆုံးသွားသော ချစ်ရသူများ ရှင်ပြန်ထမြောက်လာကြ၏။ အချို့သူတို့မူ သာ၍ မြတ်သော ရှင်ပြန်ထမြောက်ခြင်းကို ရရန် တစ်နည်းနည်းဖြင့် ရွေးနုတ်ခြင်းကို လက်မခံဘဲ ညှဉ်းဆဲခံခဲ့ကြ၏။” (ဟေဗြဲ ၁၁:၃၅) ဘယ်သူတွေကို ပေါလု ရည်ညွှန်းနေမှန်း အသေအချာ မသိရပေမဲ့ နာဗုတ်နဲ့ ဇာခရိတို့လို ဘုရားသခင်ကို နာခံလို့ ကျောက်ခဲနဲ့ ပေါက်သတ်ခံရသူတချို့ကို ရည်ညွှန်းတာ ဖြစ်နိုင်တယ်။ (၃ ရာ. ၂၁:၃၊ ၁၅။ ၆ ရာ. ၂၄:၂၀၊ ၂၁) ဒံယေလနဲ့ အဖော်တွေဟာ အလျှော့ပေးမယ့်အစား အသေခံဖို့ လိုလိုလားလား ရှိခဲ့ကြတယ်။ ယေဟောဝါကို အခိုင်အမာ ယုံကြည်တဲ့အတွက် “ခြင်္သေ့နှုတ်ကို ပိတ်” ပြီး “မီးအရှိန်ကို ငြိမ်း” နိုင်ခဲ့ကြတယ်။—ဟေဗြဲ ၁၁:၃၃၊ ၃၄။ ဒံ. ၃:၁၆-၁၈၊ ၂၀၊ ၂၈။ ၆:၁၃၊ ၁၆၊ ၂၁-၂၃။
၁၁ မိက္ခာ၊ ယေရမိစတဲ့ ပရောဖက်တွေဟာ ယုံကြည်ခြင်းကြောင့် “ကဲ့ရဲ့ခြင်း၊ . . . ထောင်ကျခြင်းတို့ဖြင့်လည်း စမ်းသပ်ခံကြရ” တယ်။ ဧလိယလို တခြားသူတွေကတော့ “တောကြိုတောင်ကြား၊ ဥမင်လိုဏ်ခေါင်းများတွင် လှည့်လည်သွားလာခဲ့” ကြရတယ်။ သူတို့အားလုံးဟာ “မျှော်လင့်သောအရာများကို စိတ်ချစွာ စောင့်မျှော်” ခဲ့တဲ့အတွက် ခံရပ်နိုင်ခဲ့ကြတယ်။—ဟေဗြဲ ၁၁:၁၊ ၃၆-၃၈။ ၃ ရာ. ၁၈:၁၃။ ၂၂:၂၄-၂၇။ ယေ. ၂၀:၁၊ ၂။ ၂၈:၁၀၊ ၁၁။ ၃၂:၂။
ရှာဖွေလေ့လာ ဘုရားရေးရာရတနာ
it-1 ၈၀၄ ပိုဒ်. ၅
ယုံကြည်ခြင်း
ယုံကြည်ခြင်းရှိတဲ့ ရှေးခေတ် စံနမူနာရှင်များ။ ပေါလု ဖော်ပြခဲ့တဲ့ ‘တိမ်ထုကြီးလို များတဲ့ သက်သေ’ ယောက်တိုင်းဆီမှာ (ဟီ ၁၂:၁) ယုံကြည်ခြင်း ရှိရတဲ့ ခြေမြစ်ခိုင်လုံတဲ့ အကြောင်းရင်း ကိုယ်စီ ရှိကြတယ်။ ဥပမာ၊ “မြွေ” ရဲ့ ခေါင်းကို ကြိတ်မယ့် “မျိုးနွယ်” နဲ့ပတ်သက်တဲ့ ဘုရားကတိကို အာဗေလ ကောင်းကောင်း သိခဲ့တယ်။ ဒါ့အပြင် အာဗေလဟာ ဧဒင်မှာ သူ့မိဘတွေအပေါ် ယေဟောဝါ ချမှတ်လိုက်တဲ့ ပြစ်ဒဏ် တကယ် ပြည့်စုံလာတာကို မျက်ဝါးထင်ထင် မြင်ခဲ့ရတယ်။ မြေကြီးဟာ ကျိန်စာသင့်ပြီး ဆူးပင်၊ ချုံပင်တွေ ပေါက်လာလို့ ဧဒင်အပြင်ဘက်မှာ အာဒံနဲ့ မိသားစုဟာ ချွေးထွက်အောင် ပင်ပင်ပန်းပန်း လုပ်ကိုင်စားသောက်ခဲ့ရတယ်။ ယောက်ျားဖြစ်သူကို ဧဝ တမ်းတမ်းစွဲ ဖြစ်တာ၊ ဇနီးအပေါ် အာဒံ ဩဇာလွှမ်းမိုးတာတွေကို အာဗေလ သတိပြုမိခဲ့မှာပဲ။ ကိုယ်ဝန်ဆောင်ချိန်မှာ ခံစားရတဲ့ ဝေဒနာအကြောင်းကိုလည်း အမေဖြစ်သူက ပြန်ပြောပြမှာ သေချာတယ်။ ဧဒင်ဥယျာဉ် ဝင်ပေါက်ကိုလည်း မီးဓားစက်နဲ့ ခေရုဗိမ်တွေ စောင့်ကြပ်ထားတယ်။ (က ၃:၁၄-၁၉၊ ၂၄) အဲဒါတွေအားလုံးဟာ သူ့အတွက်တော့ “ထင်ရှားတဲ့ သက်သေ” ပဲ။ ဒါကြောင့်လည်း ‘ကတိထားရာ မျိုးနွယ်’ အားဖြင့် ကယ်တင်ခံရမယ်ဆိုတဲ့ အာမခံချက်ကို သူစိတ်ချခဲ့တယ်။ ယုံကြည်ခြင်းကြောင့်ပဲ ကာအိနရဲ့ ပူဇော်သက္ကာထက် ပိုသာလွန်တဲ့ ပူဇော်သက္ကာကို “ဘုရားသခင်ဆီ ဆက်သခဲ့တယ်။”—ဟီ ၁၁:၁၊ ၄။
‘ဘုရားသခင်ရဲ့ စိတ်တော်နဲ့ တွေ့တဲ့သူ’
ဒါဆို ဧနောက်ဟာ ဘယ်လို သဘောနဲ့ ‘ပြောင်းရွှေ့’ ခံလိုက်ရတာလဲ။ ယေဟောဝါဘုရားက ဧနောက်ကို ဝေဒနာ မခံစားရစေဘဲ အသက်ရှင်ခြင်းကနေ သေခြင်းဆီ ညင်ညင်သာသာ ပြောင်းရွှေ့လိုက်တာ ဖြစ်နိုင်တယ်။ ဒါပေမဲ့ ဘုရားသခင့်စိတ်တော်နဲ့ တွေ့တဲ့သူ ဖြစ်တယ်ဆိုတဲ့ သက်သေခံချက်ကို ပြောင်းရွှေ့မခံရခင်မှာ သူရခဲ့တယ်။ ဘယ်လို ရခဲ့တာလဲ။ သူမသေဆုံးခင်မှာ ဘုရားသခင်ဆီက စိတ်အာရုံတစ်ခု ရခဲ့တာ ဖြစ်နိုင်တယ်။ စိတ်အာရုံထဲမှာ ကမ္ဘာတစ်ခွင်လုံးဟာ သာယာလှပတဲ့ ဥယျာဉ် ဖြစ်နေပါလိမ့်မယ်။ ဘုရားသခင့်နှစ်သက်မှုကို ရရှိကြောင်း ဖော်ပြတဲ့ အဲဒီအထောက်အထားကို ရရှိပြီးနောက် သေခြင်းမှာ သူအိပ်ပျော်သွားတယ်။ ဧနောက်နဲ့ တခြားသစ္စာရှိ အမျိုးသားအမျိုးသမီးတွေနဲ့ ပတ်သက်ပြီး တမန်တော်ပေါလုက ‘ထိုသူအပေါင်းတို့သည် . . . ယုံကြည်ခြင်းအားဖြင့် သေလွန်ကြ၏’ လို့ ရေးခဲ့တယ်။ (ဟေဗြဲ ၁၁:၁၃) နောက်ပိုင်းမှာ ရန်သူတွေက သူ့အလောင်းကို ရှာကောင်းရှာပါလိမ့်မယ်။ ဒါပေမဲ့ သူတို့ ‘ရှာလို့မတွေ့ကြ’ ဘူး။ ယေဟောဝါဘုရားက သူ့အလောင်းကို ရန်သူတွေ ဖျက်လိုဖျက်ဆီး မလုပ်နိုင်အောင် ဒါမှမဟုတ် အဲဒါကို အသုံးချပြီး မှားယွင်းတဲ့ ဘာသာတစ်ခုကို အစပြုတာမျိုး မလုပ်နိုင်အောင် တားဆီးတဲ့အနေနဲ့ သူ့အလောင်းကို ဖျောက်ဖျက်လိုက်ပုံရတယ်။
ကျမ်းစာဖတ်ရှုခြင်း
စက်တင်ဘာ ၂၃-၂၉
ကျမ်းစာထဲက အဖိုးတန်ဘဏ္ဍာများ | ဟီဘရူး ၁၂–၁၃
“ဆုံးမခြင်းက ယေဟောဝါရဲ့ မေတ္တာ အထောက်အထားဖြစ်”
“နောက်သို့ လှည့်” မကြည့်နဲ့
၁၈ ပြင်းထန်တဲ့ဆုံးမမှု။ ကျွန်ုပ်တို့ဟာ အရင်က ပြင်းပြင်းထန်ထန် ဆုံးမခံခဲ့ရတာကိုပဲ အမြဲ တွေးမိနေနိုင်တယ်။ ဒီလိုလုပ်တာက ကျွန်ုပ်တို့ကို ဝမ်းနည်း၊ ဒေါသထွက်စေနိုင်ပြီး စိတ်ဓာတ်ကျစေနိုင်တယ်။ (ဟေဗြဲ ၁၂:၅) ကျွန်ုပ်တို့က ဆုံးမမှုကို ချက်ချင်း လက်မခံတာပဲ ဖြစ်ဖြစ်၊ ချက်ချင်း လက်ခံလိုက်ပြီး နောက်ပိုင်းမှာ စိတ်ဓာတ်ကျတာပဲ ဖြစ်ဖြစ် ရလဒ်ကတော့ အတူတူပဲ။ အဲဒါက ဆုံးမမှုကနေ ကျွန်ုပ်တို့ အကျိုးမရယူတာ ဖြစ်တယ်။ ရှောလမုန်ရဲ့ ဒီအကြံပေးချက်ကို လိုက်နာတာက ပိုကောင်းပါတယ်– “ဆုံးမမှုကို ဖမ်းဆုပ်ထားပါ။ မလွှတ်လိုက်နဲ့။ သူ့ကို ကာကွယ်စောင့်ရှောက်ပါ။ သူက သင့်အသက် ဖြစ်လို့ပဲ။” (သု. ၄:၁၃၊ ကဘ) လမ်းပြအမှတ်အသားတွေကို လိုက်နာတဲ့ ယာဉ်မောင်းလို ဆုံးမမှုကို လက်ခံပါ၊ လိုက်နာပါ၊ ရှေ့ကို တိုးတက်နေပါ။—သု. ၄:၂၆၊ ၂၇; ဟေဗြဲ ၁၂:၁၂၊ ၁၃ ကိုဖတ်ပါ။
“သင်တို့ ဆုတောင်းသည့်အခါတိုင်း ‘ကျွန်ုပ်တို့၏ အဖ’” လို့ ပြောပါ
မေတ္တာရှိတဲ့ ဖခင်တစ်ဦးဟာ သားသမီးတွေရဲ့ နောင်ရေး ကောင်းစားဖို့ သူတို့ကို ဆုံးမပဲ့ပြင်ပေးပါတယ်။ (ဧဖက် ၆:၄) အဲဒီလိုဖခင်တစ်ဦးဟာ သူ့သားသမီးတွေအပေါ် ခိုင်မာပြတ်သားပေမဲ့ ဘယ်တော့မှ ကြမ်းကြမ်းတမ်းတမ်း မဆုံးမဘူး။ အဲဒီလိုပါပဲ ကောင်းကင်ပေါ်က ကျွန်ုပ်တို့ရဲ့ အဖေဟာ တစ်ခါတလေ ကျွန်ုပ်တို့ကို ဆုံးမပဲ့ပြင်ဖို့ လိုအပ်နေတယ်ဆိုတာ သတိပြုမိတယ်။ ဒါပေမဲ့ ဘုရားသခင့်ဆုံးမပဲ့ပြင်မှုက အမြဲတမ်း မေတ္တာပါပြီး ဘယ်တော့မှ မကြမ်းတမ်းဘူး။ ယေရှုလည်း သူ့အဖေလိုပဲ၊ တပည့်တွေကို ပဲ့ပြင်တဲ့အခါ သူတို့ ချက်ချင်း မပြုပြင်ရင်တောင် ဘယ်တော့မှ ကြမ်းကြမ်းတမ်းတမ်း မဆုံးမခဲ့ဘူး။—မဿဲ ၂၀:၂၀-၂၈; လုကာ ၂၂:၂၄-၃၀။
“ဆုံးမစကားကို နားထောင်ပါ။ ဉာဏ်ပညာရှိပါ”
၁၈ ဆုံးမခံရတဲ့အခါ နာကျင်မှု ခံစားရပေမဲ့ ဒီထက် ပိုဆိုးတဲ့ နာကျင်မှု ရှိသေးတယ်။ ဆုံးမမှုကို ငြင်းပယ်ခြင်းရဲ့ ဆိုးကျိုးတွေပါပဲ။ (ဟီ. ၁၂:၁၁) ကာအိနနဲ့ ဘုရင် ဇေဒကိအကြောင်း သုံးသပ်ကြည့်ပါ။ အာဗေလကို ကာအိန သတ်ချင်လောက်အောင် မုန်းနေတဲ့အတွက် ဘုရားသခင်က “ဘာလို့ ဒီလောက်တောင် ဒေါသထွက်ပြီး မျက်နှာပျက်နေရတာလဲ။ မင်းသာ အခုကစပြီး ကောင်းတာ လုပ်မယ်ဆိုရင် မျက်နှာသာ ပြန်ရမှာပဲ။ ကောင်းတာ မလုပ်ရင်တော့ အပြစ်က မင်းကို ခုန်အုပ်ချင်လို့ တံခါးဝမှာ ချောင်းနေတယ်။ အပြစ်ကို မင်း အနိုင်ယူလိုက်ပါ” လို့ ပြောတယ်။ (က. ၄:၆၊ ၇) ကာအိန နားမထောင်ခဲ့တဲ့အတွက် အပြစ်က အနိုင်ယူသွားတယ်။ မလိုအပ်တဲ့ နာကျင်မှုဝေဒနာတွေ ခံစားခဲ့ရတယ်။ (က. ၄:၁၁၊ ၁၂) ဘုရားသခင့်ဆုံးမမှုကိုသာ လက်ခံခဲ့ရင် အဲဒီလောက် နာကျင်ခံစားရမှာ မဟုတ်ဘူး။
it-1 ၆၂၉
ဆုံးမခြင်း
ဟီဘရူးနာမ် မူဆာနဲ့ ကြိယာ ယာစာဟာ “ဆုံးမခြင်း၊” “ပြစ်ဒဏ်ပေးခြင်း၊” “တည့်မတ်ပေးခြင်း၊” “တိုက်တွန်းနှိုးဆော်ခြင်း” စတဲ့ အဓိပ္ပာယ်တွေ ရှိတယ်။ ဂရိ စက်ပ်တွားဂျင့်နဲ့ ခရစ်ယာန် ဂရိကျမ်းစာစောင်တွေမှာ တွေ့ရတဲ့ နာမ် ပိုင်ဒေယာနဲ့ ကြိယာ ပိုင်ဒူအိုတို့ရဲ့ အဓိပ္ပာယ်ကလည်း အခြေခံအားဖြင့် ခပ်ဆင်ဆင်ပါပဲ။ “ကလေး” လို့ အဓိပ္ပာယ်ရတဲ့ ပိုင်အစ်ကနေ ယူထားတာဖြစ်တယ်။ ဒါကြောင့် ပိုင်ဒေယာ ဆိုတဲ့ စကားလုံးဟာ သားသမီး ပျိုးထောင်ရာမှာ လိုအပ်တဲ့ ဆုံးမခြင်း၊ လမ်းပြပေးခြင်း၊ သင်ကြားပေးခြင်း၊ တည့်မတ်ပေးခြင်း၊ ပြစ်ဒဏ်ပေးခြင်း စတာတွေနဲ့ အဓိက ဆက်စပ်နေတယ်။
ရှာဖွေလေ့လာ ဘုရားရေးရာရတနာ
အသက်ပြေးပွဲကို ခံနိုင်ရည် ရှိစွာ ပြေးကြစို့
၁၁ ခရစ်ယာန်ခေတ် မတိုင်မီ အသက်ရှင်ခဲ့တဲ့ ယေဟောဝါအပေါ်တည်ကြည်တဲ့ ကျေးကျွန်တွေကို ပေါလုက “ငါတို့ပတ်လည်၌ အလွန်ကြီးမားသော သက်သေအုပ်စုကြီး” လို့ ပြောခဲ့တယ်။ သူတို့က အသက်ပြေးပွဲမှာ အဆုံးအထိ တည်ကြည်စွာ ပြေးခဲ့သူတွေ ဖြစ်လို့ ခရစ်ယာန်တွေလည်း အလွန်ခက်ခဲတဲ့ အခြေအနေတွေမှာတောင် ယေဟောဝါအပေါ် ဆက်တည်ကြည်နိုင်တယ် ဆိုတာ သူတို့ရဲ့ ပုံသက်သေတွေက ဖော်ပြတယ်။ “သက်သေအုပ်စုကြီး” က ပြေးပွဲကို ပန်းဝင်တဲ့အထိ ပြေးခဲ့တဲ့ အပြေးသမားတွေနဲ့ တူတယ်။ သူတို့ရဲ့ ပုံသက်သေက တခြားသူတွေကိုလည်း ပြေးပွဲမှာ ဆက်ပြေးဖို့ အားပေးမှု ဖြစ်စေပါလိမ့်မယ်။ အကယ်၍ ကျွန်ုပ်တို့က ပြိုင်ပွဲမှာ ပါဝင်နေတယ်၊ တကယ် တော်တဲ့ အပြေးသမားတွေက ပြေးပွဲကို ကြည့်နေပြီး အားပေးနေတယ်ဆိုတာ သိရင် ကျွန်ုပ်တို့က ပြေးပွဲမှာ ပန်းဝင်ဖို့ အားသွန်ခွန်စိုက် ဆက်ပြေးနေပါလိမ့်မယ်။ ဒါကြောင့် ဟေဗြဲခရစ်ယာန်တွေက ယေဟောဝါရဲ့ အတိတ်က ကျေးကျွန်တွေရဲ့ ပုံသက်သေကို စဉ်းစားဖို့ လိုတယ်။ သူတို့ရဲ့ ပုံသက်သေက အားပေးမှု ဖြစ်စေပြီး “ခံနိုင်ရည်ရှိစွာ ပြေး” နေစေပါလိမ့်မယ်။ ကျွန်ုပ်တို့အပေါ်လည်း အလားတူ အကျိုးသက်ရောက်ပါလိမ့်မယ်။
က၈၉ ၁၂/၁၅ ၂၂ ပိုဒ်. ၁၀
ယေဟောဝါ နှစ်သက်တော်မူရာ ယဇ်ပူဇော်သက္ကာများကို ဆက်သ
၁၀ ထိုကြောင့် ဟေဗြဲအသင်းသားတို့သည် ယုဒဘာသာတရား၏ “အထူးထူးအပြားပြားသော အယူဝါဒသစ်ကို လိုက်၍ မဖောက်ပြန်ကြ” ရန် သတိပြုဖို့ လိုသည်။ (ဂလ၊ ၅:၁-၆) ဤသို့သော သွန်သင်ချက်များအားဖြင့် မဟုတ်ဘဲ သမ္မာတရား၌ ‘မြဲမြံနိုင်ရန် ကျေးဇူးတော်အားဖြင့် စိတ်ခိုင်ခံ့မြဲမြံခြင်း ရှိ’ မည် ဖြစ်သည်။ အချို့သူများသည် အစာအမျိုးမျိုး၊ ယဇ်အမျိုးမျိုးအကြောင်း အငြင်းပွားခဲ့ပုံ ရှိသည်။ အကြောင်းမှာ၊ ပေါလုက “အစာများကို အမှုထားသော သူတို့သည် အကျိုးကို ရကြပြီမဟုတ်၊” နှလုံးမခိုင်ခံ့လာကြဟု ဆိုထားသည်။ အစာစားခြင်း၊ အထူးနေ့ရက်များကို စောင့်ခြင်းတို့ကို အမှုထားခြင်းမှ မဟုတ်ဘဲ ဘုရားရေးရာ ဆက်ကပ်အပ်နှံခြင်းနှင့် ရွေးနုတ်ဖိုး ပူဇော်သက္ကာကို တန်ဖိုးထားလေးစားခြင်းမှ ဝိညာဏအကျိုးကျေးဇူးများ ဖြစ်ထွန်းပါသည်။ (ရော၊ ၁၄:၅-၉) ထို့ပြင် ခရစ်တော်၏ ယဇ်ပူဇော်သက္ကာသည် လေဝိအမျိုးဆိုင်ရာ ယဇ်ပူဇော်ခြင်းတို့ကို အကျိုးနည်းစေသည်။—ဟေ၊ ၉:၉-၁၄။ ၁၀:၅-၁၀။
ကျမ်းစာဖတ်ရှုခြင်း
စက်တင်ဘာ ၃၀–အောက်တိုဘာ ၆
ကျမ်းစာထဲက အဖိုးတန်ဘဏ္ဍာများ | ယာကုပ် ၁–၂
“အပြစ်နဲ့ သေခြင်းကို ပို့ဆောင်တဲ့လမ်း”
သွေးဆောင်မှု
သွေးဆောင်ခံရတယ်ဆိုတာ တစ်ခုခု၊ အထူးသဖြင့် မှားယွင်းတဲ့အရာ တစ်ခုခုဆီ ဆွဲဆောင်ခံရတာကို ဆိုလိုတယ်။ ဥပမာ၊ သင် ဈေးဝယ်ထွက်ရင်း လိုချင်တဲ့ ပစ္စည်းတစ်ခုကို တွေ့သွားတယ် ဆိုပါစို့။ ဘယ်သူမှ မသိအောင် ခိုးယူဖို့ အတွေးပေါ်လာတယ်။ ဒါပေမဲ့ အမှားအမှန်သိစိတ်က မဖြစ်ဘူးလို့ ပြောတယ်။ ဒါနဲ့ အဲဒီအတွေးကို ဖျောက်လိုက်တယ်။ ဒီအခြေအနေမှာ သွေးဆောင်မှုကို သင် အနိုင်ယူလိုက်နိုင်ပြီ။
သမ္မာကျမ်းစာ ပြောဆိုရာ
မကောင်းတဲ့သူမို့လို့ သွေးဆောင်ခံရတာ မဟုတ်ပါဘူး။ လူတိုင်း သွေးဆောင်ခံရကြတယ်လို့ ကျမ်းစာ ပြောတယ်။ (၁ ကောရိန္သု ၁၀:၁၃) သွေးဆောင်မှုကို တုံ့ပြန်ပုံကသာ အရေးကြီးတာပါ။ တချို့က မသင့်တော်တဲ့ ဆန္ဒကို ကြာရှည် စဉ်းစားနေလို့ မကြာခင်မှာပဲ အလျှော့ပေးလိုက်မိတယ်။ တချို့ကတော့ မှားတဲ့အရာကို အတွေးထဲကနေ ချက်ချင်း ဖျောက်ပစ်လိုက်တယ်။
“ကိုယ့်အလိုဆန္ဒရဲ့ ဆွဲငင်ဖြားယောင်းမှုကို ခံရတာကသာ လူတိုင်းအတွက် စမ်းသပ်မှုပါ။” —ယာကုပ် ၁:၁၄။
သွေးဆောင်မှု
အမှားလုပ်ဖို့ ဦးတည်ပေးတဲ့ အဆင့်တွေကို ကျမ်းစာ ဖော်ပြတယ်။ “[မှားယွင်းတဲ့] အလိုဆန္ဒက ကြီးထွား [“သန္ဓေတည်၊” အောက်ခြေမှတ်ချက်] လာရင် အပြစ်ကို လုပ်မိစေတယ်” လို့ ယာကုပ် ၁:၁၅ ပြောတယ်။ ရိုးရိုးလေး ပြောရရင် မကောင်းတာကို ကြာရှည် စဉ်းစားနေတဲ့အခါ လက်တွေ့ လုပ်ဆောင်တဲ့ အဆင့်ထိ ရောက်သွားတယ်။ ကိုယ်ဝန်ဆောင်အမျိုးသမီး မလွဲမသွေ သားဖွားသလိုပေါ့။ ဒါပေမဲ့ မကောင်းတဲ့ ဆန္ဒနောက် မလိုက်မိအောင် ရှောင်နိုင်ပါတယ်။ အဲဒီဆန္ဒကို ထိန်းချုပ်နိုင်ပါတယ်။
ရှာဖွေလေ့လာ ဘုရားရေးရာရတနာ
it-2 ၂၅၃-၂၅၄
အလင်း
ယေဟောဝါဟာ “ကောင်းကင်အလင်းရဲ့ ဖခင်” ဖြစ်တယ်။ (ယာ ၁:၁၇) “နေ့ဘက်မှာ အလင်းရောင် ရဖို့ နေမင်းကြီးကို ပေးသနားတဲ့ အရှင်၊ ညဘက်မှာ အလင်းရောင် ပေးဖို့ လမင်းနဲ့ ကြယ်စင်တွေအတွက် နိယာမတရားကို ပြဋ္ဌာန်းတဲ့ အရှင်” ဖြစ်ရုံမက (ယေ ၃၁:၃၅) အမှန်တရားအလင်းရဲ့ ရင်းမြစ်လည်း ဖြစ်တယ်။ (၂က ၄:၆) ကိုယ်တော့်ရဲ့ ပညတ်တွေ၊ တရားစီရင်ချက်တွေနဲ့ နှုတ်တော်ထွက်စကားရဲ့ လမ်းပြမှုကို လက်ခံတဲ့သူတွေအတွက်တော့ အဲဒါတွေဟာ အလင်းပဲ။ (ဆ ၄၃:၃။ ၁၁၉:၁၀၅။ ပ ၆:၂၃။ ရှာ ၅၁:၄) “အလင်းတော်ကြောင့်သာ အလင်းကို ကျွန်တော်တို့ မြင်တွေ့နိုင်တာပါ” ဆိုပြီး ဆာလံဆရာ ရေးခဲ့တယ်။ (ဆ ၃၆:၉။ ဆ ၂၇:၁။ ၄၃:၃ တို့နဲ့ နှိုင်းယှဉ်ပါ။) အရုဏ်ဦးအချိန်ကနေ “မွန်းတည့်ချိန်” ရောက်တဲ့အထိ လင်းသည်ထက် လင်းလာတဲ့ အလင်းရောင်လိုပဲ ဖြောင့်မတ်သူတွေရဲ့ လမ်းဟာ ဘုရားရေးရာ ဉာဏ်ပညာကြောင့် ထွန်းလင်းသည်ထက် ထွန်းလင်းလာတယ်။ (ပ ၄:၁၈) ယေဟောဝါဘုရားရဲ့ လမ်းစဉ်အတိုင်း လျှောက်လှမ်းတာဟာ ဘုရားရဲ့ အလင်းမှာ လျှောက်လှမ်းနေတယ်ဆိုတဲ့ သဘောပဲ။ (ရှာ ၂:၃-၅) ဒါပေမဲ့ လူတစ်ယောက်ဟာ ကိစ္စရပ်တွေကို မသန့်ရှင်းတဲ့နည်းနဲ့ ဒါမှမဟုတ် ဆိုးညစ်တဲ့စိတ်နဲ့ ကြည့်တယ်ဆိုရင်တော့ ဘုရားရေးရာ အမှောင်ထုကြီးထဲ ကျနေတာပဲ။ ယေရှု ပြောခဲ့သလိုပါပဲ– “မနာလိုတဲ့စိတ်နဲ့ ကြည့်နေရင် တစ်ကိုယ်လုံး မှောင်နေလိမ့်မယ်။ ခင်ဗျားတို့ရဲ့ အလင်းဟာ တကယ်ပဲ မှောင်နေရင်တော့ တစ်ကိုယ်လုံး မှောင်မိုက်နေမှာပေါ့။”—မ ၆:၂၃။ တရ ၁၅:၉။ ၂၈:၅၄-၅၇။ ပ ၂၈:၂၂။ ၂ပ ၂:၁၄ တို့နဲ့ နှိုင်းယှဉ်ပါ။
it-2 ၂၂၂ ပိုဒ်. ၄
ပညတ်
“တော်ဝင်ပညတ်။” လူသားချင်း ဆက်ဆံရေးနဲ့ပတ်သက်ပြီး ဘုရင်တစ်ပါး ပြဋ္ဌာန်းတဲ့ ဘယ်ပညတ်ထက်မဆို “တော်ဝင်ပညတ်” ဟာ အရေးပါထင်ရှားတယ်။ (ယာ ၂:၈) ပညတ်ပဋိညာဉ်မှာ မေတ္တာဟာ အဓိကပဲ။ ပညတ်ကျမ်းနဲ့ ပရောဖက်ကျမ်းရှိသမျှဟာ ပညတ်နှစ်ခုအပေါ်မှာ အခြေခံထားတာ ဖြစ်ပြီး “လူလူချင်းကို ကိုယ်နဲ့ထပ်တူ ချစ်ပါ” ဆိုတဲ့ တော်ဝင်ပညတ်ဟာ ဒုတိယပညတ် ဖြစ်တယ်။ (မ ၂၂:၃၇-၄၀) ခရစ်ယာန်တွေဟာ ပညတ်ပဋိညာဉ်အောက်မှာ မရှိကြတော့ပေမဲ့ ပဋိညာဉ်သစ်နဲ့ပတ်သက်လာရင်တော့ ဘုရင်ယေဟောဝါနဲ့ သားတော်ဘုရင် ယေရှုခရစ်တို့ရဲ့ ပညတ်အောက်မှာတော့ ရှိနေကြပါတယ်။
ကျမ်းစာဖတ်ရှုခြင်း