သန့်ရှင်းမြင့်မြတ်သောအရာများနှင့်ပတ်သက်၍ ယေဟောဝါနည်းတူ သင်ရှုမြင်သလော

‘မတရားသောမေထုန်၌မှီဝဲသောသူနှင့် ဘုရားသခင်၏မြင့်မြတ်သောအရာများကို မရိုမသေပြုသောသူမရှိစေခြင်းငှာ သတိနှင့်ကြည့်ရှုကြလော့။’—ဟေဗြဲ ၁၂:၁၆၊ ကဘ။

၁။ ယနေ့ခေတ်တွင် ပျံ့နှံ့နေသော အဘယ်သဘောထားမျိုး ယေဟောဝါ၏ကျေးကျွန်များတွင် မရှိကြသနည်း။

လောကသားအများစုသည် သန့်ရှင်းမြင့်မြတ်သောအရာများကို ပို၍ပို၍လျစ်လျူရှုလာနေကြသည်။ ပြင်သစ်လူမှုဗေဒပညာရှင် အက်ဂါမော်ရန် ဤသို့ဆို၏– “လူတို့သည် ဘုရားသခင်၊ သဘာဝတရား၊ အမိမြေ၊ သမိုင်းကြောင်း၊ ဆင်ခြင်တုံတရားစသည့် ကိုယ်ကျင့်တရား၏အခြေခံအားလုံးကို သံသယဖြစ်လာကြသည်။ . . . သူတို့သည် မိမိတို့စိတ်ကြိုက်စံနှုန်းများကို ရွေးချယ်ချမှတ်နေကြသည်။” ယင်းက ‘လောကဝိညာဉ်’ သို့မဟုတ် “ငြင်းဆန်သောသူတို့၌ပြုပြင်သောဝိညာဉ်” ကိုထင်ဟပ်နေခြင်းပင်ဖြစ်သည်။ (၁ ကောရိန္သု ၂:၁၂; ဧဖက် ၂:၂) ယေဟောဝါထံအပ်နှံပြီး ကိုယ်တော်၏တော်မှန်သော အကြွင်းမဲ့ပိုင်သအုပ်စိုးခွင့်ကို လိုလိုလားလားလက်အောက်ခံသူတို့မူ အဆိုပါမထီလေးစားပြုသည့်စိတ်ထားမျိုးမရှိပေ။ (ရောမ ၁၂:၁၊ ၂) ယင်းအစား ဘုရားသခင်၏ကျေးကျွန်များသည် ယေဟောဝါအားဝတ်ပြုရာတွင် သန့်ရှင်းမြင့်မြတ်မှု၏ အရေးပါသောအခန်းကဏ္ဍကို သိမှတ်နားလည်ကြသည်။ ကျွန်ုပ်တို့၏အသက်တာတွင် အဘယ်အရာများသည် သန့်ရှင်းမြင့်မြတ်သောအရာ ဖြစ်သင့်သနည်း။ ဤဆောင်းပါးတွင် ဘုရားသခင့်ကျေးကျွန်အားလုံးက မြင့်မြတ်သည်ဟုယူဆသော ကဏ္ဍငါးခုကို ဆွေးနွေးပါမည်။ ခရစ်ယာန်အစည်းအဝေးများ၏ သန့်ရှင်းမြင့်မြတ်မှုကို နောက်ဆောင်းပါးတွင် ဆွေးနွေးပါမည်။ သို့သော် “သန့်ရှင်းမြင့်မြတ်ခြင်း” ဟူသည် အမှန်တကယ် ဘာကိုဆိုလိုသနည်း။

၂၊ ၃။ (က) သမ္မာကျမ်းစာတွင် ယေဟောဝါ၏သန့်ရှင်းမြင့်မြတ်မှုကို မည်သို့အလေးပေးဖော်ပြထားသနည်း။ (ခ) ယေဟောဝါ၏နာမတော်ကို သန့်ရှင်းမြင့်မြတ်သည်ဟု အဘယ်နည်းဖြင့်ရှုမြင်ကြသနည်း။

^၂ ဟေဗြဲကျမ်းစာစောင်တွင် “သန့်ရှင်းမြင့်မြတ်ခြင်း” ဟူသောစကားလုံးသည် သီးခြားဖြစ်ခြင်းဟူသော သဘောဆောင်သည်။ ဝတ်ပြုရေးတွင် “သန့်ရှင်းမြင့်မြတ်ခြင်း” ဟူသည် ပုံမှန်အသုံးပြုရာတို့မှ သီးသန့်ခွဲခြားထားခြင်း သို့မဟုတ် အထွတ်အမြတ်ထားခြင်းနှင့်ဆိုင်သည်။ ယေဟောဝါသည် အပြည့်ဝဆုံးသဘောဖြင့် သန့်ရှင်းမြင့်မြတ်တော်မူသည်။ ကိုယ်တော့်ကို ‘သန့်ရှင်းတော်မူသောဘုရားသခင်’ ဟုခေါ်ဆိုထားသည်။ (သု. ၉:၁၀) ရှေးဣသရေလနိုင်ငံတွင် ယဇ်ပုရောဟိတ်မင်းကြီးသည် “သန့်ရှင်းခြင်းကို ယေဟောဝါပိုင်ဆိုင်” ဟူသောစကားလုံးများ ထွင်းထားသည့် ရွှေပြားသင်းကျစ်ကို ခေါင်းပေါင်းပေါ် တပ်ဆင်ရသည်။ (ထွက်မြောက်ရာ ၂၈:၃၆၊ ၃၇၊ ကဘ) ယေဟောဝါ၏ပလ္လင်တော်ဝန်းကျင်တွင်နေရသော ကောင်းကင်တမန်ခေရုဗိမ်နှင့် သရပ်တို့သည် ‘ကောင်းကင်ဗိုလ်ခြေအရှင် ထာဝရဘုရားသခင်သည် သန့်ရှင်းတော်မူ၏။ သန့်ရှင်းတော်မူ၏။ သန့်ရှင်းတော်မူ၏’ ဟုကြွေးကြော်နေကြောင်း သမ္မာကျမ်းစာတွင် ပုံဖော်ထားသည်။ (ဟေရှာယ ၆:၂၊ ၃; ဗျာ. ၄:၆-၈) ထိုအထပ်ထပ်ကြွေးကြော်မှုက ယေဟောဝါသည် အမြင့်ဆုံးအတိုင်းအတာအထိ သန့်ရှင်းစင်ကြယ်မြင့်မြတ်ကြောင်း အလေးပေးဖော်ပြသည်။ အမှန်မှာ ကိုယ်တော်သည် သန့်ရှင်းမြင့်မြတ်မှုအားလုံး၏ ရင်းမြစ်ဖြစ်တော်မူသည်။

^၃ ယေဟောဝါ၏နာမတော်သည် သန့်ရှင်းမြင့်မြတ်တော်မူသည်။ ဆာလံဆရာက “ကြီးမြတ်၍ ကြောက်ရွံ့ဖွယ်သောနာမတော်ကို ချီးမွမ်းကြစေ။ အကြောင်းမူကား နာမတော်သည် သန့်ရှင်းခြင်းရှိသတည်း” ဟုကြွေးကြော်ခဲ့သည်။ (ဆာလံ ၉၉:၃) “ကောင်းကင်ဘုံ၌ရှိတော်မူသော အကျွန်ုပ်တို့အဘ၊ ကိုယ်တော်၏နာမတော်အား ရိုသေလေးမြတ်ခြင်း [“သန့်ရှင်းမြင့်မြတ်ခြင်း၊” ကဘ] ရှိပါစေသော” ဟုဆုတောင်းရန် ယေရှုသင်ပေးခဲ့သည်။ (မဿဲ ၆:၉) ယေရှု၏မိခင်မာရိ ဤသို့ဆိုသည်– ‘ငါ့စိတ်နှလုံးသည် ထာဝရဘုရားသခင်ကိုချီးမြှောက်၏။ တန်ခိုးနှင့်ပြည့်စုံတော်မူသော ဘုရားသခင်သည် ကြီးသောအမှုများကို ငါ့အားပြုတော်မူပြီ။ ထိုဘုရားသခင်၏နာမတော်သည် သန့်ရှင်းတော်မူ၏။’ (လုကာ ၁:၄၆၊ ၄၉၊ သမ္မာ) ယေဟောဝါ၏ကျေးကျွန်များသည် ကိုယ်တော်၏နာမတော်ကို သန့်ရှင်းမြင့်မြတ်သည်ဟုရှုမြင်ကြပြီး ထိုမြင့်မြတ်သောနာမတော်အား ရှုတ်ချစရာဖြစ်စေမည့်အရာမှန်သမျှကို ရှောင်ကြသည်။ ထို့ပြင် သန့်ရှင်းမြင့်မြတ်မှုနှင့်ပတ်သက်၍ ယေဟောဝါနည်းတူ ရှုမြင်ကြသည်။ သန့်ရှင်းမြင့်မြတ်သည်ဟု ကိုယ်တော်ရှုမြင်ရာများကို ကျွန်ုပ်တို့လည်း အလားတူရှုမြင်ကြသည်။—အာမုတ် ၅:၁၄၊ ၁၅။

ယေရှုကို အဘယ်ကြောင့် အလွန်ရိုသေလေးစားရ

၄။ သမ္မာကျမ်းစာတွင် ယေရှုကို “သန့်ရှင်းတော်မူသောအရှင်” ဟု အဘယ်ကြောင့်ခေါ်ဆိုထားသနည်း။

^၄ ယေရှုသည် သန့်ရှင်းတော်မူသောဘုရားသခင် ယေဟောဝါ၏ “တစ်ပါးတည်းသောသားတော်” အနေနှင့် သန့်ရှင်းမြင့်မြတ်စွာ ဖန်ဆင်းခံခဲ့ရသည်။ (ယောဟန် ၁:၁၄; ကောလောသဲ ၁:၁၅; ဟေဗြဲ ၁:၁-၃) ထို့ကြောင့် ကိုယ်တော်သည် “ဘုရားသခင်၏သန့်ရှင်းတော်မူသောအရှင်” ဖြစ်တော်မူသည်။ (ယောဟန် ၆:၆၉၊ သမ္မာ) ယေရှု၏အသက်ကို ကောင်းကင်မှမြေကြီးသို့ ပြောင်းရွှေ့ခဲ့ချိန်တွင် ကိုယ်တော်သည် သန့်ရှင်းမြင့်မြတ်တော်မူဆဲပင်၊ အကြောင်းမှာ မာရိသည် သန့်ရှင်းသောဝိညာဉ်တော်တန်ခိုးအားဖြင့် ယေရှုကိုဖွားမြင်ခဲ့ခြင်းကြောင့်ဖြစ်၏။ ကောင်းကင်တမန်တစ်ပါးက မာရိကို ဤသို့ဆိုသည်– “သန့်ရှင်းသောဝိညာဉ်တော်သည် သင်၏အပေါ်မှာသက်ရောက်တော်မူ၍ . . . ထိုသန့်ရှင်းသောသားသည်လည်း ဘုရားသခင်၏သားတော်ဟု ခေါ်ဝေါ်သမုတ်ခြင်းကိုခံရလိမ့်မည်။” (လုကာ ၁:၃၅) ယေရုရှလင်မြို့မှ ခရစ်ယာန်များသည် ယေဟောဝါထံဆုတောင်းရာတွင် ဘုရားသခင့်သားတော်ကို “သန့်ရှင်းသောကျွန်ရင်းယေရှု” ဟုနှစ်ကြိမ်တိုင်ခေါ်ဆိုခဲ့သည်။—တမန်တော် ၄:၂၈၊ ၃၀၊ သမ္မာ။

၅။ ယေရှုသည် မြေကြီးပေါ်တွင် အဘယ်မြင့်မြတ်သောတာဝန်ကို ထမ်းဆောင်ခဲ့သနည်း။ ကိုယ်တော်၏အသွေးတော်သည် အဘယ်ကြောင့် တန်ဖိုးရှိသနည်း။

^၅ ယေရှု၌ မြေကြီးပေါ်တွင်ထမ်းဆောင်ရမည့် မြင့်မြတ်သောတာဝန်ရှိသည်။ ကိုယ်တော်သည် အေဒီ ၂၉ တွင် နှစ်ခြင်းခံစဉ် ယေဟောဝါ၏မဟာဝိညာဉ်ရေး ဝတ်ပြုရာအိမ်တော်၏ ယဇ်ပုရောဟိတ်မင်းအဖြစ် ခန့်အပ်ခံခဲ့ရသည်။ (လုကာ ၃:၂၁၊ ၂၂; ဟေဗြဲ ၇:၂၆; ၈:၁၊ ၂) ထို့ပြင် ယဇ်သကာအဖြစ် ကိုယ်တော်သေဆုံးရမည်ဖြစ်သည်။ ကိုယ်တော်သွန်းတော်မူသော အသွေးတော်အားဖြင့် အပြစ်သားများကို ကယ်တင်ရန် ရွေးနုတ်ဖိုးပေးနိုင်မည်ဖြစ်သည်။ (မဿဲ ၂၀:၂၈; ဟေဗြဲ ၉:၁၄) ထို့ကြောင့် ကျွန်ုပ်တို့သည် ယေရှု၏အသွေးတော်ကို တန်ဖိုးရှိသောအရာ၊ မြင့်မြတ်သောအရာအဖြစ် ရှုမြင်ကြသည်။—၁ ပေတရု ၁:၁၉။

၆။ ယေရှုခရစ်ကို ကျွန်ုပ်တို့မည်သို့သဘောထားသနည်း၊ အဘယ်ကြောင့်နည်း။

^၆ ကျွန်ုပ်တို့၏ဘုရင်နှင့် ယဇ်ပုရောဟိတ်မင်း ယေရှုခရစ်ကို အလွန်ရိုသေလေးစားကြောင်း ဖော်ပြလျက် တမန်တော်ပေါလု ဤသို့ရေးခဲ့သည်– “ဘုရားသခင်သည် ကိုယ်တော်ကိုအလွန်ချီးမြှောက်၍ ဘွဲ့နာမတကာတို့ထက်ကြီးမြတ်သော ဘွဲ့နာမကို ပေးသနားတော်မူ၏။ အကြောင်းမူကား ကောင်းကင်သတ္တဝါ၊ မြေကြီးသတ္တဝါ၊ မြေကြီးအောက်၌ရှိသောသတ္တဝါတည်းဟူသော ခပ်သိမ်းသောသတ္တဝါတို့သည် ယေရှု၏ဘွဲ့နာမတော်ကိုဒူးထောက်၍ ယေရှုခရစ်သည် သခင်ဖြစ်တော်မူ၏ဟု နှုတ်နှင့်ဝန်ခံသဖြင့် ခမည်းတော်ဘုရား၏ဘုန်းအသရေတော်ကို ထင်ရှားစေကြမည်အကြောင်းတည်း။” (ဖိလိပ္ပိ ၂:၉-၁၁) ခရစ်ယာန်အသင်းတော်၏ဦးခေါင်းနှင့် အုပ်စိုးနေသောဘုရင်ဖြစ်သည့် ကျွန်ုပ်တို့၏ခေါင်းဆောင်ယေရှုခရစ်ကို ရွှင်လန်းစွာလက်အောက်ခံခြင်းဖြင့် သန့်ရှင်းမြင့်မြတ်မှုနှင့်ပတ်သက်၍ ယေဟောဝါနည်းတူ ရှုမြင်ကြောင်း ဖော်ပြကြသည်။—မဿဲ ၂၃:၁၀; ကောလောသဲ ၁:၁၈။

၇။ ခရစ်တော်ကိုလက်အောက်ခံကြောင်း ကျွန်ုပ်တို့မည်သို့တင်ပြကြသနည်း။

^၇ ခရစ်တော်ကိုလက်အောက်ခံခြင်းတွင် ကိုယ်တော်ညွှန်ကြားလျက်ရှိသော လုပ်ငန်းကိုဦးဆောင်ရန် အသုံးတော်ခံနေရသော အမျိုးသားများကို ရိုသေလေးစားမှုတင်ပြခြင်း ပါဝင်သည်။ အုပ်ချုပ်ရေးအဖွဲ့ဝင် ဝိညာဉ်တော်ဖွားများနှင့် ဌာနခွဲများ၊ ခရိုင်များ၊ တိုက်နယ်များ၊ အသင်းတော်များတွင် ၎င်းတို့ခန့်အပ်ထားသော ကြီးကြပ်မှူးများ၏ အခန်းကဏ္ဍကို မြင့်မြတ်သောအရာအဖြစ် အသိအမှတ်ပြုသင့်သည်။ ထို့ကြောင့် ထိုအစီအစဉ်ကို နက်ရှိုင်းစွာရိုသေလေးစားပြီး လက်အောက်ခံထိုက်ပေသည်။—ဟေဗြဲ ၁၃:၇၊ ၁၇။

သန့်ရှင်းသောလူမျိုး

၈၊ ၉။ (က) ဣသရေလလူမျိုးသည် မည်သည့်နည်းဖြင့် သန့်ရှင်းသောလူမျိုးဖြစ်သနည်း။ (ခ) ယေဟောဝါသည် သန့်ရှင်းမြင့်မြတ်မှုနှင့်ပတ်သက်သောမူကို ဣသရေလလူမျိုးအား မည်သို့စွဲမှတ်စေခဲ့သနည်း။

^၈ ယေဟောဝါသည် ဣသရေလလူမျိုးနှင့် ပဋိညာဉ်တစ်ခုဖွဲ့တော်မူခဲ့သည်။ ယင်းကြောင့် ထိုလူမျိုးသစ်သည် အခွင့်ထူးတစ်ရပ်ရရှိခဲ့သည်။ သူတို့သည် သန့်ရှင်းလာသည်၊ တစ်နည်းအားဖြင့် သီးခြားခွဲထားခံရကြသည်။ ယေဟောဝါကိုယ်တော်တိုင် ဤသို့မိန့်တော်မူ၏– ‘ငါထာဝရဘုရားသခင် သန့်ရှင်းသည်ဖြစ်၍ သင်တို့ကို ငါအလိုရှိသဖြင့် အခြားသောအမျိုးနှင့်ခွဲထားသောကြောင့် ငါ့အဖို့သန့်ရှင်းခြင်းရှိရကြမည်။’—ဝတ်ပြုရာ ၁၉:၂; ၂၀:၂၆။

^၉ ဣသရေလလူမျိုး ဖွဲ့စည်းတည်ထောင်သည်နှင့် ယေဟောဝါသည် သန့်ရှင်းမြင့်မြတ်မှုနှင့်ပတ်သက်သောမူကို သူတို့အား စွဲမှတ်စေခဲ့သည်။ ပညတ်တော်ဆယ်ပါးပေးသည့်သိနာတောင်ကို သန့်ရှင်းမြင့်မြတ်သည်ဟု ယူမှတ်ရသောကြောင့် ယင်းကို ထိမိလျှင်ပင် သေဆုံးမည်ဖြစ်သည်။ (ထွက်မြောက်ရာ ၁၉:၁၂၊ ၂၃) ယဇ်ပုရောဟိတ်တာဝန်၊ တဲတော်နှင့် ယင်း၏အသုံးအဆောင်များကိုလည်း သန့်ရှင်းမြင့်မြတ်သည်ဟု ယူမှတ်ရမည်။ (ထွက်မြောက်ရာ ၃၀:၂၆-၃၀) ခရစ်ယာန်အသင်းတော်တွင်ကော မည်သို့နည်း။

၁၀၊ ၁၁။ ဝိညာဉ်တော်ဖွားများ၏ ခရစ်ယာန်အသင်းတော်သည် သန့်ရှင်းမြင့်မြတ်သည်ဟု အဘယ်ကြောင့်ဆိုနိုင်သနည်း။ ယင်းက “အခြားသိုး” အပေါ် အဘယ်အကျိုးသက်ရောက်မှုရှိသနည်း။

^၁၀ ဝိညာဉ်တော်ဖွားများ၏ ခရစ်ယာန်အသင်းတော်သည် ယေဟောဝါရှေ့တွင် သန့်ရှင်းမြင့်မြတ်သည်။ (၁ ကောရိန္သု ၁:၂) အမှန်မှာ မည်သည့်အချိန်တွင်မဆို မြေကြီးပေါ်အသက်ရှင်ခဲ့သော ဝိညာဉ်တော်ဖွားခရစ်ယာန်တစ်အုပ်စုလုံးကို သန့်ရှင်းသောဝတ်ပြုရာအိမ်တော်နှင့် ခိုင်းနှိုင်းထားသည်။ သို့သော် ယေဟောဝါ၏မဟာဝိညာဉ်ရေး ဝတ်ပြုရာအိမ်တော်ကို သူတို့နှင့်သာဖွဲ့စည်းထားခြင်းမဟုတ်ပေ။ ယေဟောဝါသည် သန့်ရှင်းသောဝိညာဉ်တော်အားဖြင့် ထိုဝတ်ပြုရာအိမ်တော်တွင် ကျိန်းဝပ်တော်မူသည်။ တမန်တော်ပေါလု ဤသို့ရေးခဲ့သည်– ‘ထိုကျောက် [ယေရှုခရစ်] နှင့် တစ်တိုက်လုံးသည် စေ့စပ်၍ကြီးပွားသဖြင့် သခင်ဘုရားအဖို့အလို့ငှာ သန့်ရှင်းသောဝတ်ပြုရာအိမ်တော်ဖြစ်၏။ ထိုအိမ်တော်၌လည်း ဘုရားသခင်သည် ဝိညာဉ်တော်အားဖြင့် ကျိန်းဝပ်တော်မူခြင်းအလို့ငှာ သင်တို့သည် ငါတို့နှင့်အတူ တည်ဆောက်လျက်ရှိကြ၏။’—ဧဖက် ၂:၂၁၊ ၂၂; ၁ ပေတရု ၂:၅၊ ၉။

^၁၁ ဝိညာဉ်တော်ဖွားခရစ်ယာန်များထံ ပေါလု ဤသို့ထပ်ရေးသည်– ‘သင်တို့သည် ဘုရားသခင်၏ ဝတ်ပြုရာအိမ်တော်ဖြစ်ကြသည်ကိုလည်းကောင်း၊ ဘုရားသခင်၏ဝိညာဉ်တော်သည် သင်တို့အထဲ၌ ကျိန်းဝပ်တော်မူသည်ကိုလည်းကောင်း မသိကြသလော။ . . . ဘုရားသခင်၏ဝတ်ပြုရာအိမ်တော်သည် သန့်ရှင်းရ၏။ သင်တို့သည်လည်း ထိုအိမ်တော်ဖြစ်ကြ၏။’ (၁ ကောရိန္သု ၃:၁၆၊ ၁၇) ယေဟောဝါသည် မိမိ၏ဝိညာဉ်တော်အားဖြင့် သူတို့တွင် “ကျိန်းဝပ်” ပြီး “လှည့်လည်” တော်မူသည်။ (၂ ကောရိန္သု ၆:၁၆) ကိုယ်တော်သည် မိမိ၏သစ္စာရှိ “ကျွန်” များကို အဆက်မပြတ်လမ်းညွှန်ပေးတော်မူသည်။ (မဿဲ ၂၄:၄၅-၄၇) “အခြားသိုး” သည် ဝတ်ပြုရာအိမ်တော်အတန်းအစားနှင့် ပူးပေါင်းရသည့် အခွင့်ထူးကို တန်ဖိုးထားမြတ်နိုးကြသည်။—ယောဟန် ၁၀:၁၆; မဿဲ ၂၅:၃၇-၄၀။

ကျွန်ုပ်တို့၏ ခရစ်ယာန်အသက်တာတွင် သန့်ရှင်းမြင့်မြတ်ရာများ

၁၂။ ကျွန်ုပ်တို့၏အသက်တာတွင် အဘယ်အရာများသည် သန့်ရှင်းမြင့်မြတ်သနည်း။ အဘယ်ကြောင့်နည်း။

^၁၂ ခရစ်ယာန်အသင်းတော်ရှိ ဝိညာဉ်တော်ဖွားအဖွဲ့ဝင်များ၊ သူတို့အပေါင်းပါများ၏အသက်တာနှင့် ဆက်စပ်နေသောအရာများစွာသည် သန့်ရှင်းမြင့်မြတ်သည်မှာ မဆန်းပေ။ ယေဟောဝါနှင့်ကျွန်ုပ်တို့၏ဆက်ဆံရေးသည် သန့်ရှင်းမြင့်မြတ်ရာတစ်ခုဖြစ်သည်။ (၁ ရာဇဝင်ချုပ် ၂၈:၉; ဆာလံ ၃၆:၇) ထိုဆက်ဆံရေးသည် အလွန်တန်ဖိုးရှိသောကြောင့် မည်သည့်အရာ၊ မည်သူကမျှ ယင်းကိုထိခိုက်ပျက်စီးစေခွင့်မပြုကြပေ။ (၂ ရာဇဝင်ချုပ် ၁၅:၂; ယာကုပ် ၄:၇၊ ၈) ယေဟောဝါနှင့် ရင်းနှီးသောဆက်ဆံရေးရှိနေရန် ဆုတောင်းခြင်းသည် အရေးပါသောကဏ္ဍမှပါဝင်သည်။ ဆုတောင်းခြင်းကို အလွန်မြင့်မြတ်သောအရာအဖြစ် ပရောဖက်ဒံယေလရှုမြင်ခဲ့ရာ အသက်အန္တရာယ်ရှိသည့်ကြားမှပင် ယေဟောဝါထံ သစ္စာရှိရှိဆက်ဆုတောင်းခဲ့သည်။ (ဒံယေလ ၆:၇-၁၁) ဝိညာဉ်တော်ဖွားခရစ်ယာန်များ သို့မဟုတ် ‘သန့်ရှင်းသူတို့၏ ဆုတောင်းချက်များ’ ကို ဝတ်ပြုရာအိမ်တော်တွင် ဘုရားသခင်အား ဝတ်ပြုရာ၌အသုံးပြုသော နံ့သာပေါင်းနှင့်ခိုင်းနှိုင်းထားသည်။ (ဗျာ. ၅:၈; ၈:၃၊ ၄; ဝတ်ပြုရာ ၁၆:၁၂၊ ၁၃) ထိုပုံဆောင်ချက်သည် ဆုတောင်းခြင်း၏မြင့်မြတ်မှုကို ပေါ်လွင်စေသည်။ စကြဝဠာအကြွင်းမဲ့ပိုင်သအုပ်စိုးရှင်နှင့် ဆက်သွယ်နိုင်ခြင်းမှာ အမှန်အခွင့်ထူးပင်! ဆုတောင်းခြင်းကို ကျွန်ုပ်တို့အသက်တာတွင် မြင့်မြတ်ရာအဖြစ်ရှုမြင်ရမည်မှာ ယုံမှားဖွယ်မရှိပေ!

၁၃။ မည်သည့်စွမ်းအားသည် မြင့်မြတ်သနည်း။ ယင်းသည် ကျွန်ုပ်တို့၏အသက်တာတွင် အတားအဆီးမရှိစီးဆင်းရန် ဘာပြုလုပ်သင့်သနည်း။

^၁၃ ဝိညာဉ်တော်ဖွားခရစ်ယာန်များနှင့် သူတို့အပေါင်းပါများ၏ အသက်တာတွင် သန့်ရှင်းမြင့်မြတ်သောစွမ်းအားရှိသည်။ ယင်းမှာ သန့်ရှင်းသောဝိညာဉ်တော်ဖြစ်သည်။ ထိုဝိညာဉ်တော်သည် ယေဟောဝါ၏ တက်ကြွလှုပ်ရှားသောစွမ်းအားဖြစ်ပြီး သန့်ရှင်းသောဘုရားသခင်၏ အလိုတော်နှင့်အညီ အစဉ်လှုပ်ရှားဆောင်ရွက်သောကြောင့် “သန့်ရှင်းသောဝိညာဉ်တော်” ဟုခေါ်သည်။ (ယောဟန် ၁၄:၂၆; ရောမ ၁:၃၊ ၄) ယေဟောဝါသည် သန့်ရှင်းသောဝိညာဉ်တော်အားဖြင့် မိမိကျေးကျွန်များကို သတင်းကောင်းဟောပြောနိုင်စွမ်း ပေးသနားတော်မူသည်။ (တမန်တော် ၁:၈; ၄:၃၁) ယေဟောဝါသည် မိမိ၏ “စကားတော်ကို နားထောင်သောသူ၊” “ဝိညာဉ်ပကတိအတိုင်းကျင့်” သောသူများကို ဝိညာဉ်တော်ပေးတော်မူ၏။ (တမန်တော် ၅:၃၂; ဂလာတိ ၅:၁၆၊ ၂၅; ရောမ ၈:၅-၈) ထိုတန်ခိုးကြီးမားသောစွမ်းအားကြောင့် ခရစ်ယာန်များသည် အရည်အသွေးကောင်းများဖြစ်သည့် ဝိညာဉ်အသီးများသီးပွင့်နိုင်ပြီး ‘သန့်ရှင်းသောအကျင့်ကိုကျင့်ခြင်း၊ ဘုရားသခင်ဝတ်၌မွေ့လျော်ခြင်း’ တို့တင်ပြနိုင်သည်။ (ဂလာတိ ၅:၂၂၊ ၂၃; ၂ ပေတရု ၃:၁၂) သန့်ရှင်းသောဝိညာဉ်တော်ကို မြင့်မြတ်သောအရာအဖြစ် ကျွန်ုပ်တို့ ရှုမြင်ပါက ယင်းကို စိတ်နာစေသည့်၊ အတားအဆီးဖြစ်စေသည့်အရာများကို ပြုလုပ်မည်မဟုတ်ပေ။—ဧဖက် ၄:၃၀။

၁၄။ ဝိညာဉ်တော်ဖွားများသည် အဘယ်အခွင့်ထူးကို သန့်ရှင်းမြင့်မြတ်သည်ဟု ယူမှတ်ကြသနည်း။ အခြားသိုးများသည် ယင်းအခွင့်ထူးတွင် မည်သို့ပါဝင်ကြသနည်း။

^၁၄ မြင့်မြတ်သောဘုရားသခင် ယေဟောဝါ၏နာမတော်ခံယူခွင့်နှင့် ကိုယ်တော့်သက်သေများဖြစ်ခွင့်ကို သန့်ရှင်းမြင့်မြတ်ရာအဖြစ် ကျွန်ုပ်တို့ယူမှတ်သည်။ (ဟေရှာယ ၄၃:၁၀-၁၂၊ ၁၅) ဝိညာဉ်တော်ဖွားခရစ်ယာန်များကို “ပဋိညာဉ်တရားသစ်၏ အမှုတော်ဆောင်” အဖြစ် ယေဟောဝါအရည်အချင်းပြည့်မီစေတော်မူသည်။ (၂ ကောရိန္သု ၃:၅၊ ၆၊ သမ္မာ) သူတို့သည် ဘုရားသခင့် “နိုင်ငံတော်နှင့်ယှဉ်သောဧဝံဂေလိတရား” ဟောရန်နှင့် ‘လူမျိုးတကာတို့ကိုတပည့်ဖြစ်စေ’ ရန် တာဝန်ရထားကြသည်။ (မဿဲ ၂၄:၁၄; ၂၈:၁၉၊ ၂၀) အဆိုပါတာဝန်ကို သူတို့သစ္စာရှိရှိထမ်းဆောင်နေကြသည်။ သိုးကဲ့သို့သောစိတ်ထားရှိသူ သန်းပေါင်းများစွာသည် ယင်းကိုတုံ့ပြန်နေကြပြီး “ဘုရားသခင်သည် သင်နှင့်အတူရှိတော်မူသည်ဟု အကျွန်ုပ်တို့သည်ကြားသိ၍ သင်တို့နှင့်အတူလိုက်ပါမည်” ဟု ပုံဆောင်သဘောအရ ဆိုနေကြသည်။ (ဇာခရိ ၈:၂၃) “ဘုရားသခင်၏ အမှုတော်ထမ်း” များဖြစ်သော ဝိညာဉ်တော်ဖွားများအတွက် သူတို့သည် ‘လယ်သမား’ နှင့် ‘စပျစ်ဥယျာဉ်စောင့်’ များအဖြစ် ရွှင်လန်းစွာအမှုဆောင်ကြသည်။ ဤနည်းဖြင့် အခြားသိုးသည် ဝိညာဉ်တော်ဖွားများ၏လုပ်ငန်းကို ကမ္ဘာတစ်ခွင် ပျံ့နှံ့စေရာတွင် များစွာကူညီပေးကြသည်။—ဟေရှာယ ၆၁:၅၊ ၆။

၁၅။ တမန်တော်ပေါလုသည် အဘယ်အရာကို မြင့်မြတ်သောအခွင့်ထူးအဖြစ် ယူမှတ်ခဲ့သနည်း။ ကျွန်ုပ်တို့ အဘယ်ကြောင့် ထိုသို့ယူမှတ်ကြသနည်း။

^၁၅ တမန်တော်ပေါလုသည် ခရစ်ယာန်ဓမ္မအမှုကို မြင့်မြတ်သောအရာအဖြစ် ရှုမြင်ခဲ့သည်။ သူသည် “ဘုရားသခင်၏ [“သန့်ရှင်းသော၊” ကဘ] ဧဝံဂေလိတရားကို ဟောပြောသောအမှုကိုဆောင်ရွက်၍ တစ်ပါးအမျိုးသားတို့တွင် ယေရှုခရစ်၏အမှုဆောင်” ဖြစ်ကြောင်းပြောခဲ့သည်။ (ရောမ ၁၅:၁၆) ပေါလုသည် ကောရိန္သုမြို့မှခရစ်ယာန်များထံ စာရေးသောအခါ မိမိခရစ်ယာန်ဓမ္မအမှုကို “ဘဏ္ဍာ” ဟုခေါ်ဆိုခဲ့သည်။ (၂ ကောရိန္သု ၄:၁၊ ၇) ကျွန်ုပ်တို့၏ခရစ်ယာန်ဓမ္မအမှုအားဖြင့် “ဘုရားသခင်၏မြင့်မြတ်သော မိန့်မြွက်ချက်များ” ကို လူတို့အား ကြားသိစေကြသည်။ (၁ ပေတရု ၄:၁၁၊ ကဘ) ထို့ကြောင့် ကျွန်ုပ်တို့သည် ဝိညာဉ်တော်ဖွားဖြစ်စေ၊ အခြားသိုးဖြစ်စေ သက်သေခံခြင်းလုပ်ငန်းကို မြင့်မြတ်သောအခွင့်ထူးအဖြစ် ရှုမြင်ကြသည်။

‘ဘုရားသခင်ကိုကြောက်ရွံ့၍ သန့်ရှင်းခြင်းနှင့်ပြည့်စုံခြင်း’

၁၆။ မြင့်မြတ်သောအရာများကို “မရိုမသေပြုသောသူ” များမဖြစ်စေရန် အဘယ်အရာက ထောက်ကူနိုင်သနည်း။

^၁၆ တမန်တော်ပေါလုသည် ခရစ်ယာန်ချင်းတို့အား မြင့်မြတ်သောအရာများကို “မရိုမသေပြုသောသူ” များမဖြစ်ရန် သတိပေးခဲ့သည်။ ယင်းအစား ‘သန့်ရှင်းခြင်းကိုမီအောင်လိုက်’ ရန်၊ ‘ခါးစွာသောပင်မြစ်ပေါက်၍ နှောင့်ယှက်သဖြင့် လူအများတို့သည် အပြစ်နှင့်မညစ်ညူးစေခြင်းငှာ . . . သတိနှင့်ကြည့်ရှုကြ’ ရန် ဆုံးမခဲ့သည်။ (ဟေဗြဲ ၁၂:၁၄-၁၆) “ခါးစွာသောပင်မြစ်” ဟူသောအသုံးအနှုန်းသည် ခရစ်ယာန်အသင်းတော်၏ ပြုလုပ်ပုံများကို အပြစ်ရှာဝေဖန်သူအချို့ကို ဆိုလိုခြင်းဖြစ်သည်။ ဥပမာ၊ သူတို့သည် အိမ်ထောင်မင်္ဂလာ၏မြင့်မြတ်မှု သို့မဟုတ် ကိုယ်ကျင့်တရားသန့်ရှင်းမှုနှင့်ပတ်သက်သော ယေဟောဝါ၏အမြင်ကို ဆန့်ကျင်ခြင်းဖြစ်နိုင်သည်။ (၁ သက်သာလောနိတ် ၄:၃-၇; ဟေဗြဲ ၁၃:၄) သို့မဟုတ် ‘အမှန်တရားလမ်းမှလွဲသွား’ သူတို့၏ “တရားမဲ့ဖြစ်သောအချည်းနှီးစကား” ဖြစ်သည့် အယူဖောက်ပြန်မှုများတွင် ပါဝင်ခဲ့ကြခြင်းဖြစ်နိုင်သည်။—၂ တိမောသေ ၂:၁၆-၁၈။

၁၇။ ဝိညာဉ်တော်ဖွားများသည် သန့်ရှင်းမြင့်မြတ်မှုနှင့်ပတ်သက်၍ ယေဟောဝါနည်းတူ ရှုမြင်ရန် အဘယ်ကြောင့် အဆက်မပြတ် ကြိုးပမ်းအားထုတ်ဖို့လိုသနည်း။

^၁၇ ပေါလုသည် သူ၏ဝိညာဉ်တော်ဖွားညီအစ်ကိုများထံ ဤသို့ရေးခဲ့သည်– ‘ချစ်သူတို့၊ ကိုယ်ခန္ဓာ၏အညစ်အကြေး၊ စိတ်ဝိညာဉ်၏အညစ်အကြေးရှိသမျှတို့နှင့် ကိုယ်ကိုကိုယ်ကင်းစင်စေလျက် ဘုရားသခင်ကိုကြောက်ရွံ့၍ သန့်ရှင်းခြင်းနှင့်ပြည့်စုံကြကုန်အံ့။’ (၂ ကောရိန္သု ၇:၁) ယင်းက “ကောင်းကင်ဘုံနှင့်စပ်ဆိုင်သော ခေါ်ဖိတ်တော်မူခြင်းကျေးဇူးကိုခံရသော” ဝိညာဉ်တော်ဖွားခရစ်ယာန်များသည် မိမိတို့၏ဘဝကဏ္ဍတိုင်းတွင် သန့်ရှင်းမြင့်မြတ်မှုနှင့်ပတ်သက်၍ ယေဟောဝါနည်းတူ ရှုမြင်ကြောင်း တင်ပြရန် အဆက်မပြတ် ကြိုးပမ်းအားထုတ်ရမည်ကို ဖော်ပြသည်။ (ဟေဗြဲ ၃:၁) ထိုနည်းတူ တမန်တော်ပေတရုကလည်း သူ၏ဝိညာဉ်တော်ဖွားညီအစ်ကိုများကို ဤသို့တိုက်တွန်းခဲ့သည်– “အထက်က သင်တို့သည် မှောင်မိုက်ထဲမှာကျင့်သော တပ်မက်ခြင်းတရားကို ယခုမလိုက်မကျင့်ဘဲ နားထောင်တတ်သောသူငယ်ကဲ့သို့ဖြစ်၍ သင်တို့ကိုခေါ်တော်မူသောသူသည် သန့်ရှင်းတော်မူသည်နည်းတူ ကျင့်ကြံပြုမူသမျှတို့၌ သန့်ရှင်းခြင်းရှိကြလော့။”—၁ ပေတရု ၁:၁၄၊ ၁၅။

၁၈၊ ၁၉။ (က) ‘လူအုပ်ကြီး’ သည် မြင့်မြတ်သောအရာများနှင့်ပတ်သက်၍ ယေဟောဝါနည်းတူ မည်သို့ရှုမြင်ကြသနည်း။ (ခ) ခရစ်ယာန်အသက်တာ၏ အဘယ်မြင့်မြတ်သောကဏ္ဍတစ်ခုကို နောက်ဆောင်းပါးတွင် သုံးသပ်မည်နည်း။

^၁၈ “ကြီးစွာသောဆင်းရဲ” ခြင်းကို ကပ်ကျော်မည့် ‘လူအုပ်ကြီး’ နှင့်ပတ်သက်၍ကော အသို့နည်း။ သူတို့လည်း သန့်ရှင်းမြင့်မြတ်သောအရာများနှင့်ပတ်သက်၍ ယေဟောဝါနည်းတူ ရှုမြင်ကြောင်း သက်သေပြရမည်။ ဗျာ.ကျမ်းစောင်တွင် သူတို့ကို ယေဟောဝါ၏ဝိညာဉ်ရေး ဝတ်ပြုရာအိမ်တော်၌ မြင့်မြတ်သောဝတ်ဖြစ်သည့် ‘ဘုရားသခင်ဝတ်’ ကို ပြုနေသူများအဖြစ် တင်စားထားသည်။ သူတို့သည် ခရစ်တော်၏ရွေးဖိုးပူဇော်သကာကို ယုံကြည်ကြပြီး ပုံဆောင်သဘောအရ “မိမိတို့ဝတ်လုံကို သိုးသငယ်၏အသွေး၌လျှော်၍ဖြူ” စေကြသည်။ (ဗျာ. ၇:၉၊ ၁၄၊ ၁၅) ထို့ကြောင့် ယေဟောဝါရှေ့တွင် စင်ကြယ်သောအနေအထားရှိပြီး ‘ကိုယ်ခန္ဓာ၏အညစ်အကြေး၊ စိတ်ဝိညာဉ်၏အညစ်အကြေးရှိသမျှတို့နှင့် ကိုယ်ကိုကိုယ်ကင်းစင်စေလျက် ဘုရားသခင်ကိုကြောက်ရွံ့၍ သန့်ရှင်းခြင်းနှင့်ပြည့်စုံ’ နေရန် တာဝန်ရှိသည်။

^၁၉ ဝိညာဉ်တော်ဖွားခရစ်ယာန်များနှင့် သူတို့အပေါင်းပါများ၏ အသက်တာတွင် အရေးပါသောကဏ္ဍတစ်ခုမှာ ယေဟောဝါကိုဝတ်ပြုရန်နှင့် ကိုယ်တော့်နှုတ်မြွက်တော်ကိုလေ့လာရန် မှန်မှန်စည်းဝေးခြင်းဖြစ်သည်။ ယေဟောဝါသည် မိမိလူမျိုးတော်၏ ထိုသို့သောစုဝေးမှုများကို မြင့်မြတ်သည်ဟု ရှုမြင်တော်မူ၏။ ထိုအရေးပါသောကဏ္ဍတွင် သန့်ရှင်းမြင့်မြတ်မှုနှင့်ပတ်သက်သည့် ယေဟောဝါ၏ရှုမြင်ပုံမျိုး မည်သို့နှင့်အဘယ်ကြောင့်ရှိသင့်ကြောင်း နောက်ဆောင်းပါးတွင် သုံးသပ်ပါမည်။

ပြန်လည်သုံးသပ်ချက်

• ယေဟောဝါ၏ကျေးကျွန်များတွင် အဘယ်လောကအမြင်မျိုး မရှိကြသနည်း။

• ယေဟောဝါသည် အဘယ်ကြောင့် သန့်ရှင်းမြင့်မြတ်မှုအားလုံး၏ရင်းမြစ် ဖြစ်တော်မူသနည်း။

• ခရစ်တော်၏သန့်ရှင်းမြင့်မြတ်မှုကို ရိုသေလေးစားကြောင်း မည်သို့တင်ပြကြသနည်း။

• ကျွန်ုပ်တို့၏အသက်တာတွင် အဘယ်အရာများကို သန့်ရှင်းမြင့်မြတ်ရာများအဖြစ်ရှုမြင်သင့်သနည်း။

[စာမျက်နှာ ၂၃ ပါ ရုပ်ပုံ]

ရှေးဣသရေလနိုင်ငံတွင် ယဇ်ပုရောဟိတ်တာဝန်၊ တဲတော်နှင့် ယင်း၏အသုံးအဆောင်များကို သန့်ရှင်း မြင့်မြတ်ရာအဖြစ်ရှုမြင်

[စာမျက်နှာ ၂၄ ပါ ရုပ်ပုံ]

မြေကြီးပေါ်ရှိ ဝိညာဉ်တော်ဖွားခရစ်ယာန်များသည် သန့်ရှင်းသောဝတ်ပြုရာအိမ်တော်ဖြစ်

[စာမျက်နှာ ၂၅ ပါ ရုပ်ပုံ]

ဆုတောင်းခြင်းနှင့် ခရစ်ယာန်ဓမ္မအမှုသည် မြင့်မြတ်သောအခွင့်ထူးများဖြစ်