သက်ကြီးရွယ်အိုများကို ကြည့်ရှုစောင့်ရှောက်ခြင်း–ခရစ်ယာန်တာဝန်တစ်ခု

“သင်တို့အသက်ကြီး၍ ဆံပင်ဖြူသည်တိုင်အောင် ငါသည် ထိုသို့သောသူဖြစ်၍ ... ဆောင်ရွက်မည်။”—ဟေရှာယ ၄၆:၄။

၁၊ ၂။ ကောင်းကင်ခမည်းတော်နှင့် လူသားမိဘများ၏ ဂရုစိုက်မှုသည် မည်သို့ကွာခြားသနည်း။

အလွန်ချစ်တတ်သောမိဘများသည် မိမိတို့သားသမီးများကို နို့စို့အရွယ်၊ ကလေးဘဝနှင့် ဆယ်ကျော်သက်အရွယ်တစ်လျှောက် ကျွေးမွေးပြုစုပေးကြသည်။ လူငယ်များ ကြီးပြင်းလာ၍ ကိုယ့်အိမ်ထောင်နှင့်ကိုယ်ဖြစ်လာချိန်၌ပင် အမိ၊ အဖတို့သည် မေတ္တာပါစွာ ဂရုစိုက်၊ ကူညီပေးကြသေးသည်။

^၂ သားသမီးများအတွက် လူ့မိဘများ လုပ်ဆောင်နိုင်ရာသည် အကန့်အသတ်ရှိသော်လည်း ကျွန်ုပ်တို့၏ကောင်းကင်ခမည်းတော်မှာမူ မိမိ၏တည်ကြည်သောကျေးကျွန်များကို အစဉ်သဖြင့် မေတ္တာပါစွာ ဂရုစိုက်ကူညီပေးနိုင်သည်။ ရှေးခေတ်မှ ရွေးချယ်ခံလူမျိုးတော်ကို ယေဟောဝါဤသို့မိန့်တော်မူခဲ့သည်– “သင်တို့အသက်ကြီး၍ ဆံပင်ဖြူသည်တိုင်အောင် ငါသည် ထိုသို့သောသူဖြစ်၍ ... ဆောင်ရွက်မည်။” (ဟေရှာယ ၄၆:၄) သက်ကြီးရွယ်အိုခရစ်ယာန်များအတွက် အားတက်စရာစကားများပင်! ယေဟောဝါသည် မိမိအပေါ် ဆက်၍တည်ကြည်သူများကို စွန့်ပစ်တော်မမူ။ ယင်းအစား သူတို့ဘဝတစ်လျှောက်၊ အိုမင်းရင့်ရော်ချိန်အထိပင် သူတို့ကို ကူညီမစ၍ လမ်းညွှန်ပေးမည်ဟု ကိုယ်တော်ကတိပြုတော်မူ၏။—ဆာလံ ၄၈:၁၄။

၃။ ဤဆောင်းပါး၌ အဘယ်အကြောင်း သုံးသပ်မည်နည်း။

^၃ သက်ကြီးရွယ်အိုများအား ယေဟောဝါမေတ္တာပြဂရုစိုက်ပုံကို ကျွန်ုပ်တို့ မည်သို့အတုယူနိုင်သနည်း။ (ဧဖက် ၅:၁၊ ၂) ကျွန်ုပ်တို့၏ ကမ္ဘာချီညီအစ်ကိုအသင်းအပင်းမှ သက်ကြီးရွယ်အိုများ၏ လိုအပ်ရာများကို အရွယ်ရောက်သောသားသမီးများ၊ အသင်းတော်ကြီးကြပ်မှူးများနှင့် ခရစ်ယာန်တစ်ဦးချင်းစီ မည်သို့ဂရုစိုက်ပြုစုနိုင်ကြောင်း သုံးသပ်ကြည့်ကြစို့။

သားသမီးများအနေဖြင့် ကျွန်ုပ်တို့၏တာဝန်

၄။ ခရစ်ယာန်သားသမီးများသည် မိဘများအပေါ် အဘယ်တာဝန်ရှိသနည်း။

^၄ “သင်၏မိဘကို ရိုသေစွာပြုလော့။” (ဧဖက် ၆:၂; ထွက်မြောက်ရာ ၂၀:၁၂) ဟေဗြဲကျမ်းမှ ဤရိုးရှင်းသော်လည်း လေးနက်သည့် ကိုးကားချက်ဖြင့် တမန်တော်ပေါလုသည် မိဘများအပေါ် သားသမီးများ၌ တာဝန်ရှိကြောင်း သတိပေးခဲ့သည်။ သို့သော် အဆိုပါစကားများသည် သက်ကြီးရွယ်အိုများကို ကြည့်ရှုပြုစုခြင်းနှင့် မည်သို့သက်ဆိုင်သနည်း။ ခရစ်ယာန်ခေတ်မတိုင်မီအချိန်မှ ကြည်နူးအားရဖွယ်ပုံနမူနာတစ်ခုက ၎င်းမေးခွန်းကို ဖြေဆိုပေးပါလိမ့်မည်။

၅။ (က) ယောသပ်သည် သားသမီးဝတ်ကို မမေ့လျော့ကြောင်း အဘယ်အရာက ဖော်ပြသနည်း။ (ခ) မိဘများကို ရိုသေခြင်းဟူသည် အဘယ်အရာကို ဆိုလိုသနည်း၊ ဤကိစ္စတွင် ယောသပ် အဘယ်ပုံနမူနာကောင်း ပြခဲ့သနည်း။

^၅ ယောသပ်သည် သူ၏သက်ကြီးရွယ်အိုဖခင် ဘိုးဘေးယာကုပ်နှင့် အနှစ် ၂၀ ကျော် အဆက်အသွယ်ပြတ်နေသည်။ သို့ရာတွင် ယာကုပ်ကိုချစ်သည့် သားသမီးမေတ္တာ ယောသပ်၌ရှိကြောင်း ထင်ရှားသည်။ မိမိမည်သူမည်ဝါဖြစ်ကြောင်း အစ်ကိုများကို ယောသပ်ပြောပြသောအခါ “ကျွန်ုပ်အဘသည် အသက်ရှင်သေးသလော” ဟုမေးခဲ့သည်။ (ကမ္ဘာဦး ၄၃:၇၊ ၂၇; ၄၅:၃) ထိုအချိန်၌ ခါနာန်ပြည်တွင် အစာခေါင်းပါးခြင်းကပ်ဆိုက်နေသည်။ ထို့ကြောင့် ယောသပ်သည် သူ၏ဖခင်အား “ကျွန်ုပ်ထံသို့လာပါ၊ မဆိုင်းပါနှင့်။ အဘသည် ဂေါရှင်အရပ်၌နေရမည်။ ကျွန်ုပ်အနားမှာရှိရမည်။ ... ထိုအရပ်၌ ကျွန်ုပ်ကျွေးမွေးပါမည်” ဟုမှာလိုက်သည်။ (ကမ္ဘာဦး ၄၅:၉-၁၁; ၄၇:၁၂) မိအိုဖအိုတို့ကို ရိုသေခြင်းတွင် သူတို့ကိုယ်ကိုသူတို့ မကြည့်ရှုနိုင်တော့သည့်အခါ သူတို့ကိုပြုစုစောင့်ရှောက်ခြင်း၊ ကာယရေးအရ ထောက်ပံ့ပေးခြင်းတို့ပါဝင်သည်။ (၁ ဓမ္မရာဇဝင် ၂၂:၁-၄; ယောဟန် ၁၉:၂၅-၂၇) ဤတာဝန်ကို ယောသပ် ဝမ်းသာအားရလက်ခံခဲ့သည်။

၆။ ဖခင်ဖြစ်သူအား အမှန်တကယ်ချစ်မြတ်နိုးကြောင်း ယောသပ်မည်သို့တင်ပြခဲ့သနည်း၊ သူ၏ပုံနမူနာကို ကျွန်ုပ်တို့ မည်သို့တုပနိုင်သနည်း။

^၆ ယောသပ်သည် ယေဟောဝါ၏ကူညီမစမှုဖြင့် အီဂျစ်ပြည်တွင် ချမ်းသာကြွယ်ဝပြီး တန်ခိုးအာဏာအရှိဆုံး ပုဂ္ဂိုလ်တို့တွင် တစ်ဦးဖြစ်လာခဲ့သည်။ (ကမ္ဘာဦး ၄၁:၄၀) သို့တိုင် အသက် ၁၃၀ အရွယ်ဖခင်ဖြစ်သူအား ရိုသေလေးစားမှုမပြအားသည့်အထိ မိမိအရေးပါလွန်းပြီး အလုပ်များလွန်းနေသည်ဟု မယူမှတ်ခဲ့ပါ။ ယာကုပ် (သို့မဟုတ် ဣသရေလ) ရောက်လာလုနီးပြီဖြစ်ကြောင်း သူသိသောအခါ “ယောသပ်သည် ရထားကိုပြင်၍ အဘဣသရေလကို ခရီးဦးကြိုပြုခြင်းငှာ ဂေါရှင်ပြည်သို့သွား၍ အဘရှေ့သို့ရောက်သော်၊ အဘ၏လည်ပင်းကိုဖက်လျက် ကြာကြာငိုလေ၏။” (ကမ္ဘာဦး ၄၆:၂၈၊ ၂၉) ဤသို့ကြိုဆိုခဲ့ပုံသည် ဓလေ့ထုံးစံအရ ရိုသေလေးစားမှုပြခြင်းမျှ မကချေ။ ယောသပ်သည် အိုမင်းနေသောဖခင်အား အလွန်ချစ်မြတ်နိုးပြီး သူ့မေတ္တာကို အထင်အရှားပြဖို့ မရှက်ခဲ့ပါ။ ကျွန်ုပ်တို့၌ မိအိုဖအိုများရှိမည်ဆိုလျှင် သူတို့အား ချစ်မြတ်နိုးကြောင်း အလားတူ ရက်ရက်ရောရောပြပါသလော။

၇။ ယာကုပ်သည် ခါနာန်ပြည်၌ အဘယ်ကြောင့်သင်္ဂြိုဟ်ခံလိုသနည်း။

^၇ ယာကုပ်သည် သေသည်အထိ ယေဟောဝါအား စွဲစွဲမြဲမြဲဆည်းကပ်ဝတ်ပြုခဲ့သည်။ (ဟေဗြဲ ၁၁:၂၁) ဘုရားသခင်၏ကတိတော်များကို သူယုံကြည်သောကြောင့် မိမိ၏ရုပ်ကလာပ်ကို ခါနာန်ပြည်၌ သင်္ဂြိုဟ်ပေးရန် တောင်းဆိုခဲ့၏။ ကုန်ကျစရိတ်နှင့် ကရိကထများသော်လည်း ယောသပ်သည် ဖခင်ဆန္ဒကို ဖြည့်ဆည်းပေးကာ လေးစားမှုပြခဲ့သည်။—ကမ္ဘာဦး ၄၇:၂၉-၃၁; ၅၀:၇-၁၄။

၈။ (က) မိအိုဖအိုများကို ပြုစုစောင့်ရှောက်ရန် ကျွန်ုပ်တို့ကို အဓိကစေ့ဆော်ပေးရာကား အဘယ်နည်း။ (ခ) အချိန်ပြည့်ကျေးကျွန်တစ်ဦးသည် မိအိုဖအိုများကို ကြည့်ရှုပြုစုရန် မည်သို့ပြုလုပ်ခဲ့ရသနည်း။ (စာမျက်နှာ ၁၇ မှ လေးထောင့်ကွက်ကိုရှု။)

^၈ ဖခင်ဖြစ်သူအား ကြည့်ရှုစောင့်ရှောက်ရန် ယောသပ်ကို အဘယ်အရာက စေ့ဆော်ခဲ့သနည်း။ မိမိအားအသက်ပေး၍ ကျွေးမွေးပြုစုခဲ့သူကို ကျေးဇူးတင်မြတ်နိုးစိတ်ရှိသည့်အပြင် ယေဟောဝါ၏သဘောတော်နှင့် တွေ့လိုသောကြောင့်လည်းဖြစ်မည် သေချာသည်။ ကျွန်ုပ်တို့လည်း ထိုသို့ဖြစ်သင့်သည်။ ပေါလုဤသို့ရေးသားခဲ့သည်– “သားမြေးရှိသောမုဆိုးမဖြစ်လျှင်၊ ထိုသားမြေးတို့သည် ရှေ့ဦးစွာ ဘုရား[သခင်]ဝတ်ကိုရည်မှတ်လျက်၊ မိမိအိမ်ကိုပြုစု၍ မိဘဘိုးဘွား၌ ကျေးဇူးဆပ်ခြင်းငှာသင်ကြစေ။ ထိုအမှုသည် ဘုရားသခင်နှစ်သက်တော်မူသောအမှုဖြစ်၏။” (၁ တိမောသေ ၅:၄) မှန်ပါသည်၊ မိအိုဖအိုများကို ပြုစုစောင့်ရှောက်ပေးရန် မည်မျှပင် ခက်ခဲပါစေ ယေဟောဝါအား ချစ်သည့်စိတ်နှင့် ကိုယ်တော်အား ကြောက်ရွံ့ရိုသေစိတ်တို့က ထိုသို့ပြုလုပ်ရန် ကျွန်ုပ်တို့ကို စေ့ဆော်ပေးပါလိမ့်မည်။a

အကြီးအကဲများ ဂရုစိုက်ကြပုံ

၉။ ယေဟောဝါသည် အသက်ကြီးရင့်သော ခရစ်ယာန်များအပါအဝင် သိုးအုပ်တစ်ခုလုံးကို ထိန်းကျောင်းရန် မည်သူ့ကို ခန့်အပ်ထားပြီနည်း။

^၉ အသက်ရှည်သောယာကုပ် သေခါနီးတွင် ယေဟောဝါသည် “ငါ့ကိုတစ်သက်လုံး ယနေ့တိုင်အောင်ထိန်းကျောင်းတော်မူသော ဘုရားသခင်” ဖြစ်၏ဟု ပြောဆိုခဲ့သည်။ (ကမ္ဘာဦး ၄၈:၁၅၊ သမ္မာ) ယနေ့ ယေဟောဝါသည် ကိုယ်တော်၏သားတော်၊ ‘သိုးထိန်းချုပ်’ ယေရှုခရစ်လက်အောက်ရှိ ခရစ်ယာန်ကြီးကြပ်မှူးများ သို့မဟုတ် အကြီးအကဲများအားဖြင့် မြေကြီးဆိုင်ရာကျေးကျွန်များကို ထိန်းကျောင်းပေးနေပါသည်။ (၁ ပေတရု ၅:၂-၄) ကြီးကြပ်မှူးများသည် သိုးတော်စုတွင်ရှိ အသက်ကြီးရင့်သူများကို ဂရုစိုက်ကြည့်ရှုပေးရာတွင် ယေဟောဝါအား မည်သို့အတုယူနိုင်သနည်း။

၁၀။ သက်ကြီးရွယ်အိုခရစ်ယာန်များ ကာယရေးအရ အကူအညီလိုအပ်လာသည့်အခါ အဘယ်သို့ပြုစုပေးခဲ့ကြပြီနည်း။ (စာမျက်နှာ ၁၉ မှ လေးထောင့်ကွက်ကိုရှု။)

^၁၀ ခရစ်ယာန်အသင်းတော် စတည်ထောင်ပြီး မကြာမီပင် ဆင်းရဲနွမ်းပါးသော ခရစ်ယာန်မုဆိုးမများအား “နေ့ရက်အစဉ်အတိုင်း လုပ်ကျွေးသောအမှု” ကိုကြီးကြပ်ပေးရန် တမန်တော်များသည် “ဝိညာဉ်တော်နှင့်လည်းကောင်း၊ ပညာနှင့်လည်းကောင်းပြည့်စုံလျက်၊ အသရေရှိသောလူခုနစ်ယောက်တို့ကို” ခန့်အပ်ခဲ့သည်။ (တမန်တော် ၆:၁-၆) နောက်ပိုင်းတွင် ကာယရေးအကူအညီ ရသင့်ရထိုက်သော ပုံသက်သေကောင်းသည့် သက်ကြီးရွယ်အိုမုဆိုးမများ၏ နာမည်စာရင်းကိုပြုစုရန် ကြီးကြပ်မှူးတိမောသေအား ပေါလုညွှန်ကြားခဲ့သည်။ (၁ တိမောသေ ၅:၃၊ ၉၊ ၁၀) အလားတူ ယနေ့ အသက်ကြီးရင့်သောခရစ်ယာန်များသည် အကူအညီလိုအပ်လာသည့်အခါ အသင်းတော်ကြီးကြပ်မှူးများက တလိုတလားကူညီပေးကြသည်။ သို့သော် တည်ကြည်သောသက်ကြီးရွယ်အိုများကို ကြည့်ရှုပြုစုပေးမှုတွင် ထိုထက်မကပြုရန်လိုသည်။

၁၁။ အလှူငွေအနည်းငယ်ထည့်ဝင်သော ဆင်းရဲသူမုဆိုးမနှင့်စပ်လျဉ်း၍ ယေရှုအဘယ်အရာပြောဆိုခဲ့သနည်း။

^၁၁ ယေရှုသည် မိမိ၏မြေကြီးပေါ် ဓမ္မအမှုဆောင်ချိန် ကုန်ဆုံးခါနီးတွင် ဝတ်ပြုရာအိမ်တော်၌ထိုင်နေစဉ် “လူများတို့သည်ကြေးငွေကို ဘဏ္ဍာတိုက်ထဲသို့သွင်းချသည်ကို ကြည့်ရှုတော်မူ၏။” ထိုအခါ လူတစ်ဦးကို ကိုယ်တော်ဂရုပြုမိသည်။ မှတ်တမ်းကဤသို့ဆို၏– “ဆင်းရဲသောမုဆိုးမတစ်ယောက်သည်လာ၍ တစ်ပဲလောက်တန်သောကြေးနီဒ င်္ဂါးနှစ်ပြားကို သွင်းချ၏။” ယေရှုသည် တပည့်များကိုခေါ်၍ ဤသို့မိန့်တော်မူသည်– “ငါအမှန်ဆိုသည်ကား၊ ဘဏ္ဍာတိုက်ထဲသို့သွင်းချသောသူအပေါင်းတို့ထက် ထိုဆင်းရဲသောမုဆိုးမသည် သာ၍သွင်းချခဲ့ပြီ။ အကြောင်းမူကား၊ ထိုသူအပေါင်းတို့သည် မိမိတို့ကြွယ်ဝသောစည်းစိမ်ထဲက နုတ်၍သွင်းချကြ၏။ ထိုမိန်းမမူကား အလွန်ဆင်းရဲလျက်ပင်၊ မိမိအသက်မွေးစရာဥစ္စာရှိသမျှကို သွင်းချလေပြီ။” (မာကု ၁၂:၄၁-၄၄) မုဆိုးမ၏အလှူငွေသည် ငွေကြေးအတိုင်းအတာအရ နည်းသော်လည်း ထိုသို့သောစိုးလ်အကြွင်းမဲ့ ဆည်းကပ်ဝတ်ပြုမှုကို ကောင်းကင်ခမည်းတော် အမှန်တကယ် တန်ဖိုးထားကြောင်း ယေရှုသိတော်မူ၏။ ယေရှုသည် ဆင်းရဲနွမ်းပါးသောမုဆိုးမ၏ အသက်အရွယ်ကို ပမာမထားဘဲ သူ၏လုပ်ဆောင်မှုကို ဂရုပြုခဲ့သည်။

၁၂။ အကြီးအကဲများသည် သက်ကြီးရွယ်အိုခရစ်ယာန်များ၏ ထည့်ဝင်မှုများကို တန်ဖိုးထားကြောင်း မည်သို့တင်ပြနိုင်သနည်း။

^၁၂ ယေရှုကဲ့သို့ပင် ခရစ်ယာန်ကြီးကြပ်မှူးများသည် စစ်မှန်သောဝတ်ပြုရေးကို မြှင့်တင်သော သက်ကြီးရွယ်အိုများ၏လုပ်ဆောင်မှုကို လျစ်လျူမရှုကြချေ။ အကြီးအကဲများသည် သက်ကြီးရွယ်အိုများ ဓမ္မအမှု၌ပါဝင်ခြင်း၊ အစည်းအဝေးများ၌ ပါဝင်ခြင်း၊ အသင်းတော်တွင် အပြုသဘောပါပါ ဩဇာလွှမ်းမိုးခြင်းကိုမက သူတို့၏ခံနိုင်ရည်ကိုပါ ချီးမွမ်းပြောဆိုရန် အကြောင်းရှိ၏။ စိတ်ရင်းမှန်ဖြင့် အားပေးစကား တစ်ခွန်းနှစ်ခွန်းပြောဆိုပေးခြင်းဖြင့် သက်ကြီးရွယ်အိုများသည် သူတို့၏မြင့်မြတ်သောလုပ်ငန်းတော်တွင် “ဝမ်းမြောက်စရာအကြောင်း” ရရှိပေမည်၊ ဤနည်းဖြင့် အခြားခရစ်ယာန်များ လုပ်ဆောင်နိုင်သည့်အတိုင်းအတာ၊ မိမိတို့ယခင်က လုပ်ဆောင်နိုင်ခဲ့သည့်အတိုင်းအတာတို့နှင့် ယှဉ်ကြည့်ကာ စိတ်ဓာတ်ကျသွားခြင်းမျိုး မဖြစ်တော့ပေ။—ဂလာတိ ၆:၄။

၁၃။ အကြီးအကဲများသည် သက်ကြီးရွယ်အိုများ၏ စွမ်းရည်နှင့် အတွေ့အကြုံတို့ကို အဘယ်နည်းများဖြင့် ထုတ်ယူအသုံးပြုပေးနိုင်သနည်း။

^၁၃ အကြီးအကဲများသည် သက်ကြီးရွယ်အိုခရစ်ယာန်များ၏ အတွေ့အကြုံနှင့် စွမ်းရည်တို့ကို ထုတ်ယူအသုံးပြုပေးခြင်းဖြင့် သူတို့၏တန်ဖိုးရှိထည့်ဝင်မှုများကို အသိအမှတ်ပြုနိုင်သည်။ ပုံသက်သေကောင်းသော သက်ကြီးရွယ်အိုများကို သရုပ်ပြခန်းများ၊ လူတွေ့မေးမြန်းခန်းများတွင် အခါအားလျော်စွာ အသုံးပြုနိုင်သည်။ “အမှန်တရားမှာ သားသမီးတွေကို ကြီးပြင်းလာစေခဲ့တဲ့ သက်ကြီးရွယ်အို ညီအစ်ကို၊ ညီအစ်မ တစ်ဦးတစ်ယောက်ကို ကျွန်တော်လူတွေ့မေးမြန်းတဲ့အခါ ပရိသတ်က ဂရုစိုက်နားထောင်ကြတယ်” ဟုအကြီးအကဲတစ်ဦးပြောပြသည်။ အသက် ၇၁ နှစ်အရွယ်ရှိ ရှေ့ဆောင်ညီအစ်မတစ်ဦးသည် ဘုရားသခင့်နိုင်ငံတော်ကြေညာသူများကို လယ်ကွင်းလုပ်ငန်း၌ မှန်မှန်ပါဝင်လာစေရန် ကူညီပေးရာတွင် အောင်မြင်ခဲ့ကြောင်း အခြားအသင်းတော်တစ်ခုမှ အကြီးအကဲများ ပြောပြသည်။ ထိုညီအစ်မသည် “အခြေခံကျသည့်အမှုများ” ဖြစ်သော သမ္မာကျမ်းစာနှင့် နေ့စဉ်ကျမ်းချက် ဖတ်ရှုခြင်း၊ ထို့နောက် သူတို့ဖတ်ရှုခဲ့ရာအပေါ် တွေးတောဆင်ခြင်ခြင်းတို့ကို ပြုလုပ်ဖို့ အားပေးတတ်သည်။

၁၄။ သက်ကြီးရွယ်အိုကြီးကြပ်မှူးတစ်ဦးကို တန်ဖိုးထားလေးစားကြောင်း အကြီးအကဲအဖွဲ့တစ်ဖွဲ့က မည်သို့တင်ပြခဲ့သနည်း။

^၁၄ အသက်ပိုကြီးသော ကြီးကြပ်မှူးများသည် အထောက်အကူဖြစ်ကြောင်းကိုလည်း အကြီးအကဲများ အသိအမှတ်ပြု တန်ဖိုးထားကြသည်။ အကြီးအကဲတစ်ဦးအဖြစ် ဆယ်စုနှစ်ချီ အမှုထမ်းခဲ့သော အသက် ၇၀ ကျော် ဇိုဇေသည် မကြာသေးမီက အကြီးစားခွဲစိတ်ကုသမှု ခံယူခဲ့ရသည်။ နာလန်ထူရန် ကြာမည်ဖြစ်သဖြင့် ဦးစီးကြီးကြပ်မှူးဖြစ်ခွင့်ကို စွန့်လွှတ်ဖို့ သူစဉ်းစားခဲ့သည်။ “တခြားအကြီးအကဲတွေ တုံ့ပြန်ပုံက အံ့အားသင့်စရာပဲ။ ကျွန်တော့်ရဲ့တင်ပြချက်ကို လက်ခံမယ့်အစား ကျွန်တော့်ရဲ့တာဝန်တွေကို ဆက်ထမ်းဆောင်နိုင်ဖို့ ဘယ်လိုကူညီပေးရမလဲလို့ သူတို့မေးကြတယ်” ဟုဇိုဇေပြောပြသည်။ အသက်ပိုငယ်သော အကြီးအကဲတစ်ဦး၏အကူအညီဖြင့် ဇိုဇေသည် ဦးစီးကြီးကြပ်မှူးတစ်ဦးအဖြစ် ပျော်ရွှင်စွာ ဆက်အမှုထမ်းနိုင်ခဲ့သည်၊ ယင်းကလည်း အသင်းတော်အတွက် ကောင်းချီးတစ်ရပ်ဖြစ်ခဲ့သည်။ အကြီးအကဲချင်းတစ်ဦးက ဤသို့ဆို၏– “အကြီးအကဲ ဇိုဇေရဲ့လုပ်ဆောင်မှုကို ညီအစ်ကိုတွေ တကယ်တန်ဖိုးထားတယ်။ သူ့ရဲ့အတွေ့အကြုံ၊ တုပထိုက်တဲ့ယုံကြည်ခြင်းတို့အတွက် သူ့ကို ညီအစ်ကိုတွေ ချစ်ခင်၊ လေးစားကြတယ်။ ကျွန်တော်တို့အသင်းတော်ရဲ့ ဝိညာဉ်ရေးကို တိုးပွားစေတယ်။”

အချင်းချင်းဂရုစိုက်ကြည့်ရှုခြင်း

၁၅။ ခရစ်ယာန်များအားလုံးသည် မိမိတို့တွင်ရှိသော သက်ကြီးရွယ်အိုများ၏အကျိုးကို အဘယ်ကြောင့်စိတ်ဝင်စားသင့်သနည်း။

^၁၅ မိအိုဖအိုများရှိ သားသမီးများနှင့် ခန့်အပ်ခံကျေးကျွန်များသာ သက်ကြီးရွယ်အိုများကို ဂရုစိုက်ရမည်မဟုတ်ပါ။ ခရစ်ယာန်အသင်းတော်ကို လူ့ကိုယ်ခန္ဓာနှင့်ပုံခိုင်းကာ ပေါလုဤသို့ရေးသားခဲ့သည်– “ကိုယ်ခန္ဓာ၌ အချင်းချင်းကွဲပြားခြင်းမရှိဘဲ၊ အင်္ဂါများတို့သည် အချင်းချင်း သူ့ကိုကိုယ်နှင့်အမျှသတိပြုစေခြင်းငှာ၊ ဘုရားသခင်သည် ကိုယ်ခန္ဓာကိုမျှစေ၍၊ ယုတ်သောအင်္ဂါအား သာ၍များသောအသရေကိုပေးတော်မူ၏။” (၁ ကောရိန္သု ၁၂:၂၄၊ ၂၅) ဘာသာပြန်ကျမ်းနောက်တစ်ခုတွင် ဤသို့ဖတ်ရသည်– “ကိုယ်အင်္ဂါအစိတ်အပိုင်းအသီးသီးတို့သည် အချင်းချင်း၏ကောင်းကျိုးကို ကြည့်ရှုပြုစုရန်ဖြစ်၏။” (နော့ခ်စ်) ခရစ်ယာန်အသင်းတော် စည်းလုံးညီညွတ်နေဖို့ အသင်းတော်ရှိသူတိုင်းသည် သက်ကြီးရွယ်အိုများပါအပါအဝင် ယုံကြည်သူချင်းများ၏အကျိုးကို ဂရုစိုက်ပေးရပေမည်။—ဂလာတိ ၆:၂။

၁၆။ ခရစ်ယာန်အစည်းအဝေးများတက်ရောက်ချိန်တွင် သက်ကြီးရွယ်အိုများအား စိတ်ဝင်စားမှု မည်သို့ပြနိုင်သနည်း။

^၁၆ ခရစ်ယာန်အစည်းအဝေးများတွင် သက်ကြီးရွယ်အိုများကို စိတ်ဝင်စားကြောင်းတင်ပြခွင့်ရသည်။ (ဖိလိပ္ပိ ၂:၄; ဟေဗြဲ ၁၀:၂၄၊ ၂၅) ထိုအချိန်အခါတွင် အချိန်ယူပြီး သက်ကြီးရွယ်အိုများနှင့် စကားစမြည်ပြောပါသလော။ သူတို့၏ကျန်းမာရေးအကြောင်း မေးမြန်းခြင်းသည် သင့်လျော်မည်ဖြစ်သော်လည်း တည်ဆောက်မှုဖြစ်စေသောတွေ့ကြုံမှု သို့မဟုတ် ကျမ်းစာမှအကြောင်းအရာတစ်ခုခု ပြောဆိုခြင်းအားဖြင့် “ဝိညာဉ်ဆုကျေးဇူးတစ်စုံတစ်ခုကို ဝေမျှ” ပေးနိုင်မည်လော။ သက်ကြီးရွယ်အိုအချို့သည် မသန်မစွမ်းဖြစ်နေကြရာ သူတို့အလာကို စောင့်နေမည့်အစား သူတို့ထံသွားစကားပြောခြင်းက ကြင်နာရာရောက်ပေမည်။ သူတို့နားလေးမည်ဆိုလျှင် ဖြည်းဖြည်းနှင့် ရှင်းလင်းပီသစွာပြောဆိုဖို့လိုပေမည်။ ‘အပြန်အလှန်အားပေးမှု’ အမှန်တကယ်ဖြစ်ဖို့ သက်ကြီးရွယ်အို ပြောဆိုသောစကားကို အာရုံစူးစိုက်နားထောင်ရမည်။—ရောမ ၁:၁၁၊ ၁၂။

၁၇။ အိမ်တွင်းအောင်းနေရသော သက်ကြီးရွယ်အိုခရစ်ယာန်များကို ကျွန်ုပ်တို့ဂရုစိုက်ကြောင်း မည်သို့ဖော်ပြနိုင်သနည်း။

^၁၇ သက်ကြီးရွယ်အိုတစ်ဦးသည် ခရစ်ယာန်အစည်းအဝေးများ မတက်နိုင်လျှင်ကော။ “မိဘမရှိသောသူငယ်တို့နှင့် မုဆိုးမတို့ ... ကိုကြည့်ရှုပြုစုခြင်း” သည် ကျွန်ုပ်တို့၏တာဝန်ဖြစ်ကြောင်း ယာကုပ် ၁:၂၇ ကဖော်ပြသည်။ “ကြည့်ရှုပြုစုခြင်း” ဟုဘာသာပြန်ဆိုထားသော ဂရိကြိယာ၏အနက်အဓိပ္ပာယ်တစ်ခုမှာ ‘ပြန်လည်ပတ်ခြင်း’ ဖြစ်သည်။ (တမန်တော် ၁၅:၃၆) ထိုသက်ကြီးရွယ်အိုများသည် ကျွန်ုပ်တို့၏လည်ပတ်မှုများကို အလွန်တန်ဖိုးထားတတ်ကြသည်! စီ.အီး. ၆၅ ခန့်တွင် ရောမမြို့၌ အကျဉ်းချခံရစဉ် ‘အသက်ကြီးသူ’ ပေါလုသည် တစ်ကိုယ်တည်းနေရသည်။ ထို့ကြောင့် သူ၏လုပ်ဖော်ဆောင်ဖက် တိမောသေကို အလွန်တွေ့မြင်လိုသဖြင့် “ငါ့ထံသို့မြန်မြန်လာခြင်းငှာကြိုးစားလော့” ဟုအကြောင်းကြားခဲ့သည်။ (ဖိလေမုန် ၉; ၂ တိမောသေ ၁:၃၊ ၄; ၄:၉) သက်ကြီးရွယ်အိုအချို့မှာ ပကတိအကျဉ်းသားများမဟုတ်ကြသော်လည်း ကျန်းမာရေးမကောင်းသဖြင့် အိမ်တွင်းအောင်းနေကြရ၏။ သို့ဖြစ်၍ ‘ကျေးဇူးပြုပြီး မြန်မြန် လာလည်ပေးကြပါ’ ဟု သူတို့ပြောဆိုလိုကြပေမည်။ ဤသို့သောမေတ္တာရပ်ခံချက်များကို ကျွန်ုပ်တို့ တုံ့ပြန်နေကြပါသလော။

၁၈။ သက်ကြီးရွယ်အိုများထံ သွားရောက်လည်ပတ်ခြင်းသည် အဘယ်အကျိုး ရှိစေနိုင်သနည်း။

^၁၈ ဝိညာဉ်ရေးအရ ညီအစ်ကို၊ ညီအစ်မတော်သူ သက်ကြီးရွယ်အိုများထံ လည်ပတ်ခြင်း၏အကျိုးကို ဘယ်သောအခါမျှ လျှော့မတွက်ပါနှင့်။ ဩနေသိဖော်အမည်ရှိ ခရစ်ယာန်တစ်ဦးသည် ရောမမြို့သို့ရောက်စဉ် ပေါလုကိုမတွေ့တွေ့အောင် ရှာပြီးနောက် ‘သူ့ကို အဖန်ဖန်သက်သာစေ’ ခဲ့ကြောင်း သိရှိရသည်။ (၂ တိမောသေ ၁:၁၆၊ ၁၇) ညီအစ်မကြီးတစ်ဦးက ဤသို့ပြောပြသည်– “လူငယ်တွေနဲ့အတူနေရတာ ပျော်တယ်။ သူတို့ရဲ့မိသားစုလိုသဘောထား ဆက်ဆံတာကို ကျွန်မအကြိုက်ဆုံးပဲ။ ကျွန်မကို စိတ်အားတက်စေတယ်။” သက်ကြီး ခရစ်ယာန်နောက်တစ်ဦးက ဤသို့ဆိုသည်– “တစ်ယောက်ယောက်က ကျွန်မကို ကတ်ပို့ပေးတာ၊ ဖုန်းဆက်တာ၊ ခဏတစ်ဖြုတ် လာလည်ပေးတာတွေကို သိပ်ကျေးဇူးတင်တယ်။ လေကောင်းလေသန့် ရှူရှိုက်လိုက်ရသလိုပါပဲ။”

ဂရုစိုက်ပေးတတ်သူများကို ယေဟောဝါဆုချ

၁၉။ သက်ကြီးရွယ်အိုများကို ဂရုစိုက်ကြည့်ရှုခြင်း၏ ကောင်းချီးများကား အဘယ်နည်း။

^၁၉ သက်ကြီးရွယ်အိုများကို ဂရုစိုက်ကြည့်ရှုခြင်းမှ ကောင်းချီးများစွာခံစားရသည်။ သက်ကြီးရွယ်အိုများနှင့် ပေါင်းဖော်ပေးခြင်း၊ သူတို့၏ပညာနှင့် အတွေ့အကြုံကို ထုတ်ယူအသုံးပြုတတ်ခြင်းသည်ပင် အခွင့်ထူးဖြစ်သည်။ ဂရုစိုက်ပြုစုစောင့်ရှောက်သူများသည် ပေးကမ်းခြင်းမှရသော ပျော်ရွှင်မှုကို များစွာခံစားရကြသည့်အပြင် ကျမ်းပေးတာဝန် ကျေပွန်သည့်အတွက် ကျေနပ်မှုရပြီး စိတ်ငြိမ်သက်မှုရရှိသည်။ (တမန်တော် ၂၀:၃၅) ထို့ပြင် သက်ကြီးရွယ်အိုများကို ဂရုစိုက်ကြည့်ရှုပေးတတ်သူများအနေနှင့် မိမိတို့အသက်ကြီးလာသောအခါ စောင့်ရှောက်ပေးမည့်သူမရှိ ပစ်ထားခံရမည်ဟူ၍ တွေးပူစရာအကြောင်းမရှိပါ။ သမ္မာကျမ်းစာက ဤသို့အာမခံသည်– “စွန့်ကြဲတတ်သောသူသည် ကြွယ်ဝလိမ့်မည်။ သူတစ်ပါးကိုရေလောင်းသောသူသည် ကိုယ်တိုင်ရေလောင်းခြင်းအကျိုးကို ခံရလိမ့်မည်။”—သု. ၁၁:၂၅။

၂၀၊ ၂၁။ သက်ကြီးရွယ်အိုများအား ဂရုစိုက်ကြည့်ရှုသူများကို ယေဟောဝါ မည်သို့ရှုမြင်သနည်း၊ ကျွန်ုပ်တို့ မည်သို့ စိတ်ပိုင်းဖြတ်သင့်သနည်း။

^၂၀ သက်ကြီးရွယ်အို ယုံကြည်သူချင်းများကို ကိုယ်ကျိုးစွန့် ဂရုစိုက်ကြည့်ရှုသည့် ဘုရားသခင်ကိုကြောက်ရွံ့သော သားသမီးများ၊ ကြီးကြပ်မှူးများနှင့် အခြားခရစ်ယာန်များကို ယေဟောဝါဆုချတော်မူ၏။ ဤစိတ်ဓာတ်သည် အောက်ပါပညာရှိစကားနှင့် သဘောချင်းညီညွတ်သည်– “ဆင်းရဲသားကိုသနားသောသူသည် ထာဝရဘုရား[သခင်]အားချေးငှားသောသူဖြစ်၍ သူပြုသောအမှု၏အကျိုးကို ဆပ်ပေးတော်မူလိမ့်မည်။” (သု. ၁၉:၁၇) မေတ္တာအားဖြင့် ဆင်းရဲနိမ့်ကျသူများကို ကျွန်ုပ်တို့ ကူမသနားမည်ဆိုလျှင် ထိုသို့ပြုခြင်းကို ကောင်းချီးများနှင့်အတူ ပြန်ဆပ်ပေးရမည့်အကြွေးအဖြစ် ဘုရားသခင်ယူမှတ်တော်မူ၏။ ထို့ပြင် များသောအားဖြင့် ‘လောကတွင်ဆင်းရဲသော်လည်း ယုံကြည်ခြင်းကြွယ်ဝ’ ကြသော သက်ကြီးရွယ်အို ယုံကြည်သူချင်းများကို မေတ္တာပါပါ ကြည့်ရှုစောင့်ရှောက်ပေးခြင်းအတွက်လည်း ကျွန်ုပ်တို့ကို ကိုယ်တော်ကျေးဇူးဆပ်ပေးလိမ့်မည်။—ယာကုပ် ၂:၅။

^၂၁ ဘုရားသခင်သည် ရက်ရက်ရောရောကျေးဇူးဆပ်တော်မူ၏! ထိုတွင် ထာဝရအသက်ပါဝင်သည်။ ယေဟောဝါ၏ကျေးကျွန်အများစုသည် မြေကြီးပရဒိသုတွင် ထာဝစဉ်အသက်ရှင်မည်ဖြစ်သည်၊ ထိုအခါ အမွေခံခဲ့ရသော အပြစ်၏အကျိုးဆက်များကို ခံရတော့မည်မဟုတ်၊ တည်ကြည်သော သက်ကြီးရွယ်အိုများသည် လူငယ့်အားမာန်ကို ပြန်ရရှိကြပါလိမ့်မည်။ (ဗျာ. ၂၁:၃-၅) ကောင်းချီးများစွာခံစားရမည့် ထိုအချိန်ကို စောင့်မျှော်နေကြစဉ် သက်ကြီးရွယ်အိုများကို ဂရုစိုက်ကြည့်ရှုရမည့်ခရစ်ယာန်တာဝန်ကို ကျေပွန်စွာ ဆက်လက်ထမ်းဆောင်ကြပါစို့။

[အောက်ခြေမှတ်ချက်]

• မိအိုဖအိုများကို သားသမီးများ မည်သို့ရိုသေလေးစားနိုင်သနည်း။

• အကြီးအကဲများသည် သိုးတော်စုမှ သက်ကြီးရွယ်အိုများကို မည်သို့တန်ဖိုးထားလေးမြတ်မှုပြကြသနည်း။

• သက်ကြီးရွယ်အိုများကို အမှန်တကယ်စိတ်ဝင်စားကြောင်း ခရစ်ယာန်တစ်ဦးစီအနေနှင့် မည်သို့တင်ပြနိုင်သနည်း။

• သက်ကြီးရွယ်အိုခရစ်ယာန်များကို ဂရုစိုက်ကြည့်ရှုသဖြင့် အဘယ်ကောင်းချီးများ ခံစားရသနည်း။

[စာမျက်နှာ ၁၇ ပါ လေးထောင့်ကွက်]

သူ့မိဘ အကူအညီလိုလာသောအခါ

ဖိလစ်သည် ၁၉၉၉ ခုနှစ်တွင် လိုင်ဘေးရီးယားနိုင်ငံ၌ စေတနာ့ဝန်ထမ်း ဆောက်လုပ်ရေးလုပ်သားတစ်ဦးအဖြစ် အမှုထမ်းနေစဉ် ဖခင်ဖြစ်သူ အသည်းအသန်ဖျားနာသည့် သတင်းရရှိခဲ့သည်။ မိခင်တစ်ယောက်တည်း မနိုင်မနင်းဖြစ်နေမည်ကို သိသဖြင့် ဖခင်ကိုဆေးကုသပေးရန် အိမ်ပြန်ဖို့ဆုံးဖြတ်လိုက်၏။

“အိမ်ကိုပြန်ဖို့ဆုံးဖြတ်လိုက်ရတာ မလွယ်လှဘူး။ ဒါပေမဲ့ မိဘကိုကြည့်ရှုပေးရေးဟာ ကျွန်တော့်ရဲ့ ဦးစားပေးတာဝန်ဖြစ်တယ်လို့ ယူဆမိတယ်” ဟု ဖိလစ်ပြန်ပြောပြသည်။ ထို့နောက် သုံးနှစ်အတွင်း ဒေသခံခရစ်ယာန်ရောင်းရင်းများ အကူအညီဖြင့် မိဘများကို သာ၍သင့်တော်သည့် အိမ်တစ်လုံးသို့ ရွှေ့ပြောင်းပေးပြီး ဖခင်အတွက် အထူးလိုအပ်ရာများ တပ်ဆင်ပြုလုပ်ပေးခဲ့သည်။

ယခု ဖိလစ်၏မိခင်သည် ဖခင်၏ အရေးတကြီးကျန်းမာရေးပြဿနာများကို ကိုင်တွယ်ဖြေရှင်းပေးတတ်လာပြီ။ သို့ဖြစ်၍ ဖိလစ်သည် မက်ဆီဒိုးနီးယားရှိ ယေဟောဝါသက်သေများ၏ဌာနခွဲရုံးတွင် စေတနာ့ဝန်ထမ်းဖို့ ဖိတ်ခေါ်ချက်ကို မကြာသေးမီက လက်ခံနိုင်ခဲ့သည်။

[စာမျက်နှာ ၁၉ ပါ ရုပ်ပုံ]

သူ၏လိုအပ်ချက်များကို လျစ်လျူမရှုခဲ့ကြ

ဩစတြေးလျနိုင်ငံမှ အေဒါအမည်ရှိ အသက် ၈၅ နှစ်အရွယ် ခရစ်ယာန်ညီအစ်မတစ်ဦးသည် ကျန်းမာရေးမကောင်းသောကြောင့် အိမ်ပြင်မထွက်နိုင်သောအခါ အသင်းတော်အကြီးအကဲများက သူ့ကိုကူညီပေးရန် အစီအစဉ်ပြုလုပ်ခဲ့ကြသည်။ အေဒါကို ကူညီပေးနိုင်မည့် ယုံကြည်သူချင်းအုပ်စုတစ်စုကို သူတို့စီစဉ်ဖွဲ့စည်းကြ၏။ ဤညီအစ်ကို၊ ညီအစ်မတို့သည် သန့်ရှင်းရေး၊ လျှော်ဖွပ်ရေး၊ ချက်ပြုတ်ရေးနှင့် တောက်တိုမည်ရအလုပ်များကို ဝမ်းပန်းတသာဖြင့် ကူညီလုပ်ဆောင်ပေးကြသည်။

ထိုသို့အကူအညီပေးရေးကို လွန်ခဲ့သောဆယ်နှစ်နီးပါးက စတင်စီစဉ်ပေးခဲ့သည်။ ယခုထိဆိုလျှင် ယေဟောဝါသက်သေ ၃၀ ကျော်တို့သည် အေဒါကို ကြည့်ရှုပြုစုပေးခဲ့ကြပြီ။ သူတို့သည် အေဒါထံ လည်ပတ်ပေးလျက်ရှိကြပြီး ကျမ်းစာစာပေများ ဖတ်ပေးကြသည်၊ အသင်းတော်ရှိသူတို့၏ဝိညာဉ်ရေး တိုးတက်မှုအကြောင်း ပြောပြကြ၍ သူနှင့်အတူ မှန်မှန်ဆုတောင်းပေးကြသည်။

ဒေသခံအကြီးအကဲတစ်ဦးက ဤသို့ကောက်ချက်ချခဲ့သည်– “အေဒါကို ကြည့်ရှုပြုစုပေးကြသူတွေက သူ့ကိုကူညီပေးရတာ အခွင့်ထူးပဲလို့ သဘောထားကြတယ်။ ဆယ်စုနှစ်များတစ်လျှောက် သူတည်ကြည်စွာ အမှုတော်ထမ်းခဲ့တာက လူအတော်များများအတွက် အားပေးမှုဖြစ်ခဲ့တယ်၊ သူ့ရဲ့လိုအပ်ချက်တွေကို လျစ်လျူရှုထားလိုက်ဖို့ဆိုတာဟာ သူတို့အတွက် စိတ်ကူးလို့တောင်မရနိုင်တဲ့ကိစ္စပဲ။”

[စာမျက်နှာ ၁၆ ပါ ရုပ်ပုံ]

မိအိုဖအိုများကို ချစ်မြတ်နိုးကြောင်း ရက်ရက်ရောရောပြပါသလော

[စာမျက်နှာ ၁၈ ပါ ရုပ်ပုံ]

ယုံကြည်သူချင်း သက်ကြီးရွယ်အိုများကို အသင်းတော်ရှိသူအားလုံး မေတ္တာပြနိုင်