စမ်းသပ်မှုများကို ကျွန်ုပ်တို့ မည်သို့ရှုမြင်သင့်သနည်း

စမ်းသပ်မှုများ! စမ်းသပ်မှုများကို လူတိုင်း ကြုံတွေ့ကြရ၏။ ယင်းတို့မှာ ပုဂ္ဂိုလ်ရေးပဋိပက္ခများ၊ စီးပွားရေးအခက်အခဲများ၊ ကျန်းမာရေးချို့တဲ့မှု၊ သွေးဆောင်မှုများ၊ အမှားပြုလုပ်ရန် ရွယ်တူချင်းဖိအား၊ ညှဉ်းပန်းနှိပ်စက်မှု၊ ကြားနေမှုအပေါ် သို့မဟုတ် . . . ကိုးကွယ်မှုအပေါ် ကျွန်ုပ်တို့၏ရပ်တည်ချက်အတွက် စိန်ခေါ်မှုများနှင့် အခြားအရာများစွာဖြစ်ပေမည်။ မည်သည့်စမ်းသပ်မှုပုံစံမျိုးမဆို အလွန်အကျွံစိုးရိမ်ပူပန်မှုကို ဖြစ်ပေါ်စေတတ်သည်။ စမ်းသပ်မှုများကို မည်သို့အောင်မြင်စွာ ဖြေရှင်းနိုင်မည်နည်း။ ကျွန်ုပ်တို့ကို တစ်နည်းနည်းဖြင့် အကျိုးပြုသလော။

အကောင်းဆုံးအထောက်အပံ့

ရှေးခေတ်မှဒါဝိဒ်သည် သူ၏ဘဝတစ်လျှောက် စမ်းသပ်မှုများစွာ ကြုံတွေ့ရသော်လည်း သစ္စာရှိရှိသေဆုံးခဲ့သည်။ သူသည် ခံနိုင်ရည် မည်သို့ရှိနိုင်ခဲ့သနည်း။ သူက “ထာဝရဘုရားသည် ငါ၏သိုးထိန်းဖြစ်တော်မူ၏။ ငါသည် ဆင်းရဲမခံရ” ဟုဆိုလျက် သူ၏ခွန်အားရင်းမြစ်ကို ဖော်ပြခဲ့သည်။ ထို့နောက် ဤသို့ဆက်ပြောသည်– “အကယ်၍ သေမင်း၏အရိပ်လွှမ်းမိုးသော ချိုင့်ထဲသို့ လျှောက်သွားရသော်လည်း ဘေးအန္တရာယ်ကို မကြောက်ပါ။ အကြောင်းမူကား ကိုယ်တော်သည် အကျွန်ုပ်နှင့်အတူ ရှိတော်မူသည်ဖြစ်၍ လှံတံတော်နှင့် တောင်ဝှေးတော်သည် အကျွန်ုပ်ကို ချမ်းသာစေပါ၏။” (ဆာလံ ၂၃:၁၊ ၄) မှန်ပါသည်၊ ယေဟောဝါသည် အကန့်အသတ်မဲ့ ထောက်ပံ့ပေးရှင် ဖြစ်တော်မူသည်။ ဒါဝိဒ် ဖိစီးမှုများ အပြင်းအထန်ခံခဲ့ရချိန်တွင် ကိုယ်တော်သည် သူ့ကိုလမ်းပြပေးခဲ့ပြီး ကျွန်ုပ်တို့ကိုလည်း လိုအပ်သည့်အခါ ထို့အတူလမ်းပြပေးရန် အသင့်ရှိတော်မူ၏။

ယေဟောဝါ၏ထောက်ပံ့ကူညီမှုကို ကျွန်ုပ်တို့ မည်သို့ရရှိနိုင်မည်နည်း။ သမ္မာကျမ်းစာက “ထာဝရဘုရားသည် ကောင်းမြတ်တော်မူသည်အကြောင်းကို မြည်းစမ်း၍ သိမှတ်ကြလော့” ဟုဆို၍ အကူအညီရနိုင်မည့်နည်းလမ်းကို ဖော်ပြသည်။ (ဆာလံ ၃၄:၈) ၎င်းသည် လှိုက်လှဲသောဖိတ်ခေါ်ချက်တစ်ခုဖြစ်သည်၊ သို့သော် အဘယ်အဓိပ္ပာယ်ရှိသနည်း။ ယေဟောဝါ၏အမှုတော်ကို ထမ်းဆောင်ရန်နှင့် ကိုယ်တော်၏အလိုတော်အတိုင်း အသက်ရှင်နေထိုင်ရန် အားပေးမှုဖြစ်သည်။ ဤသို့သောလမ်းစဉ်ကိုလိုက်ခြင်းသည် ကျွန်ုပ်တို့၏လွတ်လပ်မှုကို အနည်းနှင့်အများစွန့်လွှတ်ပြီး အနစ်နာခံခြင်းကို ဆိုလို၏။ တစ်ခါတစ်ရံ ညှဉ်းပန်းနှိပ်စက်ခြင်းနှင့် ဆင်းရဲခြင်းအစရှိသည့် စမ်းသပ်မှုများကိုပင် ခံရစရာအကြောင်းရှိနိုင်သည်။ သို့တိုင် ယေဟောဝါ၏ဖိတ်ခေါ်ချက်ကို စိတ်နှလုံးအကြွင်းမဲ့လက်ခံသူများသည် ထိုသို့လက်ခံလိုက်သည့်အတွက် ဘယ်သောအခါမျှ ဝမ်းနည်းစရာအကြောင်းမရှိပေ။ ယေဟောဝါသည် သူတို့ကို အလွန်ချစ်ခင်ကြင်နာတော်မူလိမ့်မည်။ ဝိညာဉ်ရေးအရ သူတို့ကို ကိုယ်တော်လမ်းပြညွှန်ကြားပြီး ကြည့်ရှုစောင့်ရှောက်တော်မူလိမ့်မည်။ ကိုယ်တော်၏နှုတ်မြွက်စကားတော်အားဖြင့်၊ ကိုယ်တော်၏သန့်ရှင်းသောဝိညာဉ်တော်အားဖြင့်၊ ခရစ်ယာန်အသင်းတော်အားဖြင့် သူတို့စမ်းသပ်မှုခံရစဉ်တစ်လျှောက် ထောက်မလိမ့်မည်။ နောက်ဆုံးတွင် သူတို့ကို ထာဝရအသက်ဆုချတော်မူလိမ့်မည်။—ဆာလံ ၂၃:၆; ၂၅:၉; ဟေရှာယ ၃၀:၂၁; ရောမ ၁၅:၅။

ယေဟောဝါကိုဝတ်ပြုရန် ဘဝကိုပြုပြင်ပြောင်းလဲဖို့ ဆုံးဖြတ်ချက်ချပြီး ထိုဆုံးဖြတ်ချက်အတိုင်း အသက်ရှင်နေထိုင်ကြသူများသည် ယေဟောဝါ ကတိတည်တော်မူကြောင်း တွေ့ရှိကြ၏။ ယောရှုနောက်လိုက်၍ ကတိထားရာပြည်တော်သို့ ဝင်ခဲ့ကြသော ဣသရေလလူတို့သည် ထိုသို့တွေ့ကြုံခဲ့ကြရ၏။ သူတို့သည် ယော်ဒန်မြစ်ကို ဖြတ်ကျော်ခဲ့ကြသည်နှင့် စမ်းသပ်မှုအမျိုးမျိုးခံခဲ့ကြရ၏၊ တိုက်ပွဲများစွာ ဆင်နွှဲခဲ့ကြရ၏၊ ခက်ခဲသောသင်ခန်းစာများစွာ သင်ယူခဲ့ကြရ၏။ သို့သော် ထိုလူမျိုးဆက်သည် အီဂျစ်ပြည်မှထွက်လာပြီး တောကန္တာရတွင် သေဆုံးခဲ့ကြသော သူတို့၏ဖခင်များထက် တည်ကြည်မှုပိုရှိကြောင်း သက်သေထူခဲ့ကြသည်။ သို့ဖြင့် တည်ကြည်သူများကို ယေဟောဝါထောက်မတော်မူခဲ့ပြီး ယောရှုသေဆုံးခါနီးတွင် သူတို့၏အခြေအနေနှင့်ပတ်သက်၍ သမ္မာကျမ်းစာမှတ်တမ်းက ဤသို့ဆိုသည်– “ဘိုးဘေးတို့အား ကျိန်ဆိုတော်မူသမျှအတိုင်း ပတ်ဝန်းကျင်အရပ်တို့၌ ငြိမ်ဝပ်ရာအခွင့်ကို ပေးတော်မူ[၏] . . . ထာဝရဘုရားသည် ဣသရေလအမျိုးအဖို့ မိန့်တော်မူသော ကောင်းကျိုးတစ်စုံတစ်ပါးမျှမလျှော့၊ ရှိသမျှတို့သည် ပြည့်စုံကြ၏။” (ယောရှု ၂၁:၄၄၊ ၄၅) ကျွန်ုပ်တို့လည်း စမ်းသပ်မှုခံရချိန်နှင့် အခြားအချိန်အခါများတွင် ယေဟောဝါကို လုံးလုံးလျားလျား မှီခိုအားထားမည်ဆိုလျှင် ထိုသို့ကြုံတွေ့နိုင်သည်။

ယေဟောဝါအပေါ် ကျွန်ုပ်တို့၏ယုံကြည်စိတ်ချမှုကို အဘယ်အရာက လျော့နည်းသွားစေနိုင်သနည်း။ ယေရှုက “အဘယ်သူမျှ သခင်နှစ်ဦးအစေကို မခံနိုင်။ . . . သင်တို့သည် ဘုရားသခင်၏အစေကိုလည်းကောင်း၊ လော[က]စည်းစိမ်၏အစေကိုလည်းကောင်း မခံနိုင်ကြ” ဟုမိန့်ဆိုစဉ်တွင် အချက်တစ်ချက်ကို ထောက်ပြတော်မူခဲ့သည်။ (မဿဲ ၆:၂၄) ယေဟောဝါကို ကျွန်ုပ်တို့ယုံကြည်ကိုးစားမည်ဆိုလျှင် လောကမှလူအများစု ရှာဖွေနေကြသော လုံခြုံမှု၊ ရုပ်ပစ္စည်းကို ကျွန်ုပ်တို့အားထားကြမည်မဟုတ်ပေ။ ယေရှုက မိမိ၏နောက်လိုက်များကို ဤသို့အကြံပြုခဲ့သည်– “ဘုရားသခင်၏ နိုင်ငံတော်နှင့် ဖြောင့်မတ်ခြင်းတရားတော်ကို ရှေ့ဦးစွာရှာကြလော့။ နောက်မှ ထိုအရာများကိုထပ်၍ ပေးတော်မူလတ္တံ့။” (မဿဲ ၆:၃၃) ရုပ်ပစ္စည်းအပေါ် မျှတသောအမြင် ဆက်ရှိပြီး မိမိ၏ဘဝတွင် ဘုရားသခင့်နိုင်ငံတော်ကို ရှေးဦးထားသည့် ခရစ်ယာန်တစ်ဦးသည် မှန်ကန်ရာကိုရွေးချယ်သည်။ (ဒေ. ၇:၁၂) ယင်းကြောင့် သူသည် တန်ရာတန်ကြေးပေးရပေမည်။ ဥစ္စာပစ္စည်းဆိုင်ရာ ကိုယ်ကျိုးစွန့်အနစ်နာခံမှုများလည်း ရှိကောင်းရှိပေမည်။ သို့သော် သူသည် ဆုကျေးဇူးများစွာ ရိတ်သိမ်းရလိမ့်မည်။ ထို့ပြင် ယေဟောဝါသည် သူ့ကို ထောက်မကူညီလိမ့်မည်။—ဟေရှာယ ၄၈:၁၇၊ ၁၈။

စမ်းသပ်မှုများမှ ကျွန်ုပ်တို့ သင်ခန်းစာယူစရာ

“ထာဝရဘုရားသည် ကောင်းမြတ်တော်မူသည်အကြောင်းကို မြည်းစမ်း၍ သိမှတ်” ရန်ရွေးချယ်ခြင်းဖြင့် ဘဝတွင် ကြုံရလေသမျှမှ ကာကွယ်မှုရမည်ဟု မဆိုလိုပါ; စာတန်နှင့် သူ၏လူ့ကိုယ်စားလှယ်များ၏ တိုက်ခိုက်မှုများမှလည်း လုံးလုံးလျားလျား ကာကွယ်မှုရရှိလိမ့်မည်ဟု မဆိုလိုပေ။ (ဒေ. ၉:၁၁) ယင်းကြောင့် ခရစ်ယာန်တစ်ဦး၏ရိုးသားမှုနှင့် သူ၏ဆုံးဖြတ်ချက်ပင် စမ်းသပ်ခံရပေမည်။ ယေဟောဝါသည် ကိုယ်တော်၏လူမျိုးတော်ကို ဤသို့သောစမ်းသပ်မှုများ အဘယ်ကြောင့် ကျရောက်စေသနည်း။ တမန်တော်ပေတရုက “အရည်ကျို၍ စုံစမ်းခြင်းခံနိုင်သော်လည်း ပျက်စီးတတ်သောရွှေကို စစ်ကြောစုံစမ်းခြင်းထက် သင်တို့ယုံကြည်ခြင်းကို စစ်ကြောစုံစမ်းခြင်းအရာသည် သာ၍မြတ်သည်နှင့် ယေရှုခရစ် ပေါ်ထွန်းတော်မူသောအခါ အချီးအမွမ်း၊ ဂုဏ်အသရေ၊ ဘုန်းအာနုဘော်အလို့ငှာ ဖြစ်မည်အကြောင်း၊ အထူးထူးအပြားပြားသော စုံစမ်းနှောင့်ယှက်ခြင်းကို ခံရသောအကြောင်းရှိလျှင် သင်တို့သည် ယခုခဏခံရ၍ ဝမ်းနည်း” ကြ၏ဟု ရေးသားသောအခါ အကြောင်းရင်းတစ်ချက်ကို ဖော်ပြခဲ့၏။ (၁ ပေတရု ၁:၆၊ ၇) မှန်ပါသည်၊ စမ်းသပ်မှုများသည် ယေဟောဝါအပေါ် ကျွန်ုပ်တို့၏ယုံကြည်ခြင်းနှင့် မေတ္တာ၏အရည်အသွေးကို ဖော်ပြစေသည်။ ထို့ပြင် စာတန်၏ကဲ့ရဲ့သောစကားများနှင့် စွပ်စွဲချက်များကို ချေပပြောဆိုရန် အခွင့်ကောင်းရသည်။—သု. ၂၇:၁၁; ဗျာ. ၁၂:၁၀။

စမ်းသပ်မှုများက တခြားခရစ်ယာန်အရည်အသွေးများကိုလည်း တိုးပွားစေသည်။ ဥပမာတစ်ခုအနေနှင့် ဆာလံဆရာ၏ ဤစကားကို သုံးသပ်ကြည့်ပါ– “ထာဝရဘုရားသည် . . . စိတ်နှိမ့်ချသောသူတို့ကို ကြည့်ရှုတော်မူ၏။ စိတ်မြင့်သောသူတို့ကိုကား အဝေးက သိတော်မူ၏။” (ဆာလံ ၁၃၈:၆) ကျွန်ုပ်တို့အများစုသည် ပင်ကိုသဘောအရ စိတ်နှိမ့်ချမှုမရှိကြသော်လည်း စမ်းသပ်မှုများက လိုအပ်သည့်အရည်အသွေးကို တိုးတက်ဖြစ်ပေါ်စေရန် ကူညီပေးနိုင်၏။ မောရှေခေတ်က ဣသရေလအချို့သည် တစ်ပတ်ပြီးတစ်ပတ်၊ တစ်လပြီးတစ်လ မန္နမုန့်စားရခြင်းကို ငြီးငွေ့လာကြသည့် အဖြစ်အပျက်ကို သတိရပါ။ မန္နမုန့်ကို အံ့ဖွယ်နည်းဖြင့် ရရှိခဲ့ကြသည်မှန်သော်လည်း ယင်းသည် သူတို့အတွက် စမ်းသပ်မှုတစ်ခုဖြစ်ခဲ့ကြောင်း ထင်ရှားပါသည်။ ထိုစမ်းသပ်မှု၏ရည်ရွယ်ချက်ကား အဘယ်နည်း။ မောရှေက “သင့်ကို နှိမ့်ချစုံစမ်း . . . လိုသောငှာ . . . မန္နနှင့် တော၌ ကျွေးမွေးတော်မူ[၏]” ဟုသူတို့ကို ပြောခဲ့သည်။—တရားဟောရာ ၈:၁၆။

ထိုနည်းတူ ကျွန်ုပ်တို့၏နှိမ့်ချမှုလည်း စမ်းသပ်ခံရပေမည်။ မည်သို့အားဖြင့်နည်း။ အဖွဲ့အစည်းဆိုင်ရာ ပြုပြင်ပြောင်းလဲချက်များကို ကျွန်ုပ်တို့ မည်သို့တုံ့ပြန်ကြသနည်း။ (ဟေရှာယ ၆၀:၁၇) ဟောပြောခြင်းနှင့် သွန်သင်ခြင်းလုပ်ငန်းကို စိတ်နှလုံးအကြွင်းမဲ့ ထောက်ခံအားပေးပါသလော။ (မဿဲ ၂၄:၁၄; ၂၈:၁၉၊ ၂၀) ကျမ်းစာအမှန်တရားရှင်းပြချက်များသည် ‘သစ္စာနှင့်သတိပညာရှိကျွန်’ ထံမှဖြစ်သည်ဟု အသိအမှတ်ပြုပြီး တလိုတလားလက်ခံပါသလော။ (မဿဲ ၂၄:၄၅-၄၇; သု. ၄:၁၈) နောက်ဆုံးပေါ်ကိရိယာများ၊ နောက်ဆုံးပေါ်အဝတ်အစားများ၊ အသစ်လွင်ဆုံးမော်တော်ကား ရရှိလိုသည့်ဆန္ဒကို တွန်းလှန်ပါသလော။ စိတ်နှိမ့်ချသောသူသည် ထိုမေးခွန်းများကို တွန်းလှန်နိုင်ပါသည်ဟု ဖြေဆိုပါလိမ့်မည်။—၁ ပေတရု ၁:၁၄-၁၆; ၂ ပေတရု ၃:၁၁။

နောက်ထပ်အရေးကြီးသည့် အရည်အသွေးတစ်ခုဖြစ်သော ခံနိုင်ရည်ရှိစေဖို့ စမ်းသပ်မှုများက ကူညီပေး၏။ တပည့်တော်ယာကုပ်က ဤသို့ပြောခဲ့သည်– “ငါ့ညီအစ်ကိုတို့၊ သင်တို့၏ယုံကြည်ခြင်းကို စစ်ကြောစုံစမ်းခြင်းအရာသည် သည်းခံခြင်း [“ခံနိုင်ရည်၊” ကဘ] ကိုပွားစေတတ်သည်ဟု သိမှတ်လျက် အထူးထူးအပြားပြား စုံစမ်းနှောင့်ယှက်ခြင်းနှင့် တွေ့ကြုံသောအခါ ဝမ်းမြောက်စရာအကြောင်း သက်သက်ဖြစ်သည်ဟု မှတ်ကြလော့။” (ယာကုပ် ၁:၂၊ ၃) ယေဟောဝါအပေါ် အပြည့်အဝမှီခိုအားထား၍ စမ်းသပ်မှုများကို တစ်ခုပြီးတစ်ခု အောင်မြင်ကျော်လွှားပြီး ခံနိုင်ရည်ရှိခြင်းက ခိုင်ခံ့မြဲမြံခြင်း၊ တည်ကြည်ခြင်းနှင့် သမာဓိတို့ကို တိုးပွားစေသည်။ ယင်းက ဤလောက၏ အမျက်ကြီးသောဘုရားစာတန်၏ အနာဂတ်တိုက်ခိုက်မှုများကို တွန်းလှန်နိုင်ရန် ကျွန်ုပ်တို့ကို ခွန်အားပေးသည်။—၁ ပေတရု ၅:၈-၁၀; ၁ ယောဟန် ၅:၁၉; ဗျာ. ၁၂:၁၂။

စမ်းသပ်မှုများကို လျောက်ပတ်သောအမြင်ထားရှိလော့

ဘုရားသခင်၏ စုံလင်သောသားတော် ယေရှုခရစ်သည် ကမ္ဘာပေါ်ရှိစဉ် စမ်းသပ်မှုများစွာ ကြုံတွေ့ခဲ့ရပြီး ယင်းတို့ကို ခံနိုင်ရည်ရှိရှိခံရပ်ခဲ့သောကြောင့် ကြီးမားသောအကျိုးကျေးဇူးများ ရိတ်သိမ်းခဲ့ရ၏။ ယေရှုသည် “ဆင်းရဲ . . . ကိုခံသောအားဖြင့် နားထောင်ခြင်းအကျိုးအကြောင်းကို သင်တော်မူ၏” ဟုပေါလုရေးသားခဲ့သည်။ (ဟေဗြဲ ၅:၈) သေသည့်အထိ ယေရှု တည်ကြည်မှုရှိခြင်းကြောင့် ယေဟောဝါ၏နာမတော် ဂုဏ်တင်ချီးမွမ်းခံရပြီး လူသားတို့အတွက် ရွေးနုတ်ဖိုးအဖြစ် ကိုယ်တော်၏စုံလင်သောလူ့အသက်တာ တန်ဖိုးကို ပေးဆပ်နိုင်ခဲ့၏။ ယင်းက ယေရှုကို ယုံကြည်ကြောင်းတင်ပြကြသူများ ထာဝရအသက်ရရှိနိုင်ရန် လမ်းဖွင့်ပေးခဲ့သည်။ (ယောဟန် ၃:၁၆) ယေရှုသည် စမ်းသပ်မှုများကြား တည်ကြည်မှုရှိခဲ့သောကြောင့် ယခု ကိုယ်တော်သည် ကျွန်ုပ်တို့၏ယဇ်ပုရောဟိတ်မင်းကြီးနှင့် နန်းထိုင်ဘုရင်ဖြစ်နေပေပြီ။—ဟေဗြဲ ၇:၂၆-၂၈; ၁၂:၂။

ကျွန်ုပ်တို့ကော အသို့နည်း။ စမ်းသပ်မှုများကြား ကျွန်ုပ်တို့ တည်ကြည်မှုရှိလျှင် ကြီးမားသောကောင်းချီးများ ခံစားရလိမ့်မည်။ ကောင်းကင်မျှော်လင့်ချက် ရှိကြသူများနှင့်ပတ်သက်၍ သမ္မာကျမ်းစာက ဤသို့ဆိုသည်– “စုံစမ်းနှောင့်ယှက်ခြင်းကို သည်းခံသောသူသည် မင်္ဂလာရှိ၏။ အကြောင်းမူကား၊ စစ်ကြောစုံစမ်းခြင်းကိုခံပြီးမှ သခင်ဘုရားကို ချစ်သောသူတို့အား ကတိထားတော်မူသော အသက်သရဖူကို ရလိမ့်မည်။” (ယာကုပ် ၁:၁၂) မြေကြီးမျှော်လင့်ချက်ရှိသူများသည် တည်ကြည်ကြမည်ဆိုလျှင် မြေကြီးပရဒိသုတွင် ထာဝရအသက်ရရှိကြလိမ့်မည်ဟု အာမခံထားသည်။ (ဗျာ. ၂၁:၃-၆) ထိုထက်အရေးကြီးသည်ကား၊ သူတို့၏တည်ကြည်မှုသည် ယေဟောဝါ၏နာမတော်ကို ဂုဏ်တင်ချီးမွမ်းခံရစေ၏။

ယေရှု၏ခြေရာကို ကျွန်ုပ်တို့လိုက်လျှောက်စဉ် ဤအစီအစဉ်စနစ်တွင် တွေ့ကြုံရမည့် စမ်းသပ်မှုအားလုံးကို အောင်မြင်စွာကျော်လွှားနိုင်မည်ဟု ယုံကြည်စိတ်ချနိုင်၏။ (၁ ကောရိန္သု ၁၀:၁၃; ၁ ပေတရု ၂:၂၁) မည်သို့အားဖြင့်နည်း။ ယေဟောဝါအား ကိုးစားသူများကို “သာမန်ထက်ထူးကဲသော တန်ခိုးတော်” ပေးသနားတော်မူသည့် ကိုယ်တော်အား မှီခိုအားထားခြင်းဖြင့်ဖြစ်သည်။ (၂ ကောရိန္သု ၄:၇) ကျွန်ုပ်တို့၏ယုံကြည်စိတ်ချမှုသည် ခက်ခဲပြင်းထန်သော စမ်းသပ်မှုများကို ခံစဉ်တွင်ပင် ယုံကြည်စိတ်ချစွာဖြင့် ဤသို့အခိုင်အမာပြောဆိုခဲ့သော ယောဘကဲ့သို့ ဖြစ်နိုင်ကြပါစေ– “စစ်တော်မူခြင်းကိုခံပြီးမှ ရွှေကဲ့သို့ ငါပေါ်လိမ့်မည်။”—ယောဘ ၂၃:၁၀။

[စာမျက်နှာ ၃၁ ပါ ရုပ်ပုံ]

စမ်းသပ်မှုကြားမှ ယေရှု၏တည်ကြည်ခြင်းသည် ယေဟောဝါ၏နာမတော်အား ဂုဏ်တင်ချီးမွမ်းခြင်း ဖြစ်စေခဲ့၏။ ကျွန်ုပ်တို့လည်း ထိုသို့ပြုနိုင်