ဘုရားရေးရာလက်အောက်ခံခြင်းက ကျွန်ုပ်တို့ထံမှ အဘယ်အရာတောင်းခံ

“ထိုကြောင့် ဘုရားသခင်၏အလိုတော်သို့လိုက်ကြလော့။”—ယာကုပ် ၄:၇။

၁။ ကျွန်ုပ်တို့ကိုးကွယ်သောဘုရားသခင်နှင့်ပတ်သက်၍ မည်သို့ဖော်ကျူးနိုင်သနည်း။

ယေဟောဝါသည် အမှန်ချီးမွမ်းထောမနာပြုဖွယ်ကောင်းသည်တကား။ အဘက်ဘက်တွင် ပြိုင်ဘက်မရှိ၊ စံမတူ၊ နှိုင်းယှဉ်၍မရ ထူးခြားပါသည်တကား။ ကိုယ်တော်သည် အမြင့်မြတ်ဆုံးဘုရား၊ စကြဝဠာပိုင်သအုပ်စိုးရှင်ဖြစ်ပြီး မှန်ကန်သောအာဏာအားလုံးတည်ရာဖြစ်တော်မူသည်။ ကိုယ်တော်သည် ရှေးအနန္တကာလမှ နောက်အနန္တကာလတိုင်အောင် တည်တော်မူ၍ ကိုယ်တော်ကိုမြင်ပြီး အသက်ရှင်နိုင်သောသူတစ်ယောက်မျှမရှိသည့်တိုင် ဘုန်းတော်ကြီးမားတော်မူသည်။ (ထွက်မြောက်ရာ ၃၃:၂၀။ ရောမ ၁၆:၂၆) ကိုယ်တော့်ဉာဏ်ပညာတော်နှင့်တန်ခိုးတော်သည် အဆုံးမရှိဘဲ တရားမျှတခြင်းတွင် အကြွင်းမဲ့စုံလင်တော်မူပြီး မေတ္တာတည်းဟူသောပြယုဂ်ဖြစ်တော်မူသည်။ ကိုယ်တော်သည် ကျွန်ုပ်တို့၏ဖန်ဆင်းရှင်၊ ကျွန်ုပ်တို့၏တရားသူကြီး၊ ကျွန်ုပ်တို့၏ပညတ်တရားရှင်၊ ကျွန်ုပ်တို့ရှင်ဘုရင်ဖြစ်တော်မူသည်။ ကောင်းမြတ်စုံလင်သောဆုကျေးဇူး ရှိရှိသမျှတို့သည် ကိုယ်တော့်ထံတော်မှ သက်ရောက်တော်မူသည်။—ဆာလံ ၁၀၀:၃။ ဟေရှာယ ၃၃:၂၂။ ယာကုပ် ၁:၁၇။

၂။ ဘုရားရေးရာလက်အောက်ခံခြင်းတွင် အဘယ်အရာများပါဝင်သနည်း။

^၂ ဤအချက်အားလုံးကိုထောက်ခြင်းအားဖြင့် ဘုရားသခင်အားလက်အောက်ခံရန်တာဝန် ကျွန်ုပ်တို့၌ရှိကြောင်း မငြင်းနိုင်ပါ။ သို့သော် ယင်း၌ အဘယ်အရာများပါဝင်သနည်း။ များစွာရှိသည်။ ယေဟောဝါဘုရားသခင်ကို ကိုယ်တိုင်မတွေ့မြင်နိုင်သည့်အတွက် ကိုယ်တော်အားလက်အောက်ခံရာတွင် တတ်မြောက်ထားသည့် ဩတ္တပ္ပစိတ်၏နှိုးဆော်ချက်ကို လိုက်နာခြင်း၊ ဘုရားသခင့်မြေကြီးဆိုင်ရာအဖွဲ့အစည်းနှင့် ပူးပေါင်းဆောင်ရွက်ခြင်း၊ လောကီမင်းအာဏာစက်ကို အသိအမှတ်ပြုခြင်း၊ မိသားစုအသိုင်းအဝိုင်းအတွင်း၌ ဦးစီးမှုမူဝါဒကို လေးစားခြင်းတို့ ပါဝင်ပါသည်။

ကောင်းသောသြတ္တပ္ပစိတ်ရှိခြင်း

၃။ ကောင်းသောသြတ္တပ္ပစိတ် အမြဲရှိနိုင်ရန် ကျွန်ုပ်တို့လိုက်နာရမည့် တားမြစ်ချက်များက အဘယ်နည်း။

^၃ ကောင်းသောသြတ္တပ္ပစိတ်ရှိရန် လူသားအနေနှင့် ကြပ်မတ်မပေးနိုင်သောပညတ်ဥပဒေ၊ မူဝါဒများကို ကျွန်ုပ်တို့နာခံရမည်ဖြစ်သည်။ ဥပမာ၊ ပညတ်တော်ဆယ်ပါးအဝင်ဖြစ်သည့် မတပ်မက်ရဟု ညွှန်ကြားသော ဒသမမြောက်ပညတ်ကို လိုက်နာရမည်ဟု မင်းအာဏာစက်များ ဥပဒေကြပ်မတ်မပေးနိုင်ပါ။ ယင်းက ပညတ်တော်ဆယ်ပါးသည် ဘုရားသခင့်ထံတော်မှဖြစ်ကြောင်း သက်သေထူသည်။ အကြောင်းမှာ၊ ချိုးဖောက်သည့်အခါ အပြစ်မပေးနိုင်သော ဥပဒေမျိုးကို ဥပဒေရေးဆွဲသည့် လူ့အဖွဲ့အစည်းတစ်ခုမျှ စီရင်မည်မဟုတ်ပါ။ ယေဟောဝါဘုရားသခင်မူကား ဤပညတ်ချက်အားဖြင့် ကောင်းသောသြတ္တပ္ပစိတ်ရှိလိုမည်ဆိုလျှင် ဣသရေလလူမျိုးတစ်ဦးစီအနေနှင့် မိမိကိုယ်ကိုယ်ကြပ်မတ်ပေးရန် တာဝန်ရှိစေတော်မူသည်။ (ထွက်မြောက်ရာ ၂၀:၁၇) ထိုနည်းတူစွာ ဘုရားသခင့်နိုင်ငံတော်ကို အမွေမခံစေသည့် လူ့တရားသူကြီးများ ကြပ်မတ်စီရင်မပေးနိုင်သော ဇာတိပကတိအကျင့်များတွင် ‘မနာလိုဝန်တိုခြင်း’ နှင့် “သူ့အကျိုးကိုငြူစူခြင်း” တို့ပါဝင်ပါသည်။ (ဂလာတိ ၅:၁၉-၂၁) သို့သော် ကောင်းသောသြတ္တပ္ပစိတ်ရှိဖို့ရန် ဤသဘောထားများကို ရှောင်ကြဉ်ရမည်ဖြစ်သည်။

၄။ ကောင်းသောသြတ္တပ္ပစိတ် အမြဲရှိနိုင်ရန် အဘယ်ကျမ်းစာစံချိန်များနှင့်အညီ ကျွန်ုပ်တို့အသက်ရှင်ရမည်နည်း။

^၄ မှန်ပါသည်။ ကျမ်းစာစံချိန်များအတိုင်း ကျွန်ုပ်တို့အသက်ရှင်နေထိုင်ရမည်။ မောရှေ၏ပညတ္တိကျမ်း၌ အဘယ်မည်သောပညတ်သည် အကြီးဆုံးဖြစ်သနည်းဟု မေးမြန်းခံရချိန်တွင် ယေရှုအခိုင်အမာအဆိုပြုတော်မူခဲ့သည့် ပညတ်နှစ်ခုတွင် ယင်းမူဝါဒများကို အချုပ်အားဖြင့်တင်ပြနိုင်ပါသည်။ “သင်၏ဘုရားသခင်ထာဝရဘုရား [ယေဟောဝါ၊ ကဘ] ကို စိတ်နှလုံးအကြွင်းမဲ့၊ ဉာဏ်ရှိသမျှနှင့်ချစ်လော့။ . . . ကိုယ်နှင့်စပ်ဆိုင်သူကို ကိုယ်နှင့်အမျှချစ်လော့။” (မဿဲ ၂၂:၃၆-၄၀) ဤပညတ်များအနက် ဒုတိယပညတ်၌ အဘယ်အရာပါဝင်ကြောင်းကို မဿဲ ၇:၁၂ ပါ ယေရှု၏စကားများက ဖော်ပြပါသည်။ “သင်တို့သည် ကိုယ်၌သူတစ်ပါးပြုစေလိုသမျှအတိုင်း သူတစ်ပါး၌ပြုကြလော့။ ဤပညတ်ကား ပညတ္တိကျမ်းနှင့် အနာဂတ္တိကျမ်းတို့၏ အချုပ်အခြာပင်ဖြစ်သတည်း။”

၅။ ယေဟောဝါဘုရားသခင်နှင့် ကောင်းသောဆက်ဆံရေး မည်သို့အမြဲရှိနေနိုင်မည်နည်း။

^၅ သူတစ်ပါးသတိပြုသည်ဖြစ်စေ၊ မပြုသည်ဖြစ်စေ မှန်ရာကန်ရာကို ကျွန်ုပ်တို့ပြုလုပ်ပြီး အမှားအယွင်းကို အစဉ်ရှောင်ကြဉ်ရမည်။ ကျွန်ုပ်တို့ပြုသင့်ရာကိုမပြု၊ မပြုသင့်သည်ကို ပြုလုပ်၍ အပြစ်ပေးမခံရသည့်တိုင် ထိုသို့ပြုမူသင့်ပါသည်။ ထိုသို့ပြုခြင်းအားဖြင့် ကောင်းကင်ခမည်းတော်နှင့် ကောင်းသောဆက်ဆံရေးရှိနေခြင်း၊ တစ်ကြိမ်တည်း ဟေဗြဲ ၄:၁၃ ပါတမန်တော်ပေါလု၏သတိပေးချက်ကို စွဲလမ်းနေခြင်းကိုဆိုလိုသည်။ “ငါတို့ကိုစစ်ကြောစီရင်တော်မူသောသူရှေ့၌ မထင်ရှားသောအရာတစ်စုံတစ်ခုမျှမရှိ။ ခပ်သိမ်းသောအရာတို့သည် အကွယ်အကာမရှိဘဲ မျက်မှောက်တော်၌ လှန်ထားလျက်ရှိ၏။” မှန်ကန်ရာကို စွဲစွဲမြဲမြဲပြုလုပ်ခြင်းဖြင့် မာရ်နတ်၏ဉာဏ်နီဉာဏ်နက်တို့ကို တိုက်လှန်ရန်၊ လောက၏ဖိစီးမှုများကို ခုခံငြင်းဆန်ရန်၊ မွေးရာပါအတ္တသဘောကို အတိုက်အခံပြုရန် အထောက်အကူရရှိကြမည်။—ဧဖက် ၆:၁၁ နှိုင်းယှဉ်။

ဘုရားသခင့်အဖွဲ့အစည်းကို လက်အောက်ခံခြင်း

၆။ ခရစ်ယာန်ခေတ်မတိုင်မီက အဘယ်ဆက်သွယ်ရေးလမ်းကြောင်းများကို ယေဟောဝါအသုံးပြုခဲ့သနည်း။

^၆ ကျမ်းစာမူဝါဒများကို ကျွန်ုပ်တို့တစ်ဦးစီ မည်သို့ကျင့်သုံးကြရမည်အကြောင်း ကိုယ်တိုင်ဆုံးဖြတ်ရန် ယေဟောဝါဘုရားသခင်ခွင့်ပြုထားတော်မမူ။ လူ့သမိုင်းအစကနဦးကပင် ဆက်သွယ်ရေးလမ်းကြောင်းများအဖြစ် လူသားများကို ဘုရားသခင်အသုံးပြုတော်မူခဲ့သည်။ သို့ဖြစ်၍ ဧဝဖန်ဆင်းမခံရမီ တားမြစ်ထားသောအသီးနှင့်စပ်လျဉ်းသည့်အမိန့်တော်ကို အာဒံအားပေးခဲ့၍ ဧဝအတွက် အာဒံသည် ဘုရားသခင်ကိုယ်စားပြုပြောဆိုသူဖြစ်ပါသည်။ ဧဝအားဘုရားသခင့်အလိုတော်ကို အာဒံပြောဆိုပေးခဲ့မည်အမှန်။ (ကမ္ဘာဦး ၂:၁၆-၂၃) နောဧသည် မိမိအိမ်ထောင်နှင့် ရေလွှမ်းမိုးဘေးမတိုင်မီက လူသားများအတွက် ဘုရားသခင့်ပရောဖက်ဖြစ်ခဲ့ပါသည်။ (ကမ္ဘာဦး ၆:၁၃။ ၂ ပေတရု ၂:၅) အာဗြဟံသည် သူ၏မိသားစုအတွက် ဘုရားသခင့်ပြောရေးဆိုခွင့်ရှိသူဖြစ်သည်။ (ကမ္ဘာဦး ၁၈:၁၉) ဣသရေလလူမျိုးအတွက် ဘုရားသခင့်ပရောဖက်နှင့် ဆက်သွယ်ရာလမ်းကြောင်းမူကား မောရှေဖြစ်ခဲ့သည်။ (ထွက်မြောက်ရာ ၃:၁၅၊ ၁၆။ ၁၉:၃၊ ၇) သူ၏နောက်ပိုင်းတွင် နှစ်ခြင်းဆရာယောဟန်အထိ ပရောဖက်အသီးသီး၊ ယဇ်ပုရောဟိတ်များနှင့်ဘုရင်များကို မိမိလူမျိုးအား အလိုတော်ထင်ရှားပြခြင်းငှာ ဘုရားသခင်အသုံးပြုတော်မူခဲ့သည်။

၇၊ ၈။ (က) မေရှိယရောက်လာသည့်နောက် ဘုရားသခင့်ပြောရေးဆိုခွင့်ရှိသူအဖြစ် မည်သူများကိုအသုံးပြုခဲ့ပြီနည်း။ (ခ) ယနေ့ယေဟောဝါသက်သေများထံမှ ဘုရားရေးရာလက်အောက်ခံခြင်းက အဘယ်အရာတောင်းဆိုသနည်း။

^၇ မေရှိယယေရှုခရစ် ကြွရောက်လာသည့်အခါ ကိုယ်တော်ကိုလည်းကောင်း၊ ကိုယ်တော်၏ တမန်တော်များနှင့် တပည့်တော်များကိုလည်းကောင်း ဘုရားကိုယ်စားပြောဆိုသူများအဖြစ် ကိုယ်တော်အသုံးပြုတော်မူခဲ့သည်။ နောင်တွင် ကျမ်းစာစံချိန်များကို မိမိတို့ဘဝအသက်တာတွင် မည်သို့ကျင့်သုံးကြရမည်အကြောင်း ယေဟောဝါ၏လူများအား အသိပေးရန် ယေရှုခရစ်၏ဘိသိက်ခံသစ္စာရှိ တပည့်နောက်လိုက်များကို “သစ္စာနှင့်သတိပညာရှိကျေးကျွန်” အဖြစ် အမှုထမ်းစေတော်မူခဲ့သည်။ ဘုရားရေးရာလက်အောက်ခံခြင်းမည်သည် ယေဟောဝါဘုရားသခင် အသုံးပြုတော်မူသောအဖွဲ့အစည်းကို အသိအမှတ်ပြု လက်ခံခြင်းတည်း။—မဿဲ ၂၄:၄၅-၄၇။ ဧဖက် ၄:၁၁-၁၄။

^၈ ယနေ့ “သစ္စာနှင့်သတိပညာရှိကျေးကျွန်” သည် ယေဟောဝါသက်သေများနှင့်ဆက်စပ်ပြီး ဤသက်သေခံများ၏ အုပ်ချုပ်ရေးအဖွဲ့ကို ကိုယ်စားပြုကြောင်း အကြောင်းတရားမှန်များက သက်သေထူသည်။ ထိုအဖွဲ့သည် ဒေသခံအသီးသီးတွင် လုပ်ငန်းတော်ကို ဦးစီးညွှန်ကြားပေးရန် အကြီးအကဲများနှင့် နယ်လှည့်ကိုယ်စားလှယ်များအဖြစ် ကြီးကြပ်မှူးများကို ခန့်အပ်ပေးပါသည်။ ဟေဗြဲ ၁၃:၁၇ နှင့်အညီ ဘုရားရေးရာလက်အောက်ခံရန် ဆက်ကပ်အပ်နှံပြီးသော သက်သေခံတစ်ဦးစီသည် ဤကြီးကြပ်မှူးများအား လက်အောက်ခံကြရမည်ဖြစ်သည်။ “သင်တို့ကိုအုပ်သောသူတို့၏စကားကိုနားထောင်၍ နှိမ့်ချလျက်နေကြလော့။ သူတို့သည် ကိုယ်တိုင်စစ်ကြောခြင်းကိုခံရသောသူကဲ့သို့ သင်တို့စိတ်ဝိညာဉ်၏အကျိုးအလို့ငှာ စောင့်နေကြ၏။ သင်တို့အကျိုးကိုမဖြစ်စေတတ်သော ဝမ်းနည်းခြင်းမရှိ၊ ဝမ်းမြောက်ခြင်းရှိ၍ သူတို့သည် စစ်ကြောခြင်းကိုခံရမည်အကြောင်း သတိပြုလျက်နေကြလော့။”

ဆုံးမမှုကိုလက်ခံခြင်း

၉။ ဘုရားရေးရာလက်အောက်ခံခြင်း၌ အများအားဖြင့် အဘယ်အရာပါဝင်သနည်း။

^၉ ဘုရားရေးရာလက်အောက်ခံခြင်း၌ ကြီးကြပ်မှူးအရာ၌အမှုထမ်းသူများ၏ ဆုံးမမှုကိုလက်ခံခြင်း မကြာခဏပါဝင်တတ်သည်။ ကျွန်ုပ်တို့သည် ကိုယ့်ကိုယ်ကို လိုအပ်သလိုအမြဲမဆုံးမပါက အသင်းတော်အကြီးအကဲများ အစရှိသည့် အတွေ့အကြုံရှိ၍ ဆုံးမမှုကိုပြုပိုင်ခွင့်ရှိသူများ၏ သွန်သင်ချက်နှင့်ဆုံးမမှုခံရရန် လိုအပ်ပေမည်။ ဤသို့သောဆုံးမမှုကိုခံယူခြင်းသည် ပညာရှိလမ်းစဉ်ဖြစ်သည်။—သု၊ ၁၂:၁၅။ ၁၉:၂၀။

၁၀။ ဆုံးမပဲ့ပြင်ရသူများ အဘယ်တာဝန်ရှိသနည်း။

^၁၀ ဆုံးမမှုပေးသောအကြီးအကဲများကိုယ်နှိုက်က ဘုရားရေးရာလက်အောက်ခံခြင်း ပုံသက်သေကောင်းများဖြစ်ရန်လိုပါသည်။ မည်သို့အားဖြင့်နည်း။ ဂလာတိ ၆:၁ အရ သူတို့သည် ကောင်းမွန်သောနည်းလမ်းပါဆုံးမသြဝါဒပေးရုံမျှမက မိမိတို့ကိုယ်တိုင်ပုံသက်သေကောင်းရမည်။ “ညီအစ်ကိုတို့၊ လူသည် သတိလစ်၍ တစ်စုံတစ်ခုသောဒုစရိုက်ကိုပြုမိလျှင် ဝိညာဉ်ဆုကျေးဇူးကိုခံရသော သင်တို့သည် အပြစ်သွေးဆောင်ခြင်းနှင့် ကိုယ်တိုင်လွတ်မည်အကြောင်း ကိုယ်ကိုသတိပြုလျက် သိမ်မွေ့နူးညံ့သောသဘောနှင့် ထိုသို့သောသူကိုမစ၍ သူ၏နေရာ၌ တည်မြဲတည်စေပြန်ကြလော့။” တစ်နည်းအားဖြင့်ဆိုလျှင် အကြီးအကဲ၏ဆုံးမမှုသည် သူ၏ပုံသက်သေနှင့်အညီ ဖြစ်ရမည်။ ဤသို့ဆိုခြင်းသည် ၂ တိမောသေ ၂:၂၄၊ ၂၅ နှင့် တိတု ၁:၉ ပါသြဝါဒအတိုင်းဖြစ်သည်။ မှန်ပါသည်။ ဆုံးမခြင်း၊ သို့မဟုတ် ပဲ့ပြင်ခြင်းကိုပြုသူများသည် မည်သည့်အခါမျှ ကြမ်းတမ်းခြင်းမရှိရန် အထူးသတိပြုကြရမည်။ အမြဲနူးညံ့သိမ်မွေ့ရန်၊ ကြင်နာမှုရှိရန်၊ တစ်ကြိမ်တည်းတွင်ပင် ဘုရားသခင့်နှုတ်ကပါဌ်တော်ရှိမူများကို ခိုင်မာစွာကိုင်စွဲရန် သတိပြုရမည်။ ဘက်မလိုက် နားထောင်သူများဖြစ်၍ ဝန်လေးပြီး ပင်ပန်းနေသူတို့အား စိတ်လန်းဆန်းစေသူများ ဖြစ်သင့်သည်။—မဿဲ ၁၁:၂၈-၃၀ နှိုင်းယှဉ်။

မင်းအာဏာစက်တို့ကို လက်အောက်ခံခြင်း

၁၁။ မင်းအာဏာစက်များနှင့်ဆက်ဆံရာတွင် ခရစ်ယာန်များ မည်သို့ပြုအပ်သနည်း။

^၁၁ ဘုရားရေးရာလက်အောက်ခံခြင်းက မင်းအာဏာစက်တို့ကိုနာခံရန် တောင်းဆိုပါသည်။ ရောမ ၁၃:၁ တွင် ဤသို့မှာကြားထားသည်။ “အစိုးရသောမင်းအာဏာစက်၏အုပ်စိုးခြင်းကို လူတိုင်းဝန်ခံစေ။ အကြောင်းမူကား၊ ဘုရားသခင်၏အခွင့်မရှိလျှင် မင်းအာဏာစက်မရှိ။ အာဏာစက်ရှိသမျှသည် ဘုရားသခင်ခန့်ထားတော်မူရာ ဖြစ်သတည်း။” ဤမှာကြားချက်တွင် လမ်းစည်းကမ်းများကို လိုက်နာခြင်း၊ ရောမ ၁၃:၇ တွင် တမန်တော်ပေါလုသတိပေးသည့်အတိုင်း တာဝန်သိသိ အကောက်အခွန်များကိုပေးဆောင်ခြင်း အစရှိသည်တို့ကိုပြုမူခြင်း ပါဝင်သည်။

၁၂။ ကဲသာကိုလက်အောက်ခံခြင်းသည် အဘယ်သဘောမျိုးဖြင့် အကန့်အသတ်ရှိသနည်း။

^၁၂ သို့သော် ကဲသာအား ထိုလက်အောက်ခံမှုများသည် အကန့်အသတ်အားဖြင့်သာဖြစ်ကြောင်း ထင်ရှားနေသည်။ မဿဲ ၂၂:၂၁ တွင်ယေရှုခရစ်မိန့်တော်မူထားသည့် စည်းမျဉ်းမူကို ကျွန်ုပ်တို့အမြဲသတိရနေရမည်။ “ကဲသာဘုရင်၏ဥစ္စာကို ကဲသာဘုရင်အား ဆက်ပေးကြလော့။ ဘုရားသခင်၏ဥစ္စာကိုကား ဘုရားသခင်အား ဆက်ပေးကြလော့။” Oxford NIV [New International Version] Scofield Study Bible တွင် ရောမ ၁၃:၁ နှင့်ဆိုင်သော အောက်ခြေမှတ်ချက်က ဤသို့ဆိုသည်။ “ယင်းကြောင့် စာရိတ္တပျက်ပြားစေသော၊ ခရစ်ယာန်အရည်အသွေးကင်းမဲ့သော စည်းမျဉ်းဥပဒေများကို လိုက်နာရမည်ဟု မဆိုလိုပါ။ ဤသို့သောအချိန်အခါမျိုးတွင် လူ၏စကားထက် ဘုရားသခင်၏စကားကိုနာခံရန် တာဝန်ရှိနေပါသည်။ (တမန်တော် ၅:၂၉။ ဒံ၊ ၃:၁၆-၁၈၊ ဆက်၍ ၆:၁၀ နှိုင်းယှဉ်)။”

မိသားစုအသိုင်းအဝိုင်းတွင် ဘုရားရေးရာလက်အောက်ခံခြင်း

၁၃။ အိမ်ထောင်အသိုင်းအဝိုင်းအတွင်း ဘုရားရေးရာလက်အောက်ခံခြင်းက မိသားစုတစ်ဦးစီထံမှ အဘယ်အရာတောင်းဆိုသနည်း။

^၁၃ မိသားစုအသိုင်းအဝိုင်းတွင် လင်ယောက်ျားနှင့်ဖခင်ဖြစ်သူသည် ဦးစီးဖြစ်သည်။ ယင်းကြောင့် ဇနီးသည်များသည် ဧဖက် ၅:၂၂၊ ၂၃ ပါသြဝါဒကိုလိုက်နာရန် တောင်းဆိုခံရသည်။ “အချင်းမိန်းမတို့၊ သခင်ဘုရား၏အုပ်စိုးတော်မူခြင်းကိုဝန်ခံသကဲ့သို့ ကိုယ်ခင်ပွန်း၏အုပ်စိုးခြင်းကို ဝန်ခံကြလော့။ အကြောင်းမူကား၊ ခရစ်တော်သည် အသင်းတော်၏အပေါ်မှာ ခေါင်းဖြစ်တော်မူသကဲ့သို့ ယောက်ျားသည် မိမိခင်ပွန်းအပေါ်မှာ ခေါင်းဖြစ်၏။”aသားသမီးများမူကား ကိုယ်ပိုင်စည်းမျဉ်းဥပဒေများ မချမှတ်ဘဲ ဖခင်ကိုလည်းကောင်း၊ မိခင်ကိုလည်းကောင်း ဘုရားရေးရာလက်အောက်ခံခြင်းဝတ်ကို ပြုထိုက်ကြောင်း ဧဖက် ၆:၁-၃ တွင် ပေါလုရှင်းပြထားတော်မူသည်။ “သားသမီးတို့၊ သခင်ဘုရား၏အလိုတော်နှင့်အညီ မိဘစကားကိုနားထောင်ကြလော့။ မိဘစကားကိုနားထောင်ခြင်းအမှုသည် တရားသောအမှုဖြစ်၏။ ‘မိဘကိုရိုသေစွာပြုလော့။’ ဤပညတ်တော်ကား၊ ‘သင်သည် ပြည်တော်၌ကောင်းစား၍ အသက်တာရှည်မည်အကြောင်း’ ဟူ၍ ကတိတော်နှင့်ဆိုင်သော ပထမပညတ်ဖြစ်၏။”

၁၄။ ဘုရားရေးရာလက်အောက်ခံခြင်းက အိမ်ထောင်ဦးစီးများထံမှ အဘယ်အရာတောင်းဆိုသနည်း။

^၁၄ လင်ယောက်ျားဖြစ်သူ ဖခင်များကိုယ်တိုင် ဘုရားရေးရာလက်အောက်ခံခြင်းသဘောရှိကြမည်ဆိုလျှင် ဇနီးဖြစ်သူနှင့် သားသမီးများသည် ဘုရားရေးရာလက်အောက်ခံခြင်းဝတ်ကို တင်ပြကြရန် လွယ်ကူစေမည်ကား အမှန်ပင်။ ဧဖက် ၅:၂၈၊ ၂၉ နှင့် ၆:၄ (ကဘ) ပါ ကျမ်းစာစည်းမျဉ်းမူများနှင့်အညီ သူတို့ ဦးစီးဦးဆောင်ခြင်းအားဖြင့် ထိုသို့ပြုကြလိမ့်မည်။ “ထိုနည်းတူ ယောက်ျားတို့သည် မိမိကိုယ်ကိုချစ်သကဲ့သို့ မိမိခင်ပွန်းတို့ကိုချစ်ရကြမည်။ ခင်ပွန်းကိုချစ်သောသူသည် ကိုယ်ကိုချစ်သောသူဖြစ်၏။ ကိုယ်အသားကိုမုန်းသောသူ တစ်ယောက်မျှမရှိ။ ခရစ်တော်သည် အသင်းတော်ကိုကျွေးမွေးပြုစုတော်မူသကဲ့သို့ ခပ်သိမ်းသောသူတို့သည် မိမိတို့အသားကို ကျွေးမွေးပြုစုတတ်ကြ၏။” “အဘတို့ ကိုယ့်သားသမီးကို စိတ်ဆိုးစေခြင်းငှာ မပြုကြနှင့်။ ယေဟောဝါ၏ပဲ့ပြင်ဆုံးမခြင်းနှင့် စိတ်သဘောတော်ဆိုင်ရာ စည်းမျဉ်းဥပဒေအရ သူတို့ကို မွေးမြူကြလော့။”

ဘုရားရေးရာလက်အောက်ခံခြင်းကိုတင်ပြရာတွင် အထောက်အကူများ

၁၅။ ဘုရားရေးရာလက်အောက်ခံခြင်းကိုတင်ပြရန် အဘယ်ဝိညာဉ်အသီးက အကူအညီပေးမည်နည်း။

^၁၅ ဤကဏ္ဍအသီးသီးတွင် ဘုရားရေးရာလက်အောက်ခံခြင်းကို တင်ပြနိုင်ရန် အဘယ်အရာက အကူအညီပေးမည်နည်း။ ဦးဆုံးအနေနှင့် ယေဟောဝါဘုရားသခင်ကိုချစ်ခြင်းနှင့် ကျွန်ုပ်တို့အားအုပ်ထိန်းခြင်းငှာ ခန့်အပ်ခံရသူများကို ချစ်ခြင်းတည်းဟူသော တစ်ကိုယ်ကောင်းမဆန်သည့်မေတ္တာဖြစ်သည်။ ၁ ယောဟန် ၅:၃ တွင် ကျွန်ုပ်တို့အား ဤသို့မှာကြားထားသည်။ “ပညတ်တော်တို့ကိုစောင့်ခြင်းအရာသည် ဘုရားသခင်ကို ချစ်ရာရောက်၏။ ပညတ်တော်တို့ကို စောင့်ခဲသည်မဟုတ်။” ယောဟန် ၁၄:၁၅ တွင် ထပ်တူအချက်ကိုပင် ယေရှုဖော်ပြပါသည်။ “ငါ့ကိုချစ်လျှင် ငါ့ပညတ်တို့ကိုစောင့်ရှောက်ကြလော့။” အမှန်ပင်၊ ချစ်ခြင်းမေတ္တာ—ဝိညာဉ်အသီး၏ပထမဆုံးအသီး—အားဖြင့် ကျွန်ုပ်တို့အတွက် ယေဟောဝါပြုတော်မူသမျှကို ကျေးဇူးတင်တတ်မည်ဖြစ်၍ ဘုရားရေးရာလက်အောက်ခံခြင်းဝတ်ကိုပြုရန် အထောက်အကူဖြစ်မည်။—ဂလာတိ ၅:၂၂။

၁၆။ ဘုရားရေးရာလက်အောက်ခံခြင်းကိုတင်ပြရာတွင် ဘုရားရေးရာကြောက်ရွံ့ခြင်းသည် မည်သို့အကူအညီပေးသနည်း။

^၁၆ ဒုတိယအချက်မှာ ဘုရားရေးရာကြောက်ရွံ့ ခြင်းဖြစ်သည်။ ယေဟောဝါမနှစ်သက်ရာပြုမိမည်ကို ကြောက်ရွံ့ခြင်းသည် အကူအညီဖြစ်စေနိုင်သည်။ အကြောင်းမှာ ယင်းသည် “ဒုစရိုက်ကိုမုန်းသောသဘောတည်း။” (သု၊ ၈:၁၃၊ ကဘ) ယေဟောဝါမနှစ်သက်ရာပြုမိမည်ကို ကြောက်ရွံ့ခြင်းသည် လူကိုကြောက်ရွံ့သောကြောင့် လိုက်လျောခြင်းမှ ကျွန်ုပ်တို့အား ကာကွယ်ပေးမည်မှာ ဆိုဖွယ်မရှိပါ။ အခက်အခဲများကြား ဘုရားသခင့်မိန့်မှာတော်မူချက်များကို နာခံခြင်းငှာ ယင်းသည် အကူအညီပေးပါလိမ့်မည်။ ထို့ ပြင် ပြစ်မှားခြင်းငှာ သွေးဆောင်ခံရခြင်း၊ သို့မဟုတ် ထိုသို့ပြုလိုသည့်သဘောကို အညံ့မခံခြင်းငှာ အထောက်အကူပြုပါလိမ့်မည်။ ယေဟောဝါမနှစ်သက်ရာပြုမိမည်ကိုကြောက်ရွံ့ခြင်းက မိမိ၏ချစ်လှစွာသောသား ဣဇာက်ကိုပူဇော်ရန် အာဗြဟံအားလှုံ့ဆော်ပြီး၊ ယောသပ်အား ပေါတိဖာမိန်းမ၏လျှပ်ပေါ်သောမြူဆွယ်မှုတို့ကို အောင်မြင်စွာ ခုခံတွန်းလှန်နိုင်စေခဲ့ကြောင်း ကျမ်းစာကတင်ပြပါသည်။—ကမ္ဘာဦး ၂၂:၁၂။ ၃၉:၉။

၁၇။ ဘုရားရေးရာလက်အောက်ခံခြင်းကိုတင်ပြရာတွင် ယုံကြည်ခြင်းသည် မည်သည့်ကဏ္ဍမှပါဝင်သနည်း။

^၁၇ တတိယအကူအညီမှာ ယေဟောဝါဘုရားသခင်ကို ယုံကြည်ခြင်းဖြစ်သည်။ “ထာဝရဘုရား [ယေဟောဝါ၊ ကဘ] ကို စိတ်နှလုံးအကြွင်းမဲ့ကိုးစားလော့။ ကိုယ်ဉာဏ်ကို အမှီမပြုနှင့်။ သွားလေရာရာ၌ ထာဝရဘုရား [ယေဟောဝါ၊ ကဘ] ကိုမျက်မှောက်ပြုလော့။ သို့ ပြုလျှင် သင်၏လမ်းခရီးတို့ကို ပဲ့ပြင်တော်မူမည်” ဟူသော သု၊ ၃:၅၊ ၆ ပါသြဝါဒစကားကိုနာခံရန် ယုံကြည်ခြင်းသည် ကျွန်ုပ်တို့အားကူညီပါလိမ့်မည်။ အထူးသဖြင့် ကျွန်ုပ်တို့မတရားစွာခံရသည်ဟု ထင်ရဖွယ်ရှိသောအခါ၊ သို့မဟုတ် ကျွန်ုပ်တို့၏မတူညီသော လူမျိုး၊ သို့မဟုတ် အနွယ်၊ သို့မဟုတ် စရိုက်မတူညီမှုကြောင့် ခွဲခြားခံရသည်ဟု ယူမှတ်သည့်အခါ ယုံကြည်ခြင်းသည် ကျွန်ုပ်တို့အားအကူအညီဖြစ်စေမည်။ အကြီးအကဲ၊ သို့မဟုတ် ဓမ္မအမှုထမ်းအဖြစ် ထောက်ခံခြင်းမခံရသည့်အခါ မိမိအား တမင်ဥပေက္ခာပြုသည်ဟု အချို့ခံစားရပေမည်။ ကျွန်ုပ်တို့ ၌ယုံကြည်ခြင်းရှိမည်ဆိုလျှင် အချိန်တန်လျှင် အမှုကိစ္စများကို ယေဟောဝါတည့်မတ်ပေးတော်မူရန် စောင့်ဆိုင်းနေပါလိမ့်မည်။ တစ်ချိန်တည်းတွင် ခံနိုင်ရည်ရှိရန် သည်းခံခြင်းကို ပြုစုပျိုးထောင်ပေးဖို့လိုပေမည်။—မြည်တမ်းစကား ၃:၂၆။

၁၈။ ဘုရားရေးရာလက်အောက်ခံခြင်းကိုတင်ပြခြင်းငှာ စတုတ္ထမြောက်အကူအညီကား အဘယ်နည်း။

^၁၈ စတုတ္ထမြောက်အကူအညီမှာ နှိမ့်ချမှုဖြစ်သည်။ ‘သူတစ်ပါးသည် ကိုယ်ထက်သာ၍ကောင်းမြတ်သည်ဟု နှိမ့်ချသောစိတ်ရှိ’ သောကြောင့် နှိမ့်ချသောသူသည် ဘုရားရေးရာလက်အောက်ခံခြင်းဝတ်တင်ပြရန် အခက်အခဲမရှိပါ။ စိတ်နှိမ့်ချသောသူသည် “အငယ်ဆုံးသောသူ” အဖြစ်ကျင့်ကြံလိုသည်။ (ဖိလိပ္ပိ ၂:၂-၄။ လုကာ ၉:၄၈) မာနထောင်လွှားသူသည် လက်အောက်ခံရခြင်းကိုမခံမရပ်နိုင်ဖြစ်ပြီး ယင်းကိုအမျက်ဒေါသထွက်တတ်သည်။ ဤကဲ့သို့သောသူသည် ပြစ်တင်ဝေဖန်မှုကိုခံယူခြင်းအားဖြင့် ကယ်တင်ခံရမည့်အစား ချီးမွမ်းခံခြင်းအားဖြင့် ပျက်စီးဖို့ ပို၍အကြောင်းရှိသည်ဟု ပြောဆိုလေ့ရှိကြသည်။

၁၉။ ကင်းမျှော်စင်အသင်း၏ ဥက္ကဌဟောင်းတစ်ဦး နှိမ့်ချခြင်းဆိုင်ရာ အဘယ်ပုံသက်သေကောင်းကို တင်ပြခဲ့သနည်း။

^၁၉ နှိမ့်ချခြင်းနှင့် ဘုရားရေးရာလက်အောက်ခံခြင်း ပုံသက်သေကောင်းတစ်ခုကို ကင်းမျှော်စင် သမ္မာကျမ်းစာနှင့် ဝေစာအသင်း၏ ဒုတိယဥက္ကဌ ဂျိုးစက် ရပ်သဖော့ဒ် တစ်ချိန်ကတင်ပြခဲ့ပါသည်။ ဂျာမနီနိုင်ငံရှိ ယေဟောဝါသက်သေခံများ၏လုပ်ငန်းကို ဟစ်တလာပိတ်ပင်ခဲ့စဉ်က မိမိတို့၏စည်းဝေးခြင်းအမှုအပြင် ဟောပြောခြင်းလုပ်ငန်းနှင့်ပတ်သက်၍ မည်သို့ ပြုလုပ်ရမည်နည်းဟု စာရေးမေးမြန်းခဲ့ကြပါသည်။ ဤအကြောင်းကို ဗေသလမိသားစုများအား ထုတ်ဖော်ပြောပြပြီး အထူးသဖြင့် ပြင်းထန်သောဒဏ်စီရင်ချက်များကို ဂျာမနီနိုင်ငံရှိညီအစ်ကိုများခံနေရသည့်အတွက် မည်သို့အဖြေပေးရမည်ကို သူမသိကြောင်း ပွင့်လင်းစွာဝန်ခံခဲ့ပါသည်။ တစ်စုံတစ်ယောက်က သူတို့အားဘာပြောရမည်ကိုသိပါက ယင်းအတွက် သူဝမ်းသာမည်ဟု ပြောဆိုခဲ့သည်။ အလွန်နှိမ့်ချသောသဘောပါတကား။b

ဘုရားရေးရာလက်အောက်ခံခြင်းမှ ခံစားရသောအကျိုးကျေးဇူးများ

၂၀။ ဘုရားရေးရာလက်အောက်ခံခြင်းကို တင်ပြခြင်းအားဖြင့် အဘယ်ကောင်းချီးများ ခံစားရသနည်း။

^၂၀ မေးသင့်သည့်မေးခွန်းတစ်ခုမှာ ဘုရားရေးရာလက်အောက်ခံခြင်းသည် မည်သည့်အကျိုးကျေးဇူးများကို ဖြစ်ထွန်းစေသနည်း ဟူ၍ဖြစ်သည်။ အကျိုးကျေးဇူးများစွာရှိပါသည်။ ထင်ရာစိုင်းသူများ၏ အဖြစ်သနစ်ဖြစ်သည့် စိုးရိမ်ပူပန်ခြင်းနှင့် စိတ်ဓာတ်ကျဆင်းခြင်းများမှ ကျွန်ုပ်တို့လွတ်မြောက်ကြသည်။ ယေဟောဝါဘုရားသခင်နှင့် ကောင်းသောဆက်ဆံရေးကို ကျွန်ုပ်တို့ထိန်းသိမ်းထားနိုင်သည်။ ကျွန်ုပ်တို့၏ခရစ်ယာန်ညီအစ်ကိုများနှင့် ပေါင်းသင်းမှုအကောင်းဆုံးရရှိပါသည်။ ဥပဒေနှင့်အညီပြုမူကျင့်ကြံခြင်းအားဖြင့် လောကီမင်းအာဏာစက်များနှင့် မလိုလားအပ်သောပြဿနာများကို ကျွန်ုပ်တို့ရှောင်ကြဉ်သည်။ ကျွန်ုပ်တို့သည် လင်နှင့်မယား၊ မိဘနှင့်သားသမီးများအဖြစ် ပျော်ရွှင်သောမိသားစုဘဝကိုလည်း မွေ့လျော်နိုင်ကြသည်။ ထို့ပြင် ဘုရားရေးရာလက်အောက်ခံခြင်းအားဖြင့် သု၊ ၂၇:၁၁ ပါသြဝါဒနှင့်အညီ ကျွန်ုပ်တို့ ပြုမူကျင့်ကြံကြပါသည်။ “ငါ့သား၊ ပညာရှိလော့။ ကဲ့ရဲ့သောသူ၏စကားကို ငါချေနိုင်အောင်၊ ငါ့စိတ်ကိုရွှင်လန်းစေလော့။”

[အောက်ခြေမှတ်ချက်များ]

ပြန်လည်စစ်ဆေးခြင်းမေးခွန်းများ

◻ဆက်သွယ်ရေးလမ်းကြောင်းများအဖြစ် အဘယ်သူများကို ဘုရားသခင်အသုံးပြုတော်မူခဲ့ပြီနည်း။ ကိုယ်တော်၏ကျေးကျွန်များသည် ကိုယ်တော်အား အဘယ်အရာပေးထိုက်သနည်း။

◻ ဘုရားရေးရာလက်အောက်ခံခြင်းဝတ်ကို အဘယ်ဆက်ဆံရေးအသီးသီးတွင် ပြုရမည်နည်း။

◻ ဘုရားရေးရာလက်အောက်ခံခြင်းဝတ်တင်ပြရန် အဘယ်အရည်အချင်းများက ကျွန်ုပ်တို့အား အကူအညီပေးသနည်း။

◻ ဘုရားရေးရာလက်အောက်ခံခြင်းသည် အဘယ်ကောင်းချီးများကို ဖြစ်ပေါ်စေသနည်း။

[စာမျက်နှာ ၁၆ ပါ ရုပ်ပုံ]

အလိုတော်ကို လူတို့အားသိစေရန် ယေရုရှလင်မြို့ရှိ ဗိမာန်တော်အစီအစဉ်ကို ဘုရားသခင်အသုံးပြုတော်မူခဲ့

[စာမျက်နှာ ၁၈ ပါ ရုပ်ပုံ]

ဘုရားရေးရာလက်အောက်ခံခြင်းကို ကျွန်ုပ်တို့တင်ပြနိုင်သည့် နေရာကဏ္ဍများ