ဘုရားသခင့်မေတ္တာတော်ကို သူတို့တစ်ကိုယ်ကောင်းမဆန်ဘဲ တုံ့ပြန်ခဲ့ကြ

“လူသားတို့၌ပြုတော်မူသော ကရုဏာနှင့်အံ့ဖွယ်သောအမှုတော်တို့ကိုထောက်၍ ထာဝရဘုရား [ယေဟောဝါ၊ ကဘ] ၏ဂုဏ်ကျေးဇူးတော်ကို ချီးမွမ်းကြစေ။”—ဆာလံ ၁၀၇:၈။

၁။ တမန်တော်ယောဟန်သည် သူ၏ပထမစာစောင်တွင် မေတ္တာအရည်အချင်းကို မည်သို့အလေးအနက်တင်ပြသနည်း။

“ဘုရားသခင်သည် ချစ်ခြင်းမေတ္တာဖြစ်တော်မူ၏။” ထိုစကားများသည် မည်မျှအဓိပ္ပာယ်ပြည့်ဝသနည်း။ ထို့ကြောင့်ပင် တမန်တော်ယောဟန်သည် သူ၏ပထမစာစောင်တွင် ထပ်မံပြောဆိုရန်လိုအပ်ကြောင်း ခံစားခဲ့ရသည်မှာ အံ့ဩစရာမဟုတ်ချေ။ (၁ ယောဟန် ၄:၈၊ ၁၆) ယေဟောဝါသည် မေတ္တာဖြစ်ရုံမကဘဲ ကိုယ်တော်သည်မေတ္တာ၏ရုပ်လုံး သို့မဟုတ် မေတ္တာ၏သရုပ်ဖြစ်သည်။

၂။ ယောက်ျားနှင့်မိန်းမကိုဖန်ဆင်း၍ သူတို့အတွက်ပေးအပ်ရာများတွင် ဘုရားသခင်သည် မေတ္တာတော်ကိုမည်သို့သောနည်းဖြင့်တင်ပြသနည်း။

^၂ ကိုယ်တော် ကျွန်ုပ်တို့အားဖန်ဆင်းရာတွင်ပြသသည့် ဘုရားရှင်၏မေတ္တာကို စဉ်းစားကြည့်ပါ။ ဒါဝိဒ်၏လေးမြတ်သောစကားများသည် လျော်ကန်လှသည်။ မှုတ်သွင်းခံဆာလံဆရာအနေနှင့် “အကျွန်ုပ်သည် ကြောက်မက်ဖွယ်သောလက္ခဏာ ထူးဆန်းသောလက္ခဏာတို့နှင့် ပြည့်စုံသည်ဖြစ်၍ ကိုယ်တော်ကိုချီးမွမ်းပါမည်။” (ဆာလံ ၁၃၉:၁၄) ကျွန်ုပ်တို့သည် ကျန်းမာမှုနှင့်ပျော်ရွှင်ခြင်းဖြင့်နေနိုင်ရန်အတွက် ဘုရားရှင်သည် ကျွန်ုပ်တို့၏အာရုံငါးပါးဖြစ်သော အမြင် အကြား အရသာ အနံ့နှင့်အထိအတွေ့အားဖြင့် မကုန်ဆုံးနိုင်သော ပျော်ရွှင်မှုရရှိစေသည်။ ကျွန်ုပ်တို့ပတ်ပတ်လည်ရှိ ဖန်ဆင်းခြင်းတွင် မည်မျှလှပမှုကိုတွေ့ရပါသည်တကား။ လူ့ပုံပန်းအသွင်အပြင်လှပမှုကိုမဆိုထားဘဲ များလှစွာသောအပင်နှင့် တိရစ္ဆာန်အမျိုးမျိုးသည်ပင် မည်မျှအံ့ဖွယ်ပါတကား။ ကျွန်ုပ်တို့စားသုံးနိုင်သည့် အသီးအနှံများ ဟင်းသီးဟင်းရွက်နှင့် အခြားအစားအစာများကို ကိုယ်တော်စီစဉ်ပေးထားပါသည်တကား။ (ဆာလံ ၁၀၄:၁၃-၁၆) အကြောင်းကောင်းဖြင့် တမန်တော်ပေါလုသည် လုတ္တရမြို့သားများအား ဘုရားသခင်သည် “သင်တို့အားကျေးဇူးပြုလျက် အစာအာဟာရနှင့်ဝပြော၍ ဝမ်းမြောက်စေခြင်းငှာ မိုးကောင်းကင်မှမိုးရွာစေတော်မူ၍ အသီးအနှံတို့ကိုသီးစေတတ်သော ဥတုကိုပေးတော်မူ” သည်ကိုသတိပြုစေခဲ့သည်။—တမန်တော် ၁၄:၁၇။

၃။ ဘုရားရှင်သည် ကျွန်ုပ်တို့အား မည်သည့်ထူးခြားလှသောစွမ်းရည်များ ပေးထားသနည်း။

^၃ ပျော်ရွှင်သောအိမ်ထောင်အသက်တာနှင့် စပ်လျဉ်းသော ကောင်းချီးအားလုံးကိုလည်း စဉ်းစားကြည့်ပါ။ ထို့အပြင် တိရစ္ဆာန်များထက်သာလွန်စေသည့် ကျွန်ုပ်တို့၏စိတ်ဓာတ်နှင့်စိတ်ပိုင်းစွမ်းရည်ဖြစ်သော စိတ်ကူးခြင်း၊ တွေးတောဆင်ခြင်ခြင်း၊ သတိရခြင်း၊ ဩတ္တပ္ပစိတ်နှင့်အထူးသဖြင့် ဝတ်ပြုနိုင်စွမ်းတို့ကြောင့် ရရှိနိုင်သည့်ပျော်ရွှင်မှုအလုံးစုံကို သုံးသပ်ပါလေ။ ကျွန်ုပ်တို့အား တေးဂီတကဖြစ်ပေါ်စေသော သာယာမှုကိုလည်း လျစ်လျူမရှုသင့်ချေ။ ယင်းတို့နှင့်များလှစွာသော ဆုကျေးဇူးများသည် ကျွန်ုပ်တို့အတွက်ဘုရားသခင်၏ မေတ္တာတော်ထင်ရှားပြသချက်ဖြစ်သည်။

၄။ ဦးဆုံးမိဘများပြစ်မှားချိန်မှစ၍ လူသားများသည် ဘုရားသခင်၏မည်သည့်မေတ္တာတင်ပြချက်ကို ခံစားခဲ့ရသနည်း။

^၄ အာဒံနှင့်ဧဝသည် ဧဒင်ဥယျာဉ်ရှိ သူတို့၏စုံလင်သောအခြေအနေတွင် ပျော်ရွှင်မှုအမျိုးမျိုးခံစားခဲ့ရသည်မှာ ယုံမှားဖွယ်မရှိချေ။ (ကမ္ဘာဦး ၂:၇-၉၊ ၂၂၊ ၂၃) သို့သော်သူတို့ခံစားနေရသည့် ဘုရားသခင့်မေတ္တာဖြင့် ပြင်ဆင်ပေးချက်အားလုံးကို တစ်ကိုယ်ကောင်းမဆန်ဘဲ တုံ့ပြန်ရန်ပျက်ကွက်ခဲ့သောအခါ ဘုရားသခင်သည် လူသားမျိုးနွယ်ကို စွန့်ပစ်ခဲ့သလော။ လုံးဝမစွန့်ပစ်ခဲ့ချေ။ ကိုယ်တော်သည် ကျွန်ုပ်တို့ဦးဆုံးမိဘများ၏ ပြစ်မှားခြင်းမှဖြစ်ပေါ်လာသည့် အမှားအားလုံးကို တည့်မတ်စေရန်အတွက် ချက်ချင်းပင်လုပ်ဆောင်ခဲ့သည်။ (ကမ္ဘာဦး ၃:၁၅) အာဒံ၏မစုံလင်သော သားမြေးများအပေါ် သည်းခံနေခြင်းဖြင့်လည်း ယေဟောဝါသည် မေတ္တာတော်ကိုပေါ်လွင်စေသည်။ (ရောမ ၅:၁၂) သို့သော်မည်မျှတိုင်နည်း။ ယခုအချိန်တိုင်အောင်နှစ်ပေါင်း ၆၀၀၀ ခန့်ဖြစ်ပါသည်တကား။ အထူးသဖြင့်ဘုရားရှင်သည် မိမိ၏ကျေးကျွန်များနှင့်ဆက်ဆံရာတွင် မေတ္တာတော်ကိုပြသခဲ့သည်။ “ထာဝရဘုရား [ယေဟောဝါ၊ ကဘ] ထာဝရဘုရား [ယေဟောဝါ၊ ကဘ] ချစ်သနားခြင်းမေတ္တာဂရုဏာနှင့်ပြည့်စုံ၍ စိတ်ရှည်ခြင်း၊ ကျေးဇူးပြုခြင်း သစ္စာစောင့်ခြင်းနှင့်ကြွယ်ဝတော်မူထသော အထောင်အသောင်းများသောသူတို့အား သနားခြင်းကျေးဇူးတရားကို စောင့်တော်မူ” သည်ဟူသောစကားများသည် မှန်ကန်ပါသည်။—ထွက်မြောက်ရာ ၃၄:၆၊ ၇။

၅။ ယေဟောဝါသည် ဣသရေလလူမျိုးနှင့်ဆက်ဆံခဲ့ရာတွင် မည်သည့်မေတ္တာပါသောစိတ်ရှည်မှု တင်ပြခဲ့သနည်း။

^၅ မှန်ပါသည်၊ ဣသရေလလူများကို လူမျိုးတစ်မျိုးအနေနှင့် သိနာတောင်ခြေရင်းမှ သူတို့၏ထင်ရာစိုင်းမှုကြောင့် သူတို့အားလုံးဝစွန့်ပစ်လိုက်ရန် မလုပ်မဖြစ်လုပ်လိုက်ရသည့်အချိန်အထိ သူတို့နှင့်ဆက်ဆံရာတွင် ယေဟောဝါ၏သည်းခံခြင်းသည် အမှန်ပင်ကြီးမားလှပေသည်။ ၂ ရာဇဝင်ချုပ် ၃၆:၁၅၊ ၁၆ တွင်ကျွန်ုပ်တို့ဖတ်ရသည့်အတိုင်းပင်ဖြစ်သည်။ “ဘိုးဘေးတို့၏ဘုရားသခင်ထာဝရဘုရားသည် မိမိလူမျိုးနှင့်မိမိနေတော်မူရာအရပ်ကို သနားသောကြောင့် စောစောထ၍အထပ်ထပ်စေလွှတ်သောတမန်တို့အားဖြင့် မှာလိုက်တော်မူသော်လည်း ဘုရားသခင်၏တမန်တို့ကိုပြက်ယယ်ပြု၍ အမိန့်တော်ကိုနားမထောင် ပရောဖက်တို့ကို ညှဉ်းဆဲသောကြောင့် ထာဝရဘုရား၏အမျက်တော်မငြိမ်းနိုင်အောင် မိမိလူမျိုးကိုထွက်တော်” မူ၏။ သို့သော် ယေဟောဝါဘုရား၏ မေတ္တာတော်ကို တစ်ကိုယ်ကောင်းမဆန်ဘဲ တုံ့ပြန်ခဲ့သောသူများရှိခဲ့သည်။ သူတို့မည်သို့လုပ်ဆောင်ခဲ့ကြောင်းသိမြင်ရန် ဤပုဂ္ဂိုလ်အချို့၏အသက်တာကို ကျွန်ုပ်တို့ယခုသုံးသပ်ကြပါစို့။ ယင်းကကျွန်ုပ်တို့ကိုယ်နှိုက်သည် ယေဟောဝါ၏မေတ္တာတော်ကို လက်တွေ့ကျစွာ မည်သို့တုံ့ပြန်နိုင်ပုံကို ပြသရန်အခြေခံကိုချမှတ်ပေးပါလိမ့်မည်။

မောရှေသည်မည်သို့ တစ်ကိုယ်ကောင်းမဆန်ဘဲတုံ့ပြန်ခဲ့ပုံ

၆။ မောရှေ၏ဥပမာသည် မည်သို့သောနည်းဖြင့်ထူးခြားပြီး မည်သည့်အခွင့်အရေးများတွင် ဘုရားသခင်၏မေတ္တာတော်ကို သူခံစားခဲ့ရသနည်း။

^၆ မောရှေသည် ဘုရားမေတ္တာတော်ကို တစ်ကိုယ်ကောင်းမဆန်ဘဲတုံ့ပြန်ရာတွင် ထင်ပေါ်သောဥပမာဖြစ်သည်။ ဖာရောသမီး၏မွေးစားသားအနေနှင့် မောရှေရှေ့တွင် များလှစွာသောအခွင့်အရေးများရှိပါသည်တကား။ သို့သော်သူသည် “အပြစ်ရှိသောကာမဂုဏ်ကိုခဏခံစားခြင်းထက် ဘုရားသခင်၏လူတို့နှင့်အတူ ညှဉ်းဆဲခံရခြင်းကို သာ၍အလိုရှိသဖြင့်လည်းကောင်း အဲဂုတ္တုပြည်၏စည်းစိမ်ထက် ခရစ်တော်ကြောင့်ခံရသောဒုက္ခသည် သာ၍မြတ်သောစည်းစိမ်ဖြစ်သည်ကို စိတ်ထင်သဖြင့်လည်းကောင်း” ရွေးချယ်ခဲ့၏။ (ဟေဗြဲ ၁၁:၂၅၊ ၂၆) တစ်ချိန်ကမောရှေသည် မိမိ၏ညီအစ်ကိုများဖြစ်သော ဣသရေလလူမျိုးများအား အီဂျစ်အချုပ်အနှောင်မှကယ်လွှတ်လိုခဲ့သည်။ သို့သော်သူ၏ကြိုးပမ်းမှုကို သူတို့မလေးမြတ်ခဲ့ချေ။ သူတို့လွတ်မြောက်ရန်အတွက် ဘုရားသခင်၏အချိန်လည်းမကျရောက်သေးချေ။ (တမန်တော် ၇:၂၃-၂၉) သို့သော်ဆယ်စုနှစ်များနောက်ပိုင်းတွင် မောရှေ၏ယုံကြည်ခြင်းနှင့် မိမိညီအစ်ကိုများအား ကူညီပေးလိုသော တစ်ကိုယ်ကောင်းမဲ့ဆန္ဒကြောင့် ယေဟောဝါသည်သူ့အား အံ့ဖွယ်များစွာပြုရန်နှင့် ဣသရေလလူမျိုးများအားအနှစ် ၄၀ တိုင်တိုင်ကိုယ်တော်၏ပရောဖက် တရားသူကြီး ပညတ်ပေးရှင်နှင့်အာမခံအဖြစ် လုပ်ပိုင်ခွင့်အပ်နှင်းခဲ့သည်။ ဤသို့သောအခြေအနေတွင်မောရှေသည် မိမိအတွက်နှင့် ဣသရေလလူမျိုးချင်းများအတွက် ယေဟောဝါ၏မေတ္တာတော်ကို များစွာတွေ့ကြုံခံစားခဲ့ရသည်။

၇။ ဘုရားသခင်မေတ္တာတော်တင်ပြချက်ကို မောရှေမည်သို့တုံ့ပြန်ခဲ့သနည်း။

^၇ မောရှေသည် ဘုရားသခင့်မေတ္တာတော်နှင့် မခံစားထိုက်သောကြင်နာမှုကို မည်သို့တုံ့ပြန်ခဲ့သနည်း။ သူသည် ‘ဘုရားသခင်၏ကျေးဇူးတော်ကို အကျိုးမဲ့’ ခံယူခဲ့သလော။ (၂ ကောရိန္သု ၆:၁) လုံးဝမဟုတ်ခဲ့ချေ။ မောရှေသည် ဘုရားကိုကိုင်းရှိုင်းခြင်းဖြင့် မိမိအပေါ်ယေဟောဝါ၏မေတ္တာကို တုံ့ပြန်ခဲ့သည်။ အချိန်တိုင်းတွင် ယေဟောဝါထံရှုမျှော်ခဲ့ပြီး မိမိ၏ဖန်ဆင်းရှင်နှင့် လက်ပွန်းတတီးဆက်ဆံရေးရှိခဲ့သည်။ ညီမောင်အပေါ်အပြစ်တင်သောကြောင့် အာရုန်နှင့်မိရိအံကိုဆုံးမစဉ် ဘုရားရှင်သည်မောရှေအပေါ် မည်မျှအမွှန်းတင်ပြောဆိုခဲ့သည်တကား။ မှန်ပါသည်၊ ယေဟောဝါသည်မောရှေနှင့် “မျက်နှာချင်းဆိုင်” စကားပြောခဲ့ပြီးသူ့အား “ထာဝရဘုရား [ယေဟောဝါ၊ ကဘ] ၏ပုံသဏ္ဌာန်” ကိုမြင်စေခဲ့သည်။ (တောလည်ရာ ၁၂:၆-၈) မောရှေသည် အခွင့်အရေးများစွာရရှိလင့်ကစား လူအပေါင်းတို့ထက် နှလုံးသိမ်မွေ့သောသဘောရှိကာယေဟောဝါ “မိန့်တော်မူသမျှအတိုင်း” ပြုလေသည်။—ထွက်မြောက်ရာ ၄၀:၁၆။ တောလည်ရာ ၁၂:၃။

၈။ မောရှေသည် အမှန်ပင်ဘုရားကိုင်းရှိုင်းကြောင်း မည်သို့တင်ပြခဲ့သနည်း။

^၈ မောရှေသည် ယေဟောဝါ၏နာမ၊ ဂုဏ်နှင့်စင်ကြယ်သောဝတ်ပြုရေးအပေါ် စိုးရိမ်စိတ်တင်ပြခြင်းဖြင့် သူသည်တစ်ကိုယ်ကောင်းမဆန်ဘဲ ဘုရားကိုင်းရှိုင်းသူဖြစ်ကြောင်းကိုလည်း ပြသခဲ့သည်။ ထို့ကြောင့် ကိစ္စနှစ်ရပ်တွင် ဘုရားနာမတော်ပတ်သက်နေသောကြောင့် ဣသရေလလူမျိုးများအား ကရုဏာပြရန် ယေဟောဝါထံမောရှေတောင်းပန်သောအခါ အောင်မြင်ခဲ့သည်။ (ထွက်မြောက်ရာ ၃၂:၁၁-၁၄။ တောလည်ရာ ၁၄:၁၃-၁၉) ဣသရေလလူမျိုးများ နွားသငယ်ဝတ်ပြုခြင်းနှင့်ပတ်သက်လာသောအခါ ယေဟောဝါဘက်၌ “အဘယ်သူနေသနည်း။ ငါ့ထံသို့လာစေ” ဟုခေါ်ထုတ်ခြင်းအားဖြင့် မောရှေသည်စင်ကြယ်သောဝတ်ပြုရေးအတွက် ဇွဲကိုတင်ပြခဲ့သည်။ ယင်းနောက်မောရှေနှင့် သူနှင့်အတူရှိသောသူများသည်ပြစ်မှားသူ ၃,၀၀၀ ကိုသုတ်သင်ခဲ့သည်။ ထို့နောက် နှစ်ပေါင်း ၄၀ တိုင်တိုင်မြည်တမ်း ပုန်ကန်သောလူမျိုးကို ခံရပ်ခဲ့သည်။ မောရှေသည်ဘုရားမေတ္တာတော်ကို တစ်ကိုယ်ကောင်းမဆန်ဘဲ တုံ့ပြန်ခဲ့သည်မှာ ယုံမှားဖွယ်မရှိဘဲ ယနေ့ကျွန်ုပ်တို့အတွက် ပုံသက်သေကောင်းတင်ပြခဲ့သည်။—ထွက်မြောက်ရာ ၃၂:၂၆-၂၈။ တရားဟောရာ ၃၄:၇၊ ၁၀-၁၂။

ဒါဝိဒ်၏တုံ့ပြန်မှုကောင်း

၉။ (က) ဒါဝိဒ်သည် ယေဟောဝါဘုရား၏မေတ္တာတော်ကို မည်သို့တုံ့ပြန်ခဲ့သနည်း။ (ခ) ဒါဝိဒ်ကဲ့သို့ကျွန်ုပ်တို့သည် ယေဟောဝါကိုအဖိုးတန်ပစ္စည်းများနှင့် မည်သို့ဂုဏ်တင်နိုင်သနည်း။

^၉ ဘုရားသခင့်မေတ္တာတော်ကို တစ်ကိုယ်ကောင်းမဆန်ဘဲတုံ့ပြန်ရာတွင် သမ္မာကျမ်းစာမှ ပေါ်လွင်သောပုံသက်သေတစ်ဦးမှာ ဣသရေလနိုင်ငံမှ ဒုတိယမြောက်ဘုရင် ဆာလံဆရာဒါဝိဒ်ဖြစ်သည်။ ယေဟောဝါနာမအတွက်သူ၏ဇွဲက ကဲ့ရဲ့သူကြီးမားသော ဖိလိတ္တိလူဂေါလျက်ကိုတိုက်ခိုက်ရန် လှုံ့ဆော်ခဲ့ပြီး ဘုရားရှင်သည်ဒါဝိဒ်ကိုအောင်ပွဲခံစေခဲ့သည်။ (၁ ဓမ္မရာဇဝင် ၁၇:၄၅-၅၁) ထိုဇွဲကပင်ဒါဝိဒ်အား ပဋိညာဉ်သေတ္တာကို ယေရုရှလင်မြို့သို့ ယူဆောင်လာရန် လှုံ့ဆော်ခဲ့သည်။ (၂ ဓမ္မရာဇဝင် ၆:၁၂-၁၉) ယေဟောဝါအတွက် ဗိမာန်တစ်ခုတည်ဆောက်ပေးလိုသောဒါဝိဒ်၏ဆန္ဒသည် ဘုရားသခင်၏မေတ္တာနှင့်ကောင်းမြတ်ခြင်းအပေါ် သူ၏ဇွဲနှင့်လေးမြတ်မှုတင်ပြခြင်း နောက်တစ်နည်းမဟုတ်ပေလော။ အမှန်ပင်ဖြစ်သည်။ ထိုအခွင့်အရေးငြင်းပယ်ခံခဲ့ရသော်လည်း မိမိကိုယ်ပိုင်ထဲမှ ရွှေ ငွေနှင့်တန်ဖိုးကြီးလှသော အဖိုးထိုက်ကျောက်များကိုလှူဒါန်းခြင်းဖြင့် အဆောက်အဦအတွက်ပြင်ဆင်ရန်နှင့် ယေဟောဝါကိုဂုဏ်တင်ရန် ဒါဝိဒ်အားအဟန့်အတားမဖြစ်ခဲ့ချေ။ (၂ ဓမ္မရာဇဝင် ၇:၁-၁၃။ ၁ ရာဇဝင်ချုပ် ၂၉:၂-၅) ဘုရားရှင်၏မေတ္တာကို အလားတူတစ်ကိုယ်ကောင်းမဲ့တုံ့ပြန်ခြင်းသည် ကျွန်ုပ်တို့အား ‘မိမိတို့၏အဖိုးတန်ပစ္စည်းများနှင့် ယေဟောဝါကိုဂုဏ်တင်’ ရန်လှုံ့ဆော်စေသင့်သည်။—သု ၃:၉ ၁၀။ မဿဲ ၆:၃၃။

၁၀။ မည်သို့နှင့်စပ်လျဉ်း၍ ဒါဝိဒ်၏လမ်းစဉ်သည်တုပထိုက်သနည်း။

^၁၀ ဒါဝိဒ်သည် ကြီးလေးသောအမှားများကို ပြုလုပ်ခဲ့သော်လည်း မိမိဘဝတစ်လျှောက်တွင်သူသည် ‘ယေဟောဝါစိတ်နှလုံးနှင့်ညီညွတ်’ ကြောင်းသက်သေထူခဲ့သည်။ (၁ ဓမ္မရာဇဝင် ၁၃:၁၄။ တမန်တော် ၁၃:၂၂) သူ၏ဆာလံကျမ်းတွင် ဘုရားမေတ္တာတော်အတွက် လေးမြတ်မှုများနှင့်ပြည့်နေသည်။ The International Standard Bible Encyclopœdia ကဒါဝိဒ်သည် “ကျေးဇူးတော်ကြီးမားမှုကို သန့်ရှင်းသောကျမ်းစောင်များတွင်တင်ပြထားသော အခြားသူများထက် ပိုမိုထုတ်ဖော်” သည်ဟုဆိုထားသည်။ ဆာလံဆရာအာသက ဘုရားသခင်သည် “ကျွန်တော်မျိုးဒါဝိဒ်ကို သိုးခြံများထဲက ရွေးယူတော်မူ၏။ . . . မိမိလူတည်းဟူသော ယာကုပ်အမျိုးသား၊ အမွေတော်တည်းဟူသော ဣသရေလလူတို့ကို ကျွေးမွေးစေခြင်းငှာ ခန့်ထားတော်မူ၏။ ထိုသူသည် ဖြောင့်မတ်သောသဘောရှိသည်အတိုင်းကျွေးမွေး၍ လိမ္မာသောလက်နှင့်ပို့ဆောင်လေ၏။” (ဆာလံ ၇၈:၇၀-၇၂) အမှန်ပင် ဒါဝိဒ်၏လမ်းစဉ်သည် ကျွန်ုပ်တို့တုပရန်အတွက်ဖြစ်သည်။

ယေရှုခရစ် ကျွန်ုပ်တို့၏စုံလင်သောပုံသက်သေ

၁၁၊ ၁၂။ ယေရှုသည်အမှန်ပင်ဘုရားကိုင်းရှိုင်းသူဖြစ်ကြောင်း မည်သို့တင်ပြခဲ့သနည်း။

^၁၁ ဘုရားသခင့်မေတ္တာတော်ကို တစ်ကိုယ်ကောင်းမဆန်ဘဲတုံ့ပြန်ရာတွင် ယေရှုခရစ်သည် အကောင်းဆုံးကျမ်းဆိုင်ရာ ပုံသက်သေဖြစ်သည်မှာ မလွဲဧကန်ဖြစ်သည်။ ယင်းသည်ယေရှုကို ဘာပြုလုပ်ရန်လှုံ့ဆော်ခဲ့သနည်း။ ဦးဆုံးအနေနှင့် ကိုယ်တော်သည် ယေဟောဝါကိုအကြွင်းမဲ့အပ်နှံဝတ်ပြုခဲ့သည်။ ယေရှုသည်တစ်လျှောက်လုံး ဘုရားကိုင်းရှိုင်းသူဖြစ်သည်မှာ ယုံမှားဖွယ်မရှိချေ။ ကိုယ်တော့်ကောင်းကင်ခမည်းတော်၏မေတ္တာနှင့် ကောင်းမြတ်ခြင်းကိုလေးမြတ်ခြင်းက ကိုယ်တော်အား အမှန်ပင်ဝိညာဏလူတစ်ဦးဖြစ်ရန် လှုံ့ဆော်ခဲ့သည်။ ကိုယ်တော်သည် ဘုရားသခင်နှင့် အနီးကပ် လက်ပွန်းတတီးဆက်ဆံရေးရှိခဲ့သည်။ ယေရှုသည် ဆုတောင်းခြင်းတွင်စွဲမြဲသူတစ်ဦးဖြစ်ပြီး ကိုယ်တော်၏ကောင်းကင်ခမည်းတော်ထံစကားပြောရန် ချစ်မြတ်နိုးခဲ့သည်။ မကြာခဏပင် ခရစ်တော်ဆုတောင်းနေခဲ့ခြင်းအကြောင်း ကျွန်ုပ်တို့ဖတ်ရှုရသည်။ တစ်ခါတွင် ကိုယ်တော်သည် ညလုံးပေါက်ဆုတောင်းခဲ့သည်။ (လုကာ ၃:၂၁၊ ၂၂။ ၆:၁၂။ ၁၁:၁။ ယောဟန် ၁၇:၁-၂၆) ဘုရားသခင်၏မေတ္တာတော်ကိုတုံ့ပြန်လျက် ယေရှုသည် ‘လူသည်မုန့်အားဖြင့်သာ အသက်ကိုမွေးရမည်မဟုတ်။ ယေဟောဝါမိန့်တော်မူသမျှအားဖြင့် အသက်ကိုမွေးရမည်’ ဟူသည့်သမ္မာတရားနှင့်အညီနေထိုင်ခဲ့သည်။ အမှန်တွင် ကိုယ်တော်၏ခမည်းတော်အလိုတော် ထမ်းရွက်ခြင်းသည် ကိုယ်တော်အတွက်အစာဖြစ်ခဲ့သည်။ (မဿဲ ၄:၄။ ယောဟန် ၄:၃၄) ကျွန်ုပ်တို့သည်လည်း အလားတူပင်ဘုရားသခင့်မေတ္တာတော်ကိုတုံ့ပြန်ပြီး ကိုယ်တော်အားအကြွင်းမဲ့ဆက်ကပ်မဝတ်ပြုသင့်ပေလော။

^၁၂ ဘုရားသခင့်မေတ္တာတော်ကို တစ်ကိုယ်ကောင်းမဆန်ဘဲတုံ့ပြန်လျက် ယေရှုခရစ်သည် မိမိ၏ဘုရားရှင်နှင့်ခမည်းတော်ထံ အစဉ်အာရုံစိုက်စေခဲ့သည်။ တစ်ယောက်ကယေရှုကို “ကောင်းမြတ်သောဆရာ” ဟုခေါ်သောအခါ ကိုယ်တော်သည်ကန့်ကွက်ခဲ့ပြီး “ဘုရားသခင်တစ်ပါးတည်းသာ ကောင်းမြတ်တော်မူ၏” ဟုမိန့်ဆိုခဲ့သည်။ (လုကာ ၁၈:၁၈ ၁၉) မိမိအလိုအလျောက် ဘာမျှမပြုလုပ်နိုင်ကြောင်း ယေရှုထပ်တစ်လဲလဲ အလေးအနက်မိန့်ဆိုခဲ့သည်။ ကိုယ်တော်သည် မိမိခမည်းတော်၏နာမဂုဏ်တင်ရန်အခွင့်အရေးကို တစ်ခါမျှလက်မလွတ်စေခဲ့ဘဲ ကိုယ်တော်၏နမူနာဆုတောင်းချက်တွင် လျောက်ပတ်စွာပင် “ကိုယ်တော်၏နာမတော်အား ရိုသေလေးမြတ်ခြင်းရှိပါစေသော” ဟူ၍အစချီတောင်းလျှောက်ခဲ့သည်။ ကိုယ်တော်မသေဆုံးမီလေးတွင်လည်း ခရစ်တော်သည်မိမိ၏ခမည်းတော်ထံ “အကျွန်ုပ်သည်မြေကြီးပေါ်မှာ ကိုယ်တော်၏ဘုန်းကိုထင်ရှားစေပါပြီ။ အကျွန်ုပ်ဆောင်ရွက်စရာဖို့ အကျွန်ုပ်၌အပ်ပေးတော်မူသောအမှုကို အကျွန်ုပ်ဆောင်ရွက်၍ပြီးပါပြီ” ဟုဆိုခဲ့သည်။ (မဿဲ ၆:၉။ ယောဟန် ၁၂:၂၈။ ၁၇:၄) အမှန်ပင် ဘုရားရှင်၏မေတ္တာတော်ကိုတုံ့ပြန်သည့်အနေနှင့် ကျွန်ုပ်တို့သည်ယေဟောဝါကိုဂုဏ်တင်ရန်လုပ်ဆောင်သင့်ပြီး ကိုယ်တော်၏သန့်ရှင်းသောနာမ မြင့်မြတ်သန့်ရှင်းမှုအတွက် ဆုတောင်းနေသင့်သည်။

၁၃။ ဘုရားသခင်၏မေတ္တာတော်သည် ယေရှုလုပ်ဆောင်ရန် မည်သို့လှုံ့ဆော်သနည်း။

^၁၃ ယခု ဘုရားသခင်၏မေတ္တာတော်အပေါ် တစ်ကိုယ်ကောင်းမဆန်ဘဲတုံ့ပြန်မှုက ယေရှုကိုမည်သို့လှုံ့ဆော်ပုံ ဒုတိယနည်းကိုကျေးဇူးပြု၍မှတ်သားပါ။ ယင်းသည်ကိုယ်တော်ကိုဆာလံ ၄၅:၇ တွင်ကြိုတင်ဟောထားသည့်အတိုင်း ဖြောင့်မတ်မှုကိုချစ်၍ဆိုးယုတ်မှုကို မုန်းစေခဲ့သည်။ (ဟေဗြဲ ၁:၉) ကိုယ်တော်သည် “သန့်ရှင်းစင်ကြယ်၍ အညစ်အကြေးနှင့်ကင်းလွတ်လျက် အပြစ်ရှိသောသူတို့နှင့်မဆက်ဆံ” ခဲ့ချေ။ (ဟေဗြဲ ၇:၂၆) ယေရှုသည်မိမိအားရန်ငြိုးထားသော အတိုက်အခံများကို မိမိအပြစ်ရှိလျှင် ထင်ရှားပြသရန် စိန်ခေါ်ခဲ့သည်။ သို့သော်သူတို့ မစွမ်းဆောင်နိုင်ခဲ့ချေ။ (ယောဟန် ၈:၄၆) ကိစ္စနှစ်ရပ်တွင် ဆိုးယုတ်မှုအပေါ် ကိုယ်တော်၏မုန်းတီးမှုက ကိုယ်တော်အား လောဘကြီးသောဘာသာရေးသမားများကို ရှင်းလင်းရန်ဖြစ်စေခဲ့သည်။ (မဿဲ ၂၁:၁၂ ၁၃။ ယောဟန် ၂:၁၃-၁၇) ယေရှုကသူတို့သည် မာရ်နတ်မှဆင်းသက်သည်ဟုပင်ပြောဆိုလျက် ရှေ့တစ်မျိုးနောက်တစ်မျိုးဖြစ်သော ဘာသာရေးခေါင်းဆောင်များအား မခံချိမခံသာ အတိအလင်းထုတ်ဖော်ခဲ့ပါသည်တကား။ —မဿဲ ၆:၂၊ ၅၊ ၁၆။ ၁၅:၇-၉။ ၂၃:၁၃-၃၂။ ယောဟန် ၈:၄၄။

၁၄။ ယေဟောဝါ၏မေတ္တာတော်ကိုတုံ့ပြန်လျက် ယေရှုသည်မိမိ၏တပည့်တော်များနှင့် မည်သို့ဆက်ဆံခဲ့သနည်း။

^၁၄ ယေဟောဝါ၏မေတ္တာတော် ယေရှုကိုလှုံ့ဆော်ပုံနောက်တစ်နည်းကို မိမိ၏တမန်တော်များနှင့် အခြားတပည့်တော်များအပေါ် ကိုယ်တော်၏ဆက်ဆံပုံအားဖြင့်လည်း မြင်တွေ့နိုင်သည်။ ကိုယ်တော်သည်သူတို့နှင့် မည်မျှမေတ္တာပါလျက်သည်းခံကာ စိတ်ရှည်လှပါသည်တကား။ သူတို့သည် မိမိတို့ပြိုင်ဆိုင်နေမှုအားဖြင့် ကိုယ်တော်အားအလွန်ထိခိုက်စေခဲ့မည်ဖြစ်ပြီး ကိုယ်တော်အပ်နှံခံရသည့်ညဉ့်တိုင်အောင် မည်သူအကြီးဆုံးနှင့်စပ်လျဉ်း၍ ငြင်းခုံခဲ့ကြသည်။ (လုကာ ၂၂:၂၄-၂၇) သို့ပင်ငြားလည်း ယေရှုသည် စိတ်နူးညံ့၍နှလုံးနှိမ့်ချကြောင်း အစဉ်တင်ပြခဲ့သည်။ (မဿဲ ၁၁:၂၈-၃၀) မှန်ပါသည်၊ ယုဒသည်ယေရှုကိုသစ္စာဖောက်ခဲ့ပြီး ပေတရုသည်ကိုယ်တော်အား သုံးကြိမ်ငြင်းပယ်ခဲ့ကာ လူအုပ်သည်ကိုယ်တော်အားဖမ်းဆီးရန်လာသောအခါ အခြားတမန်တော်များထွက်ပြေးခဲ့သည်။ သို့သော်ကိုယ်တော်သည် တစ်ခါမျှနာကြည်းခြင်း သို့မဟုတ် ဒေါသထွက်ခြင်းမရှိခဲ့ချေ။ ကျွန်ုပ်တို့မည်သို့သိနိုင်သနည်း။ အကြောင်းမှာ ကိုယ်တော်ထမြောက်ပြီးနောက် တမန်တော်များနှင့် ပြန်လည်တွေ့ဆုံသောအခါ ကြောက်ရွံ့သွားခြင်းအတွက် ယေရှုသည်သူတို့အား အပြစ်တင်စကားများနှင့် ထိုးနှက်ခဲ့သည်ကိုမတွေ့ရချေ။ သို့အစား၊ ကိုယ်တော်သည်သူတို့အား နှစ်သိမ့်ခဲ့ပြီး ရှေ့ဆက်ဘုရားနိုင်ငံတော် လုပ်ငန်းအတွက် ခွန်အားပေးခဲ့ပါသည်။—ယောဟန် ၂၀:၁၉-၂၃။

၁၅။ ယေရှုသည် လူများ၏ရုပ်ပိုင်းလိုအပ်ချက်ကို တစ်ကိုယ်ကောင်းမဆန်ဘဲ မည်သို့ဆောင်ရွက်ပေးခဲ့သနည်း။

^၁၅ ယေရှုခရစ်သည် ဘုရားသခင့်မေတ္တာတော်ကို တစ်ကိုယ်ကောင်းမဆန်ဘဲတုံ့ပြန်ခဲ့ပုံ နောက်တစ်နည်းကို ကျွန်ုပ်တို့သုံးသပ်ကြပါစို့။ ကိုယ်တော်သည် နှက်တိုင်ပေါ်တွင် ရှက်ဖွယ်နှင့်နာကျင်လှစွာသေသည့်တိုင်အောင် အခြားသူများအတွက် မိမိကိုယ်ကိုပူဇော်ခြင်းအားဖြင့်ဖြစ်သည်။ (ဖိလိပ္ပိ ၂:၅ ၈) ယေရှုသည်လူဒုနှင့်ဒေးအား အံ့ဖွယ်နည်းဖြင့်ကျွေးမွေးကာ ကုသမှုများစွာပြုလုပ်ပေးခြင်းဖြင့် လူသားတို့၏ခန္ဓာပိုင်းလိုအပ်ချက်ကို ဆောင်ရွက်ပေးခဲ့သည်။ (မဿဲ ၁၄:၁၄-၂၂။ ၁၅:၃၂-၃၉) ကိုယ်တော်သည် မိမိအရေးထက် အခြားသူများ၏အရေးကို အစဉ်ဦးစားထားခဲ့သည်။ ထို့ကြောင့်ပင်ကိုယ်တော်က “မြေခွေးသည် မြေတွင်းရှိ၏။ မိုးကောင်းကင်၌ကျင်လည်သောငှက်သည် နားနေရာအရပ်ရှိ၏။ လူသားမူကား ခေါင်းချရာမျှမရှိ” ဟုမိန့်ဆိုနိုင်ခဲ့သည်။ (မဿဲ ၈:၂၀) ယေရှုသည် အံ့ဖွယ်ကုသမှုများလုပ်ဆောင်ရာတွင် မိမိကိုယ်မှစီးဆင်းသွားသော ဘုရားသခင့်ဝိညာဉ်တော်၏လုပ်ဆောင်မှုကို သိရှိခံစားခဲ့သည်။ သို့သော်ကိုယ်တော်သည် မိမိအဝတ်တော်ကို ယုံကြည်ခြင်းနှင့်လာရောက်တို့ထိကာ ကျန်းမာသွားသော ၁၂ နှစ်တိုင်တိုင်သွေးသွန်နာစွဲနေသော မိန်းမတစ်ဦးမှာကဲ့သို့ ထိုကဲ့သို့သော ဓမ္မတာထက်လွန်ကဲသောတန်ခိုးကိုအသုံးပြုခြင်းမှ တစ်ခါမျှငွေကြေးဥစ္စာ အမြတ်မထုတ်ခဲ့ချေ။ (မာကု ၅:၂၅-၃၄) ထို့ပြင် ယေရှုသည်တစ်ခါမျှ မိမိအကျိုးအတွက် ဓမ္မတာထက်လွန်ကဲသောတန်ခိုးများ အသုံးမပြုခဲ့ချေ။—မဿဲ ၄:၂-၄ နှိုင်းယှဉ်။

၁၆။ ခရစ်တော်သည် လူတို့၏ဝိညာဏလိုအပ်ချက်ကို မည်သို့သောနည်းများဖြင့် ဆောင်ရွက်ပေးခဲ့သနည်း။

^၁၆ ယေရှုသည် တစ်ကိုယ်ကောင်းမဆန်ဘဲ လူတို့၏ရောဂါကိုကုသလျက် အံ့ဖွယ်နည်းဖြင့်ကျွေးမွေးခဲ့ကာ သူတို့၏ရုပ်ပိုင်းလိုအပ်ရာများကို ဆောင်ရွက်ပေးခဲ့သော်လည်း ကိုယ်တော်၏မြေကြီးအမှုဆောင်ခြင်းတွင် အဓိကစိတ်ထက်သန်မှုမှာ ဘုရားနိုင်ငံတော်သတင်းကောင်းကိုကြေညာရန် သွန်သင်ရန်နှင့်တပည့်ဖြစ်စေရန်ဖြစ်သည်။ ကိုယ်တော်သည် အံ့ဖွယ်ကုသမှုများစွာပြုလုပ်ခဲ့သော်လည်း ကိုယ်တော်အားသမားတော်ကြီး သို့မဟုတ် အံ့ဖွယ်တန်ခိုးရှင်အဖြစ်မဟုတ်ဘဲ ကြီးမြတ်သောဆရာအဖြစ်သိရှိခဲ့ကြသည်။ (မဿဲ ၄:၂၃၊ ၂၄။ မာကု ၁၀:၁၇) ယေရှုသည်မိမိကိုယ်ကို မိမိ၏တပည့်တော်များနှင့်မိမိ၏ရန်သူများကဲ့သို့ပင် ဆရာအဖြစ်ရည်ညွှန်းခဲ့သည်။ (မဿဲ ၂၂:၁၆။ ၂၆:၁၈။ မာကု ၉:၃၈) ကိုယ်တော်၏တောင်ပေါ်ဒေသနာ၌ကဲ့သို့ပင် ကိုယ်တော်သည် တကယ့်သမ္မာတရားများကို သွန်သင်ခဲ့ပါသည်တကား။ (မဿဲ ၅:၁–၇:၂၉) ကိုယ်တော်၏ပုံဥပမာများသည် မည်မျှလျော်ကန်လှ၍ ကိုယ်တော်၏ပရောဖက်ပြုပုံတင်ပြချက်များနှင့်အခြားပရောဖက်ပြုချက်များသည် မည်မျှစိတ်လှုပ်ရှားဖွယ်ပါတကား။ ထို့ကြောင့်ပင်ယေရှုကိုဖမ်းရန် စေလွှတ်ခဲ့သောစစ်သားများသည် ကိုယ်တော်ကိုဖမ်းရန်မဝံ့ခဲ့သည်မှာ အံ့ဩစရာမဟုတ်ပါတကား။—ယောဟန် ၇:၄၅၊ ၄၆။

၁၇။ (က) ယေရှုသည်ကျွန်ုပ်တို့အတွက် မည်သည့်စုံလင်သောပုံနမူနာကို တင်ပြခဲ့သနည်း။ (ခ) နောက်ဆောင်းပါးတွင် ဘာကိုဆွေးနွေးမည်နည်း။

^၁၇ ကျွန်ုပ်တို့အပေါ် ဘုရားသခင်တင်ပြခဲ့သောမေတ္တာကို တစ်ကိုယ်ကောင်းမဆန်ဘဲ တုံ့ပြန်ရာတွင် ယေရှုခရစ်သည်ကျွန်ုပ်တို့အတွက် စုံလင်သောပုံသက်သေထားခဲ့သည်မှာ ယုံမှားဖွယ်မရှိချေ။ ယေရှုသည် မိမိ၏အသက်တာနှင့် တွယ်တာမှုတွင် ကောင်းကင်ခမည်းတော်ကို ပထမနေရာပေးခဲ့သည်။ ကိုယ်တော်သည် ဖြောင့်မတ်ခြင်းကိုအမှန်ပင်ချစ်ပြီး မိမိ၏တမန်တော်များနှင့် အခြားတပည့်တော်များကို မေတ္တာဖြင့်ဆက်ဆံခဲ့ကာ လူများ၏ဝိညာဏနှင့်ရုပ်ပိုင်းလိုအပ်ချက်ကို ဆောင်ရွက်ပေးခြင်းဖြင့် မိမိ၏အသက်တာကိုအသုံးပြုခဲ့သည်။ (မဿဲ ၂၀:၂၈) ကျွန်ုပ်တို့ကောမည်သို့နည်း။ မှန်သည် ကျွန်ုပ်တို့သည် မောရှေနှင့်ဒါဝိဒ်ကဲ့သို့ မစုံလင်ကြချေ။ သို့ပင်ငြားလည်း နောက်ဆောင်းပါးတွင် တင်ပြထားသည့်အတိုင်း ဘုရားသခင့်မေတ္တာတော်တင်ပြချက်ကို တစ်ကိုယ်ကောင်းမဆန်ဘဲ တုံ့ပြန်ရာတွင် ကျွန်ုပ်တို့၏ပုံသက်သေရှင်ကို တုပနိုင်သည့် လက်တွေ့ကျသောနည်းလမ်းများရှိလေသည်။

သင်မည်သို့တုံ့ပြန်မည်နည်း

▫ “ဘုရားသခင်သည် ချစ်ခြင်းမေတ္တာဖြစ်တော်မူ၏” ဟုအဘယ်ကြောင့်ဆိုနိုင်သနည်း။

▫ ဘုရားသခင်၏မေတ္တာတော်တင်ပြချက်ကို မောရှေမည်သို့တုံ့ပြန်ခဲ့သနည်း။

▫ ဒါဝိဒ်သည် ယေဟောဝါဘုရား၏မေတ္တာတော်ကို မည်သို့သောနည်းများဖြင့် တုံ့ပြန်ခဲ့သနည်း။

▫ ဘုရားသခင်၏မေတ္တာတော်တုံ့ပြန်ရာတွင် ယေရှုခရစ်သည် မည်သည့်ပုံသက်သေများထားခဲ့သနည်း။

[စာမျက်နှာ ၉ ပါ ရုပ်ပုံ]

မောရှေသည် ဘုရားသခင်၏မေတ္တာတော်အား မည်သို့တုံ့ပြန်ပုံကို သင်သိရှိပါသလော

[စာမျက်နှာ ၁၀ ပါ ရုပ်ပုံ]

ယေရှုသည် အခြားသူများကို ဝိညာဉ်ရေးအရနှင့်ရုပ်ပိုင်းအရကူညီလျက် မိမိ၏အသက်ကိုရွေးဖိုးအဖြစ်ပေးအပ်ခြင်းဖြင့် ဘုရားသခင်၏မေတ္တာတော်ကိုတုံ့ပြန်ခဲ့သည်