ငရဲနှင့်ပတ်သက်သော အမှန်တရားကို သိရှိခြင်းက သင့်အပေါ် မည်သို့ သက်ရောက်မှုရှိသနည်း
ငရဲဟူသည် ညှဉ်းဆဲရာအရပ်ဖြစ်သည်ဟု သွန်သင်သူတို့သည် ယေဟောဝါဘုရားသခင်နှင့် ကိုယ်တော်၏အရည်အသွေးများကို လုံးဝတလွဲဖော်ပြလိုက်ခြင်းပင်။ ဘုရားသခင်သည် လူဆိုးများကိုဖျက်ဆီးမည်ဟု ကျမ်းစာတွင်ဖော်ပြထားသည်မှာ မှန်ပါသည်။ (၂ သက်သာလောနိတ် ၁:၆-၉) သို့သော် ဖြောင့်မတ်သောအမျက်ဒေါသသည် ဘုရားသခင်၏အဓိကအရည်အသွေးမဟုတ်ပေ။
ဘုရားသခင်သည် ရက်စက်သော၊ အငြိုးအတေးကြီးသော ဘုရားသခင်မဟုတ်ပါ။ “မတရားသောသူ . . . အသေခံခြင်းအမှု၌ ငါသည် အနည်းငယ်သော ပျော်မွေ့ခြင်းရှိသလော” ဟုပင် ကိုယ်တော်မေးခဲ့သည်။ (ယေဇကျေလ ၁၈:၂၃) မတရားသောသူသေဆုံးသည်ကို ကိုယ်တော်မနှစ်သက်လျှင် သူတို့ထာဝစဉ်ညှဉ်းဆဲခံနေရသည်ကို ကိုယ်တော် မည်သို့နှစ်သက်နိုင်ပါမည်နည်း။
ဘုရားသခင်၏အဓိကအရည်အသွေးမှာ ချစ်ခြင်းမေတ္တာဖြစ်၏။ (၁ ယောဟန် ၄:၈) ‘ယေဟောဝါသည် ခပ်သိမ်းသောသူတို့အား ကျေးဇူးပြုချင်သောသဘောရှိ၍ ဖန်ဆင်းတော်မူသမျှတို့ကို သနားစုံမက်တော်မူ၏။’ (ဆာလံ ၁၄၅:၉) တစ်ဖန်၊ ကျွန်ုပ်တို့ကလည်း ဘုရားသခင်ကို နှစ်နှစ်ကာကာချစ်ရန် ကိုယ်တော်လိုလားသည်။—မဿဲ ၂၂:၃၅-၃၈။
ငရဲကိုကြောက်ရွံ့ခြင်း သို့မဟုတ် ဘုရားသခင်ကိုချစ်ခြင်း—အဘယ်အရာက သင့်ကို လှုံ့ဆော်ပေးသနည်း
ငရဲတွင် ဝိညာဉ်များညှဉ်းဆဲခံရသည်ဟူသော သွန်သင်ချက်သည် ဘုရားသခင်အား အလွန်အမင်းကြောက်စိတ်ဝင်ရန် လှုံ့ဆော်ပေးသည်။ သို့သော် ဘုရားသခင်နှင့်ပတ်သက်သော အမှန်တရားကိုသင်ယူသိရှိပြီး ကိုယ်တော်ကိုချစ်လာသူတစ်ဦးသည် ကိုယ်တော်အား တော်မှန်သောကြောက်ရွံ့စိတ် ရှိလာပါလိမ့်မည်။ ‘ယေဟောဝါကို ကြောက်ရွံ့ရိုသေခြင်းသည် ပညာ၏အစမူလဖြစ်၏။ ထိုသို့ကြောက်ရွံ့ရိုသေသောသူတို့သည် ဉာဏ်ကောင်းသောသူဖြစ်ကြ၏’ ဟုဆာလံ ၁၁၁:၁၀ [သမ္မာ] တွင် ဖော်ပြသည်။ ဘုရားသခင်အား ထိုသို့ကြောက်ရွံ့ခြင်းသည် အလွန်အမင်းထိတ်လန့်ကြောက်ရွံ့ခြင်းမဟုတ်ပေ။ ဖန်ဆင်းရှင်အား လေးစားခန့်ညားခြင်း၊ ကြောက်ရွံ့ရိုသေခြင်းဖြစ်သည်။ ကိုယ်တော်မနှစ်သက်မည်ကို စိုးရိမ်သည့် ကောင်းကျိုးပြုသောကြောက်ရွံ့ခြင်းမျိုးဖြစ်သည်။
အမှန်တရားကိုသင်ယူခြင်းသည် မူးယစ်ဆေးစွဲခဲ့သူ အသက် ၃၂ နှစ်အရွယ်ကယ်သရင်းအပေါ် မည်သို့သက်ရောက်မှုရှိကြောင်း သုံးသပ်ကြည့်ပါ။ သူ့ဘဝတစ်လျှောက်လုံးတွင် ပါတီပွဲတက်ခြင်း၊ အကြမ်းဖက်ခြင်း၊ မိမိကိုယ်ကိုရွံမုန်းခြင်း၊ အကျင့်ပျက်ခြင်းတို့နှင့် ပြည့်နှက်နေသည်။ “ကျွန်မရဲ့ တစ်နှစ်အရွယ်သမီးလေးကိုကြည့်ပြီး ‘သမီးလေးအတွက် ငါဘာတွေလုပ်နေသလဲ ကြည့်စမ်းပါဦး။ ဒီအတွက် ငါ ငရဲကျတော့မှာပဲ’ လို့တွေးမိတယ်” ဟုသူပြောသည်။ သူသည် မူးယစ်ဆေးဖြတ်ရန် ကြိုးစားသော်လည်း မအောင်မြင်ခဲ့ပေ။ “ကျွန်မ လူကောင်းဖြစ်ချင်ပါတယ်။ ဒါပေမဲ့ ကျွန်မဘဝမှာကော၊ တစ်လောကလုံးမှာပါ အရာရာဟာ ကြေကွဲစရာတွေချည်းပဲ၊ လူကောင်းဖြစ်လာစရာ အကြောင်းမရှိပါဘူး” ဟုသူပြောခဲ့သည်။
နောက်ပိုင်း၊ ကက်သရင်းသည် ယေဟောဝါသက်သေများနှင့် တွေ့ဆုံခဲ့သည်။ “မီးငရဲမရှိဘူးဆိုတာ ကျွန်မသိလာတယ်။ ကျမ်းစာအထောက်အထားတွေက တကယ့်ကိုအဓိပ္ပာယ်ရှိတယ်။ ကျွန်မ မီးငရဲထဲညှဉ်းဆဲခံရမှာမဟုတ်ဘူးဆိုတာ သိလာတော့ အတော့်ကိုစိတ်အေးသွားတယ်” ဟုသူပြောပြသည်။ ဆိုးသွမ်းမှုကင်းစင်သောကမ္ဘာပေါ်တွင် လူတို့ ထာဝစဉ်အသက်ရှင်နိုင်မည်ဟူသော ဘုရားသခင်၏မျှော်လင့်ချက်ကိုလည်း သူသိရှိလာသည်။ (ဆာလံ ၃၇:၁၀၊ ၁၁၊ ၂၉; လုကာ ၂၃:၄၃) “အခုဆို ပရဒိသုမှာထာဝစဉ်အသက်ရှင်နိုင်မယ့် စစ်မှန်တဲ့မျှော်လင့်ချက်ရှိလာပြီ” ဟုသူဝမ်းသာအားရပြောခဲ့သည်။
ကက်သရင်းသည် မီးငရဲကိုကြောက်စရာမလိုဘဲ မူးယစ်ဆေးဖြတ်နိုင်ပါမည်လော။ “မူးယစ်ဆေးကို အာသာငမ်းငမ်းတမ်းတမိတဲ့အခါ အကူအညီပေးဖို့ ယေဟောဝါဆီဆုတောင်းတယ်။ အဲဒီညစ်ညမ်းတဲ့အကျင့်တွေကို ဘုရားသခင် ဘယ်လိုရှုမြင်တယ်ဆိုတာ ကျွန်မတွေးတောတယ်။ ကိုယ်တော့်ကို စိတ်မပျက်စေချင်ဘူး။ ကျွန်မရဲ့ဆုတောင်းချက်ကို ကိုယ်တော်နားညောင်းခဲ့တယ်” ဟုသူပြန်ပြောပြသည်။ (၂ ကောရိန္သု ၇:၁) ဘုရားသခင်မနှစ်သက်မည်ကို စိုးရွံ့စိတ်က အကျင့်ဆိုးများကိုဖျောက်ဖျက်နိုင်ရန် ကက်သရင်းအား ကူညီပေးခဲ့သည်။
ဘုရားသခင်ကိုချစ်သောမေတ္တာကို မွေးမြူခြင်း၊ ငရဲကိုကြောက်ရွံ့ခြင်းမျိုးမဟုတ်ဘဲ ဘုရားသခင်အား တော်မှန်စွာကြောက်ရွံ့ခြင်းသည် ကိုယ်တော့်အလိုတော်ဆောင်ရန် ကျွန်ုပ်တို့ကို လှုံ့ဆော်ပေးနိုင်ပြီး ထာဝရပျော်ရွှင်စေသည်။ ထို့ကြောင့် ဆာလံဆရာက ‘ယေဟောဝါကိုကြောက်ရွံ့၍ လမ်းခရီးတော်သို့ လိုက်သွားသမျှသောသူတို့သည် မင်္ဂလာရှိကြ၏’ ဟုရေးခဲ့ခြင်းဖြစ်သည်။—ဆာလံ ၁၂၈:၁။
[စာမျက်နှာ ၉ ပါလေးထောင့်ကွက်/ ရုပ်ပုံ]
မီးငရဲမှ မည်သူလွတ်မြောက်မည်နည်း
ဘာသာပြန်ကျမ်းအချို့က ဂေဟင်နာနှင့် ဟေးဒီးစ်ဟူသော ဂရိ စကားလုံးနှစ်လုံးကို “ငရဲ” ဟူ၍ တစ်မျိုးတည်းပြန်ဆိုခြင်းဖြင့် လူတို့အား စိတ်ရှုပ်ထွေးစေခဲ့သည်။ ကျမ်းစာတွင် ဂေဟင်နာဟူသောစကားလုံးသည် ရှင်ပြန်ထမြောက်ခြင်းမျှော်လင့်ချက်မရှိသော အစတုံးဖျက်ဆီးခြင်းကို ရည်ညွှန်းသည်။ ဆန့်ကျင်ဘက်အနေဖြင့် ဟေးဒီးစ်တွင်ရှိသောသူတို့မူ ရှင်ပြန်ထမြောက်ခြင်းမျှော်လင့်ချက်ရှိသည်။
ထို့ကြောင့် ယေရှုသေဆုံး၍ ရှင်ပြန်ထမြောက်ပြီးနောက်ပိုင်းတွင် ပေတရုက မိမိပရိသတ်အား ဘုရားသခင်သည် ယေရှုကို “ငရဲ၌ပစ်ထားတော်မမူ” ဟုပြောဆိုခဲ့ခြင်းဖြစ်သည်။ (တမန်တော် ၂:၂၇၊ ၃၁၊ ၃၂; ဆာလံ ၁၆:၁၀၊ ဂျိမ်းဘုရင်ဘာသာပြန်ကျမ်း) ဤတွင် “ငရဲ” ဟုပြန်ဆိုထားသော ဂရိစကားလုံးမှာ ဟေးဒီးစ်ဖြစ်သည်။ ယေရှုသည် မီးတောက်လောင်ရာအရပ်တစ်ခုသို့ မရောက်ရှိခဲ့ပါ။ ဟေးဒီးစ် သို့မဟုတ် “ငရဲ” ဟူသည် သင်္ချိုင်းဖြစ်၏။ သို့သော် ဘုရားသခင်သည် ယေရှုတစ်ဦးတည်းကိုသာ ဟေးဒီးစ်မှထွက်မြောက်စေသည်မဟုတ်ပါ။
ရှင်ပြန်ထမြောက်ခြင်းနှင့်ပတ်သက်၍ ကျမ်းစာက “သေခြင်းနှင့် ငရဲသည်လည်း မိမိတို့၌ရှိသောလူသေတို့ကို အပ်ပေးကြ၏” ဟုဖော်ပြသည်။ (ဗျာ. ၂၀:၁၃၊ ၁၄၊ ဂျိမ်းဘုရင်ဘာသာပြန်ကျမ်း) “ငရဲ” ကို ဗလာကျင်းဖြစ်စေခြင်းဟူသည် ရှင်ပြန်ထမြောက်ခံထိုက်သည်ဟု ဘုရားသခင်စီရင်သူအားလုံး အသက်ပြန်ရှင်လာခြင်းကို ဆိုလိုသည်။ (ယောဟန် ၅:၂၈၊ ၂၉; တမန်တော် ၂၄:၁၅) ကျွန်ုပ်တို့ချစ်မြတ်နိုးရသော သေလွန်သူတို့ သင်္ချိုင်းမှထမြောက်လာသည်ကို မြင်တွေ့ရခြင်းသည် အနာဂတ်အတွက် အလွန်တောက်ပသောမျှော်လင့်ချက်ပါတကား။ အတိုင်းအဆမဲ့မေတ္တာရှင် ယေဟောဝါဘုရားသခင်သည် ထိုသို့လုပ်ဆောင်ပေးပါလိမ့်မည်။