“ပတ္တမြားကျောက်နှင့်တူ၏”

တမန်တော်ယောဟန်သည် ကောင်းကင်တွင် ဘုန်းရှိသောပလ္လင်တစ်ခုကို အာရုံတစ်ခု၌ တွေ့ မြင်ခဲ့သည်။ ပလ္လင်တော်ပေါ် ထိုင်သောသူသည် ‘နဂါးသွဲ့ကျောက်နှင့်တူ၏။’ ထိုသူသည် “ပတ္တမြားကျောက်နှင့်” လည်းတူ၏။ (ဗျာ. ၄:၂၊ ၃) အဘယ်ကျောက်များနည်း။

ထိုကျောက်များသည် အရောင်လက်သည့် ထိုးဖောက်မမြင်နိုင်သော ကျောက်များမဟုတ်ပေ။ ရှေးအချိန်တွင် “နဂါးသွဲ့” ဟုဘာသာပြန်ထားသော ဂရိစကားလုံးသည် ထိုးဖောက်မြင်နိုင်သော တန်ဖိုးရှိကျောက်များအပါအဝင် ရောင်စုံကျောက်များကို ဖော်ပြရန်အသုံးပြုသည်။ ဗျာ. ၄:၃ တွင်ဖော်ပြထားသော “နဂါးသွဲ့ကျောက်” သည် “ကျွန်ုပ်တို့ခေတ်တွင်သိထားသည့် ဈေးပေါသော နဂါးသွဲ့မဟုတ်သည်မှာ သေချာသည်” ဟုအေ. တီ. ရောဘတ်စန်က ဓမ္မသစ်ကျမ်း ရုပ်လုံးပေါ်စကားများ ဟူသောစာအုပ်တွင် ဖော်ပြသည်။ ထို့ပြင် ယောဟန်သည် ဗျာ.ကျမ်း၏နောက်ဆုံးပိုင်းတွင် ကောင်းကင်ယေရုရှလင်မြို့အကြောင်း ဤသို့ဖော်ပြသည်– “ထိုမြို့၏အရောင်အဝါသည်၊ ကျောက်သလင်းနဂါးသွဲ့ကဲ့သို့ အမြတ်ဆုံးသောကျောက်မျက်မွန်နှင့်တူ၏။” (ဗျာ. ၂၁:၁၀၊ ၁၁) ယောဟန်ရည်ညွှန်းသော ကျောက်များသည် အလင်းထိုးဖောက်နိုင်သော ကျောက်များဖြစ်သည်မှာ ထင်ရှားသည်။

ယောဟန်၏အာရုံတွင် တွေ့မြင်ရသော ပလ္လင်တော်ပေါ်မှာထိုင်သောသူသည် စကြဝဠာတွင် ဘုန်းကျက်သရေအရှိဆုံးပုဂ္ဂိုလ် ယေဟောဝါပင်ဖြစ်သည်။ ကိုယ်တော်၏ သန့်ရှင်းမြင့်မြတ်မှုသည် အထွတ်အထိပ်ဖြစ်၏။ ယင်းနှင့်အညီ တမန်တော်ယောဟန် ဤသို့ရေးသားခဲ့သည်– “ဘုရားသခင်သည် အလင်းဖြစ်တော်မူ၏။ ဘုရားသခင်၌ မှောင်မိုက်အလျှင်းမရှိ။” (၁ ယောဟန် ၁:၅) ထို့ကြောင့် ယောဟန်သည် ယုံကြည်သူချင်းတို့အား “ကိုယ်တော်သန့်ရှင်းတော်မူသည်နည်းတူ၊ ကိုယ်ကိုကိုယ်သန့်ရှင်းစေ” ရန် တိုက်တွန်းခဲ့သည်။—၁ ယောဟန် ၃:၃။

ကျွန်ုပ်တို့အား သန့်ရှင်းစင်ကြယ်သည်ဟု ကိုယ်တော်ယူမှတ်ရန် ကျွန်ုပ်တို့အဘယ်အရာ ပြုလုပ်ရမည်နည်း။ ကျွန်ုပ်တို့၏အပြစ်များ ခွင့်လွှတ်ခံရဖို့ ယေရှုသွန်းခဲ့သောအသွေး၌ ယုံကြည်ခြင်းသည် မရှိမဖြစ်လိုအပ်သည်။ ကျွန်ုပ်တို့သည် ကျမ်းစာမှန်မှန်လေ့လာပြီး ၎င်း၏သွန်သင်ချက်များနှင့်အညီ အသက်ရှင်နေထိုင်ခြင်းဖြင့် “အလင်း၌ကျင်လည်” ရန်လည်းလိုအပ်သည်။—၁ ယောဟန် ၁:၇။