စာရှုသူများထံမှ မေးခွန်းလွှာ

ယေဟောဝါသက်သေများသည် ဗျာ.ကျမ်း၌ဖော်ပြထားသော ၁၄၄,၀၀၀ ကို ပုံဆောင်ဂဏန်းအဖြစ်မဟုတ်ဘဲ အဘယ်ကြောင့် စာသားအတိုင်းယူကြသနည်း။

တမန်တော်ယောဟန်က “တံဆိပ်ခတ်ခြင်းကိုခံရသောသူအရေအတွက်ကို ငါကြား၍ . . . တစ်သိန်းလေးသောင်းလေးထောင်” ဖြစ်သည်ဟု ရေးသားခဲ့သည်။ (ဗျာ. ၇:၄) သမ္မာကျမ်းစာတွင် “တံဆိပ်ခတ်ခြင်းကိုခံရသောသူ” ဟူသည့် စကားစုမှာ ရောက်လာတော့မည့် မြေကြီးပရဒိသုကို ကောင်းကင်တွင် ခရစ်တော်နှင့်အတူအုပ်ချုပ်ရန် လူသားတို့ထဲမှ ရွေးချယ်ခံရသောလူအုပ်စုကို ဆိုလိုသည်။ (၂ ကောရိန္သု ၁:၂၁၊ ၂၂; ဗျာ. ၅:၉၊ ၁၀; ၂၀:၆) အကြောင်းရင်းအမျိုးမျိုးကြောင့် ၁၄၄,၀၀၀ ဟူသော သူတို့၏အရေအတွက်သည် စာသားအတိုင်းဖြစ်သည်ဟု နားလည်ရသည်။ အကြောင်းရင်းတစ်ခုကို ဗျာ. ၇:၄ ၏ရှေ့နောက်စကားတွင် တွေ့ရှိရသည်။

တမန်တော်ယောဟန်သည် အဆင်းအာရုံတွင် ဤ ၁၄၄,၀၀၀ အုပ်စုအကြောင်း ကြားသိရပြီးနောက် အခြားအုပ်စုတစ်စုကို မြင်တွေ့ ခဲ့ရသည်။ ဤဒုတိယအုပ်စုကို ယောဟန်က “ဘာသာစကားအဖုံဖုံပြောသည့် လူအမျိုးမျိုး၊ အနွယ်နွယ်၊ အစုစုမှ မည်သူမျှမရေတွက်နိုင်သော လူအုပ်ကြီး” အဖြစ် ဖော်ပြသည်။ ဤလူအုပ်ကြီးသည် လက်ရှိဆိုးညစ်သောလောကကို ဖျက်ဆီးပစ်မည့် ရောက်အံ့ဆဲဆဲ ‘ကြီးစွာသောဆင်းရဲခြင်း’ ကိုကပ်ကျော်မည့်သူများဖြစ်သည်။—ဗျာ. ၇:၉၊ ၁၄၊ ကဘ။

သို့သော် ဗျာ.ကျမ်းအခန်းကြီး ၇ အခန်းငယ် ၄ နှင့် ၉ ခြားနားကြောင်း ယောဟန်ဖော်ပြပုံကို သတိပြုပါ။ “တံဆိပ်ခတ်ခြင်းကိုခံရသောသူ” ပထမအုပ်စုသည် အရေအတွက်အတိအကျရှိကြောင်း သူဖော်ပြခဲ့သည်။ သို့သော် ဒုတိယအုပ်စု “လူအုပ်ကြီး” မှာမူ တိကျသောအရေအတွက်မရှိချေ။ ယင်းကို စိတ်ထဲစွဲမှတ်ထား၍ ၁၄၄,၀၀၀ အရေအတွက်ကို စာသားအတိုင်းယူခြင်းသည် ကျိုးကြောင်းဆီလျော်ပါသည်။ ၁၄၄,၀၀၀ သည် ပုံဆောင်ဂဏန်းဖြစ်ပြီး အရေအတွက်အတိအကျမရှိသော အုပ်စုတစ်စုကို ဆိုလိုခြင်းဖြစ်ခဲ့လျှင် ထိုအခန်းငယ်နှစ်ခုကြားရှိ ကွဲပြားခြားနားချက်သည် လေးနက်မည်မဟုတ်ချေ။ ထို့ကြောင့် ၁၄၄,၀၀၀ အရေအတွက်ကို စာသားအတိုင်းယူရမည်ဟု စကားစပ်က ခိုင်လုံစွာဖော်ပြသည်။

အတိတ်နှင့် မျက်မှောက်ခေတ် ကျမ်းပညာရှင်များစွာက ထိုအရေအတွက်သည် စာသားအတိုင်းဖြစ်ရမည်ဟု ကောက်ချက်ချခဲ့ကြသည်။ သာဓကအနေနှင့် ဗြိတိသျှအဘိဓာန်ပြုစုသူ ကျမ်းပညာရှင် ဒေါက်တာ အက်သ်အဲလ်ဘတ် ဒဘလျူ. ဘူလင်ဂါသည် ဗျာ. ၇:၄၊ ၉ နှင့်ပတ်သက်၍ လွန်ခဲ့သောအနှစ် ၁၀၀ ကျော်က ဤသို့ဆို၏– “ယင်းသည် အဖြစ်မှန်၏ ရိုးရှင်းသောဖော်ပြချက်ဖြစ်သည်– ဤအခန်းကြီးတစ်ခုတည်းတွင် မတိကျသောအရေအတွက်နှင့် ခြားနားသော တိကျသောအရေအတွက်ကို ဖော်ပြခြင်းဖြစ်သည်။” (အပေါကလစ် သို့မဟုတ် “သခင်အရှင်၏နေ့” စာမျက်နှာ ၂၈၂) မကြာသေးမီက အမေရိကန်ပြည်ထောင်စုရှိ သခင့်ကျမ်းစာကျောင်းမှ ဓမ္မသစ်ကျမ်းဆိုင်ရာပါမောက္ခ ရောဘတ်၊ အဲယ်လ်. သောမတ်စ် ဂျူနီယာ က “ယင်းကို ပုံဆောင်ဂဏန်းဟုယူမှတ်ဖို့ ခိုင်လုံသောအခြေအမြစ်မရှိ” ဟုရေးသားခဲ့သည်။ သူဤသို့ထပ်ပြောသည်– “[၇:၄ မှ] တိကျသောအရေအတွက်သည် ၇:၉ မှ မတိကျသောအရေအတွက်နှင့် တခြားစီပင်။ ယင်းကို ပုံဆောင်သဘောအရယူလျှင် ထိုကျမ်းစောင်၌ပါသော ကိန်းဂဏန်းတစ်ခုကိုမျှ စာသားအတိုင်း မယူနိုင်ပါ။”—ဗျာ.ကျမ်း– အနက်ဖွင့်ဋီကာကျမ်း၊ အတွဲ ၁၊ စာမျက်နှာ ၄၇၄။

အချို့က ဗျာ.ကျမ်းတွင် ပုံဆောင်စကားများစွာပါရှိသည်ဖြစ်ရာ ၁၄၄,၀၀၀ ကိန်းဂဏန်းအပါအဝင် ထိုကျမ်းစောင်ရှိ ကိန်းဂဏန်းအားလုံး ပုံဆောင်သဘောဖြစ်ရမည်ဟု စောဒကတက်ကြသည်။ (ဗျာ. ၁:၁၊ ၄; ၂:၁၀) သို့သော် ထိုသို့ကောက်ချက်ချခြင်းသည် လုံးဝမမှန်ပါ။ ဗျာ.ကျမ်းတွင် ပုံဆောင်ကိန်းဂဏန်းများစွာ ပါရှိသည်မှန်သော်လည်း ပကတိကိန်းဂဏန်းများလည်း ပါရှိပါသည်။ ဥပမာ၊ “သိုးသငယ်၏တမန်တော် တစ်ဆယ့်နှစ်ပါး၏နာမတို့” အကြောင်း ယောဟန်ပြောသည်။ (ဗျာ. ၂၁:၁၄) ဤအခန်းငယ်၌ပါသော ကိန်းဂဏန်း ၁၂ သည် ပုံဆောင်သဘောအရမဟုတ်ဘဲ စာသားအတိုင်းဖြစ်ကြောင်း ထင်ရှားသည်။ ထို့အပြင် ခရစ်တော်၏ “အနှစ်တစ်ထောင်” အုပ်ချုပ်မှုအကြောင်း တမန်တော်ယောဟန် ရေးသားသေးသည်။ ကျမ်းစာကို အသေအချာလေ့လာသုံးသပ်ကြည့်သည်နှင့်အမျှ ထိုအရေအတွက်ကိုလည်း စာသားအတိုင်းယူရမည်ဖြစ်ကြောင်း တွေ့ရသည်။a (ဗျာ. ၂၀:၃၊ ၅-၇) ထို့ကြောင့် ဗျာ.ကျမ်းပါ ကိန်းဂဏန်းတစ်ခုကို စာသားအတိုင်းယူမည်လော၊ ပုံဆောင်သဘောဖြင့် ယူမည်လောဆိုသည်မှာ ယင်း၏နောက်ခံနှင့် ရှေ့နောက်စကားအပေါ် မူတည်ပါသည်။

“လူအုပ်ကြီး” နှင့်နှိုင်းယှဉ်ကြည့်လျှင် ၁၄၄,၀၀၀ ကိန်းဂဏန်းသည် စာသားအတိုင်းဖြစ်ပြီး အရေအတွက်ကန့်သတ်ထားသည့် အုပ်စုငယ်ကို ဆိုလိုသည်ဟုကောက်ချက်ချခြင်းသည် အခြားကျမ်းချက်များနှင့်လည်း ကိုက်ညီပါသည်။ ဥပမာ၊ တမန်တော်ယောဟန်ရရှိခဲ့သော နောက်အဆင်းအာရုံတစ်ခုတွင် ၁၄၄,၀၀၀ ကို “အဦးသီးသောအသီးဖြစ်စေခြင်းငှာ လူတို့အထဲကဝယ်ယူတော်မူသောသူ” အဖြစ် ဖော်ပြထားသည်။ (ဗျာ. ၁၄:၁၊ ၄၊ သမ္မာ) “အဦးသီးသောအသီး” ဟူသော အသုံးအနှုန်းသည် အနည်းငယ်သော လက်ရွေးစင်ကိုယ်စားလှယ်အဖွဲ့ကို ဆိုလိုသည်။ ထို့အပြင် ယေရှုမြေကြီးပေါ်ရှိစဉ်က ကောင်းကင်နိုင်ငံတော်တွင် မိမိနှင့်အတူအုပ်ချုပ်ကြမည့်သူများအား ကိုယ်တော်က “သိုးစုငယ်” ဟုခေါ်ခဲ့သည်။ (လုကာ ၁၂:၃၂; ၂၂:၂၉) မှန်ပါသည်၊ လာလတ္တံ့သော မြေကြီးပရဒိသုတွင် နေထိုင်ကြမည့်သူများနှင့်နှိုင်းယှဉ်လျှင် ကောင်းကင်တွင် အုပ်ချုပ်မည့်သူများအရေအတွက်သည် နည်း၏။

သို့ဖြစ်၍ ဗျာ. ၇:၄ ၏စကားစပ်နှင့် သမ္မာကျမ်းစာတွင် အခြားနေရာများပါ သက်ဆိုင်ရာဖော်ပြချက်များက ၁၄၄,၀၀၀ ကို စာသားအတိုင်းယူဖို့ ခိုင်လုံစေပါသည်။ ယင်းက မြေကြီးပရဒိသုကို ခရစ်တော်နှင့်အတူ ကောင်းကင်မှ အုပ်ချုပ်ကြမည့်သူများအား ရည်ညွှန်းသည်၊ ထိုမြေကြီးပရဒိသုတွင် အရေအတွက်အတိအကျမသိနိုင်အောင် များပြားသော၊ ယေဟောဝါအား ပျော်ရွှင်စွာဝတ်ပြုကြသူများ နေထိုင်ကြမည်ဖြစ်သည်။—ဆာလံ ၃၇:၂၉။

[အောက်ခြေမှတ်ချက်]

[စာမျက်နှာ ၃၁ ပါ အကျဉ်းဖော်ပြချက်]

ကောင်းကင်အမွေခံများ၏ အရေအတွက်ကို ၁၄၄,၀၀၀ ဟုကန့်သတ်ထား

[စာမျက်နှာ ၃၁ ပါ ရုပ်ပုံ]

“လူအုပ်ကြီး” ကို မရေမတွက်နိုင်

[Picture Credit Line on page 31]

Stars: Courtesy of Anglo-Australian Observatory, photograph by David Malin