ထုတ်ဝေခဲ့သောစာပေအသစ်များကစင်ကြယ်သောဘာသာစကားကို အချိန်မရွေးပြောဆိုရန် အကူအညီပေး

^၁ “စင်ကြယ်သောဘာသာစကား” ခရိုင်စည်းဝေးကိုတက်ရောက်ခဲ့ပြီဖြစ်၍ ကျွန်ုပ်တို့အားယေဟောဝါပေးသနားတော်မူသော စင်ကြယ်သောဘာသာစကားကို သွက်လက်မှန်ကန်စွာ ဝီရိယစိုက်ထုတ်ပြောဆိုရန်လိုအပ်ကြောင်း ပိုမိုသဘောပေါက်လာပေပြီ။ (ဇေ၊ ၃:၉) အစီအစဉ်တွင်တင်ဆက်ခဲ့သောအကြောင်းအရာအလုံးစုံကို ပြန်သုံးသပ်ကြည့်ပြီး နေ့စဉ်ဘဝအသက်တာ၌ လက်တွေ့ကျင့်သုံးရန် ကြိုးစားကြရာတွင် စစ်မှန်သောဝတ်ပြုရေး၌ ယေဟောဝါနှင့်ရင်းနှီးလာရန်အကူအညီရရှိခဲ့ကြသည်။

^၂ သို့ရာတွင် “စင်ကြယ်သောဘာသာစကား” ခရိုင်စည်းဝေးပွဲတွင်ရရှိသော စာအုပ်အသစ်များမှ ကြွယ်ဝသောပညာရပ်ကို တိုး၍တိုး၍သိနားလည်လာသည့်အခါ စင်ကြယ်သောဘာသာစကားကို ပိုပြောတတ်လာပေမည်။ စာအုပ်အသစ်များကို ဖတ်ရှုပြီးပြီလော။

^၃ “ကြည့်ရှုလော့၊ ငါသည် ခပ်သိမ်းသောအရာတို့ကို အသစ်ဖန်ဆင်းသည်” ရုပ်ပြစာစောင်သည် စိတ်ဝင်စားသူများနှင့်လည်းကောင်း၊ မိမိသားသမီးများနှင့်လည်းကောင်း အိမ်တွင်းကျမ်းစာသင်အံမှုပြုရန် အလွန်ကောင်းသောစာအုပ်ဖြစ်သည်။ ကတိတော်တည်ရာ ကမ္ဘာသစ်ကိုယုံကြည်ရန် များစွာတည်ဆောက်ပေးမည်။ တစ်အိမ်မှတစ်အိမ်သက်သေခံချိန်၊ ပြန်လည်ပတ်မှုများပြုလုပ်ချိန်များတွင် ဤရုပ်ပြစာစောင်ကိုဆောင်ယူသွားလျှင်ကောင်းပေသည်။ ယင်းကိုပြပြီး ၄င်းအကူအညီဖြင့် သမ္မာကျမ်းစာကို မည်သို့လေ့လာနိုင်ကြောင်း ပြပေးနိုင်ပါမည်။

^၄ ပရဒိသုဖြစ်ပေါ်စေမည့် ဘုရားသခင့်အစိုးရ ရုပ်ပြစာစောင်သည် ကျွန်ုပ်တို့နှင့်စိတ်ဝင်စားသူများ၏ ကလေးငယ်များနှင့်ကျမ်းစာလေ့လာရန် အသင့်တော်ဆုံးစာအုပ်ဖြစ်သည်။ သို့သော် ကလေးများအတွက်သာဖြစ်သည်မက လူကြီးများပင် ဘုရားသခင်နိုင်ငံတော်အကြောင်းနှင့်ပရဒိသုအကြောင်းကို ယင်းမှများစွာသိရှိနိုင်သည်။ ထိုကြောင့် အချိန်မရွေး၊ လူတိုင်းအားပြရန်ကြိုးစားပါ။

^၅ AIDS အကြောင်း နိုးလော့ ရုပ်ပြစာစောင်သည် ဤနောက်ဆုံးကာလ၊ ထိတ်လန့်ဖွယ်ရောဂါ ကမ္ဘာချီပြန့်နှံ့နေချိန်တွင် အသင့်တော်ဆုံးဖြစ်သည်။ ဘုရားသခင်ကိုမယုံ၊ ကမ္ဘာသစ်နှင့်ဆိုင်သော ကိုယ်တော်၏ကတိတော်များကို စိတ်မဝင်စားသူများပင် AIDSအကြောင်းသိလိုကြမည်။

^၆ လှပသည့်ရောင်စုံ ဝေစာသုံးခုနှင့်အတူ လွန်ခဲ့သောတစ်နှစ်က ထုတ်ဝေခဲ့သည့်ဝေစာကိုအသုံးပြု၍ ဘုရားသခင်၏နိုင်ငံတော်အကြောင်း ဤဗျာများသောလောကအားတင်ပြရန် အသင့်တော်ဆုံးဖြစ်သည်။ မည်သည့်အရပ်သို့သွားစေကာမူ သင်နှင့်အတူပါသွားပါစေ။ စကားစမြည်စတင်ပေးရန် အလွန်ကောင်းသောအထောက်အကူဝေစာများဖြစ်သည်။

^၇ “စင်ကြယ်သောဘာသာစကား” ခရိုင်စည်းဝေးတွင် ရရှိခဲ့သော အခန့်သင့်ဝိညာဉ်အစာမျိုးစုံအတွက် ယေဟောဝါဘုရားသခင်ကို ကျွန်ုပ်တို့အားလုံးကျေးဇူးတင်သင့်ပေသည်။ ကျွန်ုပ်တို့၏တစ်ဆူတည်းသောခမည်းတော်ဘုရားသခင်၊ ယေဟောဝါ၏ ကိုးကွယ်ဝတ်ပြုသူများဖြစ်လာရန် သူတစ်ပါးကိုကူညီပေးရာတွင် ဤပြင်ဆင်ချက်များကို ဝီရိယရှိရှိအသုံးပြုခြင်းဖြင့် စိတ်နှလုံးအတွင်းမှ ကျေးဇူးတင်ကြောင်း တင်ပြကြစို့လေ။