မိဘတို့—သင်တို့၏သားသမီးများအတွက်ပုံသက်သေကောင်းကို ချမှတ်ပေးကြလော့
၁ ဘုရားသခင့်နှုတ်ကပါဌ်တော်က ကျွန်ုပ်တို့အား “ဖြောင့်မတ်သောသူ၏အဘ [နှင့်အမိ] သည် အလွန်ဝမ်းမြောက်လိမ့်မည်” ဟုပြောပြသည်။ (သု. ၂၃:၂၄၊ ၂၅) မိမိတို့၏သားသမီးများအတွက် ပုံသက်သေကောင်းချမှတ်ပေးခဲ့သောမိဘများအတွက် ကောင်းချီးတစ်ရပ်ပါတကား! ဌာနခွဲကော်မတီဝင်တစ်ဦးက သူ့မိဘများအကြောင်း ဤသို့ပြောသည်– “သူတို့ရဲ့ဘဝတစ်ခုလုံးကို သမ္မာတရားပေါ်မှာဗဟိုပြုခဲ့တယ်၊ ကျွန်တော့်ရဲ့ဘဝတစ်ခုလုံးကိုလည်း အဲဒီလိုပဲဖြစ်ချင်ခဲ့တယ်။” သားသမီးတို့သည် မိဘများ၌ အဘယ်အရာကိုတွေ့မြင်သင့်သနည်း။
၂ အမူအကျင့်ကောင်းများနှင့် နက်ရှိုင်းသောလေးစားမှု– မိမိတို့၏သားသမီးများ၌ အကျိုးပြုသောစရိုက်များကို ရိုက်သွင်းပေးခြင်းသည် မိဘတို့၏တာဝန်ဖြစ်၏။ အမူအကျင့်ကောင်းများကို နှုတ်နှင့်သွန်သင်ဆုံးမရုံမျှဖြင့်မဟုတ်ဘဲ သတိပြုခြင်းနှင့် တုပခြင်းဖြင့် သင်ယူသိရှိကြသည်။ ထို့ကြောင့် သင်သည် မည်သည့်အမူအကျင့်များကို ပြသနည်း။ သင်သည် “ခွင့်ပြုပါ၊” “ကျေးဇူးပြု၍၊” “ကျေးဇူးတင်တယ်” ဟူ၍ပြောဆိုသည်ကို သင့်သားသမီးများကြားရသလော။ မိသားစုတွင် တစ်ဦးကိုတစ်ဦး နက်ရှိုင်းသောလေးစားမှုဖြင့် ဆက်ဆံသလော။ အခြားသူများစကားပြောသည့်အခါ သင် အာရုံစိုက်သလော။ သင့်သားသမီးများက သင့်ကိုစကားပြောသည့်အခါ သင်နားထောင်သလော။ နိုင်ငံတော်ခန်းမနှင့်အိမ်တွင်းနှစ်ခုစလုံး၌ ဤစရိုက်ကောင်းများကို ပြသလော။
၃ သန်စွမ်းသောဝိညာဉ်ရေးနှင့် ဇွဲရှိသောလုပ်ဆောင်မှု– အချိန်ပြည့်လုပ်ငန်းတွင် အနှစ် ၅၀ ကျော်အသုံးပြုခဲ့ပြီးသော ညီအစ်ကိုတစ်ဦးက ဤသို့ပြန်အမှတ်ရသည်– “ကျွန်တော့်အမေနဲ့အဖေဟာ အစည်းအဝေးတွေကိုတန်ဖိုးထားရာမှာ၊ ဓမ္မအမှုအတွက် ဇွဲရှိရာမှာ အလွန်ကောင်းတဲ့ပုံသက်သေပါပဲ။” သင့်အိမ်သားများ၏ဝိညာဉ်ရေးမြဲမြံမှုကို သင်အလေးထားကြောင်း သင့်သားသမီးများအား သင်မည်သို့ပြသနည်း။ သင်သည် နေ့စဉ်ကျမ်းချက်ကို အတူတကွသုံးသပ်သလော။ ပုံမှန်မိသားစုသင်အံမှုတစ်ခုရှိသလော။ သင်သည် သမ္မာကျမ်းစာနှင့် အသင်းမစာပေများအား ဖတ်ရှုသည်ကို သင့်သားသမီးများမြင်သလော။ မိသားစုကိုယ်စား သင်ဆုတောင်းသည့်အခါ မည်သည့်အရာကို သူတို့ကြားရသနည်း။ သင်သည် သမ္မာတရား၊ အသင်းတော်နှင့်ပတ်သက်သည့် အပြုသဘောပါသောအကြောင်းအရာများကိုဆွေးနွေးကာ သင့်သားသမီးများနှင့် ဝိညာဉ်ရေးတည်ဆောက်မှုဖြစ်စေသော စကားစမြည်ပြောဆိုမှုတွင် ပါဝင်သလော။ သင်သည် မိသားစုလိုက် အသင်းတော်အစည်းအဝေးအားလုံးကိုတက်ရန်နှင့် လယ်ကွင်းဓမ္မအမှုတွင်ပါဝင်ရန် ထက်သန်ပါသလော။
၄ မိဘတို့၊ သင်တို့၏သားသမီးများအတွက် သင်တို့ချမှတ်ပေးနေသည့်ပုံသက်သေကို ပြန်သုံးသပ်ပါ။ ၎င်းကို အလွန်ကောင်းစေမည်ဆိုလျှင် သူတို့၏အသက်တာတစ်လျှောက်လုံး ၎င်းကိုတန်ဖိုးထားပါလိမ့်မည်။ ယခု အသက် ၇၀ ကျော်ရှိပြီဖြစ်သော နယ်လှည့်ကြီးကြပ်မှူးတစ်ဦး၏ဇနီးက ဤသို့ဆို၏– “ကျွန်မချစ်ရတဲ့ခရစ်ယာန်မိဘများရဲ့ ကောင်းတဲ့ပုံသက်သေကနေ အကျိုးခံစားနေရဆဲဖြစ်တယ်။ လာမယ့်ကျွန်မရဲ့အသက်တာတစ်လျှောက်လုံးမှာ အဲဒီအမွေဥစ္စာကို ကောင်းစွာအသုံးပြုသွားခြင်းအားဖြင့် အဲဒါကို အပြည့်အဝလေးမြတ်ကြောင်း သက်သေထူမယ်လို့ စိတ်အားထက်သန်စွာ ကျွန်မဆုတောင်းပါတယ်။”