ယေရှုမွေးဖွားခြင်း ဖြစ်ရပ်မှန်

သင့်နိုင်ငံ၏သမိုင်းတွင် လူသိများသောအဖြစ်အပျက်တစ်ခုကို ပြန်ပြောင်းစဉ်းစားကြည့်ပါ။ ယင်းကိုကောင်းစွာမှတ်တမ်းတင်ထားပြီး သမိုင်းပညာရှင်တစ်ဦးမက ရေးသားခဲ့လျက်နှင့် ဤအဖြစ်အပျက်သည် တစ်ခါမျှဖြစ်ပျက်ခဲ့ခြင်းမရှိ၊ ဒဏ္ဍာရီသာဖြစ်သည်ဟု တစ်စုံတစ်ဦးက သင့်ကိုပြောပြသည်ဆိုပါစို့။ သို့မဟုတ် ကိုယ်နှင့် ပို၍ပတ်သက်ပြီးပြောရလျှင် သင့်အဖိုးမွေးဖွားပုံနှင့် သူ၏ငယ်စဉ်ဘဝအကြောင်း သင့်မိသားစု၏ပြောပြချက်များစွာတို့သည် မဟုတ်မမှန်ကြောင်း တစ်ဦးတစ်ယောက်ကပြောသည်ဆိုပါစို့။ အဆိုပါကိစ္စနှစ်ခုစလုံးနှင့်ပတ်သက်ပြီး ပြောဆိုခဲ့သောစကားက သင့်ကိုဒေါသထွက်စေပေမည်။ ထိုအပြောအဆိုများကို အပေါ်ယံသဘောဖြင့်သာ သင်လက်ခံမည်မဟုတ်သည်မှာသေချာသည်!

သို့တိုင် အပြစ်ရှာသူများသည် မဿဲနှင့် လုကာတို့ရေးသားခဲ့သော ခရစ်ဝင်ကျမ်းပါ ယေရှုမွေးဖွားခြင်းဆိုင်ရာမှတ်တမ်းများကို ယနေ့ငြင်းပယ်လေ့ရှိသည်။ သူတို့က ၎င်းမှတ်တမ်းတို့သည် လုံးဝဆန့်ကျင်ကွဲလွဲပြီး ဆက်စပ်၍မရနိုင်သည့်အပြင် မှတ်တမ်းနှစ်ခုစလုံးတွင် ဗြောင်ကျသည့်လိမ်ညာမှုများနှင့် သမိုင်းဆိုင်ရာလွဲချော်မှားယွင်းမှုများ ပါဝင်သည်ဟုဆိုကြသည်။ ယင်းသို့အမှန်ဖြစ်နိုင်ပါမည်လော။ ထိုစွပ်စွဲချက်များကို လက်ခံမည့်အစား ခရစ်ဝင်ကျမ်းတွင်ပါသောမှတ်တမ်းများကို ကိုယ်တိုင်သုံးသပ်ကြည့်ကြစို့။ ယင်းသို့ပြုကြရာတွင် ထိုမှတ်တမ်းများသည် ယနေ့ ကျွန်ုပ်တို့ကိုအဘယ်အရာများသွန်သင်ပေးနိုင်သည်ကို ကြည့်ကြစို့။

ရေးသားရသည့်ရည်ရွယ်ချက်

ဦးဆုံးအနေနှင့် ယင်းကဤကျမ်းစာမှတ်တမ်းများရေးရသည့် ရည်ရွယ်ချက်ကို သတိရရန်အထောက်အကူပြုသည်။ ၎င်းတို့သည် အတ္ထုပ္ပတ္တိစာပေများမဟုတ်ဘဲ ခရစ်ဝင်ကျမ်းများဖြစ်သည်။ ဤသို့ခွဲခြားသိထားခြင်းသည် အရေးကြီးသည်။ အတ္ထုပ္ပတ္တိစာပေတစ်ခုတွင် စာရေးဆရာသည် မိမိ၏ဇာတ်ကောင် မည်သို့ကျော်ကြားလာကြောင်းကို စာမျက်နှာရာနှင့်ချီ၍ ဖော်ပြပေမည်။ ထို့ကြောင့် အချို့အတ္ထုပ္ပတ္တိစာပေများသည် ယင်းတို့ဇာတ်ကောင်များ၏မိဘ၊ မွေးဖွားခြင်းနှင့် ကလေးဘဝအကြောင်းကို အသေးစိတ်ဖော်ပြရန် စာမျက်နှာပေါင်းများစွာ အသုံးပြုကြသည်။ ခရစ်ဝင်ကျမ်းများမူကား ကွာခြားသည်။ ခရစ်ဝင်ကျမ်းမှတ်တမ်းလေးခုအနက် မဿဲနှင့် လုကာနှစ်ဦးသာ ယေရှုမွေးဖွားခြင်းနှင့် ကလေးဘဝအကြောင်းကိုဖော်ပြသည်။ သို့သော် သူတို့၏ရည်ရွယ်ချက်မှာ ယေရှုသည် ထိုသို့သောသူမည်သို့ဖြစ်ပေါ်လာပုံကို ဖော်ပြရန်မဟုတ်ပါ။ ယေရှုသည် မြေကြီးပေါ်သို့ကြွမလာမီ နာမ်ဝိညာဉ်ပုဂ္ဂိုလ်တစ်ပါးအဖြစ် တည်ရှိခဲ့သည်ကို ကိုယ်တော့်နောက်လိုက်များသိထားကြောင်း သတိရပါ။ (ယောဟန် ၈:၂၃၊ ၅၈) ထို့ကြောင့် ယေရှုသည် အဘယ်လူစားဖြစ်လာကြောင်း ရှင်းပြဖို့အတွက် ကိုယ်တော်၏ကလေးဘဝကို မဿဲနှင့်လုကာတို့က အာရုံမစိုက်ခဲ့ကြပါ။ ထိုသို့ပြုမည့်အစား သူတို့၏ခရစ်ဝင်ကျမ်းများရေးရခြင်း ရည်ရွယ်ချက်နှင့် သင့်တော်သောဖြစ်ရပ်များကို ပြန်ဖော်ပြခဲ့ကြသည်။

ယင်းတို့ကိုရေးသားရသည့် သူတို့၏ရည်ရွယ်ချက်ကား အဘယ်နည်း။ “ခရစ်ဝင်ကျမ်း” ဟူသော စကားလုံး၏အဓိပ္ပာယ်မှာ “ဝမ်းမြောက်ဖွယ်ရာသတင်း” ဖြစ်သည်။ ထိုသူနှစ်ဦးစလုံးသည် သတင်းတစ်မျိုးတည်း—ယေရှုသည် ကတိထားရာမေရှိယ သို့မဟုတ် ခရစ်တော်ဖြစ်ကြောင်း၊ ကိုယ်တော်သည် လူသားတို့၏အပြစ်အတွက် အသေခံခဲ့ကြောင်းနှင့် ကောင်းကင်သို့ရှင်ပြန်ထမြောက်သွားကြောင်း—ကိုဖော်ပြခဲ့ကြသည်။ သို့သော် ထိုစာရေးဆရာနှစ်ဦးစလုံးသည် သိသိသာသာခြားနားသည့်နောက်ခံများရှိကြပြီး ခြားနားသောစာရှုသူများအတွက် ရေးသားခဲ့ကြသည်။ အခွန်ခံမဿဲသည် သူ၏မှတ်တမ်းကို အဓိကအားဖြင့် ဂျူးစာရှုသူများအတွက် စီစဉ်ရေးသားခဲ့သည်။ သမားတော်လုကာသည် အတော်အတန်ရာထူးကြီးသူဖြစ်နိုင်သည့် “အလွန်မြတ်သောသော်ဖိလု” မှတစ်ဆင့် ကျယ်ပြန့်သောလူစုလူဝေးဖြစ်သည့် ဂျူးနှင့်တစ်ပါးအမျိုးသားများအတွက် ရေးသားခဲ့ခြင်းဖြစ်သည်။ (လုကာ ၁:၁-၄) စာရေးဆရာတစ်ဦးစီသည် မိမိ၏စာကိုဖတ်ရှုမည့်သူများ ယုံကြည်လက်ခံနိုင်မည့် အဆီလျော်ဆုံးအဖြစ်အပျက်များကို ရွေးချယ်တင်ပြခဲ့သည်။ ထို့ကြောင့် မဿဲ၏မှတ်တမ်းသည် ယေရှု၌ပြည့်စုံခဲ့သည့် ဟေဗြဲကျမ်းစာမှ ပရောဖက်ပြုချက်များကို အလေးပေးဖော်ပြသည်။ အခြားတစ်ဖက်တွင်မူ လုကာသည် ဂျူးမဟုတ်သောစာရှုသူများ သတိပြုမိမည့် သာ၍ဂန္ထဝင်မြောက်သောသမိုင်းဝင်ချဉ်းကပ်မှုကို အသုံးပြုပြီးရေးသားခဲ့သည်။

ယင်းကြောင့် သူတို့၏မှတ်တမ်းများ ခြားနားခြင်းသည် အံ့ဩစရာမဟုတ်ပါ။ သို့ရာတွင် ဝေဖန်သူများဆိုသကဲ့သို့ ထိုကျမ်းနှစ်ကျမ်းသည် ဆန့်ကျင်ကွဲလွဲမနေပါ။ တစ်ကျမ်းကိုတစ်ကျမ်းဖြည့်စွက်ပေးပြီး ရုပ်လုံးပေါ်အောင် ကောင်းစွာဆက်စပ်ပေးသည်။

ဗက်လင်မြို့တွင် ယေရှု၏မွေးဖွားခြင်း

မဿဲနှင့်လုကာနှစ်ဦးစလုံးတို့သည် ယေရှုမွေးဖွားခြင်းနှင့်ပတ်သက်သော ထူးဆန်းသည့်အံ့ဖွယ်တစ်ခု—အပျိုကညာတစ်ဦးမှ ကိုယ်တော်မွေးဖွားခံရခြင်း—ကို မှတ်တမ်းတင်ခဲ့ကြသည်။ ဤအံ့ဖွယ်အမှုသည် ရာစုနှစ်နှင့်ချီ၍ ဟေရှာယကြိုဟောထားသည့် ပရောဖက်ပြုချက်ကို ပြည့်စုံစေကြောင်းမဿဲကဖော်ပြသည်။ (ဟေရှာယ ၇:၁၄; မဿဲ ၁:၂၂၊ ၂၃) လုကာက ကဲသာချမှတ်ခဲ့သော မှတ်ပုံတင်ရန် ဥပဒေတစ်ခုကြောင့် ယောသပ်နှင့်မာရိတို့သည် ဗက်လင်မြို့သို့ မဖြစ်မနေသွားခဲ့ရသည့်အတွက် ယေရှုသည် ထိုမြို့တွင်မွေးဖွားခဲ့သည်ဟု လုကာရှင်းပြသည်။ (စာမျက်နှာ ၇ မှလေးထောင့်ကွက်ရှု။) ဗက်လင်မြို့တွင် ယေရှုမွေးဖွားခဲ့ခြင်းသည် အဓိပ္ပာယ်ရှိသည်။ ပရောဖက်မိက္ခာက မေရှိယသည် ယေရုရှလင်မြို့အနီးရှိ ဤမထင်ရှားသောမြို့မှဖြစ်လိမ့်မည်ဟု ရာစုနှစ်များစွာကတည်းက ကြိုပြောခဲ့သည်။—မိက္ခာ ၅:၂။

ယေရှုမွေးဖွားသည့်ညသည် သူငယ်တော်ဖွားမြင်ရာမြင်ကွင်းများအတွက် အခြေခံအဖြစ် ကျော်ကြားလာခဲ့သည်။ သို့ရာတွင် ဖြစ်ရပ်အမှန်သည် မကြာခဏသရုပ်ဖော်ပြလေ့ရှိသောပုံနှင့် အပြတ်အသတ်ကွာခြားပါသည်။ ယောသပ်နှင့်မာရိကို ဗက်လင်မြို့သို့ရောက်စေခဲ့သော သန်းခေါင်စာရင်းကောက်ခြင်းအကြောင်း ကျွန်ုပ်တို့အားပြောပြသည့် သမိုင်းဆရာလုကာက ထိုအရေးကြီးသောညတွင် မိမိတို့၏သိုးများနှင့်အတူ အိမ်ပြင်တွင်ရှိနေခဲ့ကြသော သိုးထိန်းတို့အကြောင်းကိုလည်း ပြောပြသည်။ ဤအခြေအနေနှစ်ရပ်ကြောင့် ကျမ်းစာသုတေသီများစွာတို့အား ယေရှုသည် ဒီဇင်ဘာလအတွင်း မွေးဖွားခြင်းမဖြစ်နိုင်ကြောင်း ကောက်ချက်ချစေခဲ့ကြသည်။ ပုန်ကန်လိုနေသည့်ဂျူးများကို အေးစိမ့်သည့်မိုးရာသီအတွင်း မိမိတို့မွေးရပ်ဌာနီသို့ခရီးထွက်ဖို့ ကဲသာအမိန့်ထုတ်ခဲ့မည်မဟုတ်ကြောင်း၊ ထိုသို့ပြုခဲ့ပါက ပုန်ကန်နေသူတို့ကို ပို၍ဒေါသထွက်စေနိုင်မည်ဖြစ်ကြောင်း သူတို့ထောက်ပြခဲ့ကြသည်။ ထိုနည်းတူ ရာသီဥတုဆိုးရွားပြင်းထန်ချိန်တွင် သိုးထိန်းများသည် မိမိတို့သိုးအုပ်များနှင့် အိမ်ပြင်တွင်ရှိနေခြင်းသည် ဖြစ်နိုင်မည်မဟုတ်ပေဟု ပညာရှင်များကသတိပြုမိကြသည်။—လုကာ ၂:၈-၁၄။

ယေဟောဝါသည် မိမိ၏သားတော်မွေးဖွားခြင်းကို ထိုခေတ်က ပညာတတ်၍ ဩဇာအရှိန်အဝါရှိသော ဘာသာရေးခေါင်းဆောင်များကိုမဟုတ်ဘဲ အိမ်ပြင်ရှိအလုပ်ကြမ်းသမားများကို အသိပေးလိုခဲ့ကြောင်း သတိပြုပါ။ အလုပ်ချိန်ပြောင်းလဲနေသည့်အတွက် နှုတ်တိုက်ပညတ်များ၏ အသေးစိတ်အချက်အလက်များကို မလိုက်လျှောက်နိုင်ကြသော သိုးထိန်းများနှင့် ကျမ်းပြုဆရာ၊ ဖာရိရှဲတို့သည်ဆက်သွယ်မှုအနည်းအကျဉ်းသာရှိကြပေမည်။ သို့သော် ဘုရားသခင်သည် စိတ်နှိမ့်ချ၍ သစ္စာရှိသောဤသူများကို ကြီးစွာဂုဏ်တင်ခဲ့သည်၊ နှစ်ထောင်ပေါင်းများစွာကတည်းက ဘုရားသခင့်လူမျိုးတော်စောင့်မျှော်လာခဲ့သည့် မေရှိယသည် ဗက်လင်မြို့တွင်မွေးဖွားပြီဟူ၍ ကောင်းကင်တမန်ကိုယ်စားလှယ်အဖွဲ့တစ်ဖွဲ့အားဖြင့် သူတို့ကိုသတင်းပေးစေခဲ့သည်။ မာရိနှင့်ယောသပ်ထံလည်ပတ်ခဲ့ပြီး နွားစားခွက်ထဲမှအပြစ်ကင်းသောကလေးကို ရှုစားခဲ့ကြသူများမှာ သူငယ်တော်ဖွားမြင်ရာမြင်ကွင်းတွင် မကြာခဏပုံဖော်ပြလေ့ရှိသော “မင်းကြီးသုံးပါး” မဟုတ်ဘဲ ဤသူတို့ဖြစ်ကြသည်။—လုကာ ၂:၁၅-၂၀။

အမှန်တရားကို နှိမ့်ချစွာရှာဖွေသူများအား ယေဟောဝါမျက်နှာသာပေး

ဘုရားသခင်သည် မိမိအားချစ်မြတ်နိုးပြီး ကိုယ်တော့်ရည်ရွယ်ချက်များပြည့်စုံလာသည်ကို အလွန်တွေ့မြင်လိုသော စိတ်နှိမ့်ချသူများကို နှစ်ခြိုက်တော်မူသည်။ ယေရှုမွေးဖွားချိန်တွင် ဖြစ်ပျက်ခဲ့သမျှ၌ ယင်းကို ထပ်ခါတလဲတွေ့ရှိရသည်။ ကလေးမွေးပြီးတစ်လခန့်အကြာတွင် ယောသပ်နှင့်မာရိတို့သည် မောရှေပညတ်အရ “ခိုနှစ်ကောင်ဖြစ်စေ၊ ချိုးကလေးနှစ်ကောင်ဖြစ်စေ” ပူဇော်ရန်အတွက် ဗိမာန်တော်သို့ခေါ်လာကြသည်။ (လုကာ ၂:၂၂-၂၄) အမှန်ဆိုလျှင် ပညတ်တရားက သိုးသငယ်တစ်ကောင်ကို တောင်းဆိုထားသော်လည်း ဆင်းရဲချို့တဲ့မည်ဆိုလျှင် ယင်းထက်တန်ဖိုးနည်းသော ဤပူဇော်သကာကိုဆက်သခွင့်ပြုထားသည်။ (ဝတ်ပြုရာ ၁၂:၁-၈) စဉ်းစားကြည့်ပါလေ။ အကြွင်းမဲ့ပိုင်သအုပ်စိုးရှင် ယေဟောဝါဘုရားသခင်သည် မိမိချစ်မြတ်နိုးလှသော တစ်ပါးတည်းသောသားတော်ကို ကြီးပြင်းစေရန် ချမ်းသာသည့်မိသားစုကိုမဟုတ်ဘဲ ဆင်းရဲချို့တဲ့သောမိသားစုကို ရွေးချယ်ခဲ့သည်။ သင်သည် မိဘတစ်ဦးဖြစ်မည်ဆိုလျှင် သင့်သားသမီးကိုပေးနိုင်သော အကောင်းဆုံးလက်ဆောင်မှာ ရုပ်ပစ္စည်း သို့မဟုတ် ဂုဏ်ရှိသောပညာရေးထက်သာသည့် ဝိညာဉ်ရေးရာကိုဦးစားထားသည့် မိသားစုအသိုင်းအဝိုင်းဖြစ်ကြောင်း ထိုအချက်က အထင်အရှားသတိပေးသင့်သည်။

ဗိမာန်တော်တွင် သစ္စာရှိ၍ စိတ်နှိမ့်ချသော အခြားဝတ်ပြုသူနှစ်ဦးသည် ယေဟောဝါ၏မျက်နှာသာတော်ကိုရရှိခဲ့သည်။ တစ်ဦးမှာ “ဗိမာန်တော်နှင့်မခွာဘဲနေ” သောအသက် ၈၄ နှစ်အရွယ် မုဆိုးမအန္နဖြစ်သည်။ (လုကာ ၂:၃၆၊ ၃၇) အခြားတစ်ဦးမှာ ရှုမောင်အမည်ရှိ သစ္စာရှိအသက်ကြီးသူတစ်ဦးဖြစ်သည်။ မိမိတို့မသေမီ ကတိထားရာမေရှိယကိုတွေ့မြင်ရသည့် ဘုရားပေးအခွင့်ထူးကြောင့် နှစ်ဦးစလုံးပီတိဖြစ်ခဲ့ကြရသည်။ သူငယ်တော်နှင့်ပတ်သက်သော ပရောဖက်ပြုချက်တစ်ခုကို ရှုမောင်မြွက်ဆိုခဲ့သည်။ ထိုပရောဖက်ပြုချက်သည် မျှော်လင့်ချက်အပြည့်ပေးသော်လည်း ဝမ်းနည်းပူဆွေးမှုအနည်းငယ်နှောသည်။ ဤငယ်ရွယ်သောမိခင်ဖြစ်သူမာရိသည် တစ်နေ့သောအခါ မိမိချစ်မြတ်နိုးသောသားအတွက်နှင့် နှလုံးပူဆွေးရလိမ့်မည်ဟု ကြိုပြောခဲ့သည်။—လုကာ ၂:၂၅-၃၅။

အန္တရာယ်ကြုံနေရသည့်သူငယ်တော်

ဤအပြစ်မဲ့သောသူငယ်တော်သည် မုန်းတီးခံရလိမ့်မည်ဟူသော ရှုမောင်၏ပရောဖက်ပြုချက်သည် မနှစ်မြို့ဖွယ်သတိပေးချက်တစ်ခုဖြစ်သည်။ ကိုယ်တော်သည် နို့စို့သူငယ်အရွယ်ဖြစ်စဉ်၌ပင် စတင်မုန်းတီးခံခဲ့ရသည်။ ယင်းသို့အဘယ်နည်းဖြင့် ဖြစ်ပျက်ခဲ့ကြောင်းကို မဿဲ၏မှတ်တမ်းက အသေးစိတ်ဖော်ပြသည်။ လများစွာကုန်လွန်ပြီးဖြစ်ကာ ယောသပ်၊ မာရိနှင့် ယေရှုတို့သည် ဗက်လင်မြို့ရှိအိမ်တစ်အိမ်တွင် ယခုနေထိုင်လျက်ရှိသည်။ မမျှော်လင့်ဘဲ နိုင်ငံခြားသားအချို့ သူတို့ထံအလည်အပတ်ရောက်လာကြသည်။ သူငယ်တော်ဖွားမြင်ရာမြင်ကွင်းမြောက်မြားစွာက မည်သို့ပင်သရုပ်ဖော်ပြစေကာမူ မဿဲက နိုင်ငံခြားသားမည်မျှရောက်လာကြောင်း မဖော်ပြသကဲ့သို့ သူတို့ကို “မင်းကြီးသုံးပါး” ဟူ၍လုံးဝမဆိုထားဘဲ “ပညာရှိများ” ဟုလည်းမခေါ်ထားပါ။ “နက္ခတ်ဗေဒင်ဆရာများ” ဟုအဓိပ္ပာယ်ရှိသော ဂရိစကားလုံး မာဂီ ကိုသူအသုံးပြုထားသည်။ ယင်းအချက်တစ်ချက်တည်းက ဤတွင် ဆိုးညစ်မှုတစ်မျိုးတစ်မည်ဖြစ်ပျက်နေသည်ဟု စာရှုသူအား သဲလွန်စပေးသင့်သည်။ အကြောင်းမှာ နက္ခတ်ဗေဒင်ပညာကို ဘုရားသခင့်နှုတ်မြွက်စကားတော်က ရှုတ်ချထားပြီး ၎င်းကို သစ္စာရှိဂျူးများ ဂရုတစိုက်ရှောင်ရှားနေကြသည့်အတွက်ဖြစ်သည်။—တရားဟောရာ ၁၈:၁၀-၁၂; ဟေရှာယ ၄၇:၁၃၊ ၁၄။

ဤနက္ခတ်ဗေဒင်ဆရာများသည် အရှေ့ဘက်မှကြယ်တစ်လုံးနောက် လိုက်ခဲ့ကြပြီး “ဖွားမြင်သောယုဒရှင်ဘုရင်” အတွက် လက်ဆောင်များ ယူဆောင်လာကြသည်။ (မဿဲ ၂:၂) သို့သော် ယင်းက ဗက်လင်မြို့သို့ခေါ်ဆောင်မသွားဘဲ ယေရုရှလင်မြို့နှင့် ဟေရုဒ်မင်းကြီးထံသို့ သူတို့ကိုပို့ဆောင်ခဲ့သည်။ ထိုသူကဲ့သို့ လူငယ်ယေရှုကိုဘေးပြုနိုင်စွမ်းနှင့် ဘေးပြုလိုသည့်ဆန္ဒပြင်းပြသူ ကမ္ဘာပေါ်မရှိတော့ပေ။ ရည်မှန်းချက်ကြီးပြီး လူ့အသက်သတ်သည့် ဤသူသည် အန္တရာယ်ကောင်များအဖြစ်သူယူမှတ်သော မိမိ၏မိသားစုအရင်းခေါက်ခေါက်များကိုပင် သတ်ဖြတ်ခဲ့သည်။a “ယုဒရှင်ဘုရင်” လောင်းဖွားမြင်ကြောင်း ကြားသည့်အခါ စိတ်အနှောင့်အယှက်ဖြစ်ကာ ဗက်လင်မြို့တွင် ထိုသူကိုရှာဖွေရန် နက္ခတ်ဗေဒင်ဆရာတို့ကို သူစေလွှတ်ခဲ့သည်။ သူတို့ထွက်ခွာသွားကြစဉ် အံ့ဩစရာတစ်ခုဖြစ်ပျက်လာသည်။ ယေရုရှလင်မြို့သို့ သူတို့ကိုလမ်းပြခဲ့သော “ကြယ်” သည် ရွေ့လျားနေပုံပေါက်သည်!—မဿဲ ၂:၁-၉။

ယင်းသည် ကောင်းကင်တွင်ပေါ်ထွန်းသော အလင်းရောင်တစ်ခုလော၊ အဆင်းအာရုံတစ်ခုမျှသာလော ဟူသည်ကိုကျွန်ုပ်တို့မသိကြရပါ။ သို့သော် ဤ “ကြယ်” သည် ဘုရားသခင်ထံမှမဟုတ်သည်ကို ကျွန်ုပ်တို့သိကြသည်။ ထိုကြယ်သည် ကြောက်စရာကောင်းလောက်အောင်တိကျစွာ ဤအယူလွဲမှားသူတို့ကို ဆင်းရဲချို့တဲ့သောလက်သမားနှင့် သူ့ဇနီးတို့၏စောင့်ရှောက်မှုကိုသာရရှိထားသော ခုခံကာကွယ်နိုင်စွမ်းမရှိ၊ ဘာမျှမတတ်နိုင်သည့် သူငယ်ယေရှုထံသို့ တိုက်ရိုက်ပို့ပေးခဲ့သည်။ ဟေရုဒ်၏လှည့်ဖြားမှုကို မထင်မမှတ်ဘဲခံနေရသော နက္ခတ်ဗေဒင်ဆရာများသည် ရန်ငြိုးသိုသည့်ဘုရင်ထံ ပြန်၍သတင်းပို့ခဲ့လိမ့်မည်ဖြစ်ရာ သူငယ်ဖျက်ဆီးခံရဖို့အကြောင်းရှိသည်။ သို့သော် ဘုရားသခင်သည် အိပ်မက်အားဖြင့် ကြားဝင်ဆောင်ရွက်ခဲ့ပြီး အခြားလမ်းတစ်လမ်းဖြင့် သူတို့ကိုအိမ်ပြန်ပို့ခဲ့သည်။ သို့ဖြစ်လျှင် ထို “ကြယ်” သည် မေရှိယအားဘေးပြုရန် တတ်နိုင်သ၍ကြိုးစားမည့် ဘုရားသခင့်ရန်သူ စာတန်၏အကြံအစည်ပင်ဖြစ်ရမည်။ ထို့ကြောင့် သူငယ်တော်ဖွားမြင်ရာမြင်ကွင်းများတွင် “ကြယ်” နှင့် နက္ခတ်ဗေဒင်ဆရာများကို ဘုရားသခင့်စေတမန်များအဖြစ် သရုပ်ဖော်ထားခြင်းသည် အလွန်မအပ်စပ်လှသည်တကား!—မဿဲ ၂:၉-၁၂။

သို့တိုင် စာတန်လက်မလျှော့ခဲ့ပါ။ ထိုကိစ္စတွင် သူ၏လက်ကိုင်တုတ်ဖြစ်သူ ဟေရုဒ်မင်းသည် ဗက်လင်မြို့ရှိ အသက်နှစ်နှစ်အောက်ကလေးအားလုံးကိုသတ်ပစ်ရန် အမိန့်ပေးလေသည်။ သို့သော် စာတန်သည် ယေဟောဝါနှင့် မယှဉ်ပြိုင်နိုင်ခဲ့ပေ။ အပြစ်မဲ့ကလေးငယ်များအား ဤရက်စက်ကြမ်းကြုတ်သော သတ်ဖြတ်မှုကိုပင် ကြာမြင့်စွာကတည်းက ဘုရားသခင်ကြိုသိမြင်ခဲ့ကြောင်း မဿဲကဖော်ပြသည်။ လုံခြုံမှုရှိရန် အီဂျစ်ပြည်သို့ထွက်ပြေးကြဖို့ ယောသပ်ကို ကောင်းကင်တမန်မှတစ်ဆင့် သတိပေးခြင်းအားဖြင့် ယေဟောဝါသည် စာတန်ကိုတစ်ဖန်တန်ပြန်တိုက်ခိုက်ခဲ့သည်။ နောက်ပိုင်းတွင် ယောသပ်သည် သူ့မိသားစုလေးနှင့် တစ်ဖန်ပြောင်းရွှေ့ခဲ့ပြီး နောက်ဆုံး နာဇရက်မြို့တွင်အခြေချခဲ့ရာ ထိုတွင် ယေရှုသည် သူ့ညီငယ်၊ ညီမငယ်များနှင့်အတူ ကြီးပြင်းလာခဲ့သည်။—မဿဲ ၂:၁၃-၂၃; ၁၃:၅၅၊ ၅၆။

ယေရှုမွေးဖွားခြင်း —သင့်အတွက်အဘယ်အဓိပ္ပာယ်ရှိ

ယေရှုမွေးဖွားခြင်းနှင့် ကလေးဘဝအဖြစ်အပျက်အကျဉ်းချုပ်က သင့်ကိုအံ့သြစေသလော။ လူများစွာတို့က အံ့သြကြသည်။ လူအချို့က ဆန့်ကျင်ပြီးအခိုင်အမာပြောဆိုကြလျက်ပင် မှတ်တမ်းတင်ချက်များသည် အမှန်ပင် သဟဇာတဖြစ်၍ တိကျမှန်ကန်သည်ကို တွေ့ ရှိရသည့်အတွက် သူတို့အံ့သြကြသည်။ အချို့ဖြစ်ရပ်များကို နှစ်ရာနှင့်ချီ၍ ကြိုပြောထားကြောင်း သိရသည့်အတွက်အံ့သြကြသည်။ ထို့ပြင် ခရစ်ဝင်ကျမ်းတွင်ပါသည့် အဓိကကျသောအခြေခံအချက်များသည် သူငယ်တော်ဖွားမြင်ခြင်းဆိုင်ရာ ထုံးတမ်းစဉ်လာပုံပြင်များ၊ မြင်ကွင်းများနှင့် သိသိသာသာကွာခြားသည်ကို သူတို့အံ့သြကြသည်။

သို့သော် အံ့ဩစရာအကောင်းဆုံးဖြစ်မည်မှာ ထုံးတမ်းစဉ်လာအရကျင်းပသော ခရစ္စမတ်ပွဲသဘင်များစွာတို့သည် ခရစ်ဝင်ကျမ်းမှဇာတ်ကြောင်းပြန်ချက်များပါ အရေးပါအချက်အလက်များမပါခြင်းဖြစ်သည်။ ဥပမာအားဖြင့် ယေရှု၏ဖခင်—ယောသပ်မဟုတ်—ယေဟောဝါဘုရားသခင်အား ထည့်ပင်မစဉ်းစားချေ။ မိမိချစ်မြတ်နိုးရသောသားတော်ကို ကြီးပြင်းစောင့်ရှောက်စေရန် ယောသပ်နှင့်မာရိကို တာဝန်ပေးထားရာတွင် ကိုယ်တော်၏ခံစားချက်ကို စဉ်းစားကြည့်ပါ။ ကိုယ်တော်၏သားသည် ကလေးလေးသာရှိနေစဉ် မုန်းတီးမှုအပြည့်ရှိသောမင်းကြီးက သူငယ်ကိုသတ်ပစ်ဖို့ကြံစည်နေသည့် လူ့လောကတွင် သားတော်ကိုကြီးပြင်းလာစေရသည့်အတွက် ကောင်းကင်ခမည်းတော်၏ဝေဒနာကို စဉ်းစားကြည့်ပါ! ဤကိုယ်ကျိုးစွန့်မှုကို ယေဟောဝါပြုလုပ်ခဲ့ရခြင်းမှာ လူသားများကို အလွန်ချစ်သောကြောင့်ဖြစ်သည်။—ယောဟန် ၃:၁၆။

တကယ့်ယေရှုသည် ခရစ္စမတ်ပွဲများတွင် ပျောက်နေလေ့ရှိသည်။ ကိုယ်တော်သည် မိမိ၏မွေးနေ့ကို တပည့်တော်များအား ပြောပြခဲ့ဖူးသည့် မှတ်တမ်းပင်မရှိ၊ ကိုယ်တော့်နောက်လိုက်များသည် ကိုယ်တော်၏မွေးနေ့ကိုကျင်းပခဲ့သည်ဟူသော ဖော်ပြချက်လည်းမရှိပေ။

ယေရှုသည် မိမိ၏မွေးနေ့ကိုမဟုတ်ဘဲ သေဆုံးသည့်နေ့—နှင့် ယင်း၏သမိုင်းဝင်အရေးပါမှု—ကို အထိမ်းအမှတ်ပွဲကျင်းပရန် မိမိ၏နောက်လိုက်များကို ကိုယ်တော်မိန့်မှာခဲ့သည်။ (လုကာ ၂၂:၁၉၊ ၂၀) ယခု ယေရှုသည် နွားစားခွက်ထဲတွင်သိပ်ထားသော အဘယ်အရာကိုမျှမတတ်နိုင်သည့် သူငယ်တော်မဟုတ်တော့သည့်အတွက် မိမိအားထိုသို့သတိရခြင်းကို ကိုယ်တော်အလိုမရှိပါ။ ယေရှုသည် သေဒဏ်ချမှတ်ခံခဲ့ရပြီးနောက် နှစ်ပေါင်း ၆၀ ကျော်အကြာတွင် မိမိကိုယ်ကိုမြင်းစီး၍တိုက်ပွဲဝင်တော့မည့် ဘုန်းတန်ခိုးကြီးမားသောဘုရင်တစ်ပါးအဖြစ် တမန်တော်ယောဟန်အား အဆင်းအာရုံမြင်စေခဲ့သည်။ (ဗျာဒိတ် ၁၉:၁၁-၁၆) ယေရှုသည် ကမ္ဘာကိုပြောင်းလဲမည့်ဘုရင်တစ်ပါးဖြစ်သောကြောင့် ကိုယ်တော်အား ဘုရားသခင်၏ကောင်းကင်နိုင်ငံတော်ဘုရင်အဖြစ် ကျွန်ုပ်တို့ယနေ့သိထားကြရမည်။

[အောက်ခြေမှတ်ချက်များ]

[စာမျက်နှာ ၈ ပါ ရုပ်ပုံ]

ခရစ်တော်မွေးဖွားပြီဟူသော သတင်းကောင်းကိုပေးခြင်းဖြင့် စိတ်နှိမ့်ချသောသိုးထိန်းများကို ယေဟောဝါ၏ကောင်းကင်တမန်က ကျေးဇူးပြုခဲ့