“ငါ့ထံသို့လာကြလော့။ ငါသည် လန်းဆန်းစေမည်”

မေတ္တာစိတ်ရှိစေပြီး အကျင့်ကောင်းများကျင့်စေသည့် အစည်းအဝေးများ

တိုရွန်တိုမြို့မှ တိုကျိုမြို့၊ မော်စကိုမြို့မှ မွန်တီဗွီဒီယိုမြို့ရှိ သန်းနှင့်ချီယေဟောဝါသက်သေများနှင့် သူတို့၏မိတ်ဆွေများသည် အပတ်စဉ် ကြိမ်ဖန်များစွာ ဝတ်ပြုရာနေရာများသို့ တဖွဲဖွဲသွားကြသည်။ ထိုသူတို့အထဲတွင် တစ်နေကုန်အလုပ်လုပ်ပြီးနောက် မောပန်းနေကြသော ဝီရိယရှိသည့် အိမ်ထောင်သည်ဖခင်များ; ကလေးများကိုချီပိုးလာကြသော ကြိုးစားမှုရှိသည့် ဇနီးသည်များနှင့် မိခင်များ; တစ်နေကုန် ကျောင်းတက်ကြသော ဖျတ်လတ်တက်ကြွသည့် လူငယ်များ; နာကျင်ကိုက်ခဲဝေဒနာများကြောင့် တစ်လှမ်းချင်းလျှောက်လာကြသော ချည့်နဲ့နေသည့် သက်ကြီးရွယ်အိုများ; သတ္တိရှိသည့်မုဆိုးမများနှင့် မိဘမဲ့များ; နှစ်သိမ့်မှုလိုအပ်သော စိတ်ဓာတ်ကျနေသူများ ပါဝင်၏။

အဆိုပါယေဟောဝါသက်သေများသည် အမြန်ခုတ်မောင်းသော ကျည်ဆံရထားများမှအစ မြည်းများအဆုံး; မြေအောက်ရထားများအစ ကုန်တင်ကားများအဆုံး ပို့ဆောင်ရေးနည်းအသွယ်သွယ်ကို အသုံးပြုကြ၏။ အချို့သည် မိကျောင်းများ ကျက်စားနေသောမြစ်များကို ဖြတ်ကူးခဲ့ကြရပြီး အခြားသူများမှာမူ မြို့ကြီးပြကြီးများ၏ ဆူညံသောကားသံများကို အောင့်အီးသည်းခံ၍လာကြ၏။ ဤသူတို့အားလုံးသည် အဘယ်ကြောင့် ဤမျှကြိုးစားအားထုတ်ကြသနည်း။

ခရစ်ယာန်အစည်းအဝေးများကို တက်ရောက်ပါဝင်ခြင်း၏ အဓိကအကြောင်းရင်းမှာ ယေဟောဝါဘုရားသခင်အား ဝတ်ပြုကိုးကွယ်ရန် အရေးပါသောနည်းလမ်းဖြစ်သည်။ (ဟေဗြဲ ၁၃:၁၅) တမန်တော်ပေါလုက “မေတ္တာစိတ်ရှိစေခြင်းငှာလည်းကောင်း၊ ကောင်းသောအကျင့်ကို ကျင့်စေခြင်းငှာလည်းကောင်း တိုက်တွန်းနှိုးဆော်ရသောအခွင့်ကိုရှာ၍ အချင်းချင်းတစ်ယောက်ကိုတစ်ယောက် ထောက်စာကြည့်ရှုကြကုန်အံ့။ . . . အချင်းချင်းစည်းဝေးခြင်းအမှုကို မရှောင်မလွှဲကြနှင့်။ အချင်းချင်းတို့ကို တိုက်တွန်းနှိုးဆော်ကြလော့။ ကာလအချိန်ရောက်လုနီးသည်ကိုထောက်သဖြင့် သာ၍ကြိုးစားကြလော့” ဟုရေးသားရာတွင် နောက်ထပ်အကြောင်းရင်းတစ်ခုကို ဖော်ပြ၏။ (ဟေဗြဲ ၁၀:၂၄၊ ၂၅) ဤတွင် ပေါလုက “‘ငါတို့သည် ထာဝရဘုရား၏အိမ်တော်သို့ သွားကြကုန်အံ့’ ဟုသူတစ်ပါးတို့သည် ပြောကြသောအခါ ငါသည် ဝမ်းမြောက်ခြင်းရှိ၏” ဟူ၍ သီဆိုခဲ့သော ဆာလံဆရာဒါဝိဒ်၏ခံစားချက်များကို သံယောင်လိုက်နေခြင်းဖြစ်သည်။—ဆာလံ ၁၂၂:၁။

ခရစ်ယာန်များသည် အစည်းအဝေးများ တက်ရောက်ရခြင်းကို အဘယ်ကြောင့် ဝမ်းမြောက်ကြသနည်း။ တက်ရောက်သူများသည် ကြည့်ရှုလေ့လာဖို့သာ စည်းဝေးတက်ကြသည်မဟုတ်ချေ။ အစည်းအဝေးများတက်ခြင်းဖြင့် တစ်ဦးနှင့်တစ်ဦး သိကျွမ်းရင်းနှီးခွင့်ရကြသည်။ ဤအစည်းအဝေးများသည် လက်ခံယူရုံမက ပေးကမ်းခွင့်ရှိစေ၍ တစ်ဦးကိုတစ်ဦး မေတ္တာပြပြီး အကျင့်ကောင်းများကျင့်စေရန် နှိုးဆော်ပေး၏။ ယင်းက အစည်းအဝေးများကို တည်ဆောက်မှုပေးသော အချိန်အခါများဖြစ်စေသည်။ ထို့ပြင် ခရစ်ယာန်အစည်းအဝေးများသည် “ငါ့ထံသို့လာကြလော့။ ငါသည် လန်းဆန်းစေမည်” ဟူသော ယေရှု၏ကတိတော် ပြည့်စုံသည့်နည်းတစ်နည်းဖြစ်၏။—မဿဲ ၁၁:၂၈။

နှစ်သိမ့်၍ ဂရုစိုက်ရာ အိုအေစစ်

ယေဟောဝါသက်သေများသည် မိမိတို့၏အစည်းအဝေးများကို လန်းဆန်းမှုပေးသောနေရာများအဖြစ် ရှုမြင်ရန် အကြောင်းကောင်းများရှိ၏။ တစ်ချက်အနေနှင့် အစည်းအဝေးများတွင် “သစ္စာနှင့်သတိပညာရှိသောကျွန်” သည်အချိန်တန်ဝိညာဉ်အစာကို တည်ခင်းကျွေးမွေး၏။ (မဿဲ ၂၄:၄၅၊ သမ) အစည်းအဝေးများသည် ယေဟောဝါ၏ကျေးကျွန်များကို ကျွမ်းကျင်၍ စိတ်ထက်သန်သော ဘုရားသခင့်စကားတော် သွန်သင်ပေးသူများဖြစ်စေရန် အရေးကြီးကဏ္ဍမှပါဝင်သည်။ ထို့ပြင် ဝမ်းနည်းကြေကွဲနေသောအချိန်အခါများ၌ အခြားသူများကို ကူညီနှစ်သိမ့်ပေးရန် အသင့်ရှိကြသော မေတ္တာပါပါ ဂရုစိုက်ကြည့်ရှုပေးသည့် မိတ်ဆွေတစ်စုကို ဘုရားသခင့်နိုင်ငံတော်ခန်းမတွင် တွေ့နိုင်၏။—၂ ကောရိန္သု ၇:၅-၇။

ခင်ပွန်းကွယ်လွန်သွားချိန်၌ ငါးနှစ်အရွယ်၊ ရှစ်နှစ်အရွယ် ကလေးများနှင့် ကျန်ရစ်ခဲ့သူ မုဆိုးမဖစ်လစ်သည် ထိုသို့တွေ့ ကြုံခံစားခဲ့ရ၏။ ခရစ်ယာန်အစည်းအဝေးများက မိမိနှင့် မိမိ၏ကလေးများကို လန်းဆန်းမှုပေးကြောင်း ဤသို့ဖော်ပြပြောဆို၏– “ယုံကြည်သူချင်းတွေက ပွေ့ဖက်ပြီး၊ ကျမ်းစာထဲကအချက်တစ်ချက်၊ ဒါမှမဟုတ် လက်ဆွဲနှုတ်ဆက်ပြီး သူတို့ရဲ့မေတ္တာနဲ့စိုးရိမ်ပေးမှုကို အမြဲတမ်းပြကြလို့ ဘုရားသခင့်နိုင်ငံတော်ခန်းမကို သွားရတာ ကျွန်မနှစ်သိမ့်မှုရတယ်။ အဲ့ဒီနေရာကို ကျွန်မအမြဲသွားချင်တယ်။”—၁ သက်သာလောနိတ် ၅:၁၄။

မာရီသည် အရေးကြီးခွဲစိတ်ကုသမှုခံယူပြီးနောက် ပြန်ကောင်းလာရန် အနည်းဆုံးခြောက်ပတ်ကြာမည်ဟု ဆရာဝန်ကပြောသည်။ မာရီနာလန်ထချိန် ဦးဆုံးအပတ်များအတွင်း သူသည် အစည်းအဝေးများကို မတက်နိုင်ခဲ့ချေ။ သူသည် ယခင်ကကဲ့သို့ ရွှင်ပျမှုမရှိသည်ကို ဆရာဝန်က သတိပြုမိ၏။ အစည်းအဝေးများကို မာရီတက်နေကြောင်းကို ဆရာဝန်သတိပြုမိရာ အစည်းအဝေးများတက်ဖို့ အားပေးခဲ့၏။ မိမိနှင့်ယုံကြည်ခြင်းမတူသော ခင်ပွန်းသည် မိမိ၏ကျန်းမာရေးအတွက် စိုးရိမ်သောကြောင့် အစည်းအဝေးများကို တက်ခွင့်ပြုမည်မဟုတ်ဟု မာရီက ပြန်ဖြေဆိုသည်။ ထို့ကြောင့် ဆရာဝန်က အားပေးမှုနှင့် တည်ဆောက်မှုဖြစ်စေသော ပေါင်းသင်းမှုရရှိဖို့ ဘုရားသခင့်နိုင်ငံတော်ခန်းမသို့သွားရန် မာရီအား တရားဝင်ဆေးညွှန်း “အမှာစာ” တစ်စောင်ကို ရေးပေးလိုက်၏။ မာရီက ဤသို့ပြောပြသည်– “အစည်းအဝေးတစ်ခုတည်း တက်ပြီးတဲ့နောက် ကျွန်မအရမ်းသက်သာသွားတယ်။ အစာစားလာပြီး တစ်ညလုံးအိပ်ပျော်တယ်၊ အကိုက်အခဲပျောက်ဆေးတွေ ခဏခဏသောက်စရာလည်း မလိုတော့ဘူး၊ ကျွန်မ ပြန်ပြုံးနိုင်ပြီ!”—သု. ၁၆:၂၄။

ခရစ်ယာန်အစည်းအဝေးများ၏ မေတ္တာပါဝန်းကျင်ကို အပြင်လူများ သတိမပြုမိဘဲမနေကြချေ။ ကောလိပ်ကျောင်းသူတစ်ဦးသည် သူ၏လူမျိုးစုနှိုင်းယှဉ်ပညာရပ်အတွက် စာတမ်းတိုတစ်စောင်ပြုစုရန် ယေဟောဝါသက်သေများကို အနီးကပ်လေ့လာမည်ဟု ဆုံးဖြတ်ခဲ့၏။ အစည်းအဝေးများ၏ ဝန်းကျင်အခြေအနေနှင့်စပ်လျဉ်း၍ သူ၏စာတမ်းတိုတွင် ဤသို့ရေးသားခဲ့သည်– “ကျွန်မရရှိခဲ့တဲ့ လှိုက်လှိုက်လှဲလှဲကြိုဆိုနှုတ်ဆက်မှုက . . . တကယ့်ကိုဘဝင်ခိုက်စရာကောင်းပါတယ်။ . . . ယေဟောဝါသက်သေတွေရဲ့ ဖော်ရွေမှုက အရမ်းကိုထင်ပေါ်တဲ့ အရည်အသွေးတစ်ခုပဲ၊ ဒီလိုဖော်ရွေမှုက သူတို့ဝန်းကျင်ရဲ့ အထူးခြားဆုံးကဏ္ဍဖြစ်တယ်လို့ ကျွန်မထင်တယ်။”—၁ ကောရိန္သု ၁၄:၂၅။

ဆင်းရဲခက်ခဲလှသည့် ဤလောကတွင် ခရစ်ယာန်အသင်းတော်သည် ဝိညာဉ်ရေးအိုအေစစ်တစ်ခုဖြစ်၏။ ငြိမ်သက်ခြင်းနှင့် မေတ္တာရှိ ခိုလှုံရာအရပ်တစ်ခုဖြစ်သည်။ အစည်းအဝေးများကို တက်ရောက်ခြင်းဖြင့် “ညီအစ်ကိုတို့သည် သဘောတူလျက် ပေါင်းဖော်ကြသည်အရာမှာ အလွန်ကောင်းပေ၏။ အလွန်တင့်တယ်လျောက်ပတ်ပေ၏” ဟူသော ဆာလံဆရာ၏စကားများ မှန်ကန်သည်ကို အသင်ကိုယ်တိုင် တွေ့ ကြုံခံစားရမည်။—ဆာလံ ၁၃၃:၁။

[စာမျက်နှာ ၂၅ ပါ မြေပုံ/ ရုပ်ပုံ]

အထူးလိုအပ်ရာကို ဖြည့်ဆည်းပေးခြင်း

နားမကြားသူများသည် ခရစ်ယာန်အစည်းအဝေးများမှ မည်သို့အကျိုးခံစားနိုင်ကြမည်နည်း။ ကမ္ဘာတစ်ဝန်းတွင် ယေဟောဝါသက်သေများသည် လက်ဟန်ပြအသင်းတော်များကို ဖွဲ့စည်းလျက်ရှိ၏။ လွန်ခဲ့သော ၁၃ နှစ်အတွင်း လက်ဟန်ပြအသင်းတော် ၂၇ ခုနှင့် လက်ဟန်ပြအုပ်စု ၄၃ ခုကို အမေရိကန်ပြည်ထောင်စုတွင် တည်ထောင်ခဲ့ပြီ။ အနည်းဆုံး အခြားနိုင်ငံ ၄၀ တွင် ယခု လက်ဟန်ပြအသင်းတော် ၁၄၀ ခန့် ရှိနေပြီ။ ခရစ်ယာန်စာပေများကို လက်ဟန်ပြဘာသာစကား ၁၃ ဘာသာဖြင့် ဗီဒီယိုများထုတ်လုပ်ခဲ့ပြီ။

ခရစ်ယာန်အသင်းတော်က နားမကြားသူများကို ယေဟောဝါအား ချီးမွမ်းခွင့်ပေးသည်။ အကြီးအကျယ်စိတ်ဓာတ်ကျပြီး ကိုယ့်ကိုယ်ကိုသတ်သေရန် ကြံစည်ခဲ့သော ကက်သလစ်ဘာသာဝင်ဖြစ်ခဲ့ဖူးသူ ပြင်သစ်နိုင်ငံမှ အော့ဒီလ်သည် ခရစ်ယာန်အစည်းအဝေးများမှ ရရှိခဲ့သည့် ကျမ်းစာပညာရေးအတွက် အလွန်ကျေးဇူးတင်လျက်ရှိသည်။ “ကျွန်မရဲ့ကျန်းမာရေး ပြန်ကောင်းလာပြီး အသက်ရှင်ရလို့ ပြန်ပြီးပျော်ရွှင်လာတယ်။ ဒါ့ထက် အမှန်တရားကို ကျွန်မတွေ့ ပြီ။ အခုဆိုရင် ကျွန်မဘဝဟာ ရည်ရွယ်ချက်ရှိပြီ” ဟုသူပြောပြ၏။