ကျမ်းစာစောင် နံပါတ် ၂၆​—ယေဇကျေလ

ကျမ်းရေးသူ– ယေဇကျေလ

ရေးရာဒေသ– ဗာဗုလုန်

ရေးသားပြီးစီးချိန်– ဘီ.စီ.အီး. ၅၉၁ ခန့်

ငုံမိသည့်ကာလပိုင်း– ဘီ.စီ.အီး. ၆၁၃ – ၅၉၁ ခန့်

၁။ ဗာဗုလုန်တွင် ပြည်နှင်ခံရသူများ၏ အခြေအနေများ မည်သို့ရှိသနည်း၊ အဘယ်စမ်းသပ်မှုအသစ်များနှင့် ရင်ဆိုင်ခဲ့ကြသနည်း။

ဘီ.စီ.အီး. ၆၁၇ တွင် ယုဒရှင်ဘုရင်ယေခေါနိသည် ယေရုရှလင်မြို့ကို နေဗုခဒ်နေဇာထံ အညံ့ခံလွှဲအပ်ခဲ့ရာ နေဗုခဒ်နေဇာသည် ပြည်တော်ထဲမှ ထိပ်တန်းကျသောလူများကိုလည်းကောင်း၊ ယေဟောဝါ၏ဗိမာန်တော်ဘဏ္ဍာနှင့် ရှင်ဘုရင်၏ဘဏ္ဍာများကိုလည်းကောင်း ဗာဗုလုန်သို့ ယူဆောင်သွားခဲ့သည်။ သုံ့ပန်းများထဲတွင် မင်းမျိုးမင်းနွယ်များ၊ မင်းသားမှူးမတ်များ၊ သူရဲကောင်းများ၊ စစ်သူကြီးများ၊ ဆောက်လုပ်ရေးနှင့် ဗိသုကာပညာရှင်များနှင့်အတူ ယဇ်ပုရောဟိတ်ဗုဇိ၏သား ယေဇကျေလလည်း ပါသွားခဲ့သည်။ (၄ ရာ. ၂၄:၁၁-၁၇; ယေဇ. ၁:၁-၃) စိတ်ပျက်လက်ပျက်ဖြင့် ဤပြည်နှင်ခံဣသရေလလူများသည် တောင်ကုန်းတောင်တန်းများ၊ စမ်းရေများနှင့် တောင်ကြားများရှိရာ နေရင်းပြည်မှ အပြောကျယ်သောလွင်ပြင်ကြီးရှိရာသို့ မောပန်းနွမ်းလျဖွယ်ခရီးကြမ်းကိုနှင်ပြီး ရောက်ရှိလာခဲ့ကြသည်။ ယခု သူတို့သည် ထူးဆန်းသောဓလေ့ထုံးစံများနှင့် ရုပ်တုကိုးကွယ်သူများအလယ်၊ အားကြီးသောအင်ပါယာ၏ဗဟိုတွင်ရှိသော ခေဗာမြစ်ကမ်းနဖူးတွင် နေထိုင်ရကြသည်။ နေဗုခဒ်နေဇာက ဣသရေလလူတို့အား ကိုယ်ပိုင်အိမ်နှင့်နေရန်၊ အခိုင်းအစေများထားရှိရန်နှင့် စီးပွားရေးလုပ်ငန်းများလုပ်ဆောင်ရန် ခွင့်ပြုထားသည်။ (ယေဇ. ၈:၁; ယေ. ၂၉:၅-၇; ဧဇ. ၂:၆၅) လုံ့လဝီရိယရှိမည်ဆိုပါက သူတို့ ချမ်းသာကြွယ်ဝလာနိုင်သည်။ သူတို့သည် ဗာဗုလုန်၏ဘာသာရေးနှင့် ရုပ်ဝါဒညွတ်ကွင်းထောင်ချောက်ထဲသို့ သက်ဆင်းကြမည်လော။ ယေဟောဝါကို ဆက်၍ပုန်ကန်ကြမည်လော။ ပြည်နှင်ခံရခြင်းသည် ဆုံးမခံရခြင်းဖြစ်သည်ဟု သူတို့ခံယူပါမည်လော။ သူတို့သည် ပြည်နှင်ခံရသောပြည်တွင် အသစ်သောစမ်းသပ်မှုများကို ရင်ဆိုင်ရတော့မည်။

၂။ (က) ယေရုရှလင်မြို့ဖျက်ဆီးမခံရမီ ခဲယဉ်းသောနှစ်များအတွင်း အဘယ်ပရောဖက်သုံးဦး ပေါ်လွင်သနည်း။ (ခ) ထူးခြားသည်မှာ ယေဇကျေလသည် မည်သို့အခေါ်ခံရသနည်း၊ သူ့အမည်၏အဓိပ္ပာယ်ကား အဘယ်နည်း။ (ဂ) ယေဇကျေလသည် အဘယ်နှစ်များအတွင်း ပရောဖက်ပြုခဲ့သနည်း၊ သူ၏အသက်တာနှင့် သူ၏သေခြင်းအကြောင်း အဘယ်အရာသိရသနည်း။

^၂ ယေရုရှလင်မြို့ပျက်စီးခြင်းကိုဦးတည်စေသည့် ခက်ခဲသောနှစ်များအတွင်း ဣသရေလလူမျိုးအလယ်တွင် ယေဟောဝါကိုယ်တော်တိုင် သို့မဟုတ် ပရောဖက်တစ်ပါးအမြဲရှိနေခဲ့သည်။ ယေရမိသည် ယေရုရှလင်မြို့တွင်ရှိနေခဲ့ပြီး ဒံယေလသည် ဗာဗုလုန်နန်းတော်ဝင်းတွင်ရှိခဲ့သည်၊ ယေဇကျေလသည် ဗာဗုလုန်ရှိ ပြည်နှင်ခံဂျူးများ၏ ပရောဖက်ဖြစ်ခဲ့သည်။ ယေဇကျေလသည် ယဇ်ပုရောဟိတ်လည်းဖြစ်၊ ပရောဖက်လည်းဖြစ်ပြီး ယင်းကွဲပြားသောတာဝန်ကို ယေရမိနှင့် နောက်ပိုင်းတွင် ဇာခရိတို့သည် ထမ်းဆောင်ပျော်မွေ့ခဲ့ကြသည်။ (ယေဇ. ၁:၃) သူ့ကျမ်းတစ်လျှောက်လုံးတွင်ပါရှိသည့် ပရောဖက်ပြုချက်များကို လေ့လာသည့်အခါ သူ့အား “လူသား” ဟုအကြိမ် ၉၀ ကျော်ခေါ်ထားခြင်းသည် ထူးခြားပါသည်၊ အကြောင်းမှာ ခရစ်ယာန်ဂရိကျမ်းစာစောင်များတွင် ယေရှုကိုလည်း “လူသား” ဟုအကြိမ် ၈၀ နီးပါး ရည်ညွှန်းခေါ်ဆိုထားသည်။ (ယေဇ. ၂:၁; မ. ၈:၂၀) သူ၏အမည် ယေဇကျေလ (ဟေဗြဲ၊ Yechez·qeʼlʹ) ဟူသည် “ဘုရားသခင် ခွန်အားနှင့်ပြည့်စေသည်” ဟုအဓိပ္ပာယ်ရသည်။ ယေခေါနိပြည်နှင်ခံရပြီး ပဉ္စမနှစ်မြောက်ဖြစ်သည့် ဘီ.စီ.အီး. ၆၁၃ ၌ယေဇကျေလကို ပရောဖက်အဖြစ် ယေဟောဝါခန့်အပ်ခဲ့သည်။ ပြည်နှင်ခံရပြီး ၂၇ နှစ်မြောက်အချိန်ဖြစ်သော နောက်နှစ်ပေါင်း ၂၂ ကြာအထိ သူသည် ပရောဖက်ပြုမြဲပြုနေကြောင်း ကျွန်ုပ်တို့ဖတ်ရသည်။ (ယေဇ. ၁:၁၊ ၂; ၂၉:၁၇) သူသည် အိမ်ထောင်သည်ဖြစ်သည်၊ သို့သော် သူ့ဇနီးသည် ယေရုရှလင်ကို နေဗုခဒ်နေဇာနောက်ဆုံးအချီဝိုင်းရံစအချိန်တွင် သေဆုံးခဲ့သည်။ (၂၄:၂၊ ၁၈) သူကိုယ်တိုင်မူ မည်သည့်အချိန်၊ မည်သို့မည်ပုံသေသည်ကို မသိရပါ။

၃။ ယေဇကျေလသည် ကျမ်းရေးသူဖြစ်ကြောင်း၊ ယေဇကျေလကျမ်းသည် ကျမ်းအဝင်ဖြစ်ကြောင်းနှင့် ကျမ်းစစ်ကျမ်းမှန်ဖြစ်ကြောင်း မည်သို့ဆိုနိုင်သနည်း။

^၃ ယေဇကျေလသည် မိမိအမည်ရှိသောကျမ်းကိုရေးသားခဲ့ခြင်းနှင့် ကျမ်းစာအဝင်ဖြစ်ခြင်းကို မငြင်းခုံကြပါ။ ဧဇရလက်ထက်ရှိကျမ်းတွင် ဤကျမ်းပါဝင်သည်ကိုတွေ့ရပြီး အစောပိုင်းခရစ်ယာန်ခေတ် ကျမ်းစာအုပ်များတွင်လည်း တွေ့ရသည်၊ အထူးသဖြင့် သြရီဂျင်၏ကျမ်းထဲတွင် ပါဝင်ခြင်းဖြစ်သည်။ ၎င်းကျမ်းထဲမှသရုပ်ဖော်ချက်များသည် ယေရမိနှင့်ဗျာဒိတ်ကျမ်းတွင်ပါသော သရုပ်ဖော်ချက်များနှင့် ထူးခြားစွာဆင်တူနေခြင်းကလည်း ကျမ်းစစ်ကျမ်းမှန်ဖြစ်ကြောင်း သက်သေသာဓကဖြစ်သည်။—ယေဇ. ၂၄:၂-၁၂—ယေ. ၁:၁၃-၁၅; ယေဇ. ၂၃:၁-၄၉—ယေ. ၃:၆-၁၁; ယေဇ. ၁၈:၂-၄—ယေ. ၃၁:၂၉၊ ၃၀; ယေဇ. ၁:၅၊ ၁၀—ဗျာ. ၄:၆၊ ၇; ယေဇ. ၅:၁၇—ဗျာ. ၆:၈; ယေဇ. ၉:၄—ဗျာ. ၇:၃; ယေဇ. ၂:၉; ၃:၁—ဗျာ. ၁၀:၂၊ ၈-၁၀; ယေဇ. ၂၃:၂၂၊ ၂၅၊ ၂၆—ဗျာ. ၁၇:၁၆; ၁၈:၈; ယေဇ. ၂၇:၃၀၊ ၃၆—ဗျာ. ၁၈:၉၊ ၁၇-၁၉; ယေဇ. ၃၇:၂၇—ဗျာ. ၂၁:၃; ယေဇ. ၄၈:၃၀-၃၄—ဗျာ. ၂၁:၁၂၊ ၁၃; ယေဇ. ၄၇:၁၊ ၇၊ ၁၂—ဗျာ. ၂၂:၁၊ ၂။

၄။ ယေဇကျေလ၏ အဘယ်ပရောဖက်ပြုချက်များ ထူးထူးခြားခြားပြည့်စုံသည်ကို တွေ့ခဲ့ရသနည်း။

^၄ အိမ်နီးချင်းနိုင်ငံများဖြစ်သော တုရု၊ အီဂျစ်၊ ဧဒုံတို့နှင့်ပတ်သက်သည့် ယေဇကျေလပရောဖက်ပြုချက်များ ထူးထူးခြားခြားပြည့်စုံခြင်းကို တွေ့မြင်ရခြင်းသည်လည်း ကျမ်းစစ်ကျမ်းမှန်ဖြစ်ကြောင်း ထပ်ဆင့်သာဓကဖြစ်သည်။ ဥပမာ၊ ယေဇကျေလက တုရုမြို့သည် သိမ်းရုံးဖျက်ဆီးခံရမည်ဟု ပရောဖက်ပြုခဲ့သည်၊ နေဗုခဒ်နေဇာက ထိုမြို့ကို ၁၃ နှစ်လုံးလုံးဝိုင်းရံပိတ်ဆို့ပြီး သိမ်းပိုက်လိုက်သောအခါ ၎င်းပရောဖက်ပြုချက်တစ်စိတ်တစ်ပိုင်း ပြည့်စုံခဲ့သည်။ (ယေဇ. ၂၆:၂-၂၁) ဤတိုက်ခိုက်သိမ်းပိုက်မှုသည် တုရုမြို့လုံးဝပျက်စီးခြင်းမဖြစ်ခဲ့ပါ။ သို့သော် လုံးဝပျက်စီးမည်ဟု ယေဟောဝါစီရင်ချက်ချပြီးဖြစ်သည်။ ယေဇကျလမှတစ်ဆင့် ကိုယ်တော်ဤသို့ကြိုဟောခဲ့ပြီးဖြစ်သည်– “မြေမှုန့်ကိုငါခြစ်ခွာ၍ ရှင်းလင်းသောကျောက်ကဲ့သို့ဖြစ်စေမည်။ . . . သင်၏ကျောက်၊ သစ်သား၊ မြေတို့ကို ရေထဲမှာချပစ်ကြလိမ့်မည်။” (၂၆:၄၊ ၁၂) နှစ်ပေါင်း ၂၅၀ လွန်ပြီးနောက် မဟာအလက်ဇန္ဒားသည် ကျွန်းမြို့တော်ဖြစ်သော တုရုမြို့ကို တိုက်ခိုက်သောအခါ ၎င်းကျမ်းချက်ပြည့်စုံခဲ့သည်။ အလက်ဇန္ဒား၏စစ်သားတို့သည် ကမ်းပေါ်မှ မြို့အပျက်အယွင်းများကိုခြစ်ယူပြီး ပင်လယ်ထဲသို့ပစ်ချကာ မိုင်ဝက်ရှိသောတာကြီးကို ကျွန်းမြို့ရောက်သည်အထိဖို့ခဲ့သည်။ သို့ဖြင့် သူတို့သည် ရှုပ်ထွေးသောဝိုင်းရံပိတ်ဆို့မှုလုပ်ရပ်များဖြင့် ပေ ၁၅၀ မြင့်သောမြို့ရိုးကိုဖြိုဖျက်ကာ ဘီ.စီ.အီး. ၃၃၂ တွင်သိမ်းယူခဲ့သည်။ ထောင်နှင့်ချီသောသူများအသတ်ခံရပြီး များစွာသောသူတို့သည် ကျွန်အဖြစ်ရောင်းစားခံရကြသည်။ ယေဇကျေလတင်ကူးဟောခဲ့သည့်အတိုင်း တုရုမြို့သည် ‘ရှင်းလင်းသောကျောက်၊ ပိုက်ကွန်လှန်းရာအရပ်’ ဖြစ်လာခဲ့သည်။ (၂၆:၁၄)a ကတိထားရာပြည်၏ အခြားတစ်ဖက်ရှိသော စဉ်းလဲသောဧဒုံလူမျိုးတို့သည်လည်း ယေဇကျေလပရောဖက်ပြုခဲ့သည့်အတိုင်း လုံးလုံးဖျက်ဆီးခံခဲ့ရသည်။ (၂၅:၁၂၊ ၁၃; ၃၅:၂-၉)b ထို့ပြင် ယေရုရှလင်မြို့ပျက်စီးခြင်း၊ ဣသရေလလူတို့ ပြည်တော်ပြန်ခြင်းတို့နှင့်ပတ်သက်သော ယေဇကျေလ၏ပရောဖက်ပြုချက်သည်လည်း အတိအကျပြည့်စုံခဲ့သည်။—၁၇:၁၂-၂၁; ၃၆:၇-၁၄။

၅။ ဂျူးတို့သည် ယေဇကျေလ၏ အစောပိုင်းပရောဖက်ပြုချက်များကို မည်သို့တုံ့ပြန်ခဲ့ကြသနည်း။

^၅ ယေဇကျေလ၏ ပရောဖက်လုပ်ငန်းအစောပိုင်းနှစ်များတွင် သစ္စာမဲ့ယေရုရှလင်အပေါ် ဘုရားသခင်သတ်မှတ်ထားသော တရားစီရင်ချက်အကြောင်း ကြေညာခဲ့ပြီး ပြည်နှင်ခံရသူများအား ရုပ်တုကိုးကွယ်ခြင်းနှင့်ပတ်သက်၍ သတိပေးခဲ့သည်။ (၁၄:၁-၈; ၁၇:၁၂-၂၁) သုံ့ပန်းဘဝရောက်ဂျူးတို့သည် နောင်တရသည့်လက္ခဏာ လုံးလုံးမပြကြပါ။ သူတို့ထဲမှ တာဝန်ရှိသူတို့သည် ယေဇကျေလနှင့် တိုင်ပင်သောအလေ့အထရှိသော်လည်း သူတို့အတွက် ယေဇကျေလမှဖော်ပြသော ယေဟောဝါထံမှသတင်းစကားကိုမူ လုံးလုံးဂရုမစိုက်ခဲ့ကြပါ။ သူတို့သည် ရုပ်တုကိုးကွယ်ခြင်း၊ ရုပ်ဝါဒလိုက်စားခြင်းတို့ကို စိတ်အနှောင့်အယှက်မရှိ လုပ်ကိုင်ခဲ့ကြသည်။ သူတို့၏ဗိမာန်တော်၊ သန့်ရှင်းသောမြို့တော်နှင့် သူတို့၏မင်းဆက်ဆုံးရှုံးခြင်းက သူတို့ကို အထိနာစေခဲ့သော်လည်း လူနည်းစုလောက်ကိုသာ နှိမ့်ချမှုနှင့် နောင်တရစေခဲ့သည်။—ဆာ. ၁၃၇:၁-၉။

၆။ ယေဇကျေလ၏ နောက်ပိုင်းပရောဖက်ပြုချက်များတွင် အဘယ်အကြောင်းအရာကို အလေးပေးဖော်ပြသနည်း၊ ယေဟောဝါ၏နာမတော် သန့်ရှင်းမြင့်မြတ်ရေး မည်သို့ပေါ်လွင်သနည်း။

^၆ နောက်ပိုင်းနှစ်များတွင် ယေဇကျေလပရောဖက်ပြုချက်များသည် ပြန်လည်တည်ထောင်ရေးမျှော်လင့်ချက်ကို အလေးပေးဖော်ပြခဲ့သည်။ ယင်းတို့ထဲတွင် ယုဒပြည်ကျဆုံးခြင်းကို ဝမ်းမြောက်ခဲ့ကြသော အိမ်နီးချင်းနိုင်ငံများကို ပြစ်တင်သတိပေးခြင်းလည်းပါဝင်သည်။ သူတို့နှိမ့်ချခံရခြင်းနှင့် ဣသရေလပြည် ပြန်လည်ထူထောင်ခြင်းတို့က သူတို့၏မျက်မှောက်တွင် ယေဟောဝါအား သန့်ရှင်းမြင့်မြတ်စေမည်ဖြစ်သည်။ သုံ့ပန်းဘဝရောက်ခြင်းနှင့် ပြန်လည်ထူထောင်ခြင်းတို့၏ရည်ရွယ်ချက်ကို အချုပ်အားဖြင့်ပြောရလျှင် ‘ငါသည်ယေဟောဝါဖြစ်ကြောင်း ဣသရေလအမျိုးသားတို့နှင့် တစ်ပါးအမျိုးသားတို့ သိစေရန်အတွက်ဖြစ်သည်။’ (ယေဇ. ၃၉:၇၊ ၂၂) ဤသို့ယေဟောဝါ၏နာမတော်အား သန့်ရှင်းမြင့်မြတ်စေခြင်းကို ကျမ်းတစ်လျှောက်လုံးတွင် ပေါ်လွင်စွာတင်ပြထားပြီး “ငါသည် ယေဟောဝါဖြစ်ကြောင်း သင် [သို့မဟုတ်၊ သူတို့] သိရကြလိမ့်မည်” ဟူသောအသုံးအနှုန်း အကြိမ် ၆၀ ကျော်ပါရှိသည်။—၆:၇၊ ကဘ။c

အဘယ်ကြောင့်အကျိုးရှိကြောင်း

၂၉။ ပြည်နှင်ခံဂျူးများသည် ယေဇကျေလ၏ပရောဖက်ပြုချက်မှ အဘယ်နည်းဖြင့် အကျိုးရခဲ့ကြသနည်း။

^၂၉ ယေဇကျေလအား ယေဟောဝါပေးခဲ့သည့် ကြေညာချက်များ၊ ရူပါရုံများနှင့် ကတိတော်များအားလုံးကို သူသည် ပြည်နှင်ခံဂျူးများအား သစ္စာရှိစွာပြန်ပြောပြခဲ့သည်။ အများစုက ပရောဖက်အား မထီမဲ့မြင်ပြု၊ ပြောင်လှောင်ကြသော်လည်း ယုံကြည်သူအချို့ရှိခဲ့ပါသည်။ ယုံကြည်သူတို့သည် အကျိုးကြီးစွာရခဲ့ကြသည်။ သူတို့သည် ပြန်လည်တည်ထောင်ခြင်းကတိတော်ကြောင့် များစွာအားတက်လာခဲ့ကြသည်။ သုံ့ပန်းဘဝရောက်ခဲ့ကြသော အခြားလူမျိုးများနှင့်မတူဘဲ၊ သူတို့သည် မိမိတို့လူမျိုးအဖြစ်အနေကို ထိန်းသိမ်းခဲ့ကြပြီး ယေဟောဝါကြိုပြောခဲ့သည့်အတိုင်း ဘီ.စီ.အီး. ၅၃၇ တွင်အကြွင်းအကျန်ကို ကိုယ်တော်ပြန်လည်စုသိမ်းခဲ့၏။ (ယေဇ. ၂၈:၂၅၊ ၂၆; ၃၉:၂၁-၂၈; ဧဇ. ၂:၁; ၃:၁) သူတို့သည် ယေဟောဝါ၏အိမ်တော်ကို ပြန်လည်တည်ဆောက်ခဲ့ကြပြီး ထိုနေရာတွင် စစ်မှန်သောဝတ်ပြုရေးကို ပြန်လည်သစ်လွင်စေခဲ့ကြသည်။

၃၀။ ယေဇကျေလကျမ်းတွင်ပါသော အဘယ်မူများသည် ယနေ့ကျွန်ုပ်တို့အတွက် တန်ဖိုးရှိသနည်း။

^၃၀ ယေဇကျေလကျမ်းတွင်ပါသောမူများသည် ယနေ့ကျွန်ုပ်တို့အတွက်လည်း အလွန်တန်ဖိုးရှိသည်။ ပုန်ကန်မှုနှင့်ဒွန်တွဲနေသော အယူဖောက်ပြန်ခြင်းနှင့် ရုပ်တုကိုးကွယ်ခြင်းတို့သည် ယေဟောဝါမျက်နှာသာတော် ဆုံးရှုံးခြင်းသို့သာ ဦးတည်စေနိုင်သည်။ (ယေဇ. ၆:၁-၇; ၁၂:၂-၄၊ ၁၁-၁၆) ယောက်စီယောက်တိုင်းသည် မိမိအပြစ်အလျောက်စီရင်ခံရမည်၊ သို့သော် မှားယွင်းသောလမ်းစဉ်ကိုစွန့်ပစ်သူအား ယေဟောဝါခွင့်လွှတ်တော်မူမည်။ ထိုသို့သောသူသည် ကရုဏာတော်ကိုခံရမည်ဖြစ်ပြီး အသက်ဆက်ရှင်ခွင့်ရမည်။ (၁၈:၂၀-၂၂) ဘုရားသခင့်ကျေးကျွန်များသည် ခက်ခဲသည့်တာဝန်များရသည်ဖြစ်စေ၊ ကဲ့ရဲ့ပြောင်လှောင်မှုနှင့် ပြစ်တင်ရှုတ်ချခံရသည်ဖြစ်စေ ယေဇကျေလကဲ့သို့ သစ္စာရှိသောကင်းစောင့်ဖြစ်ရမည်။ ကျွန်ုပ်တို့သည် လူဆိုးကိုသတိမပေးဘဲ အသက်ဆုံးရှုံးစေခြင်းဖြင့် ကျွန်ုပ်တို့ဦးခေါင်းပေါ် သူတို့အသွေးမသက်ရောက်စေရပါ။ (၃:၁၇; ၃၃:၁-၉) ဘုရားသခင့်လူမျိုး၏သိုးထိန်းများသည် သိုးအုပ်ကိုကြည့်ရှုစောင့်ရှောက်ရမည့် ကြီးလေးသောတာဝန်ရရှိကြသည်။—၃၄:၂-၁၀။

၃၁။ ယေဇကျေလ၏ အဘယ်ပရောဖက်ပြုချက်များက မေရှိယကြွလာခြင်းအကြောင်း ကြိုပြောသနည်း။

^၃၁ ယေဇကျေလကျမ်းတွင် ထူးခြားပေါ်လွင်သည့်အရာမှာ မေရှိယနှင့်ပတ်သက်သော ပရောဖက်ပြုချက်များဖြစ်သည်။ မေရှိယသည် ဒါဝိဒ်၏ရာဇပလ္လင်ကို “အစိုးပိုင်သောသူ၊” ယင်းကိုပေးအပ်ခံရမည့်သူဖြစ်သည်ဟု ဖော်ပြထားသည်။ “ငါ၏ကျွန်ဒါဝိဒ်” အဖြစ် နှစ်နေရာတွင်ဖော်ပြထားပြီး “သိုးထိန်း၊” “ဘုရင်၊” “မင်း [“အကဲအမှူး၊” ကဘ]” ဟူ၍လည်းဖော်ပြထားသည်။ (၂၁:၂၇; ၃၄:၂၃၊ ၂၄; ၃၇:၂၄၊ ၂၅) ဒါဝိဒ်ကွယ်လွန်သည်မှာ ကြာပြီဖြစ်၍ ဒါဝိဒ်၏သားလည်းဖြစ်၊ သခင်လည်းဖြစ်မည့်သူအကြောင်း ယေဇကျေလပြောဆိုနေခြင်းဖြစ်သည်။ (ဆာ. ၁၁၀:၁; မ. ၂၂:၄၂-၄၅) ဟေရှာယကဲ့သို့ပင် ယေဇကျေလသည် ယေဟောဝါကြီးမြင့်စေမည့် အညွှန့်ပေါက်ခြင်းအကြောင်းပြောသည်။—ယေဇ. ၁၇:၂၂-၂၄; ဟေရှာ. ၁၁:၁-၃။

၃၂။ ယေဇကျေလ၏ဗိမာန်တော်ရူပါရုံကို ဗျာဒိတ်ကျမ်းပါ ‘သန့်ရှင်းသောမြို့’ ရူပါရုံနှင့် မည်သို့နှိုင်းယှဉ်ကြည့်နိုင်သနည်း။

^၃၂ ယေဇကျေလ၏ဗိမာန်တော်ရူပါရုံကို ဗျာဒိတ်ကျမ်းပါ “သန့်ရှင်းသောယေရုရှလင်မြို့” ရူပါရုံနှင့်နှိုင်းယှဉ်ကြည့်လျှင် စိတ်ဝင်စားဖွယ်ဖြစ်သည်။ (ဗျာ. ၂၁:၁၀) ခြားနားချက်များကိုတွေ့ရသည်၊ ဥပမာ၊ ယေဇကျေလဗိမာန်ကိုခွဲခြားထားကာ မြို့တော်၏မြောက်ဘက်တွင်ရှိပြီး ဗျာဒိတ်ကျမ်းပါမြို့တော်၏ဗိမာန်တော်သည် ယေဟောဝါကိုယ်တော်တိုင်ဖြစ်၏။ သို့ရာတွင် အဖြစ်အပျက်နှစ်ခုစလုံး၌ အသက်ရေစီးဆင်းနေသည်၊ အနာပျောက်စေသောအသီးအရွက်ကို လစဉ်ပေးတတ်သောသစ်ပင်များရှိပြီး ယေဟောဝါ၏ဘုန်းတော် ကျိန်းဝပ်နေသည်။ ရူပါရုံတစ်ခုစီက ယေဟောဝါ၏ဘုရင်အဖြစ်အနေကိုလည်းကောင်း၊ ကိုယ်တော်၏ မြင့်မြတ်သောလုပ်ငန်းတော်လုပ်ဆောင်သူများအတွက် ကိုယ်တော်၏ကယ်တင်ခြင်းအစီအစဉ်ကိုလည်းကောင်း နားလည်သဘောပေါက်ရန် အထောက်အကူပြုသည်။—ယေဇ. ၄၃:၄၊ ၅—ဗျာ. ၂၁:၁၁; ယေဇ. ၄၇:၁၊ ၈၊ ၉၊ ၁၂—ဗျာ. ၂၂:၁-၃။

၃၃။ အဘယ်အကြောင်းအရာကို ယေဇကျေလအလေးအနက်ဖော်ပြသနည်း၊ ယခု မိမိတို့၏ဘဝအသက်တာတွင် ယေဟောဝါအားသန့်ရှင်းမြင့်မြတ်စေသူများသည် အဘယ်ရလဒ်ရမည်နည်း။

^၃၃ ယေဟောဝါသည် သန့်ရှင်းတော်မူကြောင်း ယေဇကျေလကျမ်းက အလေးအနက်တင်ပြ၏။ ယေဟောဝါ၏နာမတော် သန့်ရှင်းမြင့်မြတ်စေခြင်းသည် အခြားအရာများထက် ပို၍အရေးကြီးကြောင်းသိစေ၏။ “တစ်ပါးအမျိုးသားတို့အလယ်၌ . . . ငါ၏မဟာနာမတော်ကို ငါချီးမြှောက် [“သန့်ရှင်းမြင့်မြတ်၊” ကဘ] မည်။ . . . ငါသည် [“ယေဟောဝါ၊” ကဘ] ဖြစ်ကြောင်းကို သူတို့သိရကြလိမ့်မည်ဟု အရှင်ထာဝရဘုရားမိန့်တော်မူ၏။” ပရောဖက်ပြုချက်တွင် ဖော်ပြထားသည့်အတိုင်း ကိုယ်တော်သည် မာဂေါဂပြည်သား ဂေါဂမင်းအပါအဝင် နာမတော်ကိုမရိုသေသူအားလုံးကို ဖျက်ဆီးသုတ်သင်ခြင်းအားဖြင့် ကိုယ်တော်၏နာမတော်ကို သန့်ရှင်းမြင့်မြတ်စေမည်။ ယခုအချိန်တွင် ယေဟောဝါလက်ခံသည့် ဝတ်ပြုကိုးကွယ်မှုဖြစ်ရန် ကိုယ်တော်၏တောင်းဆိုချက်များကို ပြည့်မီခြင်းအားဖြင့် မိမိတို့၏ဘဝအသက်တာတွင် ကိုယ်တော်အားသန့်ရှင်းမြင့်မြတ်စေသူအားလုံးသည် ပညာရှိရာကျသည်။ ထိုသူတို့သည် ဗိမာန်တော်မှစီးဆင်းလာသော အသက်ရေအားဖြင့် ကုသမှုနှင့် ထာဝရအသက်ကို ရရှိကြမည်။ “ယေဟောဝါရှမ္မ” (ယေဟောဝါကိုယ်နှိုက်စံတော်ရာ) ဟုအမည်ပေးထားသော ထိုမြို့တော်သည် ဘုန်းရောင်ကွန့်မြူး၍ ကျက်သရေဂုဏ်ရောင် ထွန်းပြောင်လျက်ရှိသည်!—ယေဇ. ၃၆:၂၃; ၃၈:၁၆; ၄၈:၃၅။

[အောက်ခြေမှတ်ချက်များ]