ကျွန်ုပ်တို့၏ဆက်ကပ်အပ်နှံမှုနှင့်အညီ “နေ့စဉ်ရက်ဆက်” အသက်ရှင်ခြင်း
“ငါ၌ဆည်းကပ်လိုသောသူဖြစ်လျှင် ကိုယ်ကိုကိုယ်ငြင်းပယ်ရမည်။ ကိုယ်လက်ဝါးကပ်တိုင်ကို နေ့တိုင်းထမ်း၍ ငါ့နောက်သို့လိုက်ရမည်။”—လုကာ ၉:၂၃။
၁ ခရစ်ယာန်များအနေဖြင့် ကျွန်ုပ်တို့၏ဖြစ်မြောက်အောင်မြင်မှုကို စမ်းသပ်နိုင်သည့် နည်းတစ်နည်းကားအဘယ်နည်း။
“ကျွန်ုပ်တို့သည် အမှန်တကယ်ပင် ဆက်ကပ်အပ်နှံထားသူများဖြစ်သလော။” အမေရိကန်နိုင်ငံ၏ ၃၅ ယောက်မြောက်သမ္မတ ဂျောန် အက်ဖ်. ကနေဒီ၏အဆိုအရ ဤမေးခွန်း၏အဖြေသည် အစိုးရဝန်ထမ်းများ၏ ဖြစ်မြောက်အောင်မြင်မှုကို စမ်းသပ်ရာတွင် တစ်ချက်အပါအဝင်ဖြစ်သည်။ ခရစ်ယာန်ဓမ္မအမှုဆောင်များအဖြစ် ကျွန်ုပ်တို့၏ဖြစ်မြောက်အောင်မြင်မှုကို စမ်းသပ်ရာတွင် ဤမေးခွန်းသည် သာ၍ပင် အဓိပ္ပာယ်လေးနက်ပါလိမ့်မည်။
၂။ “ဆက်ကပ်အပ်နှံခြင်း” ကို အဘိဓာန်တစ်ခုက မည်သို့အနက်ဖွင့်ထားသနည်း။
၂ သို့သော် ဆက်ကပ်အပ်နှံခြင်းကား အဘယ်နည်း။ ဝက်ဘ်စတား၏နဝမကောလိပ်အဘိဓာန်သစ်က ယင်းကို “မြင့်မြတ်သောပုဂ္ဂိုလ်တစ်ဦးထံ သို့မဟုတ် သန့်ရှင်းမြင့်မြတ်သောအသုံးအဆောင်အတွက် ဆက်ကပ်အပ်နှံသည့် အပြုအမူ သို့မဟုတ် ထုံးတမ်း၊” “တစ်စုံတစ်ရာသောရည်ရွယ်ချက်အတွက် ဆက်သခြင်း သို့မဟုတ် သီးသန့်ထားခြင်း၊” “ကိုယ်ကျိုးစွန့်ဆည်းကပ်ကိုးကွယ်ခြင်း” ဟုအနက်ဖွင့်ဆိုထားသည်။ ဂျောန် အက်ဖ်. ကနေဒီသည် ထိုစကားလုံးကို “ကိုယ်ကျိုးစွန့်ဆည်းကပ်ကိုးကွယ်ခြင်း” ဟူသောအဓိပ္ပာယ်မျိုးဖြင့် အသုံးပြုနေပုံရှိသည်။ ခရစ်ယာန်တစ်ဦးအတွက်မူကား ဆက်ကပ်အပ်နှံခြင်းသည် ထိုထက်မက အဓိပ္ပာယ်လေးနက်ပါသည်။
၃။ ခရစ်ယာန်ဆက်ကပ်အပ်နှံခြင်းကား အဘယ်နည်း။
၃ တပည့်တော်များအား ယေရှုခရစ်တော်က ဤသို့မိန့်တော်မူသည်– “ငါ၌ဆည်းကပ်လိုသောသူဖြစ်လျှင် ကိုယ်ကိုကိုယ်ငြင်းပယ်ရမည်။ ကိုယ်လက်ဝါးကပ်တိုင်ကိုထမ်း၍ ငါ့နောက်သို့လိုက်ရမည်။” (မဿဲ ၁၆:၂၄) ဘုရားသခင်အတွက် သီးသန့်ထားခြင်းတွင် တနင်္ဂနွေနေ့၌ သို့မဟုတ် ဝတ်ပြုရာအရပ်တစ်ခု၌ ကိုးကွယ်ဝတ်ပြုခြင်းမျှမဟုတ်ပါ။ တစ်စုံတစ်ယောက်၏ ဘဝပုံစံတစ်ခုလုံးနှင့်ပတ်သက်နေသည်။ ခရစ်ယာန်တစ်ဦးဖြစ်ရန် မိမိကိုယ်ကိုငြင်းပယ်ဖို့၊ သို့မဟုတ် ယေရှုခရစ်တော်ဝတ်ပြုသော ယေဟောဝါဘုရားသခင်ကို ဝတ်ပြုရာတွင် မိမိကိုယ်ကိုငြင်းပယ်ရန်ဟူ၍အဓိပ္ပာယ်ရှိသည်။ ထို့ပြင် ခရစ်တော်၏တပည့်နောက်လိုက်ဖြစ်သောကြောင့် မည်သည့်ဒုက္ခဆင်းရဲမျိုးကိုမဆို ခံရဦးတော့ ကြံ့ကြံ့ခံခြင်းအားဖြင့် ခရစ်ယာန်တစ်ဦးသည် မိမိ၏ “နှက်တိုင်” ကိုထမ်းပါသည်။
စုံလင်သောပုံသက်သေ
၄။ ယေရှု၏နှစ်ခြင်းသည် အဘယ်အရာ၏အထိမ်းအမှတ်ဖြစ်သနည်း။
၄ ကမ္ဘာပေါ် ယေရှုရှိစဉ်က ယေဟောဝါထံဆက်ကပ်အပ်နှံခြင်း၌ အဘယ်အရာပါဝင်ကြောင်းကို ဖော်ပြတော်မူခဲ့သည်။ ကိုယ်တော်၏ စိတ်သဘောထားကား ဤသို့ဖြစ်သည်– “ကိုယ်တော်သည် ယဇ်နှင့်ပူဇော်သကာကို အလိုတော်မရှိသည်ဖြစ်၍ အကျွန်ုပ်အဖို့ ကိုယ်ခန္ဓာကို ပြင်ဆင်တော်မူပြီ။” ထပ်ဆင့်၍ ဤသို့ဆိုသည်– “(ကျမ်းစာလိပ်၌ အကျွန်ုပ်ကိုအမှတ်ပြု၍ ရေးထားသည်နှင့်အညီ) အကျွန်ုပ်သည် ကိုယ်တော်၏အလိုကို ဆောင်အံ့သောငှာ သွားပါမည်။” (ဟေဗြဲ ၁၀:၅-၇) ဆက်ကပ်အပ်နှံထားသော လူမျိုးအဝင်ဖြစ်သဖြင့် ကိုယ်တော်သည် မွေးဖွားသည်နှင့် ယေဟောဝါထံ ဆက်ကပ်အပ်နှံထားသူတစ်ဦးဖြစ်လာလေသည်။ သို့တိုင် ကိုယ်တော်၏မြေကြီးပေါ် ဓမ္မအမှုစတင်ချိန်တွင် ကိုယ်တော့်အတွက် ယေဟောဝါအလိုတော်တွင်ပါဝင်သည့် ရွေးနုတ်ဖိုးပူဇော်သကာအဖြစ် မိမိ၏အသက်ကို ဆက်သခြင်းငှာ မိမိကိုယ်ကိုအပ်နှံခြင်းအထိမ်းအမှတ်အနေနှင့် နှစ်ခြင်းယူသည်။ ဤသို့အားဖြင့် ယေဟောဝါ၏အလိုတော်သည် မည်သို့ပင်ရှိစေကာမူ ခရစ်ယာန်များပြုလုပ်ဆောင်ရွက်ရမည့်ပုံသက်သေကို ကိုယ်တော်ချမှတ်ပေးတော်မူခဲ့သည်။
၅။ ရုပ်ပစ္စည်းများအပေါ် ပုံသက်သေကောင်းသောအမြင်ကို ယေရှုမည်သို့တင်ပြသနည်း။
၅ ယေရှုနှစ်ခြင်းယူပြီးနောက် ကိုယ်တော်သည် ယဇ်ပူဇော်သကာအဖြစ်သေခြင်း၌ နိဂုံးချုပ်သည့် ဘဝလမ်းစဉ်ကို လိုက်လျှောက်တော်မူသည်။ ကိုယ်တော်သည် စီးပွားရှာခြင်း၊ သို့မဟုတ် သက်သောင့်သက်သာနေထိုင်ခြင်းကို စိတ်မဝင်စားပါ။ ယင်းအစား ကိုယ်တော်သည် ဓမ္မအမှုဆောင်ရန်အတွက်သာ အသက်ရှင်တော်မူသည်။ တပည့်တော်များအား “ဘုရားသခင်၏နိုင်ငံတော်နှင့် ဖြောင့်မတ်ခြင်းတရားတော်ကို ရှေ့ဦးစွာရှာကြ” ရန် ဩဝါဒပေးပြီး ကိုယ်တော်တိုင်လည်း ထိုစကားနှင့်အညီ အသက်ရှင်တော်မူသည်။ (မဿဲ ၆:၃၃) တစ်ကြိမ်တွင် ကိုယ်တော်က “မြေခွေးသည် မြေတွင်းရှိ၏။ မိုးကောင်းကင်၌ကျင်လည်သောငှက်သည် နားနေရာအရပ်ရှိ၏။ လူသားမူကား ခေါင်းချရာမျှမရှိ” ဟူ၍ပင်ပြောဆိုသည်။ (မဿဲ ၈:၂၀) ကိုယ်တော်သည် တပည့်နောက်လိုက်များထံမှ ငွေညှစ်ယူရန် မိမိ၏သွန်သင်ချက်များကို ပြုပြင်ဟောပြောနိုင်ပါသည်။ လက်သမားဆရာတစ်ဦးအနေနှင့်လည်း ငွေပိုရရန် အချိန်ရှာယူပြီး လက်ရာကောင်းသောပရိဘောဂတစ်ခုကို ပြုလုပ်နိုင်ပါသည်။ သို့သော် ကိုယ်တော်သည် မိမိ၏ကျွမ်းကျင်မှုများကို စီးပွားဖြစ်ဖို့အတွက် အသုံးမပြုပါ။ ဘုရားသခင်၏ ဆက်ကပ်အပ်နှံကျေးကျွန်များအနေနှင့် ကျွန်ုပ်တို့သည် ယေရှုကို အတုယူကာ ရုပ်ပစ္စည်းပေါ် အမြင်မှန်ရှိပါသလော။—မဿဲ ၆:၂၄-၃၄။
၆။ ဘုရားသခင်၏ ကိုယ်ကျိုးစွန့်၊ ဆက်ကပ်အပ်နှံထားသောကျေးကျွန်များအဖြစ် ယေရှုကို မည်သို့တုပနိုင်သနည်း။
၆ ဘုရားသခင်၏လုပ်ငန်းတော်ကို ရှေးဦးထားရာတွင် ယေရှုသည် ကိုယ်ကျိုးရှာတော်မမူချေ။ ကိုယ်တော်၏ဘဝအသက်တာဓမ္မအမှုဆောင်ချိန် သုံးနှစ်ခွဲကာလအတွင်း ကိုယ်ကျိုးစွန့်တော်မူခဲ့သည်။ အစာစားချိန်ပင်မရသည့် အလွန်အလုပ်များသော နေ့တစ်နေ့အကုန်တွင် ယေရှုသည် “ပင်ပန်းသည်ဖြစ်၍ ထိန်းသူမရှိဘဲ ပစ်ထားသောသိုးကဲ့သို့ဖြစ်” သူများကို သွန်သင်ပေးရန် အသင့်ရှိနေသေးသည်။ (မဿဲ ၉:၃၆; မာကု ၆:၃၁-၃၄) “ခရီးသွား၍ ပင်ပန်း” နေသော်လည်း ရှုခါမြို့ရှိ ယာကုပ်၏ရေတွင်းသို့ ရောက်လာသော ရှမာရိအမျိုးသမီးတစ်ဦးအား ကိုယ်တော်က စတင်စကားပြောဆိုတော်မူသည်။ (ယောဟန် ၄:၆၊ ၇၊ ၁၃-၁၅) ကိုယ်တော်သည် သူတစ်ထူး၏အရေးကို မိမိအရေးထက် အမြဲဦးစားပေးပါသည်။ (ယောဟန် ၁၁:၅-၁၅) ကျွန်ုပ်တို့လည်း ရက်ရောစွာကိုယ်ကျိုးစွန့်ကာ ဘုရားသခင်နှင့် သူတစ်ပါး၏အကျိုးကို ဆောင်ရွက်ခြင်းအားဖြင့် ယေရှုကို အတုယူနိုင်သည်။ (ယောဟန် ၆:၃၈) လိုအပ်သည့်အနည်းဆုံးအတိုင်းအတာလောက်သာ လုပ်ဆောင်မည့်အစား ဘုရားသခင်၏စိတ်တော်နှင့် မည်သို့တွေ့နိုင်မည်ကို စဉ်းစားခြင်းအားဖြင့် မိမိဆက်ကပ်အပ်နှံခြင်းနှင့်အညီ အသက်ရှင်ခြင်းမည်ပါလိမ့်မည်။
၇။ ယေဟောဝါအား အမြဲဂုဏ်တင်ရာတွင် ယေရှုကို မည်သို့တုပနိုင်သနည်း။
၇ လူများကိုကူညီပေးခြင်းအားဖြင့် မိမိကို လူတို့အာရုံစိုက်ရန် ယေရှုပြုလုပ်နေတော်မူခြင်း လုံးဝမဟုတ်ပါ။ ဘုရားသခင်၏အလိုတော်ကို ဆောင်ရွက်ရန် ကိုယ်တော်ထံ ဆက်ကပ်အပ်နှံထားတော်မူသည်။ ထို့ကြောင့် မိမိပြုလေသမျှသည် ခမည်းတော်ယေဟောဝါကို ဂုဏ်တင်ခြင်းဖြစ်စေဖို့ရန် ကိုယ်တော်အမြဲသတိပြုသည်။ အရာရှိတစ်ဦးက ကိုယ်တော်အား “ကောင်းမြတ်သောဆရာ” ဟုခေါ်ဆိုကာ “ကောင်းမြတ်သော” ဟူသောစကားလုံးကို ဂုဏ်ပုဒ်အနေနှင့် အသုံးပြုသောအခါ ယေရှုက “ဘုရားသခင်တစ်ပါးတည်းသာ ကောင်းမြတ်တော်မူ၏” ဟုမိန့်တော်မူပြီး သူ့အား ပဲ့ပြင်ပေးခဲ့သည်။ (လုကာ ၁၈:၁၈၊ ၁၉; ယောဟန် ၅:၁၉၊ ၃၀) ကျွန်ုပ်တို့သည် ယေရှုနည်းတူ မိမိအားချီးမြှောက်သည့်အခါ ယေဟောဝါကိုဂုဏ်တင်ရန် အလျင်အမြန်ပြုပါသလော။
၈။ (က) ဆက်ကပ်အပ်နှံထားသူတစ်ဦးအနေနှင့် ယေရှုသည် လောကနှင့် မည်သို့တသီးတခြားနေသနည်း။ (ခ) ကိုယ်တော်ကို ကျွန်ုပ်တို့မည်သို့တုပသင့်သနည်း။
၈ ယေရှု၏ ဆက်ကပ်အပ်နှံ မြေကြီးအသက်တာတစ်လျှောက် မိမိသည် ဘုရားသခင်၏လုပ်ငန်းတော်အတွက် မိမိကိုယ်ကို သီးသန့်ထားကြောင်း သက်သေထူခဲ့သည်။ “အဘယ်အပြစ်မျှမရှိ အညစ်အကြေးနှင့်ကင်းစင်သောသိုးသငယ်၊” ရွေးနုတ်ဖိုးပူဇော်သကာအဖြစ် ကိုယ်ကိုဆက်သနိုင်ရန် မိမိကိုယ်တိုင်ကို သန့်ရှင်းစင်ကြယ်စေတော်မူသည်။ (၁ ပေတရု ၁:၁၉; ဟေဗြဲ ၇:၂၆) မောရှေပညတ္တိကျမ်းစာ၏ ပညတ်ချက်အားလုံးကို လိုက်လျှောက်ခြင်းအားဖြင့် ထိုပညတ္တိကျမ်းကို ပြည့်စုံစေတော်မူသည်။ (မဿဲ ၅:၁၇; ၂ ကောရိန္သု ၁:၂၀) အကျင့်သီလနှင့်ဆိုင်သော မိမိ၏သွန်သင်ချက်အားလုံးကို ကိုယ်တိုင်လိုက်လျှောက်တော်မူသည်။ (မဿဲ ၅:၂၇၊ ၂၈) မကောင်းသောသဘောထားရှိသည်ဟု ကိုယ်တော်အား မည်သူမျှ မှန်ကန်စွာ မစွပ်စွဲနိုင်ပါ။ အမှန်တကယ်ပင် ကိုယ်တော်သည် “မတရားသောအမှုကို မုန်းတော်မူ၏။” (ဟေဗြဲ ၁:၉) ဘုရားသခင်၏ကျေးကျွန်များအနေနှင့် ကျွန်ုပ်တို့သည် မိမိဘဝအသက်တာနှင့် သဘောထားများကိုပင် ယေဟောဝါ၏ရှေ့တော်မှောက်တွင် သန့်ရှင်းစင်ကြယ်စေခြင်းဖြင့်ယေရှုကိုတုပကြစို့။
သတိပေးချက်ဖြစ်သော ပုံသက်သေများ
၉။ အဘယ်သတိပေးချက်ဖြစ်သောပုံသက်သေကို ပေါလုရည်ညွှန်းနေသနည်း။ ဤပုံသက်သေကို ကျွန်ုပ်တို့အဘယ်ကြောင့် သုံးသပ်သင့်သနည်း။
၉ ယေရှု၏ပုံသက်သေနှင့် ခြားနားသည့် ဣသရေလလူမျိုး၏ပုံသက်သေသည် ကျွန်ုပ်တို့အတွက်သတိပေးချက်ဖြစ်သည်။ ယေဟောဝါမှာကြားတော်မူသမျှကို လိုက်နာပါမည်ဟု သူတို့ပြောဆိုပြီးနောက်၌ပင် အလိုတော်ကို မဆောင်ရွက်ကြချေ။ (ဒံယေလ ၉:၁၁) ဣသရေလလူမျိုးအပေါ် သက်ရောက်ခဲ့သမျှသောအမှုတို့မှ သင်ခန်းစာယူရန် တမန်တော်ပေါလုသည် ခရစ်ယာန်များအား တိုက်တွန်းခဲ့သည်။ ကောရိန္သုအသင်းသားများထံ ပေါလုရေးသည့် ပထမစာစောင်တွင်ပါသော အဖြစ်အပျက်အချို့ကို စစ်ဆေးကြည့်ပြီး ကျွန်ုပ်တို့ခေတ်တွင် ဆက်ကပ်အပ်နှံထားသော ဘုရားသခင့်ကျေးကျွန်များသည် အဘယ်ထောင်ချောက်များကို ရှောင်ကြဉ်ရမည်ကိုကြည့်ကြစို့။—၁ ကောရိန္သု ၁၀:၁-၆၊ ၁၁။
၁၀။ (က) ဣသရေလလူမျိုးသည် အဘယ်နည်းဖြင့် ‘မကောင်းသောအရာတို့ကိုတပ်မက်’ ခဲ့သနည်း။ (ခ) အစားအသောက်နှင့်ပတ်သက်၍ ဒုတိယအကြိမ်မြည်တမ်းသည့်အခါ ဣသရေလလူမျိုးသည် အဘယ်ကြောင့်ပိုတာဝန်ကြီးသနည်း။ သတိပေးချက်ဖြစ်သော ဤပုံသက်သေမှ အဘယ်သင်ခန်းစာရနိုင်သနည်း။
၁၀ ဦးဆုံး၊ ‘မကောင်းသောအရာတို့ကို မတပ်မက်’ ရန်ပေါလုသတိပေးသည်။ (၁ ကောရိန္သု ၁၀:၆) ယင်းစကားများက မန္နမုန့်သာစားနေရကြောင်း ဣသရေလလူမျိုးတို့ ညည်းညူခဲ့သည့်အချိန်ကို သင့်အား သတိရစေမည်။ သူတို့အား ငုံးငှက်များကို ယေဟောဝါချပေးတော်မူသည်။ တစ်နှစ်ခန့်က သိမ်တောအရပ်၌ ဣသရေလလူမျိုးများ ယေဟောဝါထံဆက်ကပ်အပ်နှံကြောင်း အလေးအနက်မပြောဆိုမီလေးတွင် ထပ်တူအဖြစ်မျိုး ဖြစ်ပျက်ခဲ့သည်။ (ထွက်မြောက်ရာ ၁၆:၁-၃၊ ၁၂၊ ၁၃) သို့သော် အခြေအနေက တထေရာတည်းမဟုတ်ပါ။ ငုံးငှက်များကို ယေဟောဝါပထမအကြိမ်ပေးစဉ်က ဣသရေလလူမျိုးများ၏မြည်တမ်းခြင်းကို ကိုယ်တော်အရေးမယူခဲ့ပါ။ သို့သော် ဤတစ်ကြိမ်တွင် အခြေအနေက ထူးခြားသည်။ “ငုံးသားကိုကိုက်၍မဝါးမီ ထာဝရဘုရားသည် သူတို့ကို အမျက်တော်ထွက်၍ အလွန်ပြင်းသောဘေးနှင့် ဒဏ်ခတ်တော်မူ၏။” (တောလည်ရာ ၁၁:၄-၆၊ ၃၁-၃၄) ဘာပြောင်းလဲသွားသနည်း။ ဆက်ကပ်အပ်နှံလူမျိုးတစ်မျိုးအနေနှင့် ယခုသူတို့သည် ကိုယ်တော်နှင့် စာရင်းရှင်းရန်လိုသည်။ ယေဟောဝါမိန့်တော်မူသမျှကို ပြုပါမည်ဟု ကတိထားခဲ့လျက်ပင် ယေဟောဝါ၏ပြင်ဆင်ချက်များအတွက် သူတို့ကျေးဇူးတင်စိတ်မရှိသောကြောင့် ကိုယ်တော်ကိုအပြစ်တင် ပြောဆိုကြခြင်းပင်တည်း! ယေဟောဝါ၏စားပွဲတော်ကို ယနေ့အပြစ်တင်ပြောဆိုခြင်းသည်လည်း ထပ်တူထပ်မျှဖြစ်သည်။ “သစ္စာနှင့်သတိပညာရှိသောကျွန်” ထံမှလာသော ယေဟောဝါ၏ ဝိညာဏပြင်ဆင်ချက်များကို အချို့တန်ဖိုးမထားကြပါ။ (မဿဲ ၂၄:၄၅-၄၇၊ သမ) ကျွန်ုပ်တို့အတွက် ယေဟောဝါပြုတော်မူခဲ့သမျှကို ကျေးဇူးတင်ကာ ကိုယ်တော်ပေးသော ဝိညာဉ်အစာကိုခံယူရန် ကျွန်ုပ်တို့၏ဆက်ကပ်အပ်နှံခြင်းက တောင်းဆိုကြောင်းသတိရပါ။
၁၁။ (က) ဣသရေလလူမျိုးသည် ယေဟောဝါအားဝတ်ပြုခြင်းကို ရုပ်ပုံကိုးကွယ်မှုနှင့် မည်သို့ရောနှောခဲ့ကြသနည်း။ (ခ) ရုပ်ပုံကိုးကွယ်မှုတစ်မျိုးကို ကျွန်ုပ်တို့မည်သို့နှစ်သက်သွားနိုင်သနည်း။
၁၁ တစ်ဖန် ပေါလုက ဤသို့သတိပေးသည်– “ထိုသူအချို့တို့ . . . ကိုးကွယ်သကဲ့သို့ မကိုးကွယ်ကြနှင့်။” (၁ ကောရိန္သု ၁၀:၈) ဤစကားသည် သိနာတောင်၌ ယေဟောဝါနှင့်ပဋိညာဉ်ဖွဲ့ပြီးပြီးချင်း ဣသရေလလူမျိုးပြုခဲ့သော နွားကိုးကွယ်မှုကို တမန်တော်ရည်ညွှန်းနေကြောင်း ထင်ရှားသည်။ ‘ဆက်ကပ်အပ်နှံ ယေဟောဝါ၏ကျေးကျွန်တစ်ယောက်အနေနှင့် အကျွန်ုပ်သည် ရုပ်ပုံကိုးကွယ်ခြင်း၌ ဘယ်တော့မျှပါဝင်မည်မဟုတ်’ ဟု အသင်ဆိုကောင်းဆိုမည်။ သို့ရာတွင် ဣသရေလလူမျိုး၏ရှုထောင့်မှ သူတို့သည် ယေဟောဝါကို ဝတ်ပြုခြင်းမှမရပ်စဲခဲ့သော်လည်း ဘုရားသခင်စက်ဆုပ်ရွံရှာသည့် နွားကိုးကွယ်မှုကို သူတို့စတင်ခဲ့ကြောင်း သတိပြုပါ။ ဤသို့သောဝတ်ပြုမှု၌ အဘယ်အရာပါဝင်သနည်း။ လူတို့သည် နွားရုပ်အရှေ့တွင် ယဇ်ပူဇော်ကြပြီး “စားသောက်လျက်ထိုင်နေကြ၏။ နောက်တစ်ဖန် ကခုန်မြူးထူးခြင်းငှာ ထကြ၏။” (ထွက်မြောက်ရာ ၃၂:၄-၆) ယနေ့ လူအချို့က ယေဟောဝါကိုကိုးကွယ်ပါသည်ဟု ဆိုကောင်းဆိုမည်။ သို့သော် သူတို့၏အသက်တာကို ယေဟောဝါအားဝတ်ပြုခြင်းပေါ်တွင်မဟုတ်ဘဲ လောကစည်းစိမ်အပေါ် အခြေစိုက်ထားပြီး စည်းစိမ်ခံစားရင်း ယေဟောဝါ၏အမှုတော်ကို ထမ်းဆောင်ရန် ကြိုးစားကြသည်။ မှန်ပါသည်၊ ဤသို့ပြုမူခြင်းက ရွှေနွားရုပ်ရှေ့ဦးချဝတ်ပြုခြင်းတမျှ လွန်ကဲသည်မဟုတ်သော်လည်း သဘောတရားအရဆိုလျှင် မထူးခြားပါ။ မိမိလိုအင်ဆန္ဒကို ဘုရားတစ်ဆူအဖြစ် တင်မြှောက်ထားခြင်းသည် ယေဟောဝါထံ ဆက်ကပ်အပ်နှံခြင်းနှင့် လျော်ညီစွာအသက်ရှင်ခြင်းလုံးဝမဟုတ်ပေ။—ဖိလိပ္ပိ ၃:၁၉။
၁၂။ ဗာလပေဂုရဘုရားနှင့်ပတ်သက်သည့် ဣသရေလလူမျိုး၏တွေ့ကြုံမှုမှ မိမိကိုယ်ကိုငြင်းပယ်ခြင်းနှင့်ပတ်သက်၍ ကျွန်ုပ်တို့အဘယ်သင်ခန်းစာရသနည်း။
၁၂ ပေါလု၏နောက်ထပ်သတိပေးချက်တွင် ဖျော်ဖြေနည်းတစ်မျိုးလည်း ပါဝင်သည်။ “ထိုသူအချို့တို့သည် မတရားသောမေထုန်အမှုကိုပြု၍ တစ်နေ့ခြင်းတွင် လူနှစ်သောင်းသုံးထောင်လဲ၍ သေသကဲ့သို့မပြုဘဲ မတရားသောမေထုန်ကို ရှောင်ကြကုန်အံ့။” (၁ ကောရိန္သု ၁၀:၈) ရှိတ္တိမ်အရပ်၌ မောဘမိန်းမတို့၏ သွေးဆောင်မှုကို ဣသရေလလူမျိုးခံခဲ့ပြီး မှားယွင်းစွာပျော်ပါးလျက် ဗာလပေဂုရဘုရားကို ကိုးကွယ်ကြလေသည်။ (တောလည်ရာ ၂၅:၁-၃၊ ၉) ယေဟောဝါ၏အလိုတော်ကိုဆောင်ရွက်ရန် မိမိကိုယ်ကိုငြင်းပယ်ခြင်းတွင် သန့်ရှင်းသောအကျင့်သီလဆိုင်ရာ ကိုယ်တော်၏စံနှုန်းများကို လက်ခံခြင်းပါဝင်သည်။ (မဿဲ ၅:၂၇-၃၀) ပျက်စီးယိုယွင်းနေသောစံနှုန်းများရှိနေသည့် ဤခေတ်သမယတွင် အကောင်းနှင့်အဆိုးကိုဆုံးဖြတ်ရန် ယေဟောဝါ၏အခွင့်အာဏာကို လက်အောက်ခံပြီး စာရိတ္တယိုယွင်းမှုအမျိုးမျိုးမှ ကင်းစင်ဖို့လိုကြောင်း ကျွန်ုပ်တို့သတိပေးခံရသည်။—၁ ကောရိန္သု ၆:၉-၁၁။
၁၃။ ယေဟောဝါထံဆက်ကပ်အပ်နှံခြင်းတွင် အဘယ်အရာများပါဝင်ကြောင်းကို နားလည်ရန် ဖိနဟတ်၏ပုံသက်သေက မည်သို့အကူအညီပေးသနည်း။
၁၃ ရှိတ္တိမ်အရပ်တွင် မတရားမေထုန်ကျော့ကွင်းထဲ လူများစွာ ကျဆင်းခဲ့သော်လည်း အချို့တို့က လူမျိုးလိုက် ယေဟောဝါထံ ဆက်ကပ်အပ်နှံထားချက်နှင့်လိုက်ဖက်အောင် နေထိုင်ကြသည်။ ဤသူတို့တွင် ဖိနဟတ်သည် ထူးခြားသောဇွဲရှိသူဖြစ်သည်။ ဣသရေလအကဲအမှူးတစ်ဦးသည် မိဒျန်မိန်းမတစ်ယောက်အား သူ၏တဲထဲသို့ ခေါ်ဆောင်သွားသည်ကို ဖိနဟတ်မြင်သောအခါ သူသည် လှံကိုကိုင်၍ သူတို့အား ထုတ်ချင်းခပ်အောင်ထိုးလေသည်။ ယေဟောဝါက မောရှေအား ဤသို့မိန့်တော်မူသည်– “ဖိနဟတ်သည် . . . ဣသရေလအမျိုးသားတို့အလယ်တွင် ငါ့အားဂုဏ်ပြိုင်ခြင်းကို လုံးဝသည်းညည်းမခံသောကြောင့် ငါ့အမျက်ကို သူတို့မှလွှဲစေပြီ။ သို့ဖြစ်၍ အကြွင်းမဲ့စိတ်နှလုံးဖြင့်ဆည်းကပ်ဝတ်ပြုခြင်းကို ကြပ်တည်းစွာပြုစေလိုသောကြောင့် ဣသရေလအမျိုးသားတို့ကို ငါသည် မဖျက်ဆီး။” (တောလည်ရာ ၂၅:၁၁၊ ကဘ) ဆက်ကပ်အပ်နှံခြင်းအဓိပ္ပာယ်မှာ ယေဟောဝါနှင့်ဂုဏ်ပြိုင်ခြင်းကို လုံးဝသည်းညည်းမခံခြင်းဖြစ်သည်။ ကျွန်ုပ်တို့နှလုံးတွင် ရှိသင့်ရှိအပ်သည့် ယေဟောဝါထံဆက်ကပ်အပ်နှံခြင်းမှအပ အခြားအဘယ်အရာကိုမျှ အစားမထိုးနိုင်ပါ။ အသင်းတော်ကို သန့်ရှင်းစင်ကြယ်စွာရှိစေရန် ကြီးလေးသော စာရိတ္တပျက်ပြားမှုကို ခွင့်မပြုဘဲ အကြီးအကဲများအား တိုင်ကြားရန် ယေဟောဝါဘက် ကျွန်ုပ်တို့၏အားကြီးသောစိတ်က တိုက်တွန်းပေးသည်။
၁၄။ (က) ဣသရေလလူမျိုးသည် ယေဟောဝါကို မည်သို့စုံစမ်းနှောင့်ယှက်ကြသနည်း။ (ခ) ယေဟောဝါထံ လုံးလုံးလျားလျားဆက်ကပ်အပ်နှံခြင်းက “အားမလျော့၊ စိတ်မပျက်” ရန်မည်သို့အကူအညီပေးသနည်း။
၁၄ သတိပေးချက်ဖြစ်သော အခြားပုံသက်သေတစ်ခုကို ပေါလုဖော်ပြသေးသည်– “ထိုသူအချို့တို့သည် ယေဟောဝါအား စုံစမ်းနှောင့်ယှက်ခြင်းကိုပြု၍ မြွေဖြင့်ပျက်စီးသကဲ့သို့ ငါတို့သည် မစုံစမ်းမနှောင့်ယှက်ဘဲ နေကြကုန်အံ့။” (၁ ကောရိန္သု ၁၀:၉၊ ကဘ) ယင်းတွင် “အသွားခက်သောကြောင့် လူများတို့သည် စိတ်အားလျော့ကြ” ပြီးဘုရားသခင်ကိုဆန့်ကျင်ဘက်ပြုကာ မောရှေထံ၌ ဣသရေလလူမျိုးများညည်းညူခဲ့ချိန်ကို ပေါလုရည်ညွှန်းနေခြင်းဖြစ်သည်။ (တောလည်ရာ ၂၁:၄) ထိုအမှားမျိုးကို တစ်ချိန်က သင်ပြုဖူးသလော။ သင့်ကိုသင် ယေဟောဝါထံဆက်ကပ်အပ်နှံခဲ့ချိန်က အာမဂေဒုန်သည် လက်တစ်ကမ်းသာလိုတော့သည်ဟု ယူမှတ်ခဲ့သလော။ ယေဟောဝါသည် သင်ထင်သည်ထက် ကြာမြင့်စွာစိတ်ရှည်နေပါသလော။ တစ်စုံတစ်ရာသောအချိန်အထိသာ၊ သို့မဟုတ် အာမဂေဒုန်တိုင်သည့်အထိသာ ယေဟောဝါထံ မိမိကိုယ်ကိုဆက်ကပ်အပ်နှံထားသည်မဟုတ်ကြောင်းကို သတိရပါ။ ကျွန်ုပ်တို့၏ဆက်ကပ်အပ်နှံမှုသည် အစဉ်ထာဝရအတွက်ဖြစ်သည်။ ထို့ကြောင့် “ငါတို့သည် အားမလျော့၊ စိတ်မပျက်ဘဲ ကောင်းသောအကျင့်ကိုကျင့်ကြကုန်အံ့။ ထိုသို့တည်ကြည်၍ကျင့်လျှင် အချိန်တန်သောကာလ၌ အသီးအနှံကို ရိတ်ရကြလိမ့်မည်။”—ဂလာတိ ၆:၉။
၁၅။ (က) ဣသရေလလူမျိုးသည် မည်သူ့ကိုဆန့်ကျင်၍မြည်တမ်းခဲ့သနည်း။ (ခ) ယေဟောဝါထံ ကျွန်ုပ်တို့၏ဆက်ကပ်အပ်နှံမှုက သီအိုကရက်တစ်အခွင့်အာဏာကို ရိုသေလေးစားရန် မည်သို့တိုက်တွန်းသနည်း။
၁၅ အဆုံးတွင် ပေါလုက ယေဟောဝါခန့်အပ်ထားသောကျေးကျွန်ကို ဆန့်ကျင်၍ ‘မြည်တမ်းသူများ’ အကြောင်း သတိပေးသည်။ (၁ ကောရိန္သု ၁၀:၁၀) ခါနာန်ပြည်ကို စုံစမ်းကြည့်ရှုရန် စေလွှတ်ခံရသူ ၁၂ ဦးအနက် ၁၀ ဦးက မကောင်းသောသတင်းပြန်ပြောပြသည့်အခါ ဣသရေလလူမျိုးသည် မောရှေနှင့်အာရုန်အပေါ် အပြင်းအထန်မြည်တမ်းခြင်းကိုပြုကြသည်။ သူတို့၏ခေါင်းဆောင်မောရှေနေရာတွင် အခြားသူကိုအစားထိုးပြီး အီဂျစ်ပြည်သို့ ပြန်သွားမည်ဟူ၍ပင် ဆွေးနွေးကြသည်။ (တောလည်ရာ ၁၄:၁-၄) ယနေ့ ယေဟောဝါ၏သန့်ရှင်းသောဝိညာဉ်တော်ညွှန်ကြားမှုအတိုင်း ရရှိထားသောဦးစီးမှုကို ကျွန်ုပ်တို့လက်ခံထားပါသလော။ သစ္စာနှင့်သတိပညာရှိသောကျွန် ရက်ရောစွာပြင်ဆင်ထားသည့် ဝိညာဏစားပွဲကိုထောက်ရှုလျှင် ‘အချိန်တန်အစာ’ ကိုဝေဖန်ပေးရန် ယေရှုသည် မည်သူအားအသုံးပြုနေကြောင်း သိသာထင်ရှားပါသည်။ (မဿဲ ၂၄:၄၅) ယေဟောဝါထံ မိမိကိုယ်ကို စိုးလ်အကြွင်းမဲ့ဆက်ကပ်အပ်နှံခြင်းက ကိုယ်တော်၏ ခန့်အပ်ခံကျေးကျွန်များကို ရိုသေလေးစားရန် တောင်းဆိုသည်။ တစ်နည်းအားဖြင့် ခေါင်းဆောင်အသစ်နောက်လိုက်ပြီး လောကထဲပြန်ရောက်သွားသော မျက်မှောက်ခေတ်မြည်တမ်းသူအချို့ကဲ့သို့ မိမိကိုယ်ကို ဘယ်သောအခါမျှ မဖြစ်စေပါနှင့်။
ယင်းသည် ကျွန်ုပ်၏အတတ်နိုင်ဆုံးလော
၁၆။ ဘုရားသခင်၏ ဆက်ကပ်အပ်နှံကျေးကျွန်များသည် မိမိကိုယ်ကို အဘယ်မေးခွန်းများ မေးလိုကြမည်နည်း။
၁၆ ဣသရေလလူမျိုးသည် မိမိတို့ကိုယ်ကို ယေဟောဝါထံ ခြွင်းချက်မရှိ ဆက်ကပ်အပ်နှံထားကြောင်းကို သတိရခဲ့မည်ဆိုလျှင် ဤမျှကြီးမားသောအပြစ်များကို သူတို့ပြုခဲ့ကြမည်မဟုတ်ပါ။ ထိုယုံကြည်ခြင်းမရှိသောဣသရေလလူမျိုးတို့နှင့်မတူဘဲ ယေရှုခရစ်သည် ကိုယ်တော်၏ဆက်ကပ်အပ်နှံခြင်းနှင်လျော်ညီစွာ အဆုံးတိုင်အသက်ရှင်နေထိုင်ခဲ့သည်။ ခရစ်တော်၏တပည့်နောက်လိုက်များအဖြစ် ကျွန်ုပ်တို့သည် ကိုယ်တော်၏စိုးလ်အကြွင်းမဲ့ဆည်းကပ်ဝတ်ပြုသောပုံသက်သေကို တုပသည့်အနေနှင့် “နောက်တစ်ဖန် သူတို့၏တပ်မက်ခြင်းတရားကိုမကျင့်၊ ဘုရားသခင်၏အလိုတော်အတိုင်းကျင့်လျက်” အသက်ရှင်ကြသည်။ (၁ ပေတရု ၄:၂; ၂ ကောရိန္သု ၅:၁၅ နှိုင်းယှဉ်။) ယနေ့ ယေဟောဝါ၏အလိုတော်မှာ “လူအပေါင်းတို့သည် ကယ်တင်ခြင်းသို့ရောက်၍ သမ္မာတရားကိုသိစေခြင်းငှာ” ဖြစ်သည်။ (၁ တိမောသေ ၂:၄) ယင်းကြောင့် အဆုံးမတိုင်မီ ဘုရားသခင်၏ ‘နိုင်ငံတော်နှင့်ယှဉ်သောသတင်းကောင်း’ ကိုကျွန်ုပ်တို့ဟောပြောရမည်ဖြစ်သည်။ (မဿဲ ၂၄:၁၄) ဤလုပ်ငန်းတွင် ကျွန်ုပ်တို့မည်မျှကြိုးစားပါဝင်သနည်း။ ‘အကျွန်ုပ်အတတ်နိုင်ဆုံး ပါဝင်သလော’ ဟုမိမိကိုယ်ကို မေးလိုပေမည်။ (၂ တိမောသေ ၂:၁၅) တစ်ယောက်နှင့်တစ်ယောက် အခြေအနေတူမည်မဟုတ်။ ယေဟောဝါသည် “မတတ်နိုင်သောအမှုကိုမထောက်ဘဲ တတ်နိုင်သောအမှုကိုထောက်၍” ကိုယ်တော်အားဝတ်ပြုခြင်းကို နှစ်သက်တော်မူသည်။ (၂ ကောရိန္သု ၈:၁၂; လုကာ ၂၁:၁-၄) မည်သူမျှ အခြားတစ်ဦး၏ ဆက်ကပ်အပ်နှံခြင်းအတိမ်အနက်ကိုလည်းကောင်း၊ စိတ်ရင်းမှန်သည့်သဘောကိုလည်းကောင်း မစီရင်သင့်ပါ။ မိမိကိုယ်တိုင်၏ ယေဟောဝါအားဆည်းကပ်ကိုးကွယ်ခြင်း အတိုင်းအတာကို တစ်ဦးချင်းစီအနေနှင့် ကိုယ်တိုင်အကဲဖြတ်သင့်သည်။ (ဂလာတိ ၆:၄) ယေဟောဝါကို ကျွန်ုပ်တို့၏ချစ်မြတ်နိုးခြင်းက ‘ယေဟောဝါအား အကျွန်ုပ်မည်သို့ပျော်ရွှင်စေနိုင်မည်နည်း’ ဟုမိမိကိုယ်ကို မေးမြန်းရန် လှုံ့ဆော်စေသင့်သည်။
၁၇။ ဆည်းကပ်ဝတ်ပြုမှုနှင့် တန်ဖိုးထားလေးမြတ်မှုသည် မည်သို့ဆက်စပ်နေသနည်း။ ဥပမာပေးပါ။
၁၇ ယေဟောဝါကို တန်ဖိုးထားလေးမြတ်မှု တိုးပွားလာလေ ကိုယ်တော်အားဆည်းကပ်ဝတ်ပြုမှုသည် ပိုမိုနက်ရှိုင်းလာလေဖြစ်သည်။ ဂျပန်ပြည်တွင် ၁၄ နှစ်သားတစ်ဦးသည် ယေဟောဝါထံ မိမိကိုယ်ကိုဆက်ကပ်အပ်နှံပြီး ယင်းကို ရေတွင်နှစ်ခြင်းယူခြင်းအားဖြင့် တင်ပြခဲ့သည်။ နောက်ပိုင်းတွင် သူသည် အဆင့်မြင့်ပညာကိုဆည်းပူးကာ သိပ္ပံပညာရှင်တစ်ဦးဖြစ်ချင်လာသည်။ အချိန်ပြည့်ဓမ္မအမှုဆောင်ရန် သူတစ်ခါမျှမစဉ်းစားခဲ့သော်လည်း ဆက်ကပ်အပ်နှံကျေးကျွန်တစ်ဦးအနေနှင့် သူသည် ယေဟောဝါကိုလည်းကောင်း၊ ကိုယ်တော်၏မျက်မြင်ရအဖွဲ့အစည်းကိုလည်းကောင်း မစွန့်လွှတ်လိုပါ။ သူရွေးချယ်သော အသက်မွေးဝမ်းကျောင်းပန်းတိုင်ရောက်ရန် တက္ကသိုလ်ကျောင်းတက်ခဲ့သည်။ ထိုတွင် တက္ကသိုလ်ဘွဲ့ရသူများသည် သူတို့၏ကုမ္ပဏီများ၊ သို့မဟုတ် လေ့လာမှုများတွင် ဘဝကိုမြှုပ်နှံရန် တိုက်တွန်းခံရကြောင်း သူတွေ့ရှိသည်။ ထိုအခါသူက ‘ငါဘာလုပ်နေတာလဲ၊ သူတို့ဘဝပုံစံမျိုးကိုလိုက်ပြီး လောကီအလုပ်မှာ ကိုယ်ကိုနှစ်မြှုပ်နိုင်သလား။ ကိုယ့်ကိုယ်ကို ယေဟောဝါဆီအပ်နှံပြီးပြီမဟုတ်လား’ ဟုတွေးတောလေသည်။ ပြန်လည်သစ်လန်းသော တန်ဖိုးထားလေးမြတ်မှုဖြင့် သူသည် မှန်မှန်ရှေ့ဆောင်တစ်ဦး ဖြစ်လာသည်။ သူ၏ဆက်ကပ်အပ်နှံမှုကို သူပိုမိုသဘောပေါက်နားလည်လာပြီး သူ၏အကူအညီကိုလိုအပ်သော အဘယ်နေရာသို့မဆိုသွားရန် စိတ်ဆုံးဖြတ်ဖို့ တိုက်တွန်းခံရသည်။ ဓမ္မအမှုထမ်းသင်တန်းကျောင်းကို သူတက်ရောက်ပြီးနောက် တိုင်းတစ်ပါးတွင် သာသနာပြုအဖြစ် အမှုထမ်းရန်တာဝန်ကို သူရရှိလေသည်။
၁၈။ (က) ယေဟောဝါထံ မိမိကိုယ်ကိုဆက်ကပ်အပ်နှံခြင်းတွင် မည်မျှပါဝင်သနည်း။ (ခ) ယေဟောဝါထံ ဆက်ကပ်အပ်နှံခြင်းမှ အဘယ်အကျိုးကျေးဇူး ခံစားနိုင်သနည်း။
၁၈ ဆက်ကပ်အပ်နှံခြင်းသည် ကျွန်ုပ်တို့၏ဘဝအသက်တာတစ်ခုလုံးနှင့်ဆိုင်သည်။ ကျွန်ုပ်တို့သည် မိမိကိုယ်ကိုငြင်းပယ်ရမည်။ ထို့နောက် “နေ့စဉ်ရက်ဆက်” ယေရှု၏ကောင်းမြတ်သောပုံသက်သေကို တုပရမည်။ (လုကာ ၉:၂၃၊ ကဘ) မိမိကိုယ်ကို ငြင်းပယ်ခဲ့ပြီဖြစ်သောကြောင့် အလုပ်ပျက်ကွက်ရန် ခွင့်ပြုဖို့ ယေဟောဝါအားတောင်းဆိုမည်မဟုတ်ပါ။ ယေဟောဝါ၏ကျေးကျွန်များအတွက် ကိုယ်တော်ချမှတ်ပေးထားတော်မူသော စည်းမျဉ်းမူများနှင့်အညီ ကျွန်ုပ်တို့အသက်ရှင်ရမည်။ ကိုယ်ပိုင်ရွေးချယ်မှုပြုလုပ်နိုင်သည့်ကဏ္ဍများတွင်ပင် မိမိသည် ယေဟောဝါထံဆက်ကပ်အပ်နှံထားသူပီပီ အတတ်နိုင်ဆုံး ကြိုးစားလုပ်ကိုင်နေမနေ စစ်ဆေးကြည့်ရန် ကောင်းပေသည်။ အလိုတော်နှင့်တွေ့ဖို့ အတတ်နိုင်ဆုံးကြိုးစားပြီး ကိုယ်တော်အား နေ့စဉ်ရက်ဆက် ဝတ်ပြုကြစဉ် ကျွန်ုပ်တို့သည် ဖြစ်မြောက်အောင်မြင်သောခရစ်ယာန်များဖြစ်လာကြပြီး ကျွန်ုပ်တို့၏စိုးလ်အကြွင်းမဲ့ ဆည်းကပ်ဝတ်ပြုမှုကိုရထိုက်သောအရှင် ယေဟောဝါ၏မျက်နှာသာနှင့်တွေ့ခြင်း ကောင်းချီးမင်္ဂလာကို ခံစားရကြလိမ့်မည်။
သင်ရှင်းပြနိုင်သလော
◻ ယေရှုခရစ်အတွက် ဆက်ကပ်အပ်နှံခြင်းတွင် အဘယ်အရာပါဝင်သနည်း။
◻ ယေဟောဝါကိုဆန့်ကျင်ပြီး မြည်တမ်းခြင်းကို ကျွန်ုပ်တို့အဘယ်ကြောင့်ရှောင်ကြဉ်သင့်သနည်း။
◻ ကျွန်ုပ်တို့အသက်တာတွင် ရုပ်ပုံကိုးကွယ်မှု မသိမသာဝင်လာခြင်းကို အဘယ်နည်းဖြင့် ရှောင်ကြဉ်နိုင်သနည်း။
◻ အဘယ်အရာကိုသတိရမည်ဆိုလျှင် ဘုရားသခင်၏အလိုတော်ကိုဆောင်ရွက်ရာတွင် ‘စိတ်အားမလျော့’ ရန်အကူအညီရမည်နည်း။
[စာမျက်နှာ ၁၇ ပါ ရုပ်ပုံ]
ဆက်ကပ်အပ်နှံထားသောခရစ်ယာန်များသည် “အားမလျော့၊ စိတ်မပျက်ဘဲ ကောင်းသောအကျင့်ကိုကျင့်ကြ” သည်