အခန်း ဆယ့်နှစ်

ဘုရားသခင့် လူမျိုးတော်အတွက် နှစ်သိမ့်မှု

ဟေရှာယ ၅၁:၁–၂၃

၁။ ယေရုရှလင်မြို့နှင့် မြို့သူမြို့သားများအတွက် အဘယ် စိတ်ပျက်ဖွယ် အလားအလာ ရှိသနည်း၊ သို့သော် အဘယ် မျှော်လင့်ချက် ရှိသနည်း။

ယုဒလူမျိုး ဗာဗုလုန်တွင် သုံ့ပန်းအဖြစ် ကြာမည့်အချိန်မှာ အနှစ် ခုနစ်ဆယ်—ပျမ်းမျှ လူ့သက်တမ်းတစ်ခု—ဖြစ်သည်။ (ဆာလံ ၉၀:၁၀; ယေရမိ ၂၅:၁၁; ၂၉:၁၀) သုံ့ပန်းအဖြစ် ခေါ်ဆောင်ခံခဲ့ရသော ဣသရေလ အများစုသည် ဗာဗုလုန်တွင် အသက်ကြီးပြီး သေဆုံးကြမည်။ သူတို့၏ ရန်သူများ သူတို့ကို ကဲ့ရဲ့ပြောင်လှောင်ခြင်းဖြင့် မည်မျှ အရှက်ခွဲခံရမည့်အဖြစ်ကို တွေးကြည့်ပါ။ သူတို့၏ ဘုရားသခင်၊ ယေဟောဝါ၏ နာမဖြင့် သမုတ်ခဲ့သော မြို့တော်သည် နှစ်ပေါင်းများစွာ လူဆိတ်ညံနေချိန်အတွင်း ကိုယ်တော့်ကိုလည်း ကဲ့ရဲ့ပြစ်တင်ကြမည်ကို စဉ်းစားကြည့်ပါ။ (နေဟမိ ၁:၉; ဆာလံ ၁၃၂:၁၃; ၁၃၇:၁-၃) ရှောလမုန် အပ်နှံပွဲ ပြုလုပ်ချိန်က ဘုရားသခင့် ဘုန်းတော်နှင့် ပြည့်ခဲ့သော ချစ်မြတ်နိုးရသည့် ဗိမာန်တော်လည်း မရှိတော့ပါ။ (၂ ရာဇဝင်ချုပ် ၇:၁-၃) စိတ်ပျက်စရာ အလားအလာပါတကား! သို့သော် ယေဟောဝါသည် ဟေရှာယမှတစ်ဆင့် ပြန်လည်တည်ထောင်ခြင်းအကြောင်း ပရောဖက်ပြုတော်မူ၏။ (ဟေရှာယ ၄၃:၁၄; ၄၄:၂၆-၂၈) ဤအကြောင်းအရာနှင့်ပတ်သက်သော နှစ်သိမ့်မှုနှင့် အာမခံချက်များဆိုင်ရာ ထပ်ဆင့် ပရောဖက်ပြုချက်များကို ဟေရှာယ အခန်းကြီး ၅၁ တွင် ထပ်မံ တွေ့ရှိရသည်။

၂။ (က) ယေဟောဝါသည် ဟေရှာယမှတစ်ဆင့် နှစ်သိမ့်မှု ပေးသော သတင်းစကားကို မည်သူတို့အား ပေးသနည်း။ (ခ) သစ္စာရှိ ဂျူးများသည် မည်သို့ “ဖြောင့်မတ်ခြင်းတရားသို့ လိုက်” ကြသနည်း။

^၂ ယေဟောဝါထံတော်သို့ စိတ်တိမ်းညွှတ်သော ယုဒလူများကို ကိုယ်တော် ဤသို့ မိန့်တော်မူ၏– “ဖြောင့်မတ်ခြင်းတရားသို့ လိုက်၍ ထာဝရဘုရားကို ရှာသောသူတို့ ငါ့စကားကို နားထောင်ကြလော့။” (ဟေရှာယ ၅၁:၁က) “ဖြောင့်မတ်ခြင်းတရားသို့ လိုက်” ခြင်းတွင် လုပ်ဆောင်မှု ပါဝင်ပတ်သက်သည်။ “ဖြောင့်မတ်ခြင်းတရား လိုက်” သူသည် ဘုရားသခင့် လူမျိုးတော်အဝင် ဖြစ်သည်ဟု ပြောရုံပြုမည် မဟုတ်ပါ။ သူတို့သည် ဖြောင့်မတ်ရန်နှင့် ဘုရားသခင့် အလိုတော်နှင့်အညီ နေထိုင်ရန် ဇွဲဖြင့် ကြိုးစားကြမည် ဖြစ်သည်။ (ဆာလံ ၃၄:၁၅; သုတ္တံ ၂၁:၂၁) သူတို့သည် ယေဟောဝါ တစ်ပါးတည်းကိုသာ ဖြောင့်မတ်ခြင်း၏ မူလအမြစ်အဖြစ် မျှော်ကိုးပြီး ‘ယေဟောဝါကို ရှာ’ မည် ဖြစ်သည်။ (ဆာလံ ၁၁:၇; ၁၄၅:၁၇) သူတို့သည် ယေဟောဝါ မည်သူ ဖြစ်ကြောင်း၊ ကိုယ်တော်ထံ မည်သို့ ဆုတောင်းချဉ်းကပ်နိုင်ကြောင်း မသိကြသေးဟု မဆိုလိုပါ။ ယင်းအစား သူတို့သည် ကိုယ်တော့်ထံ ချဉ်းကပ်ရန်၊ ကိုယ်တော်ကို ဝတ်ပြုကိုးကွယ်ရန်၊ ကိုယ်တော့်ထံ ဆုတောင်းရန်နှင့် သူတို့ လုပ်ဆောင်မှုအားလုံးကို ကိုယ်တော့် ညွှန်ကြားချက်အတိုင်း လုပ်ဆောင်ရန် ကြိုးစားကြမည် ဖြစ်သည်။

၃၊ ၄။ (က) ဂျူးလူမျိုးကို ဆစ်ယူခဲ့သည့် “ကျောက်” မှာ မည်သူ ဖြစ်ပြီး၊ သူတို့ကို ထွက်ပေါ်လာစေသည့် “တူးယူရာ တွင်းဝ” မှာ မည်သူနည်း။ (ခ) မိမိတို့၏ မူလအမြစ်ကို ဂျူးများ သတိရခြင်းက အဘယ်ကြောင့် နှစ်သိမ့်မှု ဖြစ်စေမည်နည်း။

^၃ သို့ရာတွင် ဖြောင့်မတ်ခြင်းတရားကို အမှန် လိုက်စားသူများသည် ယုဒပြည်အတွင်း အနည်းငယ်သာ ရှိသောကြောင့် သူတို့ ကြောက်ရွံ့စိတ်ပျက်နိုင်သည်။ ထို့ကြောင့် ကျောက်ကျင်းတစ်ခု ပုံဥပမာကို အသုံးပြု၍ သူတို့အား ယေဟောဝါ ဤသို့ အားပေး၏– “သင်တို့ကို ခုတ် [“ဆစ်၊” သမ္မာ] ယူရာ ကျောက်နှင့် တူးယူရာ တွင်းဝကို ကြည့်ရှုကြလော့။ သင်တို့၏အဘ အာဗြဟံနှင့် သင်တို့ကို ဖွားသောသူ စာရာတို့ကို ကြည့်ရှုကြလော့။ ငါသည် တစ်ယောက်တည်းသောသူ အာဗြဟံကို ခေါ်၍ ကောင်းချီးပေးသဖြင့် များပြားစေ၏။” (ဟေရှာယ ၅၁:၁ခ၊ ၂) ဣသရေလလူမျိုး ဂုဏ်ယူဝင့်ကြွားကြသည့် သမိုင်းဝင်ပုဂ္ဂိုလ်၊ အာဗြဟံတည်းဟူသော “ကျောက်” မှ ဂျူးများကို ဆစ်ယူခဲ့ခြင်း ဖြစ်သည်။ (မဿဲ ၃:၉; ယောဟန် ၈:၃၃၊ ၃၉) သူသည် လူမျိုးတော် အစပြုရာ၊ ဘိုးဘေး ဖြစ်သည်။ “တူးယူရာ တွင်းဝ” မှာ ဣသရေလလူမျိုး၏ ဘိုးဘေးဣဇာက် လာခဲ့ရာ သားအိမ်၏ ပိုင်ရှင် စာရာ ဖြစ်သည်။

^၄ အာဗြဟံနှင့် စာရာသည် ကလေး မွေးဖွားနိုင်သည့် အသက်အရွယ် ကျော်လွန်နေပြီး သားသမီးလည်း မရှိပါ။ သို့တိုင် ယေဟောဝါသည် အာဗြဟံအား ကောင်းချီးပေးပြီး “များပြားစေ” မည်ဟု ကတိပြုခဲ့၏။ (ကမ္ဘာဦး ၁၇:၁-၆၊ ၁၅-၁၇) ဘုရားသခင်သည် ကလေး မွေးဖွားနိုင်စွမ်းကို ပြန်လည်ပေးသနားခြင်းကြောင့် အာဗြဟံနှင့် စာရာသည် အသက်ကြီးမှ ကလေးတစ်ဦးကို ဖွားမြင်ခဲ့ပြီး ထိုသူမှ ဘုရားသခင်နှင့် ပဋိညာဉ် ဖွဲ့ထားသော လူမျိုး ဆင်းသက်လာခဲ့သည်။ သို့ဖြင့် ယေဟောဝါသည် ထိုအမျိုးသားတစ်ဦးအား ကောင်းကင်တွင် ရှိသော ကြယ်များကို မရေမတွက်နိုင်သကဲ့သို့ များပြားလှသော လူမျိုးကြီးတစ်မျိုး၏ ဖခင် ဖြစ်စေခဲ့သည်။ (ကမ္ဘာဦး ၁၅:၅; တမန်တော် ၇:၅) ထို့ကြောင့် ယေဟောဝါသည် အာဗြဟံကို ဝေးလံသော ဒေသမှ ခေါ်ဆောင်ခဲ့ပြီး သူ့ထံမှ လူမျိုးကြီးတစ်မျိုးကို ဖြစ်စေနိုင်ခဲ့လျှင် ကိုယ်တော်သည် ဗာဗုလုန်တွင် ချုပ်နှောင်ခံနေရသော သစ္စာရှိ အကြွင်းအကျန်ကို လွတ်မြောက်စေပြီး သူတို့၏ ပြည်တော်သို့ ပြန်စေကာ တစ်ဖန်သူတို့ထံမှ လူမျိုးကြီးတစ်မျိုး ပြန်ဖြစ်စေမည် ဟူသော ကတိတော်ကို မလွဲဧကန် ကိုယ်တော် လုပ်ဆောင်နိုင်၏။ အာဗြဟံကို ပေးခဲ့သော ဘုရားသခင့် ကတိတော် ပြည့်စုံခဲ့သည်; ဂျူးသုံ့ပန်းများနှင့်ပတ်သက်သော ကိုယ်တော့် ကတိတော်သည်လည်း ပြည့်စုံမည်။

၅။ (က) အာဗြဟံနှင့် စာရာသည် မည်သူ့ကို ပုံတင်ပြသနည်း။ ရှင်းပြပါ။ (ခ) နောက်ဆုံး ပြည့်စုံချက်တွင် မည်သူသည် “ကျောက်” မှ မြစ်ဖျားခံလာသနည်း။

^၅ ဟေရှာယ ၅၁:၁၊ ၂ ပါ ပုံဆောင် ကျောက်ကျင်းသည် နောက်ထပ် ပြည့်စုံရန် ရှိသည်။ တရားဟောရာ ၃၂:၁၈ [သမ္မာ] တွင် ယေဟောဝါကို ဣသရေလလူမျိုး၏ မွေးသဖခင် ဖြစ်သော “ကျောက်၊” “[ဣသရေလ] ကို ဖြစ်ဖွားစေတော်မူသော” အရှင်အဖြစ် ခေါ်ဆိုထား၏။ ယင်းမှ ဒုတိယ ဖော်ပြချက်တွင် အသုံးပြုထားသော ဟေဗြဲ ကြိယာကို စာရာ ဣသရေလလူမျိုးကို မွေးဖွားခြင်းနှင့်ပတ်သက်၍ ဟေရှာယ ၅၁:၂ တွင်လည်း အသုံးပြုထားသည်။ ထို့ကြောင့် အာဗြဟံသည် သာ၍ ကြီးမြတ်သော အာဗြဟံ၊ ယေဟောဝါ၏ ပရောဖက်ပြုပုံစံ ဖြစ်သည်။ အာဗြဟံ၏ ဇနီး၊ စာရာသည် သန့်ရှင်းသော သမ္မာကျမ်းစာထဲတွင် ဘုရားသခင်၏ ဇနီးအဖြစ် ကိုယ်စားပြု ဖော်ပြခြင်းခံရသော ဝိညာဉ်သတ္တဝါများဖြင့် ဖွဲ့စည်းထားသည့် ယေဟောဝါ၏ စကြဝဠာ ကောင်းကင်အဖွဲ့အစည်းကို ကောင်းစွာ ပုံတင်ပြသည်။ (ကမ္ဘာဦး ၃:၁၅; ဗျာဒိတ် ၁၂:၁၊ ၅) ဤဟေရှာယ ပရောဖက်ပြုချက်၏ နောက်ဆုံး ပြည့်စုံချက်တွင် “ကျောက်” မှ ထွက်ပေါ်လာသော လူမျိုးမှာ စီ.အီး. ၃၃ ပင်တေကုတ္တေပွဲနေ့တွင် မွေးဖွားလာသော ဝိညာဏ ဘိသိက်ခံ ခရစ်ယာန် အသင်းတော်၊ “ဘုရားသခင်၏ ဣသရေလလူမျိုး” ဖြစ်သည်။ ဤစာအုပ်၏ ပြီးခဲ့သော အခန်းများတွင် ဆွေးနွေးခဲ့ပြီးသည့်အတိုင်း ထိုလူမျိုးသည် ၁၉၁၈ တွင် ဗာဗုလုန်၌ သုံ့ပန်း ဖြစ်နေသော်လည်း ၁၉၁၉ တွင် ဝိညာဏ ကြွယ်ဝသည့် အခြေအနေသို့ ပြန်ရောက်ရှိခဲ့သည်။—ဂလာတိ ၃:၂၆-၂၉; ၄:၂၈; ၆:၁၆။

၆။ (က) ယုဒပြည်အတွက် ရှေ့တွင် အဘယ်အရာ ရှိသနည်း၊ အဘယ် ပြန်လည်တည်ထောင်ခြင်း လိုအပ်မည်နည်း။ (ခ) ဟေရှာယ ၅၁:၃ သည် ကျွန်ုပ်တို့အား အဘယ် မျက်မှောက်ခေတ် ပြန်လည်တည်ထောင်ခြင်းကို သတိရစေသနည်း။

^၆ ဇိအုန် သို့မဟုတ် ယေရုရှလင်ကို ယေဟောဝါ နှစ်သိမ့်ပေးချက်တွင် လူဦးရေများသော လူမျိုးဖြစ်လာရန် ကတိပေးခြင်းထက်မက ပါဝင်သည်။ ကျွန်ုပ်တို့ ဤသို့ ဖတ်ရ၏– “ထာဝရဘုရားသည် ဇိအုန်မြို့ကို ချမ်းသာ [“နှစ်သိမ့်၊” ကဘ] ပေးတော်မူမည်။ သူ၏ ဆိတ်ညံရာအရပ် အလုံးစုံတို့ကို ချမ်းသာပေးမည်။ သူ၏ တောကို ဧဒင်အရပ်ကဲ့သို့လည်းကောင်း၊ သူ၏ လွင်ပြင်ကို ထာဝရဘုရား၏ ဥယျာဉ်ကဲ့သို့လည်းကောင်း ဖြစ်စေတော်မူသဖြင့် ဇိအုန်မြို့သည် ဝမ်းမြောက်ရွှင်လန်းခြင်း၊ ကျေးဇူးတော်ကို ချီးမွမ်းခြင်း၊ သီချင်းဆိုခြင်းနှင့် ပြည့်စုံလိမ့်မည်။” (ဟေရှာယ ၅၁:၃) အနှစ် ၇၀ လူဆိတ်ညံနေချိန်အတွင်း ယုဒပြည်သည် တောကန္တာရကဲ့သို့ ဖြစ်လာပြီး ဆူးခြုံ၊ ဆူးပင်များ၊ အခြားအရိုင်းပင်များ ပေါက်လာမည်။ (ဟေရှာယ ၆၄:၁၀; ယေရမိ ၄:၂၆; ၉:၁၀-၁၂) ထို့ကြောင့် ယုဒပြည်၌ ပြန်လည်အခြေချရုံမကဘဲ ပြန်လည်တည်ထောင်ခြင်းတွင် မြေကြီးကို ပြန်လည်ပြုပြင်ခြင်း ပါဝင်မည်၊ ရေကောင်းစွာ ရရှိသည့် ဖြစ်ထွန်းသည့် လယ်ကွင်းများ၊ အသီးလှိုင်လှိုင်ပေါသည့် ဥယျာဉ်ခြံများ ဖြစ်မည့် ဧဒင်ဥယျာဉ်ကဲ့သို့ ပြန်လည်ပြုပြင်ခြင်း ဖြစ်သည်။ မြေကြီးသည် ရွှင်လန်းပုံပေါက်မည်။ ပြည်နှင်ခံရချိန်အတွင်း ဆိတ်သုဉ်းနေသော အခြေအနေနှင့် နှိုင်းယှဉ်ကြည့်ပါက ပြည်တော်သည် ပရဒိသုကဲ့သို့ ဖြစ်နေမည်။ ဘုရားသခင်၏ ဘိသိက်ခံ ဣသရေလ အကြွင်းအကျန်သည် ၁၉၁၉ တွင် ထိုကဲ့သို့သော ပရဒိသုထဲသို့ ဝိညာဏသဘောဖြင့် ဝင်ရောက်ခဲ့ကြသည်။—ဟေရှာယ ၁၁:၆-၉; ၃၅:၁-၇။

ယေဟောဝါ၌ ယုံကြည်စိတ်ချရသည့် အကြောင်းရင်းများ

၇၊ ၈။ (က) နားထောင်နာယူပါဟု ယေဟောဝါ ဖိတ်ခေါ်ခြင်းက အဘယ်အရာကို ဆိုလိုသနည်း။ (ခ) ယုဒသည် ယေဟောဝါကို နာခံရန် အဘယ်ကြောင့် အရေးကြီးသနည်း။

^၇ အသစ်တစ်ဖန် အာရုံစိုက်ရန် တောင်းဆိုလျက် ယေဟောဝါ ဤသို့ မိန့်တော်မူ၏– “ငါ၏ လူမျိုး၊ ငါ့လူစုတို့ ငါ့စကားကို နားထောင်နာယူကြလော့။ ငါ့ထံမှ တရားထွက်၍ ငါစီရင်ချက်သည် လူများ လင်းစရာဖို့ တည်ရလိမ့်မည်။ ငါ၏ ဖြောင့်မတ်ခြင်းတရားသည် အနီးမှာ ရှိ၏။ ငါ၏ ကယ်တင်ခြင်းတရားသည် ထွက်သွားပြီ။ ငါ့လက်ရုံးသည် လူတို့တွင် တရားမှုကို စီရင်လိမ့်မည်။ တစ်ကျွန်းတစ်နိုင်ငံသားတို့သည် ငါ့ကို မျှော်လင့်၍ ငါ့လက်ရုံးကို ကိုးစားကြလိမ့်မည်။”—ဟေရှာယ ၅၁:၄၊ ၅။

^၈ နားထောင်နာယူပါဟု ယေဟောဝါ ဖိတ်ခေါ်ခြင်းက ကိုယ်တော့် သတင်းစကားကို နားထောင်ရုံထက်မက ပါဝင်ပတ်သက်သည်။ ယင်းသည် ကြားခဲ့ရာကို လုပ်ဆောင်ရန်အတွက် အာရုံစိုက်ခြင်းကို ဆိုလိုသည်။ (ဆာလံ ၄၉:၁; ၇၈:၁) ယေဟောဝါသည် သွန်သင်ခြင်း၊ တရားမျှတခြင်းနှင့် ကယ်တင်ခြင်းတို့၏ ရင်းမြစ် ဖြစ်ကြောင်း လူမျိုးတော် သဘောပေါက်နားလည်ရမည်။ ကိုယ်တော် တစ်ပါးတည်းသာလျှင် ဝိညာဏအလင်း၏ ရင်းမြစ် ဖြစ်တော်မူ၏။ (၂ ကောရိန္သု ၄:၆) ကိုယ်တော်သည် လူသားတို့၏ တရားသူကြီးချုပ် ဖြစ်တော်မူ၏။ ယေဟောဝါထံမှ ထွက်ပေါ်လာသော ပညတ်တော်များနှင့် တရားရေး ဆုံးဖြတ်ချက်များကို မိမိတို့၏ ဘဝအသက်တာ လမ်းညွှန်အဖြစ် ခွင့်ပြုကြသူများအတွက် ယင်းတို့သည် အလင်း ဖြစ်သည်။—ဆာလံ ၄၃:၃; ၁၁၉:၁၀၅; သုတ္တံ ၆:၂၃။

၉။ ဘုရားသခင်နှင့် ပဋိညာဉ် ဖွဲ့ထားသော လူမျိုးအပြင် မည်သူတို့သည် ယေဟောဝါ၏ ကယ်တင်ခြင်း လုပ်ရပ်များမှ အကျိုးခံစားရမည်နည်း။

^၉ ယင်းတို့အားလုံးသည် ဘုရားသခင်နှင့် ပဋိညာဉ် ဖွဲ့ထားသော လူမျိုးနှင့်သာ သက်ဆိုင်သည် မဟုတ်ဘဲ နေရာတိုင်း၊ ပင်လယ်ထဲ အဝေးဆုံး ကျွန်းများ၌ပင်ရှိ စိတ်ထားမှန်သူများနှင့်လည်း သက်ဆိုင်သည်။ သစ္စာရှိ ကျွေးကျွန်များ၏ အကျိုးအတွက် လုပ်ဆောင်၊ ကယ်တင်မည့် ဘုရားသခင်နှင့် ကိုယ်တော့်စွမ်းရည်ကို သူတို့ ယုံကြည်စိတ်ချခြင်းသည် စိတ်ပျက်စရာ ဖြစ်မည် မဟုတ်ပါ။ ကိုယ်တော်၏ လက်ရုံးဖြင့် ကိုယ်စားပြုသော ကိုယ်တော်၏ ခွန်အား၊ သို့မဟုတ် တန်ခိုးသည် စိတ်ချရသည်; မည်သူတစ်ဦးတစ်ယောက်မျှ မဆီးတားနိုင်ပါ။ (ဟေရှာယ ၄၀:၁၀; လုကာ ၁:၅၁၊ ၅၂) ယနေ့လည်း အလားတူ၊ ဘုရားသခင်၏ ဣသရေလလူမျိုးထဲမှ အကြွင်းအကျန်တို့ ဇွဲဖြင့် လုပ်ဆောင်သော ဟောပြောခြင်းလုပ်ငန်းသည် ပင်လယ်ထဲရှိ ဝေးလံသော ကျွန်းများမှ လူများစွာ အပါအဝင် သန်းနှင့်ချီသောသူများကို ယေဟောဝါထံ လှည့်လာစေပြီး ကိုယ်တော့်ကို ယုံကြည်ကိုးစားစေခဲ့ပြီ။

၁၀။ (က) ဘုရင် နေဗုခဒ်နေဇာသည် အဘယ် အမှန်တရားကို မဖြစ်မနေ သိရှိလာရမည်နည်း။ (ခ) အဘယ် “ကောင်းကင်” နှင့် “မြေကြီး” တို့ ပျောက်ကွယ်သွားမည်နည်း။

^၁၀ ဗာဗုလုန် ရှင်ဘုရင် နေဗုခဒ်နေဇာ သင်ယူရမည့် အမှန်တရားတစ်ခုအကြောင်းကို ယေဟောဝါ ဆက်၍ ရည်ညွှန်းဖော်ပြတော်မူ၏။ ကောင်းကင် သို့မဟုတ် မြေကြီးပေါ်ရှိ မည်သည့်အရာကမျှ ယေဟောဝါ၏ အလိုတော် ပြီးမြောက်အောင် ဆောင်ရွက်မှုကို မရပ်တန့်နိုင်ပါ။ (ဒံယေလ ၄:၃၄၊ ၃၅) ကျွန်ုပ်တို့ ဤသို့ ဖတ်ရ၏– “မိုးကောင်းကင်ကို မျှော်၍ ကြည့်ကြလော့။ မြေကြီးကိုလည်း ငုံ့၍ ကြည့်ကြလော့။ မိုးကောင်းကင်သည် မီးခိုးကဲ့သို့ ကွယ်ပျောက်၍ မြေကြီးသည် အဝတ်ကဲ့သို့ ဟောင်းနွမ်းလိမ့်မည်။ မြေကြီးသားတို့သည် ခြင်ကောင်ကဲ့သို့ သေကြလိမ့်မည်။ ငါ၏ ကယ်တင်ခြင်းတရားမူကား အစဉ်အမြဲ တည်လိမ့်မည်။ ငါ၏ ဖြောင့်မတ်ခြင်းတရားလည်း ပပျောက်ခြင်း မရှိနိုင်ရာ။” (ဟေရှာယ ၅၁:၆) သုံ့ပန်းများကို ပြည်တော်ပြန်ခွင့် ပြုခြင်းသည် ဗာဗုလုန် ဧကရာဇ်များ၏ မူဝါဒနှင့် ဆန့်ကျင်သော်လည်း မိမိလူတို့အား ယေဟောဝါ ကယ်တင်ခြင်းသည် ပျက်ပြားမည် မဟုတ်ပါ။ (ဟေရှာယ ၁၄:၁၆၊ ၁၇) ဗာဗုလုန် လူမျိုးတို့၏ “ကောင်းကင်” သို့မဟုတ် အုပ်ချုပ်ရေး အာဏာစက်များသည် ရှုံးနိမ့်ပျက်စီးသွားမည်။ ထိုအုပ်ချုပ်ရေး အာဏာစက်များ၏ လက်အောက်ခံများ ဖြစ်သည့် ဗာဗုလုန်လူမျိုး တည်းဟူသော “မြေကြီး” သည် တဖြည်းဖြည်း ပျောက်ကွယ်သွားမည်။ မှန်ပါသည်၊ ထိုအချိန်က အကြီးဆုံး အာဏာစက်ပင်လျှင် ယေဟောဝါ၏ ခွန်အားတစ်ဖက်၌ မရပ်တည်နိုင် သို့မဟုတ် ကိုယ်တော်၏ ကယ်တင်ခြင်း လုပ်ရပ်များကို မတားဆီးနိုင်ပါ။

၁၁။ ဗာဗုလုန်လူမျိုးတို့၏ “ကောင်းကင်” နှင့် “မြေကြီး” ပျောက်ကွယ်သွားမည် ဟူသော ပရောဖက်ပြုချက် အပြီးသတ် ပြည့်စုံခြင်းက ယနေ့ ခရစ်ယာန်များအတွက် အဘယ်ကြောင့် အားတက်စရာ ဖြစ်သနည်း။

^၁၁ ထိုပရောဖက်ပြုချက်စကားများ လုံးဝ ပြည့်စုံခဲ့ပြီးသည်ကို သိရခြင်းက ယနေ့ ခရစ်ယာန်များအတွက် အလွန် အားရှိစရာပါတကား! အဘယ်ကြောင့်နည်း။ အကြောင်းမှာ တမန်တော် ပေတရုက မဖြစ်သေးသော အနာဂတ် အဖြစ်အပျက်နှင့်ပတ်သက်၍ ထပ်တူဖော်ပြချက်များကို အသုံးပြုခဲ့သောကြောင့် ဖြစ်သည်။ သူသည် အလျင်အမြန် ချဉ်းကပ်လာနေသော ယေဟောဝါနေ့နှင့်ပတ်သက်၍ “မိုးကောင်းကင်သည် မီးနှင့် ပျက်၍ လောကဓာတ်တို့သည် ပူအားကြီးလျက်၊ အရည်ကျိုခြင်းကို ခံရသောနေ့” ဟု ပြောခဲ့သည်! ထို့နောက် သူ ဤသို့ ဆက်ပြော၏– “ယခု ရှိသမျှသောအရာတို့သည် ပျက်ရသော်လည်း ဖြောင့်မတ်ခြင်းတရား တည်နေရာ မိုးကောင်းကင်သစ်နှင့် မြေကြီးသစ်ကို ငါတို့သည် ကတိတော်နှင့်အညီ မျှော်လင့်ကြ၏။” (၂ ပေတရု ၃:၁၂၊ ၁၃; ဟေရှာယ ၃၄:၄; ဗျာဒိတ် ၆:၁၂-၁၄) တန်ခိုးကြီးသော တိုင်းနိုင်ငံများနှင့် သူတို့၏ ထောင်လွှားသော ကြယ်နှင့် တူသည့် အုပ်စိုးရှင်များသည် ယေဟောဝါအား အာခံတော်လှန်ကြသော်လည်း ကိုယ်တော် သတ်မှတ်ထားချိန်တွင် သူတို့သည် ပယ်ရှင်းခံရမည်—ခြင်ကောင်တစ်ကောင်ကဲ့သို့ အလွယ်တကူ ဖျက်ဆီးခြင်း ခံရမည်။ (ဆာလံ ၂:၁-၉) ဘုရားသခင်၏ ဖြောင့်မတ်သော အစိုးရတစ်ခုတည်းသာ ဖြောင့်မတ်သော လူ့အဖွဲ့အစည်းအပေါ် ထာဝစဉ် အုပ်ချုပ်သွားမည်။—ဒံယေလ ၂:၄၄၊ ၄၅; ဗျာဒိတ် ၂၁:၁-၄။

၁၂။ ဘုရားသခင့် ကျေးကျွန်များသည် လူသားဆန့်ကျင်သူများ၏ ကဲ့ရဲ့ရှုတ်ချခံရသည့်အခါ အဘယ်ကြောင့် မကြောက်သင့်သနည်း။

^၁၂ “ဖြောင့်မတ်ခြင်းတရားကို လိုက်” သူများအား မိန့်တော်မူနေရာ ယခု ယေဟောဝါ ဤသို့ ဆို၏– “ဖြောင့်မတ်ခြင်းတရားကို သိ၍ ငါ၏ တရားကို နှလုံးသွင်းမိသောသူတို့ ငါ့စကားကို နားထောင်ကြလော့။ လူတို့သည် အပြစ်တင်မည်ဟု မစိုးရိမ်ကြနှင့်။ လူတို့ ကဲ့ရဲ့ခြင်းကို မကြောက်ကြနှင့်။ အကြောင်းမူကား ပိုးရွတို့သည် သိုးမွေးအဝတ်ကို ကိုက်စားသကဲ့သို့ ထိုသူတို့ကို ကိုက်စားဖျက်ဆီးကြလိမ့်မည်။ ငါ၏ ဖြောင့်မတ်ခြင်းတရားမူကား နိစ္စထာဝရ ဖြစ်၍ ငါ၏ ကယ်တင်ခြင်းတရားသည်လည်း ကမ္ဘာအဆက်ဆက် တည်လိမ့်သတည်း။” (ဟေရှာယ ၅၁:၇၊ ၈) ယေဟောဝါကို ယုံကြည်ကိုးစားသူများ၏ ရဲရင့်သော ရပ်တည်မှုကြောင့် အသရေဖျက်၊ ပြစ်တင်ရှုတ်ချပြောဆိုခံရမည် ဖြစ်သော်လည်း ယင်းသည် ကြောက်ရမည့်အရာ မဟုတ်ပါ။ ပြစ်တင်ရှုတ်ချပြောဆိုသူများသည် ပိုးစားနေသော သိုးမွေးဝတ်ရုံတစ်ခုကဲ့သို့ “ကိုက်စားဖျက်ဆီး” ခံရမည့် သေမျိုးမျှ ဖြစ်သော လူသားများပင် ဖြစ်သည်။a ရှေးသစ္စာရှိ ဂျူးများကဲ့သို့ ယနေ့ စစ်မှန်သော ခရစ်ယာန်များသည် မည်သည့် ဆန့်ကျင်မှုကိုမဆို ကြောက်စရာအကြောင်း မရှိပါ။ ထာဝရဘုရားသခင်၊ ယေဟောဝါသည် သူတို့၏ ကယ်တင်ခြင်း ဖြစ်သည်။ (ဆာလံ ၃၇:၁၊ ၂) ကိုယ်တော့် ဝိညာဉ်တော်နှင့် ခံရပ်နေကြသောကြောင့် ဘုရားသခင့် ရန်သူများထံမှ ပြစ်တင်ရှုတ်ချမှုက ယေဟောဝါ လူမျိုးတော်တွင် ကိုယ်တော် ဝိညာဉ် ရှိကြောင်း သက်သေအထောက်အထား ဖြစ်သည်။—မဿဲ ၅:၁၁၊ ၁၂; ၁၀:၂၄-၃၁။

၁၃၊ ၁၄။ “ရာခပ်” နှင့် “နဂါး” ဟူသော အသုံးအနှုန်းသည် အဘယ်အရာကို ပုံတင်ပြသနည်း၊ ယင်းသည် မည်သို့ “အပိုင်းပိုင်း ပြတ်” ပြီး “ထိုးဖောက်” ခံရသနည်း။

^၁၃ သုံ့ပန်း ဖြစ်နေသော မိမိ၏ လူမျိုးတော်၏ အကျိုးအတွက် လုပ်ဆောင်ရန် ယေဟောဝါကို ဆင့်ခေါ်ဘိသကဲ့သို့ ဟေရှာယ ဤသို့ဆို၏– “အိုထာဝရဘုရား၏ လက်ရုံးတော် နိုးတော်မူပါ။ နိုး၍ ခွန်အားကို ယူတော်မူပါ။ ရှေးကာလနှင့် လွန်ဖူးသော ကာလ၌ကဲ့သို့ နိုးတော်မူပါ။ ရာခပ်ကို ဒဏ်ခတ် [“အပိုင်းပိုင်းပြတ်စေ၊” ကဘ] ၍ နဂါးကို နာစေ [“ထိုးဖောက်၊” ကဘ] သောသူကား ကိုယ်တော်ပင် မဟုတ်လော။ ပင်လယ်ရေ၊ နက်နဲရာရေတို့ကို ခန်းခြောက်စေ၍ ပင်လယ်နက်နဲရာအရပ်တို့ကို ရွေးနုတ်သောသူများ သွားစရာလမ်း ဖြစ်စေသောသူကား ကိုယ်တော်ပင် မဟုတ်လော။”—ဟေရှာယ ၅၁:၉၊ ၁၀။

^၁၄ အထူး ရွေးချယ်ထားသော သမိုင်းဝင် အဖြစ်အပျက်များကို ဟေရှာယ ဖော်ပြသည်။ ဣသရေလလူတိုင်းသည် အီဂျစ်ပြည်မှ လူမျိုးတော် လွတ်မြောက်ခြင်းနှင့် ပင်လယ်နီကို ဖြတ်ကူးခြင်းအကြောင်းတို့ကို သိကြသည်။ (ထွက်မြောက်ရာ ၁၂:၂၄-၂၇; ၁၄:၂၆-၃၁) “ရာခပ်” နှင့် “နဂါး သို့မဟုတ် မိကျောင်း” ဟူသော အသုံးအနှုန်းများက အီဂျစ်ပြည်မှ ဣသရေလလူမျိုး ထွက်ခွာခြင်းကို ဆန့်ကျင်ခဲ့သူ ဖာရောလက်အောက်ရှိ အီဂျစ်ပြည်ကို ရည်ညွှန်းသည်။ (ဆာလံ ၇၄:၁၃; ၈၇:၄; ဟေရှာယ ၃၀:၇) ယင်း၏ ဦးခေါင်းရှေ့ပိုင်းသည် နိုင်းလ်မြစ်ဝကျွန်းပေါ်ဒေသတွင် တည်ရှိပြီး ယင်း၏ ကိုယ်ပိုင်းသည် မြေသြဇာကောင်းသော နိုင်းလ်မြစ်ဝှမ်းဒေသအထိ မိုင်ပေါင်းရာနှင့်ချီ ရှည်လျားရာ ရှေးအီဂျစ်ပြည်သည် နဂါးကြီးနှင့် ဆင်တူခဲ့သည်။ သို့သော် ဤသတ္တဝါကြီးသည် ထိုပြည်အပေါ်သို့ ကပ်ဘေးဆယ်ပါး ယေဟောဝါ ကျရောက်စေခဲ့ချိန်တွင် အပိုင်းပိုင်း ဖြတ်ခြင်း ခံခဲ့ရသည်။ ပင်လယ်နီတွင် သူ၏ စစ်တပ် ဖျက်ဆီးခံခဲ့ရချိန်တွင် သူသည် ထိုးဖောက်ခံရကာ ပြင်းထန်သော ဒဏ်ရာ ရခဲ့ပြီး ခွန်အား လျော့နည်းခဲ့သည်။ မှန်ပါသည်၊ ယေဟောဝါသည် အီဂျစ်ပြည်နှင့် ဆက်ဆံရာတွင် မိမိ၏ လက်ရုံးတန်ခိုးတော်ကို တင်ပြခဲ့သည်။ ကိုယ်တော်သည် ဗာဗုလုန်တွင် ပြည်နှင်ခံရသော မိမိလူမျိုးအတွက် တိုက်ခိုက်ရန် ပို၍ပင် အဆင်သင့် မရှိဘဲ ဖြစ်ပါမည်လော။

၁၅။ (က) ဇိအုန်၏ ဝမ်းနည်းခြင်းနှင့် ညည်းတွားခြင်းသည် မည်သည့်အချိန်တွင်နှင့် မည်သို့ ပျောက်ကွယ်သွားမည်နည်း။ (ခ) မျက်မှောက်ခေတ် ဘုရားသခင်၏ ဣသရေလလူမျိုးအတွက် အဘယ်အချိန်တွင် ဝမ်းနည်းခြင်းနှင့် ညည်းတွားခြင်း ပျောက်ကွယ်သွားသနည်း။

^၁၅ ယခု ဣသရေလလူမျိုး ဗာဗုလုန်မှ လွတ်မြောက်ခြင်းကို ရှေ့ရှု မျှော်မှန်းကာ ဤသို့ ဆက်၍ ပရောဖက်ပြု၏– “သို့ဖြစ်၍ ထာဝရဘုရား ကယ်လွှတ်တော်မူသောသူတို့သည် ပြန်လာ၍ သီချင်းဆိုလျက်၊ ထာဝရ ဝမ်းမြောက်ခြင်း သရဖူကို ဆောင်းလျက် ဇိအုန်မြို့သို့ ရောက်ကြလိမ့်မည်။ ဝမ်းမြောက်ရွှင်လန်းခြင်း အခွင့်ကို ရကြ၍ ဝမ်းနည်းခြင်းနှင့် ညည်းတွားခြင်းသည် ပြေးသွားရလိမ့်မည်။” (ဟေရှာယ ၅၁:၁၁) ဗာဗုလုန်၌ ရှိသောသူတို့၏ အခြေအနေသည် ဝမ်းနည်းစရာ ဖြစ်သော်လည်း ယေဟောဝါ၏ ဖြောင့်မတ်ခြင်းကို ရှာသူများတွင် နှစ်လို့ဖွယ် အလားအလာ ရှိသည်။ ဝမ်းနည်းခြင်းနှင့် ညည်းတွားခြင်း မရှိတော့မည့်အချိန် ရောက်လာမည်။ ကယ်လွှတ်ခံရသူ သို့မဟုတ် ရွေးနုတ်ခံရသူတို့၏ နှုတ်မှ ထွက်လာသော သီချင်းဆိုသံ၊ ဝမ်းမြောက်ရွှင်လန်းခြင်းအသံကို ကြားရမည်။ ထိုပရောဖက်ပြုချက်စကားများ၏ မျက်မှောက်ခေတ် ပြည့်စုံချက်တွင် ဘုရားသခင်၏ ဣသရေလလူမျိုးသည် ဗာဗုလုန်တွင် သုံ့ပန်း ဖြစ်နေရာမှ ၁၉၁၉ တွင် လွတ်မြောက်ခဲ့သည်။ သူတို့သည် ဝိညာဏ နယ်မြေသို့ ရွှင်လန်းဝမ်းမြောက်စွာ ပြန်လာခဲ့ကြပြီး ဝမ်းမြောက်မှုသည် ယနေ့အချိန်အထိ ဆက်ရှိနေဆဲ ဖြစ်သည်။

၁၆။ ဂျူးများကို ရွေးနုတ်ရန်အတွက် အဘယ် အဖိုးအခကို ပေးရသနည်း။

^၁၆ ဂျူးများကို ရွေးနုတ်ရန် အဖိုးအခကား အဘယ်အရာ ဖြစ်မည်နည်း။ ယေဟောဝါက “သင့်ကို ရွေးဖို့ အဲဂုတ္တုပြည်ကိုလည်းကောင်း၊ သင့်အတွက် ကုရှ [အီသီယိုးပီးယား] ပြည်နှင့် သေဘပြည်ကိုလည်းကောင်း” ပေးမည်ဟု ဟေရှာယ ပရောဖက်ပြုချက်တွင် ဖော်ပြခဲ့ပြီး ဖြစ်သည်။ (ဟေရှာယ ၄၃:၁-၄) ယင်းသို့ နောက်ပိုင်းတွင် ဖြစ်ပျက်လာမည်။ ဗာဗုလုန်ကို အောင်နိုင်ပြီး ဂျူးသုံ့ပန်းများကို လွှတ်ပေးပြီးနောက် ပါးရှားအင်ပါယာသည် အီဂျစ်၊ အီသီယိုးပီးယားနှင့် သေဘပြည်တို့ကို ဆက်အောင်ပွဲခံမည်။ သူတို့ကို ဣသရေလလူမျိုး၏ စိုးလ်များအတွက် ပေးဆက်ခြင်း ဖြစ်မည်။ ယင်းက သုတ္တံ ၂၁:၁၈ တွင် ဖော်ပြထားသော “မတရားသောသူသည် တရားသောသူအဖို့၊ လွန်ကျူးသောသူသည် ဖြောင့်မတ်သောသူအဖို့ ရွေးရန် ဖြစ်၏” ဟူသော မူနှင့် ကိုက်ညီသည်။

ထပ်ဆင့် အာမခံချက်

၁၇။ ဂျူးများသည် ဗာဗုလုန်၏ အမျက်ဒေါသကို အဘယ်ကြောင့် ကြောက်ဖို့ မလိုသနည်း။

^၁၇ ယေဟောဝါသည် မိမိ၏ လူမျိုးတော်ကို ဤသို့ ထပ်၍ အာမခံ၏– “သင်တို့ကို နှစ်သိမ့်စေသောသူကား အခြားသူ မဟုတ်၊ ငါ့ကိုယ်တိုင်ပေတည်း။ သေရသော လူကိုလည်းကောင်း၊ မြက်ပင်ကဲ့သို့ ဖြစ်လတ္တံ့သော လူသားကိုလည်းကောင်း သင်သည် ကြောက်ရမည်အကြောင်း အဘယ်သို့သော သဘောရှိသနည်း။ မိုးကောင်းကင်ကို ကြက်တော်မူထသော၊ မြေကြီးကိုလည်း တည်တော်မူထသော သင့်ကို ဖန်ဆင်းတော်မူသော ထာဝရဘုရားကို သင်သည် မေ့လျော့၍ ညှဉ်းဆဲ [“ချုပ်ချယ်၊” ကဘ] သောသူသည် ငါ့ကို ဖျက်ဆီးလုပြီဟု စိတ်ထင်နှင့် သူ၏ ဒေါသအမျက်ကို အစဉ် ကြောက်ရမည်အကြောင်း အဘယ်သို့သော သဘောရှိသနည်း။ ယခုမှာ ညှဉ်းဆဲ [“ချုပ်ချယ်၊” ကဘ] သောသူ၏ ဒေါသအမျက်သည် အဘယ်မှာ ရှိသနည်း။” (ဟေရှာယ ၅၁:၁၂၊ ၁၃) ပြည်နှင်ခံရမည့် နှစ်များသည် ရှေ့တွင် ရှိနေသည်။ သို့သော်လည်း ဗာဗုလုန်၏ ဒေါသအမျက်ကို ကြောက်ရွံ့စရာ မလိုပါ။ ကျမ်းစာမှတ်တမ်း၏ တတိယမြောက် ကမ္ဘာ့အာဏာစက် ဖြစ်သော ထိုလူမျိုးသည် ဘုရားသခင့်လူမျိုးကို အောင်နိုင်ပြီး ‘သူတို့ကို ချုပ်ချယ်’ ရန် သို့မဟုတ် သူတို့ လွတ်မြောက်မည့် လမ်းကို ဆီးတားပိတ်ဆို့ဖို့ ရှာကြံကြသော်လည်း ယေဟောဝါသည် ကုရု၏ လက်တွင် ဗာဗုလုန် ကျရှုံးမည့်အကြောင်း ကြိုဟောထားသည်ကို သစ္စာရှိဂျူးများ သိထားကြသည်။ (ဟေရှာယ ၄၄:၈၊ ၂၄-၂၈) ဖန်ဆင်းရှင်—ကာလအစဉ်အဆက် တည်ရှိသော ဘုရားသခင်၊ ယေဟောဝါ—နှင့် ခြားနားလျက် ဗာဗုလုန်လူမျိုးများသည် ခြောက်သွေ့သော ရာသီအတွင်း အလွန် ပူပြင်းသော နေရောင်အောက် သွေ့ခြောက်သွားသည့် မြက်ပင်များအလား ဖျက်ဆီးခံရမည်။ သို့ဖြစ်၍ သူတို့၏ ခြိမ်းခြောက်မှုနှင့် ဒေါသအမျက်တို့သည် အဘယ်မှာ ရှိတော့မည်နည်း။ လူကို ကြောက်ပြီး ကောင်းကင်၊ မြေကြီးကို ဖန်ဆင်းတော်မူသော ဘုရားသခင်ကို မေ့လျော့ခြင်းသည် ပညာမဲ့မှုပါတကား!

၁၈။ ကိုယ်တော်၏ လူမျိုးတော်သည် ခေတ္တခဏ ထောင်သားများ ဖြစ်မည် ဖြစ်သော်လည်း ယေဟောဝါသည် သူတို့ကို အဘယ် အာမခံချက် ပေးသနည်း။

^၁၈ ယေဟောဝါ၏ လူမျိုးတော်သည် ခေတ္တခဏ “အချုပ်ခံရ” မည် ဖြစ်သော်လည်း သူတို့၏ လွတ်မြောက်ခြင်းသည် မထင်မမှတ်ဘဲ ရုတ်တရက် ဖြစ်မည်။ သူတို့သည် ဗာဗုလုန်တွင် လုံးဝ ပျက်စီးသွားမည် မဟုတ်၊ သို့မဟုတ် သင်္ချိုင်းတွင်းထဲရှိ သက်မဲ့များကဲ့သို့ ထောင်သားများအဖြစ် အစာငတ်မွတ်၍ သေဆုံးမည်လည်း မဟုတ်ပါ။ (ဆာလံ ၃၀:၃; ၈၈:၃-၅) ယေဟောဝါသည် သူတို့ကို ဤသို့ အာမခံတော်မူ၏– “အချုပ်ခံရသောသူသည် ထောင်ထဲမှာ မသေ၊ ရေစာ မပြတ်၊ လျင်မြန်စွာ ကယ်နုတ်ခြင်းသို့ ရောက်လိမ့်မည်။”—ဟေရှာယ ၅၁:၁၄။

၁၉။ သစ္စာရှိ ဂျူးများသည် ယေဟောဝါ၏ စကားများကို အဘယ်ကြောင့် အပြည့်အဝ ယုံကြည်စိတ်ချနိုင်သနည်း။

^၁၉ ဇိအုန်ကို နှစ်သိမ့်ကာ ယေဟောဝါ ဤသို့ ဆက်ဆို၏– “ငါသည် သမုဒ္ဒရာကို ဆုံးမ၍ လှိုင်းတံပိုးကို ဟုန်းစေသော သင်၏ ဘုရားသခင် ထာဝရဘုရား ဖြစ်၏။ ထိုဘုရား၏ နာမတော်ကား ကောင်းကင်ဗိုလ်ခြေအရှင် ထာဝရဘုရားပေတည်း။ မိုးကောင်းကင်ကို ဆောက်၍ မြေကြီးကို တည်စေခြင်းငှာလည်းကောင်း၊ ‘သင်သည် ငါ၏ လူမျိုး ဖြစ်၏’ ဟု ဇိအုန်မြို့ကို ပြောစေခြင်းငှာလည်းကောင်း ငါ့စကားကို သင်၏ နှုတ်ထဲမှာ ငါထားပြီ။ ငါ့လက်၏ အရိပ်နှင့် သင့်ကို ငါမိုးပြီ။” (ဟေရှာယ ၅၁:၁၅၊ ၁၆) ပင်လယ်ကို လွှမ်းမိုးပြီး ယင်းကို ထိန်းချုပ်နိုင်သော ဘုရားသခင်၏ တန်ခိုးစွမ်းရည်အကြောင်းကို ကျမ်းစာတွင် ကြိမ်ဖန်များစွာ ဖော်ပြထားသည်။ (ယောဘ ၂၆:၁၂; ဆာလံ ၈၉:၉; ယေရမိ ၃၁:၃၅) မိမိလူမျိုးတော်ကို အီဂျစ်ပြည်မှ ကယ်လွှတ်ခဲ့ချိန်က တင်ပြခဲ့သကဲ့သို့ ကိုယ်တော်သည် သဘာဝအင်အားများကို အပြည့်အဝ ထိန်းချုပ်နိုင်တော်မူ၏။ ‘ကောင်းကင်ဗိုလ်ခြေအရှင် ယေဟောဝါ’ နှင့် မည်သူသည် အသေးငယ်ဆုံး နည်းနှင့်ပင် ယှဉ်ပြိုင်နိုင်မည်နည်း။—ဆာလံ ၂၄:၁၀။

၂၀။ ဇိအုန်ကို ယေဟောဝါ ပြန်လည်တည်ထောင်ချိန်တွင် အဘယ် “ကောင်းကင်” နှင့် “မြေကြီး” တည်ရှိလာမည်နည်း၊ အဘယ် နှစ်သိမ့်ဖွယ်စကားများကို ကိုယ်တော် မိန့်တော်မူမည်နည်း။

^၂၀ ဂျူးများသည် ဘုရားသခင်နှင့် ပဋိညာဉ် ဖွဲ့ထားသော လူမျိုး ဆက်ဖြစ်နေပြီး သူတို့သည် ပြည်တော်သို့ ပြန်မည် ဖြစ်ပြီး ယေဟောဝါ၏ ပညတ်အောက်တွင် တစ်ဖန် ပြန်လည်နေထိုင်မည်ဟု ကိုယ်တော် အာမခံသည်။ သူတို့သည် ယေရုရှလင်မြို့နှင့် ဗိမာန်တော်ကို ပြန်လည်တည်ဆောက်မည် ဖြစ်ပြီး မောရှေအားဖြင့် သူတို့နှင့် ကိုယ်တော် ဖွဲ့ခဲ့သော ပဋိညာဉ်အောက်ရှိ တာဝန်များကို ပြန်လည်လုပ်ဆောင်မည်။ ပြည်တော်သည် ပြည်တော်ပြန် ဣသရေလလူမျိုးများ၊ သူတို့၏ အိမ်မွေးတိရစ္ဆာန်များနှင့် စတင်စည်ပင်လာချိန်တွင် “မြေကြီးသစ်” တည်ရှိလာမည်။ ယင်းအပေါ်တွင် “ကောင်းကင်သစ်” ဖြစ်သော အစိုးရ အစီအစဉ်စနစ်သစ် ရှိမည်။ (ဟေရှာယ ၆၅:၁၇-၁၉; ဟဂ္ဂဲ ၁:၁၊ ၁၄) ယေဟောဝါက ဇိအုန်အား “သင်သည် ငါ၏ လူမျိုး ဖြစ်၏” ဟု တစ်ဖန် မိန့်တော်မူမည်။

လုပ်ဆောင်ရန် ဖိတ်ခေါ်ချက်တစ်ရပ်

၂၁။ လုပ်ဆောင်ရန် အဘယ် ဖိတ်ခေါ်ချက်ကို ယေဟောဝါ ထုတ်ဆင့်တော်မူသနည်း။

^၂၁ ဇိအုန်ကို စိတ်ချစေပြီးနောက် ယေဟောဝါသည် လုပ်ဆောင်ရန် ဖိတ်ခေါ်ချက်တစ်ရပ် ထုတ်ဆင့်တော်မူ၏။ ဆင်းရဲဒုက္ခ ခံရခြင်း၏ အဆုံးပိုင်း ရောက်နေဘိသကဲ့သို့ ကိုယ်တော် ဤသို့ မိန့်တော်မူ၏– “ထာဝရဘုရား၏ လက်တော်၌ အမျက်တော်ဖလားကို သောက်သော ယေရုရှလင်မြို့ နိုးလော့။ နိုး၍ ထလော့။ သင်သည် တုန်လှုပ်စေသော [“ယိမ်းယိုင်စေသော၊” သမ္မာ] ဖလားကို အကုန် သောက်ခဲ့ပြီ။ အနည်အဖတ်ကိုလည်း ညှစ်ခဲ့ပြီ။” (ဟေရှာယ ၅၁:၁၇) မှန်ပါသည်၊ ယေရုရှလင်မြို့သည် ယိုယွင်းသည့် အခြေအနေမှ နိုးထရမည် ဖြစ်ပြီး ယခင်အခြေအနေ၊ ခမ်းနားထည်ဝါမှုကို ပြန်တည်ထောင်ရမည်။ ဘုရားသခင်၏ ပြစ်ဒဏ်ပေးခြင်း ဖြစ်သော ပုံဆောင်ဖလားကို ကုန်သွားစေသည်အထိ သောက်မည့်အချိန် ရောက်ရှိလာမည်။ သူမအပေါ် ဘုရားသခင့် အမျက်တော် လုံးဝ ကျန်တော့မည် မဟုတ်ချေ။

၂၂၊ ၂၃။ ယေရုရှလင်မြို့သည် ယေဟောဝါ၏ အမျက်တော်ခွက်ဖလားကို သောက်သည့်အခါ အဘယ်အရာ ကြုံတွေ့ရမည်နည်း။

^၂၂ သို့ရာတွင်၊ ယေရုရှလင်မြို့ ပြစ်ဒဏ်ခံနေရချိန်တွင် သူ၏ မြို့သူမြို့သားများ ဖြစ်သော “သားတို့” မည်သူမျှ ဖြစ်ပျက်နေသည့်အရာများကို ဆီးတားနိုင်မည် မဟုတ်ပါ။ (ဟေရှာယ ၄၃:၅-၇; ယေရမိ ၃:၁၄) ပရောဖက်ပြုချက်၌ ဤသို့ ဆို၏– “ကိုယ်တိုင် ဖွားမြင်သော သားတို့တွင် သင့်ကို လမ်းပြသောသူ တစ်ယောက်မျှ မရှိ။ ကိုယ်တိုင် မွေးစားသော သားတို့တွင် သင့်ကို လက်ဆွဲသောသူ တစ်ယောက်မျှ မရှိ။” (ဟေရှာယ ၅၁:၁၈) ဗာဗုလုန်လူမျိုးလက်ထဲတွင် အပြင်းအထန် ဒုက္ခခံရမည် ဖြစ်သည်! “အစာခေါင်းပါး၍ လူဆိတ်ညံခြင်းဘေး၊ ဓားဖြင့် ဖျက်ဆီးခြင်းဘေး တည်းဟူသော ဘေးနှစ်ပါးတို့သည် သင်၏ အပေါ်မှာ ရောက်လာသည် ဖြစ်၍ သင့်အတွက် အဘယ်သူ ငိုကြွေးမြည်တမ်းသနည်း။ ငါသည် အဘယ်သို့ ချမ်းသာပေးနိုင်သနည်း။ သင်၏ သားတို့သည် မိန်းမောတွေဝေကြ၏။ ကျော့ကွင်း၌ ဖမ်းမိသော စိုင်ကဲ့သို့ ခပ်သိမ်းသော လမ်းဝမှာ အိပ်၍ ထာဝရဘုရား၏ အမျက်ထွက်တော်မူခြင်း၊ သင်၏ ဘုရားသခင် ဆုံးမတော်မူခြင်းနှင့် ဝကြ၏။”—ဟေရှာယ ၅၁:၁၉၊ ၂၀။

^၂၃ သနားစရာကောင်းသော ယေရုရှလင်မြို့ပါတကား! သူသည် “အစာခေါင်းပါး၍ လူဆိတ်ညံခြင်းဘေး” အပြင် “ဓားဖြင့် ဖျက်ဆီးခြင်းဘေး” တို့ကို ခံရမည်။ သူမအား သူမ၏ ခြေထောက်ပေါ် ဆက်ရပ်တည်ရန် မလုပ်ဆောင်ပေးနိုင်သောကြောင့် သူ၏ “သားတို့” သည် ချင်းနင်းဝင်ရောက်လာသူ ဗာဗုလုန်လူမျိုးများကို ပြန်ခုခံရန် အကူအညီမဲ့၊ ခွန်အားမဲ့လျက် ရှိနေကြမည်။ ထူးခြားသည်မှာ လမ်းဝ သို့မဟုတ် လမ်းထောင့်များတွင် သူတို့သည် စိတ်ပျက်အားလျော့၊ ချည့်နဲ့အားပြတ်ကာ လဲကြလိမ့်မည်။ (မြည်တမ်းစကား ၂:၁၉; ၄:၁၊ ၂) သူတို့သည် ဘုရားသခင့် အမျက်ဒေါသ ခွက်ဖလားကို သောက်ပြီး ဖြစ်ကာ ပိုက်ကွန်တွင် မိနေသော တိရစ္ဆာန်ကဲ့သို့ အကူအညီမဲ့ ဖြစ်နေမည်။

၂၄၊ ၂၅။ (က) ယေရုရှလင်သည် အဘယ်အရာကို ထပ်၍ ခံစားရမည် မဟုတ်သနည်း။ (ခ) ယေရုရှလင်ပြီးနောက် မည်သူသည် ယေဟောဝါ၏ အမျက်တော် ခွက်ဖလားကို သောက်ရမည်နည်း။

^၂၄ သို့သော် ထိုဝမ်းနည်းဖွယ် အခြေအနေသည် အဆုံးတိုင်မည် ဖြစ်သည်။ ဟေရှာယသည် နှစ်သိမ့်မှု ပေးလျက် ဤသို့ ဆို၏– “သို့ဖြစ်၍ ဒုက္ခဆင်းရဲ ခံရသောသူသည် စပျစ်ရည်နှင့် မဟုတ်ဘဲ ယစ်မူးသောသူ နားထောင်လော့။ သင်၏အရှင် မိမိလူတို့အမှုကို စောင့်တော်မူသော သင်၏ ဘုရားသခင် ထာဝရဘုရား မိန့်တော်မူသည်ကား ‘ကြည့်လော့။ ယိမ်းယိုင်စေသော ဖလား၊ ငါ့အမျက်တော်ဖလားကို သင်၏ လက်မှ ငါယူ၍ သင်သည် နောက်တစ်ဖန် မသောက်ရ။ သင့်ကို ညှဉ်းဆဲသော သူတို့လက်သို့ ထိုဖလားကို ငါလွှဲအပ်မည်။ သင်အား ထိုသူတို့က “ငါတို့ ကျော်နင်းမည်အကြောင်း ဝပ်လျက်နေတော့” ဟု ဆိုကြ၏။ သင်သည်လည်း လူတို့ ကျော်နင်းရအောင် ကိုယ့်ကျောကို မြေပြင်သဖွယ်၊ လမ်းသဖွယ် ဖြစ်စေလေပြီ။’” (ဟေရှာယ ၅၁:၂၁-၂၃၊ သမ္မာ) ယေရုရှလင်မြို့ကို ဆုံးမဒဏ်ပေးပြီးနောက် ယေဟောဝါသည် သနားကြင်နာစွာ ပြုမူရန်နှင့် ခွင့်လွှတ်မှု တင်ပြရန် အဆင်သင့်ရှိတော်မူ၏။

^၂၅ ယခု ယေဟောဝါသည် မိမိ၏ အမျက်တော်ကို ယေရုရှလင်မြို့မှ ဖယ်လိုက်ပြီး ဗာဗုလုန်အပေါ်သို့ ကျရောက်စေမည်။ ဗာဗုလုန်သည် ယေရုရှလင်မြို့ကို ဖြိုဖျက်ပြီး အရှက်ကွဲစေခဲ့ပြီး ဖြစ်မည်။ (ဆာလံ ၁၃၇:၇-၉) သို့သော် ယေရုရှလင်သည် ဗာဗုလုန် သို့မဟုတ် သူ၏ မဟာမိတ်များလက်ထဲတွင် ထိုကဲ့သို့သော ဖလားကို နောက်တစ်ဖန် သောက်ရတော့မည် မဟုတ်ပါ။ ယင်းအစား ခွက်ဖလားကို ယေရုရှလင်၏ လက်မှ ဖယ်ရှားပြီး သူပျက်စီးချိန်တွင် ဝမ်းမြောက်ရွှင်လန်းခဲ့ကြသူများကို ပေးမည် ဖြစ်သည်။ (မြည်တမ်းစကား ၄:၂၁၊ ၂၂) ဗာဗုလုန်သည် လုံးလုံး ယစ်မူးကာ ကျရှုံးသွားမည်။ (ယေရမိ ၅၁:၆-၈) ထိုအတောအတွင်း ဇိအုန်သည် ပြန်နိုးထလာမည်! အခြေအနေ ပြောင်းပြန် ဖြစ်သွားသည်! ဇိအုန်သည် ထိုအလားအလာကြောင့် အမှန်ပင် နှစ်သိမ့်မှု ဖြစ်နိုင်သည်။ ထို့ပြင် ကိုယ်တော်၏ နာမတော်သည် ကိုယ်တော်၏ ကယ်တင်ခြင်း လုပ်ရပ်အားဖြင့် သန့်ရှင်းမြင့်မြတ်စေမည် ဖြစ်ကြောင်း ယေဟောဝါ၏ ကျေးကျွန်များ စိတ်ချနိုင်သည်။

[အောက်ခြေမှတ်ချက်]