အခန်း နှစ်ဆယ့်တစ်

စစ်မှန်သော ဝတ်ပြုရေး ကမ္ဘာတစ်ဝန်း တိုးချဲ့

ဟေရှာယ ၆၀:၁-၂၂

၁။ ဟေရှာယ အခန်းကြီး ၆၀ တွင် အဘယ် အားတက်ဖွယ် သတင်း ပါရှိသနည်း။

ဟေရှာယ အခန်းကြီး ၆၀ ကို စိတ်အားတက်ကြွဖွယ် အဖြစ်အပျက်တစ်ခုအဖြစ် ရေးသားဖော်ပြထားသည်။ အဖွင့်အခန်းငယ်များတွင် ပါသော ရင်နင့်ဖွယ် မြင်ကွင်းတစ်ခုက ကျွန်ုပ်တို့အာရုံကို ဖမ်းစားလိုက်သည်။ ဆက်တိုက် လိုက်ပါလာသော အဖြစ်အပျက် အစဉ်လိုက်သည် ဇာတ်သိမ်းပိုင်းသို့ ဦးတည်သွားသည်။ ရှေးယေရုရှလင်မြို့တွင် စစ်မှန်သော ဝတ်ပြုရေး ပြန်လည်တည်ထောင်ခြင်းနှင့် ယနေ့ စစ်မှန်သော ဝတ်ပြုရေး ကမ္ဘာတစ်ဝန်း တိုးချဲ့သွားခြင်းအကြောင်းကို ကွက်ကွက်ကွင်းကွင်း မြင်သာအောင် ဤအခန်းကြီး၌ ဖော်ပြထားသည်။ ထို့ပြင် ဘုရားသခင်အား သစ္စာစောင့်သိသော ဝတ်ပြုကိုးကွယ်သူအားလုံးအတွက် သိုထားသော ထာဝရ ကောင်းချီးများကို ဖော်ပြသည်။ ဟေရှာယ ပရောဖက်ပြုချက်၏ စိတ်ဝင်စားဖွယ် ဤအပိုင်း ပြည့်စုံခြင်းတွင် ကျွန်ုပ်တို့တစ်ဦးစီ ပါဝင်နိုင်သည်။ ထို့ကြောင့် အသေအချာ ဆန်းစစ်ကြည့်ကြစို့။

အမှောင်ထဲတွင် အလင်းထွန်းလင်း

၂။ အမှောင်ထုထဲတွင် လှဲနေသော အမျိုးသမီးကို အဘယ် အမိန့်ပေးသနည်း၊ သူမ, နာခံရန် အဘယ်ကြောင့် အရေးကြီးသနည်း။

^၂ ဟေရှာယ၏ ဤအခန်းကြီးပါ အဖွင့်စကားများသည် ဝမ်းနည်းဖွယ် အခြေအနေတွင် ရှိသော အမျိုးသမီးတစ်ဦးအား ဦးတည်ပြောဆိုသည်။a သူသည် အမှောင်ထုထဲရှိ မြေပြင်ပေါ် လဲကျနေပုံရသည်။ ရုတ်တရက် ယေဟောဝါသည် ဟေရှာယမှတစ်ဆင့် ဤသို့ ခေါ်လိုက်စဉ် အလင်းသည် မှောင်မိုက်ကို ခွင်းလိုက်၏– “[အို၊ အမျိုးသမီး] သင် ထလော့။ လင်းလော့။ သင်၏ အလင်း ရောက်လာပြီ။ ထာဝရဘုရား၏ ဘုန်းတော်သည် သင်၏အပေါ်မှာ ပေါ်ထွန်းလျက် ရှိ၏။” (ဟေရှာယ ၆၀:၁) မှန်ပါသည်၊ ‘အမျိုးသမီး’ သည် မတ်တတ်ရပ်ပြီး ဘုရားသခင့် ဘုန်းတော်ကို ထွန်းလင်းသင့်သည်! အဘယ်ကြောင့် ဤမျှ အရေးတကြီး ဖြစ်ရသနည်း။ ပရောဖက်ပြုချက်က ဤသို့ ဆက်ဆို၏– “ကြည့်ရှုလော့။ မှောင်မိုက်သည် မြေကြီးကို ဖုံးလွှမ်းလိမ့်မည်။ ထူထပ်သော မှောင်မိုက်သည် လူများကို ဖုံးလွှမ်းလိမ့်မည်။ သို့သော်လည်း သင်၏အပေါ်မှာ ထာဝရဘုရားသည် ပေါ်ထွန်းတော်မူ၍ ဘုန်းတော်သည် သင်၏အပေါ်မှာ ထင်ရှားလျက် ရှိလိမ့်မည်။” (ဟေရှာယ ၆၀:၂) “အမျိုးသမီး” ၏ ပတ်ဝန်းကျင် အမှောင်ထဲ၌ စမ်းတဝါးဝါး သွားနေသူများ၏ အကျိုးအတွက် သူသည် “အလင်း ထွန်းလင်း” ရမည် ဖြစ်သည်။ အဘယ် ရလဒ် ရရှိမည်နည်း။ “တစ်ပါးအမျိုးသား [“လူမျိုးခြား၊” သမ္မာ] တို့သည် သင်၏ အလင်းသို့လည်းကောင်း၊ ရှင်ဘုရင်တို့သည် သင်၌ ပေါ်ထွန်းခြင်း အရောင်သို့လည်းကောင်း လာကြလိမ့်မည်။” (ဟေရှာယ ၆၀:၃) ဤအဖွင့်စကားများသည် ပို၍ အသေးစိတ် ရှင်းလင်းမည့် နောက်အခန်းငယ်များ၏ အကျဉ်းချုပ် ဖြစ်သည်—စစ်မှန်သော ဝတ်ပြုရေးသည် ကမ္ဘာတစ်ဝန်း တိုးချဲ့သွားရမည်!

၃။ (က) ‘အမျိုးသမီး’ သည် မည်သူ ဖြစ်သနည်း။ (ခ) ‘အမျိုးသမီး’ သည် အဘယ်ကြောင့် အမှောင်ထဲတွင် လဲနေခဲ့သနည်း။

^၃ အနာဂတ် အဖြစ်အပျက်များအကြောင်း ပြောနေခြင်း ဖြစ်သော်လည်း ဖြစ်ပျက်ပြီးသော ဖြစ်ရပ်တစ်ခုအဖြစ် ‘အမျိုးသမီး’ ၏ “အလင်း ရောက်လာပြီ” ဟု ယေဟောဝါ မိန့်တော်မူ၏။ ယင်းက ပရောဖက်ပြုချက် ပြည့်စုံမည်မှာ သေချာကြောင်း အလေးပေးဖော်ပြခြင်း ဖြစ်သည်။ ထို ‘အမျိုးသမီး’ သည် ဇိအုန် ဖြစ်သော ယုဒနိုင်ငံ၏ မြို့တော်၊ ယေရုရှလင်မြို့ကို ရည်ညွှန်းခြင်း ဖြစ်သည်။ (ဟေရှာယ ၅၂:၁၊ ၂; ၆၀:၁၄) မြို့တော်သည် လူမျိုးတစ်မျိုးလုံးကို ကိုယ်စားပြုသည်။ ဤပရောဖက်ပြုချက် ဦးဆုံး ပြည့်စုံချိန်၊ ယေရုရှလင်မြို့ ဖျက်ဆီးခံခဲ့ရသည့် ဘီ.စီ.အီး. ၆၀၇ မှစ၍ ‘အမျိုးသမီး’ သည် အမှောင်ထဲတွင် လဲနေသည်ကို တွေ့ရသည်။ သို့ရာတွင် ဘီ.စီ.အီး. ၅၃၇ တွင် ပြည်နှင်ခံရသော ဂျူးများထဲမှ သစ္စာရှိ အကြွင်းအကျန်များသည် ယေရုရှလင်သို့ ပြန်ပြီး စင်ကြယ်သော ဝတ်ပြုရေးကို ပြန်လည်တည်ထောင်ကြသည်။ နောက်ဆုံးတွင် ယေဟောဝါသည် ‘အမျိုးသမီး’ အပေါ် အလင်း ထွန်းလင်းပေးပြီး ကိုယ်တော်၏ ပြန်လည်ထူထောင်ထားသော လူမျိုးသည် ဝိညာဏ အမှောင်ထဲရှိ လူများအလယ်တွင် အလင်းထွန်းလင်းရာ ရင်းမြစ် ဖြစ်ခဲ့သည်။

သာ၍ ကြီးသော ပြည့်စုံချက်

၄။ ယနေ့အချိန်တွင် မြေကြီးပေါ်ရှိ မည်သူသည် ‘အမျိုးသမီး’ ကို ကိုယ်စားပြုသနည်း၊ ပရောဖက်ပြုချက်စကားများသည် မည်သူတို့နှင့်လည်း အကျုံးဝင်ပတ်သက်သနည်း။

^၄ ဤပရောဖက်ပြုချက်စကားများ ရှေးယေရုရှလင်မြို့အပေါ် ပြည့်စုံခြင်းမျှလောက်ကိုသာ ကျွန်ုပ်တို့ စိတ်ဝင်စားခြင်း မဟုတ်ပါ။ ယေဟောဝါ၏ ကောင်းကင်ဆိုင်ရာ ‘အမျိုးသမီး’ သည် ယနေ့အချိန်တွင် မြေကြီးပေါ်ရှိ “ဘုရားသခင်၏ ဣသရေလအမျိုး” ကို ကိုယ်စားပြုသည်။ (ဂလာတိ ၆:၁၆) စီ.အီး. ၃၃ ပင်တေကုတ္တေပွဲနေ့မှစ၍ ယနေ့အချိန်ထိ ကာလတစ်လျှောက် တည်ရှိလာသော ဤဝိညာဏလူမျိုးသည် ကောင်းကင်တွင် ခရစ်တော်နှင့်အတူ အုပ်ချုပ်မည့် အလားအလာ ရှိပြီး “မြေကြီးမှ ရွေးနုတ်သောသူ၊” စုစုပေါင်း ဝိညာဉ်တော်ဖွား ဘိသိက်ခံ အရေအတွက်သည် ၁၄၄,၀၀၀ ရှိလာသည်။ (ဗျာဒိတ် ၁၄:၁၊ ၃) ဟေရှာယ အခန်းကြီး ၆၀ ၏ မျက်မှောက်ခေတ် ပြည့်စုံချက်သည် “နောက်ဆုံးသော နေ့ရက်များ” အတွင်း မြေကြီးပေါ်တွင် အသက်ရှင်နေကြသော ၁၄၄,၀၀၀ အဝင် ဖြစ်သူများအပေါ် ဗဟိုပြုသည်။ (၂ တိမောသေ ၃:၁၊ ကဘ) ပရောဖက်ပြုချက်သည် ထိုဘိသိက်ခံ ခရစ်ယာန်များ၏ အပေါင်းပါများ ဖြစ်သော “အခြားသိုး” မှ “လူအုပ်ကြီး” နှင့်လည်း ဆိုင်သည်။—ဗျာဒိတ် ၇:၉; ယောဟန် ၁၀:၁၁၊ ၁၆။

၅။ ဘုရားသခင်၏ ဣသရေလအမျိုးထဲမှ အသက်ရှင်လွတ်မြောက်ခဲ့သော အဖွဲ့ဝင်များသည် မည်သည့်အချိန်တွင် အမှောင်ထုထဲ၌ လဲနေကြောင်း တွေ့ခဲ့ကြသနည်း၊ အဘယ်အချိန်တွင် သူတို့အပေါ် ယေဟောဝါ၏ အလင်း ထွန်းလင်းခဲ့သနည်း။

^၅ ၁၉၀၀ ပြည့်လွန်နှစ်များ အစောပိုင်း အချိန်တိုအတွင်း မြေကြီးပေါ်တွင် ရှိနေဆဲ ဖြစ်သော ဘုရားသခင်၏ ဣသရေလ အမျိုးအဝင် ဖြစ်သူများက မိမိတို့သည် အမှောင်ထုထဲတွင် လဲနေသည့် အခြေအနေ၌ ရှိကြောင်း တွေ့ခဲ့ကြသကဲ့သို့ ဖြစ်သည်။ ပထမကမ္ဘာစစ်က သူတို့ကို ဗျာဒိတ်ကျမ်း၌ ဖော်ပြထားသော ပုံဆောင် အခြေအနေ—“သောဒုံဟူ၍လည်းကောင်း၊ အဲဂုတ္တုဟူ၍လည်းကောင်း အတွင်းအနက်အားဖြင့် ခေါ်ဝေါ်သော မြို့ကြီး၏ လမ်း၌” လဲနေသော အလောင်းကောင်များအဖြစ်—သို့ ရောက်စေခဲ့သည်။ (ဗျာဒိတ် ၁၁:၈) သို့ရာတွင် ၁၉၁၉ ခုနှစ်တွင် ယေဟောဝါသည် သူတို့အပေါ် အလင်း ထွန်းလင်းပေးခဲ့သည်။ ယင်းကို တုံ့ပြန်သည့်အနေနှင့် သူတို့သည် မတ်တတ်ရပ်ခဲ့ကြပြီး ဘုရားသခင့် နိုင်ငံတော် သတင်းကောင်းကို မကြောက်မရွံ့ ကြွေးကြော်ခြင်းဖြင့် ဘုရားသခင့် အလင်းကို ထင်ရှားစေခဲ့ကြသည်။—မဿဲ ၅:၁၄-၁၆။

၆။ လောကသား အများစုသည် ဘုရင်အဖြစ် ယေရှု ရောက်ရှိခြင်းအကြောင်း ကြွေးကြော်ချက်ကို မည်သို့ တုံ့ပြန်ခဲ့ကြသနည်း၊ သို့သော် ယေဟောဝါ၏ အလင်းသို့ မည်သူတို့ ဆွဲဆောင်ခံခဲ့ရသနည်း။

^၆ ဤ “လောကီမှောင်မိုက်၌ အစိုးတရ ပြုလုပ်သော မင်းတို့” ၏ အကဲအမှူး ဖြစ်သော စာတန့် သြဇာလွှမ်းမိုးမှုအောက်ရှိ လူသားအများစုသည် “ဤလောက၏ အလင်း” ဖြစ်သော ယေရှုခရစ် ဘုရင်အဖြစ် ရောက်ရှိခြင်း ကြေညာချက်ကို ငြင်းပယ်ခဲ့ကြသည်။ (ဧဖက် ၆:၁၂; ယောဟန် ၈:၁၂; ၂ ကောရိန္သု ၄:၃၊ ၄) သို့သော် သန်းနှင့်ချီသောသူတို့သည် ယေဟောဝါ၏ အလင်းသို့ ဆွဲဆောင်ခံခဲ့ရသည်၊ သူတို့ထဲတွင် “ရှင်ဘုရင်တို့” (ကောင်းကင်နိုင်ငံတော်၏ ဘိသိက်ခံ အမွေခံ ဖြစ်လာသူများ) နှင့် “လူမျိုးခြားတို့” (အခြားသိုးအဝင် လူအုပ်ကြီး) ပါဝင်သည်။

တိုးချဲ့ခြင်းက နှလုံးသားထဲမှ ရွှင်လန်းမှု ဖြစ်စေ

၇။ ‘အမျိုးသမီး’ သည် နှလုံးနွေးထွေးဖွယ် အဘယ် မြင်ကွင်းကို မြင်တွေ့သနည်း။

^၇ ဟေရှာယ ၆၀:၃ တွင် ပါသော အဓိက အကြောင်းပေါ် မူတည်၍ ‘အမျိုးသမီး’ ကို ယေဟောဝါ ထပ်ဆင့် ဤအမိန့် ပေးတော်မူ၏– “အရပ်ရပ် [“ပတ်လည်၊” သမ္မာ] သို့ မျှော်ကြည့်လော့!” ‘အမျိုးသမီး’ နာခံ၍ မျှော်ကြည့်သည့်အခါ နှလုံးနွေးထွေးဖွယ် မြင်ကွင်းတစ်ခုကို တွေ့လိုက်ရသည်—သူမ၏ သားသမီးများ အိမ်သို့ ပြန်လာနေသည့် မြင်ကွင်း ဖြစ်သည်! “ခပ်သိမ်းသောသူတို့သည် စုဝေး၍ သင့်ထံသို့ လာကြ၏။ သင်၏ သားသမီးတို့သည် အဝေးက လာ၍ သင်၏ အနားမှာ မွေးစား [“စောင့်ရှောက်၊” ကဘ] ခြင်းကို ခံကြလိမ့်မည်။” (ဟေရှာယ ၆၀:၄) ၁၉၁၉ ခုနှစ်မှ အစပြုခဲ့သော အပြည်ပြည်ဆိုင်ရာ နိုင်ငံတော်သတင်း ကြွေးကြော်ခြင်းကြောင့် နောက်ထပ် ထောင်နှင့်ချီသော ဘိသိက်ခံ “သားသမီးတို့” သည် ဘုရားသခင်၏ ဣသရေလအမျိုးနှင့် ပူးပေါင်းခဲ့ကြသည်။ ဤနည်းဖြင့် ယေဟောဝါသည် ခရစ်တော်နှင့်အတူ စိုးစံမည့်သူ၊ ကြိုဟောထားသော ၁၄၄,၀၀၀ အရေအတွက် ပြည့်ရန် လုပ်ဆောင်ခဲ့သည်။—ဗျာဒိတ် ၅:၉၊ ၁၀။

၈။ ၁၉၁၉ ခုနှစ်မှစ၍ ဘုရားသခင်၏ ဣသရေလသည် ရွှင်လန်းဝမ်းမြောက်ရန် အဘယ် အကြောင်းရင်း ရှိသနည်း။

^၈ ထိုတိုးတက်မှုက ရွှင်လန်းမှုကို ဖြစ်စေခဲ့သည်။ “ထိုအခါ သင်သည် ကြောက်ရွံ့ခြင်းနှင့် ရွှင်လန်းခြင်း ရှိလိမ့်မည်။ နှလုံးတုန်လှုပ် [“လှုပ်ရှား၊” ကဘ] ၍ ဝမ်းမြောက်လိမ့်မည်။ အကြောင်းမူကား သမုဒ္ဒရာ [“ပင်လယ်၊” ကဘ] ၏ ကြွယ်ဝခြင်းသည် သင့်ဘက်သို့ ပြောင်းလဲ၍ တစ်ပါးအမျိုးသားတို့၏ စည်းစိမ်သည် သင့်လက်သို့ ရောက်လိမ့်မည်။” (ဟေရှာယ ၆၀:၅) ၁၉၂၀ နှင့် ၁၉၃၀ ပြည့်လွန်နှစ်များအတွင်း ဘိသိက်ခံများကို စုသိမ်းခြင်းသည် ဘုရားသခင်၏ ဣသရေလအမျိုးအတွက် ကြီးစွာသော ပျော်ရွှင်မှုကို ဖြစ်စေခဲ့သည်။ ထို့ပြင် ရွှင်လန်းရန် ထပ်ဆင့် အကြောင်းရင်းတစ်ခု ရှိသည်။ အထူးသဖြင့် ၁၉၃၀ ပြည့်လွန်နှစ်များ အလယ်လောက်မှစ၍ ဘုရားသခင်နှင့် စိမ်းကားနေသော လူသားထု “ပင်လယ်” ၏ အစိတ်အပိုင်း ဖြစ်ခဲ့ကြသူများသည် ဘုရားသခင်၏ ဣသရေလအမျိုးနှင့်အတူ ဝတ်ပြုကိုးကွယ်ရန် လူအမျိုးမျိုးထဲမှ ထွက်လာခဲ့ကြသည်။ (ဟေရှာယ ၅၇:၂၀; ဟဂ္ဂဲ ၂:၇) ထိုသူတို့သည် ဘုရားသခင်အား ဝတ်ပြုကိုးကွယ်ဖို့ တစ်ယောက် တစ်လမ်းစီ သွားနေကြခြင်း မဟုတ်ပါ။ ယင်းအစား သူတို့သည် ဘုရားသခင့် ‘အမျိုးသမီး’ ထံ လာကြပြီး ဘုရားသခင်၏ စည်းလုံးညီညွတ်သော သိုးအုပ်အဝင် ဖြစ်လာကြသည်။ ရလဒ်အနေနှင့် ဘုရားသခင့် ကျေးကျွန်အားလုံးသည် စစ်မှန်သော ဝတ်ပြုရေး တိုးချဲ့ခြင်းတွင် ပါဝင်ကြသည်။

လူမျိုးခြားများသည် ယေရုရှလင်မြို့သို့ အတူတကွ ရောက်လာကြ

၉၊ ၁၀။ ယေရုရှလင်မြို့သို့ ရောက်လာကြသော မည်သူတို့ကို တွေ့ရသနည်း၊ သူတို့ကို ယေဟောဝါ မည်သို့ လက်ခံတော်မူသနည်း။

^၉ ဟေရှာယ၏ တစ်ခေတ်တည်းသားများနှင့် ရင်းနှီးကျွမ်းဝင်သည့် ဥပမာများကို အသုံးပြုကာ တိုးချဲ့ခြင်းအကြောင်းကို ယေဟောဝါ ဖော်ပြတော်မူ၏။ ‘အမျိုးသမီး’ သည် ဇိအုန်တောင်အပေါ်စီးမှ နေ၍ အရှေ့ဘက် မိုးကုပ်စက်ဝိုင်းကို စေ့စေ့ကြည့်နေသည်။ သူ အဘယ်အရာကို တွေ့ရသနည်း။ “ကုလားအုတ်များနှင့် မိဒျန်ပြည်၊ ဧဖာပြည်မှ ဖြစ်သော ကုလားအုတ်မျိုးတို့သည် သင့်ကို နှံ့ပြား [“ဖုံးအုပ်၊” ကဘ] ကြလိမ့်မည်။ ရှေဘပြည်သားအပေါင်းတို့သည် လာကြလိမ့်မည်။ ရွှေနှင့် လောဗန်ကို ဆောင်ခဲ့၍ ထာဝရဘုရား၏ ဂုဏ်ကျေးဇူးတော်တို့ကို ဝမ်းမြောက်စွာ ချီးမွမ်းကြလိမ့်မည်။” (ဟေရှာယ ၆၀:၆) ကုလားအုတ် ယာဉ်တန်းကြီးများကို အသုံးပြုသော ကုန်သည်လူမျိုးနွယ် အသီးသီးသည် ယေရုရှလင်မြို့သို့ ဦးတည်လျက် လမ်းများပေါ် ခရီးနှင်ခဲ့ကြသည်။ (ကမ္ဘာဦး ၃၇:၂၅၊ ၂၈; တရားသူကြီး ၆:၁၊ ၅; ၃ ဓမ္မရာဇဝင် ၁၀:၁၊ ၂) ကုလားအုတ်များသည် နေရာတကာတွင် ရှိသောကြောင့် ရေလွှမ်းမိုးနေသော ဒေသတစ်ခုကဲ့သို့ ဖြစ်သည်! ယာဉ်တန်းကြီးများသည် အဖိုးတန် လက်ဆောင်များ သယ်ဆောင်လာကြသည်၊ ယင်းက ကုန်သည်များသည် ချစ်ကြည်ရေးအတွက် ရည်ရွယ်၍ လာခြင်း ဖြစ်ကြောင်း တင်ပြသည်။ သူတို့သည် ယေဟောဝါအား ဝတ်ပြုကိုးကွယ်လိုကြပြီး သူတို့ ပေးနိုင်သည့် အကောင်းဆုံးအရာများကို ကိုယ်တော်အား ပေးကြသည်။

^၁၀ ထိုကုန်သည်များ တစ်ဖွဲ့တည်းသာ ခရီးနှင်လာကြသူများ မဟုတ်ပါ။ “ကေဒါပြည်၏ သိုးစုအပေါင်းတို့သည် သင့်ထံမှာ စုဝေးကြလိမ့်မည်။ နဗာယုတ်ပြည်၏ ဆိတ်တို့သည် သင်၏အမှုကို ဆောင်ရွက်” ကြလိမ့်မည်။ မှန်ပါသည်၊ သိုးထိန်း မျိုးနွယ်စုတို့သည်လည်း ယေရုရှလင်မြို့သို့ ခရီးနှင်လာကြသည်။ သူတို့၏ တန်ဖိုးအရှိဆုံး ပိုင်ဆိုင်ရာများ—သိုးအုပ်များ—ကို လက်ဆောင်များအဖြစ် ယူလာကြပြီး အစေအပါများအဖြစ် အမှုဆောင်ရန် မိမိတို့ကိုယ်ကို ပေးဆက်ကြသည်။ သူတို့ကို ယေဟောဝါ မည်သို့ လက်ခံတော်မူသနည်း။ ကိုယ်တော် ဤသို့ မိန့်တော်မူ၏– “နှစ်သက်ဖွယ်သော လက္ခဏာနှင့် ငါ၏ ယဇ်ပလ္လင်ပေါ်သို့ တက်ကြလိမ့်မည်။ ငါ့ဘုန်းထင်ရှားရာ ဗိမာန်ကို ငါသည် သာ၍ ဘုန်းပွင့်စေမည်။” (ဟေရှာယ ၆၀:၇) ယေဟောဝါသည် စင်ကြယ်သော ဝတ်ပြုရေးတွင် အသုံးပြုမည့် သူတို့၏ လက်ဆောင်များကို လက်ခံတော်မူ၏။—ဟေရှာယ ၅၆:၇; ယေရမိ ၄၉:၂၈၊ ၂၉။

၁၁၊ ၁၂။ (က) ‘အမျိုးသမီး’ သည် အနောက်ဘက်အရပ်ကို ကြည့်သည့်အခါ အဘယ် မြင်ကွင်းကို မြင်ရသနည်း။ (ခ) ဤမျှလောက်များစွာသည် ယေရုရှလင်မြို့သို့ အဘယ်ကြောင့် လျင်မြန်စွာ လာနေကြသနည်း။

^၁၁ ယခု ယေဟောဝါသည် ‘အမျိုးသမီး’ အား အနောက်ဘက် မိုးကုပ်စက်ဝိုင်းသို့ မျှော်ကြည့်ရန် မိန့်တော်မူပြီး ကိုယ်တော် ဤသို့ မေးတော်မူ၏– “မိုးတိမ်ကဲ့သို့လည်းကောင်း၊ မိမိတို့အိမ်သို့ ပျံသော ချိုးများကဲ့သို့လည်းကောင်း ပျံလာသော ဤသူတို့ကား အဘယ်သူ ဖြစ်ကြလိမ့်မည်နည်း။” ယေဟောဝါ ကိုယ်တော်တိုင် ဤသို့ ဖြေကြားတော်မူ၏– “အကယ်စင်စစ် သင်၏ ဘုရားသခင် ထာဝရဘုရား၏ နာမတော်ကြောင့်လည်းကောင်း၊ သင်၏ ဘုန်းကို ပွင့်စေသော ဣသရေလအမျိုး၏ သန့်ရှင်းသော ဘုရားကြောင့်လည်းကောင်း သင်၏ သားတို့နှင့်တကွ သူတို့ရွှေ ငွေများကို အဝေး [“ဝေးသောအရပ်၊” ကဘ] မှဆောင်ခဲ့ခြင်းငှာ တစ်ကျွန်းတစ်နိုင်ငံသားတို့သည် ငါ့ကို စောင့်နေ၍ တာရှုသင်္ဘောတို့သည် အဦးပြုကြလိမ့်မည်။”—ဟေရှာယ ၆၀:၈၊ ၉။

^၁၂ သင်သည် ‘အမျိုးသမီး’ နှင့်အတူ ရပ်နေပြီး အနောက်ဘက်အရပ်ရှိ မြေထဲပင်လယ်ပြင်ကို ငေးကြည့်နေသည်ဟု မြင်ယောင်ကြည့်ပါ။ သင် အဘယ်အရာကို မြင်ရသနည်း။ ရေမျက်နှာပြင်ပေါ်တွင် လျှောဆင်းလာသော အဖြူရောင် အစက်လေးများ ဖြစ်သည့် ဝေးလံသော မိုးတိမ်တစ်ခု ဖြစ်သည်။ ၎င်းတို့သည် ငှက်များနှင့် တူသည်၊ သို့သော် သာ၍ နီးလာသည့်အခါ ရွက်ဖွင့်ထားသော သင်္ဘောများ ဖြစ်သည်ကို သင် တွေ့မြင်ရသည်။ သူတို့သည် “ဝေးသောအရပ်မှ” လာကြသည်။b (ဟေရှာယ ၄၉:၁၂) ဇိအုန်မြို့သို့ အလျင်အမြန် ရွက်လွှင့်လာသော သင်္ဘောစုသည် များလွန်းသဖြင့် မိမိ နေရင်းဒေသသို့ ပျံလာသော ချိုးအုပ်နှင့် တူသည်။ ထိုသင်္ဘောစုသည် အဘယ်ကြောင့် ထိုမျှ အလျင်အမြန် လာကြသနည်း။ သင်္ဘောများပေါ် လိုက်ပါလာသော ဝေးလံသည့် ဆိပ်ကမ်းမြို့များမှ လာကြသည့် ယေဟောဝါအား ဝတ်ပြုကိုးကွယ်သူများကို အလျင်အမြန် ပို့ဆောင်ပေးရန် ဖြစ်သည်။ အမှန်ပင်၊ ရောက်လာခါစ လူသစ်အားလုံး—အရှေ့ သို့မဟုတ် အနောက်အရပ်၊ အနီးအနား သို့မဟုတ် ဝေးလံသော ဒေသများမှ ဣသရေလလူမျိုးများရော တစ်ပါးအမျိုးသားများပါ—သည် သူတို့၏ ဘုရားသခင်၊ ယေဟောဝါ၏ နာမတော်ထံ၌ သူတို့ ပိုင်ဆိုင်ရာအားလုံးကို ဆက်ကပ်အပ်နှံရန် ယေရုရှလင်မြို့သို့ လျင်မြန်စွာ လာကြခြင်း ဖြစ်သည်။—ဟေရှာယ ၅၅:၅။

၁၃။ မျက်မှောက်ခေတ်တွင် “သားသမီးတို့” မှာ မည်သူတို့ ဖြစ်ပြီး မည်သူတို့သည် “တစ်ပါးအမျိုးသားတို့၏ စည်းစိမ်” ဖြစ်သနည်း။

^၁၃ ဟေရှာယ ၆၀:၄-၉ တွင် ကွက်ကွက်ကွင်းကွင်း ဖော်ပြထားချက်များက ယေဟောဝါ၏ ‘အမျိုးသမီး’ ဤလောက အမှောင်ထုထဲတွင် စတင် အလင်းထွန်းလင်းခဲ့သည့် အချိန်မှစ၍ ဖြစ်ပျက်ခဲ့သော ကမ္ဘာချီ တိုးချဲ့မှုကို ပုံဖော်ခြင်း ဖြစ်သည်! ဦးဆုံး ရောက်လာသူများမှာ ဘိသိက်ခံ ခရစ်ယာန်များ ဖြစ်လာသော ကောင်းကင်ဇိအုန်၏ “သားသမီးတို့” ဖြစ်သည်။ သူတို့သည် ၁၉၃၁ ခုနှစ်တွင် ယေဟောဝါသက်သေများအဖြစ် မိမိတို့ကိုယ်ကို လူထုရှေ့ ဖော်ပြခဲ့ကြသည်။ ထို့နောက် “တစ်ပါးအမျိုးသားတို့၏ စည်းစိမ်၊” “သမုဒ္ဒရာ၏ ကြွယ်ဝခြင်း” ဖြစ်သည့် စိတ်နှိမ့်ချသူ လူအုပ်ကြီးတစ်အုပ်သည် ခရစ်တော်၏ ညီတော် အကြွင်းအကျန်နှင့် ပူးပေါင်းရန် အလျင်အမြန် ရောက်ရှိလာခဲ့သည်။c ယနေ့အချိန်တွင် ကမ္ဘာ့အရပ် လေးမျက်နှာနှင့် ဘဝပုံစံအမျိုးမျိုးမှ လာကြသော ယေဟောဝါ၏ ကျေးကျွန်အားလုံးသည် အကြွင်းမဲ့ ပိုင်သအုပ်စိုးရှင်၊ ယေဟောဝါကို ချီးမွမ်းရန်နှင့် ကိုယ်တော်၏ နာမတော်ကို စကြဝဠာတစ်ခုလုံးတွင် အကြီးမြတ်ဆုံး နာမတော်အဖြစ် ချီးမြှောက်ရန် ဘုရားသခင်၏ ဣသရေလအမျိုးနှင့် ပူးပေါင်းကြသည်။

၁၄။ ရောက်လာခါစ လူသစ်များသည် မည်သို့ “[ဘုရားသခင်၏] ယဇ်ပလ္လင်ပေါ်သို့ တက်ကြ” သနည်း။

^၁၄ သို့သော် လူမျိုးများထဲမှ ရောက်လာခါစ လူသစ်များသည် “[ဘုရားသခင်၏] ယဇ်ပလ္လင်ပေါ်သို့ တက်ကြ” ခြင်းသည် အဘယ်အရာကို ဆိုလိုသနည်း။ ယဇ်ပလ္လင်ပေါ်တွင် ယဇ်ကောင်ကို တင်ကြသည်။ ယဇ်ပူဇော်သကာနှင့်ပတ်သက်သော အသုံးအနှုန်းကို အသုံးပြုကာ တမန်တော် ပေါလု ဤသို့ ရေးခဲ့၏– “ညီအစ်ကိုတို့ အသက်ရှင်ခြင်း လက္ခဏာ၊ သန့်ရှင်းခြင်း လက္ခဏာ၊ ဘုရားသခင် နှစ်သက်တော်မူဖွယ်သော လက္ခဏာနှင့် ပြည့်စုံသောယဇ်ကို သင်တို့သည် ပူဇော်၍ မိမိကိုယ်ခန္ဓာကို ဘုရားသခင်အား ဆက်ကပ်ခြင်း တည်းဟူသော သင်တို့ပြုအပ်သော ဝတ်ကို ပြုမည်အကြောင်း . . . သင်တို့ကို ငါတိုက်တွန်းနှိုးဆော်ပေ၏။” (ရောမ ၁၂:၁) စစ်မှန်သော ခရစ်ယာန်များသည် မိမိတို့ကိုယ်ကို လိုလိုလားလား ပေးဆက်ကြသည်။ (လုကာ ၉:၂၃၊ ၂၄) သူတို့သည် စင်ကြယ်သော ဝတ်ပြုရေး တိုးတက်စေရန် သူတို့၏ အချိန်၊ ခွန်အားနှင့် စွမ်းရည်တို့ကို ပေးဆက်ကြသည်။ (ရောမ ၆:၁၃) ယင်းသို့ ပြုရာတွင် နှစ်သက်လက်ခံဖွယ် ဖြစ်သော ချီးမွမ်းခြင်းယဇ်ကို ဘုရားသခင်ထံ ပူဇော်ကြသည်။ (ဟေဗြဲ ၁၃:၁၅) ယနေ့ သန်းနှင့်ချီသော ယေဟောဝါအား ဝတ်ပြုကိုးကွယ်သူ၊ လူကြီးလူငယ်တို့သည် မိမိတို့၏ ကိုယ်ပိုင်ဆန္ဒများကို ဘုရားသခင့် နိုင်ငံတော် အကျိုးစီးပွားနှင့်စာလျှင် ဒုတိယနေရာတွင် ထားကြသည်မှာ အလွန် အားရစရာ ဖြစ်သည်! သူတို့သည် စစ်မှန်သော ကိုယ်ကျိုးစွန့်စိတ်ဓာတ်ကို တင်ပြကြသည်။—မဿဲ ၆:၃၃; ၂ ကောရိန္သု ၅:၁၅။

တိုးချဲ့ခြင်းလုပ်ငန်းတွင် အသစ်ရောက်လာသူများ ပါဝင်ကြ

၁၅။ (က) ရှေးအချိန်က လူမျိုးခြားများနှင့်ပတ်သက်သော ယေဟောဝါ၏ ကရုဏာတော်ကို မည်သို့ တင်ပြခဲ့သနည်း။ (ခ) မျက်မှောက်ခေတ်တွင် “လူမျိုးခြားတို့” သည် စစ်မှန်သော ဝတ်ပြုရေး တည်ဆောက်ခြင်းတွင် မည်သို့ ပါဝင်ခဲ့ကြသနည်း။

^၁၅ အသစ်ရောက်လာသူများသည် ယေဟောဝါ၏ ‘အမျိုးသမီး’ ကို အထောက်အမ ပေးရန် သူတို့၏ ပိုင်ဆိုင်ရာများနှင့် သူတို့ကိုယ်တိုင်၏ လုပ်အားကို ပေးဆက်ကြသည်။ “လူမျိုးခြားတို့သည် သင်၏ မြို့ရိုးကို တည်ပြန်၍ သူတို့၏ ဘုရင်များလည်း သင်၏ အမှုကို ဆောင်ရွက်ကြလိမ့်မည်။ အကြောင်းမူကား ငါသည် အမျက်ထွက်၍ သင့်ကို ဒဏ်ခတ်သော်လည်း မေတ္တာစိတ်နှင့် ကရုဏာ ပြဦးမည်။” (ဟေရှာယ ၆၀:၁၀၊ သမ္မာ) လူမျိုးခြားများ ယေရုရှလင်ရှိ ဆောက်လုပ်ရေးလုပ်ငန်းတွင် အကူအညီ ပေးခဲ့ကြချိန်၊ ဘီ.စီ.အီး. ခြောက်ရာစုတွင် ယေဟောဝါ၏ ကရုဏာကို တင်ပြခဲ့သည်။ (ဧဇရ ၃:၇; နေဟမိ ၃:၂၆) ယနေ့ သာ၍ ကြီးသော ပြည့်စုံချက်တွင် “လူမျိုးခြားတို့” ဖြစ်သော လူအုပ်ကြီးသည် စစ်မှန်သော ဝတ်ပြုရေး တည်ထောင်ရာတွင် ဘိသိက်ခံ အကြွင်းအကျန်ကို ထောက်မပေးကြသည်။ သူတို့၏ ကျမ်းစာသင်သားများကို ခရစ်ယာန် အရည်အသွေးများ ပြုစုပျိုးထောင်ရန် ကူညီပေးခြင်းဖြင့် ခရစ်ယာန် အသင်းတော်ကို တည်ထောင်ကြကာ ယေဟောဝါ၏ အဖွဲ့အစည်း၏ “မြို့ရိုး” များသဖွယ် ဖြစ်ရာကို ခိုင်ခံ့စေကြသည်။ (၁ ကောရိန္သု ၃:၁၀-၁၅) သူတို့သည် နိုင်ငံတော်ခန်းမများ၊ စည်းဝေးပွဲခန်းမများနှင့် ဗေသလ အဆောက်အအုံများ ဆောက်လုပ်ခြင်းတွင် ကြိုးစားလုပ်ဆောင်ကြခြင်းဖြင့် ပကတိ ဆောက်လုပ်ခြင်း၌လည်း ပါဝင်ကြသည်။ ထို့ကြောင့် သူတို့သည် ယေဟောဝါ၏ တိုးချဲ့နေသော အဖွဲ့အစည်း၏ လိုအပ်ရာများကို ဖြည့်စွက်ပေးရာ၌ ဘိသိက်ခံ ညီအစ်ကိုများနှင့် ပူးပေါင်းကြသည်။—ဟေရှာယ ၆၁:၅။

၁၆၊ ၁၇။ (က) ဘုရားသခင့် အဖွဲ့အစည်း၏ “တံခါးတို့” ကို မည်သို့ ဖွင့်ထားလျက် ရှိစေခဲ့သနည်း။ (ခ) “ရှင်ဘုရင်တို့” သည် ဇိအုန်အတွက် မည်သို့ အမှုဆောင်ခဲ့ကြသနည်း။ (ဂ) ယေဟောဝါက “တံခါးတို့” ကို ပွင့်နေရန် အလိုရှိတော်မူသော်လည်း ပိတ်ရန် ကြိုးစားသူများ၌ အဘယ်အရာ ဖြစ်ပျက်မည်နည်း။

^၁၆ နှစ်စဉ် ဝိညာဏ ဆောက်လုပ်ရေး အစီအစဉ်၏ အကျိုးဆက်အနေနှင့် သိန်းနှင့်ချီသော “လူမျိုးခြားတို့” သည်ယေဟောဝါ၏ အဖွဲ့အစည်းနှင့် စတင်ပူးပေါင်းလာကြပြီး နောက်ထပ်လူများအတွက် လမ်းပွင့်နေဆဲ ဖြစ်သည်။ ယေဟောဝါ ဤသို့ မိန့်တော်မူ၏– “လူမျိုးခြားတို့၏ စည်းစိမ်ကို သူတို့ဘုရင်များသည် ဦးဆောင်လျက် သင့်ထံသို့ ဆောင်သွင်းမည်အကြောင်း သင်၏ တံခါးများကို နေ့ညမပိတ်ဘဲ အစဉ် ဖွင့်ထားရလိမ့်မည်။” (ဟေရှာယ ၆၀:၁၁) ထိုသို့ဖြစ်လျှင် လူမျိုးခြားတို့၏ စည်းစိမ်ကို ဇိအုန်သို့ သယ်ဆောင်ရာတွင် ဦးဆောင်ကြသည့် “ရှင်ဘုရင်တို့” သည် မည်သူတို့နည်း။ ရှေးအချိန်က ဇိအုန်အတွက် ‘အမှုဆောင်ရန်’ အချို့သော အုပ်စိုးသူများ၏ နှလုံးကို ယေဟောဝါ လှုံ့ဆော်ခဲ့သည်။ ဥပမာ၊ ကုရုသည် ဂျူးလူမျိုးများ ဗိမာန်တော်ကို ပြန်လည်တည်ဆောက်ရန် ပြန်လွှတ်ခြင်းဖြင့် အစပြုလုပ်ဆောင်ခဲ့သည်။ နောက်ပိုင်းတွင် အာတဇေရဇ်သည် အလှူငွေများစွာ ပေးကာ ယေရုရှလင်မြို့ရိုးကို ပြန်လည်တည်ဆောက်ရန် နေဟမိကို စေလွှတ်ခဲ့သည်။ (ဧဇရ ၁:၂၊ ၃; နေဟမိ ၂:၁-၈) “ရှင်ဘုရင်၏ စိတ်နှလုံးသည် ရေချောင်းကဲ့သို့ ဖြစ်၍ ထာဝရဘုရား၏ လက်တော်၌ ရှိ” သည်မှာ အမှန် ဖြစ်သည်။ (သုတ္တံ ၂၁:၁) ကျွန်ုပ်တို့၏ ဘုရားသခင်သည် တန်ခိုးကြီးသော အုပ်စိုးသူများကိုပင် ကိုယ်တော်၏ အလိုတော်နှင့်အညီ ပြုမူဆောင်ရွက်ရန် လှုံ့ဆော်နိုင်တော်မူ၏။

^၁၇ မျက်မှောက်ခေတ်တွင် များစွာသော “ရှင်ဘုရင်တို့” သို့မဟုတ် လောကီအာဏာပိုင်များသည် ယေဟောဝါ အဖွဲ့အစည်း၏ “တံခါးတို့” ကို ပိတ်ရန် ကြိုးစားခဲ့ကြသည်။ သို့သော် အခြားသူများသည် ထို “တံခါးတို့“ ဆက်ပွင့်နေစေရန် အကူအညီ ဖြစ်စေသော စီရင်ချက်များ ချပေးခြင်းဖြင့် ဇိအုန်၏ အမှုတော်ကို ဆောင်ခဲ့ကြသည်။ (ရောမ ၁၃:၄) ၁၉၁၉ ခုနှစ်တွင် လောကီအာဏာပိုင်များသည် ဂျိုးဇက် အက်ဖ်. ရပ်သဖော့ဒ်နှင့် သူ၏ အပေါင်းပါများကို မတရားထောင်ချခြင်းမှ လွှတ်ပေးခဲ့သည်။ (ဗျာဒိတ် ၁၁:၁၃) စာတန် ကောင်းကင်မှ ကျလာပြီးနောက် သူ ဖြစ်ပေါ်စေခဲ့သော နှိပ်စက်ညှဉ်းပန်းခြင်း ရေလွှမ်းမိုးမှုကို လူသားအစိုးရများသည် “မျို” ပစ်ခဲ့ကြသည်။ (ဗျာဒိတ် ၁၂:၁၆) အစိုးရအချို့သည် ဘာသာရေး လွတ်လပ်မှုကို အတည်ပြုပေးခဲ့ကြပြီး တစ်ခါတစ်ရံ အထူးသဖြင့် ယေဟောဝါသက်သေများ၏ အကျိုးအတွက် ထိုသို့ ပြုခြင်း ဖြစ်သည်။ ထိုကဲ့သို့သော အမှုဆောင်ပေးခြင်းက စိတ်နှိမ့်ချသောသူများစွာအား ယေဟောဝါ၏ အဖွဲ့အစည်းသို့ ပွင့်နေသော “တံခါးတို့” မှ အလွယ်တကူ ဝင်ရောက်စေနိုင်ခဲ့သည်။ ထို “တံခါးတို့” ကို ပိတ်ရန် ကြိုးစားကြသော ဆန့်ကျင်သူများနှင့်ပတ်သက်၍ကော အသို့နည်း။ သူတို့ ဘယ်တော့မျှ အောင်မြင်မည် မဟုတ်ပါ။ သူတို့နှင့်ပတ်သက်၍ ယေဟောဝါ ဤသို့ မိန့်တော်မူ၏– “အကြင်ပြည်နှင့် အကြင်နိုင်ငံသည် သင်၏ အမှုကို မဆောင်၊ ထိုပြည်နှင့် ထိုနိုင်ငံသည် ပျက်စီးရလိမ့်မည်။ ထိုသို့သော တိုင်းနိုင်ငံတို့သည် သုတ်သင်ပယ်ရှင်းခြင်းကို အမှန် ခံရကြလိမ့်မည်။” (ဟေရှာယ ၆၀:၁၂) ဘုရားသခင်၏ ‘အမျိုးသမီး’ ကို—တစ်ဦးချင်းစီ သို့မဟုတ် အဖွဲ့အစည်းများအလိုက်—ဆန့်ကျင်တိုက်ခိုက်သူအားလုံးသည် ရောက်ရှိလာတော့မည့် အာမဂေဒုန်စစ်ပွဲတွင် နောက်ဆုံး ဖျက်ဆီးခံရမည်။—ဗျာဒိတ် ၁၆:၁၄၊ ၁၆။

၁၈။ (က) ဣသရေလပြည်တွင် သစ်ပင်များ ရှင်သန်ပေါက်ရောက်ကြမည်ဟူသော ကတိတော်သည် အဘယ်အရာကို ဆိုလိုသနည်း။ (ခ) ယနေ့အချိန်တွင် ‘ယေဟောဝါ၏ ခြေတင်ရာအရပ်’ ကား အဘယ်နည်း။

^၁၈ တရားစီရင်ချက်နှင့်ပတ်သက်သော ဤသတိပေးချက်ပြီးနောက် ပရောဖက်ပြုချက်သည် ဝမ်းမြောက်ခြင်းနှင့် ကြီးပွားတိုးတက်ခြင်းဆိုင်ရာ ကတိတော်များဘက်သို့ ပြန်လှည့်လိုက်သည်။ မိမိ၏ ‘အမျိုးသမီး’ ကို ယေဟောဝါ ဤသို့ မိန့်တော်မူ၏– “ငါ၏ သန့်ရှင်းရာဌာနကို တင့်တယ်စေခြင်းငှာ လေဗနုန် ဘုန်းနှင့်တကွ ထင်းရှူးပင်၊ တဒေရပင်၊ တာရှုရပင်တို့သည် သင့်ထံသို့ တညီတညွတ်တည်း ရောက်လာကြလိမ့်မည်။ ငါသည် ငါ၏ ခြေတင်ရာအရပ်ကို ဘုန်းပွင့်စေမည်။” (ဟေရှာယ ၆၀:၁၃) စိမ်းလန်းစိုပြေသော သစ်ပင်များသည် တင့်တယ်မှုနှင့် သီးပွင့်တိုးပွားမှုကို ပုံဆောင်သည်။ (ဟေရှာယ ၄၁:၁၉; ၅၅:၁၃) ဤအခန်းငယ်တွင် ပါသော “သန့်ရှင်းရာဌာန” နှင့် “ငါ၏ ခြေတင်ရာအရပ်” ဟူသော အသုံးအနှုန်းများသည် ယေရုရှလင်မြို့ရှိ ဗိမာန်တော်ကို ရည်ညွှန်းသည်။ (၁ ရာဇဝင်ချုပ် ၂၈:၂; ဆာလံ ၉၉:၅) သို့ရာတွင် ယေရုရှလင်မြို့ရှိ ဗိမာန်တော်သည် ကြိုဟောထားသော သာ၍ ကြီးမြတ်သည့် ဝိညာဏ ဗိမာန်တော်—ခရစ်တော်၏ ရွေးနုတ်ဖိုးပေါ် အခြေခံသည့် ဝတ်ပြုကိုးကွယ်မှုတွင် ယေဟောဝါထံ ချဉ်းကပ်နိုင်သော အစီအစဉ်—၏ ပုံပမာအရိပ် ဖြစ်သည်ဟု တမန်တော် ပေါလု ရှင်းပြခဲ့သည်။ (ဟေဗြဲ ၈:၁-၅; ၉:၂-၁၀၊ ၂၃) ယနေ့အချိန်တွင် ယေဟောဝါသည် ဤမဟာဝိညာဏ ဗိမာန်တော်၏ မြေကြီးရင်ပြင် ဖြစ်သော ‘ကိုယ်တော်၏ ခြေတင်ရာအရပ်’ ကို ဘုန်းအသရေ ရှိစေသည်။ ထိုဘုန်းအသရေ ရှိမှုက ထိုနေရာရှိ စစ်မှန်သော ဝတ်ပြုရေးတွင် ပါဝင်ရန် လူမျိုးအပေါင်းမှ လူများစွာကို ဆွဲဆောင်မှု ဖြစ်စေသည်။—ဟေရှာယ ၂:၁-၄; ဟဂ္ဂဲ ၂:၇။

၁၉။ ဆန့်ကျင်သူများသည် အဘယ်အရာကို အသိအမှတ်ပြုရန် ဖိအားပေးခံရမည်နည်း၊ အဘယ် နောက်ဆုံးအချိန်တွင် ထိုသို့ ပြုလုပ်ကြမည်နည်း။

^၁၉ ယခု ယေဟောဝါသည် ဆန့်ကျင်သူများဘက်သို့ အာရုံလှည့်လိုက်ကာ ဤသို့ မိန့်တော်မူ၏– “သင့်ကို ညှဉ်းဆဲသောသူတို့၏ သားတို့သည် သင့်ထံသို့ လာ၍ ဦးချကြလိမ့်မည်။ သင့်ကို မထီမဲ့မြင်ပြုသောသူအပေါင်းတို့သည် သင်၏ ခြေရင်း၌ ဝပ်နေကြလိမ့်မည်။ ထာဝရဘုရား၏ မြို့၊ ဣသရေလအမျိုး၏ သန့်ရှင်းသောဘုရား၏ ဇိအုန်မြို့ဟူ၍ သင့်ကို သမုတ်ကြလိမ့်မည်။” (ဟေရှာယ ၆၀:၁၄) မှန်ပါသည်၊ မိမိလူမျိုးအပေါ် ဘုရားသခင်၏ ကောင်းချီးများကြောင့် အလျှံပယ် တိုးပွားခြင်းနှင့် သာလွန်မြင့်မြတ်သော အသက်တာ လမ်းစဉ်ကို တွေ့မြင်ရခြင်းက ဆန့်ကျင်သူအချို့အား ‘အမျိုးသမီး’ ကို ဦးချခြင်းမျိုး ပြုလုပ်ရန် ဖိအားပေးခံရမည်။ ဆိုလိုသည်မှာ ဘိသိက်ခံ အကြွင်းအကျန်နှင့် သူတို့၏ အပေါင်းပါများသည် ဘုရားသခင်၏ ကောင်းကင်အဖွဲ့အစည်း ဖြစ်သော “ထာဝရဘုရား၏ မြို့၊ ဣသရေလအမျိုး၏ သန့်ရှင်းသော ဘုရား၏ ဇိအုန်မြို့” ကို အမှန်ပင် ကိုယ်စားပြုသူများ ဖြစ်ကြောင်း—အာမဂေဒုန်တွင် နောက်ဆုံး—အသိအမှတ်ပြုရန် ဖိအားပေးခံရမည် ဖြစ်သည်။

ဥစ္စာအင်ခွင်များကို အသုံးပြုခြင်း

၂၀။ ‘အမျိုးသမီး’ သည် အဘယ် မဟာပြောင်းလဲမှုကြီးနှင့် ကြုံတွေ့သနည်း။

^၂၀ ယေဟောဝါ၏ ‘အမျိုးသမီး’ ကြုံတွေ့ခံစားရသော မဟာပြောင်းလဲမှုကြီးပါတကား! ယေဟောဝါ ဤသို့ မိန့်တော်မူ၏– “သင့်ကို အဘယ်သူမျှ လျှောက်၍ မသွားရမည်အကြောင်း သူတစ်ပါးတို့သည် သင့်ကို စွန့်ပစ်ရွံရှာကြသည်အတွက် ငါသည် သင့်ကို ထာဝရ အထွတ်အမြတ် [“ဂုဏ်ယူဖွယ်ရာ၊” ကဘ] ဖြစ်စေမည်။ လူမျိုးအစဉ်အဆက် ဝမ်းမြောက်စရာအကြောင်းလည်း ဖြစ်စေမည်။ သင်သည် တစ်ပါးအမျိုးသားတို့၏ နို့ကို စို့ရလိမ့်မည်။ ရှင်ဘုရင်တို့၏ သားမြတ်ကိုလည်း စို့ရလိမ့်မည်။ ငါထာဝရဘုရားသည် သင့်ကို ကယ်တင်သောသူ၊ ယာကုပ်အမျိုး၌ တန်ခိုးကြီးသော ဘုရားသည် သင့်ကို ရွေးနုတ်သောသူ ဖြစ်ကြောင်းကို သင်သည် သိရလိမ့်မည်။”—ဟေရှာယ ၆၀:၁၅၊ ၁၆။

၂၁။ (က) ရှေးယေရုရှလင်သည် “ဂုဏ်ယူဖွယ်ရာ” မည်သို့ ဖြစ်လာသနည်း။ (ခ) ယေဟောဝါ၏ ဘိသိက်ခံ ကျေးကျွန်များသည် ၁၉၁၉ ခုနှစ်မှစ၍ အဘယ် ကောင်းချီး ခံစားခဲ့ရသနည်း၊ သူတို့သည် “တစ်ပါးအမျိုးသားတို့၏ နို့ကို” မည်သို့ စို့ခဲ့ကြသနည်း။

^၂၁ ရှေးယေရုရှလင်သည် “အဘယ်သူမျှ လျှောက်၍ မသွားရ” ဟု ပြောရသည်အထိ အနှစ် ၇၀ လုံးလုံး မတည်ရှိခဲ့ပါ။ သို့သော် ဘီ.စီ.အီး. ၅၃၇ မှစ၍ ယေဟောဝါသည် မြို့ကို ပြန်လည်လူစည်ကားစေပြီး “ဂုဏ်ယူဖွယ်ရာ” ဖြစ်စေသည်။ အလားတူပင် ပထမကမ္ဘာစစ်အပြီးတွင် ဘုရားသခင်၏ ဣသရေလအမျိုးသည် ‘လုံးလုံး စွန့်ပစ်’ ခံရသည်ဟု ခံစားရသော ပျက်စီးခြင်းကာလတစ်ခုကို ကြုံတွေ့ခဲ့ရသည်။ သို့သော်၊ ၁၉၁၉ ခုနှစ်တွင် ယေဟောဝါသည် မိမိ၏ ဘိသိက်ခံ ကျေးကျွန်များကို သုံ့ပန်းဘဝမှ ရွေးနုတ်ခဲ့ပြီး ထိုအချိန်မှစ၍ ကိုယ်တော်သည် သူတို့ကို မကြုံစဖူးသော နှုန်းနှင့် တိုးချဲ့ခြင်း၊ ဝိညာဏ ကြီးပွားမှုတို့ဖြင့် ကောင်းချီးပေးခဲ့သည်။ ကိုယ်တော်၏ လူမျိုးတော်သည် “တစ်ပါးအမျိုးသားတို့၏ နို့ကို” စို့ခဲ့ကြသည်၊ စစ်မှန်သော ဝတ်ပြုရေး တိုးတက်စေရန် တိုင်းနိုင်ငံများ၏ အဖိုးတန် ဥစ္စာအင်ခွင်များကို အသုံးပြုကြခြင်းအားဖြင့် ဖြစ်သည်။ ဥပမာ၊ မျက်မှောက်ခေတ် နည်းပညာကို ပညာရှိရှိ အသုံးပြုခြင်းဖြင့် သမ္မာကျမ်းစာနှင့် ကျမ်းစာစာပေများကို ဘာသာစကား ရာနှင့်ချီ၍ ဘာသာပြန်၊ ထုတ်ဝေနိုင်ခဲ့သည်။ ရလဒ်အနေနှင့် နှစ်စဉ် သိန်းချီသောသူများသည် ယေဟောဝါသက်သေများနှင့် ကျမ်းစာလေ့လာကြပြီး ယေဟောဝါသည် ယေရှုခရစ်မှတစ်ဆင့် သူတို့၏ ကယ်တင်ရှင်နှင့် ရွေးနုတ်ရှင် ဖြစ်ကြောင်း သိရှိလာကြသည်။—တမန်တော် ၅:၃၁; ၁ ယောဟန် ၄:၁၄။

အဖွဲ့အစည်းဆိုင်ရာ တိုးတက်မှု

၂၂။ အဘယ် အထူးတိုးတက်မှုမျိုးကို ယေဟောဝါ ကတိပြုတော်မူသနည်း။

^၂၂ ယေဟောဝါ၏ လူမျိုးတော် အရေအတွက် တိုးများလာခြင်းသည် အဖွဲ့အစည်းလိုက် တိုးတက်မှုများနှင့် ဒွန်တွဲနေသည်။ ယေဟောဝါ ဤသို့ မိန့်တော်မူ၏– “ကြေးဝါအရာ၌ ရွှေကိုလည်းကောင်း၊ သံအရာ၌ ငွေကိုလည်းကောင်း၊ သစ်သားအရာ၌ ကြေးဝါကိုလည်းကောင်း၊ ကျောက်အရာ၌ သံကိုလည်းကောင်း ငါဆောင်ခဲ့မည်။ သင်၏ အရာရှိတို့ကို ငြိမ်သက်သောသဘော၊ အခွန်ခံတို့ကို ဖြောင့်မတ်သောသဘောနှင့် ပြည့်စုံစေမည်။” (ဟေရှာယ ၆၀:၁၇) ကြေးဝါအရာ၌ ရွှေကို အစားထိုးခြင်းသည် တိုးတက်မှုတစ်ခု ဖြစ်သည်၊ ဖော်ပြထားသော အခြားပစ္စည်းများလည်း ထပ်တူပင် ဖြစ်သည်။ ၎င်းနှင့်အညီ ယေဟောဝါ၏ လူမျိုးသည် ဤနောက်ဆုံးကာလအတွင်း အဖွဲ့အစည်းလိုက် အစီအစဉ်များ တိုးတက်မှုကို တွေ့ကြုံခံစားခဲ့ရသည်။

၂၃၊ ၂၄။ ၁၉၁၉ ခုနှစ်မှစ၍ ယေဟောဝါ၏ လူမျိုးတော်သည် အဖွဲ့အစည်းဆိုင်ရာ တိုးတက်ခဲ့သော အဘယ် အစီအစဉ်များကို ကြုံတွေ့ခဲ့သနည်း။

^၂၃ ၁၉၁၉ ခုနှစ်တွင် အသင်းတော်များ၌ ဒီမိုကရေစီ နည်းစနစ်ဖြင့် မဲပေးရွေးကောက်တင်မြှောက်ခံရသော အကြီးအကဲများနှင့် သင်းထောက်များ ရှိခဲ့သည်။ ထိုနှစ်မှစ၍ အသင်းတော်တွင် လယ်ကွင်းလုပ်ငန်း လှုပ်ရှားမှုများကို ကြီးကြပ်ရန် လုပ်ငန်းတော် ဒါရိုက်တာတစ်ဦးကို သီအိုကရက်တစ် နည်းဖြင့် ခန့်အပ်ခဲ့သည်၊ သို့သော် မဲဖြင့် ရွေးကောက်ခံထားရသော အကြီးအကဲအချို့သည် လုပ်ငန်းတော် ဒါရိုက်တာကို ဆန့်ကျင်ကန့်ကွက်သည့် ကိစ္စများ ရှိခဲ့သည်။ ၁၉၃၂ ခုနှစ်တွင် အစီအစဉ် ပြောင်းလဲခဲ့သည်။ အသင်းတော်များသည် အကြီးအကဲများနှင့် သင်းထောက်များကို မဲစနစ်ဖြင့် ရွေးကောက်ခြင်း မပြုတော့ရန် ကင်းမျှော်စင် မဂ္ဂဇင်းမှတစ်ဆင့် ညွှန်ကြားခဲ့သည်။ ယင်းအစား လုပ်ငန်းတော် ဒါရိုက်တာနှင့်အတူ အမှုဆောင်ရန် လုပ်ငန်းတော် ကော်မတီတစ်ခုကို ရွေးကောက်မည် ဖြစ်သည်။ ယင်းသည် ကြီးမားသော တိုးတက်မှုတစ်ခု ဖြစ်ခဲ့သည်။

^၂၄ ၁၉၃၈ ခုနှစ်တွင် အသင်းတော်အတွင်းရှိ ကျေးကျွန်အားလုံးကို သီအိုကရက်တစ် နည်းလမ်းအရ ခန့်အပ်ရန် အစီအစဉ် ထူထောင်ခဲ့ချိန်တွင် ထပ်၍ ရွှေများ ဆောင်ကြဉ်းခဲ့သည်။ အသင်းတော် စီမံခန့်ခွဲမှု တာဝန်ကို ကုမ္ပဏီ အမှုထမ်း (နောက်ပိုင်းတွင် အသင်းတော် အမှုထမ်း) နှင့် သူ့ကို ထောက်ကူသည့် အမှုထမ်း အသီးသီးက လုပ်ဆောင်ကြပြီး သူတို့အားလုံးသည် “သစ္စာနှင့် သတိပညာရှိသော ကျွန်” ၏ ကြီးကြပ်မှုအောက် ခန့်အပ်ခံရသူများ ဖြစ်ကြသည်။d (မဿဲ ၂၄:၄၅-၄၇၊ သမ) သို့ရာတွင်၊ ၁၉၇၂ ခုနှစ်၌ အသင်းတော်တစ်ခုကို တစ်ဦးတစ်ယောက်က မဟုတ်ဘဲ အကြီးအကဲအဖွဲ့က ကြီးကြပ်သည့် ကျမ်းစာနည်းလမ်းကို တွေ့ရှိခဲ့ကြသည်။ (ဖိလိပ္ပိ ၁:၁) အသင်းတော် ကိစ္စရပ်များ၌ရော၊ အုပ်ချုပ်ရေးအဖွဲ့၏ ကိစ္စရပ်များ၌ပါ အခြားပြုပြင်ပြောင်းလဲမှုများ ပြုလုပ်ခဲ့သည်။ အုပ်ချုပ်ရေးအဖွဲ့နှင့်ပတ်သက်သော ပြောင်းလဲမှု ဥပမာတစ်ခုအနေနှင့် ၂၀၀၀ ပြည့်နှစ် အောက်တိုဘာ ၇ ရက်နေ့တွင် ပဲင်စီလ်ဘေးနီးယား ကင်းမျှော်စင်အသင်းနှင့် ယင်းအောက် ဖွဲ့စည်းထားသော ကော်ပိုရေးရှင်းများ၏ ဒါရိုက်တာများအဖြစ် အမှုဆောင်ခဲ့ကြသော အုပ်ချုပ်ရေး အဖွဲ့ဝင်များသည် မိမိတို့ရာထူးမှ ဆန္ဒအလျောက် စွန့်လွှတ်ကြောင်း ကြေညာခဲ့သည်။ သို့ဖြင့် သစ္စာနှင့် သတိပညာရှိ ကျွန်ကို ကိုယ်စားပြုသော အုပ်ချုပ်ရေးအဖွဲ့သည် ‘ဘုရားသခင်၏ အသင်းတော်’ နှင့် သူ၏ အပေါင်းပါ အခြားသိုးများကို ဝိညာဉ်ရေးတွင် ကြီးကြပ်ရန် ပို၍ အာရုံစိုက်နိုင်စေသည်။ (တမန်တော် ၂၀:၂၈) ယင်းသို့သော အစီအစဉ်အားလုံးသည် တိုးတက်မှုများပင်။ ယင်းတို့သည် ယေဟောဝါ၏ အဖွဲ့အစည်းကို ခိုင်ခံ့စေပြီး ကိုယ်တော်အား ဝတ်ပြုကိုးကွယ်သူများအတွက် ကောင်းချီး ဖြစ်ခဲ့သည်။

၂၅။ ယေဟောဝါ လူမျိုးတော်၏ အဖွဲ့အစည်းဆိုင်ရာ တိုးတက်မှုများ နောက်ကွယ်၌ မည်သူ ရှိသနည်း၊ အဘယ် အကျိုးကျေးဇူးကို ရိတ်သိမ်းရသနည်း။

^၂၅ ထိုတိုးတက်ပြောင်းလဲမှုများ၏ နောက်ကွယ်၌ မည်သူ ရှိသနည်း။ စည်းစနစ်ကျနမှုဆိုင်ရာ စွမ်းရည်၊ ကျွမ်းကျင်လိမ္မာစွာ စဉ်းစားတွေးခေါ်တတ်သည့် လူတချို့ကြောင့်လော။ မဟုတ်ပါ၊ “ရွှေကို . . . ငါဆောင်ခဲ့မည်” ဟု မိန့်တော်မူသော ယေဟောဝါကြောင့် ဖြစ်သည်။ ဤတိုးတက်မှုအားလုံးသည် ဘုရားသခင်၏ ညွှန်ကြားမှုကြောင့် ဖြစ်သည်။ ယေဟောဝါ၏ လူမျိုးသည် ကိုယ်တော်၏ ညွှန်ကြားချက်များကို လိုက်နာပြီး ပြုပြင်ပြောင်းလဲကြသည်နှင့်အမျှ အကျိုးကျေးဇူးများကို ရိတ်သိမ်းရသည်။ သူတို့အလယ်တွင် ငြိမ်သက်မှု ရှိပြီး ဖြောင့်မတ်ခြင်းကို မြတ်နိုးခြင်းက ကိုယ်တော့်အမှုတော် ဆောင်ရန် သူတို့ကို လှုံ့ဆော်ပေးသည်။

၂၆။ ဆန့်ကျင်သူများပင် သတိပြုမိသည့် စစ်မှန်သည့် ခရစ်ယာန်များ၏ အမှတ်အသားကား အဘယ်နည်း။

^၂၆ ဘုရားပေး ငြိမ်သက်ခြင်းတွင် ပြောင်းလဲသော အကျိုးသက်ရောက်မှုတစ်ခု ရှိသည်။ ယေဟောဝါ ဤသို့ ကတိပြုတော်မူ၏– “သင်၏ ပြည်၌ အနိုင်အထက်ပြုခြင်းအသံကို နောက်တစ်ဖန် မကြားရ။ သင်၏ နယ်အတွင်းတွင် လုယူဖျက်ဆီးခြင်း မရှိရ။ သင်၏ မြို့ရိုးကို ကယ်တင်ခြင်းဟူ၍လည်းကောင်း၊ မြို့တံခါးတို့ကို ချီးမွမ်းခြင်းဟူ၍လည်းကောင်း သမုတ်ရလိမ့်မည်။” (ဟေရှာယ ၆၀:၁၈) မည်မျှ မှန်လိုက်လေခြင်း! ငြိမ်သက်ခြင်းသည် စစ်မှန်သော ခရစ်ယာန်များ၏ ထူးခြားသော အမှတ်အသားတစ်ခု ဖြစ်သည်ဟု ဆန့်ကျင်သူများပင် ဝန်ခံသည်။ (မိက္ခာ ၄:၃) ဘုရားသခင်နှင့်လည်းကောင်း၊ ယေဟောဝါသက်သေ အချင်းချင်းတွင်လည်းကောင်းရှိသော ဤငြိမ်သက်ခြင်းက ခရစ်ယာန်များ စည်းဝေးသည့် နေရာတစ်ခုစီကို အကြမ်းဖက်လောကတွင် လန်းဆန်းမှု ပေးသော အိုအေစစ် ဖြစ်စေသည်။ (၁ ပေတရု ၂:၁၇) ယင်းမှာ မြေကြီးသားအားလုံး ‘ယေဟောဝါ၏ ဆုံးမသွန်သင်တော်မူ’ ခြင်း ခံရချိန်တွင် ရှိမည့် များပြားသော ငြိမ်သက်ခြင်းကို ကြိုတင်မြည်းစမ်းရခြင်း ဖြစ်သည်။—ဟေရှာယ ၁၁:၉; ၅၄:၁၃။

ဘုရားသခင့် မျက်နှာသာဆိုင်ရာ ဘုန်းတော်အလင်း

၂၇။ ယေဟောဝါ၏ ‘အမျိုးသမီး’ အပေါ် အဘယ် အလင်း မပြတ် ထွန်းလင်းနေသနည်း။

^၂၇ ယေရုရှလင်အပေါ် ထွန်းလင်းသော အလင်း၏ အရှိန်ကို ယေဟောဝါ ဤသို့ မိန့်တော်၏– “နောက်တစ်ဖန် နေ့အချိန်၌ သင်၏ အလင်းသည် နေပေးသော အလင်း မဟုတ်၊ ညအချိန်၌လည်း လအရောင်သည် သင့်ကို မလင်းစေရ။ အကြောင်းမူကား ထာဝရဘုရားသည် သင်၌ ထာဝရအလင်း၊ သင်၏ ဘုရားသခင်သည် သင်၏ ဘုန်းအသရေ ဖြစ်တော်မူလိမ့်မည်။ နောက်တစ်ဖန် သင်၏ နေသည် မဝင်ရ။ သင်၏ လသည်လည်း မဆုတ်ရ။ ထာဝရဘုရားသည် သင်၌ ထာဝရအလင်း ဖြစ်တော်မူ၍ စိတ်မသာ ညည်းတွားရာကာလ ကုန်လေပြီ။” (ဟေရှာယ ၆၀:၁၉၊ ၂၀) ယေဟောဝါသည် ကိုယ်တော်၏ ‘အမျိုးသမီး’ အတွက် “ထာဝရအလင်း” ဆက်ဖြစ်မည်။ ကိုယ်တော်သည် ဘယ်တော့မျှ နေကဲ့သို့ “ဝင်” ပြီး၊ လကဲ့သို့ “ဆုတ်” မည် မဟုတ်ပါ။e ကိုယ်တော်သည် ဘုရားသခင်၏ ‘အမျိုးသမီး’ ကို ကိုယ်စားပြုသော ဘိသိက်ခံ နောက်လိုက်များအပေါ် မျက်နှာသာတော် အလင်း အဆက်မပြတ် ထွန်းလင်းပေးတော်မူ၏။ သူတို့သည် လူအုပ်ကြီးနှင့်အတူ ထိန်ထိန်ညီးသည့် ထိုဝိညာဏ အလင်းတွင် ပျော်မွေ့ကြသည်၊ ထိုအလင်းကို လောက နိုင်ငံရေး သို့မဟုတ် စီးပွားရေး ဖြစ်ရပ်တို့၏ မည်သည့် အမှောင်ထုကမျှ မယုတ်လျော့စေနိုင်ပါ။ ထို့ပြင် သူတို့ရှေ့တွင် ယေဟောဝါ ထားရှိသည့် တောက်ပသော အနာဂတ်ကို ယုံကြည်စိတ်ချကြသည်။—ရောမ ၂:၇; ဗျာဒိတ် ၂၁:၃-၅။

၂၈။ (က) ပြည်တော်ပြန် ယေရုရှလင် မြို့သူမြို့သားတို့နှင့်ပတ်သက်သော အဘယ် ကတိတော် ရှိသနည်း။ (ခ) ဘိသိက်ခံ ခရစ်ယာန်များသည် ၁၉၁၉ ခုနှစ်တွင် အဘယ်အရာကို ပိုင်ဆိုင်ခဲ့ကြသနည်း။ (ဂ) ဖြောင့်မတ်သူတို့သည် ပြည်တော်ကို မည်မျှကြာကြာ အမွေခံရမည်နည်း။

^၂၈ ယေရုရှလင် မြို့သူမြို့သားများနှင့်ပတ်သက်၍ ယေဟောဝါ ဤသို့ ဆက်၍ မိန့်တော်မူ၏– “သင်၏ လူအပေါင်းတို့သည် ဖြောင့်မတ်၍ ပြည်တော်ကို အစဉ်အမြဲ [“အချိန် အကန့်အသတ်မဲ့၊” ကဘ] အမွေခံသဖြင့် ငါ၏ ဘုန်းပွင့်စေခြင်းငှာ ငါ့ကိုယ်တိုင် စိုက်၍ ပြုစုသော ပျိုးပင် ဖြစ်ရကြလိမ့်မည်။” (ဟေရှာယ ၆၀:၂၁) ဇာတိဣသရေလအမျိုး ဗာဗုလုန်မှ ပြန်လာကြချိန်တွင် သူတို့သည် ‘ပြည်တော်ကို ပြန်လည်အမွေခံ’ ခဲ့ကြသည်။ သို့သော် ဤဖြစ်ရပ်တွင် “အချိန် အကန့်အသတ်မဲ့ ဟူသည် ရောမစစ်တပ်က ယေရုရှလင်နှင့် ဂျူးနိုင်ငံကို ဖျက်ဆီးခဲ့ချိန် စီ.အီး. ပထမရာစု ရောက်ချိန်အထိ ဖြစ်ခဲ့သည်။ ၁၉၁၉ ခုနှစ်တွင် ဘိသိက်ခံ ခရစ်ယာန် အကြွင်းအကျန်သည် ဝိညာဏ သုံ့ပန်းဘဝမှ လွတ်မြောက်လာခဲ့ပြီး ဝိညာဏ ပြည်တော်ကို အမွေခံခဲ့သည်။ (ဟေရှာယ ၆၆:၈) ပြည်တော် သို့မဟုတ် လှုပ်ရှားဆောင်ရွက်မှုရှိရာ နယ်ပယ်ကို မှေးမှိန်မသွားမည့် ပရဒိသုကဲ့သို့ ဝိညာဏ ကြွယ်ဝမှုဖြင့် မှတ်သားဖော်ပြသည်။ ရှေးဣသရေလလူမျိုးနှင့် မတူဘဲ ဝိညာဏ ဣသရေလသည် လူမျိုးတစ်မျိုးအနေနှင့် ဖောက်ပြန်မည် မဟုတ်ပါ။ ထို့ပြင် ဟေရှာယ ပရောဖက်ပြုချက်သည် ရုပ်ပိုင်းအရလည်း ပြည့်စုံမည်၊ မြေကြီးသည် “များပြားသော ငြိမ်သက်ခြင်း” ရှိမည့် ပကတိ ပရဒိသု ဖြစ်လာချိန်တွင် ဖြစ်သည်။ ထိုအခါတွင် မြေကြီးမျှော်လင့်ချက် ရှိသော ဖြောင့်မတ်သူများသည် ပြည်တော်ကို အစဉ်အမြဲ အမွေခံကြမည်။—ဆာလံ ၃၇:၁၁၊ ၂၉။

၂၉၊ ၃၀။ “သူငယ်တစ်ယောက်” သည် “လူတစ်ထောင်” မည်သို့ ဖြစ်လာခဲ့သနည်း။

^၂၉ ဟေရှာယ အခန်းကြီး ၆၀ ၏ နိဂုံးပိုင်းတွင် ယေဟောဝါသည် မိမိ၏ နာမတော်ကို တိုင်တည်၍ အာမခံထားသော လေးနက်သော ကတိတော်တစ်ခုကို တွေ့ရသည်။ ကိုယ်တော် ဤသို့ မိန့်တော်မူ၏– “သူငယ်တစ်ယောက်သည် လူတစ်ထောင် ဖြစ်ရလိမ့်မည်။ အားနည်းသောသူ တစ်ယောက်သည် အားကြီးသောလူမျိုး ဖြစ်ရလိမ့်မည်။ ငါထာဝရဘုရားသည် အချိန်ရောက်လျှင် ထိုအမှုကို နှိုးဆော်မည်။” (ဟေရှာယ ၆၀:၂၂) ကွဲလွင့်နေခဲ့သော ဘိသိက်ခံများကို ၁၉၁၉ ခုနှစ်တွင် လုပ်ဆောင်မှုအတွက် ပြန်လည်စုစည်းခဲ့စဉ်က “သူငယ်တစ်ယောက်” ကဲ့သို့ ဖြစ်ခဲ့သည်။f သို့သော် ကျန်ရှိနေသေးသော ဝိညာဏ ဣသရေလသားများကို နောက်ထပ် ခေါ်ဆောင်ခံရသည်နှင့် သူတို့၏ အရေအတွက် တိုးများလာသည်။ ၎င်းနောက် လူအုပ်ကြီးကို စုသိမ်းလာသည်နှင့် အံ့ဩစရာကောင်းအောင် တိုးပွားမှု စတင်ခဲ့သည်။

^၃၀ မကြာခင်ပင် ဘုရားသခင့် လူမျိုးအလယ်တွင် ရှိသော ငြိမ်သက်ခြင်းနှင့် ဖြောင့်မတ်ခြင်းသည် စိတ်နှလုံး ရိုးဖြောင့်သူများကို မည်မျှ ဆွဲဆောင်ခဲ့သနည်းဟူမူ “သူငယ်တစ်ယောက်” မှ “အားကြီးသောလူမျိုး” အဖြစ် စာသားအတိုင်း တိုးများလာသည်။ ယခုအချိန်တွင် ကမ္ဘာ့အချုပ်အခြာနိုင်ငံ အတော်များများတွင် ရှိသော လူဦးရေထက် ပိုများနေသည်။ ယေဟောဝါသည် ယေရှုခရစ်မှတစ်ဆင့် နိုင်ငံတော်လုပ်ငန်းများကို ညွှန်ကြားခဲ့ပြီး တိုးတက်မှု မြန်စေခဲ့ကြောင်း ထင်ရှားသည်။ စစ်မှန်သော ဝတ်ပြုရေး ကမ္ဘာတစ်ဝန်းသို့ တိုးချဲ့နေမှုကို တွေ့မြင်ရပြီး ယင်းအထဲတွင် ပါဝင်ခွင့်ရခြင်းတို့သည် ပီတိဖြစ်စရာပင်! မှန်ပါသည်၊ ယင်းတိုးပွားမှုက ရှေးကြာမြင့်စွာကတည်းက ထိုသို့သော အကြောင်းများကို ပရောဖက်ပြုခဲ့သော ယေဟောဝါအား ဘုန်းထင်ရှားစေသည်ကို သိရှိရ၍ ရွှင်လန်းမှု ဖြစ်စေသည်။

[အောက်ခြေမှတ်ချက်များ]