ခရစ်တော်သေဆုံးပြီးနောက် အစောပိုင်း ခရစ်ယာန်တွေကြားမှာ လွဲမှားစွာသွန်သင်တဲ့သူတွေ ပေါ်လာပြီး ကျမ်းစာအမှန်တရားကို ဖောက်လွဲဖောက်ပြန် ပြုကြလိမ့်မယ်လို့ သမ္မာကျမ်းစာမှာ ကြိုပြောထားတယ်။ (တမန်တော် ၂၀:၂၉၊ ၃၀) အဲဒီအတိုင်းပဲ အတိအကျ ဖြစ်လာခဲ့တယ်။ သူတို့က ယေရှုရဲ့သွန်သင်ချက်တွေနဲ့ မှားယွင်းတဲ့သွန်သင်ချက်တွေကို ရောနှောပြီး ခရစ်ယာန်ဘာသာအတု ပေါ်ထွက်စေခဲ့တယ်။ (၂ တိမောသေ ၄:၃၊ ၄) ယနေ့ သမ္မာကျမ်းစာ အမှန်တကယ်သွန်သင်တာတွေကို မှန်မှန်ကန်ကန်နားလည်ထားကြောင်း ဘယ်လိုနည်းနဲ့ အသေအချာသိနိုင်မလဲ။

အမှန်တရားကို ယေဟောဝါဘုရား ဖော်ထုတ်တဲ့အချိန် ရောက်လာတယ်။ နောက်ဆုံးကာလဖြစ်တဲ့ “အဆုံးပိုင်းကာလ” အတွင်းမှာ “စစ်မှန်တဲ့အသိပညာ တိုးများလာလိမ့်မယ်” ဆိုပြီး ဘုရား ကြိုဟောထားတယ်။ (ဒံယေလ ၁၂:၄) ၁၈၇၀ ပြည့်နှစ်မှာ အမှန်တရားကိုရှာဖွေတဲ့ အုပ်စုငယ်လေးက ချာ့ချ်အယူဝါဒများစွာဟာ ကျမ်းစာနဲ့မကိုက်ညီမှန်း တွေ့ရှိလာကြတယ်။ ဒါကြောင့် သမ္မာကျမ်းစာရဲ့ မူလသွန်သင်ချက်ကို သဘောပေါက်ဖို့ လေ့လာရှာဖွေမှုတွေ စတင်လုပ်ခဲ့ကြတယ်။ သူတို့ရဲ့ကြိုးစားမှုကို ယေဟောဝါ ကောင်းချီးပေးခဲ့တယ်။

စိတ်နှလုံး ရိုးဖြောင့်တဲ့သူတွေဟာ သမ္မာကျမ်းစာကို အသေအချာ လေ့လာခဲ့ကြတယ်။ စိတ်ထက်သန်တဲ့ ကျမ်းစာကျောင်းသားတွေ (အစောပိုင်းယေဟောဝါသက်သေတွေ) သုံးခဲ့တဲ့ လေ့လာနည်းကို ကျွန်တော်တို့ အခုအချိန်ထိ သုံးနေတုန်းပါပဲ။ သူတို့က အကြောင်းအရာတစ်ခုချင်းစီကို ဆွေးနွေးသုံးသပ်ကြတယ်။ နားလည်ရခက်တဲ့ ကျမ်းပိုဒ်ကို တွေ့တဲ့အခါ အဲဒါကို ရှင်းပြဖို့ တခြားကျမ်းချက်တွေကို ရှာဖွေကြတယ်။ ကျမ်းစာရဲ့ကျန်တဲ့အပိုင်းတွေနဲ့ ကိုက်ညီမှုရှိတဲ့ ကောက်ချက် ချနိုင်ပြီဆိုရင် အဲဒါကို ရေးမှတ်ထားလိုက်တယ်။ အဲဒီလိုသမ္မာကျမ်းစာကိုယ်နှိုက်ရဲ့ ရှင်းလင်းဖော်ပြချက်ကိုသုံးပြီး ဘုရားသခင့်နာမတော်နဲ့ နိုင်ငံတော်၊ လူသားတွေနဲ့ ကမ္ဘာမြေကြီးနဲ့ပတ်သက်တဲ့ ဘုရားရဲ့ ရည်ရွယ်ချက်၊ လူသေတွေရဲ့ အခြေအနေ၊ ရှင်ပြန်ထမြောက်ခြင်းမျှော်လင့်ချက် စတဲ့ အမှန်တရားတွေကို ပြန်ဖော်ထုတ်ခဲ့ကြတယ်။ သူတို့ရဲ့ရှာဖွေလေ့လာမှုကြောင့် မှားယွင်းတဲ့ ယုံကြည်ချက်တွေ၊ ဓလေ့ထုံးစံတွေကနေ လွတ်မြောက်လာခဲ့ကြတယ်။—ယောဟန် ၈:၃၁၊ ၃၂။

၁၈၇၉ ခုနှစ်မှာ ကျမ်းစာကျောင်းသားတွေက လူအများကို အမှန်တရား ပေးသိဖို့ အချိန်တန်ပြီဆိုတာ သိရှိလာခဲ့ကြတယ်။ ဒါနဲ့ အဲဒီနှစ်ကနေစပြီး ကင်းမျှော်စင် ယေဟောဝါ၏နိုင်ငံတော်ကို ကြေညာခြင်း မဂ္ဂဇင်းကို ထုတ်ဝေခဲ့တာ ဒီနေ့ထိပါပဲ။ ဒီနေ့ သမ္မာကျမ်းစာ အမှန်တရားကို နိုင်ငံနဲ့ နယ်မြေပေါင်း ၂၄၀ မှာ ဘာသာစကားပေါင်း ၉၀၀ ကျော်နဲ့ ဖြန့်ဝေပေးနေပါတယ်။ စစ်မှန်တဲ့အသိပညာ ဒီလောက်အထိပျံ့နှံ့တာ တစ်ခါမှ မရှိခဲ့ဖူးဘူး။

• ခရစ်တော်သေဆုံးပြီးနောက် သမ္မာကျမ်းစာအမှန်တရား ဘာဖြစ်ခဲ့သလဲ။

• သမ္မာကျမ်းစာအမှန်တရား ဘယ်လိုနည်းနဲ့ ပြန်ပေါ်လာခဲ့သလဲ။

ယေဟောဝါသက်သေတွေဟာ ဆယ်စုနှစ်နဲ့ချီပြီး ကျမ်းစာဘာသာပြန်ကျမ်းအမျိုးမျိုးကို အသုံးပြုခဲ့ကြတယ်၊ ပုံနှိပ်ဖြန့်ဝေခဲ့ကြတယ်။ ဒါပေမဲ့ ဘုရားသခင့်အလိုတော်ဖြစ်တဲ့ “အမှန်တရားအကြောင်း တိကျမှန်ကန်စွာ သိ” လာအောင် လူတွေကို ကူညီပေးဖို့ ဘာသာပြန်ကျမ်းအသစ်တစ်ခု ထုတ်ဝေဖို့ လိုတယ်ဆိုတာ နောက်ပိုင်းမှာ သိမြင်ခဲ့ကြတယ်။ (၁ တိမောသေ ၂:၃၊ ၄) ဒါကြောင့် ၁၉၅၀ ပြည့်နှစ်ကနေစပြီး ခေတ်သုံးဘာသာစကားနဲ့ ရေးထားတဲ့ ကမ္ဘာသစ်ဘာသာပြန်ကျမ်းကို အပိုင်းလိုက် စတင်ထုတ်ဝေခဲ့တယ်။ ဒီဘာသာပြန်ကျမ်းကို ဘာသာစကားပေါင်း ၁၃၀ ကျော်နဲ့ တိတိကျကျ ပြန်ဆိုထားပါတယ်။

နားလည်ရလွယ်ကူတဲ့ သမ္မာကျမ်းစာ လိုအပ်တယ်။ ခေတ်ကာလ ပြောင်းလဲလာတာနဲ့အမျှ ဘာသာစကားတွေလည်း ပြောင်းလဲလာတယ်။ သမ္မာကျမ်းစာ ဘာသာပြန်ကျမ်းများစွာမှာ မရှင်းလင်းတဲ့၊ ခေတ်နောက်ကျတဲ့ အသုံးအနှုန်းတွေပါတဲ့အတွက် နားလည်ရခက်တယ်။ ဒီအပြင် ပိုတိကျတဲ့၊ မူရင်းအရေးအသားနဲ့ ပိုနီးစပ်တဲ့ ရှေးလက်ရေးစာမူတွေကို တွေ့လာတဲ့အတွက် ကျမ်းစာသုံး ဟီဘရူး၊ အာရမိတ်၊ ဂရိစကားတို့ကို ပိုနားလည်လာကြတယ်။

ဘုရားသခင့်တရားစကားတော်ကို တိတိကျကျ ပြန်ဆိုတဲ့ ဘာသာပြန်ကျမ်း လိုအပ်တယ်။ သမ္မာကျမ်းစာ ဘာသာပြန်သူတွေဟာ ဘုရားသခင့်လမ်းညွှန်ချက်နဲ့ ရေးထားတဲ့ ရေးသားချက်တွေကို ပြုပြင်ပြောင်းလဲတာမျိုးမလုပ်ဘဲ မူရင်းစာသားကို တိတိကျကျ ပြန်ဆိုသင့်တယ်။ ဒါပေမဲ့ ဘာသာပြန်ကျမ်းအများစုမှာ ယေဟောဝါဆိုတဲ့ ဘုရားသခင့်နာမည်ကို ထည့်မသုံးကြဘူး။

မူလအာဘော်ရှင်ကို ဂုဏ်တင်တဲ့ ကျမ်းစာ လိုအပ်တယ်။ (၂ ရှမွေလ ၂၃:၂) အောက်ပုံမှာ ဥပမာပြထားသလို ရှေးအကျဆုံးကျမ်းစာလက်ရေးစာမူတွေမှာ ဘုရားသခင့်နာမည် ၇,၀၀၀ ကျော် ပါဝင်ပြီး ကမ္ဘာသစ်ဘာသာပြန်ကျမ်းမှာ ဘုရားသခင့်နာမည်ကို မူလနေရာအတိုင်း ထည့်သွင်းပြန်ဆိုထားတယ်။ (ဗျာဒိတ် ၄:၁၁) နှစ်နဲ့ချီပြီး ဝီရိယရှိရှိ ရှာဖွေလေ့လာထားတာကြောင့် ဒီဘာသာပြန်ကျမ်းဟာ ဘုရားသခင့်စဉ်းစားပုံကို ရှင်းရှင်းလင်းလင်း ပေါ်လွင်စေပြီး ဖတ်ရှုရတာ နှစ်သက်ဖွယ်ကောင်းတယ်။ သင့်ဘာသာစကားနဲ့ ကမ္ဘာသစ်ဘာသာပြန်ကျမ်း မရှိရင်တောင် ယေဟောဝါဘုရားရဲ့ တရားစကားတော်ကို နေ့စဉ်ဖတ်ရှုတဲ့ အလေ့အကျင့်လုပ်ပါလို့ ကျွန်တော်တို့ တိုက်တွန်းလိုပါတယ်။—ယောရှု ၁:၈။ ဆာလံ ၁:၂၊ ၃။

• ကမ္ဘာသစ်ဘာသာပြန်ကျမ်း ထုတ်ဝေဖို့ ကျွန်တော်တို့ ဘာကြောင့် ဆုံးဖြတ်ခဲ့တာလဲ။

• ဘုရားသခင့်အလိုတော်ကိုသိချင်သူတိုင်းအတွက် ဘယ်အလေ့အကျင့်က ကောင်းသလဲ။