ပရဒိသု

အဓိပ္ပာယ်သတ်မှတ်ချက်– ဂရိခုနစ်ကျိပ်ကျမ်း၌ ဘာသာပြန်သူတို့က ဧဒင်ဥယျာဉ်အကြောင်း ဆိုရာ၌ “ပရဒိသု” (pa·raʹdei·sos) ဟူသောဝေါဟာရကိုသုံးသည်မှာ လျောက်ပတ်လှ၏။ အကြောင်းမှာ ၎င်းသည် ခြံခတ်ထားသောဥယျာဉ်ဖြစ်ဟန်တူသည်။ ကမ္ဘာဦးကျမ်းနောက်ပိုင်းမှကျမ်းချက်များ ပရဒိသုအကြောင်းဆိုသောအခါ (၁) ဧဒင်ဥယျာဉ်၊ သို့မဟုတ် (၂) ဧဒင်ဥယျာဉ်အလား ပြောင်းလဲသွားမည့်ကမ္ဘာ၊ သို့မဟုတ် (၃) မြေကြီးပေါ်ရှိဘုရားသခင့်ကျွန်များ၏ ကြီးပွားဖွံ့ ဖြိုးသည့်ဝိညာဏအခြေအနေ၊ သို့မဟုတ် (၄) ဧဒင်ကိုသတိရစေသည့်ကောင်းကင်အစီအစဉ်များကို ဆိုလိုသည်။

“ဓမ္မသစ်ကျမ်း” သည်အနာဂတ်မြေကြီးပရဒိသုအကြောင်းကိုပြောသလော။ သို့မဟုတ် “ဓမ္မဟောင်းကျမ်း” ၌သာထိုအကြောင်းကိုဆိုသလော

ကျမ်းစာကိုနှစ်ကဏ္ဍခွဲခြင်း၊ “အဟောင်း” လော၊ “အသစ်” လောဟူသည့်အချက်ပေါ်မူတည်၍ ကျမ်းစာကိုတန်ဖိုးဖြတ်ခြင်းသည် ကျမ်းစာနှင့်မညီညွတ်ပါ။ ၂ တိမောသေ ၃:၁၆၊ ၁၇ ၌ “ထိုကျမ်းစာရှိသမျှ သည် ဘုရားသခင် မှုတ်သွင်းတော်မူသောအားဖြင့်ဖြစ်၍ . . . ဩဝါဒပေးခြင်း၊ အပြစ်ကိုဖော်ပြခြင်း၊ ဖြောင့်မတ်စွာပြုပြင်ခြင်း၊ တရားကိုသွန်သင်ခြင်း ကျေးဇူးများကိုပြုတတ်၏” ဟု ဆိုထားပေသည်။ ရောမ ၁၅:၄ (သက) က “ကျမ်းစာတော်တွင် ရေးသားဖော်ပြထားသမျှသောအရာတို့သည် ငါတို့အား သွန်သင်ဆုံးမရန်အတွက်ဖြစ်၏” ဟုဆိုရာတွင် ခရစ်ယာန်အကြိုခေတ်က မှုတ်သွင်းခံကျမ်းစာများကိုရည်ညွှန်း၏။ ထို့ကြောင့် အထက်ပါမေးခွန်း၏အဖြေကိုရှာရာ၌ ကျမ်းစာတစ်အုပ်လုံးကို ခြုံငုံ၍ကြည့်ရန်လို၏။

ကမ္ဘာဦး၂:၈ က “ထာဝရအရှင် ဘုရားသခင်သည်လည်း အရှေ့မျက်နှာ၊ ဧဒင်အရပ်၌ ဥယျာဉ် [“ပရဒိသု၊” Dy; pa·raʹdei·son, LXX] ကိုစိုက်ပျိုးပြီးလျှင် ဖန်ဆင်းတော်မူသောလူ [အာဒံ] ကို ထိုဥယျာဉ်၌ နေရာချတော်မူ၏” ဟုဆို၏။ ထိုဥယျာဉ်ထဲ၌ နှစ်လိုဖွယ်အပင်နှင့်တိရစ္ဆာန် အမျိုးမျိုးရှိ၏။ ယေဟောဝါသည် ပထမမောင်နှံကိုကောင်းချီးပေး၍ “အချင်းတို့ များပြားစွာမွေးဖွားကြလော့။ မြေကြီးကိုပြည့်စေ၍ နိုင်ကြလော့။ ပင်လယ်ငါးတို့ကိုလည်းကောင်း၊ မိုးကောင်းကင်ငှက်တို့ကိုလည်းကောင်း၊ အသက်ရှင်၍ မြေပေါ်မှာလှုပ်ရှားတတ်သောတိရစ္ဆာန်အပေါင်းတို့ကိုလည်းကောင်း အုပ်စိုးကြလော့” ဟုမိန့်တော်မူ၏။ (က. ၁:၂၈) တစ်ကမ္ဘာလုံး ဘုရားသခင့်ပညတ်ကိုလေးမြတ်နာခံသူတို့နှင့်ပြည့်သော ပရဒိသုဖြစ်စေရန် တည်းဟူသော ဘုရားသခင့်မူလရည်ရွယ်ချက်သည် မဖြစ်မြောက်ဘဲမနေ။ (ဟေရှာ. ၄၅:၁၈; ၅၅:၁၀၊ ၁၁) ထို့ကြောင့် ယေရှုက “စိတ်နူးညံ့သိမ်မွေ့သောသူတို့သည် မင်္ဂလာရှိကြ၏။ အကြောင်းမူကား၊ ထိုသူတို့သည် ပြည်တော် [“မြေကြီး၊” ကဘ] ကိုအမွေခံရကြလတ္တံ့” ဟုမိန့်ဆိုခဲ့ခြင်းဖြစ်၏။ “ကောင်းကင်ဘုံ၌ရှိတော်မူသော အကျွန်ုပ်တို့အဘ၊ ကိုယ်တော်၏နာမတော်အား ရိုသေလေးမြတ်ခြင်းရှိပါစေသော။ နိုင်ငံတော်တည်ထောင်ပါစေသော။ အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာ [လည်း] ပြည့်စုံပါစေသော” ဟူ၍ဆုတောင်းရန် တပည့်တော်တို့အား သင်ကြားခဲ့ခြင်းလည်းဖြစ်သည်။ (မ. ၅:၅; ၆:၉၊ ၁၀) ယင်းအချက်နှင့်အညီ ဧဖက် ၁:၉-၁၁ က ဘုရားသခင်သည် “ကောင်းကင်ပေါ်၊ မြေကြီးပေါ်မှာ ရှိရှိသမျှ တို့ကိုပေါင်း၍ ခရစ်တော်၌ ချုပ်ခြာစေ” ရန် ရည်ရွယ်တော်မူကြောင်း ရှင်းပြ၏။ ဟေဗြဲ ၂:၅ က “နောင်ကပ်ကမ္ဘာ” အကြောင်းကိုပြော၏။ ဗျာဒိတ် ၅:၁၀ က ခရစ်တော်၏အမွေခံဖက်များအနေနှင့် ‘ကမ္ဘာကို အုပ်စိုး’ ရမည့်ပုဂ္ဂိုလ်များအကြောင်း တင်ပြ၏။ ဗျာဒိတ် ၂၁:၁-၅ နှင့် ၂၂:၁၊ ၂ ကလည်း “မြေကြီးသစ်” ၏အခြေအနေကို လှပစွာ ထပ်မံသီကုံးပေသည်။ ၎င်းသည် အသက်ပင်ရှိသော ဧဒင်မှမူလပရဒိသုကိုပြန်လည်သတိရစေသည်။​—က. ၂:၉။

ထို့ပြင် အနာဂတ်ပရဒိသုအကြောင်း ယေရှုဆိုရာ၌ ဂရိအသုံးအနှုန်း pa·raʹdei·sos ကိုသုံးတော်မူ၏။ “[မိမိနှင့်အတူ နှက်တိုင်ပေါ်ဆွဲခံရသူ၊ ဘုရင့်အာဏာဖြင့် မိမိကြွလာခြင်းကိုယုံကြည်သောလူဆိုးအား] ယေရှုက ‘သင့်အားယနေ့ ငါအမှန်ဆို၏။ သင်သည် ငါနှင့်အတူ ပရဒိသု၌ ရှိလိမ့်မည်’ ဟု မိန့်တော်မူ၏။”​—လု. ၂၃:၄၃၊ ကဘ။

လုကာ ၂၃:၄၃ ၌ လူဆိုးအား ယေရှုမိန့်ကြားသောစကားပါ ပရဒိသုသည် ဘာကိုဆိုလိုကြောင်း မည်သို့တပ်အပ်သိနိုင်သနည်း

၎င်းသည် ‘သေလွန်သော ဖြောင့်မတ်သူများ’ အတွက် ယာယီတည်းခိုရာ ဟေးဒီးစ်၏တစ်ဌာနဖြစ်သလော

ဤအယူ၏ဇာစ်မြစ်ကား အဘယ်နည်း။ နိုင်ငံတကာ ဓမ္မသစ်ဓမ္မပညာအဘိဓာန်သစ် က ဤသို့ဆို၏– “ဂရိတို့၏မသေစိုးလ်အယူဝါဒ စိမ့်ဝင်လာသည်နှင့်အမျှ ပရဒိသုလည်း စပ်ကူးမပ်ကူးအခြေအနေရှိ ဖြောင့်မတ်သူတို့၏နေရာဖြစ်လာသည်။” (ဂရန်း ရက်ပစ်စ်မြို့၊ မစ်ရှဂင်ပြည်နယ်၊ ကောလင်းဘရောင်း တည်းဖြတ်သည်။ အတွဲ ၂၊ စ. ၇၆၁) ကျမ်းစာနှင့်မညီသောထိုအယူသည် ယေရှုကမ္ဘာပေါ်ရှိစဉ်အခါ ဂျူးတို့ဘောင်တွင် နှံ့ပြားနေသလော။ ဟေးစ်တင်းစ်၏ သမ္မာကျမ်းစာအဘိဓာန် က သံသယဖြစ်စရာရှိကြောင်းတင်ပြ၏။ (အက်ဒင်ဘာရာမြို့၊ ၁၉၀၅)၊ အတွဲ ၃၊ စစ. ၆၆၉၊ ၆၇၀။

ပထမရာစုတွင် ဂျူးတို့ဘောင်၌ ၎င်းအယူပျံ့နှံ့သည်ပဲထား ယေရှုအနေနှင့် နောင်တရသူထိုလူဆိုးအား ကတိပေးတော်မူခြင်းဖြင့် ထိုအယူကိုထောက်ခံခဲ့မည်လော။ ဂျူးဖာရိရှဲနှင့်ကျမ်းတတ်တို့သည် ဘုရားသခင့်နှုတ်ကပါဌ်တော်နှင့်ဆန့်ကျင်သောရိုးရာများကို လူတို့အားပို့ချသင်ကြားသည့်အတွက် ယေရှု သူတို့ကို ပြင်းထန်စွာပြစ်တင်တော်မူခဲ့ပါသည်။​—မ. ၁၅:၃-၉; အဓိကခေါင်းစဉ် “စိုးလ်” ကိုပါရှု။

တမန်တော် ၂:၃၀၊ ၃၁ အရ ယေရှုသေသောအခါ ဟေးဒီးစ်သို့ရောက်ခဲ့သည်မှန်၏။ (တမန်တော်ပေတရု ဆာလံ ၁၆:၁၀ ကိုညွှန်းဆိုစဉ် ဟေးဒီးစ်ကို ရှီးအိုးလ်၏ထပ်တူအနက်အဖြစ် သုံး၏။) သို့ရာတွင် ရှီးအိုးလ်/ဟေးဒီးစ် သို့မဟုတ် ၎င်း၏အစိတ်အပိုင်းတစ်ခုသည် လူကိုပျော်ရွှင်စေသော ပရဒိသုဖြစ်သည်ဟု ကျမ်းစာမည်သည့်နေရာ၌မျှ မဆိုပါ။ သို့အစား၊ ဒေသနာ ၉:၅၊ ၁၀ က၊ ထိုနေရာသို့ရောက်သောသူတို့သည် “အဘယ်အရာကိုမျှမသိ” ဟုဆို၏။

လုကာ ၂၃:၄၃ ပါ ပရဒိသုသည် ကောင်းကင် သို့မဟုတ် ကောင်းကင်၏တစ်စိတ်တစ်ဒေသဖြစ်သလော

ယေရှု ထိုလူဆိုးနှင့်စကားပြောသောနေ့၌ သူတို့နှစ်ဦး ကောင်းကင်သို့သွားသည် ဟူသောအယူသည် ကျမ်းစာနှင့်မညီညွတ်ချေ။ မိမိအသတ်ခံရပြီး သုံးရက်မြောက်မတိုင်မီ ထမြောက်မည်မဟုတ်ဟု ယေရှုတင်ကူးမိန့်ဆိုခဲ့သည်။ (လု. ၉:၂၂) ထိုသုံးရက်အတွင်း ကောင်းကင်၌ရှိတော်မမူ။ အကြောင်းမှာ ထမြောက်တော်မူသည့်နောက် မာဂဒလမာရိအား “ငါသည် ငါ့ခမည်းတော်ထံသို့ မတက်ရသေး” ဟု မိန့်ဆို၏။ (ယော. ၂၀:၁၇) ထမြောက်၍ ရက် ၄၀ ကြာသည့်နောက်မှသာ မြေပေါ်မှချီပင့်ခြင်းခံရပြီး ကောင်းကင်သို့တက်ကြွပျောက်ကွယ်သွားတော်မူသည်ကို တပည့်တော်တို့ တွေ့ရခြင်းဖြစ်၏။​—တ. ၁:၃၊ ၆-၁၁။

ထိုလူဆိုးသည် ထိုနေ့၌မဆိုထားဘိ၊ နောင်တစ်နေ့နေ့၌ပင် ကောင်းကင်သွားရန်အရည်အချင်းမရှိ။ သူသည် “ဒုတိယမွေးခြင်း”​—ရေနှစ်ခြင်းဖြစ်စေ၊ ဘုရားသခင့်ဝိညာဉ်တော်ဖြင့်မွေးခြင်းဖြစ်စေ၊ မခံခဲ့ချေ။ သူသေ၍ရက် ၅၀ လွန်မှသာ ယေရှုတပည့်များပေါ် သန့်ရှင်းသောဝိညာဉ်တော် သွန်းလောင်းတော်မူသည်။ (ယော. ၃:၃၊ ၅; တ. ၂:၁-၄) ယေရှုသည် အသေခံတော်မူမည့်နေ့၌ ‘မိမိနှင့်အတူ အေးအတူပူအမျှ စုံစမ်းခြင်းခံခဲ့ကြသူတို့’ နှင့် ကောင်းကင်နိုင်ငံဆိုင်ရာပဋိညာဉ်တစ်ရပ်ကို ဖွဲ့တော်မူသည်။ ထိုလူဆိုးသည် ဤသို့သောသစ္စာစောင့်ခြင်းနာမည်ကောင်းမရှိ၊ ပါလည်းမပါဝင်ခဲ့။​—လု. ၂၂:၂၈-၃၀။

အဘယ်အချက်က ဤပရဒိသုသည် မြေကြီးဆိုင်ရာဖြစ်ကြောင်းပြသနည်း

ဟေဗြဲကျမ်းစာက သစ္စာရှိဂျူးတို့အား ကောင်းကင်အသက်တာဆုရဖို့ ဘယ်အခါကမျှ မျှော်လင့်ချက်မပေးချေ။ ဤကမ္ဘာပေါ်ပြန်လည်တည်ထောင်လာမည့် ပရဒိသုကိုပြန်ညွှန်သည်။ ဒံယေလ ၇:၁၃၊ ၁၄ က မေရှိယသည် “နိုင်ငံနှင့်တကွ အာဏာစက်တန်ခိုး” အပ်နှင်းတော်မူခြင်းခံရသောအခါ “အရပ်ရပ်တို့၌နေ၍ အသီးသီးအခြားခြားသော ဘာသာစကားကိုပြောသော လူမျိုးတကာတို့” ကို အုပ်စိုးရလိမ့်မည်ဟု ကြိုပြောထားသည်။ ထိုအခါ၊ ၎င်းအုပ်ချုပ်ခံနိုင်ငံသားတို့သည် ကမ္ဘာပေါ်၌ရှိကြမည်။ ထိုလူဆိုးက ထိုသမယ၌ ယေရှုသူ့ကိုအောက်မေ့မည် ဟူသောမျှော်လင့်ချက်ဖြင့် လျှောက်ဆိုခဲ့ခြင်းဖြစ်သည်မှာထင်ရှား၏။

သို့ဖြစ်လျှင် ယေရှုသည် မည်သည့်နည်းဖြင့် ထိုလူဆိုးနှင့်အတူ ရှိနိုင်မည်နည်း။ သူ့အား သေရာမှထမြောက်စေ၍ ကာယဆိုင်ရာလိုအပ်ရာများကို ဖြည့်ဆည်းလျက် ထာဝရအသက်ရရန် ယေဟောဝါချမှတ်တော်မူသောစည်းမျဉ်းများကို သိရှိလိုက်နာနိုင်ခွင့် ပေးတော်မူခြင်းအားဖြင့်တည်း။ (ယော. ၅:၂၈၊ ၂၉) ယေရှုသည် ထိုလူဆိုး၌ နောင်တနှင့်လေးစားခြင်းသဘောရှိသည်ကိုထောက်၍ မြေကြီးအသက်တာသို့ထမြောက်လာမည့် ကုဋေပေါင်းများစွာသောလူတို့တွင် ပါဝင်စေတော်မူ၏။ ထိုသူတို့သည် ပရဒိသု၌ ထာဝစဉ်အသက်ရှင်ထိုက်မထိုက် သက်သေပြနိုင်သောအခွင့်အရေး ရကြလိမ့်မည်။

ထိုလူဆိုးသည် အဘယ်အခါ၌ ပရဒိသုတွင်ရှိမည်နည်း

စာရှုသူတို့သည် ဘာသာပြန်သူ၏ဝါကျဖြတ်တောက်ပုံပေါ်မူတည်၍ လုကာ ၂၃:၄၃ ကို တစ်ယောက်တစ်မျိုး နားလည်ကြသည်။ မူရင်းဂရိကျမ်းမူများ၌ ဝါကျအဖြတ်အတောက်သင်္ကေတမရှိ။ အမေရိကန်စွယ်စုံကျမ်း (၁၉၅၆၊ အတွဲ ၂၃၊ စ. ၁၆) က ဤသို့ဆို၏– “ရှေးစာမူများနှင့် ဂရိကမ္ပည်းတို့၌ ဝါကျဖြတ်တောက်ခြင်းပြုဟန်မရှိ။” စီ.အီး. ၉ ရာစုရောက်မှ ဝါကျဖြတ်တောက်မှုပြုကြသည်။ လုကာ ၂၃:၄၃ ကို “Truly, I say to you, today you will be with me in Paradise” (RS) (“ငါအမှန်ဆိုသည်ကား၊ ယနေ့တွင် သင်သည် ငါနှင့်အတူ ပရဒိသုဘုံ၌ရှိလိမ့်မည်”) ဟုပြန်ဆိုသင့်သလော။ သို့တည်းမဟုတ်၊ ‘Truly I say to you today, You will be with me in Paradise’ (ကဘ) (‘သင့်အား ယနေ့ ငါအမှန်ဆို၏။ သင်သည် ငါနှင့်အတူ ပရဒိသု၌ ရှိလိမ့်မည်’) ဟုပြန်ဆိုသင့်သလော။ အဆုံးအဖြတ်ပေးမည့်အချက်မှာ ခရစ်တော်၏သွန်သင်ချက်နှင့် ကျန်ကျမ်းစာများဖြစ်သင့်သည်။ ထိုစကားကိုယေရှုမိန့် ကြား၍ ရာစုနှစ်များစွာကုန်လွန်သည့်နောက်မှ ကျမ်းချက်ထဲသို့ ကော်မာ (,) တစ်ခု ထည့်သွင်းသည်ဖြစ်ရာ ၎င်းကော်မာဖြင့် မဆုံးဖြတ်သင့်။

ဂျေ.ဘီ.ရော်သဟမ်ပြန်ဆိုသော The Emphasised Bible က ကမ္ဘာသစ်ဘာသာပြန်ကျမ်းပါ ပုဒ်ဖြတ်နည်းကိုသဘောတူ၏။ ဂျာမန်ကျမ်းစာဘာသာပြန်သူ L. Reinhardt က လုကာ ၂၃:၄၃ ဆိုင်ရာ အောက်ခြေမှတ်ချက်၌ ဤသို့ဆို၏ “ဤကျမ်းချက်၌ ယခု [ဘာသာပြန်သူအများထု] သုံးသော ပုဒ်ဖြတ်ပုံသည် မှားယွင်းပြီး၊ ခရစ်တော်နှင့်ထိုလူဆိုးတို့၏တွေးဆပုံတစ်ရပ်လုံးနှင့် ဆန့်ကျင်နေသည်မှာ သံသယမရှိ။ . . . ပရဒိသုသည် လူသေတို့ရှိရာနယ်ပယ်၏တစ်စိတ်တစ်နေရာဖြစ်သည်ဟု ခရစ်တော်သဘောပေါက်သည်မဟုတ်၊ မြေကြီးပေါ် ပရဒိသုတစ်ခု ပြန်ပေါ်လာမည်ဟုသာ သဘောပေါက်တော်မူကြောင်း ထင်ရှားပါသည်။”

ယေရှုသည် အဘယ်အချိန်၌ ‘မိမိနိုင်ငံတော်သို့ဝင်’ ၍ မြေကြီးကိုပရဒိသုဖြစ်စေရန်ဟူသော မိမိခမည်းတော်၏ရည်ရွယ်ချက်ကို ဖြစ်မြောက်စေမည်နည်း။ လုကာ ၂၃:၄၂၊ ၄၃ ပါစကား ရေးသား၍ ၆၃ နှစ်ကုန်လွန်သည့်နောက်၌ရေးသားသော ဗျာဒိတ်ကျမ်းက အနာဂတ်တွင်ဖြစ်မည်ကိုပြ၏။ (“သက္ကရာဇ်နေ့စွဲများ” ခေါင်းစဉ်အောက် စာမျက်နှာ ၃၃၇-၃၄၀ နှင့် “နောက်ဆုံးကာလ” ခေါင်းစဉ် တို့ကိုရှု။)