သမ္မာကျမ်းစာကို ပြုပြင်ပြောင်းလဲ ခဲ့သလား

မပြောင်းလဲခဲ့ပါဘူး။ နှစ်ထောင်ချီအချိန်အတွင်း သမ္မာကျမ်းစာကို ပျက်စီးလွယ်တဲ့ ပစ္စည်းတွေသုံးပြီး အဆင့်ဆင့် ကူးရေးခဲ့ကြပေမဲ့ ရှေးလက်ရေးစာမူတွေနဲ့ နှိုင်းယှဉ်ကြည့်တဲ့အခါ အခြေခံအမှန်တရားက အတူတူပါပဲ။

ဒီလိုဆိုရင် မှားပြီး ကူးရေးမိတာမျိုးတွေ မရှိခဲ့ဘူးလား

ရှေးကျမ်းစာ လက်ရေးစာမူ ထောင်နဲ့ချီကို ရှာဖွေတွေ့ရှိခဲ့ပြီ။ အဲဒီထဲက တချို့ မတူတာတွေ ပါတဲ့အတွက် ကူးရေးတဲ့အခါ အမှားအယွင်းရှိခဲ့မှန်း သိရတယ်။ ဒါပေမဲ့ စာသားအဓိပ္ပာယ်ကို ပြောင်းလဲသွားစေတဲ့ အမှားမျိုး သိပ်မရှိပါဘူး။ တွေ့ရှိခဲ့တဲ့ အကြီးအကျယ် ကွဲလွဲချက်တွေကတော့ ကျမ်းစာသတင်းတရားကို ပြောင်းလဲပစ်ချင်သူတချို့က တမင်တကာ ရေးသားထည့်သွင်းထားတဲ့ စာသားတွေဖြစ်တယ်။ ဥပမာနှစ်ခုကို ကြည့်ရအောင်-

1. ၁။ ၁ ယောဟန် ၅:၇ ကို ရှေးခေတ် ကျမ်းစာဘာသာပြန်ကျမ်း တချို့က “ကောင်းကင်ဘုံ၌ ခမည်းတော်တစ်ပါး၊ နှုတ်ကပါဌ်တော်တစ်ပါး၊ သန့်ရှင်းသောဝိညာဉ်တော်တစ်ပါး၊ သက်သေခံသုံးပါးရှိ၍ ထိုသုံးပါးတို့သည် တစ်လုံးတစ်ဝတည်းဖြစ်တော်မူ၏” လို့ရေးထားတယ်။ ဒါပေမဲ့ မူရင်းစာသားမှာ ဒီစကားတွေမပါတာကို ယုံကြည်စိတ်ချရတဲ့ လက်ရေးစာမူတွေက ဖော်ပြတယ်။ နောက်ပိုင်းမှ ထပ်ဖြည့်သွင်းထားတဲ့ စကားတွေဖြစ်မှန်း ထင်ရှားတယ်။a ဒါကြောင့် ယုံကြည်စိတ်ချရတဲ့ ခေတ်သစ် ဘာသာပြန်ကျမ်းစာတွေမှာ အဲဒီစကားတွေ မပါတော့ဘူး။

2. ၂။ ဘုရားသခင့်နာမတော်ဟာ သမ္မာကျမ်းစာ ရှေးလက်ရေးစာမူတွေမှာ အကြိမ်ပေါင်း ထောင်နဲ့ချီ ပါတယ်။ ဒါတောင်မှ ဘာသာပြန်ကျမ်း အတော်များများက ဘုရားသခင့်နာမည်အစား “ထာဝရဘုရား၊” “ဘုရားသခင်” ဆိုပြီး အစားထိုးထားတယ်။

နောက်ထပ် အမှားတွေ မရှိဘူးဆိုတာ ဘယ်လိုပြောနိုင်သလဲ

အခု လက်ရေးစာမူ အတော်များများ တွေ့ရှိထားပြီဖြစ်လို့ အမှားတွေ ရှိမရှိ ရှာဖို့ ပိုလွယ်ကူသွားပြီ။b အခုသုံးနေတဲ့ သမ္မာကျမ်းစာနဲ့ ဒီလက်ရေးစာမူတွေကို နှိုင်းယှဉ်ဖတ်ကြည့်တဲ့အခါ ကျမ်းစာရဲ့ တိကျမှန်ကန်မှုနဲ့ပတ်သက်ပြီး ဘာတွေ့ရသလဲ။

• ဟေဗြဲကျမ်းစောင် (လူအများအခေါ် “ဓမ္မဟောင်းကျမ်း”) နဲ့ပတ်သက်ပြီး ကျမ်းပညာရှင် ဝီလျံ ဟင်နရီ ဂရင်းက အခုလိုပြောတယ်– “သမ္မာကျမ်းစာလိုမျိုး တိတိကျကျ ကူးရေးထားတဲ့ တခြားရှေးဟောင်းစာပေ လုံးဝမရှိဘူးလို့ ကျိန်းသေပြောရဲတယ်။”

• ခရစ်ယာန်ဂရိကျမ်းစောင်တွေ ဒါမှမဟုတ် “ဓမ္မသစ်ကျမ်း” နဲ့ပတ်သက်ပြီး ကျမ်းပညာရှင် အက်ဖ်. အက်ဖ်. ဘရူးစ်က ဒီလိုရေးခဲ့တယ်– “ဓမ္မသစ်ကျမ်းအတွက် သက်သေအထောက်အထားသည် ဂရိ၊ ရောမစာရေးဆရာများ၏ စာပေများထက် ပို၍တိကျခိုင်မာမှုရှိသည်။ သို့တိုင် ဂရိ၊ ရောမစာပေများ၏ တိကျမှန်ကန်မှုကိုမူ မည်သူမျှ စောဒကမတက်ကြချေ။”

• ကျမ်းစာ လက်ရေးစာမူတွေကို တတ်ကျွမ်းတဲ့ အထင်ကရပညာရှင် ဆာ ဖရက်ဒရစ် ကင်ညွန်က “ကျမ်းစာ တစ်အုပ်လုံးကို လက်ထဲကိုင်ပြီး ဒါဟာ ရာစုနှစ်တွေတစ်လျှောက် လူမျိုးဆက် တစ်ဆက်ပြီးတစ်ဆက် အဓိကအချက် ပျောက်ဆုံးခြင်းမရှိ လက်ဆင့်ကမ်းခဲ့တဲ့ ဘုရားသခင်ရဲ့ စစ်မှန်တဲ့စကားပဲလို့ မည်သူမဆို ရဲရဲပြောနိုင်တယ်” လို့ဆိုတယ်။

သမ္မာကျမ်းစာရဲ့ တိကျမှန်ကန်မှုကို စိတ်ချနိုင်တဲ့ တခြား ဘယ်အကြောင်းတွေ ရှိသေးသလဲ

• ဘုရားသခင့်လူမျိုး လုပ်ခဲ့တဲ့ ကြီးလေးတဲ့အပြစ်တွေအကြောင်းကို ဂျူးနဲ့ ခရစ်ယာန် ကျမ်းကူးရေးသူတွေက အမှန်အတိုင်း တိတိကျကျ ကူးရေးခဲ့တယ်။c (တောလည်ရာ ၂၀:၁၂။ ၂ ဓမ္မရာဇဝင် ၁၁:​၂-၄။ ဂလာတိ ၂:​၁၁-၁၄) အဲဒီလိုပဲ၊ ဂျူးလူမျိုးတွေ နာခံမှုမရှိခဲ့တာကို ရှုတ်ချတဲ့၊ လူ့အယူဝါဒတွေကို ဖော်ထုတ်တဲ့ ကျမ်းပိုဒ်တွေကိုလည်း အမှန်အတိုင်း ကူးရေးခဲ့တယ်။ (ဟောရှေ ၄:၂။ မာလခိ ၂:​၈၊ ၉။ မဿဲ ၂၃:​၈၊ ၉။ ၁ ယောဟန် ၅:၂၁) ဒီမှတ်တမ်းတွေကို တိတိကျကျ ကူးရေးခဲ့ကြတာကိုကြည့်ရင် ကျမ်းကူးရေးသူတွေဟာ ယုံကြည်စိတ်ချနိုင်သူတွေ၊ ဘုရားသခင့် မြင့်မြတ်တဲ့စကားတွေကို လေးမြတ်သူတွေ ဖြစ်တယ်ဆိုတာ ပေါ်လွင်တယ်။

• အစကတည်းက၊ သမ္မာကျမ်းစာကို စွမ်းအားတော်တန်ခိုးနဲ့ ရေးစေခဲ့တဲ့ ဘုရားသခင်ဟာ သမ္မာကျမ်းစာရဲ့ တိကျမှန်ကန်မှုကို ဆက်ထိန်းသိမ်းပေးမယ် မဟုတ်လား။d (ဟေရှာယ ၄၀:၈။ ၁ ပေတရု ၁:​၂၄၊ ၂၅) ဘုရားသခင်က ရှေးခေတ်ကလူတွေကိုသာမက အခုအချိန်မှာရှိတဲ့ ကျွန်တော်တို့ကိုလည်း ကျမ်းစာကနေ အကျိုးခံစား စေချင်တယ်။ (၁ ကောရိန္သု ၁၀:၁၁) “ကျမ်းစာမှာ ကြိုတင်ရေးထားသမျှဟာ ကျွန်တော်တို့ကို သွန်သင်ဆုံးမဖို့ ဖြစ်တယ်။ ကျမ်းစာက ကျွန်တော်တို့ကို ခံနိုင်ရည်နဲ့ နှစ်သိမ့်မှုပေးတဲ့အတွက် မျှော်လင့်ချက်ရှိစေတယ်။”​—ရောမ ၁၅:၄။

• ယေရှုနဲ့ သူ့တပည့်တွေဟာ ကူးရေးထားတဲ့ ဟေဗြဲကျမ်း လက်ရေးစာမူတွေကို ယုံကြည်စိတ်ချစွာနဲ့ ကိုးကားခဲ့ကြတယ်။​—လုကာ ၄:​၁၆-၂၁။ တမန်တော် ၁၇:​၁-၃။